Post: #1
Title: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:25 AM
Parent: #0
القصة بقت بايظة بوظ شديد وباكات شطر البقرة الحلوب التي كانت يرضع منها جربندوني اتجهجهت جهجهة ابراهيم عطا استوبر المريخ الشهير ..والنقاطة الكانت بس عاوزة ليها دقن (بكرت) و جكة جكتين في ميدان الفريق لزوم الدفاع الشعبي...ومعاها حبة تكبير وحبيتن تهليل عند اللزوم... النقاطة دي بقت في خطر
جربندي زارته سحابة ولمحة فلاش باكية من انجازاته التاصيلية السريعة والشرتيت الذي تقاطر اليه منذ بدايات اكتشافه الية عمل (كل شي لله) وسرح بخياله الي اياماته الاولي في طريق الترطيبة التي هبطت عليه عندما رشحه (شيخ يس) لتولي ميز معسكر الدفاع الشعبي في المدينة التي كان يقطنها.
|
Post: #2
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:28 AM
Parent: #1
والله زمان يا شيخ( يس) لعبنا( ون تو) احرف ثنائي في الدوري البرازيلي ما يلعب زيو
زيت مجاهدين كف نجرف -بصل مجاهدين لب لب- رغيف مجاهدين- دمورية مجاهدين- باتات مجاهدين- موية مجاهدين....كلو ذهب ما بين جربندي افندي وشيخ (0يس) فيفتي فيفتي....
نص يمشي لجموع للمجاهدين والنص التاني كروبات وفواتير كب فيها جربندي افندي موية تقيلة وكانت اولي الاشارات التي التقطها سريعا وعرف بان الناس الدقانة ديل بجي منهم خيرات وثمرات رطبا جنيا لو دفر معاهم في سكة الدقن دي....وساعد القصة بكم جزاك الله خير ...وكب في شخصيته كوز كوزين مع شوية تهليل وتكبير...
واقتني جربندوني احلي دقن فاقت في طولها الان دقن عباس انصار السنة العامل فيها منقطها وابن كثير .....
|
Post: #3
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:30 AM
Parent: #2
كانت مرحلة البدايات وامطار الكروبات التي هطلت علي جرنبدي كافية لاشاعة البهجة في بيته الجالوصي ذو الاوضة الواحدة ودخلت البيت هذا ولاول مرة (اربعة غويشات) من الدهب المصقول والموضب عند احرف صائغ في المدينة...وعندما كانت المدينة تسمي تلكم الدقة الدهبية المميزة (دقة الترابي)....حلف وازبد وارغي اخونا جربندي افندي وهدد نفيسة زوجته بانه سيذهب بها الي غياهب الطلاق ان لم تشيع في المدينة بان هذه الدقة اسمها (جيبو حي)...!!!!
|
Post: #4
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:33 AM
Parent: #3
سريع سريع اصبح جربندي وهو الذي طرد من فصول الدراسة ذات زمان بعيد لكونه طالب فاشل يجلب البنقو الي فصول الحكومة واتهم بعدة تهم عجيبة في التحرش بالاطفال في سنة اولي ومحاولة العبث الشين معهم..ليطرده المدير الاسطوري (ود سرور) شر طردة وتلفظه كل مدارس المدينة الاخري لذات السبب ليتحول الي عاطل كبير يستمد اعاشته من والده ذلك الرجل العصامي الذي كان يعمل تزري فقير ولكنه مكافح اهلكته الاحزان عندما لم يجد ابنه جربندي سوي في طريق الضلال والاجرام
|
Post: #5
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:36 AM
Parent: #4
وكل يوم والتاني جايبو بتاع (كارو) من فريق النسوان الكعبات وهو ثملا منغشم نغشيمة ليها ضل... ليكافح والده ليلا ونهار ليزوجه من احدي النساء الطيبات التي
اصابها الخلع والاندهاش عندما طل جربندي عليها ذات مساء وهو يحمل اربع من غويشات الدهب الما بغبباء عينها لدرجة اتهامها له بانه قد يكون نهب احدي المتاجر الدهبية ليلا...ولكنه عالجها بهتاف جادي مكبرا ومهللا.....
دي الدقن ....دي الدقن يا زولة هوووي انا من نصيحة ولاشنو ياوهم.. ومن الليلة....الغريق قدام قداااااااااااام وليبيا فتحت وراجلك لقي ليهو شطر ابن لذينة والقصة واااااااااااااره....ومن الليلة يا وهم تجدعي الثوب ده وشوفي ليك خمار اقفلي وشك العامل زي الكبك ده...وبكرة اشوفك
في المعسكر بتاع اخوات سعدية....
|
Post: #6
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:39 AM
Parent: #5
سريع سريع عربية الطوب والرملة والابواب الحديدية الفور ويل درايف هطلت علي بيت جربندي...وشوية شويةاتوضب صالون ابن لذينة...ودقن جربندي ماشة في سكة اللبع تمد وتطورت علاقاته الي ضابط المجلس وامير المجاهدين البجي من الخرطوم
ودقاني خاشي ودقاني مارق من صالون جربندي الذي تمدد الان واصبح هو رجل المرحلة التي عليها تفريخ محاربين ومحاربات بالذهاب بهم الي العمليات وحبة حبة
فضي له الجو بموت شيخ (يس) في الحرب الجهادية واصبح هو الكل في الكل تربيع
ليعالج سطوته ويحي ذكره فردة باكه اليمين (يس) بزواج سريع وعاجل لزوجته استخلافا وطمعا في الفيفتيات القبيل كان شيخ (يس) يكابسه فيها......!!![/blue]
|
Post: #7
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:44 AM
Parent: #6
يا جربندي ياخي ما ارح معنا الجنوب...
هيييع انا زول من جهز غازيا فقد غزا فخلوني يا اخواني في الله في هذه الابتلاءات وخلوني اعد لهم من رجال وقوي ورباط خيل...والله اكبر الله اكبر..
عندما شالته الهاشمية ذات يوم من ايام حضور الزعيم الكبير الي دائرة اختصاص جربندي الجغرافية وشاف بام عينه معنويات المجاهدين فوووووووق والتكبير كان عنانه السماء واختلطت تكبيراته مع تكبيرات الشيخ الكبير الجاي من الخراطيم
مع تكبيرات المجاهدين فكر وقرر سريعا جربندي الذي هو الان شيخ جربندي ان لايفوت هذه السانحة التي يمكن ايضا ان يجي منها وفير المال العام والخاص فقرر بانه سيقود جموع المجاهدين وتوريت توريت يا ارض الفداء اقسم جربندي ان يجعلها ارض للعداء كان هذا هو شعار جربندي الذي عصر فيها علي روحه وقدمها الان رخيصة من اجل الدين ظاهريا ولكن باطن الامر رغبة في مزيد من الكروبات والسفسفة ورا المشية القلبو ما كان دايراها دي لكن يسوي شنو ياخي مع الشيخ الكبير الفقررررررررري ده......
|
Post: #8
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:47 AM
Parent: #7
كان يوم تحرك جربندي من المدينة هو يوم للوصايات واظهار المغتغت في ثروته التي
لملمها من مرحلته الاولي في سكة اللبع..ووصي بالحواشات والدكان الناصية القاعد فيهو عبود ود اختي ده حقي و الطاحونة الفي فريق ورا حقتي والدكان الفي فريق الاندايات تبعي...وانداية بت شلخة برضها حقتي...وابقي عليها عشرة يا ابوي لحدي ما اشوف لي صرفة مع الجهاد ده واجيكم نابل....ووب عليك يا جربندي من ناس كتيبة جاموس وكتيبة زعلان القالو بلقطو من طرف ديل...!!!!
ونعود
|
Post: #9
Title: Re: شيخ جربندي في متاهة وزنقة تاريخية خلاص.....!!!!
Author: عبداللطيف حسن علي
Date: 03-12-2009, 09:11 AM
Parent: #8
| Quote: زيت مجاهدين كف نجرف -بصل مجاهدين لب لب- رغيف مجاهدين- دمورية مجاهدين- باتات مجاهدين- موية مجاهدين....كلو ذهب ما بين جربندي افندي وشيخ (0يس) فيفتي فيفتي.... |
تتذكر يا كيكي مسرحية شكسبير ديك الفيها( صرماتي) الانتهازي بتاع تصليح احذية داك
كيف اصبح غنيا من المظاهرات ، يجري بالناس من شارع لشارع عشان يقطع الجزم بتاعتهم ويجو يصلحوها عندو
نفس الانتهازية عند واحد بعرفو..
عندو محل لتنجيد المراتب ، اكتشف انو لو انضم للدفاع الشعبي ممكن يبيع مليون مرتبة في اليوم
وفعلا الان عندو مصنع ودفارات لنقل المراتب للمعسكرات ، مش للدفاع شعبي بس
بل للجيش والشرطة والداخليات وكل مالا يخطر علي البال اضافة الي زباينه القدامي
ده الكوز ولا بلاش !!!
ـــــــــــــــــــــــــــــــــــ
بالمناسبة نحن مختلفين بشان الجنائية!
|
Post: #11
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 09:57 AM
Parent: #9
Quote: تتذكر يا كيكي مسرحية شكسبير ديك الفيها( صرماتي) الانتهازي بتاع تصليح احذية داك
كيف اصبح غنيا من المظاهرات ، يجري بالناس من شارع لشارع عشان يقطع الجزم بتاعتهم ويجو يصلحوها عندو
نفس الانتهازية عند واحد بعرفو..
عندو محل لتنجيد المراتب ، اكتشف انو لو انضم للدفاع الشعبي ممكن يبيع مليون مرتبة في اليوم
وفعلا الان عندو مصنع ودفارات لنقل المراتب للمعسكرات ، مش للدفاع شعبي بس
بل للجيش والشرطة والداخليات وكل مالا يخطر علي البال اضافة الي زباينه القدامي
ده الكوز ولا بلاش !!!
ـــــــــــــــــــــــــــــــــــ
بالمناسبة نحن مختلفين بشان الجنائية! |
هلا يا لطيف
والليلة ياخي خميسك خميسك خلينا معاك حتي لو تبيع قميصك 
ومشتاقين يا زول انت قاعد تمشي وين يازول هوووي..؟؟
والانتهازية يا عبداللطيف الواعية بتعرف تاكل وين من كتف الاشياء المفكوكة في السهلة وماعندها وجيع
والذكاء الانتهازي بعرف محل بعضي المال العام والخاص كيف...
وزولي جربندي ده حكايتو حكاية وبعد شوية ح يحير ليك كبير الشيوخ وشاعرو منشار منشار للعمار منشار نازل ومنشار طالع..
هذه هي النفس الانتهازية في ازمنة الظلام والوعي المنوم للشعوب وسطوة ابنائه الطماعين
|
Post: #13
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 10:04 AM
Parent: #9
| Quote: بالمناسبة نحن مختلفين بشان الجنائية |
اصبر لي ساكت ياعبداللطيف
عندي ليكم بوست قريبات دي اسمو...!!
توجسات ونقة اهل الديالتيك في حماية نظام الدلالايك
|
Post: #10
Title: Re: شيخ جربندي في متاهة وزنقة تاريخية خلاص.....!!!!
Author: نادر
Date: 03-12-2009, 09:13 AM
Parent: #3
| Quote: اسمها (جيبو حي)...!!!! |
هاهاها ... خميسك ممزمز، متابعين حكاويك اللذيذة دي، أدفر لي قدام وراك مأمن يا شيخنا. تكبير
|
Post: #12
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 10:01 AM
Parent: #10
| Quote: هاهاها ... خميسك ممزمز، متابعين حكاويك اللذيذة دي، أدفر لي قدام وراك مأمن يا شيخنا. تكبير |
هلا شيخ نادر
ورامين قدام مع شيخ جربندي القاعد ومنذ حادثة نسوان الجنائية يتراجف زي صحن الكاسترد
وحالفين ما نفكو الا بعد ان نري ماذا هناك في خبوراته وتاريخه والتوجسات عند توقف البقرة الحلوب
التي كانت قد سارت ولاتبالي بالرياح
|
Post: #14
Title: Re: شيخ جربندي في متاهة وزنقة تاريخية خلاص.....!!!!
Author: طارق جبريل
Date: 03-12-2009, 10:24 AM
Parent: #12
هسع عليك الله يا هندسة ما لقيت غير دفاع المريخ تشبهو بالناس ديل
مالو دفاعكم المتهالك داك
هههههههههههههههههههههه
|
Post: #15
Title: Re: شيخ جربندي في متاهة وزنقة تاريخية خلاص.....!!!!
Author: khaleel
Date: 03-12-2009, 11:04 AM
Parent: #14
كيكي
معجب بالجربندي جدا والرجل يعمل بطريقة من وجد رياحا فليغتنمها
وما تنسي حكاية زواجه من النسوان التلاتة الباقيات
عشان الراجل فحل والفحل ما عواف
|
Post: #21
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:09 PM
Parent: #15
Quote: وما تنسي حكاية زواجه من النسوان التلاتة الباقيات
عشان الراجل فحل والفحل ما عواف |
هلا ياخلي وجربندي
وياما خمج السوق لعب ماتشات من النوع البعجبك داك
فكن فالجوار ستحلو السياحة صوب مدارات جربندينو الرهيب المنشار
|
Post: #16
Title: Re: شيخ جربندي في متاهة وزنقة تاريخية خلاص.....!!!!
Author: عبداللطيف حسن علي
Date: 03-12-2009, 11:05 AM
Parent: #14
مش صاحبك داك قال عندو لابتوب رشاش وقال للجماعة تمشو وين الليلة؟
اها نحن بالعكس ، كمبيوترنا والانترنت ذاتو بقو بطء قاتل ، تجري وين الليلة
يا كيكي ، نديك عضة كلب واحدة والرد في العدد القادم!
|
Post: #23
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:21 PM
Parent: #16
Quote: مش صاحبك داك قال عندو لابتوب رشاش وقال للجماعة تمشو وين الليلة؟
اها نحن بالعكس ، كمبيوترنا والانترنت ذاتو بقو بطء قاتل ، تجري وين الليلة
يا كيكي ، نديك عضة كلب واحدة والرد في العدد القادم! |
هلا يا لطيف
وتعرف انا زااتي اكتشفت انو الكلب العضاني ده
عضاك انت قبلي..والكلام ده كلو بعد رحلة البحث عنك في ارشيف المنبر فلقيتك نقتك كثيرة ياخ
وماخليت حاجة في جامعة جوبا وكل زكريات اليسار واليمين العريض فيها..
وانا من بكرة جايب لابتوب فيهو قرنوف..وداير اتحالف مع ذات الكبك الشهيرة ديك
وح البد ليكم انت وزول كده عجوز بتاع شيوعيين في الدوحة اسمو ابي ماهيتاب وليس ابي ساندرا
في انتظارك يا وريف وماتنسي اللنك ياخي
طولنا عديل كده والكاروشة الف
|
Post: #17
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 12:11 PM
Parent: #14
Quote: هسع عليك الله يا هندسة ما لقيت غير دفاع المريخ تشبهو بالناس ديل
مالو دفاعكم المتهالك داك |
هلا يا دكترة ومشتاقين ياخي
ورجفة وجقلبة شيخ جربندي دي
قدر ما اتلفت جاي جاي مالقيت ليها شبيه الا دفاع المريخ
ولكن بقيادة ابراهيم عطا حيث الكبكبة علي اصولها
|
Post: #18
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 01:51 PM
Parent: #17
عندما وقع المتحرك الذي كان بين صفوفه جربندي مزرقنا بين كمين من الكماين التي نصبتها (كتيبة زعلان) واختلط الحابل بالنابل تحت وابل رصاص الدوشكا والقرنوف والاربجيهات (والبي تو تونتي وهاجة) لم يجد جربندي ادني طريقة من مقاومة (الياااع )والرغبة في الشتات ولكن الامر اصبح له شينا وقاسي وصعيب ..فداااااااك شيخ فلان مضروب دانة مفرطاقهو قطعة صواميل للمجاهدين تاني ما ينفع...!!!
وياهووو داااك فلان الفلاني مضروب ومفرطق الراس وكيف له ان يطلع من هذه القبضة الثمينة (حرب الكفار) الرعاديد دون عاهة مستديمة وجرح غائر يمكن ان يساعد في الايام اللاحقة في معركة لملمة الثروة وحور عين الدنيا...!!!
فخش تحت اقرب (شجرةلالوب) وادي المجاهدين ضهرو ورشا روحو واحدة طلقة سلاخية زي السم في (الرجل الشمال) وليجري سريعا صوب المعسكر بطريقة (الهرك) الشهيرة او( الشدت) راجعا الي صفوف الجرحي ومدعيا بانه ضرب في مقتل ولولا القرود الاثنين اللائي هبطا من( شجرة لالوب) مقاربة لمكان ضربه بواسطة الكفار وليحملا ه الي مكان الجرحي....!!!
وتعالت الصيحات الله اكبر الله اكبر
وليصبح ومنذ ذلك التاريخ اسم الشهرة للشيخ جربندي هو (الشيخ الشالتو القرود)..هيييييييييييع ...!!!!
|
Post: #19
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 01:55 PM
Parent: #18
وعاد جربندي موشحا بسيرة بطولات زائفة وجد لها من بين المطبلين ثوما وشمار وثلجا كاد هو ان يصدق بل عندما يجد مساحة وزمن وساحة للجاكة يردد بان القرود التي شالته قد قالت له حرم يا شيخ جربندي لوما احنا كقرود سماوية عارفين انو الدنيا لسع محتاجة ليك عشان تعمرها وتحول الارض البور البلقع الي جنة نضيرة كان شلناك يا جربندينا الي الفردوس ونعيم..
|
Post: #20
Title: Re: شيخ جربندي في متاهة وزنقة تاريخية خلاص.....!!!!
Author: حامد محمد حامد
Date: 03-12-2009, 02:05 PM
Parent: #19
كيكى ازيك
ربما حاول الجربندى ان يكون شخصا مهما بضم الميم يوما ما
من بخير
|
Post: #22
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:12 PM
Parent: #20
مشية جربندي تلك كانت هي الاولي والاخيرة فقد قرر بينه وبين نفسه وبعد ماراي من الدماء والقرنوف البفرطق البني ادميين حتت حتت والالغام التي تنبل من حيث يحتسب ولا يحتسب قرر( تاني جهاد نهيييي) ويلقوها عند الغافلين الدقانة مجرمين ديل...
وساعتها كانت اليته الي الالتفاف هو تغيير التخصص والرمي قدام والبحث عن مورد (كجمة) تاني بعيدا من مدارات حاربو واقتلو وجهزو غازي قد غزا دي....
فقرر تنويع اللعب والدخول الي عوالم البندر والرمي قدام في الخرطوم محل الطيارة بتقوم والشيخ ابودقن كبيرة بنوم...!!!
فاصبح الان بعدما كان دمورية مجاهدين لب لب في الماضي .... اصبح الان الشغل بنية تحتية...طرق وعطات لب لب... شركة اتصالات عاوزة تصديق عشان الناس تقول عبرها (الوو) جربندي جاهز موية ونور لب لب عبر تسهيلات من مكتب الوزير شخشييا
صينين عيونهم صغااااااااار عاوزين يحفروا ليهم بير بيرين في البترول جربندي جاهز موية ونور وبقشيش تقيل بكرة الصيني يجيب حفارتو ويدور حفر ..ما ضروري يلقي ليهو بترول او ما يلقي ..ولكن المهم في الامر انو جربندي ياخد
حقو كاش ويقلل النقاش
|
Post: #24
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:25 PM
Parent: #20
Quote:
ربما حاول الجربندى ان يكون شخصا مهما بضم الميم يوما ما
|
هلا ياحامد وحبابك
ومشتاقين
والجربندي البعجني فيهو طموح وحالم ووصولي بسرعة البرق لكل اشيائه ومافي قشة كده بتعتر ليهو
وجربندينا ده بعد شوية حتشوفو ذو اهمية اقليمية ودولية وخبرو بصل امريكا زاااتها
وكل الود والتقدير يا حامد
|
Post: #25
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:31 PM
Parent: #24
بيت الجالوص الكان في مدينته تحول اليوم الي قصر منيف في حي من احياء الخرطوم الترطيبة وجربندي يحصد ثمار جهاده
ووااااااااااااره معاه وره تقيلة...
والتلفزيون شغال وصرح المجاهد الشهيد الذي يمشي بيننا جربندي بان الامور كيت كيت
وزار الوزير المنطقة الفلانية العلانية وكان في صحبته المجاهد جربندي .......
وكانت زوجته الرابعة احدي بنات الاسر التي كابسها جربندي في سوق السيخ والاسمنت ..مجاهدة زينة وحجابها وارد ايران
ولكنها تفتيحة تمارس التجارة ما بين السعودية ودبي ولندن كمان....يا وجععععع وكلا بدولارات جربندي التي هطلت عليه السماء دولارا يورو وفرنكا وين وقروشات وارد شنغهاي
|
Post: #26
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:41 PM
Parent: #25
واما زوجته نفيسة ام العيال فلاتزال في مكانها القديم في ذلك البيت الذي اهلته واخرجته ضربات خطاوي جربندي الاولي من الجالوص الي مدارات الطوب الاحمر والصالون الوثير تمارس مباصرة معيشة اولادها من الدكان والانداية التي تركها
جربندي دون ان يحاسب صاحبتها حساب منكر ونكير كما ا كان في ايامه الاولي تلك وهو حفتانا يحاسب حتي علي شدة اليوم واليوم التالي......وحتي المشك كان له فيه رايا عندما يباع الي غنم مدير المدرسة....!!!
جربندي في كل صولاته الجهادية والقروش التي نزلت عليه كالامطار والمقيلة مع الوزير الفلاني والسفر مع الشيخ الفلاني لموتمر نصرة فلسطين في بلاد وين كده ماعارف..وموتمر تطوير وتنمية البنية التحتية في حزام ماخلف الصحاري العربية والاسلامية ووصل جربندي بملحسته حتي ابواب (ابا كبير) شخشيا الذي اعجبه سخاء ومجاهدات جربندي وصار مصدر ثقة ....ومراسيل دولية علي التقيل...
|
Post: #27
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 02:49 PM
Parent: #26
يا جربندي بالله تعال امشي لينا البوسنة وشوف لينا حكاية الهرسك دي شنووو..!!!
ياجربندي بالله ناس جزر القمر ديل بالله دايرين نعمل معاهم تكامل اسلامي افريقي
يا جربندي بالله بكرة من الصباح دغش تمشي لينا امريكا تشوف فلان فرخات ده وتعمل لينا الية عمل اسلامي افروامريكاني
يا جربندي بالله شوف معاك الهند دي حكايتها شنو من باكستان وارفع لينا تقرير...
يارجربندي بالله شوف ي لينا ناس غزة واريحة ديل حكايتها شنو من ناس رام الله..!!
ليصبح الشيخ جرنبدي رسولا للمحبة و مبشرا بالاسلام في ربوع العالم والقصة مشت معاه مشية السنين ما بين سفرة وسفرة كان هناك (عطاء) وكجمة كجمتين في انتظار جربندي الشالتو القرود... وفي سفراته تلك عادت الي حليمته عادته القديمة التي لم يستطع مقاومتها ليلا في السودان ونهار جهارا في سفراته الي كل اركان العالم المختلفة فقد زار جربندي معظم دول العالم
وان رايت ليلا في احدي المراقص الملحقة بالفندق رجلا يرتدي بنطلونا من الجينز و(فانلة كت) ويراقص فتاة غراء فرعاء شحمانا هو جسمها وملتقص معها التصاق ماكوكي لصقوي امريكاني فان ذلك الرجل هو شيخنا جربندي يمارس الرقص الرسالي...!!!
|
Post: #28
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 03:02 PM
Parent: #27
هذا ماكان في شان الخارج واما داخليا فان جربندي ما بتفارق لياليه نصيته الشهيرة تلك التي الهمته موضوع الانتهاز عبر الدفاع الشعبي في ايامه الاولي في فريق ورا..وكانت كل صباحاته الخرطومية لابد لها ان تبداء بسيجارة من الصنف الذي صار اكثر جودة ومقدرة علي التسطيل يحرص جربندي ان تكون بكرت وسط عطور وارياح نفاذة استطاع جلبها من بلاد برة,,,...!!!
جربندي الان مشاريع في الدمازين الطير ياكل فيها سنة ونص ويخلي العيش راقد هبطرش
جربندي مشاريع في القضارف وعصارة زيت في النهود
جربندي مصنع اثاثات في سنجة
جربندي شركة جربندي الاسلامية للاستيراد والتصدير الاسلامي
سفريات جربندي الاسلامية الخرطوم –كوستي وبالعكس
مجمع جربندي السكني الاسلامي يرحب بكم واشتري شقة واحصل علي لابتوب وسيارة كرسيدا مجانا
ونعود
|
Post: #29
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 03:18 PM
Parent: #28
كل هذه السحابات والاموال والاملاك المنتشرة في ربوع السودان المختلفة والقروش الهبطرش التي رقدت في بنوك بلاد جووه وبره...بكل هذا الارث الكبير والثروة المطر استقبل جربندي افندي
نضمي نسوان الجنائية الاثنين( الشمطانات الغلف) هكذا ردد جربندي عندما راي ذلك بدايات الموتمر الذي نضمت فيهو النسوان الاثنين ديل بسيرة قبض الريس....!!!
صهيونيات عذبات مقاطيع طاري يهوديات كلبيات هي النغمة التي كانت يرددها جربندي افندي
وحس بحسه الامني وشوية الثقافة الدولية التي لقطها من مباراته للوزير الفلاني والرسالي علان العلاني بان الموضوع ده كبير خلاص وانو الخواجة ابن اللذينة الارجتيني الصهيوني بتاع النسوان اوكمابو ما داير يجيبها البر....وحيقبض زولنا ده حيقبضوا....
ويصبح كجربندي في راسه ريشة لبع وضرب قروش الميري في امر ضيق ...!!!
|
Post: #30
Title: Re: شيخ جربندي في متاهة وزنقة تاريخية خلاص.....!!!!
Author: سيف النصر محي الدين محمد أحمد
Date: 03-12-2009, 03:46 PM
Parent: #29
مع شيخ جربندي في محنته.
|
Post: #31
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 05:16 PM
Parent: #30
| Quote: مع شيخ جربندي في محنته. |
هلا يا دكتور
وحبابك في مدارات شيخ جربندي افندي ومحنته الباينة بينونة كبري
وزومة جربندي مضايقة بالحيل مع ابوحواجب الما داير يجيبها البر ده
|
Post: #32
Title: Re: شيخ جربندي في متاهة وزنقة تاريخية خلاص.....!!!!
Author: حامد محمد حامد
Date: 03-12-2009, 05:40 PM
Parent: #31
| Quote: وان رايت ليلا في احدي المراقص الملحقة بالفندق رجلا يرتدي بنطلونا من الجينز و(فانلة كت) ويراقص فتاة غراء فرعاء شحمانا هو جسمها وملتقص معها التصاق ماكوكي لصقوي امريكاني فان ذلك الرجل هو شيخنا جربندي يمارس الرقص الرسالي...!!! |
ياخى بالغت فى دى
والله انه متمكن متمكن ( كما فى مسرحية الدخول بالملابس الرسمية)
|
Post: #33
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 06:08 PM
Parent: #32
Quote: ياخى بالغت فى دى
والله انه متمكن متمكن ( كما فى مسرحية الدخول بالملابس الرسمية) |
هلا حامد
وابو دقن متمكن اووووووووووي
ويودي الرقص الايقاعي والاسلو دانص بطريقة كثير مميزة
...........
حكي لي احد الاصدقاء الكثيري التجوال في الدول الافريقية وعواصمها المختلفة بحكم عمله
بانه في احدي العواصم التقي بسوداني دقنو سلبة النوع الزنداني داك...
اها صحبي قال تاني يوم بالمساء استحم نضيف وغشا النايت كلوب بتاع الفندق في الطابق الارضي
وشاف ليك صاحبنا ابو دقن ده حاضن حضنة شديدة خلاص وبرقص (اسلو دانص)بكل فنون ورشاقة وافريقية مميزة
واها لم كحل صحبي قام ابو دقن عمل ليهو كدا
|
Post: #34
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 06:25 PM
Parent: #33
وتتواصل تداعيات جربندي في غضبته الكبري علي الارجتيني الممسوخ سليل الامبريالية العالمية الكوندليز رايسية...الكولن باولوية...!!!
وهو يردد
معقولة....!!!
معقولة ياربي
بكرة(ابا كبير) يشيلو لاهاي وضهرنا كجربندية يكون مكشوف ويجونا ناس اعتقد وافتكر والمال العام والثراء الحرام ومن اين لك ذلك وناس كذلك حيث انو ايضا..ويقلعو مني المال والبنون زينة الحياة الدنيا....
معقولة يا ناس...!!!!
لعععع يا زول والف لععععععع..!!!
انا جربندي (الشالتو قرود) حرم اقيف ديك احمر وجن احمر وحرم اوكمابو ده الا الاقيهو عريان ميطي
والرهيفة تنقد وحرم يفرزونا بالشورتات والمجتمع الدولي يقول ده شورت اوكمابو وده شورت جربندي
ونعود
ولكن بعد الفاصل
|
Post: #35
Title: Re: شيخ جربندي في متاهة وزنقة تاريخية خلاص.....!!!!
Author: sami Alzubair
Date: 03-12-2009, 06:34 PM
Parent: #33
كيكي يا مبدع
سلامات ياخ
| Quote: وليصبح ومنذ ذلك التاريخ اسم الشهرة للشيخ جربندي هو (الشيخ الشالتو القرود)..هيييييييييييع ...!!!! |
لووول.. في دي بالغت عديل
ذكرتني القصة بتاعت عمك غفير مخزن زاد المجاهد
ايام انتشار اخبارية الملايكة نجدت الناس الاتقطعو في الطريق لي (يرول)
وقالو كشحتهم بي لوري تعيينات جامد عشان ترفع الروح المعنوية للمقاتلين
عمك ما صدق
بالليل مشي جاب ليهو لوري ونقل المخزن عدمو الكيلة
الجماعة جوهو تاني يوم.. يا زول الدقيق وين؟
قال ليهم والله انا لي هسي برجف من الخوف والرهبة
الملائكة الليل كلو تنقل في الدقيق وتودي الجنوب
____
واصل متابعنك.. مع كامل التضامن مع شيخ جربندي في زنقته
|
Post: #36
Title: Re: شيخ جربندي في متاهة وزنقة تاريخية خلاص.....!!!!
Author: khaleel
Date: 03-12-2009, 07:40 PM
Parent: #35
يا كيكي
ما تنسي جربندي لما الجماعة قال ليهو يصلو بيهم المغرب
واتطرطش طرطشة شديدة
|
Post: #37
Title: Re: شيخ جربندي في متاهة وزنقة تاريخية خلاص.....!!!!
Author: Safia Mohamed
Date: 03-12-2009, 08:23 PM
Parent: #36
مت من الضحك
اها وتاني
تجياتي
|
Post: #40
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-13-2009, 07:30 AM
Parent: #37
Quote: مت من الضحك
اها وتاني
|
هلا يادكترة
وحبابك في سيرة جرنبدي
وكويس تضحكي في صحبي جربندي وهو مزنوق زنقة بوبي في طاحونة
ليه كده ياناس..؟؟؟ هههه
|
Post: #39
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-13-2009, 07:24 AM
Parent: #36
Quote: ما تنسي جربندي لما الجماعة قال ليهو يصلو بيهم المغرب
واتطرطش طرطشة شديدة |
هلا ياخلي
وجربندي كان جنو وجن (يامولانا صلي بينا دي) وما بدورها كلو كلو
اها اليوم داك المجاهدين اصرو اصرار عجيب انو جربندي يصلي بيهم وقدر ما حاول يتزاوغ جاي وجاي
الجماعة اصرو...
ولقي جربندي نفسه فيس تو فيس امام مهمة قيادة الصلاة
واتجهجه جهجهة ما فضل ليهو الا يعمل حكاية (ياعبد اقراء ديك)...!!!
المهم بعد مباصرة شديد قدر يتخارج منهم بكم سجود سهو كده بعضهم اعاد صلاته
والجاكة بتاعتو انو دي صلاة الشيعي وانه شيعي
|
Post: #38
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-12-2009, 08:27 PM
Parent: #35
Quote: بالليل مشي جاب ليهو لوري ونقل المخزن عدمو الكيلة
الجماعة جوهو تاني يوم.. يا زول الدقيق وين؟
قال ليهم والله انا لي هسي برجف من الخوف والرهبة
الملائكة الليل كلو تنقل في الدقيق وتودي الجنوب |
هلا يا سامي وحبابك ياخي
وعمك بتاع المخازن لو لم فيهو صاحبنا جربندي ده
يدور معاهو ون تو حرم بيبتو ورومايو ما يقدروا يلعبو زيو...هههه
ويوضبو ليك المخازن والمهمات دي وضيبة السنين..
...
تسلم يا سامي
ومبدع دي ياخي بتجيب هواء مع الرهط والباقيين
حسع يجو يرشونا جمكسين تقيل بجاااي هههه
وكل الود ياخي
|
Post: #41
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-13-2009, 08:02 AM
Parent: #38
جربندي في تداعياته وحمي عاصفة اوكمابو واعصار الجنائية ذهبت به الافكار لمحلات بعيدة خلاص...
ورغم حماسه العالي واستعداده الذي طل لحماية (ابا كبير) لدرجة تهديده بارجاع الايام القديمة واستعداده
لطهورة (اوكمابو) علي طريقة سلاطين باشا عند طهره فتية ود تورشين...الا انه في لحظات خلوته من نفسه تزوره سحابات المخارجة من الدقانة ديل خلاص...ويهتف بصوت متشنج عالي بينه وبين روحه يحدثها....
تاني داير منهم الدقانة ديل شنوووو ياجربندي
...عرس...ياكاا العرست اربعة
عمرة ..مشيتها اربعين مرة..
عرس عرست من طرف الدقن ..خمسة نسوان كل واحدة تقول للقمر زح كده...حمرا وحلا...شحم ولحم تقيل
سفر...الدنيا كلها طاولتها بكراع كلب..ولاهاي البكوركو فيها دي زااتها اتجدعت ياجربندي في شوارعها ورقصت
في فنادقها كده لم الله غفر ليك...
قروش..هيييييييييع..حرم النار ماتاكلها..
ونعود
|
Post: #42
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-13-2009, 05:09 PM
Parent: #41
جربندي
|
Post: #43
Title: Re: شيخ جربندي في متاهة وزنقة تاريخية خلاص.....!!!!
Author: شول اشوانق دينق
Date: 03-13-2009, 05:34 PM
Parent: #42
يا كيكى جربندى ده نجطتو نجاض السنين ياخ
مباااااااااااااالغة طبعاً
هههههههههههههههههههه
|
Post: #44
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-13-2009, 05:56 PM
Parent: #43
Quote: يا كيكى جربندى ده نجطتو نجاض السنين ياخ
|
هلا يا شول وحبابك ياخي
و حالتي ابو الجا ده اشتغلنا معاهو ابنصات خفيفة..
لانو قلنا الراجل قلبو مخلوع ومجقلب وباكاتو مجهجهة فما زودنا ليهو من العيار..
غايتو حنديهو اسبوع لو ما عمل (هاند اب) تاني حنجي نديهو في التقيل وننجضو نجاض قبورة
وتحياتي يافردة
|
Post: #45
Title: Re: شيخ جربندي في متاهة وزنقة تاريخية خلاص.....!!!!
Author: عبدالكريم الامين احمد
Date: 03-14-2009, 02:47 PM
Parent: #44
قليلا من سيرة جربندي لا يضر للاهاي قضية
|
|