Post: #1
Title: النقـــــارة........ قـدام....... بـاب السفـــارة
Author: سجيمان
Date: 03-19-2003, 08:43 AM
بيان من القنصل في الرياض ........ ما عارفو صحي والله ما صحي...كان ما صحي احسن لهم في سكاتهم ناس السفارة في الرياض....وكان صحي.... تبقى مصيبة....كل الشعوب ناس المشؤلين منها قالو ليهم حنعمل لكم...خطة لاجلائكم في حالة نشوب الحرب.... نحن لله الحمد والمنة.... قنصلنا الهمام... بعد ما شرب شاي الصباح وقهوة الصباح وقلب النت لمن فتر.....صنقع فوق ومسك دقنو بايدو.... اليمن...واداها مسحة..وجرا لو ورقة ...وكتب... اول حاجة يا دافعي الضرائب المغتربين السودانين...جيبو اكلكم....ودواكم وختوهم معاكم في البيت...والبتو في بيوتكم ساكت... والداير يسافر منكم ويمشي اهلو ويشرد من الحرب....وتشردو من الحرب ليه؟ وانتو جدكم الابيزح ولا بيتر قدام العينيهم خدر. وبعدين لما انتو تشردو وتمشو تتلفتو بهناك منو الحيدفع للسفارة بجاي؟..غايتو الزول الداير يشرد يبقى جواز مجدد ودافع ضرائبو كلها...وبعدين ناس قريعتي راحت العندهم عربات كركوبة... اوعى يركبو يشردو بيها... لانو ما حانخليهم يدخلو بيها.... السودان...اجدعوها في اقرب كوشة وتعالو جارين انتو ووليداتكم وشفعكم.. كداري...لحدي جدة....بعدين نحن ما مسؤلين من أي قرد يجي راكب لو حاجة قديمة... حنجدعها في نص البحر وهو جواها....الظاهر سعادة القنصل... ما قايل دي حرب.... بيفتكرها لعبة سوليتير... في جهاز الكمبيوتر القدامو...والمتعود يلعبها دايما وحتى لو انت جيت وقفت وسلمت لا يعاين لك ولا يجيب خبرك....ولا حتى يقول النشوف الهوانة دا داير شنو؟...وناسي سعادتو انو الزويل الواقف قدامو دا... هو الدافع حق جهاز الكمبيوتر البيلعب بيهو دا....وقلع اللقمة من خشم وليداتو...ودفع حق الكرسي القاعد فوقو دا و بتدور بيهو يمن وشمال.. وحرم امو من العلاج عشان يدفع لك حق الاتصال بالنت... الانت قاعد تدخل وتصفح فيهو اكتر من تصفح واستماعك لمشكلة زول جاك قاصدك..يا سعادة القنصل دي حرب مو لعب عيال.. ... عشان سعادتك يضع شروط للزول العاوز يشرد منها براهو والله بوليداتو....وزول شارد من حرب حيقعد يفتش لجوازو مجددوالله ما مجدد؟ وافرض ما مجدد؟ يقعد عشان يموت؟ وافرض ما عندو جواز خالص....والله يقعد يفتش في ايصالات السفارة... وعليهو كم ما دفعو؟....وبعدين يا اخي..حتى العربية العاوزين نشرد بيها تكون موديل مسموح بيهو.... انتو بتلعبو والله....وبتضحكو على الناس...ودي مسألة حياة او موت...
انا ومن يعز علي.. ومن يسمع كلامي.. والله ثم والله لو ما لقيت طريقة....... اتخارج بيها اجي السفارة...وافرش لي برش لي ولوليداتي ووليدات البيجي معاي...قدام باب السفارة..... ونجيب اباريقنا معانا... ولوليداتنا قصريات..لا بامبرز ولا يحزنون....ونبقى لكم في تولاتكم دي.... وتحلو لينا مشكلتنا...
والليلة يوم حوبتكم..
بيان القنصل
إعلان صادر عن السفارة السودانية بالرياض بالرقم س س ر/ق/5/عمومي
وتاريخ 11/3/2003م
وهذا نص الإعلان
بهذا ترجو السفارة بأن تبصر أفراد الجالية بالإجراءات الواجب إتخاذها في حالة نشوب الحرب ضد العراق لا سمح الله وتتمثل في الآتي
1- الإحتفاظ بمخزون غذائي كافي تركيزا على الأرز والماء والأدوية الحيوية .
1- التأكد من جاهزية المركبات وكمال أوراقها مع التقيد التام بالموديلات المسموح بها لدخول السودان .
2- إكتمال الأوراق الثبوتية من جوازات وخلافها والتأكد من صلاحيتها .
3- تحديد نقاط تجمع لتوجيه المواطنين لها وتقسيمهم الى قطاعات بقدر المستطاع
4- التقيد التام بما تصدره السلطات السعودية من إرشادات تتعلق بالأمن والسلامة وحظر التجوال
5- الرصد والتسجيل بالأسماء والممتلكات عند نقاط الخروج والدخول .
6- ترتيب الخروج والعودة مع السلطات السعودية ما أمكن .
7- عدم ترك المجوهرات والأشياء الثمينة بالمنازل وتأمينها مبكراً
للتكرم بالعلم والإحاطة واتخاذ التدابير اللازمة ... مع أمنياتنا بسلامة الجميع .
وتفضلوا بقبول فائق الشكر والتقدير
بتوقيع
خالد أحمد محمد علي
القنصـــــــل
|
Post: #2
Title: Re: النقـــــارة........ قـدام....... بـاب السفـــارة
Author: أبوالزفت
Date: 03-19-2003, 09:24 AM
Parent: #1
فى حالة نشوب حرب اتصل بالاخ سجيمان الرمدان لحجز قصرية لعيالك امام السفارة سارع بالاتصال فالاماكن محدودة
يا سجيمان انت نسيت لما تمشى تدفع بيمرمطوك كيف يعنى هسع حيعملو ليك شنو وانت عاوز منهم حاجة
|
Post: #3
Title: Re: النقـــــارة........ قـدام....... بـاب السفـــارة
Author: سجيمان
Date: 03-19-2003, 11:35 AM
Parent: #2
ابو الزفت ..... قلت حيمرمطوني زيادة.؟ ....طيب...... حاجيهم بدون اي قصرية للعيال
|
Post: #4
Title: Re: النقـــــارة........ قـدام....... بـاب السفـــارة
Author: bit barber
Date: 03-19-2003, 08:45 PM
Parent: #1
و الله يا سجيمان لو كلامك ده صحي يستاهلوا نجيهم بدون اي قصريه للعيال
|
Post: #5
Title: Re: النقـــــارة........ قـدام....... بـاب السفـــارة
Author: سجيمان
Date: 03-20-2003, 10:56 AM
Parent: #4
بت بربر........ الاعلان قدامك..مرفق
|
|