لكل الناس البحبها

لكل الناس البحبها


02-10-2003, 11:56 PM


  » http://sudaneseonline.com/cgi-bin/sdb/2bb.cgi?seq=msg&board=2&msg=1044917801&rn=0


Post: #1
Title: لكل الناس البحبها
Author: بت قضيم
Date: 02-10-2003, 11:56 PM

ولأني غاطسة في الخروف حتى الكوع
بجانب الركب بالطبع
فربما لن استطيع مع تعبي في عملي البيلوجي الخطير وامريكا على أهبة الاستعداد لمحاربة اسلحة الدمار الشامل أن اهنيكم بالعيد
وعلى فكرة
الحمد لله
اطمئن قلبي عندما وجدت الطريقة المثلى لحماية نفسي من الناس الشريرين ديل،،، أملك سلاح خروفي بيلوجي خطير،،،بالطبع دمار

لكل ذلك
اردت أن اقول
ربما لن استطيع كتابة مسنجرات لكل الناس البحبها لاهنيهم بالعيد،، العدد كبير وباندوث بكري اكبر

فلكلكم
كل عام وانتوا كل حاجة حلوة في الدنيا

وبعدين انا اعلم صعوبة الرد على كل تهنئة بوردية بالعيد
بكري بقوم بعدين يطردنا
لذا قد لا يستحق بوستي الرد يعني،، أنا ادري انكم ستدعون لي برضو بالخير ولو لم تردوا التهنئة،،، اردت فقط ان اكون سباقة بالخير
شفتوني طيبة كيف وبعرف اسوي كمونية؟؟؟


كل الحب

Post: #2
Title: Re: لكل الناس البحبها
Author: رقم صفر
Date: 02-11-2003, 00:04 AM
Parent: #1

بت قضيم لك ولكل اعضاء البورد الف تحيه مباركه ، وربنا يححق اماني الجميع ، وسوداننا بخير

Post: #3
Title: Re: لكل الناس البحبها
Author: وجن
Date: 02-11-2003, 00:07 AM
Parent: #1

حبيبتى بت قضيم
كل سنه وإنت أجمل وأجمل
وكل سنه وإنتى معانا ومكمله لينا باندوث بكرى


أسمعى ممكن سؤال انت العالم دى
ما بتقدر تعيش من غيرأكلن البعرفوا براهم دا
والله عجائب

كل سنه وانت طيبه وكل البورداب الحلوين بخير

Post: #4
Title: Re: لكل الناس البحبها
Author: Elkhawad
Date: 02-11-2003, 00:31 AM
Parent: #3


بت قضيم
تحايا اليك بمقدر حله كمونيه
وصحن شطه
وعيد جزر سعيد منمق بكل انواع السلطه
وامانيا كتير تبدا من تقشير الخروف لحد شوربه الضلوف


Post: #5
Title: Re: لكل الناس البحبها
Author: Tumadir
Date: 02-11-2003, 00:35 AM
Parent: #4

ان شا الله انا اكون من
الناس البحبها ديل

انا غايتو نضفت تلفونى وختيت فيه وردة

العيد ما اظن يفوت حد التلفون

مشينا للجزار قال تعالوا يوم الاربعا للخروف

الجامع فى بلد تانية والعربيه اتكسرت

حنطبخ حلة فيها تلاتة كيلو لحمة

وحاغيب من الشغل

واشتريت كرت


نحن مش يانا ناس عيٌد بايَة حاًل عدت يا عيُد؟

Post: #6
Title: Re: لكل الناس البحبها
Author: DKEEN
Date: 02-11-2003, 11:15 AM
Parent: #1

وانتي طيبة يا استاذة
ودمتي تصدرين الافراح والفراشات ...ودام الود
بينك وبين من تحبين ..وانشا الله يضووا ليكي


ومن عندك نهني جميع البورداب ونقول ليهم كل سنة ووكل واحد بخير وطيب
وما عندو قشة تعتر ليو
واخص بالتهئنة الوالد والوالدة
والعريف عبد الرحمن بشير ابوسن بالسلاح الطبي ، والاخت سلمي صد يق محمد بطيبة الشيخ القرشي والعروسة هالة ببري وااهدي اليها اغنية (النار ولعت والعمة العزيزة نفيسة بالكدرو، والاستاذة المتألقة رانيا هارون ببرنامج اليوم الاول وكل الاهل والاحباب بالبشاقرة .
وبرضو من كل البحبوكي يا بت قضيم

Post: #8
Title: Re: لكل الناس البحبها
Author: بت قضيم
Date: 02-11-2003, 10:25 PM
Parent: #1

رقم صفر الرجل الغامض
ولك كل الأماني الطيبة
عيد سعيد وعمر مديد يا رب

وجن
الحبيبة
وأنت بألف خير
معليش لن استطيع الإفصاح عن أكلنا اليوم
ما دفسته من لحمة تخمني يا وجن حتى بت أحس نفسي ضلعة
والله

Post: #9
Title: Re: لكل الناس البحبها
Author: hasan_6
Date: 02-11-2003, 10:31 PM
Parent: #1

كل سنه وانت طيبه
بت قضيم
انشاء الله مزيدا من العطاء والتنوع والثراء
كل الاحلام والامنيات متحققه

Post: #10
Title: Re: لكل الناس البحبها
Author: bit barber
Date: 02-11-2003, 10:36 PM
Parent: #1

كل سنه وانت طيبه يا بت قضيم و ربنا يديك كده علي قدر نيتك

قلتي لي بتعرفي تعملي كمونيه ..يعني ما بترميها كده بيني وبينك ؟؟

و الله شاطره

Post: #11
Title: Re: لكل الناس البحبها
Author: مشتاق
Date: 02-11-2003, 10:42 PM
Parent: #1

بت قضيم

كل سنه وانت طيبه

وبمناسبه الكمونيه نحن لحدى اسى(قصدى اناوالفرد)ماقادرين نعمل الكمونيه

ومحتارين نعمل شنو فى الكرشه والمصارين بعد ان غسلناهم بصابون فيرى

واضافه عطر باريسى

فالرجاءالمساعده

Post: #12
Title: Re: لكل الناس البحبها
Author: willeim andrea
Date: 02-11-2003, 11:02 PM
Parent: #1

كل سنه وانتي طيبه ولو كنته عارف انكم ضابحين اول يوم كنته جيت عسكره عندكم لانو قرجه شراني وما عارف اعمل شنو غايتو رسلي لي الكوارع وكل سنه وانتي طيبه وكل افراد الاسره الكرام وربنا يستر علينا من الناس البتبلوا علينا قال بيولوجي

Post: #13
Title: Re: لكل الناس البحبها
Author: solara
Date: 02-12-2003, 00:43 AM
Parent: #1

..
.
تحياتي ليك.....


Solara....

Post: #14
Title: Re: لكل الناس البحبها
Author: SAMIR IBRAHIM
Date: 02-12-2003, 04:27 AM
Parent: #1

وانتي طيبه يا بت ست البنات

Post: #15
Title: Re: لكل الناس البحبها
Author: DKEEN
Date: 02-12-2003, 08:43 AM
Parent: #1

كما واهني قدامي الاصدقاء بالمقرن الثانوية ،والصديقات بفيلا جيلدا ومحمد علي مكي الثانوية ،واخص بالتهنئة الاستاذالمعز والاستاذة ابتسام سنهوري والي
جميع الذين كانوايامئذ متكئين علي الرياحين في المين روود... والي تلك الفارهة التي تركت غصة في حلقي لا تنتهي ومسخت جميل الليالي وعاطر الذكريات بي كلمة واحدة وحركة سغيرة.. ومشت تقدل كما لو انها انتهرت متسول ..ء
واليكي يا من تتاهلين هذه الايام تاركة للرجال طمام البطن علي ظهر البواخر وفي بلغاريا وفي بطحاء الرياض ..... والجوقة بتقول ليك في الم جماعي .. ليه انحنا سوينا ليك شنو؟

***************************************
يا صانع الدكاي ..خلصني من هذا العذاب ..عذاب ان اشرب بلا انخاب

Post: #16
Title: Re: لكل الناس البحبها
Author: وجن
Date: 02-12-2003, 05:58 PM
Parent: #15

دكين أنت حاسى بشنو ود أمى
شايفاك شغال عربى وأفرنجى
أنت شارب حاجه ود أمى
أسمع ....
شايفه الحياه عندك كأس وبلغاريه
أنت وين من الشربوت ومن العيد
دكين كل سنه وأنت طيب
أسمع
ما داير تهدى لى

بت قضيم
دا كلو أكل لكن ما بتبالغى
وبكره تشتغلى لينا مُصلحه
لكن ما حا أشتغل بكلامك بعد ما دفستيها كمونيه
أختفيتى وين تانى ما رديتى على الناس البحبوكِ

Post: #17
Title: Re: لكل الناس البحبها
Author: ابويوسف
Date: 02-12-2003, 06:15 PM
Parent: #16

الغاليه بت قضيم
لكي مني تحيه
معطره بشذى العيد
كل عام وانت بالف الف خير

Post: #18
Title: Re: لكل الناس البحبها
Author: بت قضيم
Date: 02-12-2003, 10:40 PM
Parent: #1

وجن
كتبت في ردي الاخير ده ما يشبه العريضة،،،كالعادة يعني،،، ومع ذلك ،، تأثير الشربوت ظهر جلياً في جهازي،،،ضاع بقية رغيي هباء
وطبعاً لا اذكر ماذا كنت قد افتيت
بعدين على فكرة اكلي الكتير ده له علاقة بأبحاثي في الأكل السوداني،،، او كيف افتي في شئ لم اجربه؟؟؟
يعني مثلاً،،،أكتشفت أن الباسم ليس باسم كما يدعون،،،انه فراق الروح لا ادري حقاً كيف للسوداني أن يملى معدته على أحزان غيره من الكائنات،،، ثم يحلو له أن يسميه باسماً،،، هرباً من الإحساس بوجع الضمير
وهنا ندخل مع بارجيت باردو،، الله يديها العافية ويزيدها من خرفه حيث كل عام في وقت عيد الضحية المسلم،، تشن حرباً شنعاء على البشر المسلمين،،،واصفة لهم بالتوحش،،، ياااي بياكلوا لحمة،،،مدافعة بذلك عن الحيوان البرئ ابو عيون كحيلة الخروف،،، وعلى فكرة،، خروفنا كانت عيونه جد خطيرة،،، لم ابتأس عند ذبحه ،، كيف افعل وعيونه احلى من عيوني بمراحل غير انه ما احوص؟؟؟
المهم أن تيتة بارجيت قالت ان المسلمين قوم متوحش شرس ما عنده ضمير يذبح في الخرفان جاي وجاي لا يفكر في إحساس الخروف كيف يكون وهو يذبح،،، وعندما سألوها عن اطفال فلسطين قالت مالي ومالهم شن غردي بيهم
والله لا ادري ماذا قالت،،،ما بدخل روحي في حق الله الدنيا ضحية ،،، بس كان نفسي يا وجن في هذه السانحة الكمونية الخروفية،، أن تواتيني ظروفي لارسل لها طبقاً من الباسم الولهان الخروف ،،وكيتاً فيها اقول ليها أننا كمان بنسميه الباسم
كيف يكون الباسم بالله عليك ولسانه كلو اتمطى لمن وصل رقبته؟؟؟
أما ما يجئ في الكمونية،،، فأي نعم هي مش سياحية كما جاء في كلامنا المصلح سابقاً،،، لكنها لذيذة بشكل؟؟؟ لا احلى منها إلا الباسم
اسفة لخذلانك ،، كان لازم اكلها طبعاً

وكي نمحى لمحة الشكك في حديث السيد مشتاق
فله نقول
كل سنة وانت با(للحمة) والسلامة
إن شاء الله تسلم يا ذوق
الكمونية عملها سهل جداً،، أصعب ما فيها غسلها،،، وطالما انكم غسلتوها وبالفيري كمان الما لقاه شعري لما تلقاه كمونية خروفكم (على فكرة الكمونية لو غسلوها نضيف بتمسخ) انت قطع البصل وبه بعض اللحمة وشوية كرشة بالطبع،،، لا تنسى القلب وشوية كبدة وبالطبع بالطبع الكلاوي،،، واطبخهم كما الطبيخ عادي،،، زيد كل شوية موية إلى أن تحس أن ما سبق ذكره استوى،،، مع ان الكرشة على فكرة لها خواص بلاستيكية ،،، قدر ما تلوكها ياها كرشة،،، بس نفترض أنها استوت،،، ضع الصلصة ثم الثوم،،، وما عارفة والله الزيت ختيته متين في كمونيتي؟؟؟
نسيت والله
المهم،،، تأتي اللحظة الحاسمة عند وضع المصارين بعد تضفيرها،،، وبالمناسبة،،، تضفر السودانية المصران سنوياً لانها في الأغلب تفرغ شحنة نقص عاطفي تجاه الضفاير والشعر
ثم تسوط عزيزي المشاهد وتسوط عزيزي المشاهد
مشتاق
والله ما عارفة بسوها كيف،،، كل سنة وانت طيب لازم يعني كان تحكها معاي
تسلم ياااااااااارب

Post: #19
Title: Re: لكل الناس البحبها
Author: بت قضيم
Date: 02-12-2003, 10:59 PM
Parent: #1

الخواض الوجيه
سيرة الطعام تصيبني الآن بحالة نفسية،،، ربي لا يأتي لي احد بسيرة لحمة البتة
ولسه،،، قدامنا كمان حوالي ثلاثة أيام،،، لثلاث ضبايح،،، في ثلاث بيوت
الرحمة يا رب
ياخي السودانيين ديل ما بعرفوا ياكلوا يوم خروف وباقي الخرفان يضحوا بيها في سبيل الله ساكت كده كان مرة واحدة في سنة من السنين بس؟؟؟
طبعاً كلامي هذا قد يثير غضب ناس ما وراء البحار،،،
اعني الناس العايشين في بلد تعز الخروف وتعمل ليه قيمة
كأن تطلب الخروف قبل فترة كافية،،، ثم تأتي بتصريح،،، غير زيارة الطبيب،،، يعني تسوق الخروف توديه الدكتور ليؤكد لك أنه سليم يمكنك اكله بالسلامة
يعني لو كنت يا الخواض أنا خروف،،، فغير عيشتي الهنية في المزارع الغنية في بلاد الله الباااااااردة دية،،، لما استطاعوا ذبحي،،، ده اولاً،،، اوكيف يفعلون وكل كرشتي مريضة،،، بالتأكيد حيلقوا حصاص ودقة وقونقليز وشطة وتبش،،، وسن خروف وكراع بقرة ومصارين جدادة،،، وشجرة دكوة ونبق ودومة وقراصتها،،،عيييييييييك وكسرة وكول وحلو مر وشربوت وبطارية قديمة وانسى
غير أنهم ما كانوا ليذبحوني وانا لن اكون فيما بعد الباسم،، وكيف اكون وسنوني كلها مخلخلة من كد العضم ،، وقال اشفط المخ،،،كيف مخ في الكراع يا الخواض؟؟؟
لو كنت خروف في بلاد بره كانوا على الأقل وجدوا حلاً لمعاناتي الكثيرة من امراض البطن
بس برضو الحمد لله انني مش خروف،،،لأنه كيف اكون خروف وخروفنا عيونه
احلى من عيوني بالله عليك؟؟؟؟
ثم أن حظي التعيش الهردبيس كان جعلني خروف في ذريبة ود الكاشف،،، الغبار ماليني ليييييي ام عيني،،، آكل في البرسيم لما تقوم لي شجرة في راسي وكرشتي يكون لونها هباب
لا عليك ،، انا بقول اي كلام
كل سنة وانت بألف خير وتمنياتي ليك بكل الصحة والسعادة
تسلم يا امير

Post: #20
Title: Re: لكل الناس البحبها
Author: مشتاق
Date: 02-12-2003, 11:00 PM
Parent: #1

loooooool

من مركز العزابه

الى القاعده

حول

عملنا بنصيحتكم

الجميع مبسوط بالنتيجه

عربه الاسعاف فى الطريق

حول!!!!!!!!

Post: #21
Title: Re: لكل الناس البحبها
Author: بت قضيم
Date: 02-12-2003, 11:06 PM
Parent: #1

مشتاق
الوصية في الذمة
بالله رسل لي الريحة الباريسية بتاعت الكرشة وما تنسى راس الخروف
حق ورثة شرعي أظن
و
لووووووول

Post: #22
Title: Re: لكل الناس البحبها
Author: مشتاق
Date: 02-12-2003, 11:18 PM
Parent: #1

بت قضيم

وصلت الوصيه

سوف ترسل الطلبات بوسطه الانتربول

لمعرفه المحرض على الجريمه

حول

Post: #23
Title: Re: لكل الناس البحبها
Author: ابويوسف
Date: 02-14-2003, 02:43 PM
Parent: #22

غض النظر عن المساكين رحمه
ولا نحن ما في دائره الناس
البتحبوها امكن اتشوبرنا ساكت
على الاقل ردي التحيه بمثلها
ولا دي كمان ما بستاهلا


وعلى الود

**************
لقيت روحي في عز جفاك
بفكر فيك وانا ناسي

ام كلثوم

Post: #24
Title: Re: لكل الناس البحبها
Author: بت قضيم
Date: 02-14-2003, 02:57 PM
Parent: #1

ولو يا ابو يوسف
احنا نطول يا عزيز

كل عام وانت بألف خير
درجنا نقول إن شاء الله السنة الجاية تتحقق كل أمانيك
ليه يعني مش السنة دي؟؟؟
واللا بكرة إن شاء الله؟؟؟
او اللحظة؟؟؟
إن شاء الله اللحظة دي يا ابو يوسف تتحقق كل أمانيك،،، بس ما تكون زعلان مني شديد وتدعي عليا يزيدني شناة،،، والله ما ناقصة

كل ما احاول فتح الصفحة امس واليوم،،، تفتح مرة ومرة يجيني
TPC Error
أو شئ من هذا القبيل،،، لاني لا ادري إن كان هذا التي سي بي نوعاً من انواع المياه الغازية واللا حاجة تانية

ليس في الأمر (عاين لي جوه عيوني وما رد السلام) لا والله
بالعكس،،،وجودك شرفني وزادني نفخة على نفخة الخروف

إن شاء الله تسلم وربنا يخليك مية مرة
عليك الله ما تزعل مني،،، طيب؟؟؟

دمت يا غالي

Post: #25
Title: Re: لكل الناس البحبها
Author: بت قضيم
Date: 02-14-2003, 03:12 PM
Parent: #1

دعوني اعترف
الكمبيوتر حالياً ما بتاعي
جلوسي عليه ،، اقصد فيه،،، اعني جلوسي لاستخدامه يستدعى التنازل عن بعض كرامة،،، بوس راس ،،، احياناً وعود جمة،،، مرات مرات إيجار،،، ليس تقصيراً مني والله
ابو يوسف رجاءاً أن تدخل مرة أخرى لتقول انك مش متضايق مني أو احس بسماجتي اكثر

تماضر
إن شاء الله اكون انا من الناس الأنت بتحبيها ديل
كل سنة وانت بألف عافية
تكون دي المرة المليون السمعتيها فيها
وعن عيد التليفون،،، فتأكدي أننا كلنا في الهم سواء،، في بلد عربي كنا في افرنجي،،، في خروف مافي،،، معاك ناس ما معاك،،، جميعنا نتشابه
هذه العلاقات التي نبني في الخارج،،، احسها جوفاء
لا طعم لها ولا استمرار،،، اتحدث عن الغالبية،،، لا ادري لماذا يبدو الناس بهذا الجفاء في الغربة،،، كأنما تأشيرة خروجك من البلد تمنحك صكاً إجبارياً بأن تكون باهتاً،،، تمثل حياتك في الخارج لا تعيشها،،، توفرها لحين العودة لبلادك وارضك،،، ثم فجأة تكتشف أن العمر ضاع وانت في انتظار العودة،،
جيل يخلف جيلاً
لا تتهنى بعيد،، لا عيد يتهنى بيك،،، لا تعرف تحب الناس صح،،، لا الناس تقدر تحبك،،،
جميعنا نمثل تمثيلية العيد لحين العودة،،،رغم إحساسي الأكيد أن العودة بعد طول غياب،،، قد تفقدك هوية الفرح
لا هنا مبسوط،، لا هناك قادر تكون

لا ادري ما علاقة ما كتبت انا بما كتبت انت،،، هكذا جاء الكلام
المهم أن لا تبتأسي
كلنا في العيد سواء

كل الود يا اكبر حبيبة

Post: #26
Title: Re: لكل الناس البحبها
Author: بت قضيم
Date: 02-14-2003, 03:27 PM
Parent: #1

دكين
يبدو لي أن شربوت العيد قد اضلك الطريق فتهت بين بوستي والإذاعة
لكن لا بأس
من اين حصلوا على هذه الصورة الجميلة؟؟؟
صورة طفولة قديمة
تشبه العديد منا
نكشة شعر فيما يشبه اللاهتمام بشكل اعتماداً على مضمون
فالأطفال وحدهم من تجذبهم ابتسامة مجذوم دون الشعور بالتقزز
نظرة تطلع لا معنى لها،،، صورة حلم لم يعاش ولم ينهزم ولم يمت فيه طعم الأمل
انتظار لغد لم يكسره بعد الانهزامات العديدة

وعبر شيطانك أهدي بدوري
لكل الغبش،،،أمانيا بعيد سعيد وعمر مديد
وابتسامة لا معنى لها سوى التعود على أن بكرة حتماً سيجئ كما ذهب الامس تماماً...جميعهم يتشابهون كأبناء شيطان

دمت يا صديق

Post: #27
Title: Re: لكل الناس البحبها
Author: ابويوسف
Date: 02-14-2003, 07:45 PM
Parent: #26

انا الايام سقتني كتيروضقت من العذاب الوان
وفيك يا دنيا ياما شفت كتير وياما فقدت فيك حنان
كيف اصبر وانسى شقاي وانسى عذابي والاحزان
متين يادنيا تفرحي لي وارجع لي فرحي الكان
واجفف ليك انا الدمعات وانسى الهجر والحرمان
***************** *******************
حبك كان على عذاب وياما زاد جروحي جراح
مساهر بي قليب مسكين يساهر الليل يقسمو نواح
واسكب فيك انا الدمعات وليلي الغالي يبقى صباح
بعد ماكنت سابح في بحور احلام مغرد زي بلبلا صداح
بقيت انظم واقول كلمات وارجى تحن تجي الافراح
****************** *******************
دا كان حبك لما رجعت احكي للوساده شقاي
ولما سكبت فيك دمعات ما اظن زولا بكاها سواي
وليه تجني وتقسي على وانا الحافظ هواك وهواي
ولسه ببني في الامال ترجعي لي والقى مناي
******************* ****************
وانا يا غاليه مهما طالت السنوات بستناك
كاتم السر مع الالام وقلبي يقول محال يسلاك
قلبي شايل هموم الناس وكيف بهون عليهو هواك
وجل سعادتي تكوني سعيده هنيه انت في د########


الاخت بت قضيم
طبعا كنت زعلان
لكن رضيت
بالمناسبه القصيده هديه برغم انو ما عندها اي علاقه بالموضوع
ولكن علاقته انها اتكتبت قبل شويه وقلت اول زول يشوفا بت قضيم
بالمناسبه البيت الاخير

Post: #33
Title: Re: لكل الناس البحبها
Author: almohndis
Date: 02-14-2003, 08:28 PM
Parent: #27

بت قضيم
كدى اقيفى
ان نشوف ابويوسف مالو
علق وملا البادوث بتاع
بكرى ولا باندوث ما باندوثك
نرجع يا بنت قضيم ونديك
تعظيم سلام وكل عام وانتى بخير
وربنا يملا ايامك كلها حب ووائام
كلامك حلو معسول وحالتك مسككوه
معليش انشاء الله السنة دى عندك
شبكة اجهزة

Post: #32
Title: Re: لكل الناس البحبها
Author: ايهاب
Date: 02-14-2003, 08:17 PM
Parent: #26


ابت والله اعمل شنو
تحياتي

_________

Post: #34
Title: Re: لكل الناس البحبها
Author: noha_g
Date: 02-14-2003, 10:27 PM
Parent: #1

بت قضيم

كل سنة و أنت ابهى و أجمل

و كل عام و أنت بخير

Post: #35
Title: Re: لكل الناس البحبها
Author: dreams
Date: 02-14-2003, 10:51 PM
Parent: #34

بت قضيم كل سنة وانتى على كيفك

بعد اذنك اسلم على رقم صفر ده فى بيتكم اصلى طولت ما شفتو

وينك يارقم؟

كورى قاى نل

بالدنقلاوى = كل سنة وانت طيب

Post: #36
Title: Re: لكل الناس البحبها
Author: filan
Date: 02-14-2003, 11:25 PM
Parent: #1


بت قضيم كل سنة وإنتي طيبة وكل البتحبيهم...والبيحبوكي
إيهاب..دي إسعافات أولية...والنية واصلة يا حبيب


Post: #37
Title: Re: لكل الناس البحبها
Author: almulaomar
Date: 02-15-2003, 03:10 PM
Parent: #1

الأستاذة الكريمة بت قضيم
أبت مقالاتك وكتاباتك إلا أن تنتهي عند حلة الكمونية ورؤوس النيفة والكوارع ، ولن أزيد حتى لا أصيب الناس بأكثر مما هم فيه ، كل عام وأنتي والأسرة الكريمة بخير.
بالمناسبة يا بت قضيم الكمونية بتاعتكم بتغسلوها عادي ولا دراي كلين
لكم المودة والإحترام جميعا

Post: #38
Title: Re: لكل الناس البحبها
Author: مهيرة
Date: 02-17-2003, 05:41 PM
Parent: #37

بت قضيم العزيزة
كل عام وانت بكل خير وعافية،والله يحقق امانيك من اللحظة دى
طبعابعد رابعة العيد بتكونوا نضفتوا الحلل وغسلتوا المطبخ وبخرتوه بالتيمان وبخور الصندل الماخمج
تحياتى المعطرة ليك وللجميع،بس بالله تانى سيرة الكمونية دى ماتجيبيهالشهر قدام
ودمتى
تحياتى

Post: #39
Title: Re: لكل الناس البحبها
Author: ايهاب
Date: 02-17-2003, 09:31 PM
Parent: #38

العزيز الخواض والعزيز فلان شكرا على المساعده
ما قصرتو تب زي ما شايفيين الشغله دي ابت تجي معاي كلو كلو
معليش كلو يهون عشان خاطر العزيزه بت قضيم تستاهل اكتر من كدا
انشاء الله بس تعجبا
كلو سنه وانتو هي و كل البورداب طيبين وفي احسن حال

Post: #40
Title: Re: لكل الناس البحبها
Author: بت قضيم
Date: 02-18-2003, 00:09 AM
Parent: #1

مساء السعادة
ابو يوسف
تشكر يا طيب
والله قربت احرد ليك البوست لما ما قريت ردك زعلانة من روحي وفقرها
رغم اني ما قريت رد أي حد تاني لان البورد يبدو كان قافل
ذي قفلتي دي الليلة
شكراً للقصيدة والكلام الما تم
يا ربي كان الباقي شنو؟؟؟
الكيور الكتل الكديسة بس
ذي ما قرب يكتل المهندس وكده

المهندس
وانت بالصحة والسعادة معليش جات متأخرة
وكان دعيت لي بشبكة حاجة تانية تكون ما قصرت معاي نوهائي
تسلم يا طيب

ايهاب يا جميل
تخيل أني لا اذكر أن احدهم من قبل اعطاني وردة ولا حتى رسمها غير صديقة لي كانت تبالغ في حبي ايام الطفولة ،، قطعت ورد الشارع كله هدية لي واكتشفت بعدها ان الورد لم يكن ورد ولكنه زهرة كانوا يسمونها ورد الحمير
بالله ما بالغ السماها ده؟؟؟
وردتك جميلة وللون الأصفر خبايا جميلة تعشقها السودانية والفيران
ما تقول لي قاصدة شنو ،، بالتأكيد فاهمني
تسلم يا صديق

Post: #41
Title: Re: لكل الناس البحبها
Author: بت قضيم
Date: 02-18-2003, 00:39 AM
Parent: #1

نهى الحبيبة
وانت انقى ،،،واطيب
لا افهم لماذا يتضايق الناس من الشعور الجميل
فلو قلت لك انا اكرهك انت وحشة لصدقوا ذلك واعتبروا جازمين أن الحديث هو كل الصدق
عكس لو قلت انت جميلة انا احبك،، لماذا يعتبروا ذلك نفاقاً يا ترى؟؟؟
غريبة بجد
فكرت في ذلك وانا ارد عليك
عموما،، الكلام الصادر من القلب يصل القلب بلا حواجز
لذا
كل عام وانت انقى ،، واطيب يا نهى
سلمت

دريمز
بالله انت دنقلاوية كمان رقم صفر؟؟
ما طلعنا اهل كده باللفة
انا مثلك اتساءل عن هذا الرجل الغامض لما كل هذا الصمت والدنيا كانت عيد قبل شوية؟؟؟

كل سنة وانت طيبة ويا رب تتحقق كل امانيك،، على أن تكون اماني !!!سعيدة،، مين عارف لو اتحققت كل امانينا هل ندرك السعادة أو
سلمتي يا احلام

فلان
وانت بألف خير مع انها متأخرة لكن خلينا نقول كل ذي الحجة حج وعيد
ثم انه من الممكن جداً أن تعيد على الناس في عيد الضحية بعد انتهاء الكمونية والكرشة واللازي منو،،، فمن حيث ينتهي ذاك يبدأ العيد الصحيح
أو ماذا؟؟؟
شكراً للوردة،، اربع وردات في بوست واحد ،،قد تخرب طبعي الدومي
ومقبولة منك وايهاب والخواض
دمت يا ظريف

Post: #42
Title: Re: لكل الناس البحبها
Author: بت قضيم
Date: 02-18-2003, 01:04 AM
Parent: #1

شريكي الفاضل الملاعمر
الم تقرر بعد اعفائي من لقب الاستاذة هذا؟؟؟
عارف..عند مشاهدتي للقنوات السودانية ،،، وسماع الاستاذ فلان والاستاذة علانة والاستاذ فلتكان،، اصاب بقشعريرة من لقب الاستاذ هذا
وانا حقاً لست ادري،،، من له صلاحية الاستذة،، الاستاذ صحي واللا الما استاذ؟؟؟
الموضوع شبيه بالديانا ،،، فيه اصل وتقليد ،، بس الديانا اسهل...حيث يدرك الفرق بالريحةواللون،،، المشكلة كيف ندرك فرق الاستذة هذا؟؟

كل سنة وانت بألف خير
يديم عليك نعمة العقل،، ويخلي الأسرة الكريمة
ويزيدك ألق

لم اتوقف عند الكمونية والكرشة ورؤوس النيفة،، هي من توقفت عندي،، واظنها تحتاج فعلاً لوقفة طويلة مع الذات،، غير الوقفة مع الدكاترة وكده
نطمئنك انني لم انتهى بعد من الفاظي الكوشية اياها
بس يخلص عسيم العيد والحج وبعدين نشوف
طبعاً بنغسل الكمونية في الدراي كلين ،، وكمان المصارين في الكوافير
شفت كيف؟؟؟
دمت يا شريك

مهيرة الحبيبة
وانت بألف خير
تسلمي للعيدية
ومثلك انا واكثر،، مش بس سيرة الكمونية،،، سيرة الخرفان كلها ما قادرة اسمعها
غير ان هناك سؤال يحيرني
يعني لو الواحد حج 7 مرات لازم يحج تاني
؟؟؟
او ان من الأفضل يترك الفرصة للغير ويساعدني في تدارك شلل الأطفال الأصابني اخيراً ده
؟؟؟
لا عليك انه العيد السعيد
شكراً يا غالية وتدومي انت ويدوم خيرك

Post: #43
Title: Re: لكل الناس البحبها
Author: بت قضيم
Date: 02-18-2003, 01:31 AM
Parent: #1

حسان - 6
وانت بالصحة والسلامة
ستة اشمعنى يعني؟؟
وبرضو يحقق أمانيك،، تلك التي تجعلك سعيد ليس التي تتوقع أنها ستجعلك سعيد
كنت اقول من شوية،، اننا كثيراً ما نتمنى اشياء نظنها السعادة وسبحان الله إن حدثت،، نتمنى من الزمن العودة قليلاً للوراء عسى نستطيع سحبها
الأمنية اعني
شكراً يا حسان على العيدية
سلمت


بت بربر
كل سنة وانت طيبة
لا ما برميها،، اعتقد ابوي مستعد يرميني ولا يرمي الكمونية
الكمونية هذه تقليد عائلي ضارب في القدم
يرموها كيف
أما عن عملها... فيمكن بعد ده سؤال مشتاق
ولو اني ما شايفاه حايم اليومين ديل هنا
الله يكضب الشينة يكون عمل بوصفتي الهباب
سلمت يا حبيبة


العزيز ويليام انديرا
ما تقول ما رديت عليك اليومين الفاتوا ديل لاني بخيلة ،، بورد بكري هو السبب
والله تجينا هسى اضبح ليك ،، كان ما السعية فرت الله يجازيها

استغرب الحرب ما قامت،، تفتكر راجين انتهاء قنابلنا البيلوجية بعد العيد؟؟؟
ممكن برضو
إن شاء الله تسلم يا ويليام وكل سنة وانت بألف خير


سولارا الصديقة
اتخيلي للآن لا اعرف كيف ارسم واحد بضحك؟؟؟
جهلولة كبيرة
تحياتي ليك والأسرة الكريمة وكل عام وانتم بالف خير
دمتي يا حبيبة

Post: #44
Title: Re: لكل الناس البحبها
Author: بت قضيم
Date: 02-18-2003, 01:36 AM
Parent: #1

سامر ابراهيم
اول مرة اصنف من ضمن البنات اساساً لأصف بالتالي من ضمن ستات البنات
لذا آثرت الرد عليك مفرداً مع اني حقيقي الليلة عملت وجع وش لوشي زاتو خليهم الناس التانين
غير انهم بعدين بقولوا عليا... شنو؟؟ ايوه نرجسية...برضو مبسوطة ولو قالوا

كل سنة وانت طيب ويعود عليك بالصحة والسلامة يا رب
دمت يا ذوق

Post: #45
Title: Re: لكل الناس البحبها
Author: hero
Date: 02-18-2003, 09:09 AM
Parent: #44


...
..
.
المغرقة انوثة .. (بت قضيم)
كل سنة وانت أنثى بكامل البهاء .. وهذا الصدق
الشف ..
لك كل الامنيات الطيبة ...

Post: #46
Title: Re: لكل الناس البحبها
Author: بت قضيم
Date: 02-18-2003, 01:08 PM
Parent: #1

المغرق بطولة
البطل الذي لا يموت،،، مش البطل ما بموت برضو؟؟؟
بت قانعة أنه لا يفعل وإن فعل
تسلم ايها البطل الما بموت

لماذا تدعو لي بالصدق؟؟؟ عارف،، بدأت اعتقد احياناً بيني وبين نفسي،،أنه من الجيد أن لا تكون صادقاً احياناً،،فتحس بكم أنت خبيث،، وهو ليس شعوراً بهذا السوء،،مقارنة بشعورك بالبله،،عندما تسمح لكل عفن الدنيا أن يركبك،،تسامحاً أحياناً،، وعبطاً في أغلب الأحوال

بل قل لي
اتمنى لك بعضاً من خبث،،، تستزيدي به عند مواجهة الطوفان
نكدت علي ام يومك صح؟؟؟


كل عام وانت بخير،،يحقق كل أمانيك ،، السعيدة،، وإن لم تكن سعيدة للبعض،، أو على الأقل تلك الأماني التي تجعلك تدرك الفرق بين الفرح الحقيقي،،وذاك المصنوع

يدوم خيرك

Post: #47
Title: Re: لكل الناس البحبها
Author: hero
Date: 02-25-2003, 05:30 PM
Parent: #46


...
..
.
بت قضيم المتفائلة
نحن ياصديقتى من نصنع الفرح .. ونحن أيضا من نصنع
لحظات الحزن ..
الأنقياء تنتابهم لحظات جنوح نحو ضفة النهر
الأخرى .. ربما فضول وربما رغبة قصيّة فى فض بكارة الأماكن
المهملة من العالم .. لذلك لاعتب على جنوحك
فهو مشروع الهوية ..
ليست كل الأمنيات سعيدة .. وليست أيضا متخمة بالحزن
وبين هذا .. وذاك تساؤل يطل برأسه للأنقياء مثلك فقط !!!

كنية هيرو فى هذا المجال لم تكن تعنى .. أو ترمز قط
لمفهموم البطولة بشقيها .. لكنها نحت فى الذاكرة لم أود لها
الاندثار والتلاشىء .. أحببت أن أحييها فينى وأسرّب اليها
شيئا من ضوء الفراشات الملونة لحظة الاحتراق ..
هو عهد وميثاق شرف فى زمانات الزيف .. والرياء ..

لك شىء من صدق ودك ...


Post: #48
Title: Re: لكل الناس البحبها
Author: HAMZA SULIMAN
Date: 02-25-2003, 08:29 PM
Parent: #47

كل سنه وانت طيبه
ودمتى متالقه دوما ومبدعه

Post: #49
Title: Re: لكل الناس البحبها
Author: Habib_bldo
Date: 02-26-2003, 12:40 PM
Parent: #48


العزيزة بت قضيم وطل البورداب السمحين
فرصة طيبة أن أنقل إليكم أطيب الامنيات القلبية بالعيد وكل سنة والجميع بخير وعافية وسلام
ومعليش إذا التهنئة جات متأخرة شوية
وأرجو أن تصبح كل أيامكم أعياد
وليد

Post: #50
Title: Re: لكل الناس البحبها
Author: بت قضيم
Date: 02-28-2003, 01:39 AM
Parent: #1

هيرو
لم نختلف كثيرا
هيرو ذكرى؟؟
ومتى تموت الذكريات؟؟؟


حمزة سليمان
وانت بألف خير
على فكرة راس السنة الهجرية بعد كم يوم
الا ترى أن بعد كل عيد بيجي عيد يستحق التهنئة؟؟؟
لذا يا حبيب بلدو
لا اظن بوجود حدود للتهاني
فأي عيد يعقبه عيد
وكل سنة انت وكل الطيبين بألف صحة وسعادة

دمتم جميعاً