البشير يقول لمحاكميه : القرار حققكم دا موصوهو واشربوهو !

ويضيف : زماان طلعوا القرار 1706 , هسع وينو ؟ ماصوهوه وشربوهوه ,

وهسع بنقول ليهم استعدوا عشان ده برضو حتموصوهو وتشربوهو !!

ويقول موجها الحديث الى السيد محمد ابراهيم نقد :

لقد كنت طوال أربعين عاما تناضل من تحت الأرض ,

وهسع بنقول ليك ان شاء الله تانى تعمل بالواضح وما تحتاج لتحت الأرض الا المرة الأخيرة بعد عمر طويل !! ( يقصد حين دنو أجله ).

جاء ذلك خلال الحفل المقام اليوم بمناسبة افتتاح سد مروى بالأقليم الشمالى , والذى حضره عدد من ممثلى الدول المانحة والمشاركة فى تمويل السد , بالأضافة لممثلى الشركات الألمانية , الفرنسية , والصينية والتى قامت بتنثيذ وتشييد السد ومولد الكهرباء , وذلك بمشاركة نخبة من المهندسين السودانيين .

وفى ختام حديثه أعلن البشير عن المكافأة التحفيزية للمهندسين السودانيين المشاركين فى تنفيذ مشروع سد مروى والتى هى عبارة عن راتب ستة أشهر لكل منهم . كما بشر الفئات الفقيرة من أبناء الشعب ( حسب تعبيره ) والذين يبلغ حجم استهلاكهم الشرى المئاتي واط شهريا بتخفيض ربع قيمة فاتورة الكهرباء المستهلكة ,
أما بالنسبة لأصحاب الحرف والصناعات الوطنية فأن تخفيض فواتير استهلاكهم من الكهرباء فقد تحدد ب 30% من قيمتها شهريا .على أن يبدأ العمل بذلك فى الثلاثين من ينيو القادم تزامنا مع الأحتفال السنوى بانقلاب الأنقاذ .

وكشف سر شح القمح وخلو المجازن والمخابز منه فى سنوات الأنقاذ الأولى عازيا ذلك قائلا : ( طلبنا القمح من أمريكا , وقالوا لينا لازم توقعوا على شروط , فرفضنا , رجعوا تانى وقالوا لينا لينا حنديكم القمح , ودفعنا قروشنا ولما الشحنة وصلت ميناء بورتسودان , قالوا لينا تانى لازم توقعوا على الشروظ ! فرفضنا تانى , ظانين بأن الشعب سيخرج مظاهرات ضد الحكومة ! لكن الشعب فعلا خرج مظاهرات ولكن تاييدا لقرار الحكومة الرافض للشروط , وجمعنا اخواننا المزارعين ووأوضحنا لهم الحاصل , وتكاتفوا معنا وزرعنا القمح وحققنا الأكتفاء الذاتى ! وان شاء الله السودان حيكون دولة عظمى قريبا !)

ملاحظة : لكن البشير ما أوضح لينا هل أمريكا اعادت ليهم قروش شحنات القمح الما استلموهو ورجع ولا لا ؟!
وقام بترديد عبارة ( الرد .. الرد ... الرد بالسد !) والتى قام بترديدها الغبش خلفه عند ختام كل جملة يتهكم فيها البشير بأمريكا والغرب زهوا ! , كما حمل الحضور تمثالا يرمز الى أوكامبو بجواره علم السودان , قاموا بحرقه وسط الحضور .
وفى الختام قدم البشير بعض العروض من ( العرضة الجعلية , والنقزات المعهودة وسط تصفيق الحضور الحار ).

وقد تمت ترجمة كلمات المتحدثين لغير الناطقين بالعربية بوساطة متخصص احسن مهمته , الآ أن كلمة السيد البشير كانت قد أغفلت ترجمتها لحكمة يعلمها الله ! مما جعل الحضور ممن يجهلون العربية فى حيرة بدت على وجوههم !( ولكنهم قطع شك استمتعوا بالعرضة !).

ست البنات .