خُــرج النــور ود شمّه . . سفينة نــــوح

صدقني مشتاق للبلد
في كل لحظه عليّ تمر
ضيع سنيني الإغتراب
في الغربه ضيّعت العمر

طاري الديار الطاعمه ديك
زي قهوه في ضُل الضُهُر
كِسرَه ومُلاحه كمان فرِك
جرجير وشطاةً خُدُر
بصلاً مفقَّش بي طرف
سِعن الغُباشه هناك يكُر
خيتين سمِن
تمسح وشيك..
بعد الشبع..
شاياً..
( مَـقـنـَّن )
فوق.
جمر.

وين المراييق البُطان ؟
كُر من فوتتُن..
يا غربه كُر.

ياشمّه وين باقي العوين؟
لا يبقو في السهله الفقُر؟
- ....
لوكي الصبر..
مالنور دُغُش..
دقش البحر
مالِص عريريقو ويكُر
- ....
- الحوت ؟
- طفش
ما باقي غير صير في الجسُر
يشبهلو مره بنات نعش
أو لمعه في سيق النصُر
في بالو ..
جبادةً تجيب
لو ما بتخيب
كُورين وفوقه عجيل بحر
أو حتي صِيرات ما بتضُر
،،..،،
لملم قسمتو وإتكل
تالا البيوت الفي الحُدُر
في خُرجُو.
برسيم الغنم
(سبروق) عشان بت بابكُر
مُسواك جريد لي (ود فِضيل)
(كرنوفه) لي شاي الضُهُر
ربطة سعف للتايه
ضوّاية الفريق
من يومه شايلالو النذُر
مُنجل بخيت الإتنسي
في تقنت الويكه المسا
نجامتو،
خُرتاية التمُر
برَّاد وفراراً قديم
ساويهُ لي اوتاد البقر
نِبله،
وملوده،
وكوم هنون،
هِـلاّ المِسينيح (ود بدُر)
،،
(كركجي) لي نورا وسُعاد
يادوب بيحلمو بالوِلاد
طعم الشهور الأولي مُر
(طاب) للبُطان الدرفنو
عرجونه للدق الجمُر
( قنقر ) عشان ضيف المقيل
شايلو كم عيدان سَمُر
لوبا البليله الفي الخُرُج
والمويتو تهدِّر من فجُر
سوط العنج المو خمج
تيله وصريمه ..
ودِفيقات حمر
تمر هندي .. (دنانيِن)
(حُمبُق). وقُرام طير..
عشان شافعو الخِدير
نبقاً غُلاد شان فاطنه
أو باقي الوِلاد
بِرجوهُ زي ليلة القدُر
بِتِيخه طاعمه .. كم نصيحه
وما مسيخه
(مجقوبه) بي (خُوستُو) ام عِويد
خايف الحَمَار لا يبقي مُر
كشكوش زرازير مِنحشِر
وسط الهناببيل القبيل
مرفوعه للطير والجراد
لا يِنقُد العيش والتمُر
خايفلو من خيبة الحصاد
إن جاب .. شكر
وإن خاب .. صبر
مالنور.
بيكفيه،
الأجُر

إن جاب ..

شكر

وإن خاب ..

صبر

مالنور.

بيكفيه،

الأجُر

سلام لي شُلة الحله..

رفاقة الصحبة والأيام..

ولي زولاً مشي أندلي

علي جرفاً ندي وسالام

يقابلك بي بشاشة الأم

وبي عافية شذي النسام

سلام للسمحه تتبسم..

ترد حالي السلام قوّام..

لمزيد من القراءه.

أنا.؟
..
..
أنا ود بيوت ..

فيهن سماحأً ما اتوجد..

إن كان روكّب أو صريف..

يسعن يمين حلم البلد..

غيرن وحات المولي جد..

دنيايَّ زي ود اللحد..


وأيه غير محنتنا البكون

أطول من الهامات إذاً

دافرين قلوبنا علي الوطن..

والفي العيون لا بد يكون..

شوفاً ينسينا الحزن..

ممتن

علي الشوق السمح.

علي الغيمات ..

وحسن الظن

يالنور ..

وينكــ ؟

إندلي لفرضك ..

أنقح أرضكــ ..

وأستر دينكــ .




يالنور وينكـ ؟؟