بين ليلى وسعاد

يقولون ليلى بالعراق مريضة
كان كدي النقوم أبلس توبي أمشي أشوفا يا مريم ما شين نشوف ليلى قالو عيانه كلمي فتحية الرسول معاك وشوفو فاطنه لكين بدرية ما أظن عندها مداخلة معاهم ، إنتي يا بت أمي الجاب ليك الخبر منو يا دي ، والله أبو وليداتي قاعد براهو في الصالون مركب نضاراتو وسافي وبعد ما شرب كباية الشاي وبدون ما أسألو قال الكلام ده ، شنو هو بعرف ليلي من وين ، هوي يا راجل هوي إنت ليلى دى منو بتعرف ليلى دى من وين وريني ساكت مالك ما تتكلم.
يا بت أمي ما تمرقي الناس منتظرنك ماشه ولا ما ماشه ، كدي لامن أمشي مع الناس وأجي راجعه والله الليلة يا أنا يا إنت في البيت ده لو ما قلت لى ليلى دي منو.
بانت سعاد فقلبي اليوم متبول
شنو والله يا هو إنت يا راجل ما بتخجل ما بتستحى على روحك قايل نفسك ولد صغير صلعتك وصلت نص راسك ونضاراتك زي قعر الكباية وبعد ليلي كمان سعاد هو يا راجل هوي انا المشي بطلتو أمشن يا نسوان أنا ما ماشه ليلى تطير في السما ما جاتني في بكا حبوبتي التايه.
يا دار عبلة بالجواء تكلمي
يا راجل هوي طلقني كمان بعد سعاد وليلى عبله طلقني إنت قايلني أنا مقطوعه من شجره أنا هسع والله بمشي لي أهلي طلقني ، ياو ليه لا حول ولا قوة إلا بالله يا ولية عنتر بن شدبد العبسي هو القال الكلام ده ما أنا لا بعرف عنتر بن شداد لا شيطان طلقني

سلام مربع

سيدي الملا عمر

**
وحات سيدي حسن هو الغلطان
الراجل قاعد لي لقيط القوالات والكلامات
الوداهو يجيب الكلام والقوالات دي بيتو شنو

يقولون ليلي بالعراق مريضة
الله يقلقلو الحر

** هامش
_______

افاده من شهادة جاره بتحاول تصلح بين المراة وراجلها




______________
شكيتكم على الله يابوش وبلير وصدام

الرائعة شيري
المشكلة ما في القولات وليلى وسعاد المشكلة في إنو زوجتو في الحساب قدحو يعني لو طلقا أبو القدح حا يعمل فيهو عمايل.

سيدي الملا عمر
لك السلام
كان سوت شنو كان قل
الا ليت ايام الصفاء جديد
ودهر تولي يابثين يعود

عبدالله جعفر

أخي عبد الله
تحياتي
ألا ليت أيام الصفاء جديد ودهر تولى يا بثينه يعود
برغم ما يحمله هذا البيت من غزل حسي واضح إلا أن المسألة قد تبدو عصية على فهم بطلة هذا المقال وليته قال هذا بيت الشعر هذا حتى يكون في حل من عمليات الترضيه الغير مجديه ، وفي كل الأحوال وكما ذكرت فالرجل مكره لا بطل وإلا كان طلقها طلقة بائنة لا رجعة فيها.

ٍسلام مربع

عليك الله كان فيها شنو
لو كان قاليها

**
عشان بريدك اديتو وردة
بيضا
زادت علي الريدة
لمبحة قلوبنا مابنفترق
ياصيده
ولو افترقنا
في الجنه تاني نعيدها

كان بحاسبو
ولا بحاسبو الطراطير



هامش **
___
واحدة عاملة بتغني





________________
شكيتكم على الله يابوش وبلير وصدام

شيري الراجل قرفان وزي ما قلت مكره لا بطل على تحمل زوجته خوفاً من أبو القدح عمه عشان كده حتى لو قال الكلمات دي ما بيقدر يقول ليها
ولو افترقنا في الجنه تاني نعيدها
لأنو بيكون بي كده كذاب أشر ، أو بستنسخ غلطة يصعب تصحيحها، خاصة وأن الحياة في الجنة تأبيده يعني لا يقدر يمشى حفله لا يقدر يجكس من الحور العين وسيك سيك معلق فيك.

..
..

تعرف يا أخوى الملا ، عمك الشيبة دا زودها حبتين ، المرة جات كاسبه لقتو يخطرف

ليت هنداً أنجزتنا ما تعـد وشفت أنفسنا مما تجــد

المره قالت ليهو ، هو ياراجل ات حاري شنو من المره دي

لكن هند ما هينة تب ( دقّست ) صاحبك دقيسة تمام

كلما قلتُ متى ميعادنـــا ضحكت هند ، وقالــت بعد غد

زولك منبطح في الهمبريب ، سرح خيالو لبكانات صعبة خلاس قال شنو

سألتها قبلـة ففـزت بهـا بعد امتنـاع وشـدة التعـب
فقلتُ بالله يا معذبتي جـودي بأخـرى اقضي بها أربـي
فابتسمت ثم ارسـلت مثلا يعرفه العُجم ليـس بالكــذب
لا تعطين ( الجلكين ) واحدة يطلب أخرى بأعنف الطلـب

أها الحاجة سكلبت ووب علي .. ووب علي

طلقني ..

اللجاويد اللجاويد ..

عمك الحاج دا يا شيخنا ، تربيتو لوليداتو طلعت فشوش سااكت ، الولد كل يوم جايب ليهو مصيبة مع واحدة من بنات الجيران ، مرة عاد وقع وقعة شينة قام شاغل ( ثريا ) طوالي جرت خلف ومشت لعمك الشيبة ، الكلام دا حكاهو الولد بي نفسو

شـكتني ثريـا الــي والديّـا وقالــت فتاكم تجني علــيا
حسا الخمر حتى استطارت هداه فشّد وألوى على ناه.... يــا
وبالرغـم منـي ترضب ثغـري وطوّق نحري ولاك المحيــا


آها التسوي كريت .. تلقا في جلدها

لكن آ الملا آخوي ، كما أخاف من ناس صاحبتنا الجندرية والتانيات أقول ليك النسوان ديل ناقصات عقل ساااكت ؟

رحمابي

أخي الرحمابي سوف أترك الجمل بما حمل وأتشعبط بطرف البردعة ، يا أخي لماذا تحاول دائماً أن تزج بي في حرب أعلم سلفاً أننا سوف نكون الطرف الخاسر فيها ، فقد سبق لكم في مقال سابق أن فتحت كوةً وعلى مسئوليتك لا مسئولية غيرك بشأن النساء وطلبت الفتوى والحديث في أمرهن وكيدهن ولقد ألهمني الله جلت قدرته حيناها الحكمة فآثرت الصمت على الكلام لأنه ليس من الحكمة أن تغلق باباً دخلت منه حيث أنك قد تحتاج إليه مرة أخرى في الخروج ، وأكرر أخي الرحمابي أن المعركة خاسرة بكل المقاييس فدع النساء وشأنهن وقل ما شئت في أهل العوض والملا وبدر الدين وابكر لأنه في أضعف الإيمان لو إنتصروا عليك في المنتدى تكون قادراً على أخذ ثأرك منهم بأن تلبد لهم في السهلة خارج المنتدى بعد الحصة الأخيرة أو تدعوهم لحفلة في قريتنا وما أن تدق الدلوكة حتى تقوم بطلبهم لمبارزتك في البطان بالسوط وسوف أطلب لك شخصياً أغنية السوط السوط يا جنا السوط أحلى من الموت يا جنا وأمام جميع جكس القرية والقرى المجاورة والقده عطشانه.

الملا عمر

السطر اللخير دا كلامي أنا ، وانا جريت واطي ومسحتو

أها الكلام القالو عمك في هند
وليدو البهابش في بنات الناس دا مالك زغت منو

قديما قيل أن الملا عمر هرب على دراجة نارية
يعني موتر بس ، حتى مش رقشة

ظاهرة الزوغان دي شنو


مع تحياتي

أخي الرحمابي
قالت العرب بلا عرب بلا كلام فاضي العرب بالجرب ، المهم الدخول في الشبكات هين ولكين التأمل في الخروج وأنا بيني وبينك كنت ناوي أدخل في الموضوع وفعلا تاوقت لكين فكرت في الخروج لأنو مواضيع زي دي بتشبه الكوكاب ون وي لذلك آثرت السلامة.
أما حكاية جري الملا ولو على ظهر شاة تيعر فله الحق كل الحق في الجري وطلع أرجل من ناس فلان الذين كرهونا التلفزيون والراديو وحتى صنابير المياه ولمدة ثلاثة أسابيع حسوما حا نعمل وحا نسوي جنس كلام ووحاتك عيك لا خبر لا أتر ولي يوم الليلة ما معروف بلدهم وين على الأقل بالنسبة للشعوب العربية ، وقلت لي الملا شتت بي موتر ومت حايف الدلاقين الكتيرة دي تدخل في الجنزير ولا اللستك الوراني وتجيب أجلو.