حديث الدموع

انتهى…كل اللبينا خلاص انتهي…وماتت لحظه الصفا الورديه زي وقت الغروب
وجاي حسه في عينيك خناجر وفي ايدك حجر…تقولي انسي
ما الحقيقه دي انا عرفتها من زمان…من ساعه الحب الفي عيونك انتحر
ومن قبل ما تعرفها انت زاتك….وتكتب لي انو البينا خلاص انتهى
امكن لمن عاينت للقمر الجميل….وما شفت فيو غير قطعه حجر
لكني يا اجمل حبيب …دفنت العرفه دي في جواي عذاب
وما قلت ليك قلت انتظر….امكن هوانا القديم…راح في سكه سفر…ولازم يعود…لمن يشتد المطر…لازم يعود يحضني زي ورقه خريف…خايفه من طعم الحريق..وعتمه المناظر والطريق
انتظرتك …ما عشان جواي كبرياء رافضه الحقيقه…ولا عشان انت الدنيا بسحرها وبريقها…انتظرتك عشان الحب البي اسمو اقسمت يوم..انو اكون صدقه قبل حبيبه…وام قبل رفيقه
…عشان لمن تجيك صحوه ضمير…وتعاين لصوره مشاعرك في مويه الخريف…وما تعرف منو المرسوم هناك…تتزكر انك كنت بتشوف الامل…لمن كنت معاك ايام الحب القديم
…وانتظرتك عشان نفسي…لمن تمر الايام واعرف اني ما قصرت مع الحب…واديو كل انفاسي لحد اخر نفس…اموت وانا ضميري مرتاح…فلا انا سرقت الفرح من زول…ولا ضيعتو لمن جاني ملفوف بنور الصباح
…وانتظرتك عشان تتعلم العطاء…وانو الحب دا فكره امل…عشان تعرف انو الحنان الاديتو ليك ما كان بسيط…ولا كان غالبني اكون زي شجر الخلا…لمن ابيت تسقيني حبك….لكني كنت بعصر من جواي مشاعر واخضر بيها واذدهر…عشان ابني ضل واهديهو ليك…يحميك من قسوه برد…لفحه لهب…واشيل دا كلو في جواي سعاده…اني بدلك بتحرق
….لكن وقت البينا خلاص راح وانتهى…حاوريك كيف الزول ممكن بالامو يزدهر…وكيف ممكن العذاب والدموع يبقو جدول او نهر…يخلق في جواي حياه من جديد
……ولو طيفك جا يوم او عبر…حاحن ليو…امكن…لا اكيد حاحن ليو…لكن حناني وحنيني ليو ما عندك فيهو اي حق….نبضه قلب ضيعتو انت براك لمن جاك…شايل معاو كل حنان الدنيا الاتخلق
….وانت لو قايلني من غيرك بضيع…تبقى لسه بتحبي في اول طريق…طريق الحب الانت لسه ما عرفت مداينو…لانو العلاقه بيني وبين الحب..ما كلمه حبيب…العلاقه بيني وبين الحب من قبل الزمان…ولا عشانك حاكرهو..واتنكر ليو
الحب عندي عالم كبير…كنت انت حروفو ومحورو
…ولمن اتنكرت ليو واتنكرت لي…فتشت في جواي ملايين المحاور
…لقيت صدقي …وحناني…وحبي لله والبشر..اكبر محاور
…وعرفت كيف رغم العذاب رغم الالم البنتح في عروقي…كيف اعيش وكيف احاور
كل الكلام القلت ليك حسه…لقيت منقوش في دمعه واحده…غلبتني ونزلت وقت ختيت السلاح…وقلت ارتاح
…لو عارفه انو دموعي بتتكلم…كنت بكيت من زمان…لمن كنت معاي…امكن كان تفهم
لكن حسه …الكلام في الزمن الضايع…..حرام

.
.

[qb]
الاستاذه الغاليه حنين
والله كلا مك عجيب ورهيب وكمان مرات انتى بتجيبى كلام الواحد يحتار فيه لووووووووووووول
يديك العافيه ويخليك
[/]

حنين
عاشت الرومانسية ..
وعاش حنينك



لو عارفه انو دموعي بتتكلم…كنت بكيت من زمان…لمن كنت معاي…امكن كان تفهم
لكن حسه …الكلام في الزمن الضايع…..حرام

حنين اليوم كلامك كلو حنيه لكن ما تقولى لى
كلام حلو بشكل والله كلام يلين الحجر ليتنى كنت انا

حنين كلامك سمح بالحيل ... رهيب ... عجيب.... وفيهو كلام غير الكلام

ذكرني بأغنية للرائع وردي يا ريت لو زول عندو الأغنية دي ينزلها لينا دي بعض المقاطع اللي اذكرها منها :

بعد إيه ... بعد إيه جيت تصالحني بعد إيه
بعد ما ودرت قلبي الكنت فيه
جيت تشكي ... جيت تبكي لي ليييه
اعتذارك ما بفيدك ...ودموعك ما بتعيدك ...
العملتو كان بإيديك...
أنا مالي ذنب فيه ...


انا خلدتك في شعري في زمانك ...
ياما غنيتك وكان كلو عشانك...
كان جزاي منك صدودك و هوانك ..
انا استاهل انا استاهل..
وضعتك في مكانا مامكانك....

جيت تايب يا حليلك .. ياحليلك . ..
والفؤد ملكوه غيرك ...
ربي يعدل ليك طريقك...
ونهاية الخير مصيرك
كل مناي في الكون عديلك..
وانا عهد العشر ة مااتنكرت ليه..
أصلي عهد العشرة ما اتنكرت ليه..

الغالي ود الجزيره:
تشكر يا سيدي.... بس استاذه دي كبيره شديد علي....انا لسه بقول تاتي



الاخ ابو تميم:
عشت انت وعاشت احاسيسك المرهفه


وليد:
شكرا ليك ....لكن يا ريت لو كنت انا دي شنو؟
لو يا ريت لو كنت الكاتب الكلام دا...فانت بتكتب اسمح منو
ولو يا ريت انت المكتوب ليك الكلام دا...تبرى يا يمه...يا ولدي دا شاكوش كااارب لووووووووول



يا روز الجميله....يا ريتني لو اسمع غنيه وردي دي معاك...
جد شوقتيني ليها...شكرا ليك