غســيل الأمــوال ،، كاراكاتير

العزيز مصدق
تحياتى
المقال دا كتبته سنه2006
كان عندى عمود فى جريدة الخرطوم "فياقة حريم"
ولمن شفت غسيل الاموال قلت النجيب الطشتى حقى ونغسل معاك

فياقة حريم
غسيل الاموال

حكمة الله فى ناس بروجوا لغسيل الاموال فى الجرايد"جريدة اخر لحظة ـ مقال كتبه الزميل حسن ساتى " وشوف عينى ما قوالة انه الاموال المغسولة دى بترفع من الاقتصاد الكلام دا قالو خبير اقتصادى ، دقر يا عين ، نان فاقعين مرارتنا ليه بالكلام عن الفساد ومحاربة الفساد ما خلاس التبقى سايبه اكتر مما هى سايبه وعندنا (الحبال ) واى زول من هسى ( طشتيهو ) جاهز للغسيل خلونا نغسل وزى ما تجى تجى ، لكين الحكاية ما غسيل ، الحكاية انه الغسيل بيفسد الاقتصاد يعنى انت ما بتقدر تقدّر حجم الاموال الداخلة والخارجة ، وان اصلا بقت الحكاية كدى يعنى صحيحة طيب ليه ممنوعة فى البلاد الاقتصادا ممتاز ؟ يعنى فى الغرب (البتقال عليهو بدون ذمة وبدون دين ولا ايمان ولا احترام ) ممنوعة بحد القانون والله قال بى قول من يتلاعب بالاموال ، وسبحان الذى لا ينام شوف عينى فى التلفزيون عمى بوش جايبين دخله كم ومنصرفاتو كم ؟ وصرف كم والدولة دايرة منو كم ؟ ونحنا يوم واحد ما فى زول قال لينا مرتب الرئيس كم ولا بسوى بيها شنو ، مرة الرئيس السابق كلينتون سنة تسعة وتسعين آخر ايامو اظنو قال داير يتمنجه ويحلق على كيفو ، دفع للحلاق مية دولار بنات حفرة ، الحكاية عادية يعنى زول داير يحلق شعرو بمزاجو ، لكين منو البخليهو يسوى كدى ، الدنيا قامت وما قعدت لمن رجع المية دولار لخزينة البيت الابيض ، تحسبو لعب ؟
لكين نحنا ناس العالم التالت ديل منو البسال منو ؟ الواحد تلقاهو مرتبو بكفى ليهو تسعين اسرة غلبانه وهو ولا هاميهو الناس انشا الله يحرقو وكتين هو ماكل احسن اكل وشارب احسن نوع من الموية الساقطة والمستوردة والاكل من احسن وارقى الاماكن ناس كشا مشا عنهم ، زمن الاسلام الاول كان فى جنس اللخبته دى ؟ مافى وارجعو للسيرة النبوية الشريفه وشوفو الخلفاء الراشدين كانوا بتعاملوا كيف كان مع الناس ولا مع الذات ، ما فى جنس الخمج ولز النار بالضنب البنشوف فيهو الزمن دا ما فى زول رتيان للفقرا البقوا اكتر من تسعة اعشار السكان ، النزوح للمدن والنهب المنظم ، الفساد بانواعو ، الذمة الزى ما بقولو المصريين ( استك ) الواحد تلقاهو يحلف ليك غليظ الايمان وهو كضاااااب ، والكضب حرام والقبر قدام والسرير حديد والكفن جديد زمان كنا بنقول للزول الكضاب الاغنية دى عشان ما يكضب ، لكين هسى الكضب حلال والناس ناسية اليوم العظيم يوم لا بتشيل معاك ملين ولا خردلة كلو ماشى تخليهو بى وراك ، مالو كلامى بقى زى الوعظ كدى ؟ لكين ما تعبنا من الاذى حق الناس التبريرات العجيبة لاى فعل ، والاسفاف فى التعامل مع البشر كانهم ما بفهموا ، وكانو ما فى زول فى الدنيا دى عندو حق يبقى ابن ادم فى البلد دى ، كرهتونا واتحولنا لناس ما مبالية كل حاجة الواحد يقول ليك ( حقت ابوى انشاء ما تنت ) وكانت حقت منو ود امى حقتنا كلنا والبشوف الاعوج اليعدلوا انشاء الله يموت فى سبيل عدلو ما مهم المهم انو ينعدل
معليش يا بلد بتنعدل الحالة وباكر احلى وباكر بنولع مليون شمعة عشانك ونبدا من اليوم نوقد شمعك ونمشى بيك للبر الامن

وينك يا مصدق

شكلك كدا لسه في السعوديه...
ياخي مشتاقين

تحياتي للجميع
عمر

ياحبة الغسيل والعصر والمصر

أصبحت لغة العصر والعصير جميل

يا جندوبى
مشتاقين والله
و إنت دبت فى الغسيل ده و لا شنو ؟
تحيات عاطرات .

الحبيب عمر دفع الله
طبعا أنا لسه هنا و المشكله ما باين أى نهايه ،
ومتابع معاك هناك ،،
لك تحياتى و تمنياتى الطيبات .

أختى الكريمه سلمى الشيخ سلامة
عاطر تحياتى
بهذه المناسبه لماذا إنقطعت عن الكتابه لصفحة فارغه و مليانه؟
أعتقد إنى قد قرأت هذا الموضوع فى الصفحه إياها ،

Quote: معليش يا بلد بتنعدل الحالة وباكر احلى وباكر بنولع مليون شمعة عشانك ونبدا من اليوم نوقد شمعك ونمشى بيك للبر الامن

هو الأمل .....
ما تبقى لنا .

مــن الأرشــــــيف :

ألأخ/مصدق.السلام عليكم..

هم يغسلو ا ألأموال وينضفوا ونحن نكتوى بنار فراقه..........

أحب بوستاتك يا جميل.........أنا ماشى غسلت لى أموال كده وشاريها ما تزعل منى........................لك الود..إسماعيل محمد احمد عباس....

الحبيب إسماعيل عباس

Quote: أحب بوستاتك يا جميل

و أنا بحب مرورك الأجمل ...
لك جزيل شكرى و تقديرى ،
و أمنياتى لك بغسيل نظيف زى دواخلك .

من الأرشــــــيف :

من الأرشـــــــــيف :

الحبيب مصدق
مسكاقمي
غايتو نحن جاهزين بالطشط وبالبمبر
غسيل وكوي كمان

سلامات ياخال
طبعا أخدنا الرد مباشره على الهواء أمس ...
لكن لامانع من أن نزيد عليهو
غسيل الطشت و البمبر ده لى غيار يوم السبت بس !!

حبيبنا مصدص ..

التحيات الطيبات لك .. وأنت تدهشنا كل يوم ..

شكراً لريشتك التي تعلم بواطن الألم ..

دم بخير،
أخوك/ الأرباب

الحبيب خالد الأرباب
جزيل شكرى و تقديرى لمرورك الجميل
و كلماتك الطيبات ،
صادق مودتى و محبتى .