والله الما بعرف المصطلحات دي حقو راح

والله الما بعرف المصطلحات دي حقو راح


04-20-2003, 00:04 AM


  » http://sudaneseonline.com/cgi-bin/sdb/2bb.cgi?seq=msg&board=2&msg=1050793458&rn=9


Post: #1
Title: والله الما بعرف المصطلحات دي حقو راح
Author: beko
Date: 04-20-2003, 00:04 AM
Parent: #0

التقيت بي احد الطلبه الجدد
وطلبت منه ان يحكي لي ما اخبار السودان
والله يا جماعه بدا يتكلم معاي حسيت ان هو بتكلم هندي
بيتكلم بي مصطلحات ما فهمتها ؟؟
سالتو قلتا ليهو طيب انا لو مشيت السودان حارتاح هناك
قال لي
(يا مان لو عندك ضحاكات ما عندك مشكله)
بعدين انا فهمتا انو ضحاكات دي المقصود يها قروش
في اثناء حديثنا دخل تاني مصطلح جديداللي هو
(الجاحه)
طبعا بعد عناء فهمتا ان الجاحه هي البنت اللي مرتبط بيها
بعدين بدا ينصح فيني من زحمة المواصلات قال لي
(يا مان حنك الطاره من الجلك)
دي بتخيل لي ساهله يعني خد السياره من الوالد
بتخيل لي كل المغتربين او المهاجرين خارج السودان لو رجعو
السودان حيكونو اغراب في بلدهم
ما دام لسه في المزيد من المصطلاحات الشبابيه الجديده

Post: #2
Title: Re: والله الما بعرف المصطلحات دي حقو راح
Author: Bakhaf
Date: 04-20-2003, 05:14 AM
Parent: #1

اي بالله كتر لنا من المصطلحات دي باقي اخوك نازل البلد قريب وما دايرين اكون زي الاطرش في الزفه
ضحاكات
جـاحه
جلك
طارة
هل من مزيد ؟؟؟

Post: #3
Title: Re: والله الما بعرف المصطلحات دي حقو راح
Author: beko
Date: 04-20-2003, 12:23 PM
Parent: #1

عزيزي بخاف
تعرف انا اعاني من نفس مشكلتك
انا فتحت الموضوع كنت طامع للمزيد من المصطلاحات الجديده التي حلت مكان اللهجه السودانيه
لكي محبتي

Post: #4
Title: Re: والله الما بعرف المصطلحات دي حقو راح
Author: ود عقاب
Date: 04-20-2003, 02:15 PM
Parent: #1

الاخوه العزا
بس انتو تعالوا نحن بنعمل وحده ترجمه فى الخرطوم
ودعقاب

Post: #5
Title: Re: والله الما بعرف المصطلحات دي حقو راح
Author: beko
Date: 04-20-2003, 03:04 PM
Parent: #1

عزيزي ودعقاب
شكلك حتكون المسؤول من الدار
لتطوير لغة الشباب الجديده
لك ودي

Post: #6
Title: Re: والله الما بعرف المصطلحات دي حقو راح
Author: almulaomar
Date: 04-20-2003, 03:05 PM
Parent: #1

أخي بيكو قبل أن أدلف إلى هذا المقال أوجست في نفسي خيفة على إعتبار أني لن أكون ناقشاً لكثير من مصطلحات عالم اليوم التي جعلت من الوالد جلكين ومن الغش تدقيسة وهلم جرا ولكن لأن الأوله شرط آخره نور ولأنك نورت فأبصرنا أنار الله لك دربك بأن جعلت العقوبة هي روحان أو ضياع الحق إن شئت ولأن حقي رايح حتى قبل الدخول إلى مقالك هذا أصبح يستوى عندي الدخول والخروج.
وأحسب أن المغتربين في الأرض هم فعلاً غرباء طوبي لهم وهي العبارة التي تتبع الغرباء عادة وأحسب أن المغترب ليس في حاجة إلى طوبي أو طوبة حمراء كانت أم خضراء أو حتى كهيك والأخير هذا أحسب أنه أحد الشهور القبطية إن لم تخني الذاكرة ولم تعاملني بالمثل حيث أنه سبق لي خيانتها وما زلت أخونها حتى أصبحت أكثر الأغاني تطريباً لي هي الأغنية التي يرددها الفنان الكبير زيدان إبراهيم وأيضا الفنان الكبير إبراهيم عوض كل على حده والتي من بين كلماتها وحرمت عيوني يا خاين لقاك ومشيت لي هلاكي في أوسع خطاك يا خاين فكنت كل ما أسمعها وعادة ما أسمعها ثلاث مرات في اليوم والليلة إحداهن قبل النوم بدقائق معدودة أتخيل الخطاب والإتهام بالخيانة والعمالة موجه لي شخصياً دون سواي من الخونة والعملاء ومن سار على دربهم.

Post: #7
Title: Re: والله الما بعرف المصطلحات دي حقو راح
Author: beko
Date: 04-20-2003, 03:30 PM
Parent: #1

عزيزي الملا عمر
ارد الله غربة كل مغتربينا الي بلادهم
انا تناولت هذا الموضوع لاني شعرت اني بعيد كل البعد
عن سوداننا الحبيب وددت ان اعرف شعور كل شخص بعيد عن ارض الوطن هل سيتاقلم مع هذا التغير
لك ودي يا رائع

Post: #8
Title: Re: والله الما بعرف المصطلحات دي حقو راح
Author: almulaomar
Date: 04-20-2003, 03:54 PM
Parent: #7

عن تأقلم المغترب مع الوضع ففيه قولان ، الأول أن المغترب يمكن له أن يـتاقلم ويندمج في المجتمع بسرعة وهؤلاء مع شديد الأسف شريحة صغيرة من المغتربين في الأرض والقول الآخر أخي أن السواد الأعظم من المغتربين لن يستطيعوا التأقلم وقبول الواقع وبالتالي سوف يعيش معظمهم حالة عدم إتزان أو إستيعاب إن شئت للواقع ويصبحون عالة على ذويهم ومجتمعهم بعد أن كانوا منتجين في يوم من الأيام ، والحل لمثل هذه الظاهرة الخطيرة يتمثل في أن يجد هذا المغترب الفرصة مرة أخرى لممارسة الإغتراب في الأرض من جديد لأنه لا شأن لوزارة شئون المغتربين أو حتى كافة مؤسسات الدولة بشأن المغترب السوداني .
رد الله غربة المغتربين وهم معافون في دينهم معافون في أبدانهم آمنون حيث ما حلوا محققين كل طموحاتهم وتطلعاتهم من الإغتراب.

Post: #9
Title: Re: والله الما بعرف المصطلحات دي حقو راح
Author: beko
Date: 04-20-2003, 11:11 PM
Parent: #1

اهلا مره اخري عزيزي الملا عمر
اضم صوتي اليك بعودة المغتربين الي ارض الوطن
لكي محبتي

Post: #10
Title: Re: والله الما بعرف المصطلحات دي حقو راح
Author: جدو
Date: 04-20-2003, 11:32 PM

العزيز بيكو
تحية وسلام
بالمناسبة لغة الرندوق دي انتشرت في اوساط الشباب انتشار شديد ..وهاك دي
واحد صاحبه اتوفى فمشى لابو صاحبو عشان يعزيهو
قالليهو معليش يا جلك ولدك كان فردة صاح لاكين دقس واتلحس هاك الشرتيت وانا مشتت

Post: #11
Title: Re: والله الما بعرف المصطلحات دي حقو راح
Author: soomaa
Date: 04-21-2003, 00:03 AM
Parent: #1

سلاااااااااام

انا شخصيا جيت من السودان قريب

وبرضو عندي مصطلحات لكين ماعارفة تكونو عارفنها ولا لا

على العموم اسمعو

سكسكانية وعدم انسانية

هبهانة والقلوب تعبانة

مكرونة وماقدرونا

تفتيحا وشايل مفاتيحا

كركدي وماعرفتو ليه

بطاطس ومستوى غاطس

وللمصلحات بقية

لكين لما اتذكرها

Post: #13
Title: Re: والله الما بعرف المصطلحات دي حقو راح
Author: almulaomar
Date: 04-21-2003, 08:35 AM
Parent: #11

سوما يبدو أن حارتكم من الصعوبة بمكان المرور فيها بعد صلاة العشاء وبصراحة كلمات فيها سجع ومعاني ما عادية والشماسي في كل الأحوال إنسان عبقري بس عاوز شوية توجيه وإهتمام وتنمية لمواهبه.

سكسكانية وعدم انسانية
هبهانة والقلوب تعبانة
مكرونة وماقدرونا
تفتيحا وشايل مفاتيحا


دي زي كلمات شماسة زمان
بندورة وكشفنا دوره
طماطم وكمان بتلاطم
أم رقيقه وعامله ضيقه



Post: #12
Title: Re: والله الما بعرف المصطلحات دي حقو راح
Author: beko
Date: 04-21-2003, 00:08 AM
Parent: #1

عزيزي جدو
لك مني الشكر لانك اضيفت لي كلمات لم اعرفها الا الان
واتمني يان نتعرف بي كلمات اكثر
واتمني المشاركه من الجميع من لديهم معلومات اكثر عن الرندوق
لك كل الافق

Post: #14
Title: Re: والله الما بعرف المصطلحات دي حقو راح
Author: جدو
Date: 04-21-2003, 08:47 AM
Parent: #12

ولا يهمك يا فردة
مشكلة تك تاك يامان
اخوك الجسطبة بعلمك كيف تكون تفتيحة وماسك مفاتيحه وما تخلي اي فارة يدقسك
شتات يا فردة

Post: #15
Title: Re: والله الما بعرف المصطلحات دي حقو راح
Author: Maksab
Date: 04-21-2003, 09:23 PM
Parent: #1

يا جمااعة عليكم الله..البعرف شي يقولو لي و بمعانييه انا في الجامعة هنا و شهادة عربية ..داقس دقسة.......
بالجد ساعدونا عشان نبقى تفاتيح زييكم

Post: #16
Title: Re: والله الما بعرف المصطلحات دي حقو راح
Author: beko
Date: 04-21-2003, 10:12 PM
Parent: #1

عزيزي مكسب
اتمني ان يمدونا بالجديد من المصطلاحات
لك ودي

Post: #17
Title: Re: والله الما بعرف المصطلحات دي حقو راح
Author: الرايق
Date: 04-21-2003, 10:35 PM
Parent: #16

"ناس البيت داقين جرس"، والمعنى أن ناس البيت جايطين معاهو،وفلان دخل الجامعة وهي السجن وغالبا في قضايا الشيكات، يقولون " فلان أومباشى" وتطلق على ضحايا الإفلاس وقضايا الشيكات، وفلان عامل مريديان معناها أن فلان وقع في الريده، وديك زعلانة وعاملة بلغاريا، وتعني أن فلانة أحست بالغيرة، ويبدو أن هناك الكثير، ولي عودة

Post: #18
Title: Re: والله الما بعرف المصطلحات دي حقو راح
Author: beko
Date: 04-21-2003, 10:57 PM
Parent: #1

عزيزي الرايق
يا رايق
شكرا ليك علي الاضافات الجديده
ومنتظرين منك المذيد
يا رايق