هــين - من معلقات البطانة

هذا الشعر الرصين ينسب إلى الصادق ودآمنة
حر عنافي نسل أماتو قاطع الشك
جدو الأبيض السابق خيول المك
الرمى الحجيل من النزيل الفك
بعيد يا أربد الشرق المجارب السك

أكل الصافي علاّك يا اب سناما رك
أبوك فارط الجدي الأخد الروينة وجك
على ست الصبا الدكانا قاطع اليك
رايف وفكفك الحسكة أم حديداً شك

اب صلعة القطابي الطار بعد ما رك
اسرع منو فور هرع البروق لا شك
علي دكك الجنيب الراسي مك من مك
سوي مشي الهوي القالع بعد ما فك

يا كور المفازات اللي الخبر فرك
وقبال تبقي نايب للوعر جرك
رئيس المنطقة المنو الغميد انفك
اهجمو الليلة يا السمع اللقالو مدك

بعد اتفاضل الزهمول وسوطو جبك
جريك عنا وسرعك برق ونايبك كك
على ستي ام مرادة مني ما بتنفك
هجم كاضم وزي حاضن الحبارة برك

يا الرهو المسافر للحجاز شّرك
عادة جدك السوسيو عليها عرك
عاشقي منزه الطبع العليه الرك
بعيد يا غايس البرق أب هديلا تك

هذه المقاطع تعنعن كالآتي : عن نزار ، عن شنتير ، عن اللمين البنا عن الشدرة الكبيرة .. ولي غاية ما نجيب ليكم اتر هذه الشجرة ، أرجو أن تشاركوني الاستمتاع .

انهض قليلا حتى أمشي وأجيك

قال ليك
حر عنافي نسل أماتو قاطع الشك

يتحدث عن النسل النضيف ،، قطع شك نضيف

جدو الأبيض السابق خيول المك
هنا فيها المك نمر غايتو

الرمى الحجيل من النزير الفك
كويس

بعيد يا أربد الشرق المجارب السك
ممتاز

اهل العوض اخوي
ما تاكلنا كلام ساي
بالله ترجم لينا الكلام ده ماذا يعني لاني بالجد زهللت وأنا احاول الفهم
الحقيقة لنا من اللهجات والعربيات ما هو صعب الإدراك على عقولنا متواضعة اللغة
وتسلم

والله يا بت قضيم .... كان على راسي كما يقول أهل دار صباح - صباح أوي
لكن اترجم شنو .. دا ما كلام وااااضح وانتي ترجمتيه زي العجب ما شاء الله
لكن ولا يهملك ، حيث أنك أول زول بعبر هذا البوست انا حاضر بس ختي اصبعك في الكلمة البتوجعك ، وتجيك الترجمة زي عد النقود

سلام مربع
اهل العوض

عارف خفت تقولوا على حنكوشةعشان كده
قريت وزغت ..
لكن صديقتي بت قضيم
نفختني بالشجاعة
غايتو فمهت المك
ونسل اماتو القاطع الشك
تاني
مافيش كلو وصل المخ ابيض في ابيض

بالله يا اهل العوض ما تدقسنا

شيري ، أو سيري كما يقول أهل سريلانكا .. لك التحية ، أما عن الشرح فعليك ببت قضيم فهي فاهمة كل شي وما تدعيه من اشكال في الفهم فهو من قبيل تواضع العلماء .. شكرا لك

انا افضل اخت يدي في القرش البوجعني شوووو القروش تجي واقعة
تكون ذات وقع اصيل

اهل العوض يؤسفني اني ما فهمت جميع ما جاء في الكلام
ولا بد افهم لاني عكليتة شديد
اكرب كي بوردك والله معاك واذاننا في طوكيو

ياخوانا دي المعلقة الآولى
الباقي بحيرة البجع
والسيمفونية السابعة
وأخواتها

حليلنا منها الزايلة

الله يجيبك يا ياسر محجوب
ويا شنتير
ويا نزار
ويا السنجاوي - يفلق فينا ويداوي
ويا الحليلة
ويا الاربعين واهل التمساح اجمعين

الحبيب اهل العوض

انها الاصالة التى يجب ان تجد دوما من يحافظ عليها وان ينقلها للاجيال الجديدة التى تكاد تظن ان تلك رطانة

يا الرهو المسافر للحجاز شّرك
عادة جدك السوسيو عليها عرك
عاشقة منزهة الطبع العليه الرك
بعيد يا غايس البرق أب هديلا تك

وهنا اقول

جنس الرهو ده والله حكايته حكاية

سلمت لنا اهل العوض وان لم نستطيع مجاراتك ولكن لا شك اننا استمتعنا كثيرا بهذه الاشياء النادرة والتى لا تتداول فى اليوميات المطبوعة او المسموعة او المرئية ..

لك تحياتى

العمدة .. حياك الله

كتر خيرك ، يازول ها والله انا بصدق بسرعة
بعدين زي ما قلت ليك ، الكلام دا مو حقي ، أنظر العنعنة

وبيني وبينك شرك الوارد في البيت الأول هي أصلا شرقت - طبعا التاء ساكنة وتتحول القاف إلى كاف . وهكذا في أغلبية الابيات - الكاف تليها تاء المخاطب

أهل العوض

تحية ليك يا جميل وانت تسوح بينا وتذكرنا المرابع فى بطانة اب على، وبين السطور والله يا ابو حميد اتكرفت دعاش شرق الله البارد، الا العين بصيرة والليد قصيرة

وكل اول ليهو اخر زى ما قالو القدام

اغرب حاجة فى النضمى ده تعرف شنو، انه القافية كلها واحده وماشه بى روى واحد، وده طبعا نمط ما مالوف عند ناسنا اهل البطانة، ودائما شغلهم بالمربعات، انت طبعا فارز الشغلانة كويس، عشان كده الشاعر ده فلته والله وزول عنده موهبة فذة جدا جدا

وتانى شكرا على الامتاع

أب آمنة أتابع الدرر التي تنثرها علينا حينا بعد آخر .. الله يخضر ضراعك

لا شك أن القافية هي أس الجمال في جميع هذه المربعات .. ذلك أن القافية كاف وكاف ساكن كمان .. إضافة إلى السبك الجيد الذي ينم عن المقدرة المتميزة للشاعر .. تحية لك مرة تانية يا عميق الاصالة

وصف الخريف
يوسف عبد الله البنا

بشوف لي برق هناك متل الزناد بق بقا
وفلح قلبي بسلاحاً ولا بتلقى
عاين فيه عقباً رفو طبق البقة
فسد عقلي ذكرين ام ضميراً رق

قنب يرف ويخلف في السحاب ويسوق
عاودني الحنين وفؤادي تاعبو الشوق
بعد مو برق بقن لامعات تلاتة بروق
اتوزرن جميع شالن سحابن فوق

من قدام عديل فر السحاب عانينا
والبرق فيه فح لمعاتو حادة سنينة
ماشة علينا جرت دايرة كان تروينا
فوقنا اتحكرت حامياها تمشي الحينا

بسم الله صبت فوقنا ليل جات ماسية
لا كشاحة لا براق مطرتن راسية
يارب ياكريم هون علينا القاسية
تتملى الحفاير والأرض متواسية

صبت فوقنا لا قرب الدغش ما نامت
أصبح سيلها دافر والمخاليق راقت
امهز المسادير والخلوق الضاقت
على الدام الصغار بدري البهايم ساقت

الشدر المدلهم سببه اصبح جار
والباشندي فاح في روبة الكتار
الخلفا القبيل رقت من المسدار
قلبت صوفة بت الـ للضلع كسار

هاج بكرينا قنب في حقاتة يطارد
ود بريبة الصي ام وريداً شارد
هايح فوقنا الليلة كل يوم مهيف وشارد
يطري الزول مجالات الشلوخو عوارض

هاش في القبلة لاح حرقوض خلقلو سحابة
لا هلال لا نجم بقت الأرض دهرابة
صبح سيلها ناحر الارض مسيلو سرابة
وناقصة الحفاير اتقرنن تبابا

بعد ما جف ماكل طير بشوفو طرابى
سمع الخاوية شاف مندوف ونطح الغابة
الوزين يعوم مرات يمش ويتشابى
مرات برة يمرق ويتنفض هبابة

معشوقن غرامن في حشاي ماكلني
شفت شبيها في النال البموح متني
فراع الشدر من العمار متحني
شف بي عيني كاكا كتفا الحنني

ريحة ام بنة فاحت وقشة النعناع
ونوار التبر زي روبة المرباع
يقوقي القمري طربان عامت الفراع
يزيد الشوق عليه الحزمو البراع

يدوّم عزك الساكي ودفن تيرابك
يا الغلبن وصوفك كل من يلهابك
نسامك يسوق في قشيشو والغيم حابك
والبراق شلع كبد السحاب متشابك

هاك دي يا بت قضيم

ما تستاهل الكمرة وسكون البوي
شما خمشو مجارة الوهوا والدامبوي
جاب لي كتبتها اللخرش أب هبوي
فوق الهويلة بالهوج الداقوي

دا بالمناسبة شعر غزلي، دي مني عشان أساعدك تفهمي.

الفهم الكلام الفوق دا يفهّم بت قضيم

.

جـبايهن صفاهن والدلال لالاهن
وردات الخدود طل الربيع بلاٍِهن
وضع فوقهن كما الاكتاف هدل خلاهن
رقاب الريل عيون بقر الوحش فى خلاهن


الشيخ احمد ابوعاقلة ابو سن

بشد وأركب على الياخد له عنه
فريوة الريف مع التوب المتنى
يتب عجلان قبل ما نلم رسنا
بيوت نورة ام شليخ .. وين من أهلنا

المحلق الحمراني

.

المهم بعد ده كلو مرقنبو قرنبو؟؟؟
!!!!
كدي يا ود شاموق كان عندك خطيبة واللا مرتك امشي قول ليها جنس غزلك الظريف ده
كان شفت عينك التانية بعد داك تعال قابلني
ومع ذلك
تتحداني افسره ليك؟؟؟

أهل العوض
معشوقن غرامن في حشاي ماكلني
شفت شبيها في النال البموح متني
فراع الشدر من العمار متحني
شف بي عيني كاكا كتفا الحنني

ده الكلام
أنا والله سألته،،، لكن والله ما شلته
كدي اسأل عمك سلمان

ود شاموق .. غايتو المديح القصدت بيه بت قضيم انا عليك امان الله غلبني تب .. كدي انشوف بت قضيم كان فهمتو .. لكن أبيات المحلق خترية .. كتر خيرك .

ريدر سفن .. حبابك .. شكرا على الابيات الرائعة .

بت قضيم .. شفتي كيف؟ أها ياهو زاااتو

يا أهل العوض دا دوبيت مكتوب قبال حوالي 400 سنة، يعني الكتبو زاتو يكون نسى قالوا في شنو، عموماً الأبيات الأولى نسيت أكتب اسم قائلها وهو : حسان الحرك وقد قالها لزوجته شما.

.

ووكت كيفتك أبيات المحلق هاك دي تانية

بشد وأركب علي ود البشاري
فريوة الريف مع المحزم تجاري
يتب عجلان قبل ما ألم حكاري
بليد نورة أم شليخ .. الليلة طاري

المحلق الحمراني

.

ود شاموق .. أحييك وهاك من نفس المغترف

الـ اتقسو يا طه وغلبنا نصيدتن
دارو المرة بالسافل وابوهو صعيدتن
الـ شرك القماح قجيتو وابى ما يصيدتن
حزمو النوق وازعج نوم عيوني جضيضتن

وانا بحييك ووكت جبتا سيرة طه هاك دي

الليلة النفس صبحت حزينة وعامدة
وما بتسلى بي برقع حميدة وحامدة
فارقنا الرباعة أبان قلوبن جامدة
ناس طه اللحو .. ضو القبيلة الخامدة

الأعزاء الأفاضل .. والماجدات ..

أهل العوض .. ود شاموق .. بت قضيم وشيري وكل من شارك ..

أحييكم .. والله كلامكم دا : أضربني ووزن أفكاري وتمى كيوفي

لا أحسن حفظ الدوبيت .. ولكني أحسن التذوق .. وأحلق به في مدارات الصفا والرقي والناس الطيبين والهواء النقي أو إن شئتم الهوى النقي .. هواء البطانة ..

التحية لكم ...

بعدين يا أهل العوض الشعر دا لو شرحوا بفقد النكهة يعني ببقى شمار في مرقة ..

جـــاد

جابوك للسوق ساكت درادر ضيعة
وامك فى الحريم ماه المره السميعة
نترة ناس ابوك اللى الرجال لويعة
ات كان كبر جنبا تقلب البيعة



الحاردلو

أهل العوض
التحية والتقدير
امل ان تستمر طويلا وكثيرا
وطبعا مرة مرة الشرح وتوضيح جماليات الشعر الحميل دا
لك الف شكر علي هذا البوست
ويديك العافية يازول ياجميل
ومستمتعين ايما استمتاع بالقصيد وبالتعليقات ايضا
شكرا لك وللجميع
عبدالله جعفر

الجيده اتلع بلا عروق
ديسه العتم كشمه البروق
يخفي البدر بهجة شروق
شوف عيني ليه البوش يروق

اهل العوض
وين طلاسمك ؟؟؟
ما تقول
واللا
خلوا الدار خراب هاديك بيوتم قافلة
يبقى قليبي متقفى الأثر والزاملة
؟؟؟

سلام أهل العوض سيد النظام و الدايره
ماك هين و لاك تاجر البضاعه البايره
طريتني البلود الفوقها تومتي النايره
جضت ناري، لي سدري الكمينه الفايره

دحين يا أهل العوض أخوي القول الجبته ده... حر عنافي نسل أماتو قاطع الشك.. ده نضم ما بقدروا عليه الا الجعاص من أهل القول والفراسه، ده ما أياهو لزوم ما لا يلزم هول أبو العلاء المعري، آمنت بالله... و الشي التاني آخوي ماشاء الله... بكان ما تقيف ما بجوك الا الزينين من أهل الذوق و اللطافه.. الله يزيدك من نعيمو يا سيد الأدب و الأصاله...
يا ود شاموق جدعك سمح بالحيل، نزيدك من نضمي ود ضحويه مع طه الضرير

قمنا مشرقين ديك البقيت بتوايق
لجت بت عمر سرفن دموع المايق
قام بينا الضرير ما بروق ملقلق ضايق
دارج الشوح علي الكسب الوراهو طبايق

سيدك وارك الغلبه و مشي الكرعين
نبت فد مره يا ساحر الغروب من وين
يا الغول بت عمر ننظر جبينها متين
مالك يالضرير فارق صباح أم زين

وهاك دي يا ياسر تمامة

الناس العلي الساحر بشقوا الصي
أمسوا الليلة فوق راياً نجيض ما ني
ناس أب ترمة جاموس النحاس أب دي
عقدوا الشورة ميعادهم جبال كربي

.

و الله كلام الشى سيتوهاالصفيةأون لاين اهاأن جابتلهامتل هدا الحديث شوفوا ود البنا الفرجونى

هاك يا اب سن

جفيل البل علي المطر ال..وقع في رشاشو
وحن القمري لفريخاتو في عشاشو
حنين الغربوهن وفي المنافي بشاشو
عندى,وشاهدي ها الدمع النزل بشاشو

عمر الدنيا للبعرف حسابو تلاتي
يوما راح وهسع يوم ويوما اتي
مادام عمري زايل زي زوال الشاتي
خلني ها النواصلو القلبي بيهو بهاتي


مالو القمري في فرعو الندي بسجعلي
لايملي الزمان ال بالخلا منجعلي
برجع للوطن كان ما الموت يجي ويفجعلي
لكن الشباب واحزني مو راجعلي

يا ود طه لاتقولي ولا تناصحني
متل القمري مالك بغناك جارحني
من الطيفو لابفارقني لاببارحني
بسأل ربي كان الموت يجي يريحني

يالايمني في طربي وغنايا وشوقي
مهما تلومني مابتحمي القماري تقوقي
وكت الموت علي مكتوب وقدرا فوقي
خلني ها النغنيلو الظريف الذوقي



الفرجوني


نقلاً عن


يالفرجوني متين يقوقي القمري في اعشاشو

.

ودي برضو نقلاً عن

يالفرجوني متين يقوقي القمري في اعشاشو

.

جابوك فى السوق ساكت وللفراجه
وامك فى الحريم مرة بتفضى الحاجة
كفتت ناس ابوك للعافية ما بتتعاجة
وات كان كبر ما بتنجلب لخواجة



الحاردلو

تحية من هنا لي القضارف .. لجميع الحبان زوار هذا البكان .

بت قضيم والله كلامك صاح بس الدار ما بقت خراب بزيارة هؤلاء الكرام وانت تقودين الرسن ، أفو - لا يقودولك الرسن يا بت المؤصلين ومفصلين .

جاد ، جادك الغيث يا جنى ود زايد ، اوافقك ، الدوبيت والشعر عموما في ظني أنه يفقد الكثير لو قاموا الناس يشرحوه .

عبد الله جعفر ، نحييك ودايرين نشوفك وبقية المبدعين .. وايدك معانا

القاصع ود شاموق والله ما قدرنا نجاريك عشان كدا ما ردينا عليك .. الله يزيدك فيما تحب شكرا على امتاعنا بالفرجوني شعرا وغناءا

استاذنا ياسر محجوب .. آزول بالراحة ، العين ما بتعلى على الحاجب ، نحن بنجيب ليكم من حق الناس وانتو بتقطعوهو أخدر .. الله يخضر ضراك ويعليك ، ويقدرنا على جزاك

وللجميع أقول : اتصلنا بكبيرنا شنتير وعرضنا عليه ما قمنا به طالبين الاذن والتصحيح ، فكتر خيرو ادانا الاذن وادانا قرصة في الاضان وصحح ما خمجناه ، وقمنا بالتصحيح ..وقال إن الشاعر هو الصادق ود آمنة .. فله الشكر والتحية والتجلة ، ولكم جميعا الود كله .

يا أهل العوض مين البيملا مكانك
الما قلتو انتا نقولوا نحنا عشانك
والبسأل سؤال بنجاوبو بي تبيانك
مشهود بالكرم والخير بقية إحسانك

.

ياخواناأنا والله ما بعرف أقول الشعر ، يا ود شاموق اوضعت تخاجلنا ، يازول نحن ما قدر كدي ، إلا كان اجيب ليكم أخوي اللكبر مني كان يقدر يكافيكم .

ويا ريدر سفن أحييك حتى تستغيث ، ومنتظرين متاوقتك

وهاكم جزءا من مسدار الصيدح للفرجوني

يا شوح الجمال ما كت مروق و رايق
مالك هسّع في رباطك تمل مضّايق
قال لي البرق هدا القلع السحابة وسايق
حقي شيومو وات حقك جلوس الرايق

يا البرق البتلعب فوق سحابك فايق
فـرّك باسًم الأدعج كحيل المايق
مرة تفر ومرة من السحابة توايق
ماك داري الجحيمك خلى نومو دقايف

يا البرق المسافر صح و رايق درك
اسقي الريدو في صفحة ضميري اتمرك
مما رف فوق سهم البطاين فرك
قت لي قلبي عاد ليك التقربن و حرك

قت يا صيدح الريل المسادر غرك
قلبك قولو يقّن لي عذابك غـّرك
السفر القريب وابتر قبل لا يغرك
فنق وبقون وشقاقاً سوامو بضـرّك

صغى لي قولي سمّاعو الرقيق اتحرًك
نفى شنشونو وانصقل المعد ومعرّك
قال لي ونفّ جنحيهو الربد واتعرك
كفي هميم وعندي صميم فعالاً يسرك

مرق مخلوفتو مما شافا حيلو اتشمك
قت لو سلمت يا المتل المناضر دمك
طايع وراسي مو كبوري هاش واتزمك
قت لو ادنيلي لي شبال درعتو مزمّك

بعيدة بلودك آ المتل المزرقن فمك
وأحلى من الروائح وطيب عبيرن شمك
قت لي قلبي ها المجروح بمتّر دمّك
ابشر بي نظرة الشوفتو تفرج همّك

يا الفي سبعة زايد في السماح فوق ندك
لا عبدلة يسطع ضاوي نايـر خـدك
ذوقك عالي ، حالي مع البخاطبك ردك
وجسمـاً ليك رطيباً مـنو فوح ندك

ها الظبي العلي قفر البطانة مردك
ذكرك بالعفاف في قلوبنا عمّ ودّك
ديسك قولّو كرّ في المتاني مهدّك
طرفك قولّو آذيت القلوب بي حدّك

حسان أبوعاقلةأبوسـن






مسدار المطيرق
للشاعرين، الحاردلو و
عبد الله أحمد أبوسن





من المعروف إن الشاعر الحاردلو مولع بالجمال من حيث هو في كل مخلوقات الله، ويتضح ذلك جليا في مسداره العظيم ، مسدار الصيد. و تدور قصة مسدار المطيرق الذي نتعرض له الآن حول إحدى الحسناوات، و اسمها الروضة بت السره، كان الشاعر معجبا بها و كان علي ميعاد للقائها وشرب القهوة معها. فحضرت لمجلسه و لكنها وجدته نائما فأخذت عصاه ( المطيرق) و عادت بها أدراجها و أخفتها لكي تثبت حقيقة حضورها في الميعاد.
و المسدار اتخذ شكل الحوار بين الشاعر و أخيه عبد الله الذي عرف بالقصة و بالتالي كان مشاركا في صناعة المسدار. و لعل الشكل الذي خرج به المسدار و الصور و التشبيهات البليغة و العوالم التي حلق فيها تجعله قطعة أدبية فريده وتخرجه من نطاق التداول للشعر في إطاره العادي إلى شئ أشبه بالمسرحية الشعرية في صورها المعروفه حيث تتضمن عناصر الحكي و السرد في الإطار الشعري.
يبتدر الحاردلو المسدار قائلا...

ذكرتي بالبنات لا عن مصوع فاحت
ضايق غلبهن من شينتن بتاحت
جديع ودعتن بالليم علي ما طاحت
هبرت كفتي و عقب المطيرق راحت
فقال له عبد الله مداعبا...

أصبحت المطيرق في نعيم و سروره
و ات النوم عبدتو و ماقريت لك صوره
ساعتين إن صبر كت تحظي بالبتدوره
سعدك إن رقد ما بجبر المكسورة
الحاردلو..

سرقة عيني داك الليلة ماها مريه
أصبح حالي متل الدخلو الظبطيه
اترجاك يا أبو التايه أول سيه
ما اتواخد أكون في حاله غير مرضيه
عبد الله....

مسامح يا أبو يوسف و لو في ميه
نعمن للدغس بتسمح القافيه
إن بقي للمطيرق شيله جاب لو حكيه
مي مسروقه لكن فيها حكمه خفيه
الحاردلو...
بعرفك وكت تقوم في حجازه و اجواديه
تبذل فيها جهدك بي صفاوة نيه
معلوم تصلح البطحاني و الشكرية
لكين المطيرق ما بتجي غير ديه
عبد الله...
شيلتها في الحقيقه مثبتابا الجيه
خوف مسك الضهر و اللوم مع الكليه
بي أسباب المطيرق لا تسيلك ديه
أنا ملزوم بها و عقب الضمانه علي
الحاردلو...
مطرقي من بشم مرداء من الغصان
و نونايا كتير جادعاه علي الجديان
سراق المطيرق فيهو نوع رسيان
مو متل سراق حمارة المسمي أخوك حسان
عبد الله...

شرفت المطيرق سيتها زي الزان
دا كلو السبب بريبة العنقان
ما لمناها ها السرقه أم حديثا بان
كان تتني فوقها نكتر الأوزان

(أنـــــــس و صـــمت)

و يتدخل عدلان ود علي ....

جيب قاف المطيرق خلنا النتسلي
نتجادعبو في مجلس أخوك عبد اللاه
اضحك و انبسط خل فاطرك اللنحل
مي مسروقة اصلها عند برنجي الحله

الحردلو....
طول بالعسين قانص بدور كلبي
ما لقيت مستحق نمي و نوادر قلبي
دحين يا رضية كان فد يوم معاي تنسلبي
هاك يا سمحة زي ما تدوري مني اطلبي
عبد الله...

من حسس أم رشوم الحار بقول وا غلبي
مما لقيت لي وجيعا يعرف الحاصل بي
شمبانيها مو براني خافس قلبي

الشيخ ابوسن زاااتو
حبابك مية واربعين .. أها .. مادام وصلت يا طويل العمر .. نحن نخلي ليك صدر المجلس فهو مكانك .. والديرة ديرتك ميراث تيلاد

فاتنو الصعيد واتقصدنو شمالن
ودوارهن خبر قشا بطشش مالهن
مالي أنا الولهان مباري شمالهن
غابن وانطوى قلبي الولوف في شمالهن

اللــــه..... يا شيخنا ود أبسن.... أطربتنا و أمتعتنا.... وليك التحيه يا أهل العوض يا زهر المجالس

الاستاذ ياسر ، لك كل التحايا والله نحن بنكتب وانتو في بالنا خايفين نغلت كدي ولا كدي - وفي رجا مشاركاتكم

وهذه أبيات من الصيدح للفرجوني

ها البرق البتلعب صح و رايق درك
اسقي الريدو في صفحة ضميري اتمرك
دامن رف بي سهم البطاين فرك
قول لي قلبي عاد ليك التقربن و حرك

رفع سرجو و لشغ طوُفو و جبدلو قشاطو
و اللب و الحقب جملي الوشاك ضرعاتو
شبه الفي العقد شتّى و مرية وطاتو
قصدي هجومو بالمتل السفينة وهاطو

والله يا أهل العوض

ورفقته الرائعون

عقدتونا عديل كده

غايتو الواحد يقرأ ويتوحوح

والله أهل العوض جنس وحيح

الله اديكم العافية


رحمابي

Sorry fellows for this spell of absence. It was some winter hibernation; as Ahalalawad knew.

Good to see Yasir Majoub back in the Den, and Samau’al (the cub of all poets) joining the club. My trilling cries of joy are due: Ayyuuuy ayyuuy ayyuuuyyiiiiiiiiii. Again, ayyyuuyuuuuiii …. Eeeeeeeee333, ayyuuuuuyiiii

See you after this cranky PC is fixed.

Abishru Bel-khair ....

Shinteer

رفع سرجو و لشغ طوُفو و جبدلو قشاطو
و اللب و الحقب جملي الوشاك ضرعاتو
شبه الفي العقد شتّى و مرية وطاتو
قصدي هجومو بالمتل السفينة وهاطو

ده اكلام
ابشر بالخير يا جنا

Ahlalwad Akramk Allah Al Dar Dark wa Al Makan Makank

الرحمابي .. سليل عبد القادر .. الكرم هيلك ، انتو شرق ونحن هوي ساي ..

شيخنا وشيخ عموم شيوخ العرب ... شنتير .. نحن سعداء بهذه الطلة .. ورطانتك تبين مدى اعتسار إيدك اليمين .. لامن تلقى إيدك .. أدنا طلة .. متقريفين وراجينك .. القومة ليك

بت قضيم .. مش كدا بالله ؟ بس دايرين من الفي السحارة .

ابو سن .. العفو يا كبيرنا .

وهذه أبيات من جقلة (ناقة) ليوسف عبد الله البنا

البلا فيك يا الشنقا الطويلة ام شوشة
البلا فيك ياالرقك مقاشر الحوشة
البلا فيك يا الفيك الرجال مغشوشة
مون عارفين كناجك مر بسوي الدوسة

الشر فيك يا الشنقا البهبهب عرفك
مارقة ردوف مسعبتة راعية قنطار جرفك
يودر سيدو لابد في المحافل ظرفك
بطلب ربي ليك يا ام الحوار ما يصرفك

يام راساً متربش وللمحن جيابة
الله يلادي محنك يا الردوف وعذابا
ديمة معينة البلد البعيد تتشابى
يتقنت مباريها اب ردق ساكلابه

يا اهل العواااااض


الخيم مالك ابيتن
العربان ما تفتحلهم الخيمة

والله اقولك خلها في سهلة الله دي سمح النم في صدر القمر
ود اب سن ده بكون عندو نم كتير خلاس قبال ما ياكلنو منو البنادر
كشكشو ما تخليه يقلبلك الكلام بالانجليزي
هو ود شنتير وود محجوب وسدهم صدر المجلس تب وخلهم يتجادعو
الناس ديل ناس ليل ونم
بت قضيم وودشاموق ديل غريقين بلحيل


من قومة الجهل ما سميع قويلات قالو
تملي شديدي فوق كلسا بتب بي عقالو
ود الدود جفل قلب الحمل فوق خالو
يا ام دغمة الدمير من قمت بتوقالو

سميع دي اصلها سمع بكسر الميم ولانو التشكيل ما بتلقي
فضلت اكتبها بالطريقة الفوق
ودضحوية

يا اهل العوض ود الدود ده قاعد ولا هسي رامي الحمل لكن فوق ودخالو

الاخوة الاعزاء: اهل العوض و نزار حسين و ياسر محجوب و ود شاموق والجندرية و سموؤل حسان و بت قضيم و الصلحابي .. و كل سكان اللكيب العامر السلام عليكم جملة و تفصيلاً .. و نعلكن طيبين و مدرتين و لاقيين ايدكم في ها الدنيا المجلفغة
قيل فيما قيل .. إنه اجتمع نفر من الانس في دار إحداهن .. و كانت، بمعاييرهم، ممن تضرب بغية رؤياها أكباد الابل .. و كانت لا تجاريها في الحي غانية في صناعة الجبنة (القهوة، بلغة الاتراك). و قد دبر هذا النفر مؤامرة ضد أحد ندمائهم .. يدعي محمد ود بابكر الشهير بلقب القطيرة (فتخ القاف و كسر الطاء و فتح الراء .. و كسر الرقبة). فعندما قدم القطيرة الى مجلسهم متهللاً ممنياً النفس باحتساء فنجان قهوة (يمرق الوقيعة من العين) معد خصيصاً لجلالته و احتراماً لشاعريته (كان هذا الرجل شاعراً فحلاً لا يشق له غبار و لا تراب و لا حصحاص) .. اعترضه الندماء و اقسموا بالله (و بالتكفي حمارهم) ألا يلمس فنجاناً .. دعك عن الاسترخاء والاحتساء. فاستغرب شيخنا القطيرة، عليه رحمة الله (الزول ده كان حي الوقت داك يا جماعة) .. و سألهم ما خطبهم؟ فردوا عليه رداً مقتضباً و قاطعاً: يا القطيرة شوف .. انت قايل روحك عندك سفلي بجيب لك الغنا في الحزة (في اللحظة) .. و الليلة كان ما نجرت لينا واحدة قدامنا هنا إت زول اضينة سا و ماك شاعر و لا بتعرف سجم خشمك ده. و اضافوا شرطاً غريباً بأن تكون الغنوة بيضاء اللون!!! فبهت الذي أمامهم.
نظر شيخنا القطيرة الى السماء .. ثم الى الارض .. ثم الى دابته في الخارج .. ثم بسمل ثم حوقل و تكلم الى نفسه (غنوة قطع أخدر و بيضاء كمان؟ دي يجيبوها من وين يا سيدي الحسن) .. ثم نظر الى الغانية و هي توزع فناجين الجبنة على اصدقائه المتآمرين و تفترّ عن ثغر ناصع البياض (زي صابون كدي ما بتذكر اسمو والله) .. فأوحى له شيطان الشعر المو خمج .. فأنشد متغزلاً في الغانية:

بيضة سنك الضرس المسمّى العاج
يا تبر الضحى و قمر العشا الوجّاج
قطناً شال عمارو و فقّع النبّاج
و خيتاً تم عدادو و بهدل النسّاج

في الحلقة القادمة نتناول الشقاق الذي حدث بين القطيرة و هذه الغانية .. و الهجاء اللاذع الذي قاله القطيرة فيها. الى ذلك الحين .. اترككم في امان الله من كل شر .. و من النيران الصديقة أيضاً

لا إله إلا الله.. لاكين دا ما يوم السعد زااااتو ، نزار حسين (بقة عقود السم) ومقنع بنات جعل .. وفي معيته شيخنا شيخ عموم شيوخ العروب شنتير .. والله تستاهلو الضبيحة من مطايب الدكة ، واترك هذه المهمة لصنديد هذه الساحة ياسر محجوب ، انا ما عندي ، عادم عنز الشاي ، إلا كان اطلع السوق .

يا ناس باسمكم جميعا أرحب بنزار حسين وشنتير .. وأرخو أضانكم وابشروا بالنم الذي يمرق الفلايت

وزي ما قالوا عيب الزاد ولا عيب سيدو ، كدي الننجر

ود شنتير عديل تمام كيوف أصحابو؟
وصمد العز نزار قاصع البتل ركابو
زارو التاية فتنوا الفي اللكيب اترابو
جرو النم وجابو التبري نتحكابو

قبل الليلة كان في التاية ود شاموق
وود اب سن وياسر في الخلايق فوق
يعبو الجوف طرب ويملوهو طوق فوق طوق
يطرو الزول مجالات المباسمو بروق

أرجو أن يعذرني بقية الأخوة الأعزاء المشاركين ، لأن النفس قام وكان في العمر مدد بنهبشن بي بيت بيتين ، أخص منهم بت قضيم والرحمابي