يــــاعزام ....أعمل حسابك

يــــاعزام ....أعمل حسابك


03-06-2009, 08:41 AM


  » http://sudaneseonline.com/cgi-bin/sdb/2bb.cgi?seq=msg&board=190&msg=1236325313&rn=87

Post: #1
Title: يــــاعزام ....أعمل حسابك
Author: SHIBKA
Date: 03-06-2009, 08:41 AM
Parent: #0

لانو لو مشينا لبت ابراهيم واشتكيناك ليها
ما بتكسب عافية معاها لكن حقنا بجينا كاااااااااااامل

اخير ليك ولي شنو يا استاذ عبد الاله؟؟؟

بالله ما توصلنا للحتة دي.....
Post: #2
Title: Re: يــــاعزام ....أعمل حسابك
Author: معتز القريش
Date: 03-06-2009, 09:13 AM
Parent: #1

بسم الله الرحمن الرحيم
في شنو يا شبكة
.
.
.
أي حاجة ولا بت ابراهيم دي
حلوها ودي أحسن
Post: #3
Title: Re: يــــاعزام ....أعمل حسابك
Author: عبدالأله زمراوي
Date: 03-06-2009, 09:22 AM
Parent: #2

Quote:
لانو لو مشينا لبت ابراهيم واشتكيناك ليها
ما بتكسب عافية معاها لكن حقنا بجينا كاااااااااااامل

اخير ليك ولي شنو يا استاذ عبد الاله؟؟؟

بالله ما توصلنا للحتة دي.....


فعلا يا شبكة وصّلنا وإنتهى، وعايزين
نغقد ليه محاكمة (كاربة) وتمثلي فيها
الإدعاء بس ما تبقي لينا زي لويس
اوكامبو ويحق للمتهم الإستعانة بمحام
أو صديق...!

ياما وقع عزّام!

صباح الخير يا شبكة..
Post: #4
Title: Re: يــــاعزام ....أعمل حسابك
Author: حامد محمد حامد
Date: 03-06-2009, 09:34 AM
Parent: #3

فى شنو يا جماعة

غايتو وفى تسرع كدة طالما فيها شبكة انا متضامن مع عزام

سلام يا عبد الالة
Post: #7
Title: Re: يــــاعزام ....أعمل حسابك
Author: SHIBKA
Date: 03-06-2009, 09:40 AM
Parent: #4

Quote: انا متضامن مع عزام


انت زاتك داير ليك شبكة
كل يوم في بلد

تضامنكم ما بحلكم





صباح الخيرات
Post: #6
Title: Re: يــــاعزام ....أعمل حسابك
Author: SHIBKA
Date: 03-06-2009, 09:39 AM
Parent: #3

Quote: ويحق للمتهم الإستعانة بمحام
أو صديق...!


ياربي بنفع(وش مستنكر)
ما اظن
الا بت ابراهيم دي تخش



Quote: صباح الخير يا شبكة..

صباحك هنا وسرور يا استاذنا
Post: #5
Title: Re: يــــاعزام ....أعمل حسابك
Author: SHIBKA
Date: 03-06-2009, 09:37 AM
Parent: #2

Quote: أي حاجة ولا بت ابراهيم دي
حلوها ودي أحسن


معتز
عملنا لجنة لحل المشكلة
وانبثقت منها لجنة وانبثقت لجان وما نفعت
بعد دا مافي الا بت ابراهيم (القوى العظمى)
Post: #8
Title: Re: يــــاعزام ....أعمل حسابك
Author: SHIBKA
Date: 03-06-2009, 09:42 AM
Parent: #5

انتو منبركم دا مالو ما بنظم كل مشاركة وتحتها ردها....
Post: #9
Title: Re: يــــاعزام ....أعمل حسابك
Author: ABUHUSSEIN
Date: 03-06-2009, 09:43 AM
Parent: #5

و الله يا عزام فعلاً أعمل حسابك

البوقعك في الشبك شنو ؟؟؟؟

تضامننا معك


تحياتي
Post: #10
Title: Re: يــــاعزام ....أعمل حسابك
Author: SHIBKA
Date: 03-06-2009, 09:53 AM
Parent: #9

Quote: تضامننا معك


انت زاااااااتك الشبك جاياك
غايب ليك كم يوم من الحصص بتاعة الدكتور

جيت برررررراك للشبك
Post: #11
Title: Re: يــــاعزام ....أعمل حسابك
Author: عزام حسن فرح
Date: 03-06-2009, 10:17 AM
Parent: #10

إن وقع الصقُر كُتْر البابِت عيب ...
بِت إبراهيم حابساني وملاني الشيب ...
يا الله تكوني لي <فُلانة> في جنة غيب ...

الليلة (شِبكة) ومعاها أفوكاتو ...
عقدو النِيه وبِالمضره إتفاتو ...
يِمْهَ هددني قال معاهو شُكاتو ...
Post: #12
Title: Re: يــــاعزام ....أعمل حسابك
Author: SHIBKA
Date: 03-06-2009, 11:14 AM
Parent: #11

Quote: بِت إبراهيم حابساني وملاني الشيب ...


من عمايلك


Quote: يا الله تكوني لي <فُلانة> في جنة غيب ...


دي تكون من بنات الحور

Quote: الليلة (شِبكة) ومعاها أفوكاتو ...
عقدو النِيه وبِالمضره إتفاتو ...


البادي اظلم
Post: #13
Title: Re: يــــاعزام ....أعمل حسابك
Author: شمس الدين ساتى
Date: 03-06-2009, 11:18 AM
Parent: #11

إن شاء الله تكون حابساك لمن تموت

مافاي تضامن

حامد كيفك... ماتتضامن مع الفاطي دا
Post: #15
Title: Re: يــــاعزام ....أعمل حسابك
Author: SHIBKA
Date: 03-06-2009, 11:23 AM
Parent: #13

Quote: مافاي تضامن

حامد كيفك... ماتتضامن مع الفاطي دا


يحيا العدل
Post: #14
Title: Re: يــــاعزام ....أعمل حسابك
Author: شمس الدين ساتى
Date: 03-06-2009, 11:18 AM
Parent: #11

إن شاء الله تكون حابساك لمن تموت

مافاي تضامن

حامد كيفك... ماتتضامن مع الفاطي دا
Post: #16
Title: Re: يــــاعزام ....أعمل حسابك
Author: عزام حسن فرح
Date: 03-06-2009, 11:58 AM
Parent: #14

الليلة المِحن كِترت علي أورادا ...
قلبي مِن جفاهو أصبح مِتِل الحديدو بٌرادا ...
يِمْهَ ما تنسيني عُقب الصلا وأورادا ...
Post: #17
Title: Re: يــــاعزام ....أعمل حسابك
Author: حامد محمد حامد
Date: 03-06-2009, 01:39 PM
Parent: #16

يا عزام اخوى شد الضراع وشوف مع الشبك حلول

ما بسمع كلام شمس الدين ود عمتى وبقيف معاك ضد الشبك لامن تزول

شبكة تعالى لى بهناك انا نويت ازح الاستاذ بتاعكم دة واستلم الحصص
Post: #19
Title: Re: يــــاعزام ....أعمل حسابك
Author: SHIBKA
Date: 03-06-2009, 01:51 PM
Parent: #17

Quote: ما بسمع كلام شمس الدين ود عمتى وبقيف معاك ضد الشبك لامن تزول


حامد

بلا تقيف معاهو الشبك جاياك....
Quote:


شبكة تعالى لى بهناك انا نويت ازح الاستاذ بتاعكم دة واستلم الحصص


ماعندك خبر انو نقلوان للفصل التاني؟؟؟؟
Post: #18
Title: Re: يــــاعزام ....أعمل حسابك
Author: SHIBKA
Date: 03-06-2009, 01:45 PM
Parent: #16

Quote: الليلة المِحن كِترت علي أورادا ...
قلبي مِن جفاهو أصبح مِتِل الحديدو بٌرادا ...
يِمْهَ ما تنسيني عُقب الصلا وأورادا ...


هسة كان بتمشي تصلي جماعة مع الدياشة ما كان بقى عليكجنس دا...
Post: #20
Title: Re: يــــاعزام ....أعمل حسابك
Author: معتز القريش
Date: 03-06-2009, 03:45 PM
Parent: #18

يا عزام يا أخوي
يشهد الله كنت عاوز (أضّامن معاك)
لكن بصراحة انت غلطان
وتستاهل اللي يحصل لك
وان شاء الله بت ابراهيم تسلخ جلد راسك
.
.
(وكت) ما بتقدر متشبك مالك مع شبكة
Post: #21
Title: Re: يــــاعزام ....أعمل حسابك
Author: SHIBKA
Date: 03-06-2009, 04:18 PM
Parent: #20

Quote: (وكت) ما بتقدر متشبك مالك مع شبكة


النبي يامعتز انت مجرب الشبك
كلمو عليك الله
Post: #22
Title: Re: يــــاعزام ....أعمل حسابك
Author: عبدالأله زمراوي
Date: 03-06-2009, 04:46 PM
Parent: #21

شبكة...

يستاهل وما تدولو فرقة...
وعليه إحضار شهوده في الجلسة،
إن كان له شهود...

المقدور إن وقع
ما بنفع الجقليب...

برايا سويتا في نفسي..
Post: #23
Title: Re: يــــاعزام ....أعمل حسابك
Author: SHIBKA
Date: 03-06-2009, 05:13 PM
Parent: #22

يا استاذ عبد الأله
عزام دا من النهار ما جا علينا
يعني كلامنا دا ما هاميهو.....
Post: #24
Title: Re: يــــاعزام ....أعمل حسابك
Author: محمد الجيلى
Date: 03-06-2009, 05:24 PM
Parent: #23

عزام يا اخويّ الليله وقعتكـ بطّاله ...


الزولـ البقع فى شِبكهـ دى أصعب حاله ...


متضامن معاكـ بى قلبى إلاّ لسانى ماقالاّ ...


أقوم أنشبكـ فى شبكه أبقى مسوّد حالهـ ...
Post: #25
Title: Re: يــــاعزام ....أعمل حسابك
Author: SHIBKA
Date: 03-06-2009, 05:44 PM
Parent: #24

Quote: عزام يا اخويّ الليله وقعتكـ بطّاله ...


الزولـ البقع فى شِبكهـ دى أصعب حاله ...


متضامن معاكـ بى قلبى إلاّ لسانى ماقالاّ ...


أقوم أنشبكـ فى شبكه أبقى مسوّد حالهـ ...


المشكلة يامحمد
هو ما معترف
هو لو اعترف بيسقط عنه نص التهمة
Post: #26
Title: Re: يــــاعزام ....أعمل حسابك
Author: عزام حسن فرح
Date: 03-06-2009, 05:47 PM
Parent: #24

صادني وكُتْ بدور خاطَري أصطادو ...
قالي زميل أقيف ليهو قُصادو ...
يِمَه حِليني مِن الشِبكة الحاره وطاطو ...
Post: #27
Title: Re: يــــاعزام ....أعمل حسابك
Author: SHIBKA
Date: 03-06-2009, 05:51 PM
Parent: #26

Quote: صادني وكُتْ بدور خاطَري أصطادو ...
قالي زميل أقيف ليهو قُصادو ...
يِمَه حِليني مِن الشِبكة الحاره وطاطو ...




الشبكة ما بتتحلا الا بلجنة
خلينا نفتش اعضاء المحكمة الو بعدين نشوف اعضاء اللجنة
Post: #28
Title: Re: يــــاعزام ....أعمل حسابك
Author: SHIBKA
Date: 03-07-2009, 11:21 AM
Parent: #27

*
Post: #29
Title: Re: يــــاعزام ....أعمل حسابك
Author: الفاتح شلبي
Date: 03-07-2009, 12:41 PM
Parent: #28

عزام غلطان ...
على قول اهلنا " أوسو ... أدولوا فى راسه"
Post: #30
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 01:25 PM
Parent: #29

إتلمو العرب علي ورُطانتو ...
أريتني معاي أخوي ورسانتو ...
يِمَه ود شلبي قال بِبطانتو ...
Post: #31
Title: Re: يــــاعزام ....أعمل حسابك
Author: الفاتح شلبي
Date: 03-07-2009, 01:55 PM
Parent: #30

Quote: يِمَه ود شلبي قال بِبطانتو ...


عزام مالك علينا ... نحن غير الناطقين بها وكتاباتنا دي كلها مجاملات, بطل حركات وترجم لي ببطانتو دي شنو انشاء الله ما تكون عندها علاقة ببطانية (وجه ضاحك)

وبعدين كلامك الجزء الاول عندهـ علاقة بحديث الطيب صالح ول عبد الطيب واحد فيهم غايتو قالها فى جامعة الخرطوم لمن سقطوهو فى الانتخابات ... اتكالبو علي العرب والعجم ... موش؟
Post: #32
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 01:57 PM
Parent: #31

ود شلبي ...

Quote: وترجم لي ببطانتو


فضحتنا في القِبل الأربعة ...
بِطانتو = بُطانتِهِ أي إلِهِ أي أهلِهِ أي عشيرتِهِ التي تأويه
Post: #33
Title: Re: يــــاعزام ....أعمل حسابك
Author: الفاتح شلبي
Date: 03-07-2009, 02:04 PM
Parent: #32

Quote: فضحتنا في القِبل الأربعة ...
بِطانتو = بُطانتِهِ أي إلِهِ أي أهلِهِ أي عشيرتِهِ التي تأويه


فضيحة شنو يا عزام ... مالك الليلة ... أقوم انا اكتب كمان بلغتي وأفضحهم ؟

شكراً للترجمة والله جادي معاك ... نحن عرفنا العربي فى المدرسة

لكن كلمة بطانة الصغيرة والله ما هينة بتحمل معنى عميق جداً


اون بالله شرفين تو هدو لانقو ؟
Post: #34
Title: Re: يــــاعزام ....أعمل حسابك
Author: شمس الدين ساتى
Date: 03-07-2009, 02:06 PM
Parent: #32

كان المحكمة ولا اللجن داير أكون عضو فيها

عشان أفش الجواي .. أرشح نفسي لرئاســـة......

ياتا ياعزام البتودي لي لاهاي ولا أخير أكون في لجنة

المحاكمة ...

لا للسدود
Post: #35
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 02:22 PM
Parent: #34

ود شلبي ...

Quote: وبعدين كلامك الجزء الاول عندهـ علاقة بحديث الطيب صالح
ول عبد الطيب واحد فيهم غايتو قالها فى جامعة الخرطوم لمن
سقطوهو فى الانتخابات ... اتكالبو علي العرب والعجم ... موش؟


جرت إنتِخابات لِرِئاسة جامِعة الخُرطوم والمُرشحين كان
الدِكتور الطَيِب عبدالله × الدِكتور عُمر مُحمد عُثمان (خالي)
وفاز الثاني وهجاهو الأول بِقصيدة (99) بَيت جُلُها تتحدث
عن كَيف لِعجمي (لِكه) أن يترأس منارة كجامِعة الخُرطوم ...

شُفت كيف يا ود شلبي ... لِسه بعد أكثر مِن 30 سنة كتب الصحفي
الخضر هارون أحمد عن الدِكتور عبدالله الطَيِب:

وعدنا أن نفرد هذه الحلقة أو حيزا مقدرا منها للحديث عن إسهامات الدكتور عبد الله الطيب رحمه الله فى غير ميادين اللغة والأدب ونشير إلى ما هو معلوم من ذلك إشارات عابرة مثل تفسيره للذكر الحكيم على مدى سنوات عدة عبر إذاعة امدرمان فى برنامج دراسات فى القرآن الكريم وكذلك إلى أحاديث فى السيرة والأخبار قدمها تلفزيون السودان . ونفصل بعض التفصيل فى نظريته القائلة إن الحبشة التى هاجر إليها المسلمون الأوائل بتوجيه من الرسول صلى الله عليه وسلم "لأن بها ملك لا يظلم عنده أحد" لم تكن سوى بلاد النوبة أو السودان . وكنت قد سمعت بنظريته تلك فى عقد الثمانينات ثم اطلعت على رسالتين باللغتين العربية والإنجليزية بعث بهما للأخ السفير الدكتور حسن عابدين اثناء عملنا معا فى سفارة السودان فى الجزائر وقد زودنى الدكتور مشكورا بنسخة من كليتهما . وفى حوالى منتصف التسعينات زودنى الاخوة فى سفارة السودان بالمملكة المغربية بشريط فيديو سجلت فيه جلسة فى مقر إقامة سفيرنا هناك وكان يومئذ الأخ الزميل السفير صديق أبو عاقلة فى شهر رمضان لتلك السنة حيث كان الراحل رحمه الله مداوما على حضور الجلسات الحسنية التى كان يدعو لها الملك الحسن الثانى رحمه الله كل عم فى رمضان عددا من العلماء من مختلف انحاء الدنيا .
وقد تحدث الراحل رحمه الله بإسهاب وتفصيل عن نظريته تلك . أشار فى البدء إلى أنه عندما ذهب إلى الحج لأول مرة فى بداية ستينات القرن الماضى سأله موظف الجوازات فى المدينة المنورة عن موطنه فى السودان فذكر الدامر فدون الرجل فى دفتره وهو يقول بصوت مسموع "حبش" ورجح أن يكون هذا الفهم قد تواتر عبر القرون ثم أشار إلى "برك الغماد" التى كان يرددها العرب وقال إنها لم تكن مكانا بعينه وإنما هى كناية عن المكان البعيد جدا الذى يصعب الوصول إليه ولعله قال هى مثل قولنا "سقط لقط!" ثم ذكر أن كتب السيرة ذكرت أن الصحابة بعد أن عبروا البحر الأحمر على ظهر السفن عبروا نهرا داخل الحبشه إلى مقر النجاشى وذكر أنه استفسر أساتذة الجغرافيا والجيولوجيا البريطانيين الذين زاملوه فى جامعة الخرطوم فأكدوا له عدم وجود أى نهر فى بلاد أكسوم فى أثيوبيا فى ذلك الوقت فى المنطقة الممتدة بين تلك المملكة وبين البحر الأحمر. ومعلوم أن منطقة أديس أبابا هذه لم تعرف فى ذلك الوقت. ورجح من ذلك أن النهر الذى عبروه إلى حيث يقيم النجاشى هو أما نهر عطبرة أو نهر النيل حيث ممالك النوبة فى ذلك الوقت واسترسل فى ذكر النهر مشيرا إلى أن الصحابة قاتلوا مع النجاشى خصوما له وأنهمإضطروا إلى إجتياز النهر واستخدام بعضهم القرب فى ذلك وأشار إلى أشعار فى ذلك حفظتها كتب السير وإلى غرق رجل منهم لا يحضرنى الساعة اسمه ولم احفظ تلك الأبيات حتى أوردها فى هذا المقام والشريط موجود على كل حال . وذكر الراحل رحمه الله أنه قدم بحثا فى هذا الموضوع وأن المؤرخ السعودى المعروف "حمد الجاسر" رحمه الله قد دونه فيما كان يحفظ من المدونات .
وفى يوم الأثنين الثامن من سبتمبر عام 1997 وبدعوة كريمة من الأخ الصديق الدكتور القاضى إبراهيم أحمد عثمان القاضى بالمحكمة العليا كنت ضمن حضور محاضرة نظمها "دار القضاة" فى الخرطوم قدمها الدكتور عبد الله الطيب بعنوان "سير وأخبار القضاة" واكتظت القاعة الفاخرة فى دار القضاة بأهل القانون: أهل القضاء الجالس والواقف وأساتذة القانون وسواهم . واستهل الدكتور عبد الله الطيب كلمته بشكر من قدمه على ثنائه الحسن وأبى ألا أن ينثر علما حتى فى سياق شكره على حسن الثناء فقال: "الثناء معناه مطلق القول: ثناء حسن وثناء سئ فيقال أثنى عليه خيرا وأثنى عليه شرا" ثم أشار إلى أن والد الأستاذ محمود محمد شاكر الأديب المعروف صاحب كتاب "أباطيل وأسمار" القاضى محمد شاكر كان أول قاضى للقضاة فى السودان . كان ذلك عام 1908 . ثم أفاض بعد ذلك فى الحديث عن تأثير الشريعة الإسلامية على تطور القوانين فى أوروبا فأشار أولا إلى تأثيرها على القانون الإنجليزى العام English common Law وأكد أن نظام المحلفين المعمول به الأن فى بريطانيا Jury Trials مأخوذ من نظام عمل به المسلمون فى الأندلس ثم فى المغرب بعد ذلك ، يعرف بنظام اللفيف وهم اثنا عشر شخصا يشيرون على القاضى وهو نظام ذكر أنه فى الفقه المالكى. وقال إن المصادر الأروبية سكتت عن ذلك ربما عن عمد غمطا لحق المسلمين فى تعليمهم ذلك وذكرت خطأ أنه من إختراع هنرى الثانى وقال إن هنرى الثانى درس فى جامعة بولونيا ثم رحل إلى اسبانيا حيث درس على كبار اساتذة العربية هناك . وقال إن نظام السوابق أو Cases مأخوذ ايضا من "قضايا النوازل" الذى ألف فيه الأندلسيون كثيرا . وقال إن ذلك الأثر ظل ممتدا لوقت طويل وقال إنه مما لاشك فيه مطلقا أن مدونة نابليون Napoleon Code وهى إحدى مكونات القوانين الأوربية الحديثة أخذت قسطا وافرا من "مدونة سحنون الكبرى" وهى من مدونات الفقه المالكى وأورد ماذكره جان جاك روسو من ان المسلمين قد علموهم حتى آداب العلاقات الجنسية . وأن دافيد هيوم أخذ فكرة انكار السببية من الإمام الغزالى .
قال ثم إضطرد هذا التأثير أذ أخذ المذهب الأرثوذكسى المسيحى فى شرق أوروبا الكثير من الشريعة الإسلامية وقوانينها عبر الإحتكاك بالعثمانيين . وقال إن صحافيا أروبيا زار تركيا فى القرن التاسع عشر فتعجب من وجود قضاة سود ومحتسبين إذ لم يكن ذلك متصورا فى أروبا .
ثم ذكر الأثر العام للثقافة العربية الإسلامية على الأداب والفنون الأوربية فأشار إلى ماذهب إليه كاتب اسبانى إلى أثر المدائح النبوية مثل "البردة" و"الهمزية" ورسالة الغفران للمعرى وحديث الإسراء على (دانتى) و(جورج هيربر). ثم فصل الحديث عن اربعة من القضاة أثروا تاريخ القضاء الإسلامي هم الصحابى أبوموسى الأشعرى وثلاثة من نسله هما أبوالحسن الأشعرى مؤسس مدرسة الأشاعرة فى الفكر الإسلامى، وابنه أبوبردة ثم بلال بن أبى بردة ثم أفاض فى ذكر (القاضى عياض) وهو من مواليد سبتة فى المغرب وهو من أعـلام الفقة المالكي .
وتكمن أهمية ما اثبته الدكتور عبد الله الطيب أنه قد فعل ذلك فى حضرة جمهرة من خيرة رجال القانون والقضاء فى البلاد ولم يعارضه أحد بل اثنوا عليه الثناء الحسن مما يؤكد صحة ما ذهب إليه خاصة وأنه أورد أدلته على ما قال مشيرا مثلا فى تأثر هنرى الثانى بنظام اللفيف إلى مختصر تاريخ بريطانيا . ولعل الأمر جدير بتحقيق أوسع فى بحث أكاديمى على هيئة رسالة فى مستوي درجتي الماجستير أو الدكتوراة تجمع هذا الشتات المتناثر فى سفر واحد حبذا لوجاء باللغة الإنجليزية حتى يسهم فى مزيد من التعريف بفضل العرب والمسلمين على الحضارة الإنسانية . وبعد المحاضرة القيمة كنا ضمن من حظوا بالجلوس على مائدة العشاء مع الراحل رحمه الله وتشقق الحديث وأخذ مناح شتى وتطرق فيما تطرق إليه إلى الثقافة العربية فى السودان . واتضح لى أكثر فى تلك الليلة ومن خلال ما دار فيها من نقاش حول هذا الأمر أن البعض يظلمون الرجل فيصورنه أحيانا (شوفونيا) موسوسا بعرقية منتنه بينما الأمر ليس كذلك فقد قال ببساطة وعفوية مثلا أن جدته من (المحس) ثم طفق يتحدث عن صلة السودان القوية بالعالم العربى وأنها ليست صلة ثقافة منبته الأصل بالنسب ولكنها موصولة بالدم ايضا وذكر فى سياق ذلك أنه سلم عميد كلية الطب فى جامعة الخرطوم دراسة للشفرة الوراثية DNA أخذت من انحاء متفرقة من ولايات السودان الشمالى تؤكد تلك الصلة لكنه لم ينكر ما يجرى فى عروق السودانيين قاطبة من دماء إفريقية أصيلة ونوبية ولم يدعي نقاءا عرقيا لأهل السودان لأنه لا يوجد نقاء عرقى على وجه المعمورة كما أن سحناتنا وملامحنا تؤكد إنتماءا لعالمين عربى وإفريقى . إننا ابناء عالمين يعد من الجحود التنكر لأحدهما . لكن عبد الله الطيب وغيره إنما يتصدون للمنكرين لهذه الحقيقة وللذين يريدون قطع صلات السودان بمحيطه العربى إستنادا إلى عامل واحد هو اللون ويتناسون عمق الثقافة العربية وتجذرها فى ثقافتنا .
إن قوة وإنتشار اللغة العربية فى السودان قبل دخول المذياع والقنوات الفضائية العربية بقرون يؤكد أن المهاجرين إلى السودان من العرب قد شكلوا جزءا أساسيا من تشكيلاته العرقية بما أدى إلى غلبة لغتهم فى بلد عريق الثقافة كالسودان له حضارته التليده ولغته المكتوبة (المرويه). وليس الإسلام هو الذى وطن العربية فى السودان، لأن العثمانيين الذين حكموا العالم الإسلامى باسم الإسلام لأربعة قرون لم يستعربوا رغم أنهم كانوا رعاة وبدوا لم يعرف لهم سبق فى حضارة عريقة وأن الفرس الذين أثروا الثقافة الإسلامية بل وطأ أعلامهم للغة العربية ونحوها وصرفها لقرون طويلة لم يقض الإسلام على لغتهم ويبدلهم العربية مكانها . إقرأ إن شئت بلاغة وفصاحة مراسلات حكام دولة سنار للغازى التركى "لا يغرنك تغلبك على الجعليين والشايقية فنحن الملوك وهم الرعية" كذلك رسائل الإمام المهدى .
Post: #36
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 02:27 PM
Parent: #35

شمس الدين

Quote: ياتا ياعزام البتودي لي لاهاي


والله يا ود عمي ما عارِف ... بس العارفو إنو درِب
[ شِبكة ] ده بِوديك التوج ... باريهو واطاطتك بِتصبِح
Post: #37
Title: Re: يــــاعزام ....أعمل حسابك
Author: SHIBKA
Date: 03-07-2009, 02:28 PM
Parent: #35

الشي شنو...
Post: #38
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 02:33 PM
Parent: #37

صُفاح صُفاح
Post: #41
Title: Re: يــــاعزام ....أعمل حسابك
Author: عبدالأله زمراوي
Date: 03-07-2009, 02:37 PM
Parent: #37

عزام

عبدالله الطيب ما بحلك....

طالبين باسوورد لبت ابراهيم/ وحتى ذلك الوقت
ممنوع من ذكرها في هذا البوست وفي المنابر
الأخرى بأمر المحكمة...

سلام حامد وباقي الشباب..

اللي شبكنا يخلصنا....
Post: #39
Title: Re: يــــاعزام ....أعمل حسابك
Author: حامد محمد حامد
Date: 03-07-2009, 02:34 PM
Parent: #35

شبكة ومجموعة 5 مارس عليكم بالانسحاب الكامل فان عزام متمكن متمكن

كيف فاطى سطر يا ود عمتى شمس .. والله كان فاضى سطر ما عارف ياخى ده خلى الاسبيس ما فى خالص
Post: #40
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 02:37 PM
Parent: #39

حامِد محمد حامِد (وبِالعكس) ...

Quote: ده خلى الاسبيس


يا كافي البلا الشي كراس هندسه
Post: #42
Title: Re: يــــاعزام ....أعمل حسابك
Author: SHIBKA
Date: 03-07-2009, 02:49 PM
Parent: #40

شبكة ومجموعة 5 مارس
تدين وتشجب كل ما لحق ببت ابراهيم من عزام
Post: #43
Title: Re: يــــاعزام ....أعمل حسابك
Author: الفاتح شلبي
Date: 03-07-2009, 02:53 PM
Parent: #40

Quote: شُفت كيف يا ود شلبي ... لِسه بعد أكثر مِن 30 سنة كتب الصحفي
الخضر هارون أحمد عن الدِكتور عبدالله الطَيِب:


يا شبكة, الود عزام دهـ برئ براءة الذئب من دم يوسف ... غايتو لأول مرة أتأكد ان الرشاوي بتلعب دور فى حتات (وجه ضاحك) المقالة دي انا فتشت ليها فى الدنياكلها نهائي ما اتذكرت وين قرات, اكون قراته فى منتدى كويكة يا عزام؟.
Post: #44
Title: Re: يــــاعزام ....أعمل حسابك
Author: SHIBKA
Date: 03-07-2009, 02:57 PM
Parent: #43

الفاتح
بركة اللقيت ضالتك في الحلة دي...

انت ما تطول بتلقى عندنا كل ما هو مفيد
Post: #45
Title: Re: يــــاعزام ....أعمل حسابك
Author: الفاتح شلبي
Date: 03-07-2009, 03:09 PM
Parent: #44

Quote: الفاتح
بركة اللقيت ضالتك في الحلة دي...

انت ما تطول بتلقى عندنا كل ما هو مفيد


أطول وين تاني ؟

قبل ثلاثة سنوات كنت عضو هنا ... نسيت الباسوورد وقعدت فى الكنبة ولمن ألقى لي بوست سمح كدهـ كنت أقول تموت الأسد فى الغابات جوعاً ولحم الضان يأكله الكلابا ... واحد من أصحابي كان بيرد علي ويقول لي اللى يسمعك وانت تقول كدهـ بيقول انت مقطع لغة الضاد (وجه ضاحك)
Post: #46
Title: Re: يــــاعزام ....أعمل حسابك
Author: SHIBKA
Date: 03-07-2009, 03:13 PM
Parent: #45

الفاتح
هسة اوكامبو فتح عليك الاون من تاني وخلي بكري اداك باوسيرد
صاح؟؟
Post: #48
Title: Re: يــــاعزام ....أعمل حسابك
Author: الفاتح شلبي
Date: 03-07-2009, 03:26 PM
Parent: #46

Quote: الفاتح
هسة اوكامبو فتح عليك الاون من تاني وخلي بكري اداك باوسيرد
صاح؟؟


أيوهـ انا كنت ناسي كلمة الاون لو اتذكرتها كنت دخلتها فى جملة زي بتاعتك دي والله

لكن ماااااااااا أون مبارك شهر مبارك
Post: #47
Title: Re: يــــاعزام ....أعمل حسابك
Author: معتصم محمد صالح
Date: 03-07-2009, 03:16 PM
Parent: #44

Quote: صُفاح صُفاح


من قبييل بقرا عايز اعرف الجريمة شنو ؟؟


يا عمك GO On وعقبالنا ..
Post: #49
Title: Re: يــــاعزام ....أعمل حسابك
Author: حامد محمد حامد
Date: 03-07-2009, 03:51 PM
Parent: #47

الفاتح اخوى

تقعد تجارى وتبارى لى شبكة فى الكلام والله تانى ما تلقى اللى يحلك

مع عزام متضامن من غير ما اعرف الموضوع ( ما لها بت ابراهيم المصونة يا عزام)

ضد مجموعة 5 مارس
Post: #50
Title: Re: يــــاعزام ....أعمل حسابك
Author: عزام حسن فرح
Date: 03-07-2009, 09:08 PM
Parent: #49

أصلو الحِكاية أظِن بدأت مِن كلامي مع هِدمه < فُلانة >
وكُت بناغِم فُستانا الدايِر يِلمِس جِلدا ... قلت ليهو :

مَـدَروع فـوقــا يا الهِـدِمْ وحارَماكـا مِـن إدْراكـا
باعَداتَـَنْـك تُفاحـاً رُخُـصَ مُدردِمـات تِحِتْ مُعْراكـا
مِنـو حابَساتَـنَـكْ حَقايِـب إتَـوَهَـطَـتْ تَمامَ أَوْراكـا
وَتَـرَنْكَ شَدَهِــنْ سَـواً صفـيـر خابرو ليـك بـراكا
شِـنْ قَدَرَكَ يا الهِـدِمْ عـُقـباً تمِسْ أو تَطـول إعْراكـا

ـــــــــــــــــ
ولِجِنِس ناس ود شلبي الفضيحة ده ... ده تفسير كلامي:
ـــــــــــــــــ
مدروع : مَوضوع
الهِدِم : الفُستان
إدراكا : الوصول لِجِسمِها
رُخُص : أول كُل شئ
مُعراكا : رقبتِها / والمُعراكا هي المُفراكا
حقايِب : العجز
إتوهطَت : قعدت
وترنك : مِن وتر العود أو الربابة
إعراكا : عرك الشئ أي تمسح بِهِ
Post: #53
Title: Re: يــــاعزام ....أعمل حسابك
Author: SHIBKA
Date: 03-08-2009, 05:32 AM
Parent: #50

عزام
بقيت تنزل المسدار بشرحو
والله قدرو عليك الجماعة
Post: #52
Title: Re: يــــاعزام ....أعمل حسابك
Author: SHIBKA
Date: 03-08-2009, 05:31 AM
Parent: #49

Quote: ضد مجموعة 5 مارس


شوف تاني البشرح ليك مسألة منو....
Post: #59
Title: Re: يــــاعزام ....أعمل حسابك
Author: الفاتح شلبي
Date: 03-08-2009, 07:25 AM
Parent: #49

Quote: تقعد تجارى وتبارى لى شبكة فى الكلام والله تانى ما تلقى اللى يحلك


أخوي حامد عندنا خبرات فى "الفوركاستينق" يعني نقدر نلقي نظرة سريعة كدهـ ونحدد ... غايتو مع عزام أضمن ليك التوج

أخوي عزام أنا تووووووش مشيت جيكت فى ذيل الموضوع أفتش على الترجمة لقيتها ومشيت للموضوع فوق وانا مطمئن قراته ... لكن ما كمان لدرجة كلمة ادراكا كمان يعني ... (وجه ضاحك)


تخريمة:

يعني لو عايز أضحك أسوي زي ما بسوي كدي ؟
Post: #51
Title: Re: يــــاعزام ....أعمل حسابك
Author: SHIBKA
Date: 03-08-2009, 05:30 AM
Parent: #47

Quote: وعقبالنا ..


دا كلام ياعبد المعطي؟؟؟!!!
Post: #54
Title: Re: يــــاعزام ....أعمل حسابك
Author: أيمن الطيب
Date: 03-08-2009, 06:20 AM
Parent: #51



سلام يا شبكة!!!

الحاصل شنو ؟؟؟

يا عزّام هببت شنو تانى!!!

إمبارح إنشاء الله لحقت!!!!!!!!!

الدوحة - دخّان - الشحانية وبالعكس كان الله هوّن,,
Post: #55
Title: Re: يــــاعزام ....أعمل حسابك
Author: SHIBKA
Date: 03-08-2009, 06:29 AM
Parent: #54

Quote: الدوحة - دخّان - الشحانية وبالعكس كان الله هوّن,,


انت ما شفتو نصايص الليل حايم في الاون
Post: #56
Title: Re: يــــاعزام ....أعمل حسابك
Author: أيمن الطيب
Date: 03-08-2009, 06:53 AM
Parent: #55

Quote: انت ما شفتو نصايص الليل حايم في الاون
وأنا البودينى أحوم نصايص الليل شنو فى الأون!!!
وبعدين أنا الناس البمشو الأون ديل عندى فيهم راى!!
حتى أنت ياعزّام بقيت تمشى الأون؟؟؟والله بالغت!!!والبسوق ليك منو وإنت راجع!!!
تانى قول عوووووووووك نرسل ليك كروة ولا ليموزين,,



وكمان الكضاب قال لى ماشى البيت,,
خلاص يا زول دا طرفنا منّك كان بقيت من جماعةالأون!!
Post: #57
Title: Re: يــــاعزام ....أعمل حسابك
Author: SHIBKA
Date: 03-08-2009, 07:10 AM
Parent: #56

ايمن
يعني كدا انضميت لمجموعة 5 مارس


عزام
ياحليلك ياخوي
Post: #58
Title: Re: يــــاعزام ....أعمل حسابك
Author: أيمن الطيب
Date: 03-08-2009, 07:17 AM
Parent: #57

شبكة,,,
Quote: يعني كدا انضميت لمجموعة 5 مارس
مجموعة الخامس من آذار دى أميرة الشيخ فيها!!!!
Post: #60
Title: Re: يــــاعزام ....أعمل حسابك
Author: عزام حسن فرح
Date: 03-08-2009, 07:27 AM
Parent: #58

أيمن الطَيِب وآخرون ...

المحنه البِجْلِبوها ويِنْعرِك دُخانو ...
البِتْدورلا شُهود وبيان بُرهانو ...
يِمَه حتو صاحبي قِليبي أهانو ...
Post: #61
Title: Re: يــــاعزام ....أعمل حسابك
Author: أيمن الطيب
Date: 03-08-2009, 07:40 AM
Parent: #60

عزام النوبّى,,,
Quote: المحنه البِجْلِبوها ويِنْعرِك دُخانو ...
البِتْدورلا شُهود وبيان بُرهانو ...
يِمَه حتو صاحبي قِليبي أهانو ...
شوف يا الحبيب,,
إت مشكلتك الكبيرة إنّك( رتّانى)
لكّة وعريبك بالحيل كعب ولسانك (أعجمى)(أحييييييييييي أنا) بقيت تلاوز
المسادير والدوباى دا كلنا عارفنو (الليل) بت ابراهيم وشكلها كانت أمينة
سر أبوها القال ليك هناى داك (أمانات مجالس وكدا)!!!
ما تقعد تعمل لينا فيها ود ضحوية وتقوم بينا طيارة بعد ما تمشى تساهر فى الأون!!

نضاضيرى وينن!!!
Post: #64
Title: Re: يــــاعزام ....أعمل حسابك
Author: SHIBKA
Date: 03-08-2009, 07:56 AM
Parent: #61

Quote: نضاضيرى وينن!!!


شوفن جنب المنضرة ديـــــك
Post: #63
Title: Re: يــــاعزام ....أعمل حسابك
Author: SHIBKA
Date: 03-08-2009, 07:55 AM
Parent: #60

Quote: (عدل بواسطة عزام حسن فرح on 08-03-2009, 06:29 ص)
(عدل بواسطة عزام حسن فرح on 08-03-2009, 06:31 ص)



عزام
مالك ياخوي
تبدل وتغير من الصباح
Post: #62
Title: Re: يــــاعزام ....أعمل حسابك
Author: SHIBKA
Date: 03-08-2009, 07:53 AM
Parent: #58

Quote: مجموعة الخامس من آذار دى أميرة الشيخ فيها!!!!


اميرة
موقفها غير واضح في القضية دي....
Post: #65
Title: Re: يــــاعزام ....أعمل حسابك
Author: أيمن الطيب
Date: 03-08-2009, 07:58 AM
Parent: #62

يا شبكة,,
Quote: موقفها غير واضح في القضية دي....
بالله لما يوضح خلينا فى الصورة!!
الموضوع دا حا تنبنى عليهو أمور كثيرة,,,يعنى الموقف لازم يكون معلن هنا على الملأ,,,


شكرا,,
Post: #66
Title: Re: يــــاعزام ....أعمل حسابك
Author: عزام حسن فرح
Date: 03-08-2009, 08:16 AM
Parent: #65

شِبكة ...

Quote: عزام
مالك ياخوي
تبدل وتغير من الصباح


مُُصاقراني بِت إبراهيم مِن الصباح ...
إدهَوبت وصابني ربكه وإنشِطاح ...
البِرضي الحروم لِحِق حد الفلاح ...
Post: #68
Title: Re: يــــاعزام ....أعمل حسابك
Author: SHIBKA
Date: 03-08-2009, 08:50 AM
Parent: #66

Quote: مُُصاقراني بِت إبراهيم مِن الصباح ...
إدهَوبت وصابني ربكه وإنشِطاح ...
البِرضي الحروم لِحِق حد الفلاح ...


مالك ما مشيت على ناس الديش من الصباح مصاقر بت ابراهيم سويتها الضهبان
Post: #67
Title: Re: يــــاعزام ....أعمل حسابك
Author: SHIBKA
Date: 03-08-2009, 08:48 AM
Parent: #65

Quote: بالله لما يوضح خلينا فى الصورة!!
الموضوع دا حا تنبنى عليهو أمور كثيرة,,,يعنى الموقف لازم يكون معلن هنا على الملأ,,,


وطبعا دا كلو في مصلحة الوطن
Post: #69
Title: Re: يــــاعزام ....أعمل حسابك
Author: الفاتح شلبي
Date: 03-08-2009, 08:53 AM
Parent: #67

Quote: إدهَوبت وصابني ربكه وإنشِطاح ...


شبكة دقيقة أسمحي لي

عزام تعال الكلمة اللى تحتها خط دي موش تشرح معناها وبس ... دي إلا تنطقها لينا كمان

إدهوبت قال
Post: #70
Title: Re: يــــاعزام ....أعمل حسابك
Author: SHIBKA
Date: 03-08-2009, 08:57 AM
Parent: #69

Quote: شبكة دقيقة أسمحي لي


طالما في صالح القضية اتفضل طوالي
Post: #71
Title: Re: يــــاعزام ....أعمل حسابك
Author: عبدالأله زمراوي
Date: 03-08-2009, 08:57 AM
Parent: #69

Quote: مُُصاقراني بِت إبراهيم مِن الصباح ...
إدهَوبت وصابني ربكه وإنشِطاح ...
البِرضي الحروم لِحِق حد الفلاح ...


ونطالب بالمرتب...!
Post: #72
Title: Re: يــــاعزام ....أعمل حسابك
Author: عزام حسن فرح
Date: 03-08-2009, 09:04 AM
Parent: #69

Quote: إدهوبت قال


يا ناس المصيبة الإندرعت فوقي ده ما تزِحو مِني جاي ولا جاي

الدَهَوبه = اللخبطه

يِمْه الجِن الرِكِبني قريب بِتداوا ...
دَهَوَبتني < فُلانة > شوقي أتْخاوا ...
مره تحِن ومره تجافي تدور تِتكاوا ...
Post: #73
Title: Re: يــــاعزام ....أعمل حسابك
Author: الفاتح شلبي
Date: 03-08-2009, 09:17 AM
Parent: #72

Quote: دَهَوَبتني < فُلانة > شوقي أتْخاوا ...


شوفو الاستغلال للمواقف هنا كيف ... طوالي دخلتها فى جملة مفيدة
Post: #74
Title: Re: يــــاعزام ....أعمل حسابك
Author: Zomrawi Alweli
Date: 03-08-2009, 09:20 AM
Parent: #72

مع كامل التضامن دونما نقيصة لشبكة
بالروح والدم نفديك يا شبكة
ودا كلوا مع احترامي وتضامني مع عزام
الا انه ورغم نوبيته الصرفة الا ان حديثه بالعربية العامية الشديدة
تغيظني ولكن تعجبني يا عزام في مقارعة الجعليين والشوايقة بلكنتهم وقد افحمتهم
قال احنا ولا جعل قال

باروح والدم نفديك يا شبكة
Post: #75
Title: Re: يــــاعزام ....أعمل حسابك
Author: عزام حسن فرح
Date: 03-08-2009, 09:27 AM
Parent: #74

Zomrawi Alweli

Quote: مع كامل التضامن دونما نقيصة لشبكة
بالروح والدم نفديك يا شبكة
ودا كلوا مع احترامي وتضامني مع عزام


إحتِرام إيه بقى بعد ما طَينتها ...

دي ذكرتني بِحِكاية:
الولد : إنعلن أبوك يا عم محمد
عم محمد : عم محمد ايه بقى كفاية ( إنعلن أبوك يا محمد )
Post: #76
Title: Re: يــــاعزام ....أعمل حسابك
Author: عزام حسن فرح
Date: 03-08-2009, 09:30 AM
Parent: #75

Zomrawi Alweli

Quote: الا انه ورغم نوبيته الصرفة الا ان
حديثه بالعربية العامية الشديدة تغيظني



مَن عرِف لُغة قَومٍ آمن شرهُم
Post: #77
Title: Re: يــــاعزام ....أعمل حسابك
Author: willeim andrea
Date: 03-08-2009, 10:04 AM
Parent: #76

شبكه وعزام... جد من فاكهة البورد اللذيذه .... وجد الواحد ما بيشبع منهم لانهم دايما عندهم الجديد .... وعلشان كده وعديل وبالباب... انا واسطة خير.... قلتوا شنو يا روعه
Post: #78
Title: Re: يــــاعزام ....أعمل حسابك
Author: SHIBKA
Date: 03-08-2009, 10:09 AM
Parent: #77

وليم
اشكرك على ثناءك جدا جدا


لكن ياخوي الموضوع كبير ومعقد ما بتحلا
Post: #79
Title: Re: يــــاعزام ....أعمل حسابك
Author: عزام حسن فرح
Date: 03-08-2009, 10:12 AM
Parent: #77

willeim andrea

إتلمو الخلِق بِرِئاسة أندرا ..
قالو السماح وفوقا السيرا ...
يِمْهَ شوفيلي رؤاكي وخيرا ...



إتَوسِط يا خوي إتَوسط ... إتفضِل قنِب ... الموية يا جنا
(والله الخوف تِنشبِك فوقك شِبكة تفتِش البِخارجك)
Post: #80
Title: Re: يــــاعزام ....أعمل حسابك
Author: SHIBKA
Date: 03-08-2009, 06:32 PM
Parent: #79

Quote: (والله الخوف تِنشبِك فوقك شِبكة تفتِش البِخارجك)


عزام كان سوى متل سواتك بتشبك فيهو
Post: #81
Title: Re: يــــاعزام ....أعمل حسابك
Author: حامد محمد حامد
Date: 03-08-2009, 09:56 PM
Parent: #80

وما زلت متضامنامع عزام ضد 5 مارس
بالرغم من شعره او دوبيته كان مباشرافى بعضه ولكنه لسان من يفلسف جفاه ( ايه رايك فى دى ياعزام)

شبكة لو قلت ليك يا دوب واصل من البحرين حتقولى شغل المضيفين سمح

شبكة انا اشتريت كتاب عديل كدة عشان الاسئلة
Post: #82
Title: Re: يــــاعزام ....أعمل حسابك
Author: SHIBKA
Date: 03-09-2009, 05:48 AM
Parent: #74

Quote: بالروح والدم نفديك يا شبكة


زمراوي
احترامنا ما بنفقدو
لكن صدقني وقفتك معاي ما بتندم عليها
وعزام دا خليهو بالجنب بس


شكرا لتضامنكم مع الديمقراطية
Post: #83
Title: Re: يــــاعزام ....أعمل حسابك
Author: SHIBKA
Date: 03-11-2009, 07:01 AM
Parent: #82

وين اختفيت ياعزام؟؟
Post: #84
Title: Re: يــــاعزام ....أعمل حسابك
Author: أيمن الطيب
Date: 03-11-2009, 07:49 AM
Parent: #83

Quote: الصعايدة ....

جات صحفيه لعمل لقاء مع واحد من ملاّك الأبقار (نقابة ناس عزّام)

الصحفية : أنت بتأكل البقر إيه ؟
المزارع : انهي فيهم البيضا ولا الحمرا ؟؟
قالت : البيضا
قال : البيضا بأكلها برسيم
قالت : والحمرا
قال : و الحمرا برضو برسيم
قالت : طيب بتسكنهم فين؟
قال : انهي فيهم البيضا ولا الحمرا؟؟
قالت : البيضا
قال : البيضا بسكنها في الحوش الي هناك
قالت : والحمرا
قال : و الحمرا برضو بسكنها في الحوش نفسه
قالت : طيب لما بتفسحهم بتعملهم إيه ؟
قال : انهي فيهم البيضا ولا الحمرا ؟؟
قالت : البيضااااااااااااا
قال : البيضا بلف بيها حول الترعه لفتين
قالت : والحمرا
قال : و الحمرا برضو بلف بيها حول الترعه لفتين
قالت : انتا ليه كل مره اسئلك بتقولي انهو فيهم انهو فيهم
وفي الاخر بتعاملهم زي بعض؟
قال : اصلو البقره البيضا بتاعتي
قالت : والحمرا؟؟
قال : والحمرا برضو بتاعتي
الزول ده بكون مشى يشوف البقر حاصل عليهو شنو,,Cow Boy وكدا,,,
Post: #85
Title: Re: يــــاعزام ....أعمل حسابك
Author: SHIBKA
Date: 03-11-2009, 07:55 AM
Parent: #84

ايمن
يعني مشي يتفقد احوال الرعية


عذر مقنع ومقبول
في الانتظار
Post: #86
Title: Re: يــــاعزام ....أعمل حسابك
Author: عزام حسن فرح
Date: 03-11-2009, 08:15 AM
Parent: #85

والله مِن شوقي لِلبقر والبُطانة قُتْ:

طِريت الضهرة والوجـع المُكَوِع فوقا
طِريت الزوامِل البالضُراع بِـتـسوقا
طِريت يا صاحِبي البُـطـانة وسـوقا
طِريت الدَرَت البِـجـيـك بِـروقـا

طِريت الضهرة والوِردَة الزِويلا بِشاكي
طِريت العِيـال اللِكِـلاب بِتسـاكـي
طِريت المَـيعَـه الطِيـورا تكـاكـي
طِريت الزيـفـه اللِـشُـقاق بـِتاكي

طِريت أُم رشيـم الفوقا التقول مخلوقا
طِريت أُم كِـضـيم البالشِلوخ مشقوقا
طِريت الخِـشـيم البالخـدار مدقوقا
طِريت أُم زُمام الفـي المفازة طُروقا
Post: #87
Title: Re: يــــاعزام ....أعمل حسابك
Author: أيمن الطيب
Date: 03-11-2009, 08:44 AM
Parent: #86

والله يا عزّام ود ضحوية وودأبسن
وكل فطاحلة الحرف ,,
أولاد البطانة والهمباتة والبطاحين والحلاوين,,

راحوا معاك شمار فى مرقة يا الرطّانى الفّكّ الحرف وإمتلك نواصى المسادير,,,

بس عليك الله تترجم وتشرح الكلام السمح دا لى شبكة دى!!!!

آدمو راح روحة بقرة فوق الضّهرة!!


ياخ حرام عليك,,
Post: #88
Title: Re: يــــاعزام ....أعمل حسابك
Author: عزام حسن فرح
Date: 03-11-2009, 09:46 AM

شِبكة ما تخجلي أشرح ليك زي ما قال ودالطَيب ولا النضمي فاهماهو
Post: #89
Title: Re: يــــاعزام ....أعمل حسابك
Author: SHIBKA
Date: 03-11-2009, 09:50 AM
Parent: #88

Quote: طِريت المَـيعَـه الطِيـورا تكـاكـي
طِريت الزيـفـه اللِـشُـقاق بـِتاكي

طِريت أُم رشيـم الفوقا التقول مخلوقا
طِريت أُم كِـضـيم البالشِلوخ مشقوقا
طِريت الخِـشـيم البالخـدار مدقوقا
طِريت أُم زُمام الفـي المفازة طُروقا



عزام
يعني ايمن فاهم بقت علي
طيب انا فسر لي الاتي:-
الميعة ، ام رشيم، ام كضيم ، ام زمام، المفازة


ياخي جننت العربي جن
Post: #90
Title: Re: يــــاعزام ....أعمل حسابك
Author: أيمن الطيب
Date: 03-11-2009, 10:21 AM
Parent: #89

يا شبكة,,
Quote: الميعة ، ام رشيم، ام كضيم ، ام زمام، المفازة
فيك الخير يا خالةيا عزّام كلامى ما فوقو شورة يا اللخو أشرح ساى,, كلامك دا عند ناس كدا زي بالصينى واحد!!!!أشرح يا زول أشرح رندوك الهمباتة دا,,,,الراجنّو كتار!!!!
Post: #91
Title: Re: يــــاعزام ....أعمل حسابك
Author: عزام حسن فرح
Date: 03-11-2009, 11:05 AM
Parent: #90

شرطو عينا ... وحالتي مِن غَير الناطِقين بِها ...
ما علينا ... هاكُم تفسير ما غَمُض علَيكُم :

(01) طِريت الضهرة والوجع المُكَـوِع فوقـا
(02) طِريت الزوامِـل البالضُـراع بِـتسوقا
(03) طِريت يا صاحِبي البُـطـانة وســوقا
(04) طِريت الدَرَت البِـجـيـك بِـروقــا

(05) طِريت الضهرة والوِردَة الزِويلا بِشاكـي
(06) طِريت العِيـال اللِكِـلاب بِتسـاكــي
(07) طِريت المَـيـعَـه الطِيـورا تكـاكـي
(08) طِريت الزيـفـه اللِشُـقاق بـتـاكـي

(09) طِريت أُم رشيم الفـوقا التقول مخلـوقا
(10) طِريت أُم كِـضـيم البالشِـلوخ مشقـوقا
(11) طِريت الخِـشـيـم البالخـدار مدقـوقا
(12) طِريت أُم زُمـام الفـي المفازة طُـروقا
ــــــــــــــــــــــــــــــــــــــــــــــــــ ـــــــــــــــ
(01) ( طريـــت : تذكرت / الضهرة : الأرض المطرِية / المُكَوِع : المُستنِد على كوع اليد [أي مُرتاح ومُستكين - مُرطِب] ).
(02) ( الزوامِل : الإبِل وكُل ما يُركب مِن البهائِم / بِالضُراع بِتسوقا : تُخذ بِاليد - يعني رجالا سااااااي كَدي ).
(03) ( البُطانـة : أرض البُطانة ، والإسم مٌشتق مِن البطن ، حِيثُ أن أرض البُطانة مُقعرة -سهل- تحتفِظ بِماء المطر فتنبُت المراعي ).
(04) ( الـــدَرَت : أيام حارة جِداً [15 يَوم] بعد الخريف ينضُج فيهِ الذُرة / روقا : بِهدوء).
(05) ( الــوِردَة : الحُمى / الزِويلا : تصغير زول / بِشاكي : يشتكي مِن الحُمى).
(06) ( بتساكي : تركُض خلفُها ).
(07) ( المَيـــعه : المُسطحات المائِية التي تخلُفها الأمطار / تكاكي : تُصيح ).
(08) ( الزيـــفه : الرِياح التُرابِية العاصِفة / الشُقاق : بِيوت الشَعر / تاكي : تُميلُها ).
(09) ( الرشيــم : وسم أخضر يُرسم بِالخد الأيمن لِلفتاة لِلزينة ).
(10) ( الكضيــم : الخد / مشقوقا : وسم الشِلوخ ).
(11) ( الخِشيــم : تصغير لِلخشم [الفم] / الخدار : وسم يُدق بِالشِفاة السُفلى لِلفتاة لِلزينة ).
(12) ( الزُمـــام : حلقة مِن الذهب تُوضع بِفتحة أنف الفتاة الأيسر / المفازة : مكان بِارض البُطانة / طُروقا : سبك وطرق الذهب ).
Post: #92
Title: Re: يــــاعزام ....أعمل حسابك
Author: SHIBKA
Date: 03-11-2009, 11:24 AM
Parent: #91

عزام
ايمن شيال الحال
كلهم طلعت عارفاهم لكن وضعهم في الجملة صعب علي
Post: #93
Title: Re: يــــاعزام ....أعمل حسابك
Author: أيمن الطيب
Date: 03-11-2009, 11:40 AM
Parent: #92

شبكة,,,
Quote: عزام
ايمن شيال الحال
كلهم طلعت عارفاهم لكن وضعهم في الجملة صعب علي
يا شبكة عليك النبى أقعدى ساى!!!
الزول المسخوت دا بقوم يقطع فيك قصيدة وبعد داك محل نقبل كلنا ما حا نعرف,,,قال وضعها فى جملة قال!!!
الكلام دا يضع نفسه حيث مكانه الوحيد و تنحنى أمامه الجمل نفسها إحتراما,,

عّزام,,
لله درك يا مفوّه,,ولا تحضرنى هنا قيل مقولة الأستاذ شيقوق هييييييييييييييييييييييييييييييييييييييييييييييع
ثم هييييييييييييييييييييييييييييييييييييييييييع,,

كلامك الفوق دا ما بقولو فوقو كلام تانى والمشكلة محل قاعدين دا حمل السلاح يعد جريمة وإلآ كان أزعجناشياطين الخلا
القدام بيتك دا لأن الرد على النار لا يكون إلا بالنار,,وهذا الكلام نار تستعر,,

مودتى..
Post: #94
Title: Re: يــــاعزام ....أعمل حسابك
Author: عزام حسن فرح
Date: 03-11-2009, 02:40 PM
Parent: #93

أيمن الطَيِب ...

Quote: الخلا القدام بيتك دا


شكيتك علي الله ... هيا زول أنا مُحدِث ناس السودان إنو بيتي
في المدينة بِجنينة وحوض سِباحة ... فضحتني في القِبل الأربعة
الله لا كسبك ...


ـــــــ
يوم الجُمعة (13/03) في سودانِيين (مِن غَير الناطِقين) بِها جايين
ياكلو عندي ( تركين ) أكان بِتاكُلا تعال بعد الصلاة ... ولو جيت
مُتغدي تكون خدمتني ...
Post: #95
Title: Re: يــــاعزام ....أعمل حسابك
Author: عزام حسن فرح
Date: 03-11-2009, 02:43 PM
Parent: #94

شِبكة ...

Quote: صعب علي


وجع
Post: #96
Title: Re: يــــاعزام ....أعمل حسابك
Author: SHIBKA
Date: 03-11-2009, 04:58 PM
Parent: #95

ياعزام
انت غير الناطقين بها ديل
كل جمعة يجوك ويغدوا معاك
عذبوك والله
Post: #97
Title: Re: يــــاعزام ....أعمل حسابك
Author: عزام حسن فرح
Date: 03-11-2009, 05:20 PM
Parent: #96

شِبكة ...

Quote: ياعزام
انت غير الناطقين بها ديل
كل جمعة يجوك ويغدوا معاك
عذبوك والله


ديل مُصنفين تحت < ... الْمُؤَلَّفَةِ قُلُوبُهُمْ ... >

كُل جمعة (تركين) بعد (6) شهور ياخدو التابِعِية المحسِية
(6) شهور تانِية تترفِع عنهُم صلاة ( العصر )
Post: #98
Title: Re: يــــاعزام ....أعمل حسابك
Author: SHIBKA
Date: 03-11-2009, 06:01 PM
Parent: #97

Quote: (6) شهور تانِية تترفِع عنهُم صلاة ( العصر )


انت قلت لي بتصلي مع الدياشة ؟؟؟