Post: #1
Title: دوللي ماتت....!!!ء
Author: zola123
Date: 02-18-2003, 07:30 PM
انتقلت الى رحمة الله يوم الجمعة الماضية
النعجة دوللي في عمر يناهز الست سنوات( اتخطفت يعني)..ْء
ولدت في الخامس من يوليو من عام 1996
في معهد روزلين بأدنبرة( اسكوتلاندا)..ء
لنعجة فتية
والوالد؟؟؟؟ هممم , ما كان ضروري
لها من الأولاد: بوني , المولود في 1998
وستة آخرين في عام 1999
ديل بقى عادين, يعني امهم دولي وأبوهم اسمه دافيد
تقرر انهاء حياة دولي بطريقة الموت الرحيم للتخفيف من معاناتها بعد تفاقم اصابتهابسرطان رئوي
وتقرر تقديم جثتها الى المتحف الوطني في اسكتلانداو وستعرض فيه تخليدا لذكراها
البركة فيكم
تحياتي
زولة123
|
Post: #2
Title: Re: دوللي ماتت....!!!ء
Author: wadazza
Date: 02-18-2003, 08:08 PM
Parent: #1
ما بتستاهل..مستنسخة وصغيرة وجاهلة...بس الموت حق...ويقال أن ابو وليدات دوللى هو الخروف دو...اتربى فى سواكن ...وزهج مع الزهجانين..وهاجر اسكوتلندا...واحتمى بلجنة حقوق الخرفان...لكن رغم كده ...طلبوه بالاسكوتلانديارد...ورجعو السودان...فى المطار طلبوا منو يصفى الضرائب...ما كان عندو شىء وما قدر اقنع ناس ضرائب المغتربين..حتى ماقدر يقنعهم لما أشر بمقدمو القدامى وأشر ناحية جلدو وقال : حتى لو كانت معاى قروش أختها وين شايفين عندى جيب؟المهم من هنا لى هنا نادوا الزول الكبير المسئول: عاين للخروف دو جاى جاى...وقال خلاص نصادر عفشو ...نط واحد قال: والله الا كان تصادر عفشتو الجواهو..هو ما عندو شنط سعادتك..
المسئول طلع نضارتو ولبسا تانى...فتح غطاء القلم وقفل القلم تانى..مسح جبهتو بالمنديل وعرق تانى...دعك عيونو..ووجعا تانى..مرر أصابعو على صلعتو..فكر وقدر ..وتانى فكر وقال للجنبو :ختو فى ضهرية العربية..
وضحك ضحكة خبث مع لؤم مع خفة دم مفتعلة مع هبالة مع حتة رزانة مصطنعة:
زمنا كلو بناكل فى لحم المغتربين المجازى...هسى النجرب الخروف المغترب ده ....
وفى اليوم التالى :
كان جلد الخروف يدبغ...ليصنع منه حذاء للمسئول وشنطة مدرسة لابنه...وشنطة يد لأم عياله...
رحمك الله دوللى ...ومؤكد انه الحزن على دو..
فلا أراكم مكروها فى نعجة لديكم أو حتى غنماية...
من المواشى المحتجة على التصدير الحصرى
تحياتى
ودعزة
|
Post: #3
Title: Re: دوللي ماتت....!!!ء
Author: nasmah1981
Date: 02-18-2003, 08:40 PM
Parent: #2
ياحليلها دوللي..موتها قطع فيني..بالله يازولة عاملين العزاء في ياتو زريبة..عشان نقوم بالواجب ونرسل غنامايتنا تقيف مع اولادها
|
Post: #4
Title: Re: دوللي ماتت....!!!ء
Author: Arbab
Date: 02-19-2003, 03:18 AM
Parent: #3
رحمهاالله ... خزلتنا مش ؟
لكن الف دولى بجونا يا زولة
!!فجاة حسيت بحزن غريب
|
Post: #5
Title: Re: دوللي ماتت....!!!ء
Author: zola123
Date: 02-19-2003, 01:34 PM
Parent: #1
يا حليلك يا دولي
جاكي 3 معزين بس؟؟
اتظلمتي لمن جيتيني واتظلمتي وانت مفارقة
نسمة1981
غنمايتك دي الا تقطعي ليها تذكرة لادنبرة تلحق البكا و ويكون احسن لو مشيتي معاها, ما تقوم تعمل لجوء وتاني ما تشوفي وشها
ود عزة
شايفة الكلام جاب ليه كلام
قلتا لي ديفد طلع من ناس وين؟ النتأكد ليك من المعلومة ونجيك تاني
تتصور السودانيين ديل عندهم جاذبية ما عاديةو ماشاء الله مشرفيننا في المحافل الدولية
أرباب
ما تزعل يا خوي, بكرة يجيبوا ليك 100 دوليي
لاكن انا ما اتخذلت اتكلم عن روحك براك
لووول
يا ربي بعدين دولي دي بيحسبوها نعجة زي باقي النعاج ولا نص نعجة؟
والبيجي البكا ناس اهل امها بس, اها اعمام اولادا ديل وين؟؟
يا زول نقول مع السلامة قبل ما نخرف اكتر
تحياتي
زولة123
|
Post: #6
Title: Re: دوللي ماتت....!!!ء
Author: Arbab
Date: 02-19-2003, 05:23 PM
Parent: #5
زولة انا شايف الدموع ماااالية عينيكى حتى لو تدعى (المرحومة) ما خزلتك
هى خزلتنا بمعنى انو كل انظار العلم كانت موجهة ليها عشان يشوفوا اى نوع من المضاعفات والمفاجات ممكن يكتشغوها
لو هى فعلا ماتت بسرطان برضو خزلان ..اقرى رايى فى بوست الاستنساخ
|
Post: #7
Title: Re: دوللي ماتت....!!!ء
Author: zozo
Date: 02-19-2003, 05:23 PM
Parent: #5
البركة فينا وفيكم والجايات أكتر من الرايحات 
|
Post: #8
Title: Re: دوللي ماتت....!!!ء
Author: zola123
Date: 02-19-2003, 05:38 PM
Parent: #1
zozo
شكرا ليك , ولا اراكم الله مكروها في عزيز
Arbab
سرطان يا د سرطان
الفقرة دي من yahoonews
The institute's Dr. Harry Griffin said Dolly had suffered from a virus-induced lung cancer that was also diagnosed in the past few months in other sheep housed with Dolly.
والمسكينة الظاهر ما اتحملتش
لي تعليق في بوست الاستنساخ بد قليل
تحياتي زولة123
يا جماعة الفاتحة
|
Post: #9
Title: Re: دوللي ماتت....!!!ء
Author: woroorrook
Date: 02-19-2003, 05:56 PM
Parent: #1
و الله يا زولة
دولي تراها يوما تما
لكن الحزن ما بفيد يا بنية
كدي إستغفري و خلي شغلة الكلام البرا من الراس دا
و الله اسئلتك دى يعني إلي كان ننتظر بيها يوم الحساب
Quote:
يا ربي بعدين دولي دي بيحسبوها نعجة زي باقي النعاج ولا نص نعجة؟
والبيجي البكا ناس اهل امها بس, اها اعمام اولادا ديل وين؟؟
|
لكن عليك الله الكلام دا فكرتي فيه كيف بس؟
|
Post: #10
Title: Re: دوللي ماتت....!!!ء
Author: ابوحراز
Date: 02-19-2003, 06:58 PM
Parent: #9
اليمنيين قبل 3 سنوات كان عندهم خروف من سلالة راقية جدا
المهم الجماعة حاولوا يعملوا علاقة نسب مع الأسكتلنديين
وطلبوا يد النعجة دولي لخروفهم
الجماعة أهل دولي قالوا لازم يشوفوا الخروف
وفعلاً ارسلوه هناك
دولي لمن شافتو ضحكت
ودخلت الحظيرة
يعني فهمنا اخيراً ان الخروف أخذ شاكوش وكارت أحمر
سبحان الله
ومن الاستنساخ ماقتل
قال ديفيد قال
|
Post: #11
Title: Re: دوللي ماتت....!!!ء
Author: Rose
Date: 02-19-2003, 08:43 PM
Parent: #1
عزيزتي زولة123
انشاء الله البركة فيكم يا بت امي ، على قولتك اتخطفك مسكينة بدري وجدعت حملانها . ربنا يصبر مستنسخيها .
اها دولى والله يرحمها الدور و بالباقي على الشافعة الاستنسخوها (كان صحي كلامهم كان كضب ) ومابين يورونا ليها ناس جماعة( الرائليين ) .
الله يشملنا برحمته جميعا و يلطف بعباده .
تحياتي
|
Post: #12
Title: Re: دوللي ماتت....!!!ء
Author: Arbab
Date: 02-19-2003, 09:26 PM
Parent: #11
الفاتحة...
|
Post: #13
Title: Re: دوللي ماتت....!!!ء
Author: Hozy
Date: 02-19-2003, 10:23 PM
Parent: #12
آآآآآآآآآآميييين
|
|