للراشدين فقط

ربما اعتقد البعض أن لهذا العنوان ما يدل على معناه ولكن آثرت ان يكون كذلك لسبب بسيط وهو اختفاء اسماء سامقة ومؤثرة في مسيرة هذا المنبر، وكذلك اختفاء للمواضيع الجادة الهادفة وهذا لا يقلل بالطبع من المواضيع المطروحة الآن والتي تشكل أيضاً إضافة حقيقية للمنبر ولكن كنا نتمنى أيضاً أن نجد تلك الأقلام، التي تتناول الحياة العامة بالداخل وتتطرق للمشاكل التي تواجه البعض، لعل وعسى أن نجد الحل.. فلدي سؤال عن اؤلئك النفر الأعزاء الذين ملؤء هذا المنبر فكراً ودرراً وإبداعاً مميزاً فلاأجد لهم الآن أثر سوى كتاباتهم القديمة المعتقة بصدق عباراتهم وجميل قولهم وحلو شعرهم وكذا صورهم.. أين هم الآن دون تحديد لاسماء فقط الجميع المختفي .مرة أخرى للراشدين فقط ليست هي المقصودة ولكن المقصود أين اولئك القوم؟؟

الغالي ابراهيم
كيفك يا عريس
دي اكيد مشاغل الدنيا
ربنا يرجع كل الغائبين بالسلامه
و يمتعنا بمزيدا من القادمين الجدد المبدعين
اها انا متوقع منك حاجه كدا
تورينا مشاهداتك بعد الاجازه الطويله دي
اقدر انك كنتا (مافاضي)لكن كدي حاول اتزكر لينا
باقي زي ما عارف احنا طولنا بالحيل
كل الود والتحايا

الغالي ايهاب تحياتي
اول حاجة كتر من الشرتيت وإياك والضهب
ثاني حاجة اوقعه يدقسوك ناس الضرائب وما تقول انك مهندس بس قول عامل إنشاء الله عامل بلدية لانو ديل جزارين بمعنى الكلمة واياك والقسم لانو القسم عندهم مغلظ وعليك بالمكاتب الخارجية فيها بنات ظريفات جداً بس تدفع ليهن كويس والله لو عائز يطلعوك أي مهنة يعملوها بس كتر في الوعوود بتاع الزواج ليهن والله ما يصدقن يعملن ليك أي حاجة ..
ثالث حاجة اوع تركب ليك ركشة لانو الواحد بتخيل نفسوا في أي لحظة هو بشتت وأمجاد ابعد من كرسي الشهيد دا جنب السواق على طول دي فيها دقسة ولحسة على طول .
رابع حاجة أوع تلبس ليك جلابية والقرشيات ظاهرات لانو النشالين حايمين في السوق بالذات السوق الصغير وبستعملوا كل الاساليب الحديثة في النشل وبقت بموية النار يكون كابيها في حقنة ويرش علي الجيب لمن الفتحة تطلع القروش وهاك ياشتات يافردة
خامس حاجة ما تفوت ليك أي حفلة في مسرح الجزيرة في مدني او نادي الضباط او كازينو النيل الأزرق بالذات ود الامين التذكرة خمسة ألف وبتنهي الحفلة الساعة الحادية عشر فقط يعني ما في صباحي .
سادس حاجة لف على الجامعات بالذات الخرطوم والاهلية والفرع ولو قدريت مشيت الاحفاد دا يكون المنى عشان تحضر ليك كم ركن نقاش وامكن تشارك .
سابع حاجة ما تناقش في السياسة ولا الفن ولا أي حاجة لانو كل من يحدثك هو فيلسوف فيما هو يتحدث فيه .
ثامن حاجة متين انت مسافر ياعريس؟
تحياتي