السادة الموهومين بأكذوبة الديموقراطية والمتاجرين بالقضية ... تعالوا لي جاي

الحرية هي أن تفعل كل ما تريد بغير قيد أو شرط، وهذا ما يحلم به كل من يقول ديموقراطية البورد ... كدي النسألكم سؤال انتو الديموقراطية دي عارفنها هي شنو في الأول ؟ ولا كلام سمعتوهو في الجرايد وكل واحد رسمو حسب مقدرتو على الرسم ؟

لا أحد يحجر على حرية أحد، ولكن حرية كل فرد تتوقف عند حدود حرية الفرد الآخر، بمعنى أن أي سيد في هذا البورد له الحق أن يبرطع كما يريد بشرط أن يبرطع بعيداً عن حيشان الناس، بمعنى تاني لأي شخص الحق أن يقول ما يشاء دون أن يسيء أو يتعدى على حرية شخص آخر.

إذا كنتم تعتقدون أن الألفاظ غير السوية مثل دلوكة وما شابه هي حرية وهي ديموقراطية فهذه للأسف يا سادة يا كرام عبارة عن كمونية وليست ديموقراطية، وأرجو من كل الحالمين بهذه الديموقراطية ان يعوا ويفرقوا جيداً بين الديموقراطية والفوضى.

لا أقبل أن ينعتني أحد بمثل هذا اللفظ، وقد حدث، أريد حلاً، ولا أريد أن يقول لي أحدكم فليعتذر لك من فعل، لأن الاعتذار ليس بعقوبة، هذا الشخص أساء إلي وأريد أن أحصل على حقي ؟ هل من الممكن أن يشرح لي أحدكم طريقة عملية للحصول على حقي منه ؟

كل من رفض مبدأ الطرد أقول له، هو العقوبة الوحيدة الموجودة حالياً ليس لدينا سجون ولا غرامات ولا مقاصل، العقوبة الوحيدة هي الطرد من البورد وابعاد سواقط القول عن الوصول إلى مسامع ومناظر الناس.

فإن كان أحدكم يعلم طريقة أخرى لتعويضي عن الأذى المعنوي الذي تسبب به هذا الدكين فليتكلم وليقل خيراً او ليصمت.

وبعد هذا كله، أنا قلتها مراراً أنا متنازل لهذا الدكين عن كل حق ولا أريد منه سوى أن يختاني ويزح أوساخه دي بعيد مني بس لا أكتر ولا أقل، لا أريده أن يطرد من البورد ولا أريد منه اعتذاراً فليبتعد عني وكفى، هو والطالع في الكفر الجديد دا (محمد) عليكم الله شوفوا ليكم شغلة تانية غيري.



.

الاخ شاموق
للاسف مررت ببعض البوستات الفيها الموضوع دا ولقيت العجب.. علي العموم زي ما قلت انت مافي طريقة تاخد بيها حقك الا انو يختاك .. واتمني هذا حتي تعود الينا كتاباتك الرائعة.. ختاما انا بعتذر ليك (موش نيابة عن زول)بس عشان عيني وقعت علي كلام زي دا عنك.. وحقيقة المبعرفك بجهلك..

فوق كل بوردابى بوردابى عليم...وتعالوا جاى دى..تنبىء عن..افلاطون ينادى تلاميذه..أن اصطفوا أمامى
يا ود شاموق
تعريف الديمقراطية والحرية لايتم بهذه السهولة خلف شاشات الكومبيوتر...جميعنا على دراية بأنه لايمكن تطبيقها هنا فى بورد سايبرى الأفق..لذلك نادينا وننادى بتكرار ممل لجعل الود باقيا..طالما ان اختلافات الرأى قد أفسدت قضايا الود...وعبر تاريخ هذا البورد شبت حرائق هائلة متشابهة فى المضمون مختلفة فى الأسماء..ولكن ظل حلها رهين المطالبة بطرد هذا العضو أو ذاك دون غوص فى جذور تلك القضايا...وتكرر الحديث عن سماحة سودانية عشائرية مجاملة...مثلما ترددت عبارة عفا الله عما سلف...ولكن ما أراه مشكلة هو تنصيب شخص لنفسه قيما على الآخرين
تحياتى
ودعزة

والله يا ود عزة ممكن تقرأ الآية كاملة

أنا وجهت الدعوة للسادة الموهومين بالديموقراطية والمتاجرين بالقضية

وديل أنا القلتا ليهم تعالوا اصطفوا عشان المحاضرة

أما العباقرة مثلك يا ود عزة فأنا عارف مستواهم

وما دعيتهم عشان يحضروا اللكشر لأنهم في غنى عنه

.

شكراً يا بويزون يا غالي

Quote: بمعنى تاني لأي شخص الحق أن يقول ما يشاء دون أن يسيء أو يتعدى على حرية شخص آخر

Quote: ولا أريد منه سوى أن يختاني ويزح أوساخه دي بعيد مني

ثم

Quote: هذا الدكين

Quote: والطالع في الكفر الجديد دا (محمد)

بالله ممكن درس تاني في الديموقراطية ، عشان الأول ما مفهوم

الدروس دي لفئة معينة من الناس هم

الموهومين بأكذوبة الديموقراطية والمتاجرين بالقضية

فإذا كنتا واحد منهم ممكن تحضر اللكشر الجاي

وحاول تتعب شوية وتفهم دا لأنك كان ما فهمتو

الجايي برضو ما حتفهمو

.

والله قصة
يعني الواحد ينسى بلاغة الدنيا دي ويقول ليكم الكلام بالوااااضح كدة
يا أخي ما فهمت دي مقصود بيها طلب تفسير لنهيك الآخرين عن السباب وأنت تمارسه
والمقصود تعليلك لطلب احترام الآخرين وأنت تشير إليهم بالتحقير
وده المقصود من ال (كوت) المصاحب
يا ربي كدة فهمت عدم فهمي قبل ما تخش في ال (لكشر) التاني
ملحق:-
وصفك الديموقراطية بالأكذوبة غير موفق ولا يتناسب مع سعيك لشرحها للناس ، ولعلك تقصد الديموقراطية الكاذبة

الاخ ودشاموق
لك التحيه

Quote: لا أحد يحجر على حرية أحد، ولكن حرية كل فرد تتوقف عند حدود حرية الفرد الآخر، بمعنى أن أي سيد في هذا البورد له الحق أن يبرطع كما يريد بشرط أن يبرطع بعيداً عن حيشان الناس، بمعنى تاني لأي شخص الحق أن يقول ما يشاء دون أن يسيء أو يتعدى على حرية شخص آخر.

اوافقك الراي فيما قلت
واواكد على

Quote: ولكن حرية كل فرد تتوقف عند حدود حرية الفرد الآخر

فالاخ دكين عندما نعتك بي الدلوكه فهو قد تعدى عليك لا شك في ذالك ولا اظن ان احداّ في هذا المنبر يوافقه في الراي
وبما انه لا توجد خيارات متاحه لردع مثل هذه التصرفات غير الحرمان من الكتابه لذلك تم اختياره
ولكن يا اخي حسب معلوماتي انه لم يتم حجبه عن الكتابه وهذا ما اكده بكري ابوبكر في احد البوستات للاخ طارق
وفي اعتقادي الشخصي انو لو كان الاخ دكين يخالفك الراى فيما تكتب فله مطلق الحريه في ان ينتقدك ولكن باسلوب لا يعتريه الاستفزاز والاهانه مهما بلغ الحوار اشده

اخوك ابوفاطمه

سلام مربع

اخوي ودماشوق

مع انني لا احب الشبك ولا مواضيعها
لكني رأيت في كلامك بعض التعقل
انت تساءلت عن الحل
وانا اقول ليك الحل
كالاتي
مقوله المسيح عليه السلام
اذا كان احدكم بلا خطيئة فليرمها بحجر

او كلام الذي لا ينطق عن الهوى
سيد الانبياء اجمعين محمد ص لى الله عليهم وسلم

لا يحق لمسلم ان يهجر اخاه
فوق ثلاث ليال فيلتقيان فيعرض هذا ويعرض هذا
وخيرهم الذي يبدأ بالسلام

الا تريد ان تكون خيراهم
هاهو الرسول صلى الله عليهم وسلم يهبك الحل
التسامح والتصافي
هذه الدنيا ليس فيها شيء حتى نهري انفسنا في ملاحقتها وخصامها
كن خيرا منه وبادر انت حتى ولو كنت ملئان باحساس انك المجني عليه
جرب ان تكون متسامح واخلد الى نفسك وشوف بعدها ، كيف يكون الاحساس بالطمأنينه بردا وسلاما على روحك
اعمل خاطر لك نداءات الاخوان وطالب معنا برفع العقوبة عن دكين
لان توقيفه ايضا ليس فيه الحل ..
فانصر معنا دكين
حتى وهو ظالم ، لكي نعيده الينا وحتى لا نفقده بتكالبنا عليه والزمن
نحن هنا اخوان . ومن اجل ذلك جئنا
لكي نسمع ونضحك ونتحاور مع بعض في ادب واحترام
اقرأ معي مااذ كتبت الاخت روعه ونهى عن معني العلاقات الساميه التي يجب ان تجمعنا
________________
شكيتكم على الله يابوش وبلير وصدام

شيري

سلام مكعب

واذا أبيت

ورفضت مش من حقي أطالب بي حقي

واذا حقي في الدنيا دي أبا يرجع

موش حيكون محفوظ في الآخرة

شكراً


علاء

.

يا سلام عليك ياشيري،والهي كلامك كلام رجال بالجد،وعين العقل،الحبيب علاء،انسي وما تعكر صفوك

ما نوبيا يا انسان، عاد بي وين بس ؟

أبو فاطمة ... شكراً
يا ريت الناس لو بتفهم
ولا بتتنازل عن المنطق الأعوج
كان الدنيا تكون بخير
لك التحية يا حبيب

ودشاموق

خلينى اخت يدى فى ايدك فى موضوع ود دكين

انا اعلم الجرح واعرف عمقه

فى بوست لا فيه راى ولا راى آخر، كنت فخورة فخر ام بابنها

وجونى الاحباب بالتهانى والدعاء الصادق والمشاركات الاخاذة ، وجانى ودكين

ليضحك بملء شدقيه اذ تفاجأ باننى كبيرة كبر السنين ، واننى اقترب نحو الموت ، بناء على تقاريره فيما يتعلق بمسالة العمر

كنت اريد ان اجعل البساط احمدى واديهو حكمة صغيرة حتى لا ينسى ان يكون مهذبا مع النساء فى مسالة الاعمار دى ، وما بقصد نفسى ، لانى عمرى كلو مكشوفة للجمهور ، والمتابع مسيرتى فى الفن ممكن يضربها ويطلع بالجواب ويخت تحتو خطين، بس كنت دايراه ليه ولى زمانو

وكتبت ليه تعبير زى ، مافى شيتن بضر الا الكلام المر

مسك كيبوردو تانى وطبظها اكتر ، وقال انو قايل البت الحلوة الفى الصورة دى انا ، وانه هو داير يخطبها

وزغرد ، ولم اصحابوا


وزى مابقولوا ، شن جابك لى بيت العدوة؟؟؟ قاليهم عندى حبيبا جوة

لم اشأ ان اسىء له ولا ان ارد له صاعه صاعين ، عشان عايزة اكرم عين


لكنى اصبت بالامتعاض
ووشى ضلم من سماجة ودكين

وهذا احقاقا للحق

وحسى امشوا بوست محمود عبد العزيز وشوفوا المدعو محمد بقول لى شنو؟؟؟؟


والله ما عندى اى مصلحة فى زول يخلى البورد ولا يتحرم من المشاركة ، لكن بهمنى احترام الناس لى بعض

والله يا تماضر قلبي معك
وعارف طعم الزول دا كيف انا


ومحمد دا خليهو لأنو ما لاقي اليوقفو
وقاعد يبرطع ساكت، عليك الله أمشي شوفيهو
في باقي المواضيع قاعد يعمل شنو
بالمناسبة موضوع محمود دا أخفا واحد


وبالحالة دي شكلها ما حتستمر

.

ود شاموق....... عليك الله اوزن لي اتنين كيلو ديمقراطية..... وتلاتة كيلو حرية راي...... ونص كيلو لخمة بالخاء........وسجلن على النوتة

سجيمان الديموقراطية كاش يا حبيب

ود شاموق

سلام

انا اقول لك أن أول عقوبة للسب الشخصي ليست هي الفصل.. قد نبدأ بتوجيه صوت لوم.. وقد نسير نحو المطالبة بمنع البوست أو الكلمات الضارة أو أي شئ..

وإذا كان هناك إصرار على تكرار الأخطاء تأتي عقوبة الفصل لفترة محدودة، ثم الفصل النهائي..

ولك شكري

الاخ ود شاموق تحياتي
اولا اجد نفسي مجبراً على الدخول في هذا البوست برغم من انني عاهدت نفسي على ان لا ادخل مرة اخرى في مناقشة هذا الموضوع الذي صرف الجميع عن الهدف الاسمى، والقيم الفاضلة، التي كانت دوما صفات لرواد هذا المنبر، برغم من وجود بعض الاصوات النشاز بين الفينة والاخرى، والتي تريد ان تثبت انها من الاقلام المميزة او صاحبة الافكار النيرة، ولكن للاسف نصطدم دوماً بافكار متطرفة أو خطرفات من قلة نشاز تريد ان تفرض رائها على الجميع، وبالقوة وحتى ولو كان ذلك الحديث لا يرقى لمستوى النشر بين الدفاتر الخاصة، ناهيك عن نشره في منبر عام يحوى عدداً مقدراً من الاخوة الأعزاء، والاخوات الفاضلات، فكيف لمن يكتب تلك الكلمات، في هذا المكان العام وهذا المنبر الذي اعلم، علم اليقين ان هنالك من هم في داخل السودان، وبيدهم مفاصل السلطة، يطلعون يومياً على هذا المنبر وما شهادة الطيب مصطفي في كتاباته الشهيرة خلال الفترة الماضية عن فصل الشمال، واستدلاله بهذا المنبر وبشهادة الاخ بكري، الا دليل على ان هنالك من يتابع هذا المنبر ويترصد الفرصة المناسبة، لكي يرى ويشاهد هذا المنبر بهذا الاسلوب المحزن، وهو في حالة ابتهاج لانهم سوف يعتقدون بأن هذة هي العقلية التي تريد ان تجلب لشعبها الحرية والديمقراطية، وهي بعيدة عنها كل البعد وهي حتى بين اعضائها الذين لا يتجاوزن المئات، فما بالهم إذا أتوا هنا لكي يديرو أو ينظروا لشعب تعداده ثلاثون مليون نسمة أو يزيد، فعيتبرون أو ينظرون على أن هذه الفئة التي تكتب، او تطرح افكار أياً ،كانت هي تعبر في الأخير عن رائ مجموعة تريد أن تصل إلى مقاليد الحكم، باي طريقة كانت وهاهي تنظر إليكم بروح المنتصر المنتشيء، بتشرذمكم وافتعالكم ،لهذه المشاكل وانتم في نظرها صفوة هذه التنظيمات .
مرة اخرى اخي ودشاموق الديمقراطية والحرية، ليست كلمات تكتب، أو تقراء، بل يجب أن تنـزل لأرض الواقع ،وأن تترجم عملياً، ولكن هي أمنية في خاطر الجميع ،يتمناه الكل ان تترجم هنا قبل أن تنـزلها لأرض الواقع .
دمتم جميعاً دكين وودشاموق، أخوة أعزة في حضرة الوطن الواحد، وجميعنا هنا في هذه الغربة اللافحة، نستظل دوماً بوجود أحبة، أو اصدقاء، نتمنى أن نقضي معهم لحظات جملية، وساعات، نتبادل فيها الأراء والقبول بالآخر، لا إقصائه حتى ولو أختلفنا في الرأي .

ود شاموق
انا ما كتبت الا من جرح دفين...وانت عارف كم شتمونا واساءوا لينا...وكنت بتلقى النصايح بالسكوت الى الدرجة الأبدو فيها كأنى أنا الغلطان..عشان كده انا وصلت قناعة بأن الكلام عن ممارسة الديمقراطية..هنا فى البورد شى يجى قبل الغول والعنقاء والخل الوفى...وانا ماقصدت فى مدخل ردى الا أن أفلاطون ومدينته الفاضلة شرق ونحن والبورد والعالم غرب....

تحياتى
ودعزة

يا دكتور ياسر وعليكم السلام

وليك وحشة يا راجل

أؤيد كلامك تماماً

رغم أن لدي حق معنوي سيضيع

إلا أنني أويدك في هذا الكلام

.

عزيزي ابراهيم الحاج

لا أرفض تبادل الآراء ولا الحوار مع دكين ولا مع غيره، ولكن ما أرفضه هو ان يتحول النقاش إلى سباب ولعن واستخدام لألفاظ غير سوية، هذا ما أرفضه، اما ما عدى ذلك فلكل فرد هنا الحق في نقد مايريد كيفما يريد دون حجر على حق احد أو على طريقته في التعبير، فقط الاحترام والبعد عن ساقط القول.

لك التجلة

عزيزي ود عزة

أنا لم انفجر منذ المحاولة الأولى، بل صبرت وصابرت وهدأت أكثر من اللازم ولكني وصلت في النهاية إلى قناعة مفادها أن السكوت أكثر هوان أكبر، لذا وجب الرد لأنها المرة العاشرة بعد الألف التي أصفع فيها على خدي الأيمن فأدير الأيسر.

لك المودة

دعني اعيد ترديد المقوله الخالده ..تنتهي حريتك عندما
تبتدي حريه الاخريين ...واهم من يظن ان عجله الحريه
والديموقراطيه يمكن ان تدور بصوره ايجابيه من ضوابط
سواء كان ذلك مستوي الحريه الفرديه او علي مستوي
المجتمع او الدوله...
انعدام الضوابط يعني تصادم حريتي مع حريه الاخر فان
كان الاخر يري انه ومن صميم حريته ان يسبني ويشتمني
وان يقول ما يشاء .بينما اري انا مثلا انه من حقي
ان احافظ علي كرامتي وارفض المساس بها ...وهذا لا يعني
انا محصن ضد النقد والتقييم..ولكن شتان ما بين الاساء
والتجريح..
...اخطاء دكين في حق ود شاموق وفي حقنا نحن متصحفي هذا
الموقع... من الطبيعي اذن يعتزر ومن المنطقي ان نقبل
العذر ...ايقاف دكين المؤقت ليس اغتيالا ادبياله او
حجر لحريه التعبير بقدر ما هو فرصه له لمراجعه النفس
والعوده بروح جديده للبوست بعيد عن الانفلات والعفويه
اقول هذا وفي ذهني الصوره الايجابيه التي رسمهاللاخ دكين
من يعرفه معرفه شخصيه ..وهي صوره تنافي انطباعنا
عنه ....عليه ارجو من الاخوه اعاده تقييم مواقفهم
للوصول لحد ادني يضمن حق التعبير واحترام بعضنا البعض
وعدم التهاتر والتجريح والتلاسن
كتبت البوست اعلاه قبل ان اطلع علي توضيح الاخ
امين الموقع بكري ابوبكر ..بانه لم يتم ايقاف الاخ دكين
بو اسطته..

عزيزي كمال

هل تعلم أني لا ألوم دكين بقدرما ألوم من وقف يدافع عن حرية الرأي وعن التجني الذي حصل لدكين من قبل الادارة، رغم إنكار الادارة لذلك، لا ألوم دكين لأنه ببساطة عجز عن الرد فاستخدم الأسلوب الذي استطاع استخدامه، أما غيره فألومهم لأنهم لم ينظروا للموضوع إلا من منظور الديموقراطية التي ستوأد بطرد دكين. وكأن الحرية لم تقبر منذ أزمان طويلة بالتعدي والتجاوز والتطاول على الناس بالساقط من القول، أقول لهم هل يهدم الديموقراطية طرد فرد - رغم تحفظي على طرده حتى وإن لم يحدث - أم التطاول على الناس وانتهاك حقوقهم المعنوية عياناً بياناً ؟

أظنها الانقاذ للمرة المليون لأنها حرمت الناس من الحرية بقيودها الكثيرة فظنوا كل من يريد وضع قيد على ممارستهم الفوضوية يحاول أن يصبح إنقاذاً جديدة، وهذا الكبت السياسي نتيجته واضحة في رفض أي محاولة لضبط الفوضى وتحويلها إلى ديموقراطية حقيقة يأمن الناس فيها على حوزاتهم المادية والمعنوية من تعدي المنتهكين والمتذرعين بدعوى الديموقراطية.

لك الشكر الغزير أخي كمال عباس

.

الاخ ودشاموق

لهدا لاتقوم لديمقراطيتنا قائمه فى سوداننا الحبيب.. لااحد يريد التقيد بأى قانون وفى رأيهم ان الديمقراطية تعنى قانون الغاب و الاجاويد من بعد ان يقع الفاس فى الراس وبقدرة قادر يصبح المعتدى هو الضحيه والضحية هى المعتدى..ويختلط الحابل بالنابل ونقعد نبكى ونقول عاوزين حكم عسكرى عشان الناس ما بتجى الا بالكرباج.. طيب انتو يا اخوانا لو كنتوا اتعاملتوا مع هده الديمقراطيه باحترام شويه مش كان حافظتوا عليها وما اديتوا فرصه للمتربصين بها للانقضاض عليها..

"وتسمع از ناديت حيا.. ولكن لا حياة لمن تنادي"

اللعين TH لم احد حرف ال

فكتبته زاءا

ودشاموق وبقية العقد
أنا معكم أطالب بحقوق ودشاموق وبالعقوبة على دكين
لكن
كم من دكين في هذا البورد ، وكم من دكين في السودان عموم ، أعتقد أنهم كثر ن وربما نعاقب بما فعل السفهاء منا ، كما عوقبنا قبل ذلك مرات حين لم يحتمل البعض العيش داخل الأطر الديموقراطية فتململوا حتى جاءتنا الديكتاتورية ، فوفرت للكثير منهم مرتعا خصبا
ما أراه أن الفنان حين يقدم فنا لابد أن تكون لديه رسالة وهذه الرسالة لابد أنها ستصب في بناء مجتمع معافى ، وهكذا يفعل كل المبدعين والعلماء ، وكل هذا يجب أن يشكل إضافة للتربية ، التربية الفردية والجماعية ، وسيظل هناك شواذ ، لكن بالعمل الدؤوب من قبل المثقفين والفنانين والعلماء يتناقص هؤلاء ، وينزوي بعضهم ، لكن المجتمع لن يخلو من دكين ، ، إلأ أن دكين سيمارس سلوكياته في الخفاء خوفا من القانون
هلا تدرجنا في الأمور وسعينا في هذا البورد إلى تقديم ما يمكن أن يغير سلوكيات الدكينيين ويقلل من مجموعهم ، فديمقراطيةالكلام لا تعني شيئا لكثير من الناس إذا لم يتبعها عطاء وإنتاج وتوزيع عادل ، فاجعلوا من البورد منبرا منتجا يضيف إلى مجتمعنا معرفة وثقافة وعلوا في الأخلاق

والله أنا ما عارف كل الكلام الكتير والتنظير حول الديمقراطية والحرية في شنو
المسألة ببساطة أنو في هذا البورد الذي يجمعنا توجد قوانين بتحكمو
وبمجرد اكتسابنا لعضويته يعني ذلك خضوعنا لتلك القوانين
التي تحدد علاقاتنا مع بعض وحتي مع الذين لاينتسبون لعضوية البورد
من حيث مدي انعكاس كتاباتنا عليهم سلبا أوايجابا
وأنا ببساطة طالبت وأطالب الان بتطبيق قوانين البورد
علي مثل هذا النوع من الكتابة أيا كان كاتبها
ولا يهمني كثيرا أن يتنازل ود شاموق عن حقه الشخصي
فهذا شأنه
فأنا أتحدث هنا عن الحق العام
حقي في كوني عضوا في منبرأعتقد أنه منبرا محترما
وفقا لقوانينه التي انضممت اليه علي أساسها
وانو في تقديري ما ورد في تلك البو ستات يتنافي مع قوانين البورد

الاخ العزيز ود شاموق
شنو الواحد يغيب شوية
القى الحكاية اتلخبطت خالص
معقولة بس
انا زمان قلت الكلام ده لما واحد
كان مدور في الموصلي
قلت ليه البورد ده مافيه حقوق تحمي الادباء والفنانين
وشايفه برضو زعلو تماضر كمان
مفروض الناس الكبار اللي دخلو عشان نستفيد منهم
ويعملو معانا روابط جيدة
ياخدوا حقهم في الاحترام
وتكون عندهم حماية ذي الحماية الامنية بتاعت الدبلوماسيين وكده
بالجد والله
وانت ذاتك نفس المستوى ولا تقل
وحقك علي انا ياخي
برسله ليك بس انت وقف الزعل
طيب؟

ود شاموق انا بوافقك بشدة انو الاعتذار ما كفاية
والشتائم الاتقالت ليك دي ما في زول برضاها لنفسو
وبالنسبة للتعويض عن حقك الضائع
اعتقد انو وقفة الناس معاك وفي صفك هي اكبر تعويض

وهمسة من صديق
لا تقبل ان تصفع علي خد واحد اكثر من مرة

ورغم اختلافي معاك في الرأي حول الموضوع الجاب الكلام ده
الا انو الود يبقي متصل ما دام الاحترام متبادل

ودمت