كلمة بس .. لو ممكن؟؟؟

سأدلف مباشرة للمدخل

سؤال مجنني موووت

هل نحن السودانيين نخجل ان نظهر عواطفنا ؟

بمعنى ... هل ممكن الواحد فينا يظهر بصورة صريحة لأخوه مثلا انو بحبه ؟ أو لأخته ؟ أو الأب يظهر للأم قدام الأولاد حبه ليها ؟؟

يعني مثلا الشوام الموضوع ده عادي عندهم
الأخ يقول لأخوه انا بحبك والاخت كذلك


في يوم اتناقشت مع اصدقائي

قال واحد منهم انو حتى لغتنا السودانية قاصرة / حصيلتها من كلمات الحب والمحنة ما كثيرة ... يعني بحبك ، بريدك

ده لو استثنينا مكسر فيك ، احي أنا... الخ


ممكن تقولوا رايكم ؟؟

طبعا نحن السودانين احساسنا الداخلى عالى فمثلا الاسرة الواحدةبيحبوا بعضهم شديد
لكن لا يظهرون حبهم لبعضهم البعض بالكلمات لانو الاشياء دى تحس ولا
تقال لانو اذا قلناها بتبتزل معناهاوكانها تملق

لهجتنا كمان ما جافة للدرجة دى وفيها من التعابير الحنينة اما الاحساس
فحقيقة هو عالى جدا وحقيقى وغزير ولكن نحن من ادبيات الحوار لا نتطرق لاظهار الود بحجمه فهو موجود ضمنيا من خلال سلوكيات التعامل بينا والواجب والالتزام التى يوجه الفرد فى التعامل مع الاسرة ومحيطه
وطالما اننا نستخدم لغة تعبيرية واحدة اذا الفهم بيننا تحقق والاحساس موصول وموصوف
ولكن نحن فينا شى من الحياء الزائد الذى يحد من استخدامنا لمفردات اللغة ويحد من تعبير الفرد عن نفسه بحريه مما يجعل سلوكه مختلف باختلاف الاوضاع من حيث تواجده من رفاقه او مع الاسرة او مع غرباء او شعوره بانه ملاحظ من محيطه
(ولكن هذا الحياء (لا اريد ان اقول شعور بالنقص
يجب ان لا يحد من تعبيرنا عن انفسنا واعتزازنا بما عندنا
صراحةاللهجة ليست عاجزة لكن المشكله فى تكوينا00000

ابوتميم
زمان انا كنت بخجل اقول الكلام ده لابوي واخواني
لكن هسع قاعد اقولو لاولادي وبوضوح شديد

الله يا ابو تميم يا اخوي معاك حق
والحكايه دايما بتعتمد على الطرفين
يعني لو جربت تدلع اخوك واللا تدلع في ابوك واخدت ليك نهره معتبره....تاني الحب زاتو بيطير ليك من راسك

و الله كلامك صح ميه الميه ,,,نحنا السودانييين ما بنعرف نحب بصوت عالي حتى لمن نحاول نكون رومانسيين شويه ما بيطلع معانا الكلام الحلو ....
دايما بقول لصحباتي لو حصل مره وعملوا مسلسل عربي مشترك يدوا السودانيين ادوار المشاكل بننفغ ليها كويس

تاملوا معاي غنيه الاستاذ الكبير ود الامين بتاعه قالو متالم شويه
شوفوا كيف كان رده : ياخي بعد الشر عليك,,,, في واحد بحب واحده
يقول ليها ياخي ؟؟؟؟

الرائعون
طارق اسماعيل - الموصلى - حنين - بت بربر

الحقيقة اشكركم اولا على الحضور وكتابة تعليقاتكم
ولكن صدقونى نحتاج دوزنة نحن السودانيين
فالاستاذ الموصلى اعترف بأنه كان يخجل قبلا ، ولكنه تدارك القصور وأصبح يستخدم الحب الواضح مع اطفاله
وهذا هو الصحيح

الأخ طارق اسماعيل يرى ان البوح بالمشاعر يكون ابتذالا .. وانا ضد هذا الرأى
نحتاج ان نسمع تلميحا وفعلا وبصوت عالٍ كل كلمة جميله
نحتاج أن نرى الحب عياناً أمامنا كي نستطيع ونتعلم كيف نهبه

الاخت حنين
معاك في انو النهرة بتوقف سيل المشاعر وتصدمها بالكمون والانفجار للداخل
ولكن لابد ان نحاول .. على الأقل مع اطفالنا وزوجاتنا وازواجنا

بت بربر
بعد اللوووووووووووووول الطويلة شديد
أقول الأمثلة كتيرة جداً

مثلا
استكثرك وقتي علي وغدا بك ** عادة زماني كل ما طاب هوّن
ليت اللذى وداك يا زين جابك ** تشوف عقبك كيف الأيام سوّن

البيت اعلاه رقيق رقة الجمال ... يدل على انسان حبيب شديد ورقيق ومرهف

ولكن

بكل تأكيد البيئة تحكم ما يُكتب ويقال
نحن في السودان رقيق المشاعر يمكن ان يُطلق عليه صفة لاتعجب احداً
وهذا اللبس تراكمي .... الرجل لا يبكي .. الرجل عيب يقول لاخوه بحبك او لزوجته او .. او .. او

فكيف يمكن أن نتغير ونصبح أكثر حبا وأوضح مشاعر؟؟؟؟

هسسه عليكم الله شفتو ليكم سوداني ماشي و ماسك يد مرتو
دا لو مشاء جنبها ساي يبقى كويس
على راي ابو حراز
قال رومانسيه قال
اي نحن حنينين شديد لكن التعابير دي ما بنعرف ليها

اتفق معك بان نحن لانعرف ان نصرح بالحب واقصد حب الاخ لاخته او لاابيه او اى احد اصدقائه ، دون الحبيبه

لو قلناها علنا سيصل المفهو واذا اخفيناها ايضا سيصل اشعار الحب الى الشخص المحبوب من الكلام من طريقة المعامله من اى فعل يؤدى الى احساس الشخص الاخر بان هذا الشخص يحبك ، والحب على حسب اعتقادى يحس ،

وفى كل الحالتين سوى صرحة او اخفيت سيصل المقصود

بــــــوب

الأخ ابو تميم
حقيقة إستفسارك و سؤالك المجننك جميل و الأجمل منه الطريقة العادية الصادقة البديت بيها الموضوع
كل الأحباء الجاوبوك قبلي إتفقوا إلي حد ما علي المبدأ إنو المشاعر بين افراد الأسرة قوية فى الدواخل و قليلة فى الكلمات كأسلوب تعبير
بي اي حال من الأحوال
ما بقدر اقول انا ما قادر اصرح

معليش جات كدا باراها ؛ ما بقدر اقول إنه لغتنا قاصرة
خصوصآ إذا إعتبرنا انه اللغة هي تداول الكلمات و ليس اصلها يعني الدارجية بتعتنا ؛ نجد إنه نحن اكتر ناس عندهم مصطلحات فى اي مجال و اي موضوع حتي فيما يتعلق بعملية تصريحات العواطف
و اديك امثلة لذلك
مافي كتير مننا بقول إنو"ابوه راجل حنين و ذكي"٠
بتلقا المعني الضمني للجملة السابقة بالطريقة دى
والله الجلك بتاعي دا راجل مكسب و تفتيحة لمن غلط
و إذا في بنت عاوزة توصف حبها لي اخوها فى موقف معين ساعدها فيه حتقول
اناعندي اخو شفت شفتنات السنييييييييييييييييييييييييييييييين
و هلمجرا من الأمثلة الزي دى
حتي في مجال الحب العاطفي ما بنقول والله انا حبيت البت الزي الوردة دى وعاوز اقول ليها إني بعشقك عشان نعيش ايامنا فى نعيم جنة الحب و الحنان؛؛؛؛؛؛؛
لا
حتطلع منه كدا
و الله انا مكسر و مدشدش فى الدامة و لازم اطرح ليها و بعداك ايامنا تبقي سيكوبييييييس و تمشي معانا طحنية

من السرد اعلاه بنتأكد إنه هنالك لغة حوار متبع بتبلورإلي حد ما مسألة توصيل العواطف لدينا نحن السودانين

لكن
هل رومانسية اللغة دى كافية لطموحاتنا العاطفية حتي و إن كان من نظرية تربوية علي الأقل داخل محيط الأسرة؟ ما اعتقد٠
لانو الإجابة لو كانت بنعم ما كان حيكون لنقاشنا دا مكان من اصله
طيب
المشكلة وين ؟ هل نحن بنطالب بمقارنة وسائل تعبيرنا بوسائل شعوب اخري و لذلك بنحس بي إنو فى قصور ؟
إمكن ؟!؟
و إذا دا صاح هل دا ناتج عن ظروف معينة ولا اي إنسان سوداني بكون عنده نفس الإحساس دا ؟
اضع سؤالي بي صورة اخري:-٠
هل الإحساس دا بتولد لدا الفرد منا عند متابعة اساليب الغيرعن طريق الإعلام المرئي اوالمسموع او حتي معايشة تلك الشعوب ؟ يعني لو جبنا زول قروي ابعد ما يكون عن وسائل إعلام تلك الشعوب هل حا إشاركنا نفس الشعور ولا كيف ؟

إذا كانت الإجابة بنعم
إبقي لابد من ان نتدارك مشكلة تربوية نشأت في دواخلنا نتيجة تقاليد إجتماعية
و زي ما قال الموصلي في إنه حطم خجله فى ممارسته الصحيحة مع اطفاله
وعشان بت حنين إنشاء الله تعبر لي ابوها و امها بكل حنية الدونيا علي راحتها ومافي زول إنهرا
وعشان ما إجي فنان كبير إغني ليهو كلمات تغيظ بت بربر
وعشان إيهاب ما إلقي ليه حجة لو فى راجل مسك يد مرتو فى الشارع
وعشان بوب إقتنع بي إنو حبه وصل بالكلمة و بالأحساس
و عشانك إنت يا ابو تمام عشان ما تشحد الكلمة و تقول
"لو ممكن"
وتسمع كل الدايرين الناس إقولو و تقول العاجبك يا حبيب

اهههههههههههها
اما زولنا القروي القبيل داك لو كانت إجابة سؤالنا ليهو :-٠
لا
إذن فالموضوع كله برمته هو اثار عولمة حديثة بادية يادوب فينا
و مع الزمن حا تتحدد ليها ملامح فى مجتمعنا

و بي كدا نكون اثبتنا إنه المجتمع كان صحيح المشاعر و الناس كانت بتعبر و بتقول و بتحب والناس كلها مبسوطة
ودا عشان انا اسيب التنظير الكتير و امشي اشوف لي شغلة اعملها

اسف للإطالة لكن جد الموضوع سووووووو نايس
و للضمان كدا ولله في لله انا بحب اي إنسان هنا إقبل مني الإحساس دا

مع فائق إحترامي و تقديري
ورورورورورورك

الأرباب

كلامك صح ..... ولكن مغلف
نفض غلافه نشوف اتفاق مخبأ معاى

انت قلت انو : لهجتنا كمان ما جافة للدرجة دى وفيها من التعابير الحنينة اما الاحساس
فحقيقة هو عالى جدا وحقيقى وغزير ولكن نحن من ادبيات الحوار لا نتطرق لاظهار الود بحجمه فهو موجود ضمنيا من خلال سلوكيات التعامل بينا والواجب والالتزام التى يوجه الفرد فى التعامل مع الاسرة ومحيطه
وطالما اننا نستخدم لغة تعبيرية واحدة اذا الفهم بيننا تحقق والاحساس موصول وموصوف

وانا معاك لهجتنا ما جافة وفيها من التعابير الحنينة ولكن الحصيلة ما كثيرة .. وقولك انو من ادبيات الحوار لا نتطرق لاظهارها .. فده في حد زاتو المصيبة مش العذر .... يعني ليه ما نتطرق لاظهارها مع من هم احق الناس بان يحسوا بهذا الشعور ؟
وقلت انو الواجب والالتزام ... ونسيت انو نحن بنتكلم عن الفة وحب واسرة واصدقاء يعني ما بينا تكليف ــ المفروض يعني ــ وصدقني ما بيكفي مجرد الفعل براهو لايصال هذا الحب .

اتخيل معاي حبك الأول .. ما كنت متشوق موووووت عشان تسمع أول كلمة أحبك ؟؟؟؟ ليه ما اكتفيت بالافعال .. فهي مجرد انها طلعت عشان تقابلك بعطر انت بتحبوا ولون فستان انت بترتاح ليهو وفى المكان المفضل ليك معناها انها بتحبك ... لكنك كنت داير تسمع الكلمة دي بالذات

وتأكيد أخير انا كلي قناعة انو السودانيين ملانين حنين وعواطف ... لكن الخجل ما بيخليها تطلع

الاخ ايهاب

فعلا نفتقد للحركة دي ...... وفعلا نساء السودان بيعانو من الحكاية دي الا من رحم ربي

تتزوج البنت ويكون حلمها كلو وردي ... يتقلب برتكاني فاقع بعد الزواج لانو اب شنب مستحيييييييل يحسسها انو بحبها .... لانو عيب .. وبرضو الا من رحم ربي

يمشو السوق المره مسكينه هلكانة من الكعب العالى ومن قعدة الحنه امبارح .. لآ وشايلة الولد الصغير .. وساكة اب شنب لأنو ما ممكن تمشى لا جنبو ولا وراه ... عيب

الأخ بوب

ماعارف ليه نحن مصرين انو في كل الحالات سيصل الاحساس بالحب .. لكن المهم اننا ما نصرح علنا بالقول مثلا؟؟؟

النقطة اللي ببحث عنها هي ليه ما بنقول كلمة بحبك بسهولة ؟؟؟

ليه مصرين نحن السودانيين نتعب الطرف الآخر المقصود بالحب .. ليه بنخليه يبحث ويتعب حد المعاناة عشان يلاحظ أفعالنا اللي يقدر من خلالها يستخلص ليهو رشفة حب ؟؟

ليه ما نديهو ليو علنا وكميات بكل سهولة ودون تعقيد ؟؟

الغريبة يا موصلى، بالرغم من انو ابوى كان بقول لينا بصراحة كدة ، انا بحبك وانا بحبك
لكن انا ماقدرت استعمل الكلمة دى الا مع اولادى ، وشايفاها بتعمل مفعول السحر ، ودى ثقافة ما سودانية اصيلة، لكن جميلة.


امى زى كل الامات_ الله يرحمها_ كانت بتغلف الكلمة جوة تعابير زى المحنة
وانا البدوروا ليك ان شا الله تشوفيه
وحال اليابك للحاجة الكعبة

لكن الاحضان والتقبيل فى، للولد والبت ، وعاها دموع كمان.

اتخيل لى زى ما قال وروروووك الاخوان بتحاببوا بالقطامة مع بعض وزى ما كتب تمبس مرة ، انو البنات بصروا وشهم وبرصعوا الزول لما يريدوه ويقولوه ِبس ويعملوا روحهم زعلانين منو بدل الريدة

والاخوات بترايدو بالثقة وحكى الاسرار.

امابوسات الجضوم

دى منتشرة بقت فى السودان بين افراد الاسر ذكور واناث

احنا مشكلتنا كسودانيين تربينا على عدم اظهار اي عاطفة او كلمة جميلة لانو المسألة دي تندرج في نظر الناس الكبار تحت بند العيب
فاصبحت بذلك معممة حتى على مستوى الكلمات العادية الرقيقة التي يمكن ان تقال بين الاصدقاء من نفس الجنس ناهيكم عن تبادل كلمات المشاعر والعواطف بين الجنسين واذكر قصة في هذا الامر حكاها لنا خالي انه لا يذكر ان والده وهم اطفال قال لهم يوم ما كلمةحب رقيقة او قبلهم كما يفعل الاباء فنشأ على ان هذا الامر عيب ، وحتى عندما يتمكن الشخص من التعبير عن مشاعره وعواطفه نجده يقول ذلك بسرعة شديدة وبصوت خافت جدا وقلبه بيكون بيدق الف دقة في الدقيقة وننبسط جدا لما نشوف فيلم او مسلسل فيه رومانسية عالية جدا وكلمة يا سلام البنقولها تعبير عن اعجابنا بهذه الرومانسية ما هي الا رغباتنا المدفونة في التعبير عن مشاعرنا
نحن محتاجين نكون ناس قادرين على التعبير عن عواطفنا ومشاعرنا بوضوح يعني ياريت نقدر نتجاوز موروثاتنا عن المشاعر والعواطف لانه كم تساوي كثيرا تلك اللحظة التي يتمكن فيها الشخص من قول كلمة حب حقيقية