ما أروعك يا انسان * قصيدة *

ما أروعك أنت يا انسان
الدنيا غدارة وما لها أمان
ساقتنا بعيد خلاص
شتتنا في الأمصار البلدان
كل الخلق غريب أمامك
لا كلامو يشبه كلامك
لا سلامو فيه حنية سلامك
لا ظلاً وريف مفروش
لا وجهاً يصابحك بشوش
لفيت الدنيا يا شعبي
زيك ابداً والله مافي
ما انت الديمة متباشر
ولضيفك بالواجب وافي
من وراك خاب رجاي
في شخصاً يحميه قفاي
غيرك انت ياشعبي الدنيا دمار
نست حقوق الناس
لا بتعرف ضيفاً لا جار
كل واحد عليه سادي الحوش
ما فيها ندى وشك الديمة بشوش
لا ترحابك..
تعالوا قدام اتفضلوا جاي
وحاتكم ..
حرم تدخلوا تشربوا الشاي
تعالوا يا الحبان
أدخلوا الله عليكم على الديوان
شرفتونا وعمرتو الدار
ما أروعك يا انسان..
تدي اللقمة لضيفك وتبقى جعان
ولسانك يلهج اتفضل يا المريود
وحاتك حالنا زين والخير موجود
عارفك نفسك طيبة زكية
وزيك أبداً في الدنيا ما موجود
زيك أبداً في الدنيا ما موجود..