عاشق هوى الخرطوم..

من ياتو حتّة
ويات مكان في الحتّة ..دي
تملاني ريدتك وأنتشي..
أحزان بتغلب ناس كتار
وعندك انت بتنتهي

لو كان بعاند النيل..ماشربت منو ..قصيد
أو كان بعاكس الموج..ماكان مشيهو..نشيد
برتدّ..حدّ ..القيف أنا بين خدارو..شهيد
يامسارب النيل..
مكتول هوى..الخرطوم.


عارفو..همّك كاسِر مابينو ..شوق..وجروف
شايفو.. ليلك..هادِر..قلبك انت ..شغوف
تعذر بيوت..الحيّ الشوق تعاندو..ظروف
أبقى مارق..للتجيك الدهر كلّو..صروف
تَمِش منّك..تقيف..صامد
وبالثبات..معروف
أدّي روحك..للمحبّة..
هناك..حتقابل..الخرطوم

شارب..هوى النيلين الشوق معاي..مظلوم
أيه ذنبي لو مشتاق وقلبي عاشقو..ظَلُوم
شيل السحاب ياريد
وظلِّل..الخرطوم.

في الروحة..والجيّات..بتشيلي مني..هموم
أمشي..باري..الزول القلتي..خيرو..يدوم
قول ليو خدارك..جاي شايلاو ورايا..غيوم
أفرِد جناح..النور
وأحضن..هوى..الخرطوم.


وقدر مانقول..نفارق النيل.. نلقى الموية سارقانا
جوه مسارا لافحة الروح عكس خُطانا سايقانا
وقدر يانيلنا نمشي بعيد..ليك رمالنا سابقانا
قدر مايمد خطاهو..القيف نلقى خطاو..مباريانا
شوق الموية لي قيفك فاض ..جوّانا.. كفّانا
ريحة جروف النيل حاوية كلامنا...عابقانا
وأحضن هوى الخرطوم

والراحة مالون الفرح ولسّه لابسني الضلام
الراحة بس لون الضمير لمّا يملاهو السلام
الفرحة انو النيل يفيض في كل وادي عليهو هام
شارّي مويتو على الجميع نادى عدلو علينا حام
الشمس بتقبّل ضِفافو وهوّ بهديها ابتسام
الموج يسالم في أخوهو وزعلو شكلو الارتطام
كيفن بيصارع فيهو بعضو تصبح الأحلام حطام
ياربي انت تشيل خُطواهو تصحي كل الفيهو نام
تحضن الأمواج وساحلك شكلو أسراب الحمام
ولمّا تبقى الوجعة حارقة غضبك إتكثّف غمام
أبقى أعرف انو أرضك راجية أمطارك سلام

كنت ماشي عليهو شارعك زهورو فارعات القوام
دخلت بيهو مدن بتضحك بيوتو شامخة وروح تمام
شفع تجدّع بالفرح من كل لون وياسلام

ياعاشق هوى الخرطوم


ياكنت صاحي براي أنا وكان جميع الناس نيام
ياكنت نايم ومابراي اللسّه بحلم بالسلام.

ألأخت/تماضر....السلام عليكم

Quote: ياعاشق هوى الخرطوم

أنا عاشق هوى الخرطوم وأم درمان ومثل هذا الكلام الجميل...

وبركة الرجعتى لنا بهذا ألألق ألأنيق.......

إسماعيل محمد احمد عباس...

ولسه مندهش