حكاية الخروف النطح مايــا

اول الحكي
الف مره عاش سلامك
والبعاد يشعل غرامك
بالمحبه عيوني ساهره
عايزه اعيشك تاني مره
والف مره ..
___________
ماعارفاه كلام مين ومين البغنيها
_______________________

حكاية الخروف السكن حوشنا

احسني مزنوقه جدا خالص .. لاعتبارات كثيره ، اولها اني طفشانه ومتبهدلة اخر بهدله ثم اني منكشة الشعر حتى البلبلة التي تحزم هذه الدومه هربت من راسي.. واخر حبة من شوال الجزر خاصتي خلص قبل عشرة دقائق .. وثانيا ، لم اشرب الشاي ، لان الغاز خلص .. ولا احد في البيت غيري يملأ لنا الغاز .. اذ لا يحق للبنت او الحرمه عموما ان تتحاوم في مثل هذه الاماكن التي قفلت فقط على الرجاله .. وثالث حاجة التلفون مقطوع بسبب كارثة بيئيه تتواجد اسفلنا ..ورابع زفت في بيتنا خروف ، وطعام يخص الخروف .. وجملة( في بيتنا) هذه ارجو لا يتبادر الى اذهانكم ، ان المقصود بها ان الخروف يقاسمني الغرفه ، رغم انه من الطبيعي جد بالنسبة لي ان لا اتنرفز من وجود الخروف في غرفتي ، ليس لاني احب الخراف او ان الخراف تجد تشابه كبير بيننا او ان هنالك ارضيه مشتركه تجمعنا .. وانما كل مافي الامر ، ان وجود الخروف يمنع بت الجيران اللهلوبة (مايا) ذات الاربع سنوات من دخول غرفتي وإعمال يد الخراب فيها .. فهذه الاموره كل شيء فيها يتناقض معها حتى اسمها لا يشبها في شيء .. لجوج ، قلقه .. شديده الحركه .. شديده التوهج ، كساره .. ما ان تنظر شيء او تلمسه الا واحالته الى فتافيت حتى وان كان طائرة اباتشي ، وعلى الذين يشكون في قصة اسقاط (منقاش) لطائرة الحلفاء في بغداد ان ياتوا ليروا ، كيف تفعل (مايا) العجب بموجودات غرفتي وموجودات البيت وكائنات اخرى تسكن دهاليز العماره الخفيفه .. فهي قادرة وبخبطة واحدة ان تمسك بالصرصار ثم تعجنه فرد عجنه .. ولديها موهبة غير عادية في اصطياد الفئران والسحالي .. فبفضلها انعدمت كل الحشرات والزواحف القارضة والمميته ..
اذن فالخروف لم يكن يقيم في غرفتي بشحمه ولحمه .. فانما يقيم في غرفتي بصوته فقط وحركته القلقه ومشاغلته للسور اللقائم بين عمارتنا والشارع ، وكثرة كرشان جلده بكل شيء خشن يتبادر له .. حتى نصف شغالتنا السيرلانكيه كرش جلده عليها في احدى المرات التي راها فيها . وفي بيتنا طعام الخروف متوافر بكثره .. ومتوافر هذه ايضا ، لا تعني البته ان بيتنا كان مشروع لانتاج القش وااشباع الحيوانات او مرتع لها ، لكنه بقدره قادر تحول الى مزرعةكبيره ..
فالذي حدث ان االقش كثر ونما في بيت جيراننا وحينما امتلأ البيت واكتفى منه ، اخرجوهوا الى الخارج ، وحينما امتلأت براحات العامره وبلكوناتها قالت كفى ..والبراحات هذه اعني بها مداخل العمارة والسلم .. ثم تركوا ما تبقى منه على كل باب شقة من شقق العمارة الثمانيه . اذن بقدره قادر تحول بيتنا احبتي الى مرتع طعام الخراف ، والذين لايعرفون تسميه طعام الخروف والحناكيش اعني ، واهل العوض يمتنعون ..

_______
شكيتكم على الله يابوش وبلير وصدام

حكاية الخروف الذي نطح بقرنه مصطفى

اقول قولي هذا واستغفر الله العظيم لي ولكم من كل ذنب عظيم ، ثم اصلي على المصطفى عليه افضل الصلوات والتسليم .. واقول ان في الامر لقولات كثيرات ، وانا لا اعلم منها الا ما يضئ لي بقعة من مساحه صغنجروته تسكن عقلي ، وماتبقى اتركه للذين ابحروا في الشلاقه والفصاحه .. اذ انني لم اوتي من العلم الا شويه . واقول ان الخراف تاكل مايأكله نوعها وهي المواشي . فهي تقتات على البرسيم وبرواية اخرى القش (هذا اذا لم يطلع لنا ) اهل العوض او الملا عمر وكسر هذه الفصاحه في راسي المبشتن دا .. وهذا الخروف (الشرفان) المزهلل يكورك من صباح السبت ساعة ان شرف في عمارتنا حتى هسع والتي يشارف توقيت هسع هذه قرابة ظهر الاثنين ،ولم ينطم ولا اظنه يخطط للانطمام في القريب العاجل حتى يفرج عنه ويطلق صراحه افراجا غير مشروط او تهوي عليه سكينه سنينه تجيب اجله .
وحتى لا تختلط عليكم سادتي هذه التقارير التي ادونها لكم هنا ، فيجب ان لا تنسوا ان الخروف لا يخصنا فهو ينتمي الى جيراننا . الذين نتقاسم معهم الشغاله السيرلانيكيه .. فهانذي المحها زهجانه مكروبة ، معشكبه تنقنق كلما طلعت سلم او نزلت .. لقد زادت نقتها وشكيتها بصورة غير محتمله فهي بقدرة قادر تحولت من شغالة الى راعيه ..
(مايا) الفسلطينيه .. تريد منها ان تريها الخروف دون ان تلمسه اوتقربه .. واصحاب عيال الجيران وجيران العيال وعيال العماره التي تبعد مسافة عمارتين مننا .. يتعلقون على اسوار عمارتنا ويقذفون الخراف بكل مافي ايديهم ، حتى اذا ما وجدوا ان لعب الكوره مع الخراف هي اجمل تسلية لهم وللخراف خططوا تلك البرحة الى ملعب صغير وقسموه فيما بينهم وبين الخراف بالتساوي نصف لهم ونصف للخراف .. فاحضروا (البخاخات) وطبعوا على جلود الخراف ارقام تبدأ من عشرين حتى سته وعشرين ..وقالوا نحن فريق العاصفه ، والخرفان تلعب باسم العلوج .. واختاروا اعرج خروف وكتبوا عليه بوش ..
بدأت المباراة ولم تنتهي ابدا ، اذا كل ماتعب عيل خرج ودخل الذي بعده .. والاخرون يتشعلقون على السور يشجعون العاصفه ضد العلوج .. . وتنسيم تبكى لان الخروف زهج من لياقتها فجأر فيها .. و(مصطفى) ذو الاربع سنوات تشقلب على وشه مفلوقا اثر معركة طاحنة مع الخروف نطحه فيها بقرنه .. فاطاره هناااك .. تضاحك على اثرها العيال كلهم .. وبكى وتنفف من اثرها مصطفى واشتكي لكل العماره .. بيتا بيتا .. ان الخروف نطحه بقرنه . ولم يزهج الا السيرلانيكيه لانها اهملت حراسه الخروف وتركته يفعل فعلته المتوحشه تلك بالشافع.

ابقوا معنا للهترشه بقيه


______________
شكتيكم على الله يابوش وبلير وصدام

حكاية الخرفان التي اصبحت كبسه رز
لذلك ففهي تبرطع من صباح السبت والى الان لم يهدأ لها بال . .ساعة تبكي وساعة تهضرب . وساعة تدعو بالسيرلانكي علي الخروف ..(الخروف الاهبل د بالله عامل كيف ؟ زح كده يزحك المرض .. ماتجي هنا .. تجيك الطاويها حبالها . ) حيث ان هذه الدعوات قيلت بالسيرلانكي وترجمتها اليكم سادتي بالعربي ، حيث انني لا افهم في السيرلانكي بنفس القدر الذي تفهم فيه الخرفان لغتنا .. . وساعة تستأذن امي ان تعفوا لها حقها في شغل البيت .. وتسلمني اياه ..وحيث انني زعلانه منها ، لانها تجاهلتني كثيرا في الايام الفائتات ، فان الامر يصبح كالاتي تار بايت معها .. ولن اقوم باي عمل بدلا منها ... فهي التي قامت بالتامر مع اخي الصغير ووضعت على طاولتي اكثر من سبعة باتنجانات سوداوات . ادى معفولها الى اقتحام الامريكان بغداد ، ومن ثم اعتلقوا برزان التكريتي الاخ غير الشقيق لصدام حسين ..
وعاشرا ، ان الامر في جملته ليس خروفا واحد ، بل كارثة بما تشبه الزريبه ، اذا تدافعت الخراف الى الحوش المعد كمتكأ لنا في ركن قصى خلف عمارتنا التي كنا نشرب فيها القهوه نحن وحريمات جيراننا .. تدافعت الخراف تلو الاخر حتى اصبحوا سبعة في عين العدو . .وانشاء الله ديل كلهن سوف يصبحون رؤووس على سبعة صحون كبسه . لسبعة زوار فقط سوف يشرعون في تقطيع لحم هذه الخرفان وهي منبطحة فوق تلال من الارز . او مايسمي اصطلاحا صحن كبسه رز .
يا لها من وليمه تاريخيه .. تنفات لها بلاد .. من منكم رأي مثل هذه العزومات ؟
على قراءنا الكرام والسادة المشاهدين الذين يتواجدون خارج منطقة الخليج او خارج مدينه جدة بالتحديد مراعاة فروق العادات والتركيز . وان يشحذوا كل خيالاتهم الخصبه وان لم تكن خصبه فليسرعوا الى محلات الاسمده حتى يخصبوها .. لانهم مهما اوتوا من خيال لن يعرفوا كيف يتخيلوا كيف تكون وليمه لضيوف بدوان .

لم تخلص الهترشه ، لكن صبركم هو الذي خلص


______________________
شكيتكم على الله يابوش وبلير وصدام

الأخـت شـيـري ســـــــــلااااااام



أولا الأغنية بتاعة العاقب محمد حسن

ثانيا في بيتنا خروف على وزن إسم الفلم العربي في بيتنا رجل


حالتك فعلا يرثى لها خروف و مايا و غاز مقطوع الله إكون في عونك


لكن برضو إستفدنا من الوضع نحن و قرينا ليك



كلامك عن مايا ذكرني قالو الجماعة عندهم شافع زي مايا دي كدا


كل ما إمشى حتة إكسر أي شئ . يوم مشوا لي جماعة و البطل قاعد


ساكت ما عمل حاجة بس إتلفت قامت ست البيت سألت ام البطل


يا ختي مالو ولدك دا الليلة ما قام هبش حاجة إتلفت ساكت ؟؟؟



أم البطل قالت ليها لأ دا محتار إبدأ من وين ..........



ســـــــــلاااااااااام


أرسل ليك شوية غاز على الإيميل بتاعك ؟؟؟؟؟؟

سلام مربع
ابو حسين

سلمت ياسيدي للاغنيه، لانها مما قمت من الصباح
ناطه لي في لساني
وسمعت بغنيها امير حلفا
لكن ماعارفاها حقت مني
حيث انني موقنه انها ماحقتو

طيب ماتجي تجي تملا لينا الغاز ، الله يرضي عليك
حتى تتفرج على الماتش
حيث انني اتفرج عليه من نافذتي
وهو مدور ليهو يومين
وان لم تنهزم هذه الخراف من عمارتنا
باسرع فرصه ..سوف تستدعي البلديه
شرطة جدة كلها لاخلاء عمارتنا
من كارثة بيئية وانسانيه محتمله

تعجبنى جدا اذدواجيه اللغه الى تمزجيها
فصى ودارج
وهذا يعنى تمكنك من السرد والخيال والابداع
وتعجبنى ايضا مصطلحاتك التى تاتى بها
)لجوج(
اتمنى ان تجمعى كتاباتك هذه فى كتاب
لانها حقيقى تطرب حتى الطرب
دمتى

سلام مربع

فناني الشدوي
حمزه سليمان

سلمت ياسيدي لهذه الطليه البهيه

فانا سيدي جزء من فنك الاصيل
وما اكتبه اكتسبته
من بيئتنا الغنيه
الله يخليك ياسيدي لجمهورك وفنك
وسلمت ياسيدي مرة اخرى للطله
وسلمت اكثر للاطراء
الذي افرحني حقا

__________
شكيتكم على الله يابوش وبلير وصدام

مساك الله بالخير يا شيري

سؤال استفزني كثيرا والح في الخروج
الخرفان شنو كمان في الايام دي ؟ انتو الضحية عندكم جات وللا شنو ؟

هترشة رائعة وأثني اقتراح استاذنا حمزة سليمان بلملمة هذه الهترشات في كتاب لانها أروع من أن تترك لتضيع

لك التحايا بالكووم والردوم من شرووم

سلام مربع


شروم
الم تنبأ بما عندنا هنا؟؟

ام انك ماقاعد عندنا هنا
وما ادراك ماهنا

حيث ان الخراف تساق في وضح النهار
وتذبح
wherever & at any time

كل ما تحتاجه من ذنب لكي تذبح
ان ياتي البدو من البدو لزيارة اخيه البدو
في الحضر
والحضر هذه تعني حاضرة الحجاز
اي جدة
هذا والله اعلم
سلمت ياسيدي للاطراء
وسلمت اكثر للطله
___________
شكتيكم على الله ياناس بوش وبليير وصدام

شيرى الرائعة
هترشتك طاعمة
وفيها حكم
زى العسل
فيه غذاء وشفاء

انا غايتو للشايفة دة
اعملوا حسابكم من الخروف دة
وقفلوا باب الشقة كويس
لانه
خرفان الزمن دة
بقت ----تضبح
مش تنضبح


والبركة فى التكنولوجيا العسكرية
تحياتى

يعني ياشيري

مراسل حربي

ومراسل زريبة




سلمتي لنا

عشت الجو الى درجة تخيل طعم أم فتفت هذا الخروف...وهذه ميزة السرد المعافى كما أنت دائما...وفى أبعاد أخرى تخيلت أن الخروف زعيم..والأبعاد وطن ...فكم خروف مثله جلس على كرسى الحكم...وأزعج أهل الداروالجوار....لكن برضو الخروف أحسن منهم على الأقل بنضبح وبتاكل شية ومرارة...لكن ديل حتى لو انضبح واحد منهم بكون مجهز ولدو خروف الظل عشان ينط فى الكرسى

بس الحمد لله رئيسنا ما عندو ولد...لكن خايف يكون مجهز ولد الجيران
تحياتى
ودعزة

الأخ ود عـــزة ســــــلاااااااااام

يا خـــوي ياتـو جــو دا البتقصدوا أم فتفت دا ما جــو الخــروف



دا جـــو تـانـي !!!!!!!!!!!!!!!!!!!!!!


و خــوفـك إكــون مجـهــز ولـد الجيران ؟؟؟؟؟

يا خــوي أديــك جـبـنـة ( كلها فتحات ) مـــرة (مضمومة الميم)؟؟؟؟؟؟؟

مهيره
كان ينقصك دكتوره ان تكوني معنا لترى ، كيف نطح الخروف مصطفى ..
انا نفسي زهجت منه .. وكنت منتظرو يعملها مع (مايا) لاني كنت ساعتها ، هللت وكبرت وزغردت ..
انت لا تعرف كم هم ضجرون .. اقول هذا واعود لا فتقد حسهم ان طولي علي الغيبه ..
سلمت ياستي للطله وسلمت اكثر للاطراء
عم قرجه
بس بالله عليك .. كيف معااااك التقارير . عارفاك بتاع شمارات
عايزه اكون مراسله (كوراوتيه) يعني اجيب شمارات الكوره . عايزه اتخصص في الكوره
دا كلوا عشان ، لمن تلعبوا انتو كوره في جدة انقل (كورتكم) .. مع اني اشك في انكم بتعرفوا تلعبوا كوره من اصلوا ..
هاهاههااههااهاااهاهاه

ود عزه : الرائع
يسلم لينا خيالك الجامح .. وحلوه اوي اوي حكاية الخروف الزعيم دا ..
انت ماشفت عيال عمارتنا .. سوي في واحد منهم شنو ..؟
طبعا الخرفان الى الان مازالت تمني نفسها ان يطول امد بقاؤها في الحياة
لكن ليس في عمارتنا وبالتحديد ليس ، ومايا ومصطفى موجودون وهم يتربصون بهم
قلت لي .. الزعيم بتاعنا .. عايز يجيب ود الجيران ؟؟.. لا ياخ . دا ، مخه خروفي جد جد ، يعني ما عندو شدايد للحاجات الزي كده ،
لكن بجد جد اعملوا حسابكم من الخروف اللي بعدو ، الاسوداني .. داك الخروف اللي فعلا تتفات ليهو بلاد
دا يكفي نطح الزعيم الخروفي الروحي بتاعهم ، والخروف الذي علمهم كيف ياكلون القش دون ان يشبعوا
. سلمت ياسيدي للطله
ابو حسين
ياخوي قول انت برااااك الخرمان لام فتفت . ..
شكلك كده عايز ليك 4 حلل كمونيه .. من انتاج ام مازن

___________
شكتيكم على الله ياناس بوش وبليير وصدام

خلاص يا شيري

الكورة الجايا تجي

تحكميها لينا

هههههه

بس خايف المغلوبين يدقو الحكم

استمتعنا بهذا الحصار الخرافي - ووصف مايا التي تدهس الصراصير وتسوق الفئران الى حتفها ,,,ولكن ربنا على الظالم,,تخاف من الخرفان موت,,لو انها اخدت النطحة بدل مصطفى المسكين ,كانت ح تاخد مناعة من الخرفان ,,ويصبح المفعول مزدوج

العزيزة شيري

بالله عليك كملي لينا القصة عشان نحن اتشحتفنا خلاص وخصوصا لما بقى فيها خرفان (علوج)

عليك الله الخرفان العلوج ديل لما يضبحوهم ادينا خبر خلينا النهلل هنا...اصلو ما قدرنا على الحمار الندردق في البردعة



والله قصة رائعة وتسحتق النشر فعلا وانا بثني على راي الاخوة الباقين في تجميع هذه الهترشات في كتيب لما لها فعلا من قيمة ادبية

لك الود والتحايا

سلام مربع

newbie

اضحكتني ياهذا .
وحات نظرى كنت عايزه اكتب متمنيه لها هذه النطحة
فعلا مسكين مابستاهل النطحه
لكن انت شفتوا .
شليق .. طالع بتجارب نطريات ساااااكت
وخطفت مني الامنيه دي ، لمايا
فعلا فعلا فعلا .. من العيال بالتجيب الاخلاق هناااا
ومع ذلك سرعااان ماتفتقدها تلك الحليووونه
التي لن اجيب زيها ابدا ، مهما عملت
وهي من النوع البتكون عايز تجضمها
ديييييك

ياسر حنا

والله حكاية العلوج دي يا ياسر
ما عارفها متين تخلص
او نقول متين ،
نلقى لينا عم الضباااح
الفالح داك ويجيب سكينو كده
وينزل لينا فيهم ضبح

سلمت ياسيدي للطله
وسلمت اكثر للاطراء

عمو قرجــه


اوع يكون جماعتك العاوزني احكم ليهم
الكوره بتاعتهم شايلين مثل عصاياتك
الشايله فوق كتفك طول الوقت دي

؟؟

كان كده ابري يايمه واستبري من كورتكم دي
شوف ليكم حكام من افريقيا الاستوائيه


سلمت ياسيدي

___________
شكيتكم على الله ياناس بوش وبلير وصدام

هسي عليك الله يا شيري الوليد دا مالو عمل شنو عشان الخروف دا ينطحو ما كان ينطحك انتي ويريحنا منك شوية

الكي بورد ده لو عندو خشم كان كوووورك

أختنا .. شيري .. لا حولة ولا قوة إلا بالله .. عملتي لي لفة رأس .. وأأكد ليك لو نطحني الخروف بدل مايا لكان أهون .. مقالك مثل الساقية المدورة ..

وتعرف يا أخي أهل العوض أن مقال الأخت شيري دي .. شوبر ليهو كم شوبارة .. طبعاً بعض البواردة لا يعرفون الشوبارة بتاعت العيش ..


تحياتي لكم جميعاً ..

جـــاد

العزيزة شيرى

الشر بره وبعيد عنك

حكاوى الخروف يبدو انها ممتدة منذ يوم السبت واليوم الاربعاء فهل تم المراد ام انه حتى الان يصدح صباح مساء باع باع ؟؟؟

اول ما خطر فى بالى ماهو نصيبك من عمل الكمونية من هذه الخراف ؟؟ ترى هل كل اهل بيتكم والجيران مثلك لهم عداء متأصل مع الكمونية حتى ولو عصر عليها ليمون سودانى ؟؟

نفسى اعرف كمونية سبع خرفان تساوى كم لديك ؟؟

بصراحة محتاج وصف دقيق لتجميع تلك الكمونيات وعملها

اوع تقولى لى الجماعة ديل رموها فى القمامة
دى نعمة ياخى وحرام رميها فان كانت الوليمة غدا لك ان تذكريهم بان نعم الله لا يجوز رميها لان هنالك ناس زى ناس قرشو يتمنوا ان يعثروا على مثل هذه حتى يهيصوا فيها..

لك تحياتى للسرد الجميل

الاخت شيرى لك التحية والاجلال
حروفك اراحتنا كثيرا وافرحتنا اكثر
متعك الله بالصحة والعافية واكل الكمونية
وداير اسال يا اختى ما بلقى لى خروف بيجى عندكم؟

سلام مربع

صحبه الورد

روبينسون
عمو قرجه
جاد
العمده قرشو
ود نمر


من نافذتي المحهم يتسابقون وبتجارون ويهرولون في كل الاتجاهات
الكل مشغول ، الا الخراف
احسهم فرحاااانه اوي اوي
وهاهي مايا تزهجني باسئلتها وشمشرتها
جابتها معااي هنا .. ولو في يدي
ايها الشفيفون لمسكتها من يدها وحسنت الخروف
داااااك الذي يقف مبسوطا متباهيا بقرنه الكبير
لمشيت وورجوته ان ينطحها نطحة
كان تطم خشمها وتريحني
لاتفرج بمزاج
الليلة وووب علينا
السجم كال الرماد
اهونديل ساقوووهم خلاااااص

سلمتم كلكلم للطله ومشاركة الخراف
احزانها .. رغم اني شايفاها مبسوطه
انو خلاص ح تقطع وشها من ناس
مايا ومصطفى وعيال عامرتنا العفاريت

والليلة حلل الكومنيه جاااااك بلا


لحظات مع مراسم وداع الخراف الى مستودعها الاخير

واعود اليكم

انتظروني

عندي كلام يجي ليكم قدر 40 حلة كمونيه
______
شكيتم على الله ياناس بوش وبلير وصدام

شيري

واصلي التدفق ؛ فنحن قي الانتظار

عادل

شيرى كيف عامله
انا عاوز اقراء الهترشه دى يوم الجعه لكن الفضول قلب
ان ما قلتى جده اقول معانا هنا فى المتمه
وواصلى ابداع


كنت براى وجنى حنين الكون
قور قور جوه فى صدر
واتمنيت لو كنت معاى
يا مايه
وتسلمى
ودعقاب

سلام مربع

عادل عبد العاطي
ود عقاب

سلمتم اخوتي للطله وسلمت اكثر للاطراء

اسفه لتأخري في الرد على مشاركتكم
بس كنت مشغوله .. من جهة كانت تقع على عاتقي
مراقبة مايا حتى لا تقضي على ماتبقى في غرفتي
من معالم اثريه
ومن جهة اقوم باعمال السيرلانيكيه نيابة عنها
حيث انها حنستني وطيبت خاطري بشوية كلمتين حلوين
وحيث ان قلبي ميت وطيبه حتى اخر نسيج في ضلعي
رضيت عنها . وقمت بعمل الاثنين معا
اي مراقبة مايا ومسكها والتدخل السريع
ان مسكت شيء ينخاف عليه في يدها
وقرأت لها موزه الحبوبه
والنقيب خلفان
وماذا فعل ميكي ماوس
وهل بندق كان بيحلم حقيقة
ام ان عمو دهب لم تجدي معه محاولاته المستميته
لحراسة اولاد اخيها العفاريت
وفتشت لها مثلما ارادت عن فضولي
ولم اجده ، لكنها وجدته لست ادري كيف
وهي تعرف حتى الواو من كوز الدره
والغربيه انها تعرف مطاعم البيك
وماكدونالد اذا مررنا بها
وتعرف ان هذه كابينه تلفونات
وتعرف ان هذه سوبرماركت ابوداؤد
او بنده العزيزيه
وتعرف ايسكريم روبنز
حيرتني هذه المفعوصه
مثلكم انتظر موكب الخرفان الاخر
لا اعلم متى ياتي موكبها الجديد
لكني من طلائع الوافدين لدى جيراننا
المح فلول هذا الموكب قريبا جدا
فاستعدوا معي لتحنيسهم من اجل اهداءنا خروف
وبدوري سوف اهديهو الى العمده قرشو
اصلوا نفسوا موت في كمونيه
وام فتفت

_________________
شكيتكم على الله يابوش وبلير وصدام

الموضوع رائع...... ولو لي سلطه بضم السين... كنت ثبتوا.... ودي هديه لصاحبة الصالون شيري...والمداخلات الرائعه...

http://www.alkabli.net/real/Marawi.ram

شيرى
الاغنية لو تخنى الذاكرة كلمات الشاعر السر احمد قدور ولها قصة طريفة وهى ان الشاعر السر احمد قدور سلم الاغنية الى الفنانة عائشة الفلاتية لتغنيها وتكاسلت منها ووجدها المرحوم الفنان العاقب محمد حسن وتغنى بها وشاءت الظروف ان يتقابلا الشاعر قدور والفنانة الفلاتية وطبعا كانت زعلانة وعلى طول قال ليه مصيبة تلحقك وتلحق عوض جبريل وسالها السر قدور انا عارف نفسى لكن عوض جبريل ذنبه شنو قالت ليه ما شين زيك.
وكما انا بقول ليك مصيبة تلحق الخروف والكبسة الجننتك
وطبعا فى انتظار الابداع الشيرى السهل الممتنع لبقية موضوع الكبسة وتداعياتها يا مبدعة منظرين لكن عديل جوعتنابس لو كنته شرحته لينا الكبسة منتنظرنك
مع التحيات

القلم الموهوب ـ شيري
كل سنة وانتو طيبين

بعد ذلك اللوم الجميل من الصديق الواعي ود قاسم ، خصصت في كل من أيام الأسبوع الماضي ساعة يومية من برنامجي لاسترجاع مشاركاتك من الإرشيف والانهماك في عمل قراءة جادة لهذه التداعيات الأدبية المترفة السلسة ، أدركت أثناءها تماما أن ودقاسم كان على حق في كل ما ذهب إليه حول موقف الذين أدركهم قدر الكتابة هنا لماذا لم يتناولوا هذا القلم بالدراسة والتحليل ، لإضافة وإضفاء روح التواصل بين أجيال الأعضاء ـ أقله ، و ليس كما يتبادر لبعض أنه لتقويم عمل أو إسداء نصح أو تقديم أحد لأحد .. فلي موقفي من هذا كله حيث لم أقبل في بداياتي الأولى أن يقدمني أحد إلى القراء لا في مقالاتي ولا إصداراتي ـ ولا أنصح أحدا بذلك ،
حينما بدأت القراءة لك من الأرشيف يا شيري كانت النية مجرد الدراسة الجادة ـ أداء للواجب ورفعا للوم ـ ولكن الأمر بالنسبة لي ما لبث أن امتزج باستمتاع حقيقي وانجذاب لهذه النكهة الأدبية الخالصة الخاصة ـ بقيت في البحلني من ( البرية ) دي شنو ـ كان ممكن أستسلم في لحظة ما ـ إلي انوالمسألة ما أكتر من هترشة زي ما بتقولي وبري وشمارات أو استمراء لمجاملات الناس الرقيقين الظراف الـ هنا ديل .
بصراحة انتبهت في لحظة ما إنو أدوات القراية الجادة الـ اتهيأت بيها دي مااااابتشتغل هنافي جنس كتابتك دي ـ لكن ( يعني أدوات المنهجية المفترضة دي) قدرت إلى حد ما أصل بيها لي حقيقة رئيسة حول كتاباتك هنا ـ وهي إنك صاحبة ملكة حقيقية واستعداد وجداني فطري وأصيل ـ للتميز الروائي ـ تنسربين بسهولة ويسر إلى ( الفنتازيا ) من اللغة التقريرية البيضاء في سرد الواقع في تصالح مدهش مع حالة الأدب واستئناس القارئ ، و تتمتعين بذخيرة لغوية هائلة من التراث المحلي ـ تربية حبوبات ( هن ذاتهن بنات حبوبات ) تعشقين الكتابة ـ أتوقع مع تراكم التجربة ـ أن تجدي الحل سهلا وقريبا جداـ لأمر أتوقع أنه يشغلك في شأن الكتابة ـ الأكثر مؤسسية ـ حتما سيتم لك ذلك ، أعني هندسة البنية للعمل المتكامل ، من خلال تحديد الإحداثيات وهو ما تتميز به الرواية عن الصحافة الأدبية الساخرة وعن أدب المذكرات الخاصة ـ و أرجو اعتمادي من قراء شيري والتكرم بتنبيهي على الماسنجر للجديد عشان ما تفوتني حاجة ـ كما أتمنى أن يقوم كل من يرغب من أقلام شبابنا بإضافتي في الماسنجر للتواصل المباشر ـ فهناك من التدارس ما يحسن فيه الاختصاص .

أحييك وأحي أخي ود قاسم وكل سنة وانتو طيبين

استاذ الكتيابي

مالي حق في كلامي (الذي يغضب ) عن هذه المهترشة انها لم تعطي حقها كاملا من الاطلاع والدعم المعنوي وشكرا لود قاسم الذي سبقني بتقديم الفكرة وان كنت اريد تقديمها في شكل اخر

سلام يارائعه
رمضان كريم