Post: #1
Title: عالم مقرف
Author: ود العجمى
Date: 03-16-2003, 06:57 AM
أين هى الحياة التى أضعناها فى سخف العيش . فى كل يوم تقرأ الصحف تشاهد الاخبار تجد ما تجد من الكلام العقيم . دارفور وما أدراك ما دارفور. و البشير وقرنق . وعشرين موضوع عن القسمة الضيزى وما هى القسمة الضيزى. ثم تدخل على أخبار العالم تجد واشطن تنوى وبلير يصرح وشارون قتل والقمة العربية . والله العظيم شىء يثير الاحباط . يا ها دى الدنيا؟ ويا هو دا العالم ؟
كلام أكثر من الفعل عن حقوق الانسان . وظلم على جميع المستويات . وصراع فى كل حتة . والله قرفنا وكترت علينا تنظير فى كل حتة . المهم كلها خمسين سنة بالكثير والواحد يرتاح من النقة. ما علينا
|
Post: #2
Title: Re: عالم مقرف
Author: koky
Date: 03-16-2003, 04:53 PM
Parent: #1
و الله النصيحة يا ود العجمي ليك حق
لكن البنسويهو ذاتو غلبنا بقينا ماشين ساكت
حقو الواحد يعمل يسد اضنيهو واحدة بي طينة و التانية بي عجينة
و اريتو بعد داك كلو يرتاح
|
Post: #3
Title: Re: عالم مقرف
Author: garjah
Date: 03-16-2003, 05:16 PM
Parent: #2
ود العجمي اخوي
يعني ضامن الخمسين سنة
طب القرف العليك شنو ازول
|
Post: #4
Title: Re: عالم مقرف
Author: امادو
Date: 03-16-2003, 10:14 PM
Parent: #1
معاك حق والله يمرر الخمسين سنة على خير
|
Post: #5
Title: Re: عالم مقرف
Author: ود العجمى
Date: 03-17-2003, 06:57 AM
Parent: #1
صديقى koky
لك الحب وحمد لله على ظهورك
لكن ح تسد دى بى طينة ودى بعجينة عمرك كلو ؟؟
دقنة
انا قلت بالكثير خمسين سنة يعنى وضعت أسوأ إحتمال وبرضو الاعمار بيد الله . لكن تبقى مصيبة لو زادت
أمادو
يا زول الخمسين سنة حتمر بخيرها وبشرها.. دا لو فى خير أصلا
شكرا ليكم
|
Post: #6
Title: Re: عالم مقرف
Author: shiry
Date: 03-17-2003, 02:53 PM
Parent: #5
سلام مربع
عن نفسي غايتو قربت اقنع بت خالتي ام مازن وشغالتنا النصف سيرلانكيه
ونفر قليل من صويحبات ماما
ان يهجعن معي الى خط مابعد قوز ابوضلوع
مع انني اجهل اين يقع هذا القوز
ولكن من تسميته فقط مقتنعة انه واق لنا انشاء الله
من مصائب يحضر لها الان
بوش وماادراك ما بليير
يقول بابا في معرض سؤالي له عنها
انها منطقة تفصل تقريبا امدرمان عن الشماليه
وهي من اسمها لا شيء فيها الا تلال الرمال
وهذا يعني انها امنة بعض الشيء
هذا ما قرأته في احدى الكتب العسكرية التي اهتم بها
هذه الايام
عليه ..
سوف ناخذ معنا راديو صغير يجيب امدرمان بس
من غير نشرة اخبار ومن غير برامج سياسية
ونجيب واحد راديو تاني اف ام من غير اغاني الخلايجه
ومن غير اخبارهم
ومعانا كفتيره شاي وكبابينا
وشوية جزر مجفف عشان لو الواحد توعك وعكه خفيفه
شوية كتب في الفن والفلسفه
والتاريخ
سياسة لا
وجع قلب لا
وبس نشيل معانا دربكه وعود
عشان نغني اغاني البنات بس
وطبعا السيرلانكيه
عشان تعرف انو الحياة هنا احلى
وح اعود
اكمل نضمي في التلفون
واسوي لي شاي كارب
واجيكم صاده
|
Post: #7
Title: Re: عالم مقرف
Author: ود عقاب
Date: 03-17-2003, 03:22 PM
Parent: #1
الاخ ودالعجمى
غايتو انت بختك ضامن خمسين على المره لكن هنا ماضامنين حتى النهايه من كتابه البوست دا
لانو هنا كل شى اجبارى ومامعروف ايمكن يجواموت اجبارى
هاك النته دى
عمر البشير قال للجماعه ما عارف مقدره طاعه الشعب له
قام الجماعهقالو له طيب نزل قرار بجلد كل سودانى مائه جلده
واخينا نزل القرار
وعند تفقد وجد الناس بالصفوف
وعند ساله احد المزاحمين عن السبب
قال يازول الجماعه ديل مامضمنين بكره يقولو ميتين
للك كل الاحترام
شيرى قوز ابو ضلوع داك\ناس الطرق كان بعملوا فيه ردميه امشو يجبوا المويه قلوها مافى الكتاحه ردمتها
لكن فى اماكن ماتخافى جبل مره قاعد
ودعقاب
|
Post: #8
Title: Re: عالم مقرف
Author: ود العجمى
Date: 03-18-2003, 10:48 AM
Parent: #1
شيرى
ود عقاب
شكرا على المداخلات
وهناك بوستات كلها تؤيد مزاق القرفة وقد دخلت اليها وأسعدتنى فقط لأنها ترفض هذا العبث العالمى . منها البوست الجميل لشيرى وهناك أيضا المبدع مودك وبوست لا تحلموا بعالم سعيد لعماد. وأيضا انتهازى يسخر من بوش وغيرها فى هذا البورد وكأننا نقول مقولة حميد
الصوت العالى يا صوت الناس
التحت الواطى المامسموع
على كل
نحن نرفض بدون هتافية نرفض سياسة الوصايا والتنفس على الرقاب ونرفض أيضا التهور والتسلط على الشعوب المسكينة ونرفض الحقارة ونأمل أن يجد هذا الرفض الاحترام. لا نريد قسمة ضيزى أو قسمة عادلة ونرفض أن يتقسم هذا الوطن الواحد. ونرفض الاسفاف على جميع مستوياته عالمية أو محلية أو أقليمية
وأعيد هتافى الخافت
الصوت العالى يا صوت الناس
التحت الواطى الما مسموع
مع حبى واحترامى
|
Post: #9
Title: Re: عالم مقرف
Author: ابو يسرا
Date: 03-18-2003, 01:12 PM
Parent: #8
الكل يتوق للعيش بحرية سواء في امريكا او العراق او السودان وهذه الحرية لن تنالها الشعوب هدية على طبق لابد من مكابدات ولايجب ان نركن ونقول ان الحياة مقرفة وانه لا امل للخروج من حالتنا.جميل من ود العجمي تريده كلمات حميد وانا ارد مع حميد ومن نفس القصيدة التى اخذ منها ود العجمي(نادوس) اردد
…
صُدْ لي ملامحك يا حراز
ريح العوارض غرَّبت
فرتك ضفائرك في الرزاز
جيةْ العصافير قرَّبت
لاقيته في غابة مدين
وصَّت شتيلةً حبحبت
على عش صغارا
الدوب حبت
ما وقَّفه الليل ، لا الهجير
كم جفَّ ريقه ووتبت
لاقت من العنت الكتير
ملت الفيافي أحدٌ
أحدْ
فايدةْ جناحي بلا أطير
الموت ولا العيش النكد
نتف الخلايا ولا الضمير
الموت ولا العيشي النكد
… … …
واختار هذا الجزء
**********
..
ندِّي دمر ونادوس ونشوقا
خل الناس الصبحت ويوم
من حيّات الخور ملدوغة
خل الصوت الكبتو الجوع
يلقى براحو يضوع ، ويضوع
الصوت العالي يا صوت الناس
التحت الواطي المامسموع
خلّو يهز الدنيا مواكب
منّو يسل خاذوقاً راكب
يا مقطوع في الخلا دون زاد
وال لليلي هناك في بوغا
جاء الحقُّ وزهق الباطل
إنَّ الباطلَ كان زهوقا
|
|