Post: #1
Title: كل ابن انثى وان طالت علاقته يوما بشاكوش أنثاهو يقع طولو
Author: wadazza
Date: 02-27-2003, 09:44 AM
ياجماعة الشاكوش ده..أقصد منو الاكتشف علاقة الشاكوش بنهاية العلاقات؟
ده عبقرى الترجم المطرقة بصدمة النهايات والله
فى شاكوش سببو اقتصادى
شاكوش سببو مادى
شاكوش سببو سلوكى أخلاقى
شاكوش مزاج كده
شاكوش ضمن اطار تعددية العلاقات
شاكوش سببو كذبة
شاكوش سببو فتنة وحسادة ناس من نوع شر حاسد اذا حسد
شاكوش سببو العوازل العوازل الناس ما العوازل التانية ديك
شاكوش سببو فوارق التخيل والواقع
شاكوش
وشاكوش وشواكيش
لكن اخطرها شاكوش البداية...
لكن بين كل شاكوش وشاكوش ...هنالك شواكيش تحدث صدمة معينة فى مناطق سلبية فتزداد العلاقات قوة واندفاعا نحو الأفضل
والشاكوش الذى لا يهشم أم رأسك يجب أن يوقظ داخلك موضوعية الحلول
وما كل شاكوش نهاية
وما كل وجه بشوش بداية
المسألة نسبية ..واللا مش كده..
وأسأل هنا كل أصحاب السوابق الشاكوشية لووول لتسجيل التجربة...وانا ما حأكلم زول سركم فى بير منبرعام
تحياتى
ودعزة
|
Post: #2
Title: Re: كل ابن انثى وان طالت علاقته يوما بشاكوش أنثاهو يقع طولو
Author: المسافر
Date: 02-27-2003, 11:47 PM
Parent: #1
عزيزي
ود عزة
ظهرت تسمية شاكوش أيام الدولة الحلمنيشية إبان راعي عرشها المنتكل الشجري، وفي تلك الفترة كانت الدراسات التي أجريت على البرالمة وصداها أكبر من صدى الإستنساخ البشري، فقد وثق لها المتقوقع الحجري في كتاباته الحلمنتيشية وطور النتائج إلى تدرجات مشابهة للرتب العسكرية.
بدأت تسمية الشاكوش لأن البرلوم دأئما يفقد صوابه ويصبح مثل من هبطت عليه المطرقة فصار مشوكشا متشوكشا. وفي الشاكوش الثاني يحمل صاحبه الشريط وعندما تصبح رتبته بثلاثة أشرطة ينال عضوية مجلس البراكسة الذي يرأسه المتجهجه الأممي ويحق له أن يشارك في لجنة تنصيب شيخ البركس وحمل المشاعر في مسيرة مارس العظيمة وأن يهتف إمام قاعة الإكزامنيشن هول بشتى الهتافات التي تنادي بسقوط البرلومات
ومن حلمنتيشية المنتكل الشجري
في الليلة ديك
يا عبدو القصة زاتها بقت عليك
وأدوك الشريط
قال شينة قال
قلنا له ده كلام صحيح
وخطيبها زاته ولد قبيح
قم تاني جاب سيرة البحر
|
Post: #3
Title: Re: كل ابن انثى وان طالت علاقته يوما بشاكوش أنثاهو يقع طولو
Author: intehazy
Date: 02-28-2003, 00:34 AM
Parent: #1
ود عزة و المسافر
و الله ضحكتوني
أنا غايتو قصتي واقعية
أخدت شاكوش آآآآآخر موديل
جاني بالبريد العلكتروني
و والله العظيم ما كلفت نفسها إنها تديني ليهو على الهواء مباشرة و قالت إنو لا بد يكون شاكوش بتقليعة جديدة
و قد كا ما كان
و من الوكت داك
أنا حيران
و ديمه هيمان
و الجيب فلسان
و المخ طفشان
و القلب زعلان
و راسي ورمان
و حيلي فتران
و على طول هلكان
و غايتو أحي من الزمان
و الله يقدرنا نسيب المكان
و نودع الأحزان
و حي أنا
إنتهازي الولهان
|
Post: #4
Title: Re: كل ابن انثى وان طالت علاقته يوما بشاكوش أنثاهو يقع طولو
Author: intehazy
Date: 03-03-2003, 05:01 AM
Parent: #1
عن إذنكم يا أخوانا أنا حشيل الموضوع دا للبورد التاني
و يا بكري عليك الله ما تبلغ فينا
|
Post: #5
Title: Re: كل ابن انثى وان طالت علاقته يوما بشاكوش أنثاهو يقع طولو
Author: wadazza
Date: 03-03-2003, 07:00 AM
Parent: #4
عزيزى المسافر
شكرا لسرد تاريخ الشواكيش
عزيزى انتهازى
اذنك معاك ووديهو محل ماداير..
انتهز الفرصة بس
تحياتى
ودعزة
|
|