دايرين نيــاشين .. (توجد نبــل) ..

كنت ابلدهم في نيش الطير ..
لكــن
أمهرهم صنـاعة .. وتحديدا للمقاسات من (الكـاف) وهو الدعامة الاساسية وغالبا ما تصنع من الحديد الصلب .. بعد أن احشره حشرا .. (السلك) في فتحات عمود الكهربه واقوم بصناعة تعريجات بدورانات اطراف السلك .. لما يحتار لهـا صناع سيارات البورش والروز..
لستك المطـاط .. عبارة عن لستك داخلي للدراجـات ودا متوفر وقتها لدى محمد نور العجلاتي .. أو عبد العظيم .. أختيار نوعية المطاط الجيدة المرنـة تعطي نتائج إيجابية في التصويب وفي قوة دفع المقذوف (الحجـر).
الجلــدة .. وغالبـا ما احسن اختيارهـا من مجموعة (النقلتية) في وسط سوق الموردة واتفاءل دائما بمحمد فهو جيد الابتسامة متعاون فيما يتعلق (بترقيع) كدارات الدافوري .. وتركيب المسامير (ببروز) حسب الطلب وبكميات تقل وتزيد حسب الموقع المطلوب .. محمد يعرف الخامة الممتازة يقوم باستجلابهـا من سوق الجلود أمدرمان بالقرب من محلات سورج للصاعوط ؟؟ يعني بي صراحـة .. الجلدة زاته بتكون معتقـة (وموزونـة) من المصدر.
سلوك التربيط ..الاسلاك النحاسية بعد استخراجهـا من سلك الكهربــاء العادي .. وسحبها من الداخل السالب والموجب .. التربيط يتم بعد أن تكتمل كافة القياسات ..
فكرة النبــلة .. عبارة عن منجنيق مصغـر وهي لاتقل فتكا من المنجنيق (والسـام سبعـة).. وهذا للتوضيح.


ملحوظـة:
ليـه دائما بتدوني احساس إني قاعد اشرح في صناعة النبلة لي ناس من جمهورية (الأرجنتين) الشقيقة..؟

(*)

يا عــلاء يا جنابو ..
موضوع النقطة الجوه القوسين دا شنو الايامات دي ..؟
انا بعرف النقطـة الساكت ..
أو
النقطة السليقة.

انا فاهم كلامك يااااخ ,,

واصل ورينا حجارة النبله بتجيبهم من وين ؟؟؟

الزولة قالت عاوزة تبقى عصفورة تطير من شجرة لشجرة صاحبك قال عايز يبقى نبلة شوفت الحسادة دي

لكن دي غايتو بالغت فيها عديييل كدة ..

يعني هسع دي عايز تعلم ( الطير ) كيف ينيش بالنبلة !!

ياخي نٍبلتك دي ( صقر ) عديل كدة يجلي بيها ..

تقول لي ( طير ) ..


إنتا الليلة مالك ؟؟

Quote: يعني هسع دي عايز تعلم ( الطير ) كيف ينيش بالنبلة !!

يا مولانـا مش قاليك علمني أنا اصطاد وما تديني سمكــة .. ؟
دا مشروع بتاع تمليك كل طيرة صياد .. وليس كل طيرة نبلــة ..
من ناحية أخرى ..؟
شايفك بقيت بتفكفك اغــاني الحقيبة بطرق حديثة ..
بعدما تنتهي من قائد الاسطول (فكفك) لي معاك:
أنا يا طير .. أنا يا طيـر بنيشك.

Quote: إنتا الليلة مالك ؟؟

الليلة عايز اصطاد في الميـاه الاقليمية يا مولانــا .. الواحد ليهو فترة ما جرب يدوو ..

Quote: صاحبك قال عايز يبقى نبلة شوفت الحسادة دي

الزول دا ما حاسد يا حيدر .. لكن احتمال كبير يكون بغران يا كمان راقد لو فوق راي ..
مش في مقولة شهيرة بتقول الما بتلحقه جدعــه.. احتمال يكون عايز يجدع أول لحدت ما يلحق دا الرقدان فوق الراي البقصدو ليك ..


طبعا نسيت اقوليك مشتاقين ..

Quote: انا فاهم كلامك يااااخ ,, واصل ورينا حجارة النبله بتجيبهم من وين ؟؟؟

.. شكلك كنت صناعي ونيشنجي درجـة اولى يا مسلمي
تتخيل مرات حتى حجار الأرض بتتعزز علينـا في الحالة دي بنجازف من اقرب مغلق بتاع ادوات بناء حجار خرسانية .. متعددة الاستعمالات يعني بتصيب الهدف وتستقر .. ممكن تلقاها قاعده وتستعمله تاني .. شفت كيف؟

تصدق يا تمبس الان تباع فى محلات كتيره فى اوربا لكن بطريقة متطورة جدا ومرتبه
ومع ذلك زمنها انتهاء

ياخى قول عايز قناص......

تحياتي لك

حرررم الصور مني انا المرة دي ..

يا أبو النون
تعرِف دة كان النوع المفضل لي أخوك
حقت تمبس دي أنا ما كنت معترِف بيها
بتاعت الخشب
لكن ما مصنّع زي دي
المن الشجرة و فيها- شكلها زي السبعة (شعبة صغيرة)
أفضل حتة كنتة بفضِّل النيش فيها داخليات البركس و شجر النيم و اللبخ الكبااااااااااااااااار داك
و ميدان الجامعة الشرقي و هندسات الخرطوم و شارع النيل
ياخي دي معاقِل الدباس ذاااااااااااتو
و كمان كان عندي ليك مهارات فردية غريبة خلاس في العزف المنفرد يعني النيش بالضراع خاصة ودأبرك
ياخ أخوك كان فنان عدييييييييييل كدة في نيش الطير
فنان يفِن الحجر يجيب ليك الطيرة ريشة ممعوط

Quote: (الكـاف) وهو الدعامة الاساسية وغالبا ما تصنع من الحديد الصلب

تمبس تحياتي

من تجربتي نبلة الخشب الزي الشعبة احسن من بتاعة الحديد ، لان نبلة الحديد فيها ارتداد يؤثر على دقة التنشين وان كان

يعطي مدي اطول.بعدين ماتنسي نبلة الرايش ودي نبلة صغيرة جداً المقذوف بتاعه عبارة عن قطعة صغيرة من سير البلاستيك

البعملوه في في الكراسي زمااان ولاتستخدم نبلة الرايش في صيد الطيور لكن تستخدم في الحفلات واماكن التجمعات ودايرة

حرفنة شديدة في التنشين وإلاختباء ... البعض كان يفضل استخدامها ضد الجنس اللطيف خصوصا النوع العندو تخت تنشين كويسة

والبعض يفضل استعمالها ضد الجنس الخشن البكون قاعد في الحفلة مع الجنس اللطيف وقابض الجو ..... وهذه النبلة تمتاز

باللسعةالحااااااااااارة.


حكاية النبل دي ذكرتني التعلمجي في كلية الشرطة...

الحصة سلاح ...

قال الدرس الاول ...

البندقية مصنوعة من حديد وخشب

اى سؤال ؟؟؟؟؟؟؟؟؟؟؟؟؟؟

Quote: لان نبلة الحديد فيها ارتداد يؤثر على دقة التنشين وان كان يعطي مدي اطول.بعدين ماتنسي نبلة الرايش ودي نبلة صغيرة جداً المقذوف بتاعه عبارة عن قطعة صغيرة من سير البلاستيك البعملوه في في الكراسي زمااان ولاتستخدم نبلة الرايش في صيد الطيور لكن تستخدم في الحفلات واماكن التجمعات ودايرة حرفنة شديدة في التنشين وإلاختباء ... البعض كان يفضل استخدامها ضد الجنس اللطيف خصوصا النوع العندو تخت تنشين كويسة والبعض يفضل استعمالها ضد الجنس الخشن البكون قاعد في الحفلة مع الجنس اللطيف وقابض الجو ..... وهذه النبلة تمتاز باللسعةالحااااااااااارة.

كيفك يا كمندان عمر ..؟ والله يا كمندان قعدته اضحك من المنهجية بتاعتك الطلعت لي بيها العود أحسن من العمود حق السلك .. جالك كلامي يا عــلاء .. اها الكمندان قاليك العمود بتاع السلك فوقو ارتداد ..
نبلة الرايش دي يا كمندان نبلة بتاعت (كربنـة) بس فعلا بتستعمل للاستعمالات الخفيفة جدا .. يعني عاملة زي الطبنجة عندكم .. تكون زهجان ليك من اي بشر .. تمتعو بي النبلة دي .. لكن الغتاتة الفيها اكتر تقوم الرصاصة حقته بتاعت سير البلاستيك دي تقشط ليك فيها سلك بتاع المونيوم داك دي بتكون دقيقة جدا في اصابة الهدف .. لانو بتطلع سليمة جدا وما بتتاثر بي عامل الهوا ..
ملحوظة:
يفضل التصويب مباشرة في الرقبــة .. للنماذج المذكورة اعــلاه .. في تصنيفك .. يا طرافية خالص في التختـه.
ميزات نبلة الرايش .. سهلة البلع حال انكشاف الأمر ..
..

Quote: قال الدرس الاول ... البندقية مصنوعة من حديد وخشب اى سؤال ؟؟؟؟؟؟؟؟؟؟؟؟؟؟

...
.. والله دا ما خلى ليكم اي حاجة .. جيهكم جيهه جد..

Quote: يا أبو النون تعرِف دة كان النوع المفضل لي أخوك حقت تمبس دي أنا ما كنت معترِف بيها بتاعت الخشب لكن ما مصنّع زي دي المن الشجرة و فيها- شكلها زي السبعة (شعبة صغيرة)

.. والله يا عــلاء أنا زيك كدا سودان قديم .. وكنت مقتنع بالمسالة دي لي آخـر حاجة ... بعدين في خرافة بتقول ليك عمود الخشب نياش .. والله في ناس كدا يا عـلاء الواحد لما يجي يشكر ليك الحاجة ممكن يعمل اي حاجة ولما يجي يفطس ليك الحاجة اصلو ما بتلفت ..
تعرف عمود الخشب دا مشكلتو انو ممكن في لحظة يتكسر ليك .. يعني شكل السبعة دا يبقى حداشر .. عودين متوازيين تقوم تربط تاني من جديد واللا كيف ؟؟ مع العلم انو لما تجي تصنع ليك نبلة بي مزاج .. ما بتخت في بالك الاسبير غير اللساتك والسلوك ..

Quote: أفضل حتة كنتة بفضِّل النيش فيها داخليات البركس و شجر النيم و اللبخ الكبااااااااااااااااار داك و ميدان الجامعة الشرقي و هندسات الخرطوم و شارع النيل ياخي دي معاقِل الدباس ذاااااااااااتو

.. اقوليك تناقض عجيب بالنسبة لي شارع النيل دا .. كنا في حوض السباحة بتاع الجامعة .. بنمشي لما الحوض بتاع الاتحاد العام يكون مقفول أو فيهو صيانة .. مشينا اليوم داك والجماعة اتغاتوو علينـا .. كان اليوم لي اولاد الراحات بس كلهم مرطبين وبجيبوهم بالعربات وقتها .. ونحن بنملح من شارع النيل وعندنا نبل .. المهم قدرما حاولنا نستعمل حقنا الشرعي والقانوني الجماعة قالو اصلو ماف طريقة ..
قلنا ليهم كويس ..
من الشنط .. طلعنـا الاسلحـة البيولوجية الفتاكة ..
واللبخ بتاع شارع النيل .. فيهو كمية من خلايـا النحل النايمة تعجبك .. يللا استخدمنا الساتر .. ورجمنـا ليك خلايا النحل الفوق .. بعد ثواني اتحول شارع النيل لي دخــان من اسراب النحل .. ونحن طبعا على اتجاه البحـر ما بتجينا مشكلة يللا قوم يا نحل ادخـل المسبح .. بعداك بقينــا كلما نجي بفتشونــا تفتيش شخصي ـ لكن علي منـو ..؟ . طبعا عارف النبلة بتتطبق كيف .. بنطبق النبلة ونصبنه في نفس الشجر بتاع اللبخ .. نزلونـا المسبح ماف نحل .. ما نزلونـا في نحل
طبعا النبله يا عـلاء كانت حاجة اساسية .. لانو في اي لحظة في اي مكان ممكن تلمح ليك اي دباسة يا اي قمرية أو لمبــة مطرفة ..
عليك الله دي طفولـة دي ..؟
ويقولو ليك نحتفل بعام الطفل الدولي ..؟

يا عمكـ

أنا قريت الكلام دا أنو في نياشين (بتاعت الجيش ديكـ) و(نبل) من نبيل وكــدا
فقلت الأمنجية ديل عاوزين يوزعوا الرتب في البورد دا

أجي ألاقيكم عاملينا لينا طير طير!



عليكـ الله طير من حياتنا ياخ!

Quote: أنا قريت الكلام دا أنو في نياشين (بتاعت الجيش ديكـ) و(نبل) من نبيل وكــدا فقلت الأمنجية ديل عاوزين يوزعوا الرتب في البورد دا أجي ألاقيكم عاملينا لينا طير طير!

.. يا معلم كاروشة .. ابو اللف
إنت شكلك زمان لا بتطقع ولا بتنيش الطيــر .. يعني بي صراحـة زول مثالي جدا من نضاراتك دي والفريم حقهــا .. يعني ينيشو جمبك قمرية وتجي واقعة تشبكنـا حسع اولاده الصغـار البياكلم منـو..؟
طيب هي بتتحاوم زي الوكت دا لي شنـو ..؟
يا عزيز بشاشا القاري .. زي محمد الصايم دا .. هو النوعية المستهدفة فيما يتعلق بي نبلة الرايش .. يعني تلقاهـو مطرف تخسر ليك فوقو جوزين سير بلاستيك كحلي .. النوعية دي لو خليته تنظر ليك في حياتك العامة .. عادي جدا ممكن تبوظ ليك احساسك الطفولي ..


نبلاء شنو وكهنـة يا عمك ؟؟

قوم لف

Quote: حرررم الصور مني انا المرة دي ..

وين الصور يا نيستــا ؟؟

Quote: تصدق يا تمبس الان تباع فى محلات كتيره فى اوربا لكن بطريقة متطورة جدا ومرتبه ومع ذلك زمنها انتهاء ياخى قول عايز قناص...... تحياتي لك

دا كلام كلام شنـو ياهشــام ..؟
ياخ انا كنت فاكر انو المسالة دي بتاعت ناس غلابــه .. ومبتكرين .. وما عندهم فرق ما بين الانسان والحيوان والنبات في الحقوق ..
بعدين بيصطادو بيها شنو في اوروبتم دي ..؟
طير ؟؟
يكسرو بيها أنوار ..؟
يكسرو بيها قزاز ..؟

والله بي صراحـة اربكتني .. أنا بعتبر دا ترف اجتماعي منهم ساكت ..
كيفك أخبارك وأخبار الأسرة ..؟

كما داهمتني بالأمس تفاصيل مدرستنـا الثانوية ـ ناداني صوت أمي صباح اليوم وفي نفس المكان تحديدا عند إشارة المرور وأنا أحسب الدقائق لأن تسمح لي بالمرور متجاوزا سخافة الصباحات في هذا المكان إلا أن صوت أحمد ربشة كان رحيماوكعادته يواسي حين شجـن ..

ليت الشتاء لا يعود مسرعا
لاننى بغير من احب
لا استطيب ان يمر فوق جبهتى
ريح الشتاء باردا وموحشا
وكنت حينما يعبرنى بزمهريره
ادفن فى تلال صدرها عذابى
وتستريح بعد هجعة السفار
فى عيونها اهدابى
وكنت مخمورا بعطرها
وسحرها
وما عرفت حينما افقت
اننى كتبت فى عيونها وداعى

وأنا اتسكع في مغادرة السرير ومصارعـة النعاس صباحا سيطرت .. تفاصيل العمود . عمود الحديد الذي كنا نحيك فيه مؤامراتنا تجـاه القماري .. ولمبات الشارع .. والصقـور تحديدا الصقور .. ومهمة الصقور كنا نوكلها لطـارق دووبي .. فيقوم بتصفيتها بشكل جيد بعد أن يستجلب الحجارة المناسبة لتنيذ المهمة.. يعني بي صراحة وقتها ما كان في صقور في حلتنـا كما صقور هذه الأيام التي تتصيد الجيف الحية .. بإستثناء بعض فروخ البوم. العمود الحديدي بصوته الرنـان تعلمنا فيه لغــة الإشارة من وقتها .. ساعدت نفس اللغـة في فترة ما في تنسيق المواعيد كل وما يهوى .. فكنا نعرف أن عدد الضربات تخص فلان .. ومحبوبتـه .. والعدد المختلف فلانه ترسل اشواقها أو أنها تعتذر عن المواعيد المحددة .. هذه اللغة اشبه بلغة رسائل الدخـان في أزمان ما .. واشبه بالحمام الزاجــل .. ورسل الحـرب ..
ضحكت هذا الصباح أن عبرتني حكاية قديمة للعمود ... وأنا محشور نهارا في شجرة النيم هاربـا من ملل الظهيرة ومن مراسيله المزعجــة ورائحـة طبيــخ الغداء وصوت بائع (البتيخ) الأجـــش الخالي من أي حـرف موسيقي من الحروف المعتمدة عالميــا.. عندما يعرض بضاعتـه بصوته فكأنمــا تتدحرج براميلا فارغــه .. يثرب الملل لأخي الصغير فيبكي .. يخرج عبد الرحمـن بكتاب لسارتر أو فيكتور هيجو.. بسرواله الدمورية (شاتما) الرجل بعبارات تقدمية .. ثورية يستمدها من كتبه الصفراء .. يصمت قليلا .. يكمل الباقي بلغة الاشارة مع اصدار فرقعـة عالية جرا تصادم ساعديـــه.. نهاية الشارع يمكن حينها أن تمــر عربة كاروو (أبو الليل) محملة بالفحــم .. او لا تمــر .

Quote: ليـه دائما بتدوني احساس إني قاعد اشرح في صناعة النبلة لي ناس من جمهورية (الأرجنتين) الشقيقة..؟

يا ابوالنسب
أحسن حكم هو الحكم الارجنتيني
ودائماً حكم محايد
وطوالي بيحسب البلنتي

تمبس ازيك:

Quote: ليـه دائما بتدوني احساس إني قاعد اشرح في صناعة النبلة لي ناس من جمهورية (الأرجنتين) الشقيقة..؟

لما يكون مزاجك رايق بتكيفني والله..
لا أرجنتين ولا حاجه, لأني اخت أولاد, طفولتي قضيتها محمد ولد, وهسي فاهمه ليك كلامك ده تماما ,
ياما شديت اللستك شدييييييد عشان أخواني يربطوا النبله كويس بالأسلاك..
لكن برضو ماكنت شفته في شدها وما حصل اصطدتها لي طيره بي نبله,
طوالي بتجلي معاي, الغريبه هم كانوا نياشين كيف..
بعدين لما الحجر يضرب ليه قزاز بالغلط, بتجلد أنا طبعا..

هيييييييه أيام, ذكرتني لما أرجع السودان أعلم بنات أختي موضوع النبله ده..
العيال ديل طفولتهم رايحه ساكت مافي ابتكار,

تحياتي,,

Quote: لا أرجنتين ولا حاجه, لأني اخت أولاد, طفولتي قضيتها محمد ولد, وهسي فاهمه ليك كلامك ده تماما , ياما شديت اللستك شدييييييد عشان أخواني يربطوا النبله كويس بالأسلاك.. لكن برضو ماكنت شفته في شدها وما حصل اصطدتها لي طيره بي نبله, طوالي بتجلي معاي, الغريبه هم كانوا نياشين كيف.. بعدين لما الحجر يضرب ليه قزاز بالغلط, بتجلد أنا طبعا..

.. والله اخيرا يا اماني الواحد لقى ليهو زولة تفهم نفسياتووو ... ياخ اخت الاولاد دي حاجة عجيبة خلاص .. بتكون صعبة المراس وعارفه حاجات كتيرة جدا لما تكبـر ـ كان عندنا واحده في الحلة برضو اخت اولاد .. هي اصغر مننا لكن دي استاندرد عجيب خلاص ..
ياخ لما تجيك قاشرة لي الدافوري .. بي الكدارة وهي بالفستان حاجة ما تخلص .. احسن زولة كانت بتودي الواحد الجير .. يعني تطير ليك جوز بي شكل عجيب جدا .. يعني البيجي ماري فيها .. بيكب دم , يعني بيكب دم .. بي نبلته طبعا .. ومستنكحة درجة أولى .. غايتو لو ما خذلته التفاصيل لما كبرت شوية .. كان تطلع حاجة عجيبة جدا..
في واحدة تانية كانت بتلعب معانا بلي .. نحن نخرت اخوانه .. وقبال ما نلقى لينا طريقة نتخارج ينادوها لينـا .. تخرتنا ليك خرت السرور

Quote: هيييييييه أيام, ذكرتني لما أرجع السودان أعلم بنات أختي موضوع النبله ده.. العيال ديل طفولتهم رايحه ساكت مافي ابتكار,

.. ماف طريقة يا اماني .. ما ح يستوعبو ليك الفكرة دي خالص .. البلي استيشن في الصين راقد .. املي ليك شنطة وانسي الفكرة دي .. اساليني انا القدامك دا ياما حاولته .

تمبس ياخ ضحكتني لمن دموعي جرت...

Quote: ياخ اخت الاولاد دي حاجة عجيبة خلاص ..

بت حلتكم دي شفته جد, فايتاني لكن,
أنا غايتو كان حدي البيت, مرحلة الشارع ماكنت بحتاج أوصلها,
جوه البيت كان ممكن يتشكل فريق أي حاجه زي العجب ماشاء الله..
المهم لعبت أي حاجه بتاعت أولاد تخطر في بالك, تلبت الحيطه حقت الشارع, طلعت في الشجر حقنا في البيت, وظبطت النبله زي العجب...
لعبت كوره, ووقفت قون, حب الكوره والهلال الدخلوا فيني لي هسي ماقادره أطلعهم, ياخ جرايد الكوره كلها قريتها,
حضرته أي كاس عالم لاقاني وحفظته ليك اللاعبين والأتيام كلها,
بعدين في المدرسه البنات في وادي وأنا في وادي...
وفي الحله ولد بقدر يتكلم معاي مافي, نظام أخت أولاد وكده..
المهم مع الوقت الحاجات دي طارت كلها طبعا,
الا حب الكوره هههههههه

Quote: بتكون صعبة المراس وعارفه حاجات كتيرة جدا لما تكبـر

بس دي المصيبه الوحيده, هسي الأولاد ديل بكرههم ليك عمي .. (بس ماتكلمهم عليك الله)..
فاهمه ليك حركاتهم كلها كوييييس, من غير مااتكلموا بعرفهم عاوزين شنو..

هييييييييييه
الله يسامح اللي كانوا السبب .....

Quote: المهم لعبت أي حاجه بتاعت أولاد تخطر في بالك, تلبت الحيطه حقت الشارع, طلعت في الشجر حقنا في البيت, وظبطت النبله زي العجب... لعبت كوره, ووقفت قون, حب الكوره والهلال الدخلوا فيني لي هسي ماقادره أطلعهم, ياخ جرايد الكوره كلها قريتها, حضرته أي كاس عالم لاقاني وحفظته ليك اللاعبين والأتيام كلها, بعدين في المدرسه البنات في وادي وأنا في وادي...

.. والله يا اماني مكسب لكـن .. للفريق حقكم طبعا لكن اكيد بتكوني ادقيتي دق العيش .. من الشباب ديل لانو اكيد مرات خشمك بيكون خفيف .. بالمناسبة المناظر دي كلها داخله ويدي طاعمة خــلاص ..
ماشاء الله الأخوان كتار وكنت اصغرم انا .. وعنصر نسائي ما كان في يعني بي لغة البورد كلنـا كنا عقليات ذكورية .. حنت علينا خالتنا دفعت ليناواحده من بناته ودي طبعا جودية سودانية نادره جدا .. المهم الوكت داك كنت ما ناقش الحاصل شنو في العالم دا يعني الواحد استحمل الصابون البخش في العيون .. والحمام بتاع البرد .. والدق التعسفي والحاجات دي .. لما كبرنـا شوية الواحد بقى يخلص في حاجاتو بعدما العود استوى .. لكن مرات مرات بتحصل ليك مقارز ما بتكون في الحسبان ..
مرة لاعبين دافوري جمب البيت قمت شت ليك الوااطه .. الضفر وباقي الاكسسورات حقتو كلها طارت والدم ما يديك الدرب .. جيت جاري وشايل رجلي .. دخلت البيت لاقتني وش .. قالت لي دقايق بس حسع رجلك برجعه ليك زي أول وبتبرد .. من اقرب منقد قشطت لي مقدار خمشة من الرماد .. وابتسمت .. تصدقي أنا لحدت الآن بكورك ؟؟ النتح خفـه شوية وهي دقست جات ماره بي عندي .. الزمن داك كانت منتشرة ثقافة (الكربون) تمسك الواحد كربون ولو عندك بقية مساعدين يخلصو ليك حقك .. المهم مسكت كربون بي طريقة غير سليمة .. والله اقوليك حاجة..؟ كان اخير الرماد بتاع قبيل .. بعد الكربون انا طلعت بي كابشر بتاع طقم اسنان قاعد لحدت الآن في مكان ما في جسمي ومن وقتها طلعت بي تجربة انو ما تخلي نفسك في زاوية قريبة من سنون الأنثى .. تحت اي ظرف كان..

Quote: بس دي المصيبه الوحيده, هسي الأولاد ديل بكرههم ليك عمي .. (بس ماتكلمهم عليك الله).. فاهمه ليك حركاتهم كلها كوييييس, من غير مااتكلموا بعرفهم عاوزين شنو..

.. يازولة نحن زاتو حركاتكم دي ناقشنها .. لكن بس مرات كدا في واحدين بجيبو لينا الهوا في صمت خشمنا

Quote: يا ابوالنسب أحسن حكم هو الحكم الارجنتيني ودائماً حكم محايد وطوالي بيحسب البلنتي

. والله ياخال مبالغة لكن ..
تعرف كلما اقرا ليك رد ليهو علاقـة بالتحكيم .. واللون الأزرق والأبيض .. بتذكر طوالي الهلال لما رش ليك الخرطوم تــلاتة سبعة الموسم الفات .. مش سبعة واللا كم يا خالووو ..؟
تاني يوم جيت الصباح زعـــلان .. وقلت الخرطوم تلاتة فاتحة للهلال ..
بعديها المريخ جا رش الخرطوم تلاتة خمسة واللا كم ما عارف .. كسرت في اضانك قشة وما جبت سيرة الفتوحات التحكيمية دي ..
لكن اشان ما تزعل يا خالووو من الهلال دا ..
التحكيم فاشل .. التحكيم فاااشل .. التحكيم فاا شش ييل ..



هاك مهند الطاهر دا

تخيلوا ان السيد علاء الدين تمبس قريب الشهيدة التاية ابو عاقلة وهو صاحب الكلام ادناه لا يستحي من وضع صورة قاتل قريبته الشهيدة التاية ابو عاقلة السفاح عمر البشير على بروفايله ولا ادري ماذا ستكون اجابته اذا ساله قريبه والد الشهيدة التاية متى سيأخذ بثأر قريبته الشهيدة من قاتليها واولهم السفاح البشير!؟

Quote: اتصلت بالأسرة ووضحت لهم حقيقة ما حدث هنا ... تعذر على الوصول إلى بقية الأهل في قرية نور الجليل بالدندر لعدم توفر هاتف .. غدا إن شاء الله سأتصل بمن هم على معرفة ودراية ومعاصرة للحدث داخل محيط الأسرة لاعكس لهم عن ما دار في هذا المكان .. حتى ذلك الحين .. نرى كيف يتحذلق هذا الهشام هباني ويتفنن في التشهير مدعياً ممارسة النضال .. مغلفا اسقاطاته حتى بالتلاعب بصور الشهداء .. حتى وإن كانت في ابشع صورة لها كما فعل بالسابق..

ولم يستح السيد تمبس في 25 مايو من العام الماضي وبشكل مستفز من وضع صورة السفاح نميرى على ملفه
الخاص ليومين متتاليين وتحديدا هذه الصورة...

نرجع لي موضوع النبل
النيلة عندك يا تمبوس
واصل حكاية النبل
اصلوا الايام دي محتاج لي
لي نبلة
مودتي ومحبتي ليك اكيدة

Quote: (توجد نبــل) ..

نبلك دي بتثقب الأوزون عدييييل .






...................................


ماااابتوب .

Quote: ماااابتوب .

..
والله يا داليــا بي ردك دا فيك حلات دين نيشــة ..
ياخ إنت عندك فيتو طالما انك متسامحه كدا وقاعده تتفهمي الامـور أنا كنت راجع ليك بي هناك .. لكن الوضع بقى ما بيتحمل لانو كنت بجوط ليك الدنيا بي هناك خاصة انو في ناس محتاجين كدا .. ولو كان كتبت البوست بتاعي دا وقتها .. كان ظبطت النبل بتاعاتي وجيت عليك بي هناك ..
.
.
طبعا الاسمها شمأأيل النور ح اظبط ليها نبله اكبر شوية وماعونه واسع .. وبدل حجر صغير .. بخت ليها طـوبـة عديل كدا ..
اريت الطـوبة زاته تنفع معاها.

أنا برضو ما بتووب والله يا داليـا .. ما انت براك

Quote: لستك المطـاط .. عبارة عن لستك داخلي للدراجـات

ليه كان اللستك الأحمر أفضل ... وقيمة النبلة كانت بتزيد لو اللستك المستعمل كان أحمر ؟

ولا الكلام دا كان عندنا برانا؟


سلامات يا تمبس.

علاء الدين ياخ ما بلاقي عندك نبلة مصنوعة من قزازة البيزيانوس تحديداً؟؟

تمبس سلامات

Quote: واتفاءل دائما بمحمد فهو جيد الابتسامة متعاون فيما يتعلق (بترقيع) كدارات الدافوري .. وتركيب المسامير (ببروز) حسب الطلب وبكميات تقل وتزيد حسب الموقع المطلوب

غايتو تركيب المسامير بي( بروز) دي ضحكتني شديد

وذكرتني زمن الغتاته الجد
تقول لي نبله وطير

تمبس

تحياتي ؛؛؛

عليكـ الله أبوالدقيق ده جليهو خلينا في موضوع النبلة


ولابأس لو صرفت ليهو واحد نيشان نبلة مصلح بس.

قبل فترة طويلة قلت شفوت المنبر تمبس وأخرين و البوست ده اكد لي نظريتي فيك شفت لمن غلط لمن كان للشفتنة

طعم ولون قد تضايق الاخرين لكن لاتضرهم وعلى ما اظن انك من الموردة التى لايضاهي شفتنت اولاده الا شفتنت اولاد الديم

في الخرطوم.






مرة كنا قاعدين شلة سودانيين في دولة خارج السودان ........ قام واحد بدون مؤاخذة بزق بالطريقة البتقول

اززززززززز واحد من الناس القاعدين قال ليهو انت من الديم والا من الموردة قال ليهو من الموردة عرفتني كيف ؟

قال ليهو شوف مافي زول في السودان بيبزق زي المزيتة كده الا ناس الموردة والديم ........

Quote: اززززززززز واحد من الناس القاعدين قال ليهو انت من الديم والا من الموردة قال ليهو من الموردة عرفتني كيف ؟ قال ليهو شوف مافي زول في السودان بيبزق زي المزيتة كده الا ناس الموردة والديم ........

.. والله يا جنابو دي بالغتو فيها ..
تخيل لو ما كلامك دا انا المسالة دي ما منتبه ليها خالص .. لانو الحركة بتاعت الـ اززززز دي مرت علي كتير جدا ..
الديم والموردة في حاجات كتيرة مشتركة .. والديامي بيكون مرتاح لما يلقى موردابي وبالعكس .. وبيعرف يتعامل معاهو ..

المشكلة في زي ناس عصام جبر الله ديل ..

Quote: عليكـ الله أبوالدقيق ده جليهو خلينا في موضوع النبلة

.. يا دكتور بشير .. زولك دا دواهو في .. نوعية النضال حقتو دي .. عندنا ليها نضال ضد .. علشان كدا ما تقلق .. بنيشو ليك بي طريقة مؤسسة خالص .. وهو ضايق يدي طبعا من بدري جدا ..

ياخ والله الموضوع ده حاسي بيهو حا يجيب هواء في النهاية !! ما عارف ليييييييييييييه ..!!
عموماً أنا لا صياد لا قناص لا بعرف أستخدم البتاعة الإسمها نبله دي ..
نحن والحمدلله الألعاب بتاعة الأحياء الطرفية دي ما استخدمناها ..
بالعكس الطير كنا بناديهو .. ويقوم يجينا طوالي .. بدون شركـ وحفر وكلام الضهاري ده ....!!!

Quote: ياخ والله الموضوع ده حاسي بيهو حا يجيب هواء في النهاية !! ما عارف ليييييييييييييه ..!!

.. يا عمران ..
شنو ياخ انتو بقيتو تفهموها طايره كدا .. تبلعو الزول فكرتو .. ياخ انا بتكلم عن (حقبة) طفولة ليس إلا
خلاص لو ما مصدقيني الواحد يظبط ليهو نبلة ويجي داخل ليكم بيها ..

Quote: عموماً أنا لا صياد لا قناص لا بعرف أستخدم البتاعة الإسمها نبله دي .. نحن والحمدلله الألعاب بتاعة الأحياء الطرفية دي ما استخدمناها .. بالعكس الطير كنا بناديهو .. ويقوم يجينا طوالي .. بدون شركـ وحفر وكلام الضهاري ده ....!!!

.. تخيل انا من اول يوم شفتك قلت الزول دا مولود في (ادنبره) ظاهر عليك ..
ياخ والله اقوليك حاجة ..؟
إنت وعصام جبر الله الواحد فيكم كان عندو ( نشــاب وطرمباش ) عديل كدا .. أخير نحن بي النبل بتاعت اولاد العز دي

Quote: غايتو تركيب المسامير بي( بروز) دي ضحكتني شديد

العزيز كمال حســن كيفك؟؟
ياخ زمان فير بلي اصلو ماف .. ما عندك امكانية لي بروز المسامير دي .. تتصرف تشوف ليك موس ..
انا كنت بلعب قوون .. عندي أحرف (سيردباك) في الدنيا .. اي كورنر ماف واحد بيقوم علشان يضرب راس .. لانو اخوك كان عامل زي حجر البطارية دا طبعا قبل التعديلات الأخيرة .. بكون لابد في القون ولا بتشالق ولا بنط ..
السيردباك زولي .. لو واحد اتجرا وقام معاهو فوق:
بيكون شايل الموس في ايدو اللحظة ديك بيكون المهاجم اخد (كف) ويمكن انك تسمع صوتو لكن ما بتعرف المصدر ..
الموس ما للتشليخ .. الموس لقطع رباط الشورت (التكـة) يعني المهاجم إلا يكون مردف بي شورت اسبير ..
لو طلعت سليم .. بتكون (مفقوه) لانو مع النطـة .. (بينتل) ايدك لي تحت ..
المسامير دي في كورة الشراب طبعا.. تمشي الدافوري وتكون (مصبن) ليك كيس بتاع ملح طعام.. بعد الدافوري ينتهي تراجع الشكل التشريحي بتاعك التظلط .. والتشليخ وتقوم بالطبابة اللازمة .. في بعض الاحيان في واحدين بيجيبو ليمون معاهم ..

Quote: علاء الدين ياخ ما بلاقي عندك نبلة مصنوعة من قزازة البيزيانوس تحديداً؟؟

.. .. ااي ممكن البزيانوس لاني لو طرفته كدا في نوعية القزاز دا .. احتمال كان نجلدك اربعين جلدة ..
فعلا كنا بنعمله بي قزاز البيبسي .. ودي طبعا وهميـة جدا واصلو ما وقعت لي .. بعدين تدخل الحصيرة كدا وتمطها وترفع لي فوق وتجدعـه ..
نحن يا عمر بنفضل بتاعت الحجــر .. لانو في جماعة كدا النوع البينظر ليك في زقاق البيت ويقول ليك ما تعمل لينا ازعاج يا الكورة تطير عندهم ويرجعه ليك مقدودة .. زي النوعية دي ما بتنفع معاهم النبلة بتاعت القزاز .. تظبط ليهو نبلة حجـر ..
وتطلع راس البيت وتنشن على اي لمبة في البيت بعد يومين بتلقاهو بلعب معاك دافوري .
وعااارف سلفا انك إنت العملت الحاجة دي .. لكن ماف ثابتة

Quote: ليه كان اللستك الأحمر أفضل ... وقيمة النبلة كانت بتزيد لو اللستك المستعمل كان أحمر ؟ ولا الكلام دا كان عندنا برانا؟ سلامات يا تمبس.

مليون سلام يا مولانـا ابوبكـر ..
ما عندكم براكم والله .
دا كان اعتقاد سايد عند كل المستخدمين
طبعا حسب التصنيع .. زي اللساتك الحالية دي هانكوك وميشلان .. إلخ كل حسب الجودة
لكن كنت بتذكر بنفضل اللون الأحمر تحديدا ـ حتى في اللون الأحمر في نوعيـة بتلقى فيها زي حبوب بي جوه .. وماده زي الدقيق كدا بودره .. يللا دا ممكن الواحد يدفع فوقو دم قلبو .. حتى العجلاتي زاتو ما بيبيعو ليك بالساهل ..
الظاهر لي مسالة اللون دا يا ابوبكـر بس لانو الشكل والمظهر بيكون مختلف وبتكون جذابة شوية من اللون الاسود .. هو طبعا ما احمر فاقع لكن درجة من درجات الأحمر .. وطبعا عارف مسالة التعويدة والعامل النفسي .. يقوليك الواحد لازم اللستك يكون أحمر ..

Quote: وقيمة النبلة كانت بتزيد

دا شنو يا ابو القاسم إنت كنت تاجـر شنطة واللا شنــو..؟ والله انا بتكلم بي طريقة استخدامات شخصية

السني اللذيذ ..
كيفك يا حبيبنـا ..؟
طبعا نبلتك دي ديجتال الكترونية .. صاح..؟
لانو ما شايف فيها اي حاجات انالوق .. لا سلك طاير ولا عمود مكعوج .. دي بتكون موزونـة زاتو بي نطرية فيثاغورث
ما عندك مشكلة انا بظبط ليك نبلة من النوع الياهو دوت كوم .. حدد لي نوعية الطير إنت بس علشان اظبط الكابسيتي حقته صدقني أنا عايز اعمل ليك حاجة كويسة

مناضل البلاعـات .. ونسوان الرئيس ..
غريبة ما جبت معاك صورة كنضوم في البوست دا .. كان تختو علشان ننيشو ليك ..

عملت لي شنو في موضوع الدكتورة . دكتورة سلمى الجابت الصورة حقت التاية ..
اووعـه تقول لي عيانه .. بنيشك ..

اليومين دي انا ما فاضي ليك .. بي صورة اوضح:
اللاب توب بتاعك الاشتريتو دا .. اللحق استمتع بيهو لحدت ما اجيك .. يا مناضل يا كيبوردي ..


شايفك بقيت مودب اليومين دي .. الرجم نفع معاك مش كدا ؟؟
أنا مش قلت ليك الكيزان ديل بيطيروها ليك من راسك لو قعدو ليك ..؟

تمبسكو

احسن من النبلة الشرك ودها بتعمل من سيبيب الحصان

مع حديدة مخرمة ويربط في قطع قماش ويتعمل علي شكل زردة


والله دها ممكن تقبض بيهو (ميسي ) زاتو

ياخي رسلت عشرة دعوات في الفيس بوك

اقبل ياخي

Quote: بعد أن احشره حشرا .. (السلك)

مصدق يا تامبا ياخي بدون اقواس











__

لما تصل القلوبية و الولفة قول لينا عوووك

نبل و حنكشة خرطوم ما شغالة معانا

شايف المجاهدين بقو مبارينك من بوست لى بوست




ايامك ..... بتلف و تجينا راجع
يا شفت البورد ....
ده فش مغسة بس .... ما تزعل
وكان زعلت ادينى ..... نيشه

يا عمك ..
انت بقيت تسهب في المقدمات كدا ليه ..
نبلة شنو من صباح الرحمن ..
داير تعمل لينا فيها مستشرق تنويري عن ثقافة الطفولة السودانية ..
خش في الموضوع ..
رابطين كداراتنا من صباح الرحمن و منتظرينك تنتهي من تلاوة البيان الاول .. و تفضى لينا عشان نفرز البضاعة ..
الايام دي ما ايام اسهاب .. البضاعة كتيرة و بطريقتك دي حتحصل تراكمات ألا نجيب ليها كراكة ..
عمك دا تاني جاب سيرة التاية .. تعفرتو و لا نقول ليهو مرنا بكرة ..
ما تعطل خلق الله ساي .. الناس دي وراها معايش و تكاسي و مصانع بيرة بتنتج بالساعة ..
انت داير تعمل كساد عالمي مش كدا ..!!

..
..

.




الله يجازي محنك يا تمبس





.













.


















.

Quote: .انا فاهم كلامك يااااخ ,, واصل ورينا حجارة النبله بتجيبهم من وين ؟؟؟ .

من مزدلفة لوووول يكه



ياتامبا

ياخي انا كان عندي نبلة والله العمود بتاعها قمة في الابداع بعادين اللساتك بتاعتها حمر اها وحاتك دي تمطها لي كتفك اها كم مرة كده ود ابرك بيجي واقع بدون راس لووول يكه
بعدين الواحد بيكون رابط ليهو لستك وسلوك ازبير في اسفل فتحة العمود

واحد من حلتنا شابكنا انا لساتكي بتاعت طيارة غايتو ماعارف كلامو ده صاااح ولا كان فاكيها فينا لوول يكه

عندي اخوي الكبير كمان كان محترف نيشان اشولنجي مابجلي اصلو يقول ليك انيش ليك القمرية دي وين

اها واحد من قرايبنا قال ليهو دي صدفة ساكت

قال ليهو امشي وراء العمود ومد لي اصبعك لووول يكه اها صاحبك كان ماشي بي جدو بس اعمامي قالوا ليهو بيقطع اصبعك وكده امشي امسك ليك عود واقيف وراء العمود اها وحاتك قولت كرووو دي العود اتكسر حته حته وصاحبك دخلت ليهو سريحة في يدك اخوي بي سخرية قال ليهو صدفة واجمل صدفة انا يوم لاقيتك لوووول يكه

تحياتي

زاتووووو

Quote: مصدق يا تامبا ياخي بدون اقواس

معقول ياخدوري الحشرو عباس طلع بتاع نبل سااااكت لوووووووووول يكه

تحياتي

زاتوووو

تامبا!!!

اخوك مزنوق يا حبة,,

داير لى عجلة يومين كدا وبرجعا ليك!!

وما تحنكنى بيش ياخ,,,

يومين بس!!!!!

وبعدين نجى نشوف موضوع النبل دا الحاصل فيهو شنو!!!

Quote: مصدق يا تامبا ياخي بدون اقواس

.. يا خـدر .. إنت أرجنتيني ؟؟

أنا اشك فعلا إنك ارجنتيني ..


بقيت زيك وزي عصام جبر الله واحد .. بس الفرق بيناتكم صلعة العباقرة دي
تابع لي عصام دا كان ما غطس حجرك ..






ـــــ

يا خدر.. جوك ردين عديل كدا ..

دا حظ غريب جدا

Quote: احسن من النبلة الشرك ودها بتعمل من سيبيب الحصان مع حديدة مخرمة ويربط في قطع قماش ويتعمل علي شكل زردة والله دها ممكن تقبض بيهو (ميسي ) زاتو

... حسب المنطقة الجغرافية يا خلي .. شركك اب زرده دا بتاع سافنـا غنية مش كدا..؟
نحن عندنا شوية نجيلات كدا بالعدد .. وكان عملت الشرك دا وحاولت تستعمل كل وسائل التمويه .. الطير بنقشو .. طير حلتنا مفتح يا خليل .. ما زي الطير حق اليومين دي ..
بعدين كنا بدل الزرده دي بنستعمل (القلوبيات) ودي بدل فاقد .. واشان اورك الطير مفتح كيف ..؟الهدهد لما يجي يلقى (العضة) في القلوبية .. إنت قايلو طوالي بيجي يمنجر مش كدا ؟؟
عارف دا بيشتغل الوجبة بي نظرية فيثاغورس شغل هندسي عجيب جدا .. بيشوف ليهو اي زاوية قائمة وبياخد منها تخريمة شوية على مربع الوتر ويجر ليك الخيط زنننن لحدت ما يبعد الطعام من منطقة الخطر أو التتك حق القلوبية .. ويضرب الوجبـة بتاعتو ويتشرب موية من اقرب جدول ويتخارج ..
تعرف في (ودبرك) بكون شغال كشيف .. نحن مسمنو (المساح) .. معليش يعني للحركة دي بالنسبة لي اليوم الحار وكدا .. .. اها المساح دا بيكوون راكي في اقرب سلك وعينو على القلوبية .. اللحظة البيحدد المكان بالضبط بيكون مركز شديد .. اي طيرة جات بقوم بقرا ليها طوالي .. طبعا دا اول واحد بتجازفو بالنبله .. وبعداك تشوف موضوع القلوبية ..

Quote: ياخي رسلت عشرة دعوات في الفيس بوك اقبل ياخي

.. والله يا خلي لي فترة طويلة ما دخلت الفيس بوك .. واي دعوة قاعد اللقاهـا بقبله طوالي .. أنا بدخل في اقرب فرصة .. واقبل الدعوة..

.

.

*

فوق