رحلات روز ... في بلاد العجائب

حمدا لله على السلامة
وكل سنه وانتي طيبه
متلهفين لأنطباعاتك عن الرحلة السرية المكوكية
يلا سوي ليك همه وقولي لينا كانت كيف .

يعني يا الفاضل انت عراف انها رحلةمكوكية وسرية كمان في داعي لكشف الحال والأسرار ؟؟ هسه كولن باول يسمع الكلام ده يقول شنو ؟

على كل حال انشاء الله اكتب بعض انطباعاتي عن الرحلة للمعلومة و الفائدة .


تحياتي

روز
حمد الله علي السلامة
وكل سنة وانتي طيبة
علمنا برحلتكم وفي انتظار الانطباعات
وبالمناسبة
كل سنة وانت طيب يا فاضل
نشوفكم

فضولى

كل سنة و انت طيب
قلت لى رحلة ( آليس ) فى بلاد العجائب ؟؟
و بعدين مالها الرحلة سرية و مكوكية يارب ؟؟؟
يمكن ناس القاعدة ..؟؟ حماس ؟؟ الشيشان ؟؟؟
و كل الارهابين وراها
على فكرة هناى داك اخباره شنو ؟؟
تتجازى يا فلان

روزا

اكتبى بالحبر السرى عشان الموساد ما يعرف حاجة
و حاسبى الفاضل عميل مزدوج

زيكو

وينك يا مان و كل عام و انت بخير
ابقى اظهر

زيكو

كل سنة وانت طيب

انشاء الله الانطباعات في الطريق
عشان نرضي فضول فضولي

كوستا
عيدك سعيد
حكاية انو فضولي عميل سري دي ما عندي فيها شكك ، بس لكن لياتو جهة ده العايزين نكتشفه !!

تحياتي

الحكاية وما فايها يا آنسات ويا سيدات ويا سادة إنو الفاضل زول بتاع شمارات و الشمار كاتلو وعايز يعرف انا عملت شنو في إجازتي التي قضيتها في دولة من دول شرق آسيا وهي أندونيسيا وقال أحسن حاجه أحرجها قدام البورداب عشان تتكلم ، دي زبدة الموضوع .ي بس والله كنت ناوية انزل بوست بهذا الخصوص عشان كل الناس تكتب انطباعاتها عن البلدان التي زاروها وانطباعاتهم و مشاهداتهم ، وأعتقد أدب الرحلات كان من أجمل قراءاتنا . على ما اذكر اني قرأت في مرة من المرات بوست جميل لأحد أعضاء البورد كتب عن رحلته إلى اليابان بأسلوب جميل ولا يخلو من الفكاهة ، ما متذكرة والله منو .
المهم سأحاول ذكر بعض مشاهداتي على شكل نقاط . ورغم كل شيء شكرا جدا للرائع الفاضل لأنه حرضني على الكتابة ، بس برضو شمشار .

شوية كده و حرجع ليكم تاني

*قررت قضاء عطلة نصف العام مع صديقتي التي تقيم هناك منذ ثلاث سنوات مع زوجها في جاكارتا عاصمة اندونيسيا.

*بشكل عام أجمل شيء في تلك البلاد وبشكل عام بلاد شرق آسيا هو الخضرة و الطبيعة الآسرة و الخلابة ، التي تعجز الكلمات عن وصفها ، حتى يخال إليك انك أمام لوحة فنية بديعة ، خاصة عندما تخرج خارج العاصمة إلى المناطق الجبلية ، حيث مزارع الشاي والرز ، والأكواخ ، أينما جلت ببصرك لا يمكن أن ترى غير اللون الأخضر ( الرويان ) بمياه الأمطار التي تتساقط بشكل يومي تقريبا، ورغم ذلك فإن الجو حار و رطب طوال العام داخل العاصمة ولكنه أعلى الجبل بارد تماماً بشكل مغاير للعاصمة جاكارتا .

*اعتقد اننا جميعا نعلم أن أندونيسيا هي أكبر دولة إسلامية ، ولكن للأسف بالأرقام فقط لأن واقع العاصمة بعيد بشكل كيبر عن الإسلام في المظهر العام للعاصمة أو الأشخاص أنفسهم وملابسهم . ولم أتأكد من إني في أندونيسيا الدولة الإسلامية الا بعد ان سمعت صوت الأذان في إحدى المرات ينبعث من مئذنة مسجد قريب من البيت، لم اتوقع مثلا أن أجد في أكبر دولة إسلامية في كل مراكز التسوق أركان ضخمة للخمور ولحوم الخنزير .

*جاكرتا العاصمة زحمة لا يمكن وصفها كمية من السيارات و الدراجات النارية لا يمكن تصورها ، وطبعا الدرجات النارية تشارك النساء في قيادتها بكل مهارة بحركات بهلوانية غريبه لتخطي الزحمة، ( وعادي جدا مشهد السيدات وهن في كامل أناقتهن ويحمل حقيبة اليد وفي نفس الوقت يقدن الدراجة النارية في الطريق من وإلى العمل ، كما قد تشاهد رجلا ومعه على نفس الدراجة زوجته وممكن كمان تكون الــ (جيرل فريند ) .

*العاصمة مدينة حديثة جدا بنايات شاهقة و مراكز تسوق راقية ، الصينيون هم المسيطرون على الاقتصاد و التجارة بالإضافة إلى جنسيات هندية ، وتوجد مجموعة من أصول عربية يمينة ( من حضرموت ) ، يقال ان الأندونيسيين شعب كسول لذلك سيطرت الجنسيات الأخرى على بلادهم . وهذه الحقيقة لاحظتها فعلا ، والملاحظ أيضا وجود أعداد كبيرة من الرجال العاطلين عن العمل الذي يملئون الشوارع( لا شغلة ولاعملة ) ، النساء هن المسيطرات علىسوق العمل في الأسواق في المطاعم في الشوراع بشكل غريب فعلا وما تنسى كمان مسيطرات على الوضع سياسيا فجميعنا يعرف السيدة ميجاواتي يعني بالبلدي ( النسوان ماسكات البلد و الرجال بتفرجو ساااااي) .

*الطريف ان في الفترة التي قمت فيها برحلتي كانت كل مراكز التسوق تحتفل بالسنة الصينية الجديدة ، حيث انهم يطلقون على كل سنة اسم من أسماء الحيوانات ، و هذه السنة كانت year of the Goat يعني بالبلدي كده الله يعزكم جميعا ( سنة الغنماية ) . و الصينيون يحبون اللون الأحمر ( تقول عندهم زار ) لذلك كان الأحمر هو اللون الغالب على مراكز التسوق مع انتشار صور ( الغنم ) في كل مكان .

*الأندونيسين في العاصمة بشكل عام يتسمون بالأناقة في اللبس و الرشاقة ،طبعا لبس النساء حدث ولا حرج. رغم ذلك تجد المحجبات ، الحجاب الكامل الصحيح ،و حجاب بنص كم و حجاب بشورت ، المهم حاجه تغطي الشعر والسلام ، لديهم حجابات غريبه الأطوار لما أشهدها من قبل . طبعا في مراكز التسوق كان الكثيرون ينظرون إلينا باستغراب و (الشمار كاتلهم عايزين يعرفون احنا من وين وليه لابسين حجاب، شعب شمشار زي الفاضل كده ) . مرة واحدة سألتني ،انتي من وين؟ قلت ليها من السودان . قالت لي انت مشيتي الحج ؟ قلت ليها لأ . قالت لي طيب ليه لابسة حجاب ؟
ومكن واحدة تشوفك لابسه حجاب وتسألك انت من وين ؟ تقول ليها من السودان تقول ليك ، انتو مسلمين يعني ؟

*الأغنياء بيوتهم فارهة جدا ، اما الفقراء فيسكون في بيوت لا يمكن أن يتصور عقلك ان هذه بيوت تصلح كسكن لإنسان . وبيوت الفقراء مخبأة خلف البنايات الشاهقة في مناطق منخفضة وهي عبارة عن أكواخ خشبية مشيدة في الماء على أعمدة خشبية( بالمناسبة الماء ده ما ماء نهر ولا بحر ولكن عندهم حاجه كده زي الخيران عندنا في السودان تحبس ماء الأمطار لأن أمطارهم طوال العام وتصرفه في البحر ، وعندما لا تكون الأمطار غزيزة تكون هذه المياه شبه راكده ) .

*من ملاحظاتي ايضا ان ان اتجاه الشواع عندهم معكوس و جميع السيارات مقودها إلى اليمين ( يعني الدريكسون يمين ) و ده عمل لي لخبطة شديدة في راسي .

*انتشار باعة الطعام المتجولين ، وعلمت ان الأندونيسيين نادرا ما يطبخون داخل بيوتهم لأنهم يقضون معظم اليوم خارج المنزل.

*انتشار ( الشحاذين بين السيارات ) والطريقة المتبعة لديهم هي العزف على الجيتار او الغناء للحصول على المال.

هذا ما استطعت كتابته حتى الآن بأسلوبي المتواضع .
السفر جميل و فيه متعة و فائدة رغم المشقة ، و التعرف على الشعوب الآخرى و عاداتها و تقاليدها وأسلوبها في الحياة شيء جميل، ونصيحتي لكل من تلوح له فرصة للسفر ألا يتردد أبدا .
أتمنى ان نقرأ المزيد عن مشاهدات وانطباعات البورداب في بلاد الله الواسعة حتى نتعرف على المزيد من البلدان ، ونستمتع بكتاباتكم أيضا .

اها يالفاضل كده كويس معاك ؟
كان اتذكرت أي حاجه تانية بجيكم ناطة تاني .

تحياتي للجميع ..

حسب معرفتي البسيطة باندونيسيا انها كانت تسمى
بالارض الحديقة على وزن البنت الحديقة
ورأيك شنو ياالفاضل نغير العنوان ونسميها
رحلة روز لأرض الموز

يا كوز

روزا

شكرآ على السياحة الاثيرية الممتعة
و اتمنى ان ابدى بعض الملاحظات و التساؤلات على هذا الموضوع قريبآ

الفاضل عميل مزدوج عند وزارة الداخلية - يعنى الامن الداخلى - و كمان امن النظام
و اعملى حسابك

ده كلو يطلع من الفاضل وانا ما جايبه خبر ؟؟
كان كدي الواحد تاني يصم خشمو و يعاين بعينو بس .

شكرا يا كوستا على التنوير عشان نعمل حسابنا .
ومرحب بتساؤلاتك .

تحياتي

روز الروز
ما الفاضل براه الكتله الشمار
لاكن كويس انك سريع لحقتينا بالتفاصيل
الظاهر عليها كانت رحلة ممتعة بالفعل
لاكن كدي تعالي, اندونيسيا دي اقرب ليكي ولا ابوظبي
يا بت امي لي 3 شهور مست########ي تجي ومافي طريقة
الاجازة الجاية عندي, بس فركة كعب على قولتهم
ساعتين وتبقي عندنا, علييييييييييييك الله يا روز

تحياتي
زولة123

حمد الله على السلامة
لكن صحى انتى متحجبة مالك؟

سلامات وكل عام وأنتم بخير
والله ليكم وحشه وطوّلنا مالاقيناكنم وحمداً لله على سلامة روز بس يا فاضل بينى وبينك خلينا نشوف سبب الزياره دى والصيف لسع وموسم الإجازات بدرى عليهو وإلى اللقاء

فضولى وسوركتى وينكم انتم البركة الروز رجعت عشان تظهرو

روز الف حمد لله على السلامة بس بينى بينك ورينى سبب السفرة دى شنو

زولة123 العسولة

الله يسلمك يا عزيزتي .
انشاء الله أوعدك بزيارة في أقرب فرصة ، بالمناسبة أبوظبي بحبها جدا لأني قضيت فيها سنوات طفولتي الأولى يعني ما مابياها الجية الا الظروف معا اتسهلت . ولا يهمك الإجازة الجاية انشاء عندك . لكن تعالي هنا انتو العين دي مابينها مالكم ؟ والله مدينة جميلة وحديقة كمان زي اندونيسيا يعني . اتمنى اشوفك قريب.

تحياتي

تحياتي ابو زران

كلامك صح 100% هي فعلا الأرض الحديقة ، لأن بها خضرة عجيبة لم أشاهدها الا في اللوحات الفنية ، من الأمكان التي زرتها مدينة تسمى مدينة الزهور كوتا بوندا وهي في أعلى الجبل ، هي عبارة عن لوحة ربانية رسمت بكل دقة وعناية ويأتيك الإحساس بأنك في الجنة فعلا.

حلوة حكاية رحلة روز في أرض الموز ، بالمناسبة عندهم الموز برضو لها اشكال متعددة ، وفواكه غربيه الشكل و الطعم .
بس قول لي ياكوز دي لزومها شنو ؟؟؟؟ ولا دي لزوم القافية ؟؟

لزوم القافية والمعاكسه ليس إلا
وآآآآآآآآآآآآآآآسفين
مع امنياتي لك برحلات ألذ

تحياتي اسامة الخاتم

يعني في كل الكلام الكتبتو ده ما لقيت حاجة تسألني فيها غير انتي محجبة مالك ؟

بالمناسبة القصة الل ذكرتها عن الحجاب ما كان سبب استغراب السيدة فيها من كوني محجبة ولكن من كوني غير اندونيسية و محجبة . الحجاب عندهم منتشر لكن عدد كبير منهم يعتقد بعدم وجود الحجاب الا في بلادهم ، لاحظت أيضا لديهم الفكرة بأن أي عربي او أي شخص يتحدث العربية هو سعودي لأنهم لا يعرفون غير السعودية من البلاد الإسلامة العربية وذلك من رحلات الحج .

شكرا

راحيل ازيك والله ليك وحشة

فعلا الجماعة ديل مختفين من مدة وانتي زاتك اختفيتيى معاهم، وانا كمان والله . نتمنى نشوفكم دايما .

والله السفرة دي كنت ناوياها من السنة الفاتت يعني ما جات صدفة ، و هي في الآخر تغيير جو و وجوه عشان الواحد يطلع من الروتين و الدبرسة.

تحياتي عزيزتي

دكتور سوركتي وييييينك ؟
كل سنة وانت طيب

اختفاءة طويلة جدا .
والله اتذكرتك في اندونيسا لأني اتذكرت موضوع ( سوركتي الاندونيسي )

و بالفعل سألت صديقتي عن هذه الأسرة وأكدت لي بأنها ما زالت موجودة وعلى تواصل مع السودانيين في اندونيسيا. يعني شوف ليك أقرب إجازة وامشي سلم على أهلك السودانيين الأندونيسيين ، و بالمرة تشوف البلد ، هي فعلا جميلة و تستاهل الزيارة .

نعم موسم إجازات الصيف لسه لكن ، إجازة الصيف دي دائما محجوزة للسودان وبس وأي سفرات تانية تكون في إجازةنصف السنة .

تحياتي

نداء عاجل إلى الفاضل .. يعني رميت طرف الموضوع وزغت !!!

أظهر وبان عليك الأمان..

ياااااااااااااااااااه
البوست ده نكت ناس حلوين واحشننا.
أما روز
فهي ملكة الزهور والورود والرياحين .
فلا غرو أنها أتحفتنا حقيقة بمعلومات قيمة في أسلوب راق وجميل .
بعدين يا حبايب عشان أنا ما أكون شمشار زي ما قالت روز وكوستا، عايز أأكد أني كنت حزين ومنزعج لسفرها وحدها برغم أنها أدها وأدود . وسبب أنزعاجي هو معرفتي لروز بأنها أنسانة رقيقة وعفوية ومحبة للناس وتثق في الكثيرين بقدر ثقتها بنفسها . والسفر الى شرق آسيا مزعج وفيه مخاطر لعتاة الناس فما بالكم بهذه البنت الندية الطرية الناعمة الناعسة الحديقة ؟؟؟
عموماً أنا أسعد الناس بعودتها ظافرة بكم هائل من المعلومات عن تلكم البلاد ، وهاهي تنشر أريجها وعبقها وتضمخ دروب البورد بالطيب والعطر والنداوة .
ويكفي أيضاً أنها سبرت أغوار تلك البلاد وعادت للدكتور سوركتي بأقرباء أندونيسيين .
وأنا أقول يا ربي دكتور سوركتي ده عيونو مالها طالعه لفوق ؟؟
روز صحي أشتريتي ركشة هناك ؟؟؟
الكلام ده قالوا لي كوستا .
عشان أوريك الشمشرة يا كوستا.
أنت الراجل داك وينو يا كوستا؟؟؟؟؟

والله يافاضل ضحكت لما إتشرقتَ وكحيت لما قمت أصلو لسع كحة
الحج ماراحت وبعدين ياخوى مسئول من الخير والسؤال لروز وراحيل أيضاً وباقى الزملاء المشاركين فى هذا البوست الاخوان كوستاوأبورزان وأسامه الخاتم وزولا123 وزيكو وووووووووووووين صور هذه الرحله
العجيبه ؟؟؟؟وماممكن رحله طويله زى دى تكون بدون صور

دكتور سوركتي مرحب بيك

اولا مبروك الحجة ...حج مبرور وذنب مغفور بإذنه تعالى .. وربنا يوعدنا بيها .

هي رحلة مكوكية وسرية عايزني انشر صورها كيف ؟؟؟ غايتو لو لقيت لي صورة ولا صورتين مناسبات ممكن انشرهم للتمويه فقط .

ما قلت لي حتمشي اندونيسيا متين عشان تزور أهلك ، ما عايزنك تلومنا مع الأندونيسيين ويقولو انو السودانيين ما بعرفو الواجب .

تحياتي

الفاضل ،بركة الظهرت
شكرا أيها الرجل الفاضل بمعنى الكلمة على كلماتك الجميلة الراقية وهذا ما اعتدنا سماعه من الفاضل ، حلو الكلام وطيبه و المشاعر الصادقة الفياضة التي تعبق بها جميع الأجواء التي تتواجد فيها .
خلينا من الكلام الفوق ده كلو ، برضو انت شمشار . يعني الشمشرة و عرفناها كمان جابت ليها فتن . هسه كوستا ده فتح خشمو ولا قال حاجه ؟ عشان تقول جبت خبر الركشة منو ؟
ويعدين يعني شنو لو اشتريت لي ركشة ولا ركشتين من اندونيسيا وجبتهم الامارات ( الحسد شنو ؟!! ) قلت أجربهم في خط داخل العين (وسط المدينة ، المطار و بالعكس ) ولو نجحت التجربة حسافر اجيب مجموعة تانية أفتح بيها خط العين- أبوظبي وربك يسهل ، بس انتو ما تقومو تحاكونا وتعملو زينا عارفاكم انتو السودانيين شغالين تقليد ( حاكونا حاكونا ) . بالمناسبة الركشة في اندونيسيا إسمها ( باجاج ) ، اسم ما بطال مش كده ؟؟ خلاص الأسطول بتاع الركشات لقيت ليه اسم ( باجاج اكسبرس ) لصاحبته روز . رايك شنو ؟

مش معقول !!!
كمان راحيل هنا ؟؟؟
كان مفروض أجي السودان في فبراير ده ، لكن لقيت مجموعة من الشماشرة والشمشرجية جايين في يوليو ود الدامر ، مشاطه ، الشايقي ، كوستا ، ود شداد ، النينو ، فقلت أحسن أحضر المولد ده .
بعدين قالوا زيادة الخير خيرين ، وأهي روز عملت ليها خطوط ترحيل وأسست شركة مواصلات روز باجاج اكسبريس . وأهي فرصة الواحد يشتغل معاها كمساري ويلم الغلة .
دكنور سوركتي
سعدت جداً بوجودك هنا ، والحجة مبروكة وأن شاء الله تسبعها .
أكيييييييييييد لاقيت بعضاً من الأهل القادمين من أندونيسيا في هذا الموسم .
تحياتي للجميع
وفي انتظار الصور يا روز .
كوستا
يندخر لك آ يابا !!!!!

الفاضل ، ده نظام عالمي جديد ولا شنو ؟ الركشة كلها قدر شنو عشان نعمل ليها كمساري ؟
غايتو انا شايفة في شوارع الخرطوم الركشات بقو يعملو ليها زوائد وملحقات عشان تشيل أكبر عدد من الركاب وفي الحالة دي ممكن أفكر في تعيين كمسارية في الأسطول بتاعي ، لكن ما اكضب عليك حشوف لي شباب صغار يقدرو على الحركات البهلوانية البعملوها الكمسارية ، انت يا ود امي مااااا بتقدر على جنس الشقاوة دي انت كان جات كديسه ساااااااااي بجنب بتكعبلك وتوقعك. و كمان عايز تورط معاك دكتور سوركتي ؟ بتبالغ لكن يالفاضل !!

باجاج اكسبروز لصاحبته روز

جاكرتا ... جزيرة جاوه و بالعكس

بختك يا روزة

قلت لى الرقشة اسمها باجاج
ياربى الركشة حقتم دى حضرمية ؟؟؟

كتر خيرك ياروز طلعتينى ما شمشار
شفتى فضولى بيعمل فينى شنو ؟؟؟

د. سوركتى

سلامات ... وينك يادكتور ؟؟؟؟ يعنى ما بتظهر الا مع صاحبك فاضل
عمومآ تحياتى و كل عام و انت بخير


رااااااااااااااااااحيل

تتجازى يا بت الناس
يا بت لينا سنين ما شفناك و لا لاقيناك .... انت وين ؟؟
و كويس فتحتى لينا يعنى
بس اصبرى .... ما حنخليك
و البركة فى فاضل و سوركتى و روزه الخلوك تظهرى
تحياتى

فضولى

ليك وحشة و الله
وينك غاطس مع البطاطس
قلت لى رابيها مع الشباب فى يوليو ..... و الله ربنا يمد فى العمر و نتلاقى ...... و نشوفك يا بعيد .... ستكون ايام سيخلدها نهر النيل و ضفافه العبقه المضمخة بريحة الطيبة و الالفة التى تلمنا
ابقى اظهر و بطل زوغان

كوستا عليك الله الإسم الاخترو ما ظريف؟ ، وكمان اتخيل لما الكمساري ينادي باجاج باجاج علينا بيجاي . جاكارتا جاوة يا سلام جملة جميلة جدا ….
الحضارمة في اندونيسيا اتخيل لي ما ليهم كتير في الباجاج ، لاحظت انهم اكتر شيء فاتحين مطاعم عربية . وبعدين ذاتو حتكون الباجاج بالنسبة ليهم مشكلة عشان نطق الجيم باليمني صعب ( باقاق )

شنو ياجماعه حكاية الرقشات والشركات الحكاية كانت رحله وحتى صورها ماشفناها بعدشويه قلبت تجاره وكمان ركشات...أنا من البدايه قلت ليكم الكلام ده ماإجازة صيف والصيف لسع بعيد ولا كمان تجاره لأنه روز مازولة تجاره ولسع صغيره ورقيقه على أمور التجار ... بعدين المشوار طوييييييييل خالص ماعارف كان قسناهو بمقاييس الوداد والصداقه يطلع طوله كم...
راحيل لينا زمن نفتش ليك لا تلفون يجيبك ولا مسنجر حكايتك شنو الكهرباء وقالوا إتعدلت والامور و سلكت؟؟؟أبقى أظهرى ...
الفاضل والله مشتاقين وماعارفين الحاصل شنو ولا حتى ردود مابتصل منك على إى ميلاتنا كان زواج الكريمه عامل ليك مشغوليه شويه الحمدلله تم بخير وربنا يهنيهم ويسعدهم مع تحياتنا وأطيب الامنيات ...أظهر علينا مره مره كده وماتطول الغياب.
وكوستا وين ياراجل خلينا نشوفك وبعدين نتدارس بوست الفاضل ده بتحت تحت ونحللو حته حته عشان نوريهو الشمشره الجد كيفنها..

روز
حمد الله على السلامه
اله وين الصور


غدى

الأمورة غدي /

تسلمي إنشاء الله يا غالية ، انا باركت ليك الحجة في البوست بتاع التتهنئة بالحج ـ وبباركها ليك تاني .
انتي برضو مستنية الصور ؟ والله دي ورطة .

د. سوركتي
انت مصمم لسه انو الرحلة ما كانت ذات نوايا حسنة ؟
أنا لما سافرت فكرة الركشات دي ما كانت في راسي لكن في موقف اتعرضت ليه مرة خلاني أفكر في الموضوع ده واتخيلت لو انا في زحمة زي زحمة العاصمة جاكارتا دي حأعمل شنو ؟. مرة اتحبسنا انا وصاحبتي في العربية أكثر من ساعتين في طريقنا إلى المنزل مع انو المنزل على بعد 10 دقائق فقط من المكان الذي كنا فيه وقدر ما السائق حاول يزوغ بيجاي بيجاي مالقى أي طريقة من شدة الزحمة . لذلك فكرت في الركشات على أساس انها بتحل مشاكل الزحمة و بتتزاوغ برشاقة بين العربات .
أوعك الفاضل يضحك عليك ويضيع ليك مستقبلك المهني . الركشات غايو ما ليكم فيها طريقة انت و الفاضل ، خليكم مع الشيشية بنكهة القنقليس و الحرجل دي فكرة ما بطالة من الفاضل ، واعتقد انت ممكن تروج للجانب الطبي يعني ممكن تدخل من مدخل التداوي بالأعشاب . بالتوفيق

تحياتي

روز
جاتني طلبية ركشات من فرانكفورت .
الألمان الشقر عايزين 87 ركشة .
وكمان عايزين 8000 شيشة وكمية من المعسل بنكهات مختلفة ، يعني عنب ، تفاح ، نعناع ، ليمون الخ .....
لكن في واحد ألماني زنخ قال عايز نكهات قنقليز ، محريب ، حرجل ، قرنجال .
الركشات مسئوليتك انتي .
الشيشة بجهزها أنا
المعسل على دكتور سوركتي ، وأهو حيخلي الطب والجراحة والدموم دي . وحينسى موضوع التنزيل نهائي ومعاها حكة راس من الفقرة للجبهة .
وباقي أنواع المعسل بتاعة الألماني الزنخ مسئولية كوستا .
يلا يا دكاترة ويا مهندسين سووا ليكم همه وخلونا نهب على وش الدنيا .
أصلو الزومي مضايقي .

على قولة أختي الصغيرة ( يضحك السمك و يقرقر الساردين )

والله عايزة أموت من الضحك

لكن والله اكتشفت انك زول نواياك حسنة تجاهي بدليل انك جايب لي زباين خواجات كمان يعني شغل تمام و رسمي على أصوله . بالله العقلية التجاريةالفذة دي كلها كنت داسيها تحت العمة ؟؟
انا ربطت ليك مع دكتور الجيلي حيدخل في المعسل من مدخل طبي خاصة بتاعة الألماني الزنخ ( قنقليز ، محريب .... ) ، كوستا ما لاقيتو لسه ما عارفه حيوافق ولا لأ.

د.سوركتى

مساءك بطعم المعسل بتاع الخواجة الزنخ
الفاضل ده قصتو طويلة .... انا حسب استخباراتى العسكرية انو هو قطع التذكرة لروزا ... و كمان اتكفل بحق النثريات و اداها كل النصائح التجارية ..... و فى رواية عشان ما يثير شك المباحث الاقتصادية عمل الرحلة سياحية لروزا لكن كان معاها بالماسنجر و الموبايل لحظة بلحظة ...اها ياروزا ثمن الرقشة بباب واحد كم ؟؟؟ و الدفع الرباعى لخط امبدة بكم ؟؟ و الرقشات الليكزس على كم ؟؟؟
و كمان مرات يعرج ( بجوكر ) على المعسل و الوانه و نكهاته
و سمع اضانى قال ليها انا المعسل بتاع الشيشة عندى اهم من الرقشات ... عشان المعسل لو ما اتباع بشربو ... لكن الرقشات اوديها وين لو ما اتباعت ؟؟؟
اها كمان يا دكتور سوركتى الشمشرة بتاعة فضولى ما انتهت
قال عايز نكهات بطعم القضيم
و القرطم
و الاراك
و الجنزبيل
و فى رواية جارى التحقق منها انو برضو طلب بى تحت تحت من روز تحضر ليهو معسل بطعم الخشخاش

و انا برررررررررررررررره يا دكتور

سجمي سجمي ياكوستا !!!

وأناحالتي قلت عليك زول مسكين ومسالم ؟؟ كده تفضح كل المواضيع ؟؟ تفتو كلو كده ؟، لا خليت حق التذكرة ولا النثريات حتى المعسل بتاع الخششششششششششششــــ برضو فضحتو ؟ أودي وشي فين من ناس البورد

روز
أسمعي يا فردة
بس أنتي عليك تطلبي ال 87 ركشة وترسليها على العنوان العندك .
والمبلغ أتحول ليك في حسابك في ستي بنك قبل يومين وأنا جاتني نسخة من أشعار التحويل لزوم المضاهاة .
بعدين دايره تدخلي لينا تركيبات الدكاترة وتبوظي النكهات بتاعة المعسل . الكلام ده ما بنفع .
خلي دكتور سوركتي يضوق النكهات ويأشر على صلاحيتها ومطابقتها للمواصفات المطلوبة . وبس .
أما حبيبنا كوستا فالحاصل أنو الشمار حارقو ومشوشوو وعايز بي تحت تحت يعرف تفاصيل التمويل بتاع البزنس بتاعنا ده . وقولي ليهو شوقو للمرقه أم ضلوف . ويشمها قدحة .
أنا لميت مجموعة من الشباب لوظيفة كمساري .
حنعمل ليهم معاينة ، والبنجحوا حنرسل منهم عدد لألمانيا عشان يشتغلوا هناك .
الألمان طلبوا مني أنو الكماسرة يلبسوا عراريق وسراويل لزوم الترويج .
تخيلي الألماني الزنخ رسل لي فاكس طالب معسل بنكهة المرس .
وتحليلي للموضوع ده أنو الراجل ده عندو أتصالات مريبة مع كوستا .

زول جديد ممكن اشارك؟؟

أنا برضه يا الفاضل وروز زول جديد زى اخوى الكاشف ود الدامر، يعنى شرحو

ممكن ما اشارك

وينكم يا ناس بى هناك، والله ليكم وحشة بى مية جنيه، ويا حليل ايامكم

لكين بس عايز اعرف، روز دى ياها الزهرة الكانت فى فريق تحت هناك ولا زولة تانية

عشان الزول ما يفك آخره طوالى

أهلا بيكم ودالدامر و The Rain

خشو طواااااالي الدار أمان تأنسونا و تشرفونا .
يا ريت لو عندكم تجارب عن السفر أو انطباعات عن بلدان زرتوها ، تفيدونا بالمعلومات .
بما انكم لسه جداد( بضم الجيم ) فرصة أعقد معاكم صفقة بتاعة ركشات . شكلكم كده شباب صغار ،والفاضل جاب ليه بيسنس بتاع ركشات من ألمانيا ،رأيكم شنو تغتربو في ألمانيا وتشتغلو كمسارية في أسطول الركشات هناك. يعني منو شغل و منو سياحة . و الرزق يحب الخفية . رايكم شنو شباب؟

The Rain انا روز بتاعة هنا بس ،ما قاعدة أمرق بره بيتنا .

تحياتي

اخوى المطر .. الشكشاكة
طبعا انت اعتبرتها روز الزمان بتاعة الحوش التانى
لا يا حبة ... دى روز تانية ... وكيفك يا ود يا مطرة
والحمد لله اللمينا فيك بى جااااى .. وزى ما قالت الاخت
روز وانت خير من يكتب عن الرحلات وفى انتظار حكاويك
الاخت روز
انا صديق شخصى للاخ الفاضل .. وكذلك للاخ كوستا الظريف
وما دفعنى للاشتراك هذه الكوكبة المشاركة فى هذا البوست

روزا

انا مسكين لكن المسكنة مع ناس الشمشرة الفحول ديل ما بتنفع
ما شفتى فضولى قولنى حاجات و لا سمعت بيها حتى ؟؟؟
اها .. عايزانى اسكت ؟ تكتكتك..... مع هزة رأس معاها كمان
و يعنى عشان اخدتى الكومشن بتاعك عايزانى اتبلم و اسكت ؟؟؟ .... ابييييييت .... و بفتو .... و بفتو ...بفتو
و كمان ما تقولى فردتى ودالدامر ظهر على المسرح ، اللعب يا دوب ماا حلوّا ...... دمورى باص واتا ... وكمان ثرو .. لعب ضفارى مافى
العب باص و افتح خانه .... عشان ما يودوك الشفخانة

اها

فضولى

كماسرة فى برلين ؟؟؟
اعتقد جماعة الخضر طالبين نجيلة طبيعية من الجريف الورانى
وين ماجلان ؟؟؟؟؟
عندى ليك معسل رهيب ما نزال السوق لسع
بنكهة المحيريب
ياربى اختنا روزا بتعرف المحيريب ؟؟؟

عشان ما تزعلو أهي بعض الصور من اندونيسيا
الصورة دي لمدينة الزهور
Kuta ponda
والصورة دي مصورها أنا شخصيا من مكان مرتفع في المدينة

شوفى ياظريفه الصور المابتنتظر فى المواقع دى مابتنفع نحنا عاوزين مواقع تمسك الصور لغاية مانقدر نشوفها ....بعدين عاوزين زهور مش زهور؟؟؟؟ماتزوغى تانى ووكوستا معاى وفضولى وراحيل وودالدامر والبقيه الباقيه من العقد الفريد وكلهم طبعا الفاضل حرشهم عليك وأنا عارفو صاحبى مابقصر وبحب الناس كتير الله يديهو العافيه بس والصحه....آمين .

شكلي كده وقعت ولا حدش سمى علي

كلكم يعني بقيتو علي ، على رأي عادل إمام "كلكو علي ولا إيه؟؟ "
الفاضل رميت طوبتو زمان ، كوستا الكنت عشمانه طلع عميل هو زاتو و باعني ، الناس الجدد طلعو أصحابكم برضو . وجيت انت ختمتها يا دكتور سوركتي؟

دي مؤامرة مدبرة .
حتى الصورة خذلتني و أبت تتطلع . بس انشاء الله حتظهر في يوم من الأيام.

لنا عودة

شكلي كده وقعت ولا حدش سمى علي

كلكم يعني بقيتو علي ، على رأي عادل إمام "كلكو علي ولا إيه؟؟ "
الفاضل رميت طوبتو زمان ، كوستا الكنت عشمانه طلع عميل هو زاتو و باعني ، الناس الجدد طلعو أصحابكم برضو . وجيت انت ختمتها يا دكتور سوركتي؟

دي مؤامرة مدبرة .
حتى الصورة خذلتني و أبت تتطلع . بس انشاء الله حتظهر في يوم من الأيام.

لنا عودة

معقولة ؟؟؟؟
يا بت يا مصقولة
تقعي ونحنا واقفين نتفرج ؟؟
دي ما حصلتش .
كوستا ودموري وسوركتي والمطر بعملوا مناورات .
أولاً كوستا
بفتش للكفيل بتاعو عشان يديهو خروج ويجي الأمارات للمعاينة ، ولو أنو زول حبيبي وأنا رشحتوا لركشات برلين . وحيسافر من هنا .
ثانياً دموري
الفرده الكده وزاد وجدي
حالف بي راس ابوه انو ما يلبس عراقي وسروال في فرانكفورت . وقرر يكون بودي قارد لروز في رحلاتها المكوكية لشرق آسيا .
ثالثاً دكتور سوركتي
أنا مرشحو لمشروع الشيشة وطلبت منو أنو يجي السودان عشان يمشي جبل المقينص في جبال النوبة الشرقية ويجهز شحنة الفحم من هناك ويشحنها لألمانيا سييييييييييييدا .
رابعا أخونا المطر
أنا والله محتار فيهو .
لو شغلناهو مع دكتور سوركتي في مشروع الشيشة ياهو الطفى ليهو النار وبوظ الفحم .
ولو شغلناهو في مشروع الباجاج اكسبريس حيرش البنات الألمانيات الحيركبن ركشاتناويبوظ ليهن هدومن الشوية ديك .
كدي أدرسي الموضوع وردي علي ينوبك ثواب .
الألماني الزنخ رسل فاكس ، كدي أشوفو وأجيكم راجع .

روزا

يا بت امى انا كل الحاصل انى خايف عليك من مؤامرات فضولى صاحبى
لكن يبدو قلبى على جناى و قلب جناى على مش حجر صخر عديييييل
طيب عشان اثبت ليك انو فاضل عميل مزدوج و له مآرب غير تجارية وراء رحلتك دى ... شوفى اول ما انتى نويتى تنزلى الصور بتاعة الرحلة قامت طلائع من استخباراته البوردية بازالة الصورة فورآ حتى لا ينكشف المخطط الرهيب لان الصورة المأخوذة بواستكم كان يقف فى اتجاه الكاميرا احد جواسيس الفاضل من غير ما تحسى بيه .. لذلك قرروا ان لا تنزل الصورة ابدآ ... دى نمرة واحد
اها ... د. سوركتى و دمورى حيكشفوا المزيد بس فى وقته
اما اللاعب الخطير المطر فانا متأكد من انو حيفجر قنابل مدويه بخصوص العميل الفاضل
قف
قواتنا و امن الدولة يراقبون الموقف بدهاء
و سيقع العميل الفاضل و معه اى كمسارى سواء فى برلين او ليفركوزن او اشتوتقارد
و لا نامت اعين الجبناء

فضولى

انت نفر مافى كويس صديق
انت مافى معلوم انا بابا واجد كويس
هو فى سوى اكست فيزا مال انا الحين
بس هو فى كلام .. كوستا انت ولد واجد زين انا ما يريد انت روح شغل كفيل تانى فى المانيا
انا كلام : بابا هذا كفيل جديد فاضل هو واجد سالرى يعطى
بعدين هو كلام ممكن نفر يريد باسبورت المانى هو يسوى
عشان هو سيم سيم كارلوس .. كل نفر تزوير هو معلوم
انت يا فاضل سوى شوية انتظار
بعدين لازم انت معلوم ... انا ما اريد شغل حق خط برلين ..بون عشان هذا خط واجد زحمة سيم سيم خرطوم ثورة ... خرطوم كلاكلة ..صحافة زلط
انت فى سوى انا كوندكتر مال خط : ميونخ .. تيلى ماتش
عشان انا اريد واجد مسخرة و ضحك هناك
بعدين لازم فردة مال انا دمورى يكون شغل سيم سيم خط

كوستا
يجازي محنك
كتلتني بالضحك
انت تاريك يا فتق بتعرف أوردو ونحنا ما عارفين ؟؟؟

فاضل بآآآى
هامكو اوردو جانتاهى
اور هندى برضو جانتاهى
لكن
هامكو ظبيانى ناهى معلومى
بتانى..نهى معلومى
يادو امى

اها

اخبار الكماسرة شنو ؟؟؟
و ين زولتك روزا؟؟؟ مما قبضت الدراهم و الركشات ما شفناها تانى
الدكتور اظنه بيجرب فى النكهات عشان ناس المواصفات و المقاييس
دمورى قال ماشى الترزى عشان اليونيفورم بتاع ناس ابورجيلة
و المطر عندو نشرة احوال جوية فى تلفزيون "العربية" الليلة

الفاضل

كوستا

وبقية عصابة الخمسة ، واحتمال اكتر من كده :

بس بعاين بعيوني

لغاية ما أفضى ليكم بجيكم ناطة تاني

روزا

يعنى خجلانة ؟؟ ما تقوليها عديل انو ناس المباحث الاقتصادية بيحققوا معاك فى الصفقة المشبوهة
انا ما قلت ليك الفاضل بيوديك فى داهية ما صدقتينى
و دلوقت حيقول ليك وراك رجالة و لا يهمك و حنحلك من الموضوع ده .. و اصلو انا علاقتى واسعة و ايدى واصلة.... و عيييييييييييك
يعطيك من طرف اللسان حلاوة
لكن يا اختى الشافك فى سجن الدبك ما كضب

آآآآآآي
يا روز
عدي الدراهم والدنانير والدورارات ، وتعالي ناطه
طبعاً حتجي ناطه من الفرحة
أنا ما قلت ليك الشغل معاي نضيف وما في لعب ضفاري زي لعب كوستا القاعد يهضرب ده .
طبعاً هو من ما عرف أنو التحويل وصل لحسابك مسكتو أم هله هله وقعد يهضرب أشي أوردو وأشي عربي وأشي ما بعرفو شنو داك .
المهم ود الدامر ودكتور سوركتي أنشغلوا بالمعسل والترزي وبحهزوا في اللعب الواته .
لكن الله لينا من المطر شايفو لابد بجمع في سحايبو . ويوم يصل هنا حنعلن البوست ده منطقة كوارث .

كوستا
صحي أنت عندك ظار ؟؟؟؟
قالوا يا خوي فيك الريح الأحمر
بي دستوركم يا أسيادي .
دي ياها هضربة الظار ذاااااااااااتا

الفاضل و كوستا
سلام مربع

كان الفاس وقعت في الراس واكتشفوني بجي ناطة برضو لكن ما ليكم ، بجي ناطة بالحيطة أو بالأصح متلبه بالحيطة ، عشان أنا مااااااا مرتاحة ليكم من الأول و عشان كده دبرت أموري كوييييس ، يعني شغل ستات ،وما يجيبها إلا ستتاتها على قولة المصريين. و الدبان الأزرق مش حيعرف طريقي .
كدي شوفو الصورة دي . دي مدينة الزهور . قلت لنفسي يا بت يا روز انت روز كيف ما يكون ليك نصيب في مدينة الزهور ؟ لذلك اشتريت المدينة دي بمبلغ ما حقول ليكم كم ولا جبتو كيف . والصورة دي اخدتها من بلكونة غرفتي في القصر بتاعي المشيد على جبل في المدينة .إنشاء الله بس المرة دي الصورة تتطلع وما تخذلني .

الاخت روز
الصور دى يعمينا فيهن .. انتى متأكدة انو الكاميرا
كان فيها فيلم .. وبعدين شوية استفسار بالله .. طبعا
انا فصلت اليونفورم وح ابتدى الشغل فى خط برلين
اشتورتغارت .. بس ما وريتونا الالمان ديل محطاتهم زينا
وكده .. يعنى محطة السبيل والمظلة .. وسندة يا اسطى بالله
فضولى
جناح جبريل يغطى عليك .. بالله ريشة واحدة لى اخوك لانو
مظلوم مرتين ... اها اخوك ماشى يشتغل فى خط برلين
بالله خلى بالك من العقاب .. وياهووو مايسطو على حقوقى
كوستا البشاشة
والله انا يخيل لى ح نسمى المحطات الالمانية اللى ح نشتغل
عليها زى بتاعتنا .. برلين صنقعت واشتوتغارت القبة
ودرسلدوف بالوادى وميونخ بالنص
سوركتى
شفت الناس ديل جدعونا وين بالله .. ان شاء الله بعدين الرواتب
تكون باليورو عشان الالمانى ده طالع ونازل
رحيل
انتى فى ياتو خط ؟؟؟ تبادلى وكده

دموري
يديك العافية
والله يا فرده كمساري شرط
بس العراقي والسروال لازم يشكلوا اليونيفورم بتاعك
وبالعدم فصل ليك كرتونة

كوستا
برضو بي دستوركم يا أسيادي
هاك الريح الأحمر ده .

روز
دكتور سوركتي
المطر
أبقوا جاي

الأخ ود الدامر

والله العظيم الكاميرا كان فيها فيلم لكن الظاهر أنا محسودة على النعمة اللي أنا فيها وأساطيل الركشات وووو.... وغيرها مافي داعي لذكرها عشان العين و الحسد ما يتقلو علينا.
باين عليك زول نشيط والله و بديت بتفصيل اليونيفورم . حسب البعرفو انو الفاضل قال انو ناس المانيا حيرسلو ليه تفاصيل بخطوط المواصلات كلها الي حتغطوها بس استنو منه خبر انت عارف الفاضل زول بشتغل من تحت لي تحت وما بطلع أخباره بالساهل ( أريتو صاحب الياباني و الألماني).
بالنسبة للصور غلبت معاها غياتو كدي جربو اللينك ده . دي محاولة أخيره لو ماطلعت الصور بعدها حأمشي أشوف لي فكي كااااااارب يفك العمل المعمول لي ده .

الفاضل
بطل كلام كتير وما تضيع زمنا ساي وشوف شغلك كويس الجماعة فصلو اليونيفورم و مستنينك

http://cute_mimi0.tripod.com/indo1.jpg

http://cute_mimi0.tripod.com/indo2.jpg

http://cute_mimi0.tripod.com/indo3.jpg

روز
مسائك بنكهة التفاحتين
عليك الله مدراء أعمالك وطاقم السكرتارية بتاعك ديل زحيهم مننا بعيييييييييد
أديتهم الصور ينشروها قاموا صيعونا .
تريبود وما أدراك ما تريبود .
يا حليوة
رسلي الصور في الأيميل عدييييييييييييل كده .

شفت يا دموري البت الزهرة دي حريفة كيف ؟؟؟
كل يوم تقول لينا شوفوا دي وجربوا ده ونحنا نجري ونتلفت زي سيد الغريبة عشمانين نشوف الصور .
لكن يا خوي أظنو عشم ابليس في الجنة .

آخر الحكي
نما الى علمنا أن كوستا ود . سوركتي منكبون في البحث والتحري عن مصدر التمويل بتاعك .

وكوستا ياهو سيد ظار .
ودكتور سوركتي جنوا كتابة حجبات وعمل وتنزيل .
يا حليوه اتحصني .

دمورى

الله يجازى محنك
لقد اضحكتنى يا رجل حتى الثمالة
قلت لى برلين صنقعت .. و اشتوتغارد القبة و ميونخ القلعة ؟؟ ههههههههههههههههههههههههههههههههاى
يادمورى فضولى حريف و بيلعبها فى راس القطر و تحت ضل الجرجير الخواجات ادوهو حق اليونيفورم بالمارك الالمانى ... و هو عشان يوفر قال ليك السروال و العراقى .... قول ليهو الب غيرها : يونيفورم بس ... على وزن : قضارف بس

فضولى

الزآر ده شنو هو ؟؟..... ملاح بالبشملى ؟؟؟
انا حأعمل فيهو بحث عشان نشوف دستور ( ابو الزهور ) ... و مش عارف الديك ( الاحمر ) اليابانى و الامريكى و الايرلندى ( على وزن الجيش الاحمر )
... اراقب الموقف بدهاء
و سأنقض فى الوقت المناسب

روزا

الصور اشاعة ...زى البيزنس بتاعكم انتتى و فاضل
يا اختى صور شنو ؟؟؟ ...... اصلو قالوا انتى مشيتى و صورتى بفيلم مغشوش و ذلك من تدبير الفاضل عشان ما يحرق عملائه المنتشرون بجزيرة جاوه .... و ما قلنا ليك الفاضل عميل من اوله ...من اوله
مارضيت كلامنا
اهو ده العذاب اتحمله

سوركتى
و المطر

اظهروا و بانو
عليكو الامانو

أنا بصراحه كده شفت صوره واحده وكانت روعه بس مش كلها والبلد بالجد تستحق الزياره لجمال طبيعتها بس ماشفت فى الصور غير أطفال مصاحبين لروز وين باقى الناس هذا هوالسؤال يعنى الموضوع مش ركشات وتجارات ....ولسع فى ناس
unseen ؟؟؟

احبائي
د. سوركتي
روز
كوستا
ود الدامر
اسامه الخاتم
مطر
وكل الأعزاء الذين شاركوا في هذا البوست
بعد يومين أن شاء الله أخاطبكم من السودان حيث أغادر اليه لتلقي العزاء في وفاة والدي عليه رحمة الله ، والتي حدثت صباح الجمعة 7/3/2003 م
وأنا أدري أنه ليس لكم علم بهذا الحدث المفجع . ولكنها أرادة الله وكل نفس ذائقة الموت .
أنا لله وأنا اليه راجعون .
أراكم قريباً بأذنه تعالى .