انا و د.البونى وامتحانات الشهادة السودانية للاحياء الشعبية والشماسة

كان هذا اميل ارسلته للدكتور عبداللطيف البونى مناقشا معه امتحانات الشهادة السودانية لها وماعليها وللاسف لم اجد منه رد لانه ربما لايطلع على الاميل كثيرا
وقد قمت بنشره هنا لمناقشة الموضوع
ولكم شكرى


الدكتور عبداللطيف البونى
السـلام عليكـم ورحمـة الله
ياحاطب الليل والناس نيام
رائع انت تحتطب ليلا( و نلقاءها نحن باردة فى الصباح ) شكرا كلمة ضئيلة امام جهودكم العظيمة
ابقاء ك الله فى دنيانا حتى نحيا سعداء
الموضوع :-- مقالكم عن امتحانات الشهادة السودانية وكان يوافق اول يوم لهذة الامتحانات وهو يوم 24.03.03
فشكرا لطرقكم هذا الموضوع والامساك بالمعضلة الاساسية وهى ان طلاب الولايات الاخرى عدا ولاية الخرطوم يلجئون الى المساق الادبى وهذا يؤدى الى انتحار العديد من الموهبات والقدرات العلمية وهذا ليس ناتج من الضعف العقلى لهؤلاء الطلاب ولكن كما ذكرتم نتيجة لضعف توفير الكتاب والمعلم
وقد وضعت انت حلا ومع تقديرى واحترامى لرائيك هذا الحل قد يكون مسكن بضم الميم وكسر الكاف او نصف حل
ومع تقديرى واحترامى لرائيك فهذا الحل قد يكون مسكن( بضم الميم وكسر الكاف) او نصف حل وليس هو بالحل القاطع وكان حلك هو فدرلة امتحانات الشهادة السودانية ( وبينى وبينك فدرلة دى قلبت فيها الهوبة) اما الوصل الى الحل القاطع يجب ان يكون همنا جميعا شعبا وحكومة والله اعلم به
ولكن جاء حكمى على حلك بانه مهدى او مسكن او نصف حل نسبة لتوقعاتى المستقبلية لحكاية حلول الفدرلة دى وسوف اخذ الموضوع بهترشة جادة
فكعادتنا دائما كسودانيين نستكين لانصاف الحلول ولانتعب انفسنا فى بذل اى جهد( لحدى ما التعليم يلحق امات طه.. دا لو ما لحقن وانتهى.. وعليك الله يادكتور البونى لوعرفت حكاية امات طه دى قول لى عوووووك.. ورينى الحصل عليهن شنو) يعنى يادكتور لو واجهتنا مشكلة اخرى بعد حكاية الفدرلة دى داخل الولاية نتيجة لاختلاف امكانيات وثقافات المدن داخل الولاية الواحدة سوف نلجا الى( مدنة) امتحانات الشهادة السودانية( ومدنة دى على وزن فدرلة) وتعنى كل مدينة لوحدها وتبقى الشغلانة فدرلة داخل فدرلة داخل مدنة لحدى( الرماد ما يكيل حماد) وبعد شوية تواجهنا مشكلة اختلاف امكانيات وثقافة المدارس داخل المدينة ونقوم نلجا الى( حيحية )امتحانات الشهادة السودانية( وحيحية على وزن فدرلة واخواتها) وتعنى التقسيم الى احياء و كدا طوالى
فمثلا فى المدينة الفلانية مدارس حى الزهور والبرلمان امتحاناتهم ماذى امتحانات الاحياء الشعبية ناس حى الخور وكمبو حاج ابكر وحى شماشة وفريق الطين مراعاة لامكانياتهم وثقافاتهم ولحدى ما يجى يوم يكون فيه صورة ورقة امتحانات الشهادة السودانية بالصورة الاتية
امتحانات الشهادة السودانية للاحياء الشعبية والشماسة
مثلا صورة لامتحان الكيمياء
يافردة اجب على الاسئلة التالية:ـ
ماهى المكونات الرئيسية للسلسيون ابوصاروخ ووضح درجات الكيف بينه وبين انواع السلسيونات الاخرى
سؤال اخر:-- اوجد الوزن الذرى للتمباك
مثال اخر لامتحان الجغرافيا
ياشفت( بكسر الشين والفا ) ومعناها تفتيحة
ارسم خريطة كركية للين به سبعة بليات واوجد المسافة القانونية بينه وبين الجوكو
مثال اخر لامتحان اللغة العربية
من القائل يافارة
شتات خالى محطات
يادقوس اعرب بيت الشعر الاتى
لا للديون واى شيـئ غير كاش لا يكون
مثال اخر لامتحان الرياضيات
جضم المسائل الاتية ياجوك
قيمة التذكرة فى سينما الحرية المختصة بالافلام الهندية 2000 جنية ومتوسط الزوار فى اليوم 5000 زائر واذا كان 45% من متوسط زوار سينما الحرية هو نفس العدد لزوار سينما الخور اليومى مع العلم بان قيمةالتذكرة فيها 1500 جنية اوجد بالدينار قيمة الدخل اليومى لسينما الخور بدون لحس واستخدام الة حاسبة)...ا)
نرجع للموضوع:--وكما اعتقد يادكتور بان الدراسة بجامعة الخرطوم وبقية الجامعات بولاية الخرطوم حق لكل طالب سودانى
واشارتك لسنة اعدادية لطالب الولايات الاخرى يؤخره عن دفعته بولاية الخرطوم وهنا ينعدم العدل فى هذة النقطة
وايضا اذا افترضنا ان كل طالب يدرس بولايتة فهذا يقود الى عدم التعارف وروح التعاون بين طلاب السودان من مختلف الولايات فالجامعة بغض النظر عن دورها الاكاديمى فهى دار تعارف وصداقات بين طلاب السودان من ختلف انحاءهـ
لذلك ارجو متكرما من الجميع وخاصة الجهات المسئولة السعى لوجود ذاك الحل القاطع لهذة المشكلة
ولكم منى غزير الشكر

عمك حسبو

يازول حمد الله علي السلامة وبركة الظهرت
وشكرا عل النص الساخر جدا والجاد ايضا
وحال التعليم اصبح يغني عن السؤال
خاصة وقد اصبح التعليم الان لاولاد المقتدرين داير طب دار سجم رماد كلو بالقروش
وبعد كمان جابت ليها كشف امتحانات
الله يدنا خيرهم
لك الود
وكد امش شوف المدرسة الابتدائىة الفتحتها وزغت منها في البوست التاني

عبدالله جعفر

up

الاخ العزيز عبدالله جعفر
اشكرك دون محدودية على مدخلاتك الحلوة
التعليم فى السودان هو احدى الامور التى تهمنى فى وطنى لانه يعنى مستقبل اجيال وليس افراد
اتمنى ان يصل التعليم فى السودان مايجعلنا رموز عالمية له
تانيا
اما بالنسبة للزوغة من البوست بتاع الابدائية بس كان عندنا تسميع واخوك ما حافظ سجم رماده
وللجميع حبى

up

السلام عليكم ياجماعة
فى صحيفة الراى العام اليوم 13.05.03 تكرم الاخ د.البونى فى عموده حاطب ليل بنشر مقالى الذى سبق وارسلته اليه على اميله باسمى الحقيقى ولم يتمكن من قراته وبد ذلك قمت بنشره فى هذا البورت وجاء اليوم فى الصحيفة باسم عمك حسبو ممايدل على ان د.البونى وصله مقالى هذا من البورت .. فارجو منكم شاكرا افادتى ان كنتم تعلمون كيف وعن طريق من وصل مقالى هذا لدكتور البونى..حتى اقدم له شكرى وتقديرى وحقيقة انا سعيد بنشر مقالىهذا..والف شكر لمن ساعد فى توصيله..وشكرى لدكتور البونى اذا كان اخذ هذا المقال بنفسه من البورت
وشكرا له فى كل حال..
عمك حسبو..

up

انكل حسـبو
لقد اطلعت على مقالك منشـورا بصحيفة الرأى العام بعدد الأمس 9/5/ بباب الأستاذ البونى حاطب ليل وقد استمتعت به كثيرا
رجائى الا تحرمنا من مقالتك البهية وطلعتك التى أأمل ان تكون ايضا بهية

عمك حسبو،سلام
اظنو والله اعلم،الدكتور قااعد معانا في البورد دا،والموضوع جميل
تسلم
regards

سلام ياحلوين تسلمو انتو قلقو ومانوبيا
بس كنت داير اعرف وصله كيف
سلام