كل شى إلا الحقارة

بغض النظر عن أى شى

وبغض النظر عن موقف المعارض وموقف المؤيد وموقف المحايد

مذكرة ال آى سى سى دى استحقار والله

ومعروف الغرض المطلوب منها

المؤيد عارف والمعارض عارف

نعم حصل الشى الكتير فى دارفور وفى غير دارفور

وكل نزاع مسلح فى أى مكان فى الدنيا بكون فيه ضحايا وفظائع وأهوال

كل ده معروف ومفهوم ومرفوض بالتأكيد
وفى مليون ألف طريقة للتعامل معاه وحله

وحبنا وتعاطفنا الكامل لكل الضحايا والناس العانو ولسه بعانو

بس إلا الحقارة
كل شى إلا الحقارة

ولسه برضه الكلونياليين القدام فى شكلهم الجديد
مصرين على فرض الشى العايزنه، وياهو نفس المبدأ القديم

يا معانا يا ما معانا

بنفس عقلية الهيمنة والتسيير القديمة

شنو يعنى تطلع مذكرة اعتقال لرئيس دولة على راس الحكم وبمثل رمز لسيادة الدولة وكرامة اهلها

لو كان كعب أو كويس ؟

هى الحقارة دى كيف

أنا شخصيا بهمنى شى واحد أحد إسمه السودان

سواء كان رئيسه البشير أو الجن الأزرق

السودان قبل كل شى، وبعد كل شى

لأنه كل شى

لك التحيه اخي ابوذر

هذا هو ديدن كل الشرفاء الأحرار

أبداً مابيرضو الحقاره

مؤونة عام من الود

..
.
ولا يهمك يا اباذر
دى حبر على ورق .. وذبذبات فى ميكروفون


_______

بس بالجد حقارين ومستفزين بشعوب العالم الثالث
والعربي والاسلامى والافريقي .. ويكيلون بمكيالين

دمت

هى يا ابوصلاح بالتأكيد ما حتكون حبر على ورق

ما نحن برضه لازم نكون واقعيين، والسياسة دى ما فيها حاجات ابستراكت كتيرة

عشان كده غالبا الناس بتعاملو فيها ومعاها بالطريقة المباشرة

ويمكن كمان بالحرة المباشرة الممكن تشوتها فى المرمى مباشرة

على حسب كلام ناس الكورة

أكيد الشى ده بترتب عليه حاجات كتيرة

نتائج وأسباب جديدة كمان رضينا ولا ابينا

اما كيف الحاجات دى حتحصل

فطله زى ما بقول الانجليز

إت دبندز

والله يا تبلدى أنا خليت الشى الإسمه السياسة ده من سنة اتنين وتمانين

تعرف كنت سكرتير ثقافى فى اجمل واقوى محل

وزمنى ده كله ببعد منها وأغنيلا

هسه ساى وجعتنى الحقارة بس

دون أى مسئولية تفصيلية طبعا عن أى سوابق أو لواحق فى الشغلانة كلها

عايزين السودان يبقى شى ديستنقويشد ورماركابل زحاجة كويسة فى الكوكب العجيب ده

ده كل المطلوب

الله يحييك يا محمد فرح

فى حاجات والله بنفور الدم وبتخلى الزول يعضى ايديهو

يعنى هسه أنا مثلا لو ما عاجبنى البشير

ده بكون شى خاص بينا نحن السودانيين

او يفترض يكون الفهم كده

وما حاقبل أى زول ما مننا، هو إيفر بى، يدخل بيناتنا

فما بالك لما الزول ده يكون قاصد ومترصد ومصر على ممارسة نوع من الاذلال بدون أى اعتبار لمعنى سيادة الدول وكرامة اهلها

ما اظن فى زول برضى بى شى زى ده

جننا وجن العوج والاستحقار

Quote: وبمثل رمز لسيادة الدولة وكرامة اهلها

يعلم الله أخي "المطر"

كم أثق في نبلك ونبل مقصدك ورهافة حسك وووو كل شيء

كم أثق في أنك مدفوع بعاطفة طهورة وصادقة
ولكن

الكلام كله عندي ليهو مليون رد ورد
وتعليق وتعليق

والحتة دي بالذات عندي ليها أكثر من ذلك

رمز شنو يا أستاذ

مشكلة السودانيين "الوجودية" مع هذه السوبر مافيا تتعدّى التلتمية ألف نّفْس الأُزْهِقَتْ نَزَقَاً محضاً في دارفور
مشكلة السودانيين عميقة الجذور مع هذه الطغمة لا تكمن في مجرد كونها "نظاماً دكتاتورياً غاشماً وظلوماً"


يا مطر

أنا ما عارف

لكن ما يتخيل لي أنو الدنيا فيها بشاعة زي بشاعة عمر البشير ومن معه

ولو لم يكن لمذكرة أوكامبو "المباركة" من نفع سوى فك ارتباط هذه الرمزية المهينة
.... فالف الف الف شكر لها

عندما يصبح رمز السيادة مجرماً"ضد" محض "الإنسانية"
ولا تصرخ السيادة ولا تنتفض من رمزيته لها
فإنها رضيت بأن تكون هي ذاتها مجرمة
ولا وألف لا لسيادة يتربع على عرش رمزيتها هذا المجرم الأخرق



ومعليش أيها المرهف النبيل

سأعود إلى هنا ما وسعني العَوْدُ الذي أرجوه أحمداً دوماً

ازيك يا بحيرى

كيف بالله

تعرف إنه السياسة دى شدة ما كعبة

اهو زحتك انت من ابداعك السمح داك وشغلتك من الشغل الجميل

بالله مش صاح؟

أكيد كلامك كله واقع لى وفارزه تب

وأكيدين كمان إنه كلامى أنا برضه وقع ليك وفهمت القصد

ولا شنو

لو اخدنا بعناوين الموضوع الكبار

خلينا بس نلقى لينا مبرر، إن كان مطلوب يعنى

نلقاهو مثلا لحكاية رمز دى

ممكن مثلا نقول على الأقل من الناحية البروتوكولية أو المراسمية لو جازت النسبة

يعنى البشير لحد اللحظة دى وقدام أى زول فى العالم، وظيفته الرسمية هى رئيس السودان

ما مافى رئيس تانى ولا كيف

تعرف يا بحيرى اليومين دى بقينا نكون ماشين فى الشارع ولا فى الشغل

على الأقل خمسة او ستة جنسيات بقولو ليك نفس الكلام بلغات مختلفة

يقول ليك رئيسكم عايزين يودوهو المحكمة ليه

يعنى اكيد هم ما عارفنى حزب خضر ولا جزب امة ولا شيوعى ولا مؤنمر شعبى الخ العقد الفريد جدا

اها انا طوالى بزعل واحس بحقارة واسى فى نفس الوقت

والمشكلة الأكبر كمان انه اخوك نصه جعلى كتيابى والنص التانى شكرى

كومبنيشن بايخ جدا

ههههههههههه

يعنى ميتة وخراب ديار

كنت عايز اقول ليك بتاعة اتلم شنو على شنو ديك لكين خفت من ناس النصين الكعبين ديل

فده الحاصل والله

عزيزى وصديقي العزيز جدا أبوذر

صحيح أنك طلقت السياسة

من بعد سنة أولي جامعة ووجهت كل اهتماماتك للأدب الذى تجيده

ونحن نعرف اجادتك للشعر كما للقصة والنثرعموما

ونعرف بأنك لم تدخل معنا في بوست رفاق مصر حتي لا (يتاورك الضرس)

هذا كله مفهوما لدينا

ولكن هنالك أشياء مهمة لابد أن نتفق عليها وهي :

1- لأهلنا في دارفور قضية حقيقية وعادلة السبب فيها نظامنا ويجب أن يعترف بذلك

2- العمل علي حلها وتعويض المتضررين بشكل عادل

3- الشعور بالحقارة دون ماذكرته في (1 و 2 ) يؤذى الملايين من المتضررين

ويشعرهم بأنك لا تشعر بهم خاصة وأنك شاعرا .......والحقارة في بوستك هذا تعني شخص الرئيس فقط

ولأن الاعلام العربي في المنطقة التي أنت بها الآن ينظر بمنظار لا ينظر به أهلنا في دارفور

المتضررون الحقيقيون (الواطين للجمرة)

أهلك الجعليين ديل لو ما قالوا أننا أخطأنا وسنعمل علي معالجة الخطأ ما عندهم حل

وكل زوبعة الاعلام العربي ده حا تنتهي بعد أيام قلائل وشعورك بالحقارة سيتلاشي

فعلينا جميعنا أن ننصح (نظام الأمر الواقع) بأن يرفع الظلم عن شعبه خاصة (أهلنا في دارفور)

بدل (الشعور بالحقارة) .....اللي حا يودى ولا حايجيب .

توضيح لابد منه :

لقد سكنا وعشنا مع بعض أبوذر وشخصي في فترة أعتبرها

من أجمل فترات العمر

لذا أعتقد بأنني أعرف طريقة تفكيره لحد ما

فعلا يمكن أن يتغير التفكير أثناء مشوار الحياة

ولكن علي الأقل هنالك ثوابت لا تتغير بسهولة

لذا يمكنني أن أقسم بأن أبي ذر أستفذ في شوارع الدولة

التي يتواجد بها

فلقد كنت يوما بدولة خليجية وأعرف كيف يفكرون

فالعجز العربي أمام المجتمع الدولي , والاحساس بالغبن

ينعكس بسرعة علي أى قرار, ولكن سرعان ما يتلاشي

هذا الشعور ليتحولواا لأمرا آخرا .

فيجب أن يعرف القراء :

بأن أباذر يتفاعل مع قضية (أهلنا في دارفور)

وبالتالي يتفاعل مع قضايا الشعب السوداني كلها

ولكن ان شاهدتم واستمعتم الي أجهزة الاعلام العربية كلها

ستجدونها تتناول الموضوع من جانب واحد

في حين أن العملية لها جوانب كثيرة

فمن منا لا يعرف ظلم الغرب لنا

ولكن ظلم ذوى القربي (لا يحتمل)

فلنترك حاليا موضوع المحكمة الجنائية

ولننظر الي مشاكل أهلنا في دارفور

أبو ذر المطر

تحياتي ...

يقول أحد الكتاب السوفييت أن الاحساس من حيث هو إحساس لايمكننا محاكمته ... ويمكنني أن اتفهم هذا الامر علي أساس أن المرجعية التي يجب أن يتم من خلالها محاكمة الاحساس هي الشخص مصدر الاحساس نفسه وهذا ما لايملكه أحد سواه ...

فقط أتساءل ما الذي يمكنه أن يحيل الكبرياء والأنفة الخاصة بالانسان ... غلي رغبة في التعلق والامساك بقشة تنجيه من الغرق ..

إنه الأسي ... والبؤس ... فلا تلومنا ....

ازيك يا جعفر وكيفك يا زول يا جميل

صحيح طبعا مافى حد بيعرف كنه وحقيقة الإحساس إلا صاحبه بس

أما المنتج الطالع من الإحساس ده، أو نتيجته فممكن أى شحص تانى غير صاحب الإحساس يعرفه طالما خلاص طلع وبقى نتيجة

Quote: فقط أتساءل ما الذي يمكنه أن يحيل الكبرياء والأنفة الخاصة بالانسان ... إلي رغبة في التعلق والامساك بقشة تنجيه من الغرق ..

التساؤل ده والله يا جعفر عايز ليه نضمى كتير لأنه المداخل ليهو كتيرة ومتنوعة كمان

يعنى فيه أبعاد متعددة ممكن تتجمع وتسوى الإجابة، أو الإجابات

لكن فى العموم اعتقد إنه فى حال تحول أى من الأحاسيس دى، كبرياء أو أنفة الخ، لى نوع من الرغبة بس فى أى شى تانى مخالف لطبيعة الإحساس الأصلى أو بعيد منه

فى الحالة دى غالبا ما تكون عبارة عن ردة فعل آنى وممكن ينتهى بزوال المسبب

يعنى ما بالضرورة الرغبة دى تكون ترجمة حرفية أو أصيلة لأصل الشعور

والأسى والإحساس بالغبن والبؤس برضه كمان

كلها إجابات أو مسببات متينة جدا

تحياتى ليك يا جعفر

فعلا والله يا عاطف

ديك كانت أحلى ايام الدنيا
وأطعم لحظات العمر

لا هموم ولا مشغوليات ولا مرض

التفكير والله ما اتغير والقناعات ياها نفسها

الدنيا يمكن هى الإتغيرت

اقسم لك بالله يا عاطف
مشكلة أى إنسان فى السودان كله بالنسبة لى مشكلة شخصية

وإنت عارف طبعا طريقة فهمى وتعاملى مع الأمور الزى دى

ولسه بنتمنى ونرجو ونغنى إنه بلدنا تبقى قدام الخلوق كلهم فى الدنيا

ما حنيأس ولا حنقنع

وأكيد الحال بنصلح

عاطف الحبيب

اخوى وصديقى العزيز

كيف أحوالك وحال الدنيا واريت حالك زين


ياخ شكله كده السياسة دى ما منها فكاك اصله

تلاتين سنة والزول باعد نفسه، ولو نظريا بس، وكل يوم يلقى روحه "ملكك" فيها

Quote: لأهلنا في دارفور قضية حقيقية وعادلة السبب فيها نظامنا ويجب أن يعترف بذلك 2- العمل علي حلها وتعويض المتضررين بشكل عادل

والله ده من البديهيات يا عاطف عندى

وعند البشير نفسه كمان أكيد، لأنه ده الشى الطبيعى المفروض يكون عند أى إنسان

والله يا عاطف يمكن أنا أكون واحد من أوائل الناس هنا الكتبو عن قضايا اهلنا فى دارفور

والأرشيف موجود طبعا. وإن اختلفت طريقة التناول

ما علينا، خليك من الأرشيف

كنت أنا وما زلات مش متعاطف مع أهلنا دارفور وبس، لكين من أشد المطالبين بتطبيث أى شى يرفع الظلم ويحاسب أى زول غلطان من أى طرف كان

والزول الشجاع هو البعتذر عن غلطه/ وأى زول ممكن يغلط ويسوى الحاجات الشينة الكعبة

وتانى عايز اقول ليك شنو يا ربى

المهم وزى ما قال محمد بادى

يانى حميد القديم
الا بس فاقد حجابى
وراح سوارى

شفتا صديقي

انا وانت لا متفقين ولا مختلفين




... ولا مشكلة مع هذا



يديك العافية


وانشاء الله ربك يهون اجيك راجع تاني برواقة أكتر

كيفك يا بحيرى

الله لا جاب خلاف ياخ

وكونه الناس يكونو واقفين فى محلين مختلفين
أكيد كل واحد منهم بكون شايف جزء معين من الشى البعاينو ليهو

والأفضل طبعا إنه الزول يدخل جوه الشى ويشوفه كله من جميع جوانبه عشان يقدر يفرز الحاجات كلها

وأكيد برضه ما بالضرورة كل الحاجات تتساوى فى نظر الناظرين

ارقد سعادة وطيبة وعافية يا فتحى

Quote: بغض النظر عن أى شى وبغض النظر عن موقف المعارض وموقف المؤيد وموقف المحايد مذكرة ال آى سى سى دى استحقار والله ومعروف الغرض المطلوب منها المؤيد عارف والمعارض عارف نعم حصل الشى الكتير فى دارفور وفى غير دارفور وكل نزاع مسلح فى أى مكان فى الدنيا بكون فيه ضحايا وفظائع وأهوال كل ده معروف ومفهوم ومرفوض بالتأكيد وفى مليون ألف طريقة للتعامل معاه وحله وحبنا وتعاطفنا الكامل لكل الضحايا والناس العانو ولسه بعانو بس إلا الحقارة كل شى إلا الحقارة ولسه برضه الكلونياليين القدام فى شكلهم الجديد مصرين على فرض الشى العايزنه، وياهو نفس المبدأ القديم يا معانا يا ما معانا بنفس عقلية الهيمنة والتسيير القديمة شنو يعنى تطلع مذكرة اعتقال لرئيس دولة على راس الحكم وبمثل رمز لسيادة الدولة وكرامة اهلها لو كان كعب أو كويس ؟ هى الحقارة دى كيف أنا شخصيا بهمنى شى واحد أحد إسمه السودان سواء كان رئيسه البشير أو الجن الأزرق السودان قبل كل شى، وبعد كل شى لأنه كل شى

تسلم البطن الجابتك
.
.
قلنا ليهم الموضوع مو هو البشير
بس هم عندهم مصالح وجارين وراها
والأجنبي قايدهم من إضنيننم بعد ما قداها ليهم

صديقي العزيز جدا جدا

أبوذر بابكر

حينها لم نكن نعلم بأن لقبك (المطر)

وأظن أن هذا اللقب جاء بفعل أنك (تمطرهم)

بوابل الأدب (فلم أكن متابعا للمنبر) عندما أنشئ

فمتابعتي له جاءت قبل ثلاثة أعوام علي أحسن التقديرات

وبما أنك (من الأدباء الفطاحلة) كما أعتقد أنا

وبما أنك من زملاء (الشهيد طه يوسف عبيد كما أعرف أنا)

وبما أنك من (السياسيين الذين تعلمت منهم أنا دروب السياسة)

وبما أنني زرتكم (بودراوة وزرتنا أنت بقريتنا الصغيرة المناصير)

فقد لا يصدق البعض بأننا (أصدقاء الزمن الجميل)

فأنت تظهر للناس حاليا بأنك الأديب الرقيق

وأنا (المناكف المشاكس)

والآن جاءت الفرصة ليعرف البعض بأنني ليس (مشاكسا ومناكفا)

بدون فائدة (فهلا فعلت)

ولكنه الانفعال احيانا



أما حجابك اللابسه

فكان من واجبك وحقنا عليك

أن تأتينا بهناك وعلي الأقل (تقول ازيكم)

فبالفعل أنا زعلان منك زعل ما ممكن تتخيله)


ولو كنت بالفعل كما قال (محمد بادى) لما كان هذا حالك

فأنا في أول مداخلة ذكرت اسمك (ولكنك لم تعبرنا)

فما هو السبب ؟ الذى لا يجعلك تقول حتي صباح الخير؟

Quote: أنا شخصيا بهمنى شى واحد أحد إسمه السودان سواء كان رئيسه البشير أو الجن الأزرق السودان قبل كل شى، وبعد كل شى لأنه كل شى

يسلم الفهم ياخال فاطنة
أبوذر
زمان حبوبتي الله يرحمها
كانت لمن نغالطا في دا صح ودا غلط
عندها رد واحد دأيمًا بتقوله وهو :
( لمن يقرأ ولمن يفهم )
وطبعًا رغم إني كنت بقرأ
لكن مابفهم ماكانت ترمي إليه
إلا بعد حين من الدهر...

لك التحايا النواضر .

سمية العزيزة

تحايا وتقدير كتير

سلمتى إن شاء الله من كل شين

عاطف الحبيب

كيف حالك يا زول يا أخدر

تعرف أى زول من الجزيرة بالمناسبة دمه لونه بكون اخضر

ملخبط بى أب سبعين واب عشرين وصفق الفول والقطن وروج البرسيم

أنا، وبفخر طبعا وأزهو والله وأفرح لما أقول نى واحد من الناس الأوائل الشاهمو فى سودانيزاونلاين من يوم سمايتها

وقبل الإسم ده كان عندى إسمين كمان

إسم المطر ده كان التانى بعد "أب آمنة"

بعدين المطر دى جات من ريدتى للمطر وقناعتى إنه هو الحبر بتاع ربنا البكتب بيهو كتب الحياة كلها

لكين ما عرفت "طه يوسف عبيد" والله يا عاطف

إحتمال يكون اتلخبط عليك إسم تانى

وبالنسبة ل "عاطف مكاوى موسى"

أكيد برضه معظم الناس هنا فى سودانيز ما بعرفو عنه غير الزول السياسى الهمام والنشيط والجاد

لكين أنا إضافة لى ده كله بعرف عاطف الزول الحبوب والنقى والطيب واخو الأخوان جد جد

الزول المرح الكريم والذواق البريد الأشياء السمحة

تلاتة بالله العظيم ده كله حقيقى

وإنت عارفنى ما قاعد اعرف "الكضب"

أما بخصوص موضوع الرفاق

اقول ليك شنو عاد يا عاطف

والله خليتنى احس بحرج وخجل كمان

يمكن عشان الموضوع بدا وأنا غائب عن المنبر وما شفته

بعدين فى معظم الأحيان الزول بدخل هنا وبالكاد يحاول يسلم على الناس ويرد على بعض المشاركات

والوقت دائما ممحوق ومشلهت

يا زول امسحا لى وشى القبيح ده

وكل شى ملحوق

الشى الأكيد يا قريش هو إنه القصد من الشغلانة كلها ما شخص واحد أو أشخاص

وبدون الخوض فى التفاصيل المعروفة للناس كلهم

الأجندات بتاعة ويذ أس و اقينست أس، وفرمانات النظام العالمى الجديد لسه فيها حاجات كتيرة ما ظهرت

للسودان ولغير السودان

ولسه كمان ربك يستر بس

الآن تذكرت يا أباذر

فان رفيق الشهيد

طه يوسف عبيد

هو الأديب أيضا

مجدى النعيم

الذى وصل الي مصر (الزقازيق) بعدنا

فنحن كنا نسبقه بسنتين

ولكن لأنكما تخرجتما

من مدارس (مدني)

فاختلط علي الأمر

وأنت ومجدى النعيم

من الأعزاء عندى

فالمعذرة

لأنني أتيت (بمعلومة خطأ)

أبوذر الحبيب ..
إزيك يا مطر والشوق زيه ..


انت قايل الحقارة دي الجابه لينا شنو ..
ما ياها زي جنس العمائل دي ..
بسبب الوصاية والناس الما عندها زمه والما بتخاف الله في شعبه ..
المذكرة دي طلعت ليها قريب السنة وهاك يا تضليل وهاك يا كذب على الشعب ..
كان ممكن نتدارك دا كله بجمع الصف الوطني وحكومة وطنية ..
لكن تقول شنو يا مطر الناس ديل مقفلين عين ومفتحين التانية بيستغلوا الأزمات ..
وشعبنا مسكين عاطفته قوية وما بقدر يستحمل في تراب بلاده ولا عزتها ..
هسي المفروض نعمل شنو ..
هل الهتافات والمسيرات بتحل حاجة ..
حتى ولو القرار دا إتلغى شكلنا بقى محرج شديد ..
لأننا بقينا أمام الوصاية الدولية ودي معناها كبير وكل يوم ح يطلعوا لينا بحاجة جديدة ..
والله بلدنا دي ما بنرضى فيها أي حاجة ..
والذل كمان ما بنرضاهو ولا الخنوع ..
البلد دي عايزه ليها ناس وطنيين ناس شجعان يخافوا الله فينا ..


لك الله يا وطني ..

معتصم الحبيب

كيفك يا سمح

والله يا معتصم الزول قلبه على الناس الفى البلد

الناس البسيطين الطيبين

الراقدين تحت ضربات مطرقة السياسة وسندان الإستحقار

الناس هتاك

خليط جميل من الطيبة والتسامح والصبر والمعاناة

أمنيات ما بتنتهى بحياة أفضل

لأنهم فعلا بستاهلو ويستحقو حياة افضل كتير من كده

ونحن واهلنا بقينا هايمين ورايحين بين

أهل السلطان فى أفق السياسات الضيق

وسماء التحكم والغطرسة الواسع

خلينا نستنى ونشوف ما يتمخض عنه جبل الإنتظار

ونشوف خرج الأيام مليان شنو