Post: #1
Title: محبوبــــي العزيــز..... يا الرايــق و شـاخـــر
Author: سجيمان
Date: 04-30-2003, 04:37 AM
انا من النوع لو جنبي زول بيشخر..... ما بقدر انوم.......واقعد اتململ.... و... اتقلب في العنقريب الليل كلو.....مرة احنحن....ومرة اشيل كوز الموية اجدعو هنااااااااك كان الزول دا يصحا...ويديني خمسة دقائق اخت فيهن راسي....
لكن......... مرة بايت مع زول بيشخر شخير عينة...... وانا قلت يا جماعة مفروض اوظف الشخير دا لمصلحتي.....و لازم ازيل الحاجز النفسي البيني وبين الشخير....ولابد ان يكون للشخير وجه مشرق... زيو زي أي حاجة تانية.... ولازم انا اخت يدي على ذلك الجانب.....رقدت علي صفحتي وقابلت الزول..دا...وختيت ايدي فوق جضمي وكوعت....وقعدت اتأمل فيهو و هو يشخر...... سيداتي... انساتي........ سادتي...... اكتشفت لكم انو الشخير دا فن....وفن راقي جدا.....عاوز انسان مرهف وحساس وصاحب اذن موسيقية عشان يستوعبو...لقيت انو الشخير عبارة عن قطع موسيقية.... تستعمل فيها كل الالات الموسيقية وترية.....نحاسية...ونفخية.... كما انو فيهو كل السلالم الموسيقية المعروفة والغير معروفة.........ولقيت انو الزول الشخيّر دا موسيقار من الدرجة الأولى... بيتهوفن شنو؟ وموزارت شنو؟ وابو اللمين شنو؟ وموصلي شنو؟.......ووصلت لعلاقة رياضية موسيقية بين الموسيقار العالمي باخ.... والشخير.... وهو انو الشاخر.... كثيرا ما يستعمل..... نغمة... بااااااااااااااااااااخ......باااااااااااااااخ........باخخخخ......وهي غالبا ما تكون النغمة الاصلية في سمفونية.... الشخير.....ودا خلاني اقطع الشك باليقين... انو... اسم باخ.... جايي من نغمة باخخخخخخ........ باااااخ...... دي
عزيزي الزوج.... عزيزتي الزوجة.... لا تحزن لو كان شريك حياتك .... شخيّر... وما تتضايق...
واحمد الله على تلك النعمة التي وهبها الله لك.....وجعل شريكك...يشخر ويصدح ويغرد.... وانت راقد جنبو....وتتأمل نجوم السماء والقمر المضئ.. وتسترجع ليالي حبكم الاولى...فقط... حاول ان تستمتع.....ويا سلام لو كان شريكك عندو جيوب انفيه....استمتع وترنم مع الشخير.... حاول تستنبط.... أي غنية من الشخير... وردد في سرك الاغنية.. و يا حبذا لو كانت اغنية حبيبي اشخر لي وانا اشخر ليك... بدون ما تحس حتلاقي نفسك رحت في نوم عميق...مريح راحة ما بعدها راحة....
وتاني ما حتقدر تنوم الا هو يشخر ليك.....وحتقعد طول النهار تردد في:-
محبوبي العزيز..... يا الرايق وشاخر
بحلف بحياتك..... وبشخيرك... بفاخر
نصيحة لوجه الله
لو كنت ما اتزوجت لسه...... اظفر بذات الجيوب الانفية... تربت يداك.
|
Post: #2
Title: Re: محبوبــــي العزيــز..... يا الرايــق و شـاخـــر
Author: benyya
Date: 04-30-2003, 10:18 PM
Parent: #1
السلام عليكم
سيجمان داير تسجمنا مالك...
شخير شنو و موسيقي شنو
والله صوت الضفادع ارحم لي
لي قدام يا زول
|
Post: #6
Title: Re: محبوبــــي العزيــز..... يا الرايــق و شـاخـــر
Author: سجيمان
Date: 05-01-2003, 03:53 PM
Parent: #2
بنية........ نضمك دا يدل على ان اذنك غير موسيقية......وعندك تخلف في الاحساس الموسيقي السابع
|
Post: #3
Title: Re: محبوبــــي العزيــز..... يا الرايــق و شـاخـــر
Author: جدو
Date: 05-01-2003, 00:02 AM
Parent: #1
الرائع سجيمان
مازلت تمارس هوايتك المحببة في ادهاشنا بابداعات هذا الخيال المنطلق من كل قيود والذي ينم عن شفافية عالية تخالطها في انسجام باهر سخرية محببة ...
لك التحيةوالتقدير
بالمناسبة وقبل ما امشي حبيت اقول انه الشخير عملية فسيولوجية فريدة
من نوعها ...اعني انك لا تستطيع ان تستمتع بمراى نفسك وانت تمارس هذه العملية الجميلة ..لذلك لابد من شاهد عيان (عدل) يروي لك القصة
او تلجأ الي تقنية التصوير المتطورة لتنعم بمشاهدة نفسك ...
جدو
|
Post: #4
Title: Re: محبوبــــي العزيــز..... يا الرايــق و شـاخـــر
Author: Abdel Aati
Date: 05-01-2003, 07:40 AM
Parent: #3
سجيمان يا فنان
انت اتاكدت من نفسك بتشخر ولا لا ؟
انا بشخر لمن اكون تعبان شديد
او شارب لي كبة زمان
حماكم الله
عادل
|
Post: #8
Title: Re: محبوبــــي العزيــز..... يا الرايــق و شـاخـــر
Author: سجيمان
Date: 05-01-2003, 03:57 PM
Parent: #4
مرة يا عادل المرا قالت لي انت بتشخر.... زعلت منها وحاربتها ليك تلاتة يوم...... حسي لي عشرة سنوات ما جابت سيرة الشخير في خشمها
|
Post: #7
Title: Re: محبوبــــي العزيــز..... يا الرايــق و شـاخـــر
Author: سجيمان
Date: 05-01-2003, 03:55 PM
Parent: #3
تعرف يا جدو..... في ناس طبعا عنهم موهبة الحركات الصاحبة لموسيقى الشخير....وديل قلة يجود بها الزمان
|
Post: #5
Title: Re: محبوبــــي العزيــز..... يا الرايــق و شـاخـــر
Author: almulaomar
Date: 05-01-2003, 11:50 AM
Parent: #1
ما أروعك حتى وأنت بتشخر وراجعين على قول دريد لحام وبالضرورة رجوعي على مسئوليتك.
لكي ودي وتقديري
|
|