Post: #1
Title: المسافة و المسافات
Author: Al-Masafaa
Date: 04-20-2003, 07:13 PM
Parent: #0
الأعزاء جميعا
سلامات كميات و نعود لكم بعد غياب بهذا البوست
بعض نماذج المسافة و المسافات فى غناء استاذنا مصطفي سيد أحمد و باب الاضافات مفتوح
لسة بيناتنا المسافة و العيون، لا بتعجزنى المسافة لا بقيف بيناتنا عارض ، ياما نحلم نشكي ليك عن المسافة و نشتهيك ، في البقاسي شقا المسافة و عايشة في داخلو و بعانى، يا ضلنا المرسوم على رمل المسافة ، مين اللى قال انو المسافة البينا بين الشمس طاقة
سلامات
|
Post: #2
Title: Re: المسافة و المسافات
Author: ابويوسف
Date: 04-20-2003, 10:04 PM
Parent: #1
الغالي المسافه
اولا حمد الله الف على السلامه
والله فاقدنك كتير
وانا كنت ماشي الشهداء ولا شارع ود البصير اسال عنك
وينك والله الشوق كميات
وسلامات يازول يارائع
وقصر المسافات وما تحرمنا منك
ابو يوسف
|
Post: #3
Title: Re: المسافة و المسافات
Author: Elkhawad
Date: 04-20-2003, 11:50 PM
يا المسافه البينا بينك
خطوه من شوق وحنين
مرحب بيك
وكل المسافات المشت
في خطوه الشوق بالسنين
اقعد عافيه
|
Post: #10
Title: Re: المسافة و المسافات
Author: Al-Masafaa
Date: 05-02-2003, 04:14 AM
Parent: #3
مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
********
يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
وبيناتنا ليل الغربة ... داكِنْ
هبّت هبوبك
أفتح شبابيك المساكن
وسـِّع دروبك .. ولـِّع مصابيح الأماكن
***********
يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا غضبة الرعد البيسكن .. فى غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا
**********
يا مشرع الحلم الفسيح
أنا وإنت .. والمطر الفصيح
حنطوِّع الزمن القبيح
ناخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف .. الأصابع
حدثنى دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا .. على الدروب المبهمة
أو ربما
تهدم آلات الشوارع .. وترجمْ العُزّى الصواقِع
حدثنى لو صادف الكى المواجع
وضلك على الساحل رمى
حدثنى لو مطرك هما
علمنا دايماً كلما
نبذر على أرضك شهيد
يطلع شمس .. يبهر بأنوارو السما
|
Post: #4
Title: Re: المسافة و المسافات
Author: Al-Masafaa
Date: 04-21-2003, 00:46 AM
Parent: #1
الأعزاء ابويوسف و الخواض
شكرا للطله و الشعور الجميل و نبادلكم الود و الخوة النضيفة و خوفنا من سفرا يودي للمسافات القصية ، والله احكام يا قدر و الله احكام يا مسافة و يا سفر ، و رغم بعدك يا مسافة و رغم طولك يا خطاوى و في دروب المحبة فتنا بعيد مسافة و لقدام يا فرد
|
Post: #5
Title: Re: المسافة و المسافات
Author: Al-Masafaa
Date: 04-22-2003, 04:17 AM
Parent: #1
في هذا البوست المسافى نطلب من الأخ شيبة او ودعزة ينزل لينا مسافة سمع لترطيب الجو
|
Post: #6
Title: Re: المسافة و المسافات
Author: sheba
Date: 04-22-2003, 09:05 AM
Parent: #1
مسافة مصطفى الى المسافة
|
Post: #9
Title: Re: المسافة و المسافات
Author: Al-Masafaa
Date: 05-02-2003, 03:44 AM
Parent: #6
حميد
نورة
وكتين يضيع عرق الجباه الشُّم
شمار فى مرقة .. آه .. يا نورة آه
من دربك التوّر نفس خيل الصبر
فتـّر خطاوى الشوق وراه .. يانورة .. آه
ساعة الشموس الغُر تهضلم
تلحق الصِّح .. فى المغارب
يستر الضو الكهارب
تستر المدن السرابية .. الضبابية الكآبة
حائط التيه .. والطشاشات .. فوق قفيِّك
يا أمْ عوارض...
يا أمْ عوارض .. ما دُعاشة
ماها شبـُّورة وتقيف .. جايى ليك يا نورة غيمة
تملا ماعونِك خريف
يملا عينيكى ويفضـِّل
يروى جوّاك العطاشا
*****
يا نفس فجر القصايد يا بلادى
القطع قلب الروادى .. بى اللّواج الجاى .. وغادى
ماهو صوتك .. لاها صورتك
دى البترقش نادى فوق صدر الجرايد
إنتى يا حُضن الصحارى
شُفّع العرب الفتارى
البفنـّوا الشايلا إيدمْ
ويجروا كايسين القطارى
لا سراب الصحرا .. موية
ولا حُجار سلّوم .. موائد
حالكم البصرخ وينادى
ياوطن عز الشدائد
*****
يا هُدى الناس الحيارى
يا ندى الفجر الببلِّل نور عِوينات الفقارى
جايى ليك يا نورة
آفة .. للسوس البنقـِّر
عود عِشيماً داخرو فيك
أصلى لمـّن أدور أجيك .. بجيك
لا بتعجّزنى المسافة
ولا بقيف بيناتنا عارض
لا الظروف تمسك فى إيدى
ولا من الأيام .. مخافة
يا نفس فجر القصايد
ما ضِهِبْ فى بعدى عنـِّك
أصلى متغرِّب عشانك
راضى بى الجايينى .. منـِّك
ما شكيت شُح اليالى .. وما بكيت نُحْ .. شِلتوا حالى
رغم إنو الحال بيفضح
إلاّ كٌتْ فى الحارة بصرُخ :
يا وطن عِز الشدايد
|
Post: #7
Title: Re: المسافة و المسافات
Author: Al-Masafaa
Date: 04-23-2003, 03:29 AM
Parent: #1
تشكر يا شيبة و لقدام
|
Post: #8
Title: Re: المسافة و المسافات
Author: Al-Masafaa
Date: 05-01-2003, 03:08 PM
Parent: #7
عارفني منك
لا الزمن يقدر يحول قلبي عنك
لا المسافة و لا الخيال يشغلني منك
يا هوي الألم النعيم
خليك علي الوعد القديم
و خليني في الشجن الأليم
ابقي فيك كل المدائن
سكتي و سفري الجحيم
تبقي اية الدنيا من بعدك تكون
و ابقي اية بعدك أكون
ما في احتمالي و بالي انك
و انت سائق فيني ظنك
رغم انك انت عارف انة منك
لا الزمن يقدر يحول قلبي عنك
لا المسافة و لا الخيال يشغلني منك
عارفني منك عارفني
|
Post: #11
Title: Re: المسافة و المسافات
Author: manubia
Date: 05-02-2003, 12:28 PM
Parent: #8
welcome back Al-Masafaa
|
Post: #12
Title: Re: المسافة و المسافات
Author: Al-Masafaa
Date: 05-22-2003, 08:06 AM
Parent: #11
Thanks Manubia.
|
|