أم غبـيـانـة..

أم غبـيـانـة..


03-22-2009, 11:50 AM


  » http://sudaneseonline.com/cgi-bin/sdb/2bb.cgi?seq=msg&board=190&msg=1237719024&rn=3

Post: #1
Title: أم غبـيـانـة..
Author: نجوان
Date: 03-22-2009, 11:50 AM
Parent: #0

بوحي من حوار عن الأمهات..
_______


تترك طفلها يستكشف الشاي الحار..
بل غمست أصبعه الصغير في الكوب الساخن..
"حتى يقتنع".. وقد كان..

لم تنهره حين لعب بالرمل والطين..
وحين أطعم شعره وقدميه بالأكل
ثم تمسّح بالباقي...
وسط ضحكاتها..

لم تكن تعبأ كثيرا بتجفيف شعره المبتل بعد الحمام..
بل كانت تأخذه مباشرة للحوش الكبير للعب والجري..

لم تجري وراه لتطعمه الأكل.. لقمة لقمة..
بل تركته "براحته" يجوع، حتى أتى بقدميه الصغيرتين يبحث عن الأكل ..

حين بكى ليلا .. تفقدته مرّة واحدة..
وان رأته على مايرام، تركته يهدهد نفسه بالبكاء.. حتى زاره النوم..
ونامت ملء جفنيها..

حين كبر قليلا.. أخذته لشراء الحلوى من الدكان
لم تنوب عنه في الحديث، بل جعلته يطلب ما يريد.. ويمّد يده الصغيرة بالنقود..

وحين كبر أكثر .. أعطته مصاريف المدرسة كل صباح في يده
وفهّمته كيف ينفقها...
لم تجزع يوم صرفها كلها على أصدقائه ونسي نفسه..
ولم تسكلب حين أضاعها ذات يوم وقضى طوال اليوم جائعا..
لم تتحسّس بطنه الصغيرة الفارغة بحسرة .. ولم تبسط له الأكل وليمة..
بل إبتسمت بهدوء وقالت "ده البحصل لما ما تخلّي بالك"..

وفي أول مشاجرة له في الحلة.. لم تلفح توبها لتؤدب كل من بالشارع..
إستمعت له بإهتمام... ثم قالت: "أمشي أخد حقّك بإيدك"..
راقبت من بعيد.. النصر والهزيمة..

لم تعامله كأمير .. وهو وحيدها..
بل خصصّت له نصيبه من المسؤوليات..
لم تغلق محبس الماء حين نسيه ذات ليلة وهو يسقي النباتات
بل خفضته قليلا..تركت الماء يسرح.. ونامت ملء جفنيها..
فاستيقظ الجميع صباحا فيما يشبه مدينة البندقية..

لم تظلم الدنيا من حولها.. حين وجدت علبة سجائر بين ملابسه ..
لم تضربه .. ولم تحرمه الخروج..
بل واصلت حديثها معه عن المستقبل..وعن العراقل التي هي من صنع أيادينا ..
ونامت ملء جفنيها...
Post: #2
Title: Re: أم غبـيـانـة..
Author: Rihab Khalifa
Date: 03-22-2009, 12:34 PM
Parent: #1

ام، اكتشفت عدم قدرتها ان تكون اما
فتخلصت من طفلها بوضعه في سله عند باب احد الجوامع
-----
ام، غانيه صدقت ثناء البعض انه لا يمكن تمييزها عن ابنتها الكبري
فعاشت دور الاخت الصغري ويتمت ابنتها بحياتها
------
ام، عاشت جل حياتها مهتمه ببيتها حبا في زوجها، و عندما هجرها
زوجها، هجرت ابنائها انتقاما منه
-----
ام، كانت مهووسه برشاقتها بعد ان وضعت وليدها فلم تتغذي،
فانقطع لبنها و اعطي المولود لبن صناعي
---------
no one is perfect, but
عليك الله لقب ام ده ما كتير عليهم؟
Post: #3
Title: Re: أم غبـيـانـة..
Author: Hussein Mallasi
Date: 03-22-2009, 12:52 PM
Parent: #2

Quote: عليك الله لقب ام ده ما كتير عليهم؟

بالعكس - تماماً - في معظم تصرفات أم المداخلة الافتتاحية
Post: #4
Title: Re: أم غبـيـانـة..
Author: Emad Abdulla
Date: 03-22-2009, 01:07 PM


تحيات يا نجوان ..

المادة دي مدح بما يشبه الذم .. وللا العكس صحيح !!!
لكن و في كل الأحوال فالأم التي تحدثتي عنها هي بالضبط ما كانت عليه أمهاتنا ، أو جيلي على الأقل ..
و لم يكن غبيانات .. حاشاهن .


التحية لكل أم في عيدها ..
مودتي .
Post: #6
Title: Re: أم غبـيـانـة..
Author: Hussein Mallasi
Date: 03-22-2009, 01:46 PM
Parent: #4

Quote: لم تعامله كأمير .. وهو وحيدها..
بل خصصّت له نصيبه من المسؤوليات..
Post: #13
Title: Re: أم غبـيـانـة..
Author: نجوان
Date: 03-22-2009, 04:01 PM
Parent: #4

Quote: المادة دي مدح بما يشبه الذم
Post: #12
Title: Re: أم غبـيـانـة..
Author: نجوان
Date: 03-22-2009, 03:51 PM
Parent: #2

Quote: بالعكس - تماماً - في معظم تصرفات أم المداخلة الافتتاحية
شكرا يا ملاسي على القراءة بين الأسطر..

بعد أن فكّرت دقسة الشاطر.. رجعتي يا رحاب واوضحتي..
Post: #5
Title: الأم
Author: محمد أبوالعزائم أبوالريش
Date: 03-22-2009, 01:32 PM
Parent: #1


يا نجوان ...
غبا الأم حقتك دي (عشان ما أقول أمك) ...... أريتو غبا الأمات لي حدّهن
Post: #7
Title: Re: الأم
Author: Hussein Mallasi
Date: 03-22-2009, 01:49 PM
Parent: #5

Quote: حين كبر قليلا.. أخذته لشراء الحلوى من الدكان
لم تنوب عنه في الحديث، بل جعلته يطلب ما يريد.. ويمّد يده الصغيرة بالنقود..
Post: #8
Title: Re: الأم
Author: Hussein Mallasi
Date: 03-22-2009, 01:59 PM
Parent: #7

Quote: وحين كبر أكثر .. أعطته مصاريف المدرسة كل صباح في يده
وفهّمته كيف ينفقها...
لم تجزع يوم صرفها كلها على أصدقائه ونسي نفسه..
ولم تسكلب حين أضاعها ذات يوم وقضى طوال اليوم جائعا..
لم تتحسّس بطنه الصغيرة الفارغة بحسرة .. ولم تبسط له الأكل وليمة..
بل إبتسمت بهدوء وقالت "ده البحصل لما ما تخلّي بالك"..
Post: #9
Title: Re: الأم
Author: Rihab Khalifa
Date: 03-22-2009, 02:16 PM
Parent: #8

Quote: بالعكس - تماماً - في معظم تصرفات أم المداخلة الافتتاحية

امهاتي ديل ما امهات يا حسين, لقب ام اكتر من كتير عليهم، ده الكونتراست لام نجوان
Post: #11
Title: Re: الأم
Author: Hussein Mallasi
Date: 03-22-2009, 02:30 PM
Parent: #9

نماذجك يا رحاب نماذج للأم الغبية و ليست الغبيانة
Post: #10
Title: Re: الأم
Author: Amany Elamin
Date: 03-22-2009, 02:21 PM
Parent: #8

نجوان العزيزه:
بوست مميز ..

لست بأم ,
ولكني لا أعرف كيف تستطيع أي أم أن تفعل مثل هذه الأشياء التي هي في مصلحة الطفل قطعا ..
لشقيقتي طفلتان أمارس معهما كل هذه الممنوعات ,
أطعمهما في فمهما ..
وأساعدهما في كل ما تعسر عليهما ..
أخشي عليهما من وخزة الدبوس أو قرصة النمل ..
اذا تعثرت احداهما , يتعثر قلبي ويهوي من الخوف ..
كنت أصغر أخوتي ..
وكن أول تعرفي علي عالم الأطفال كراشده ..
أري فيهن قطعا من البسكوت أخشي تكسرها ..

أعلم أني أم مفرطه في القلق والحمايه مستقبلا..
ويزعجني هذا ..

أخبرينا كيف تتمكن الأم من ضبط مشاعرها المفرطه ..
وترك الفرصه للأطفال للتعلم بسياسة التجربه والفشل ..

تحياتي ..
Post: #15
Title: Re: الأم
Author: smart_ana2001
Date: 03-22-2009, 04:05 PM
Parent: #10

سلامات يا جماعة
الام الغبيانة دى يا نجوان ....ام ح تتطلع و لدها ده راجل ملو هدومو (على راى المصريين).....{قلت راجل مع انى من انصار معالمة الولد و البنت ذى بعض ..تماما...مع شويه دلع اكتر للبنت}

Quote: لم تنهره حين لعب بالرمل والطين..
وحين أطعم شعره وقدميه بالأكل
ثم تمسّح بالباقي...
وسط ضحكاتها..

لم تكن تعبأ كثيرا بتجفيف شعره المبتل بعد الحمام..
بل كانت تأخذه مباشرة للحوش الكبير للعب والجري..


لعب الطين عرفناه ...لعب الاكلده انا بعاقب فيه طواااالى. (و ش مصرور)
و عدم نشيف الشعر ده انا بيمرضنى طواااالى....للاطفال : معناها زيارة الدكتور كل اسبوع ....و للاسف ..ما بقدرى تبنى مناعة من فقدان حرارة الجسم عن الطريق الراس...يعنى كل ما ح تعمل كده...الطفل ح يمرض.
باق الحجات ...ذى ما موضح ملاسى...تستحق التصفيق..
Amany Elamin سلامات
انا ذيك كده مع الاطفال و خاصة اطفال شقيقتى ...وهى دائما فى حالة شكوى من انى ح اخرب ليها اولادها..
Post: #18
Title: Re: الأم
Author: نجوان
Date: 03-22-2009, 04:40 PM
Parent: #15

Quote: لعب الاكلده انا بعاقب فيه طواااالى
ما قلنا ده حق الامات الغبيانات
Post: #16
Title: Re: الأم
Author: نجوان
Date: 03-22-2009, 04:21 PM
Parent: #10

Quote: كيف تتمكن الأم من ضبط مشاعرها المفرطه ..
المسألة ليست ضبط المشاعر، بالعكس، إطلاق العنان لها..
لكن توظيفها بصورة صحيحة..


_____
أوعى تكوني يا أماني ساكنة مع ناس أختك ديل..
Post: #14
Title: Re: الأم
Author: نجوان
Date: 03-22-2009, 04:03 PM
Parent: #5

Quote: أريتو غبا الأمات لي حدّهن
آميــــن..
Post: #17
Title: Re: الأم
Author: DEYAA MOHD
Date: 03-22-2009, 04:29 PM
Parent: #14

نجوان اريتين امهات السرور ديل
علمو اولادهم حمل المسئولية من الصغر
ولو كان في الكبر كان زي النقش على الحجر
ابقه زي ما دايره
Post: #19
Title: Re: الأم
Author: نجوان
Date: 03-22-2009, 04:43 PM
Parent: #17

شكرا يا ضياء..
ويكتّر من أمثالهن..
Post: #20
Title: Re: الأم
Author: Sana Khalid
Date: 03-24-2009, 12:22 PM
Parent: #19

تعرفي يا نجوان

انت بتفكيرك دا حتكوني ام ممتازة!

عندي مشروع بوست في راسي ليهو زمن

وعايزة اعزم عليهو ممكونة لأني احسب انها ام غبيانة برضو!

اكيد حأعزمك تتشايليهو معاي

و نتعلم سوا




التوقيع

ام غبيانة (Smiley refused to appear!!)
Post: #22
Title: Re: الأم
Author: mamkouna
Date: 03-24-2009, 11:50 PM
Parent: #20

Quote: تترك طفلها يستكشف الشاي الحار..
بل غمست أصبعه الصغير في الكوب الساخن..
"حتى يقتنع".. وقد كان..




Quote: حين بكى ليلا .. تفقدته مرّة واحدة..
وان رأته على مايرام، تركته يهدهد نفسه بالبكاء.. حتى زاره النوم..
ونامت ملء جفنيها..
Post: #28
Title: Re: الأم
Author: نجوان
Date: 03-25-2009, 12:41 PM
Parent: #22

كيفك يا ممكونة..

شنو كلها ثمبس داون..
دي مكنة كيكي والله اللي وزّع ثمبس داون بالجملة..


____
مشتاقين وما تغيبي يا بنيّة..
Post: #23
Title: Re: الأم
Author: mamkouna
Date: 03-24-2009, 11:59 PM
Parent: #20

Quote: عندي مشروع بوست في راسي ليهو زمن

وعايزة اعزم عليهو ممكونة لأني احسب انها ام غبيانة برضو!

اكيد حأعزمك تتشايليهو معاي

و نتعلم سوا


يا ريت يا سناء...
تستهويني دايماً مواضيع الطفولة و الأمومة و الأسرة بصفة عامة...
خلينا نفيد و نستفيد
...
كل عيد أم و كلكن طيبات و حنينات و..مرة مرة.. غبيانات.
Post: #26
Title: Re: الأم
Author: نجوان
Date: 03-25-2009, 05:36 AM
Parent: #20

خلاص في انتظار الدعوة يا سناء.. ومشكورة ..

واولادك في الصورة ياااي ستايل خالص..
خصوصا ام كوت طويل شوية دي..
ما شالله..


____
وممكونة دي عندي هي حكيمة البورد..
Post: #21
Title: أم السرور
Author: انعام عبد الحفيظ
Date: 03-24-2009, 01:10 PM
Parent: #1

دي أم السرور

إلا بس موضوع الحمام والموية والهواء دا هههههههههه

نجوان سلامات يا رايقة
Post: #24
Title: Re: أم السرور
Author: Gafar Bashir
Date: 03-25-2009, 00:15 AM
Parent: #21

تحياتي نجوان

هل يعتبر أب غبيان من يقوم بنفس المواقف ؟

ياريت تقولي لا ..
Post: #25
Title: Re: أم السرور
Author: تبارك شيخ الدين جبريل
Date: 03-25-2009, 00:24 AM
Parent: #24

عبركن ... يا رحاب ... أرسل التحايا لروح المرأة "الحارة" ... علوية همرور ...

التى علمتنى طريقةً جديدة .... لـ"إنتقال الحرارة" .... وذهبت ... دون أن يتاح لى وداعها ....












.. المهم ...
Post: #27
Title: Re: أم السرور
Author: نجوان
Date: 03-25-2009, 11:20 AM
Parent: #25

كيفك يا انعام..

والله موضوع عدم تنشيف الراس والمرض ده .. خزعبلة ليس إلا..
رغم انه سمارت فلسفتو شوية (وجه مبتسم بسنون)

يعني فقدان مناعة بسبب فقدان حرارة الراس (جملة طويلة بشكل!)
المهم.. ده لا يتأتى إلا اذا كان الطفل في القطب الشمالي مثلا..
استحمى.. وطلعوا الشارع لمدة ساعات.. وحصل ليهو علميا شيء اسمه هايبوثيرميا..
وبعد ده كلّووو.. لازم ولابد يكون حول شخص حامل لبكتيريا أو فيروس نزلة مثلا..

يجوا ناس أمي وحبوبتي يقولوا ليك هايبوثيرميا.. ودرجة الحرارة تقلي الحبّة في قلب الخرطوم..
(وجه مبتسم بإستغراب كده)..
Post: #30
Title: Re: أم السرور
Author: نجوان
Date: 03-25-2009, 12:50 PM
Parent: #25

Quote: أرسل التحايا لروح المرأة "الحارة" ... علوية همرور ...
ألف رحمة على روحها يا تبارك..
Post: #29
Title: Re: أم السرور
Author: نجوان
Date: 03-25-2009, 12:46 PM
Parent: #24

Quote: هل يعتبر أب غبيان من يقوم بنفس المواقف ؟
لأ.. يعتبر أبو السرور..
(وجه مبتسم)


_____
يا سلام يا جعفر بشير
على الآباء اللي بيشاركوا في الرعاية والتربية..



ويا حليل ناس "في القهوة ما جلاس"
بس ده موضوع تاني..
:-)
Post: #31
Title: Re: أم السرور
Author: smart_ana2001
Date: 03-25-2009, 04:51 PM
Parent: #29

Quote: والله موضوع عدم تنشيف الراس والمرض ده .. خزعبلة ليس إلا..
رغم انه سمارت فلسفتو شوية (وجه مبتسم بسنون)

يعني فقدان مناعة بسبب فقدان حرارة الراس (جملة طويلة بشكل!)
المهم.. ده لا يتأتى إلا اذا كان الطفل في القطب الشمالي مثلا..
استحمى.. وطلعوا الشارع لمدة ساعات.. وحصل ليهو علميا شيء اسمه هايبوثيرميا..
وبعد ده كلّووو.. لازم ولابد يكون حول شخص حامل لبكتيريا أو فيروس نزلة مثلا..

يجوا ناس أمي وحبوبتي يقولوا ليك هايبوثيرميا.. ودرجة الحرارة تقلي الحبّة في قلب الخرطوم..
(وجه مبتسم بإستغراب كده)..


العزيزه نجوان......اها....." خزعبلة ليس إلا"......انا برضوا بتاعت خزعبلات؟؟؟؟ "وش مصرور"*
1- انا كلامى بقى كتير الايام دى....استحملى البرى الجايك تحت ده..
2-منو القال " هايبوثيرميا"؟؟...انا لو عاوزه اقول " هايبوثيرميا" كنت قلتها..." هايبوثيرميا" فى السودان ؟؟الا يختوك فى الفريزر يوم كامل "على امل انو الكهرباء ما ح تقطع فى اليوم ده"
3- طيب ....دكاترة الاطفال بيقولوا ليك تلبسى الطفل ذى ما انتى بتلبسى تماما..فى الشتاء بيوصو بى طبقة واحده اكتر من الملابس
4- اظنك عارفه انو البكتريا و الفيروسات حولنا دائما...و ما لازم يكون الزول الجمبك بيعطس عشان يكون حامل لبكتريا او فيروس. و مناعتنا هى اللى بتحمينا من كل المصائب اللى فى الجو حولنا اوحتى اللى اصلا فى جسمنا.
5- الاطفال بيفقدوا كميه كبيره من حرارة جسمهم عن طريق الراس ( 40 % لعمر اقل من سنة)
6- فقدان حراره الجسم (ما لدرجه ال هايبوثيرميا) بينتج عنه اضعاف للمناعة. دى ما خزعبلة ..للاسف دى common sense
7- اذا كنتى بتلبس فنلة برد فى السودان فى الشتاء ...معناها الجو بارد. و مع راس مبلول... معناها درجه الحرارة ح تكون اقل.
8- اذا قلتى لى "يا اخى السودان ما فيه شتاء"...ح اقول ليك الموضوع ده نسبى تماما...انا مشيت السودان فى يناير ..طوال الليل مشغله المروحة (ما لدرجه مكيف..المروحة كانت كفايه)...و ناس البيت عاوزين يموتوا من البرد...كل زول خاتى ليه بطانيتين و الناس بتشكى من البرد.
9- بعدين نجى لحكايه اللعب بالاكل....دى بالنسبة (لى انا) ذى ترك الصلاة (جلد طوالى)..الاكل نعمة من الله علينا..و ما كل الناس لاقيه تاكل...و اللعب بالاكل ما للاستكشاف و التعليم...اللعب بالطين ممكن يكون كده.
___________________________________________________________________________
* كل معلوماتى الطبيه من المسلسلات ...ذى هاوس و كده!
Post: #32
Title: Re: أم السرور
Author: smart_ana2001
Date: 03-25-2009, 05:06 PM
Parent: #31

Quote: يعني فقدان مناعة بسبب فقدان حرارة الراس (جملة طويلة بشكل!)
المهم.. ده لا يتأتى إلا اذا كان الطفل في القطب الشمالي مثلا..
استحمى.. وطلعوا الشارع لمدة ساعات.. وحصل ليهو علميا شيء اسمه هايبوثيرميا..

بعدين حكايه القطب الشمالى دى جبتيها من وين ؟؟؟ صاح صعب تجيك هايبوثيرميا فى السودان..لكن صدقينى الموضوع ما محتاج حمام و ساعة فى قطب شمالى .
فى حفل اداء القسم بتاع اوباما(فى واشنطن دى سى ) اصيب الميات بال هايبوثيرميا..U.S. Department of Health & Human Services طلعت بيان ..ده عنوان البيان
http://www.hhs.gov/news/press/2009pres/01/20090112a.html
و دى حته منو
Quote: The average temperature in Washington in January is 35 degrees Fahrenheit. Exposure to cold temperatures can cause serious or life-threatening health problems. Infants and the elderly are particularly at risk, but anyone can be affected. Visitors from warm climates may be more sensitive to the cold and should factor in any sensitivity in deciding how to dress for outdoor inaugural events.

_____________________________________________________________________________
درجه حراره 35 degrees Fahrenheit حتى ما واصله صفر بالدرجات المئوية ( = 1.67 degree Celsius)
Post: #33
Title: Re: أم السرور
Author: smart_ana2001
Date: 03-25-2009, 07:16 PM
Parent: #32

معليش يا نجوان على الاحتلال و الكلام الكتير...
لكن ...ما قادره امسك لسانى ..خاصة انى اليوم فى اجازه ..لانى عيانه (مرقت فى الجو البارد من غير ما انشف شعرى )!!!
Quote: حين بكى ليلا .. تفقدته مرّة واحدة..
وان رأته على مايرام، تركته يهدهد نفسه بالبكاء.. حتى زاره النوم..
ونامت ملء جفنيها
..
Experts say: you can’t spoil a baby
يعنى كلام الحبوبات بان الشيل بيخرب المولود غير صحيح.
يعنى (يا الامهات) شيلى البيبى ذى ما عاوزه ...هدهديه و لوليه.*
فى مدرستين فى موضوع البكاء ده ..وما فى واحده فيهم صح او غلط..حسب الام و قلبها !
الاولى بتقول ذى ما قلتى ..اذا كان كويس و نظيف و شبعان و ما بردان و ما مسخن و ما عندو separation anxiety سيبيه و ح يبكى لحدى ما ينوم
المدرسة التانيه بتقول ..لما طفلك يبكى (حتى لو ما عنده مشكله ) شيليه و حنسيه لحدى ما ينوم
و اثبتت الدراسات ان الطفل اللى بيخلوه يبكى كتير لما كان بيبى بيطلع طفلع عنيد لما يكبر شويه ( 2-5 سنين)
____________________________________________________________________
الكلام ده لحدى 6 شهور بس......بعد كده.......طبعا ح يتخرب!!!!!
Post: #36
Title: Re: أم السرور
Author: نجوان
Date: 03-29-2009, 06:31 AM
Parent: #33

Quote: معليش يا نجوان على الاحتلال و الكلام الكتير...
يا بنيّة اتكلمي زي ما عايزة.. البوست بوستك..



_____
Quote: الاولى بتقول ذى ما قلتى ..اذا كان كويس و نظيف و شبعان و ما بردان و ما مسخن
و ما عندو separation anxiety سيبيه و ح يبكى لحدى ما ينوم
كويس جدا.. الأم الغبيانة الفوق دي في مدرسة علمية عديل كده بتدعم خياراتها..

Quote: الكلام ده لحدى 6 شهور بس......بعد كده.......طبعا ح يتخرب!!!!!
أيواااا..
اعتبر ده الـ disclaimer لما سبقه من حديث..
Post: #35
Title: Re: أم السرور
Author: نجوان
Date: 03-29-2009, 06:23 AM
Parent: #32

Quote: بعدين حكايه القطب الشمالى دى جبتيها من وين ؟؟؟ صاح صعب تجيك هايبوثيرميا فى السودان..لكن صدقينى الموضوع ما محتاج حمام و ساعة فى قطب شمالى .
فى حفل اداء القسم بتاع اوباما(فى واشنطن دى سى ) اصيب الميات بال هايبوثيرميا..U.S. Department of Health & Human Services طلعت بيان ..
الناس في تنصيب اوباما قضوا يوم كامل في درجة حرارة منخفضة جدا،
درجة الحرارة في اليوم المذكور أبدا لم تصل ال35 .. بالكاد وصلت ال30 (خلال ساعتين فقط او شيء من ال24 ساعة)
وكانت تحت الصفر المئوي طول اليوم..
ومع حساب تأثير الريح كانت درجة الحرارة أقل كثيرا من ال20 ..
(خلوّنا نحنا ذاتنا نبرد بس من مشاهدتهم )

مصدرك طلع قبل يوم 20 يناير مع توقّعات الجو..
في الحقيقة اليوم كان أبرد من المتوقّع كثيرا (الجو للرؤساء الديموقراطيين دايما كده؟ )
وهناإحصائيات الجو ليوم 20
بيانات الجو يوم تنصيب الرئيس اوباما.. بالساعة

_____
وين ديل من الأم في قصتي أعلاه، وطفلها العايز يلعب في الحوش في السودان؟

قال ليكم ملاسي الام دي غبيانة بس
ما شيء تاني!
Post: #34
Title: Re: أم السرور
Author: نجوان
Date: 03-29-2009, 05:42 AM
Parent: #31

Quote: كل معلوماتى الطبيه من المسلسلات ...ذى هاوس و كده!
وأنا أقول سمعت الكلام الخزعبلي ده وين قبل كده؟


مافي حاجة إسمها نسبية، درجة حرارة الرأس لازم تنخفض لمستوى معّين حتى تؤّثر في الجهاز المناعي..
بالنسبة للنزلات تحديدا، لازم يكون في زول حولك بصورة أو بأخرى (أو آثاره)..
لأن كثير من هذه الفيروسات ضعيف جدا ولا يستطيع (والحمدلله) التسكّع في الجو كثيرا..
Post: #37
Title: Re: أم السرور
Author: smart_ana2001
Date: 03-29-2009, 03:34 PM
Parent: #34

سلامات نجوان ...مشتاقين يا اخى
طيب....brace yourself لدور برى جديد

Quote: أيواااا..
اعتبر ده الـ disclaimer لما سبقه من حديث..


ابدا....كلامى عن موضوع القيام بالليل و مدرسة "شيليه و حنسيه" او مدرسة "سيبيه ينوم براه" كان واضح ...و فى النهايه قلت
Quote: و اثبتت الدراسات ان الطفل اللى بيخلوه يبكى كتير لما كان بيبى بيطلع طفلع عنيد لما يكبر شويه ( 2-5 سنين)

كلامى عن البوظان بعد 6 شهور عن الشيل طوال الوقت و الهدهدة .
اغلب بكاء الاطفال باليل بيكون من ال separation anxiety... و ده كمان موضوع براه...

Quote: الناس في تنصيب اوباما قضوا يوم كامل في درجة حرارة منخفضة جدا،
درجة الحرارة في اليوم المذكور أبدا لم تصل ال35 .. بالكاد وصلت ال30 (خلال ساعتين فقط او شيء من ال24 ساعة)
وكانت تحت الصفر المئوي طول اليوم..
ومع حساب تأثير الريح كانت درجة الحرارة أقل كثيرا من ال20 ..
(خلوّنا نحنا ذاتنا نبرد بس من مشاهدتهم )

Quote: مصدرك طلع قبل يوم 20 يناير مع توقّعات الجو..
في الحقيقة اليوم كان أبرد من المتوقّع كثيرا (الجو للرؤساء الديموقراطيين دايما كده؟ )
وهناإحصائيات الجو ليوم 20


you missed my point ( دى ما مشكلتك...دى مشكلتى انا ...كلامى ماكان واضح)
انا جبت مثال حفل اوباما عشان اقول ليك ان الموضوع ما محتاج قطب شمالى. الهرباثرميا حصلت فى دى سى (ما القطب الشمالى)
و جبت البيان عشان اقول ليك ان الناس من المناطق الدافئة بيتاثروا بالبرد بدرجات مختلفة عن زول عايش فى منطقه بارده. و برضوا عشان اقول ليك ان الاطفال بيتاثروا بالبرد اكتر من الشباب. و ده كان تحته خط فى البيان (الخط من عندى ).
و تانى...انا ما قلت ممكن تجيك هرباثرميا فى السودان....ابدا....قلت انخفاض درجه حرارة الجسم ممكن يودى لضعف المناعة

Quote: مافي حاجة إسمها نسبية، درجة حرارة الرأس لازم تنخفض لمستوى معّين حتى تؤّثر في الجهاز المناعي..
بالنسبة للنزلات تحديدا، لازم يكون في زول حولك بصورة أو بأخرى (أو آثاره)..
لأن كثير من هذه الفيروسات ضعيف جدا ولا يستطيع (والحمدلله) التسكّع في الجو كثيرا..


للاسف فى حاجه اسمها نسبية.....و ده لان الناس فى اعمار مختلفة و من بئيات مختلفة عندهم مناعات مختلفة ...و بيان وزارة الصحة دليل على النسبية
بالنسبة للنزلات تحديدا، ما لازم في زول حولك يكون عنده نزله (او كان عنده نزله قريب).... الفيروس ممكن يعيش فى اى سطح (كومبيوتر ...تلفون ....طربيزه)
الفيروس ضعيف ...نعم . لكنه للاسف (برضو) ممكن يعيش من ثوانى حتى يومين خارج جسم الانسان (على حسب نوع الفيروس)
فى النهايه ....انا تحديدا ..(و انا فى الجامعة) عييت اكتر من مرة (فى شتاء السودان التعبان ده) لانى طلعت فى الشتاء فى جؤ بارد (نسبيا) من غير ما اتنشف

Quote: وأنا أقول سمعت الكلام الخزعبلي ده وين قبل كده؟

معقوله يا اخى؟؟؟؟؟هاوس دى بيكتوبها اطباء عديل كده...و كل القصص اللى فى المسلسل قصص من مجلات علميه (حالات نادره جدا جدا ...و"تقريبا" من المستحيل ان طبيب واحد يصادف اكتر من حاله واحده ذى دى طوال حياته الطبية.....لكن طبيبنا المفضل هاوس بيلاقى حالة ذى دى كل اسبوع )


شكرا يا نجوان على البوست....انا بالجد مستمتعة
___________________________________________________________________________________________________________
اظن اننا من البوست ده مفروض نفتح بوست عن التربيه و الامومه و الاسرة عموما...بوست تانى عن النزله و فيروس النزله....او العزيزه نجوان تقرر ترفع البوست للربع التانى من السنه