حسن الصدف

بسم الله الرحمن الرحيم



لكم اعزائي اخر قصيده كتبت امس الاول علكم تجدون فيها ما يرضي اذواقكم وهي بعنوان :


حسن الصدف


جمعتني بيك مره الظروف

من غير ميعاد حلوه الصدف

ما كنت يوم بنشد هواك

ولا يوم هواك كان لي هدف

جابني القدر في سكّتك

وارواحنا هامت بالولف

واتوشح الخجل المورّد وجنتيك

حتى الكلام طعمه اختلف

وقريته في عيونك خبر

طول مخبا وما انكشف

وكل ما اتوه جوه العيون

لبديع محاسنك بكتشف

تتارجح الكلمات معاي

واعجز اعبر عن جمالك بالوصف

دسيت مشاعر ريدي ليك

اصلو القليب مال وانعطف

واحلى الشمائل والصفات

في سكتك مختاره طايعه بتنجرف

تتبعثر الافكار تتوه جوايا

والاحلام تتابعك بي شغف

وايماني بي حسن الصدف

خلاني اعشم في وصالك بعترف