Post: #1
Title: الدنان
Author: adil amin
Date: 02-24-2009, 09:56 AM
Parent: #0
هذا البوست براعية سوبر ريد
ذو القوة الثلاثية للابادة
|
Post: #2
Title: Re: الدنان
Author: adil amin
Date: 02-24-2009, 10:06 AM
Parent: #1
يطلق النار على قدمه ويصرخ
اما كان اجدى
ان يطلق النار على راسه الخاوي
ويستريح
|
Post: #3
Title: Re: الدنان
Author: adil amin
Date: 02-25-2009, 08:46 AM
Parent: #2
الحرس القديم
جعفر اسماعيل الطيب*
يا صائحا بالسحر فى سوق الخسارة
امزج صياحك بالبكاء
ولتسقط الوجه
الكئيب الاستعارة
ولتستحيل فراشة تهمى
على وجه الدعاء
ليكن كلامك برزخيا عابرا
جسد الرحيل
الى رؤى الشوق المقيم
كل اللذين رضو بخلع الذات
عند نهايةالشط القديم
فقدو شيبات زواتهم
وتكلسوا صورا على جدر المغارة
اياك والزبد ..الجفاء
ثم اياك والوشل الغناء
وليكن غناؤك صادقا
من الصميم الى الصميم
كمذنب الليل البهيم
وارفع لقافلة تسير
عل الطريق
يد البريق
وابنى لها الضوء البشارة
ليكن كراصدةالشهاب
تغوص فىعنق الرجيم
ليكن مع هذا وذاك
على صراط مستقيم
ليكن كهمس العابدين يسح
فى الزمن الحريق
ليكن كهطل الغيم
فى ام القرى زخا
على الحرم المنارة
|
Post: #4
Title: Re: الدنان
Author: د.نجاة محمود
Date: 02-25-2009, 09:42 AM
Parent: #3
سلامات يا عادل
وكيف بعش الدبابير الا يحتاج ؟
|
Post: #5
Title: Re: الدنان
Author: adil amin
Date: 02-26-2009, 08:57 AM
Parent: #4
Quote: سلامات يا عادل
وكيف بعش الدبابير الا يحتاج ؟ |
الكوزة الظلامية بيان
سلام
قلتي لي ((عش الدبابير))
ناس ((الخمير الحمر)) وزعيمهم مجرم الحرب بول بوت المقيم في دوحة العمر الظليلة والمورقة لا زال في ضلاله القديم
شايف المعارك حامية الوطيس..
....
سيبك منهم...
تعالي احكي ليك عن زيارتي للسودان الاخيرة ..اصلو الناس هنا بتتونس شوية مرات
(1)دنان سعاد
لمن مشيت عطبره التي بقت مقبرة وصمت فيها الحديد والنار وصلت الظهر ومشيت في شمس تصر العين لحدت بيت الداخلة ووصلت الظهر...وهناك لقيت حليمة بس والبيت مصنصن..رقدت في البرندة العجيبة ديك..وجابت لي حليمة البارد..ورجعت بي الذكريات
قلت لي حليمة: وينو الدنان الكان بجي الضهر داك ويدخل في شقيقة الدوم في البرندة..ضحكت وقالت لي مالكم يا ولاد المرحوم محمود تسالو عن الدنان ده مالكم ...غير دوامو الصباح...اصلو صفارة السكة حديد وقفت ونزلو المعاش
وتعجبك حليمة مرة حسين عمي في خفة دمها وبديهتا الحاضرة وقالت لي سعاد لمن جاءت سالت من الدنان وطلبت غدا خدرة بقراصة وقالو لي انت لمن جيتي بكيتي لمن لقيتي شجرة ناس مك الدار قطعوها والشجرة بتاعة البلي ديك..والله انا ذاتي حذ في نفسي التغيير البشع الذى حل بالداخلة وعطبره والماسي الكثيرة الحصلت في سنوات الحصاد المر.. والناس حكت لي الكثير وكلاما ما كمل وما اظن يكمل
ما اصلو الفي الجوف اندفن
لا بتنسي
لا بتمحي
لا بنتهي منو الحريق
***
ودي كده عناوين رئيسة فقط
وبجيك صاد
والبوست ده عائلي ما عايز القى لي دنان حايم بي هنا
وبالله شوفى صورة الدنان الفي بروفاليك ده عجيب كيف
بت سحر علا تشبه سحر نفسها لمن كانت صغيرة
سلام للاسرة والجميع
|
Post: #6
Title: Re: الدنان
Author: د.نجاة محمود
Date: 02-26-2009, 09:27 AM
Parent: #5
يا سلام على الداخلة
طبعت اليومداك بكيت على اكثر من النيمة الاليفة..
على عويض الما اتعرف ليه مكان وعلى فاطنى بت الحاج وعلى وادي الشام وعلى الحرم وعلى بت حسين
حداتنا الحبيبات وعلى سعدة عمتي رحمهم الله جميعا
وعلى البيت الحسيت بيه ضيق جدا ودهشت لعدد الناس الكانو فيه ولكن قيل اذا النفوس اطايبت
العتقريب بشيل مية.. واكثر حاجة ادهشتني قرب دكان ناس الدابي لينا
ولا كان يستحق كل الهيصة ديك والمفاريك البتطلع لما نرفض نترسل ليه بحجة بعدو
ولاقيت سمية هارون..
مشيت مدرسة الداخلة القديمة وشفتا بيت ناس صاحبتي اخلاص عبدالموجود
اخلاص ماتت يا عادل اكيد ما بتكون سمعت..ربنا يرحمها ويعوضها بشبابها الجنة
ومشيت جنب ناس بيت خالة فرحين السموها فرحين وما لمت في فرح واحد
اذكرت على صاحبنا الذي مات غرقا في سن صغيرة لس مذكرة لما زمزغ في البلي وعضيتو في اضانو
والغضبة المضرية لفرحين وترضيات الحبوبات..والطاحونة الكنا بنشوفها بعيدة جدا
ونلف بالقفة حقت الدقيق كم مرة ادفق الدقيق في لفاتنا وشكلاتنا في تغير اضان القفة
برضو لقيت ميدان الداخلة ياخي دا ما يصل 1000 متر ليه كنا شايفو
قدر الدنيا والاخرا
وعمي عيد الله والكوشتنية الدائمة لكل عابر سبيل الى كل راكب دراجة.
صالح ود عمي مسمي محاسن عم عيدالله قال الكوشتنية حقتها والناس تغلبها..
تذكر دكان الباسطة داك الحل الوحيد الذي نتسابق لذهاب اليه
اتقفل..
يا رب وين عواطف وكمال حميدو.. شخصيات شكلت طفولتنا..
بالمناسبة مشيت جنب بيت ناس حبوبة الحرم ود العقيد رحمهم الله اجمعين
كانت بالجد رحلة عجيبة خلاس .بعد قريب 38 سنة ترجع لمراتع الطفولة ..
وتمنيت امشي المدرسة الثانوية عن طريق السودانة
المرة الجاية طريق قطعته لمدة سنة كاملة..
اجيال وراها اجيال...
وتبقى عطبرة اكثر شئ مضيئ في حياتنا وعرفت لماذا كان يلاهي الوالد بالرجوع الى عطبرة
تمنيت لو كنا دفناه رحمه الله في عطبرة..قرب اهله..
|
Post: #7
Title: Re: الدنان
Author: د.نجاة محمود
Date: 02-27-2009, 12:38 PM
Parent: #6
كتب الاخ طارق الخواض هذه الرسالة
اتمنى لو استمر في الذكريات
مع صادق المحبة والاخاء له
Quote: بت الداخله الموقرة
سلامات
أسمحى أن أخاطبك المره ده بدون ألقاب أصلك إنتى وعادل أخوك رجعتونى لحته عجيبة .
15 سنة يا نجاة في الداخله نادى الجيل الوادى الوطن ناس الحسين بكسر الشين وبلة الجزار ووداعة بتاع القش جامع ود نواوى أعمامى حسن السرور وحسن أبشر .
تحياتى ولنا عودة . |
|
Post: #8
Title: Re: الدنان
Author: adil amin
Date: 02-28-2009, 09:41 AM
Parent: #7
(2) حسن النعجة
تتذكري حسن النعجة ود بت كلس الكنا بنمشي نجيب منها الفول الله يرحما..طبعا بعد ما اتوفت بت كلس اتزوج ابنها الكبير وبقي حسن الطفل السمين شديد داك تذكريه قاعد مع اخوه وللاسف مات حسن كما اخبروني بصورة فاجعة جدا..سافر اخوه الخرطوم وخلوهو في البيت براه وخو طبعا بقى ما بقدر بتحرك(السمن الناجم عن خلل في الغدد الصماء) ومات براه وبعدايام الريحة مرقت والناس كسرو الباب..ولفوه ميت ودفنوه في مقابر الداخلة جوار امه الراحلة التي خلفته ورائها في هذا الزمن التعس يوم يفر المرء من اخيه وامه وابيه
وناس عطبره الكانو اقوى من نظرية الكنقر
يقال ان العلماء في استراليا الاتملت شيوعيين سودانيين دي..اجرو تجربة على حيوان الكنجر المشهور بؤمومته المفرطة..ختو الام مع ولدا في الجراب..في برميل بداءو يملو موية..لمن الموية حصلت الولد في الجراب رفعته فوق ولمن الموية جاتا حلق واختنقت نزلتو تحتا وطلعت فوقو شفتي الانقاذ دي ودت الناس وين
الله يرحم اخلاص وكمان استاذ عبدالحي الرائع الذى كانت وفاته في القطار قبل ما يصل الحرطوم وثكلته المدينة عن بكرة ابيها
..
والله تصدقي عطبره والداخلة بالليل...لمن تتجولي فيها...تشبه مسلسل kingdom hospitalالشغال في ام بيسي اكشن
تحسي بارواح الناس الطيبة التي رحلت في صمت وهم كثر تتجول حولك في كل مكان...خاصة بعد ان صمت ضجيج القاطرات
...
انا مشيت بيت الثانوية ومريت بتحت على السودنة ودي قصة تانية
ونواصل
|
Post: #9
Title: Re: الدنان
Author: adil amin
Date: 02-28-2009, 10:17 AM
طبعا الاغنية دي كانت تتردد في سوق الداخلة من دكان اب شنب وراديوهو الفلبس اب لمب داك
وكل ما الزول يمسع ليه غنية قديمة خمس نجوم ذى الابيض ضميرك يشوف سوق الداخلة و(الابيض ضميرك) دي وكانت مكتوبة في البولمان الفورد البنقل الناس من سوق الداخلة للسوق الكبير مرورا بالمستشفي وسوق الزيارة
ونهديها لطارق الجزولي والزوار والكرام اصدقاء التداعايات العطبرواية... عن سيرة مدينة ..كانت اسمعا عاصمة الحديد والنار قبل ان يغتالها بنو تغلب في اعز ما تملك(السكة حديد) وتشريد العمال والموظفين والحديث ذو شجون
للاسف الكود بتاع رفع الاغاني لا يعمل
|
Post: #10
Title: Re: الدنان
Author: adil amin
Date: 02-28-2009, 10:27 AM
Parent: #9
|
|