Post: #1
Title: انت عارف 1
Author: zumrawi
Date: 03-02-2003, 09:02 PM
انت عارف 1
حكاية الغربة دى جنتنا والواحد بقي مافاهم العليهو شنو وزى اى وجع سودانى الاصل بيكون الكلام فيه طبطبة فى الكتف وتهدئة للخواطر والغربة بتاكل من قدراتنا بالحبة والملوة وكل يوم الواحد تشرق عليه الشمس بضيرو انو ماشغال في بلده حيث اللقمة التى تصنعها معروفة ماشة لمنو وانتحتاكل بتمنو منو....
بعدين حكاية الاولاد البتربو فى الغربة موجعة حيث المناهج جامدة تنتج مؤديين كبار ويصعب انو تننج اصحاب عقول متفتحة وفضول علمى غير انو الدراسة عن اشياء لاتمت للوطن بصلة والوطنهم راجعين ليهو وتتحكم فى ذلك ظروف البلد المضيف وهو البحدد لحدى متين تكون الاقامة ده غير انو الرجعة فى بال كم زول عشان راحة
البال والاطمئنان على الاهل.....
وبعدين قصة الطلبة العددهم نفس عدد المغتربين , ديل من المتوقع عودتهم للوطن لو مالقو عقود عمل في بلاد الدراسة...
يعنى المسالة ذى المازق الواحد مصطلى بغربة ونيرانها والعودة للوطن ضياع مع الامراض والجوع والاهمال....
والحل فى الصبر والصبر احساس ماحاجة مادية يمكن الواحد يحسها.. ويمكن الصبر يقصر ويطول على حسب الزول ومشغولياتو والبلد الهو مغترب فيها
في بلاد ذي الخليج السودانيين كتار وده بقلل شوية من اثر الغربة اللعينة لكن كلو مابسوي قصاد شوفةالاهل
التى هى في المقام الاول ...
في دول المنافى البعيدة واقصد بيها استراليا وامريكا وكندا قد يصدف وجودك فى مدينة او قرية بها قلة من السودانيين وهنا بتجى الوجعة في التفتيش عن صديق
تسر له بالامك..واخبارك تطمئن على اخباره
ويطمئن على اخبارك...والبلاد التلاته دى الرتابه فيها
ممكنة خصوصا بعد اوقات العمل..
والرتابه هى شنو ماوكت ضائع وقلق متحفز للصعود
وجهد ضائع وامكانيات مهدرة وضياع فرص التواصل ...
وحل الرتابه فى رائي لايتمثل الا فى السعى للتواصل بين افراد البلاد المعنية وبالعودة الى الوطن
|
|