Post: #1
Title: يا أخوانى البنات البورد ده ما حقى !!!!!!!!
Author: wadazza
Date: 04-26-2003, 05:34 AM
حاولت قراءة البورد من أسفله الى أعلاه ومن أعلاه الى أسفله ..رأسيا وأفقيا...وجدت بعضا مما يقرأ...وبعض ما تشتم منه رائحة ود مفقود...هجوم من عضو على آخر ومن أعضاء على آخرين...ومطالبات بالاقصاء والابعاد وتهديد ووعيد بايقاف هذا العضو أو ذاك...وتنفيذ ربما للتهديدات..باستخدام القوة السايبرية...التى ربما قد يكون راح ضحيتها الزميل/ دكين...والذى مهما كانت درجة تخطيه للقواعد والتى أرى من منظور حرية التعبير والرأى أنه لم يتخط أى منها..فنحن نشهد من غيره تعد على حقوق المؤلف...وصلف فى القول.وسفه حديث.وادعاء معرفة وشاعرية وسياسة..الخ ولو أطلقنا أحكامنا وفقا لما راح ضحيته دكين لما تبقى فى هذا البورد الا نفر قليل...فلنكن أوفياء لحق دخولنا المجانى فى هذا البورد وعبثنا المجانى0...وعلاقاتنا العاطفية المجانية ومسنجراتنا الأقل مجانية ولنترك الخلق لخالقها...والكلمات رقراقة على صفحة نهر الود..
سأرمى بكل ثقل بوستاتى المتواضعة وأطالب بعودة دكين الى حظيرتنا منزوعة الأشواك
تحياتى
ودعزة
|
Post: #2
Title: Re: يا أخوانى البنات البورد ده ما حقى !!!!!!!!
Author: doma
Date: 04-26-2003, 07:05 AM
Parent: #1
ياوليداتي من غير فلسفه وكلام كبار كباردكين غلطان علي ود شاموق ووصفه له بالدلوكه غير جميل ابدا وكان عليه ان يعتذر له امام الجميع وجل من لا يخطئ الاستاذ سامراوسمير ماعنده حق يتدخل ويهدد ويتوعد ويبلش حركات المديده حرقتني . بت قضيم دافي وغيرهم من وقفوا يدافعون عن دكين طبعا حقهم ومكفول لهم لكين كذلك من حق ود شاموق ان يغضب ان لم تعجبه طريقه دكين معه كما يحق له ان يطالب باعتذار دكين او رفع شكواه للجهات المختصه في اداره البورد .
|
Post: #3
Title: Re: يا أخوانى البنات البورد ده ما حقى !!!!!!!!
Author: wadazza
Date: 04-26-2003, 07:09 AM
Parent: #2
دوما
عشان غلط الغلطان هنا ماغلط وما صح..قلنا نخلى الغلط ياخد مجراهو ناحية الصح0..وبس
لووول
الغرض الود يعم والزعل ينحسر ويمشى وياخد باب البورد وراهو
تحياتى
ودعزة
|
Post: #4
Title: Re: يا أخوانى البنات البورد ده ما حقى !!!!!!!!
Author: Dafi
Date: 04-26-2003, 07:10 AM
Parent: #1
| Quote: يا دكين اتحداك كان تاني تقدر تكتب كلمه في البورد....ود شاموق ده مقامو كبير.....وعالي |
Quote: يا احمد ساطور يا عزيزي..
انا ما عندي اي سلطه في البورد....لكن صدقني....تاني ما حا يقدر يخش البورد...لانو الاشكال دي برضو ممكن ننزل لمستواها وله ما كده....ود شاموق كاتب رائع واخ عزيز ...وشاعر حساس....ودكين للاسف ....صعلوق... |
| Quote: نحن قدر القول يا ابو حسين..........وخليهو يرد رد واحد |
ود عزه
بالاعلي..مداخلات..للاخ سمير..البيدرس في نيويورك..كمبيوتر..علي يد الاستاذه..ليزا منو كده ماعارف
والبيقدم سلسله محاضرات عن الهاكرز واساليبهم..في هذا البورد الجميل
بعد كده
تحسس قمبورك جيدا في راسك..عشان تعمل فيها ما عارف ..الوقف دكين منو!!
وانا بدروي اسالك
البورد ده ما حقك يا اخو البنات..ولا حقي...طيب حق منو!!؟؟؟؟
|
Post: #5
Title: Re: يا أخوانى البنات البورد ده ما حقى !!!!!!!!
Author: wadazza
Date: 04-26-2003, 07:27 AM
Parent: #4
عزيزى دافى
انت ماقريت دى؟
| Quote: وتنفيذ ربما للتهديدات..باستخدام القوة السايبرية. |
دى معناها الهدد نفذ تهديدو..لا خوف ولا وجل...يظهر انو سمير كان قدر الكتبو مهددا...زى ما بقولو .طالما أنه يمتلك أسلحة الكومبيوتر الشاملة والدراسة والمعرفة .والله يازول الكورة دى تانى ماتشمها...ده مدافع يقول لى مهاجم...وعشان الشفافية والناس ما تعتقد انو الادارة هى العملت حائط صد بين دكين والضربة الحرة المباشرة ارجو من الأخ سمير ان ينبرى ويقول ...انا العملت كده أها عندكم كلام..أو يقول انا ماعملت كده أها ما عندكم كلام؟..وحدها الصراحة تحل الموضوع وحده الود يخلق المواقف وحده البورد يلمنا كسودانيين فى روح سودان سمحة
تحياتى
ودعزة
|
Post: #6
Title: Re: يا أخوانى البنات البورد ده ما حقى !!!!!!!!
Author: Dafi
Date: 04-26-2003, 07:42 AM
Parent: #5
| Quote: وحده الود يخلق المواقف وحده البورد يلمنا كسودانيين فى روح سودان سمحة |
ده كان..زمن كتب الطيب صالح
نحن قوم..اذا غضب احدنا من اخيه..قال له يا ابن الكلب!!!
زمن..راجل الجيران يكورك فيك..تعال هنا يا ولد
..جيب لي الحقه دي...وولدو..قدامو
زمن..سندوتش الفول يتقطع في ايدك..حته حته..قبل ما تستلموا من يد سيد البوفيه..وتقعد تساكك باقيهو.. في يد الصحاب
زمن ..المطافي بالقربه..والكمونيه بالمتر!!!!!
ماني غرقان في التمني..ولاني سابح في الاماني
يا ود عزه
عد ..فات...زمن العيون الالفه..والحضن الملاذ
ورهافة الحس البلون..ضحكة الناس العزاز
سلامات..علي عرشك يا عظيم..(التعبير مستلف..من تحفة البورد الجديده..محمد) وشكرا
|
Post: #7
Title: Re: يا أخوانى البنات البورد ده ما حقى !!!!!!!!
Author: wadazza
Date: 04-26-2003, 07:51 AM
Parent: #6
Quote: سلامات..علي عرشك يا عظيم..(التعبير مستلف..من تحفة البورد الجديده..محمد) وشكرا
|
وده منو ؟ وبسلم على منو؟ لووووول
لكن برضو ننادى ولو بى آخر نفس...لعودة الودوالصفاء للبورد...وبالمناسبة الود والصفاء موقوفين برضو..الوقفهم منو؟
تحياتى
ودعزة
|
Post: #8
Title: Re: يا أخوانى البنات البورد ده ما حقى !!!!!!!!
Author: قرشـــو
Date: 04-26-2003, 08:00 AM
Parent: #7
الاخوان دافع وود عازة
هاااااى يكا
يعنى سمير افندى طلع ما زى الصحاف افندى
والله بعد ده البورد ده منه جفله بصراحة
معقول الحكاية وصلت للدرجة دى ...
الللللللللله يستر
|
Post: #9
Title: Re: يا أخوانى البنات البورد ده ما حقى !!!!!!!!
Author: المسافر
Date: 04-26-2003, 08:04 AM
Parent: #7
العزيز ود عزة، سلامات، خليهم يقولوا ياودعزة وانت قولك خليه زي أول عشان نحن وسط الزفة بنميزوا، وزي ما الناس بتعرض برة الدارة وجوة الدارة والشبال بي شرو خلي عرضتك زي ما بعرفوها جماعة عينك سرك وتسلم
|
Post: #10
Title: Re: يا أخوانى البنات البورد ده ما حقى !!!!!!!!
Author: Dafi
Date: 04-26-2003, 08:14 AM
Parent: #7
الود دي اغنيه لي ورده
حتي الان ما سمعتها كامله
الموسيقي تتمطمط لي..وتتجرجر..اكون انا زهجت..وقلت الشريط عشان اسمع الحنينه السكره
كان مفروض يجيبوها..في صوت العرب من القاااااهره..عشان اسمعها مع اغاني ام كلثوم وحليم....الحاج..كان بخلي الرادي مفتوح..وينوم..يخليهو..واقعد انا القط..في الاخبار..والنجوم...وحليم يغني للقمر...وانا اشيل..معاه
وصفء..دي خدار نااااااعم كده..غشانا في البورد..وفرحنا بيها..
وبي كلامها..الاينع منها
لكن الكبكابات..وناس سيد جرسه عينتي..قعدوا يبحلقوا في الصوره..لامن هي طفشت زاتو
الله يديم المحنه
والريده
|
Post: #11
Title: Re: يا أخوانى البنات البورد ده ما حقى !!!!!!!!
Author: ebrahim_ali
Date: 04-26-2003, 08:37 AM
Parent: #10
العزيز ودعزة والمشاغبين والمحايديين والمدافعين والجميع البرة والجوة والبعاينو بالطاقة والشباك تحياتي
ما هذا الذي يحدث ما هذا الذي يجرى هل انعدمت حتى ابسط اساليب الحوار والقبول بالآخر بعثراته وعلاته في هذا المنبر الذي يدعي الحرية والديمقراطية وهو ارى انه ـ بعيدا تماماً عنها ـ حتى ولو سلمنا جدلاً بان ما يكتب في بعض الاحيان يعبر عن حرية مشوة لا رقابة عليها ولا سيف مسلط ولكن ان يتخطى البعض الذوق العام والتهجم على البعض هذا ما لا نرضاه ولكن ياودعزة ويا كل من ينشد منبر خالي من العيوب فأري أن هذا من المستحيلات فلن يحدث ذلك مهما كان من اتفاق حتى ولو جزئ في بعض القضايا ولكن هنالك اختلاف جوهري في قضايا مصيرية وهذه لا تحل بفرض الرأي ولكن بالجدال بالتي هي أحسن وهذا تخلق نوعا من الاحترام المتبادل .
ودمتم جميعاً أحبة .
|
Post: #12
Title: Re: يا أخوانى البنات البورد ده ما حقى !!!!!!!!
Author: الشاعر
Date: 04-26-2003, 09:52 AM
Parent: #11
ما هو الفرق بين الهاكر والكراكر؟
أنا بجاوب بتعريف الأول والثاني عرفوا انتو
الهاكر هو كبير البيت وهو مصمم ومدير هذا الموقع وهو يفيد بعلمه الناس الهنا كلهم
وقد قال
Quote:
الاحباء الاعزاء
لم يتم توقيف احد من البورد و قد اتصلت بالحبيب دكين و حتى الان لم يتصل بى
--------------------------------------------------
إذا كان كبير البيت للطبل ضاربا فلا تلم الصبيان فيه على الرقص
|
وبالمناسبة باقي الإدارة ليس لهم دخل حيث أنهم ليس من صلاحياتهم إيقاف عضوية مشترك
أنا جاوبت الجزء الأول وجا دوركم
من هو الكـــراكر؟؟؟؟
|
|