يا ناس مصارعة طواحين الهواء.. تعالوا قولوا لي الماصحيح في كلام مصطفى ده شنو ؟؟

Quote: (لو كنا نتعامل بالعنتريات لما كان حال السودان اليوم مقارنة مع ما كان حاله من قبل، هذه الحكومة عندما جاءت إلى السلطة، الشعب السوداني كان مثل الشحاتين، يقوم من صلاة الصبح يقيفوا في الصفوف عشان يتحصل علي جالون بنزين، أو يقيف في الصف عشان ما يلقي رغيفتين عيش يقدر يعمل بيها ساندويتش لأولاده، وهو يمشي يأكل عصيدة أو يأكل هناي.. لما جات الحكومة دي ما كان في سكر، الشعب السوداني كان بيشرب الشاي بالجكة.. لما جات الحكومة دي ما كان في طرق، ما كان في تصنيع، ما كان ما كان ما كان. لو كانت (الحكومة) بتشتغل بالعنتريات كانت ظلت تكرر العنتريات دي ولا تعمل شيء)

ما تقعدوا تشتغلوا بي حكاية (ويل للمصلين) وتسكتوا عن البقية

الزول قال: الشعب السوداني كان مثل الشحاتين، يقوم من صلاة الصبح يقيفوا في الصفوف عشان يتحصل علي جالون بنزين، أو يقيف في الصف عشان ما يلقي رغيفتين عيش يقدر يعمل بيها ساندويتش لأولاده،

ده حاصل ولا ما حاصل

ما كلنا عشنا أيام الصادق المهدي

يمين كانوا بصحونا من أرحم الراحمين.. عشان نمشي نقيف في صف الرغيف

ونرجع بعد ما الشفع يكونوا مشو المدرسة

ثم لا نتحصل إلا على رغيفتين أو تلاتة أو خمسة على أحسن تقدير

عليكم الله الآن الشحاد لو جا ودق بابك في صلاة الصبح ما بيطلع ليهو بي خمسة عيشات أو (ألف جنيه بالقديم)

==========

قوموا لفوا جاي ولا جاي

أمة تعمل من الحبة قبة

ثم ثانياً ما الدكتور ذاتو مقتنع بأن قال ما قال .. فكلامو ما فيهو إية إساءة.. اللهم إلا لمن في نفسه مرض


ودي رسالتو لصحيفة (الشرق الأوسط) وهي حاتا قرض مع نظام الإنقاذ.. التدق راسا في الحيطة:

Quote: "أود هنا أن ألفت انتباهكم إلى أن الذي قلته قد كان على النحو التالي: "إننا كنا، قبل مجيء الإنقاذ، نقف في الصفوف مثل الشحاتين لنحصل علي جالون البنزين وعلي رغيفة الخبز وعلى كيلة الدقيق". ولعلكم تلحظون الفرق الواضح بين ما قلته في المؤتمر الصحفي ـ بالحرف الواحد ـ وبين ما أوردته صحيفتكم، فالذي "قلته لا لبس فيه".

ثم ثالثاً: تقرأ عناوين هنا وكأن د. مصطفى قد قال: الشعب السوداني كان شحاداً !!!

استمعت إلى نص الكلمة التي قالها .. والتي جاءت بها صحيفة الشرق الأوسط

فقد قال: (مثل) .. ثم ثانياً.. جاب ليكم وجه الشبه كان في شنو

يعني جاب ليكم المشبه .. والمشبه به .. ووجه الشبه (أمشوا أقرو ياخ)

ثم رابعاً: صحيفة الشرق الأوسط دي لو كانت نشرت محتويات هذا الفيديو لكنا احترمناها


كانت تجيب لينا عنوان كبير:

صاحب السمو الملكي الأمير سلطان بن فهد بن عبدالعزيز الرئيس العام لرعاية الشباب رئيس الاتحاد السعودي لكرة القدم يقول: إعلاميي المملكة غير محترمين وغير مؤدبين وغير مربيين


http://www.youtube.com/watch?v=quMPQhXYOZ8


خليهم ينتقدوا حكامهم ثم يأتوا ليستأسدوا على حكام السودان

سلام يا عز الدين ..
تعرف ..
رغم اني ما كنت ناوي اتكلم في نص الزحمة دي عن الموضوع ده لكن عجبني في بوستك ده انك جبت النص و عرضت وجة نظرك فيو ..
و كمان البوست رايق ..
فاسمح لي اختلف معاك ..

الدكتور قال :

Quote: هذه الحكومة عندما جاءت إلى السلطة، الشعب السوداني كان مثل الشحاتين، يقوم من صلاة الصبح يقيفوا في الصفوف عشان يتحصل علي جالون بنزين، أو يقيف في الصف عشان ما يلقي رغيفتين عيش يقدر يعمل بيها ساندويتش لأولاده، وهو يمشي يأكل عصيدة أو يأكل هناي.. لما جات الحكومة دي ما كان في سكر، الشعب السوداني كان بيشرب الشاي بالجكة.. لما جات الحكومة دي ما كان في طرق، ما كان في تصنيع، ما كان ما كان ما كان

كل وصف الحالة صحيح و سليم و كان هذا حالنا و ربما اسوأ ..
ما هي الاسباب ؟
ليس هذا مجال مناقشتها.
و اي زول يقول ما كان في ضائقة و معاناه كضاب
اي زول يقول السكر هسه ما متوفر كضاب
اي زول يقول الانقاذ ما عملت شوارع مفتري
لكن ما حنناقش المشاكل الظهرت مع توفر السكر او مع انشاء الطرق لانو ده ما الموضوع ..
فعلا قبل الانقاذ ده كان حاصل و سلمنا بذلك ..


لكن ..

البيقوم الصباح يمشي الطابونة او الطرمبة او او .. هل ده شحاد ؟
هل الشحاد بيمشي يالطرمبة شايل قروش و ما يلقى بنزين ؟
هل الشحاد بيمشي الطابونة و ما يلقى عيش ؟
انا معاك انو قال زي الشحادين
لكن وجه الشبه شنو ؟

نقول وجه الشبه المعاناة ؟
فلنفترض انو المعاناة ..


يبقى جينا للحتة الرئيسية ..
فعلا كان في معاناه
لكن لما تعبر لي عنها بلفض شين بتبقى شتمتني
كان ممكن يقول قبل الانقاذ الشعب السوداني كان بيعاني و ما لاقي سكر و ما و ما ..
و لو زول غالطوا يبقى افاك ..
لكن لما يستعمل لفظ شين في التشبيه دي اسمها شتيمة

تخيل يا عز الدين اقول ليك انت كنت بتجي تشد مني القمصان ياخ لو ما الله فتحا على اخوك و اعترب و بقى يرسل ليك من بره.
حتقول دي حقيقة و تسكت وله حتقول شتمني ؟

اتخيل يلاقيك واحد زميل دراسة و يتفشخر تقوم تقول ليو ياخ ما انت كنت بتبول في هدومك لما يجلدوك في المدرسة.
هل دي حقيقة يشكرك على ذكرها و يقول ليك يا سلاااام كانت ايام الله لا يعيدا ؟

اتخيل هسه لو زول قال الرئيس بيجي يرقص زي قسمة الغنايه.
طيب الرئيس بيرقص في الحتفالات و دي حقيقة
و قسمة بترقص و تعلم الرقيص و دي حقيقة
هل التشبيه ده عادي وله دي قلة ادب و اهانة لرئيس الجمهورية ؟


يا زميلي العزيز ..
لو غضب الناس و قالوا دكتور مصطفى كذب و ادعى انو ما كنا لاقين سكر فيكونوا فعلا بالغوا
لكن كون الدكتور يصف حال الناس قبل الانقاذ و يشبه الحال ده بحال الشحاتين ( رغم انو في مليون تعبير احسن ) فدي اسمها شتيمة و خطأ.

صدقني من الافضل ان يعترف الدكتور بالخطأ و زلة اللسان خير من محاولة التبرير لأن كل محاولة للتبرير تزيد الامر سوء.
و اعتقد ان هذا حال عدد من مؤيدي النظام هنا.
لاحظوا تماما ان الامر مسئ مهما كان سليما و ان لكل جواد كبوة فلزم بعضهم الصمت و استعاذ بعضهم من كثرة الكلام و اقر بعضهم بالخطأ.
هذا خير من زيادة النار حطبا.



و اخيرا ..
يبقى هذا الكلام قد قيل في حق كل الشعب.
من حقك ( او حق الزميل سبيل مثلا الذي قبل الكلام و اعترف به على نفسه ) ان ترى انك كنت كالشحاد وان الكلام لا يهينك.
لكن من حقي انا ان اعتبر هذا الكلام مهين بالنسبة لي.
ليس لك ان تقرر لي ان الكلام ليس اهانة لي.
و ليس لي ان اقرر لك انه اهانة لك.

وله شنو ؟

الرجل لم يقل كانوا شحاتين ,, قال مثل الشحاتين ,, وفرق كبير ان تقول لى انت شحاتا وان تقول مثل الشحات فقد شبه حال المواطن جراء المعاناة التى كان يعانيها ـ ولا احد ينكرها ـ بحال الشحات ,, الذى لا الزام على احد ان يعطيه فالرجل اراد ان يقول :
ان المواطن كان يسعى للحصول على حقه كمن يتسول ,, فهو لايهاجم الشعب انما يهاجم الأنظمة التى كانت قائمة ويقول انها جعلت الشعب يتسول حقه الواجب على تلك الأنظمة,,
عين الرضا عن كل عيب كليلة *** وعين السخط تبدى المساويا
ومثلنا الشعبى يقول:
اللى مـابدورك فى الضلمة يحدر ليك.

اتخيل هسه لو زول قال الرئيس بيجي يرقص زي قسمة الغنايه.
طيب الرئيس بيرقص في الحتفالات و دي حقيقة
و قسمة بترقص و تعلم الرقيص و دي حقيقة
هل التشبيه ده عادي وله دي قلة ادب و اهانة لرئيس الجمهورية ؟اتخيل هسه لو زول قال الرئيس بيجي يرقص زي قسمة الغنايه.
طيب الرئيس بيرقص في الحتفالات و دي حقيقة
و قسمة بترقص و تعلم الرقيص و دي حقيقة
هل التشبيه ده عادي وله دي قلة ادب و اهانة لرئيس الجمهورية ؟

thanks hammour

Quote: اتخيل هسه لو زول قال الرئيس بيجي يرقص زي قسمة الغنايه. طيب الرئيس بيرقص في الحتفالات و دي حقيقة و قسمة بترقص و تعلم الرقيص و دي حقيقة هل التشبيه ده عادي وله دي قلة ادب و اهانة لرئيس الجمهورية ؟اتخيل هسه لو زول قال الرئيس بيجي يرقص زي قسمة الغنايه. طيب الرئيس بيرقص في الحتفالات و دي حقيقة و قسمة بترقص و تعلم الرقيص و دي حقيقة هل التشبيه ده عادي وله دي قلة ادب و اهانة لرئيس الجمهورية ؟

ود اخوى <<
ان شاء الله تكون طيب وكل الأهل,,
اها لما البدوى قال:
انت كالكلب فى الوفاء ,,, وكالتيس فى قراع الخطوب
هل كان المشبه به كلبا او تيسا ,, انما لكل مقام مقال

يعني يا فاضلابي هسه انا قلبي اكلني في المثل ده و حسيت انو مثل متجاوز شوية فجيت اعدلو اقوم القاك نقلتو و لونتو و كمان كاتب اسمي تحتو ؟
و الله دي ما حركات اخوان منك كلو كلو ياخ.



الاستاذ عبد العزيز ..
تحياتي ..
ليس لمثلي أن يلفت نظر مثلكم الى تفاصيل قصة البيت و كيف اعتبروه معيبا و من الالفاظ التي لا تليق
لك تحياتي

Quote: يعني يا فاضلابي هسه انا قلبي اكلني في المثل ده و حسيت انو مثل متجاوز شوية فجيت اعدلو اقوم القاك نقلتو و لونتو و كمان كاتب اسمي تحتو ؟ و الله دي ما حركات اخوان منك كلو كلو ياخ. الاستاذ عبد العزيز .. تحياتي .. ليس لمثلي أن يلفت نظر مثلكم الى تفاصيل قصة البيت و كيف اعتبروه معيبا و من الالفاظ التي لا تليق

حمور هسع ماعرفناك شايت وين
انت كلامك ده للفاضلابى السغير (Fadlabi ) ولا لى عمو الكبير (عبدالعزيز الفاضلابى) بس عشان ما نشوف طشاش,,
عدم لياقة البيت لاتمنع الإستدلال به فالبدوى بعد ان تمدن قال:
عيون المها بين الصافية وحلة حمد جلبن الموية من توتى,,
لك تحياتي

لا فض فوك يا حمور
ما خليت لينا حاجة

Quote: يبقى جينا للحتة الرئيسية .. فعلا كان في معاناه لكن لما تعبر لي عنها بلفض شين بتبقى شتمتني كان ممكن يقول قبل الانقاذ الشعب السوداني كان بيعاني و ما لاقي سكر و ما و ما .. و لو زول غالطوا يبقى افاك .. لكن لما يستعمل لفظ شين في التشبيه دي اسمها شتيمة تخيل يا عز الدين اقول ليك انت كنت بتجي تشد مني القمصان ياخ لو ما الله فتحا على اخوك و اعترب و بقى يرسل ليك من بره. حتقول دي حقيقة و تسكت وله حتقول شتمني ؟ اتخيل يلاقيك واحد زميل دراسة و يتفشخر تقوم تقول ليو ياخ ما انت كنت بتبول في هدومك لما يجلدوك في المدرسة. هل دي حقيقة يشكرك على ذكرها و يقول ليك يا سلاااام كانت ايام الله لا يعيدا ؟ اتخيل هسه لو زول قال الرئيس بيجي يرقص زي قسمة الغنايه. طيب الرئيس بيرقص في الحتفالات و دي حقيقة و قسمة بترقص و تعلم الرقيص و دي حقيقة هل التشبيه ده عادي وله دي قلة ادب و اهانة لرئيس الجمهورية ؟ يا زميلي العزيز .. لو غضب الناس و قالوا دكتور مصطفى كذب و ادعى انو ما كنا لاقين سكر فيكونوا فعلا بالغوا لكن كون الدكتور يصف حال الناس قبل الانقاذ و يشبه الحال ده بحال الشحاتين ( رغم انو في مليون تعبير احسن ) فدي اسمها شتيمة و خطأ. صدقني من الافضل ان يعترف الدكتور بالخطأ و زلة اللسان خير من محاولة التبرير لأن كل محاولة للتبرير تزيد الامر سوء. و اعتقد ان هذا حال عدد من مؤيدي النظام هنا. لاحظوا تماما ان الامر مسئ مهما كان سليما و ان لكل جواد كبوة فلزم بعضهم الصمت و استعاذ بعضهم من كثرة الكلام و اقر بعضهم بالخطأ. هذا خير من زيادة النار حطبا. و اخيرا .. يبقى هذا الكلام قد قيل في حق كل الشعب. من حقك ( او حق الزميل سبيل مثلا الذي قبل الكلام و اعترف به على نفسه ) ان ترى انك كنت كالشحاد وان الكلام لا يهينك. لكن من حقي انا ان اعتبر هذا الكلام مهين بالنسبة لي. ليس لك ان تقرر لي ان الكلام ليس اهانة لي. و ليس لي ان اقرر لك انه اهانة لك.

يا شيخنا فاضلابي

Quote: انت كالكلب فى الوفاء ,,, وكالتيس فى قراع الخطوب

وعلى شاكلة هذه التورية كان يتمازح الشاعران شوقي وحافظ ابراهيم فقال حافظ

يقولون ان الشوق نار وحرقة فما بال شوقي اليوم بارد

ورد عليه شوقي وقال

امنت انسانا وكلبا فضيعها الانسان والكلب حافظ ...

فمثلك الشايلو وحايم بيه في البوستات دا لا ينطبق والوصف المباشر للسيد المستشار ... فلو اتى بجملة بليغة فيها تورية كانت ستكون مقبولة حتى لو وصف الشعب بالحصين او التيوس ...

Quote: فمثلك الشايلو وحايم بيه في البوستات دا لا ينطبق

انت هسع زعلان مالك ? دى وجهة نظرى تنطبق ماتنطبق ده مش الموضوع ,, وانت كان يكفيك ان تقول لى بكل ادب يافاضلابى مثلك ده ما بنطبق على الحالة دى وتكون اوصلت رسالتك بأدب زى ادب الأستاذ حمور ,, وها انت بيتك من زجاج وتقذف مصطفى عثمان بالحجارة,, قول ده برضو مابنطبق ,, والمرة دى قولها بادب لأننى لاأعرفك ولاسبب لدى لأسئ اليك غاية مافى الأمر اننى ارى عبارة الدكتور من زاوية غير زاويتك ,,
ام حرام على بلابله الدوح حرام على الطير من كل جنس.
ولعلمك لو خرجت عن حدود الأدب فى ردك فكل ما سأفعله هو اهمال الرد عليك فانا لست هنا لاهاتر او لأثبت انى انسان افهم من الناس .

Quote: انت هسع زعلان مالك ?

انا حر طبعا يا استاذ .. ازعل او ما ازعل ...

Quote: وانت كان يكفيك ان تقول لى بكل ادب يافاضلابى مثلك ده ما بنطبق

وانا اشرت لانو مثلك لا ينطبق ولم اتجاوز حدود الادب ولم اسيء اليك ..

Quote: وها انت بيتك من زجاج وتقذف مصطفى عثمان بالحجارة,, قول ده برضو مابنطبق

بكل ادب ... ما بتنطبق برضو .....

Quote: ام حرام على بلابله الدوح حرام على الطير من كل جنس.

ما فهمت دي ممكن بكل ادب اسأل عن المعنى ؟؟

Quote: ولعلمك لو خرجت عن حدود الأدب فى ردك فكل ما سأفعله هو اهمال الرد عليك فانا لست هنا لاهاتر او لأثبت انى انسان افهم من الناس

ان شاء الله كدا ما اكون خرجت عن حدود الادب ؟؟ لانو بزعل لو اهملت ردي ..

كل كل الاحترام والادب

تسلم كمان ... اها قصرت معاك ؟

Quote: وانا اشرت لانو مثلك لا ينطبق ولم اتجاوز حدود الادب ولم اسيء اليك

لا انت قلت مثلك الحايم بيهو فى البوستات ده ,, وهذا الأسلوب خروج عن اللياقة فى الخطاب ,,
عموما لك الشكر على ردك الأخير الذى اراه جاء كماينبغى ان يكون الحوار.

نسيت ,,
طالما جاء ردك الأخير بطريقة لاتجنح للمهاترة فمن حقك ان تعرف السبب فى اننى وضعت نفس المداخلة فى أكثر من بوست وهو:
ان الموضوع واحد فى كل تلك البوستات فاردت ان يطلع على رأيي اكبر عدد من الناس وان جانب رأيي الصواب تكون فرصة التعرف على رأى مخالف لرأيي اكبر فاستفيد لأن تباين الفكر يثرى الفكر.
ارجو الا يضيق صدرك بكلامى مهما كان مباشرا

Quote: لا انت قلت مثلك الحايم بيهو فى البوستات ده ,, وهذا الأسلوب خروج عن اللياقة فى الخطاب ,, عموما لك الشكر على ردك الأخير الذى اراه جاء كماينبغى ان يكون الحوار.

الله يديك العافية وبتمنى ليك من جوه قلبي انو ما يجي اي مسئول يصفك وانت من جملة الشعب بانك كنت شحاد او كالشحاد ..

كل الود

عز الدين بيلو
لا أري أن الرجل قصد الإهانة كما ولا أري أية لمحة هتر في كلامه الذي أوردت .
وأنا ( طلحة عبدالله ) واهلي جميعهم بوصفنا(شعب سوداني) لا نحمل له أدني درجة بغض .

الاخ عبد العزيز الفاضلابي

Quote: ارجو الا يضيق صدرك بكلامى مهما كان مباشرا

معذرة ليك ولكل الذين يرون ان السيد المستشار قد اصاب في حديثه ...

Quote: معذرة ليك ولكل الذين يرون ان السيد المستشار قد اصاب في حديثه ...

ياعلاء ,,
انا لا ارى انه قد اصاب لكن رأيي ان ماقاله لايمس الشعب بقدر ما يمس من الجأ الشعب للمعاناة ..التى جعلته يحصل على حقوقه وكأنه يتسولها وهو صاحب حق..
اما تعبير الدكتور فجانبته فيه الدقة وهو فى النهاية بشر يخطئ ويصيب
مرة اخرى
لك الشكر

الاخ / عبد العزيز الفاضلابي

Quote: اما تعبير الدكتور فجانبته فيه الدقة وهو فى النهاية بشر يخطئ ويصيب

ونحن ايضا لا نحمل بغضا ولا كراهية في هذا الرجل ولكن نقول وهو لسان حال الدولة انه اخطأ( باستثناء الذين لا يرون خطأ في اورد )

ولكن كيف يصحح هذا الخطأ .. فانا شخصيا لا اطالبه بدفع تعويض مالي وكثير غيري ولكن كان لابد لتدارك الامر والاعتذار ..