ضل الشاتي ..

في ضل الشاتي في سنين ..دفنت جواها ..المناظر القائمة والاصوات
الغائبة ..كانت حذود الدنيا عند طرف القرية ..والغابة..كنت بتامل
الطير في صفوف ..الي ان يبتلعه المدي البعيد..واسال من كان قربي ..
ماشي وين ..ماشي بلاد الله ..حد الاجابة وقف ..
بعد سنين كنت انا محل الطير ..وفي بلاد الله ..
بين فرجات اللوري شفت ونحن مرحلين وسط كوم من العفش كنت بشوف النسوان ينشلن الموية من البير
كنت بسال امي نحن ماشبن ..وين قريب وجاين ..ومن يومها انتزعت من القرية ..
ومازالت جواي ..الطاب ..والمركب ....وحبل المريد والمناجل ..
ورائحة فراد الدمور ..في بيت النساجين..ورائحة القطران ..في القرب ..لما يكون في فرح
واسماء البهائم والوان الحمير..وطنابير شباب الفريق ..وصوت الشتم والدلوكة تتخنق..
وابلعتني المدن ..وسكنت ..جواي ...الام الزكري ..
والوطن ..عندي القرية ومازال ..كل مرة ينبت تاني من جديد

الوطن الان خواطر مرحلة تنازع كل واحد منا كل مساء..
ودون استاذان

في ضل الشاتي
كانت اللمة..والصلح والعفو..
ياربي لسة الناس بخير..
وضل الشاتي موجود.بي معناه

يا باسط
دايما تلمسنى محل الوجع الفينى
ضل الشاتى
كانت حبوبة حليمة تجئ الى بيتنا فى الصباحات الباكرة
وتكون حاملة معها "خدارا" لحما وضحكات توزعها علينا
تجلس الى امى نفيسة وتقعدان تنظفان الخدار وتقطعان البصل والقلب
تنذران قهوة سيدى الحسن وود حسونة وجدى ابوقرجة كما كانتا تقولان
وتجئ لذلك العقد امى عرفة من العرضة وامى عازة وامى فاطمةبنات محمود
تحل عليهم حبوبة زينب بت امنة
قالت امى سكينة تحدثنا عن حبوبة زينب انها كانت تجئ بالترماى من ودنوباوى
تنزل فى محطة الدايات وتبدا فى السؤال طارقة اول باب بيت يصادفها
ـ هوى دا حوش البنوت ؟
والبنوت هن بنات محمود الماذون
تجئ اليهن بعد عناء سؤال يبدو راتبا
ولا ينفض السامر قط
يدخلن بعد جلسة الصباح تلك الى راكوبة مفضلة فى الانس والونس
قهوة تدور فناجيلها
وودع يستبطن ماخفى فيخرج وسط وجوم وذهول لا تستطيع تحديد هويته
وتبدا رحلة المشاط وكسر المسيرة وتجميل رحيب بلا مواد كيمائية قط
وحكايات تدور وتدور وانت بين مصدق ومكذب
يناديننا لندلق ماء ما، او لجلب بهار ما، او يطردننا حين ترتفع وتيرة الحديث الهامس
وندف الضحك تنزل عالية
ويمتد الضل وسط اهازيج نفرح بها لان جمعت الينا كل تلك الالفة

سلمي ضل الشاتي و
حواري امدر ورائحة الابري ..وازيار السبيل
وبائع الترمس وصفارة الداردمة وحلاوة وقطن..
ونسوان الجزر ..ورائحة ...بيوت الطين استعدان للخريف
صدقيني كاني غريب وهنا المرارة
نكرتنني البيوت والابواب البتعرففني بعد سنوات ..قليلة
وحاولت اعيش تلك الايام لكن للاسف كل شي اتغير
حتي حيطة الجامع..والشافع ..
كنت غريب هناك