اللهم الطف على اهل الشمال الفوقاني من كيد اهل الشمال التحتاني

ظلم واضح يحيق باهل الشمال الفوقاني

ومع قرب اتفاق السلام والتغيير الذي سيطرا على مواقع المسعولين

بدا كل واحد في تعمير منطقته

مولدات الكهربا

المستشفيات

الطرق

كلها حدها الشمال التحتاني

وانتو ليكم الله

يا ناس الشمال الفوقاني

عزيزنا قرجة سلام ـ
داير اعرف اي شمال تعني؟ ؟ هل هو الشمال الذي هو شمال الجنوب؟؟ واللا شمال الخرطوم واللا شمال ابوحمد ؟؟ ــ عشان اقدر افرز ـ لانو برضو
ممكن نزيد التصنيف ونقول الشمال الفوقاني خالص والشمال الما فوقاني خالص ـ

بصراحة انا عشان كنت عارف انو دا هيحصل عندي اقتراح ان البلد تتقسم الي شعوب وقبائل ونبدأ نتعارف من جديد ــ لازم كل كوم يأكل نارو الي ان يكتشف انه لا يمكن ان يعيش براهو ـ فيتحد مع جيرانه وحدة طوعية ، ثم يكبر الكوم شوية شوية الي ان يتم تجميع السودان من جديد طواعية ,, ياخي مالو لو اتقاسمنا السودان ده حتت حتت دا يكفينا كلنا حيث انه اكبر من اوربا الغربية كلها ، شوف هم عندهم كم دولة !!!ـ
الناس عشان تضوق حلاوة الوحدة لازم تتجرع مرارة التقسيم ــ واللا كيف ؟؟

والله يا منير اخوي

انت تناولت الموضوع بجوانبه التي ظل البعض يمتنع عن دخولها....خوفا من النعرات العنصرية.....وهذا شيء ايجابي...خصوصا وان هناك حديث دائر عن تقاسم ثروة وتنمية بمعدلات غير متوازنة...وحيث ان الاتفاق اصبح وشيكا ارى ان هناك من يسعى لتكبير الكوم....فمؤكد ان منصب النائب الاول لن يكون شماليا...وربما وزير المالية...وهذا مؤكد سيجعل كل من غفل عن منطقته واهله في الماضي ....سيفكر لهم هذه الايام...وبمتابعة بسيطة للاخبار نلاحظ ان التمويل يجلب لسدود معينة....وان القروض يقصد بها تنمية مناطق ذات جدوى اقل
والمتابع للاخبار يلحظ ذلك بوضوح

وبصراحة انا اقصد بالشمال الفوقاني الشمال النوبي....فهو المظلوم في هذه اللعبة بالاضافة لمناطق اخرى كثيرة...ولكنها اقل ظلما

اخوي قرجة ـ والله انا كنت عارف قصدك بس قلت اوسع دائرة الموضوع شوية ــ بالتأكيد المتابع للاحداث يري حالة السودان ماشة في تدهور اثني وعرقي ، قلنا ان من يطلق عليهم مثقفين قادرين كل واحد يوعي اهله بضرورة التكاتف ـ ولكن كما كان الحال دائمآ المثقفون اسوأ من العوام لمن تجي للعصبية والعنصرية ـ ما تشوف القصائد والاغاني والخطب الحماسية دي ــ دي كلها هبوب ساكت ــ
الحقيقة الناس دائمآ تتعامي عن الظلم والتهميش للشمال حتي شمال الخرطوم القريب ـ ويزداد الظلم كلما اتجهنا شمالآ ـ وبالتأكيد النوبيين تحملوا معظم البلاء ـ والله منظر جد محزن عندما تري نساءهم و حسانهم معلقات فوق البضائع باللواري التي تشق بهن غمار صحاري بيوضة والعتامير ايام وليالي للوصول الي قراهم في اقاصي الشمال ليس لهم دليل سوي نجوم الليل التي تشهد علي عدد من ضل الطريق ولم يعثر له علي اثر في تلك الفيافي ـ
لكين عندي ملاحظة بخصوص السدود بالذات ــ اذكر عندما كانت هناك زوبعة سد كجبار قرأت عن معارضة لذلك المشروع من نوبيين بذريعة انه سيدمر المنطقة ـ الكلام ده قريته في الانترنت دي وما عارف اذا كان دا فعلآ رأي اهل المنطقة ـ وحقيقة ما عارف سد كجبار ده وصل لي وين ــ؟ في المقابل تلقي ان ناس الحامداب الذين سيغمر السد اراضيهم رحبوا به ايما ترحيب وترجوا الحكومة ان تهجرهم مثلما تم تهجير الحلفاويين ، حتي انهم اقترحوا المنطقة
التي يودون تهجيرهم اليها ــ
علي العموم انا شخصيآ لا انظر لسد الحامداب الا كمشروع قومي يستفيد منه كل السودان ـ ياخي دا نحنا مازلنا مدورين بثلاثمائة ميقاواط كهرباء فقط، يعني القيقاوات الحينتج من سد مروي دا الناس في مروي حتتمسح بيهو ـ ـ

رأيك شنو يا قرجة في التقسيم الابتدائي دا لغاية ما يتم التقسيم الكبير : ناس الشمالية والشرق يكونوا دولة تكون عاصمتها الخرطوم بحري ـ وتوحدهم الختمية
ناس كردفان ودارفور وباقي الغرب يكونوا دولة عاصمتها امدرمان ، وتوحدهم المهدية ـ
ناس جنوب الخرطوم والجزيرة وكل الجنوب يكونوا دولة عاصمتها الخرطوم ويوحدهم الجبهجية والحركة الشعبية ـ

شايفك ضحكت ـ تصبح علي خير