Post: #1
Title: عليكم الله ضوقوا شطة الوالي شوفوها حارة كيف ؟؟
Author: ابوحراز
Date: 02-16-2009, 12:07 PM
زرت أحد الأندية في السودان
حيث دعاني رئيس النادي لمبارة معه في تنس الطاولة بعد ان شاهدني العب باحد الأندية
ويبدو أن الرجل انخدع في شخصي
حيث أنه افتكرني من جماعة { الله أكبر الجديدة } !!
ودعاني بعد يومين لحضور مادبة عشاء تقام على شرف الوالي
لأول مرة في حياتي { آآآآآآآآآآآآكل الحكومة }
فقد أكلت منا الكثير في سنين الاغتراب وغيرها !!!
سجوك ودجاج مشوي وسمك محمر وجبنة وزيتون
وأشياء والله لااعرف معناها ولكنني أكلتها على استحياء
تذكرت يومها حفلة زيدان التي عملها لأهل العوض
فقد أكل الجماعة معه وكانوا ياكلون الباسطة بالرغيف !!!
لم يكن بالأكل أي شطة
ولكن الحق يقال أنني رايت الوالي يتصبب عرقاً !!!
وفي اليوم التالي سمعنا أن الضيافة قد كلفت الكثير جداً
عارفين الشطة بي كم ؟؟؟
والله العظيم 3 مليون جنيه !!!!
كاتبنها شطة 3 مليون
تلج بارد 500 الف !!!
*******
في اليوم التالي لشطة المحلية
طلبت مني ست النفر احضار الخضار من { الملجة }
والمشكلة قالت لي جيب لينا معاك شطة !!!
قلت ليها والله ما أظن الملجة اليوم يكون فيها شطة
نجيب ليكم بدلها فلفل !!!
قال شطة قال !!!
|
Post: #2
Title: Re: عليكم الله ضوقوا شطة الوالي شوفوها حارة كيف ؟؟
Author: إسماعيل التاج
Date: 02-16-2009, 12:12 PM
Parent: #1
Quote: عارفين الشطة بي كم ؟؟؟
والله العظيم 3 مليون جنيه !!!! |
يا أبو حراز
دي الشطة الظهرت.
يعني الشطة الماظهرت (خليها مستورة).
|
Post: #6
Title: Re: عليكم الله ضوقوا شطة الوالي شوفوها حارة كيف ؟؟
Author: ابوحراز
Date: 02-16-2009, 06:31 PM
Parent: #2
أخي اسماعيل التاج
الزول المتخصص تلج قالوا ليهو 15 سنة في الشغلانية دي
بيتين مسلحات
واحد ايجار والتاني ساكن فيه
وشوية بقر لزوم الحليب والترفيه عصرا
قالوا كم مرة نقلوه يرفض
يقول ليهم انا زول تلج بس
|
Post: #3
Title: Re: عليكم الله ضوقوا شطة الوالي شوفوها حارة كيف ؟؟
Author: walid taha
Date: 02-16-2009, 02:11 PM
Parent: #1
| Quote: عليكم الله ضوقوا شطة الوالي شوفوها حارة كيف ؟؟ |
والله يا ابوحراز لمن شفت العنوان قايلك مريخابي :) ، كمان أفتكرت الشطة مقصود بيها فوز المريخ أمبارح :)
والله غايتو عقلنا الباطن ده ما عارفين نعمل ليهو شنو :))
أرقد عافية
|
Post: #7
Title: Re: عليكم الله ضوقوا شطة الوالي شوفوها حارة كيف ؟؟
Author: ابوحراز
Date: 02-16-2009, 06:39 PM
Parent: #3
walid taha
تعرف مصائب قوم عند قوم فوائد
يوم اتهزم المريخ من الوحدات الأردني كان يوم عجيب جداً عندنا
والله أكره الكورة وكرهت ابوها خاصة بعد الهزائم الكثيرة والمتتالية
لكن في ذلك اليوم لأول مرة الواحد يملأ الثلاجة بما لذ وطاب
مشينا الصباح عادي شايلين قفة الملاح
والواحد زهجان ويسخط في الأسعار وارتفاعها
نقوم نسمع ليك واحد هلالابي في السوق يكورك
{ 7 } ربطات ملوخية بجنيه
{ 7 } رجلة بجنيه
{ 7 } ربطات ورق بجنيه
{ 7 } جرجير بجنيه
ياخي والله مليت ثلاثة أكياس كبيرة بخمسة ألف بس
كيلو اللحمة بي سبعة جنيه
سبعة عيشات بجنيه
ستة أكياس مكرونة والسابع مجان
والله لمن جيت داخل البيت ناس البيت اتخلعوا
والثلاجة اتملت والجيران أخدوا الفيها النصيب
لمن كلمت ست النفر بالحاصل قالتلي ان شاء الله كلهن يغلبوهن
|
Post: #4
Title: س
Author: بلدى يا حبوب
Date: 02-16-2009, 02:18 PM
Parent: #1
سلام ابوحراز
Quote: والله العظيم 3 مليون جنيه !!!!
كاتبنها شطة 3 مليون
تلج بارد 500 الف !!!
|
والدليل استيفن وارغو وسعره
تحياتى
|
Post: #8
Title: Re: س
Author: ابوحراز
Date: 02-16-2009, 06:43 PM
Parent: #4
بلدى يا حبوب
هل تشابه عليك الولاة ؟؟
أم تشابه عليك البقر ؟؟؟
تعرف جمال الوالي احتمال كبير يكون قريبي لكن راحت عليه
هو ماعارف الحقيقة دي
لكن لو قابلته عندي ليه ظرف
بس يبني لينا بيتنا
والله اوعدك وأوعده انا وست النفر وأولادي وبناتي وجيرانا كلنا نشجع المريخ
|
Post: #5
Title: أبوحراز
Author: Anwar Ahmed
Date: 02-16-2009, 02:48 PM
Parent: #1
Quote: والله العظيم 3 مليون جنيه !!!!
كاتبنها شطة 3 مليون
تلج بارد 500 الف !!! |
صديقي أبوحراز شكيت محنك اتاريك من آكلة اموال الشعب :)
|
Post: #9
Title: Re: أبوحراز
Author: أيمن الطيب
Date: 02-16-2009, 06:46 PM
Parent: #5
سلامات يا أخونا أبوحراز,,
لكن يا أخوى الشطة أم تلاتة مليون دى!!!!
ما لازم يقيف قصادا مصنع التلج دا وإلا!!!
حدث ما لا يحمد عقباه وحا تبقى فى أزمة لساتك ركشة وكدا,,,
وأزمة عوادم على المدى الطويل,,,,,,
عالم نفوسا فاتحه ما شاء الله عليهم,,,
وفى الآخرة كمان فى كلام تانى خالس,,,
ومال الشعب عافنو ليك إنت راجل مقصدك حميد,,,
|
Post: #11
Title: Re: أبوحراز
Author: ابوحراز
Date: 02-16-2009, 07:06 PM
Parent: #9
تعرف يا أيمن انا هنا أعمل في وزارة البلديات
والبلدية ميزانيتها ضخمة
وهي شبيهة بالمحلية هناك في السودان
لكن هنا خدماتها موجهة نحو المواطنين مباشرة
ويقع على عاتقها مسئولية التخطيط والتعمير وحماية البيئة والترويح عن النفس
تعرف الميزانية مقسمة الى بنود
جميع البنود بملائيين وآلاف الريالات
الا البند الخاص بالضيافة
فهو في حدود 3 الف ريال فقط
يعني لايكفي حتى لقفة شطة واحدة !!!
|
Post: #10
Title: Re: أبوحراز
Author: ابوحراز
Date: 02-16-2009, 06:47 PM
Parent: #5
Anwar Ahmed
| Quote: صديقي أبوحراز شكيت محنك اتاريك من آكلة اموال الشعب |
والله كمان أكل الحكومة طاعم بطريقة عجيبة جداً
|
Post: #12
Title: Re: أبوحراز
Author: Hisham Ibrahim
Date: 02-17-2009, 05:57 AM
Parent: #10
يا أخوي
حق الحكومه دى مبروك عليك !
وما تستغرب من الأرقام دي !
عادي ..
الشطة دي في لجنة كانت مكونه ليها وإنبثقت منها لجنة عشان تمشي تجيب شطة من الهند 220
لأنو الشطة دي ما بقانيت ..
انشاء الله عليهم بالساحق والماحـــق والإسهال المتلاحق -
والقرحة والطوحال والحـــــمـوضـــة !!
والبواسير والناســــور ولين العظام !!
ــــــــــــــــــــــــــــــــــــــــــــــ
أما انت يا صديقي فكررها! لأنك معـفي من هذا الدعاء !!
هشام
|
Post: #13
Title: Re: أبوحراز
Author: حمزاوي
Date: 02-17-2009, 06:09 AM
Parent: #12
دي شطة اللخويا
وارغو أن لا تزعل
|
Post: #15
Title: Re: أبوحراز
Author: ابوحراز
Date: 02-17-2009, 06:19 AM
Parent: #13
حمزاوي
دي شطة وللا اسبيرات { اللخويا } دي شنو
شوف لينا صديق الموج خليهو يضوق شطة أخونا الوالي
يقال والحق على الراوي أن هذه الشطة تصلح لمن انتهت مدة صلاحيتهم
جربوها ياجماعة !!!
|
Post: #14
Title: Re: أبوحراز
Author: ابوحراز
Date: 02-17-2009, 06:14 AM
Parent: #12
Hisham Ibrahim
حكى لي صديقي طبيب يوم أمس وقال لي كنت بنيالا
وكان من المفترض أن يزورنا وكيل وزارة الصحة
وطلب مدير المستشفى من هذا الطبيب تجهيز ورقة بطلبات الضيافة
فكتب الأخ خروف
جركانة زيت
1000 عيشة
قفتين طماطم
ومثلها بطاطس
والبهارات
ومن ثم قام بتقديمها للمدير وقال لي كنت خائفاً من التكلفة
ولكن المدير حينما نظر اليها قال له سيكون العشاء في منزلي
ومن ثم قام بكتابة طلب آخر
عدد ستة خرفان
5000 عيشة
10 قفة طماطم
ومثلها جرجير وبطاطس
وهلم جرا 00 هلمجرا دي زي السكة حديد حاجة كده مفتوحة لا ليها أول ولا آخر
قوم ياوكيل الصحة اتصل فجأة وقال أه سيكتفي بعشاء الفاشر ولن يستطيع الحضور الى نيالا
وبالطبع طرشق العشاء !!!
وطلب صديقي من المدير في اليوم التالي ان يقوم بارجاع كل شيء الى مكانه
فقال له المدير
الخرفان وضبحناها
والبصلة ونجضناها
والطماطم وخلطناها
المشكلة قال لقاهو كاتب عطور ب 500 الف من ضمن الطلبية المشبوهة
وحينما سأله لماذا اذن العطور
فقال له : هل تريد أن تقابل زوجتي وكيل الوزارة وهي معفنة !!!
|
Post: #16
Title: Re: أبوحراز
Author: SHIBKA
Date: 02-17-2009, 09:24 AM
Parent: #14
والله يا ابو حاز خسرت الدولة خسارة شديدة خلاص
ماكل ليك شطة ب 3 مليون
ياربي الشطة الباطنة قدر شنو؟؟؟؟؟
|
Post: #17
Title: Re: أبوحراز
Author: ابوحراز
Date: 02-18-2009, 06:21 AM
Parent: #16
SHIBKA
سلام
صدقي أتمنى أن تكون هناك رقابة مشددة على المال العام
حتى لاتجد مثل هذه الشطة موطيء قدم لها في { سفرة } الضيوف
وكم يحلم الانسان بأن تتوجه المحليات نحو خدمة المواطن ورفاهيته لاتعذيبه
شخصياً غير مقتنع نهائياً بدور المحليات تجاه خدمة السودان بصفة عامة
القوانين واضحة وكذلك الأنظمة لكن كثيرون منهم يلوون اعناقها
أحدهم ذكر أنه أتى ليستلم قطعة ارض
فقالت له الموظفة الجميلة سنخفض لك ياعم من الرسوم
وبدلاً من 4 مليون تم التخفيض الى 2 مليون
كلام جميل
لكن اتضح أنه لاتوجد ايصالات
فرفض الرجل بعد أن وافق مبدئياً
والغريب في الأمر بعد كل ذلك تم التخفيض له وأعطي ايصالا
وهذه نقطة في بحر من فساد الخدمة المدنية في السودان
|
Post: #18
Title: Re: أبوحراز
Author: maia
Date: 02-18-2009, 07:21 AM
Parent: #17
الاخ ابو حراز
لعلك وست النفر بالف خير
عارف بيكونوا اشتروا شطة ب 10 الف
وال 2 مليون و90 الف دي دخلت في واحدة من الجيوب العامرة بمال الشعب
اهو المنصرفات بتطلع كدا
والشعب ليهو الله وعيشة السوق
|
Post: #19
Title: Re: أبوحراز
Author: ابوحراز
Date: 02-18-2009, 07:51 AM
Parent: #18
مايا
فعلا ارخص ما قابلني في السودان { الشطة }
مرة أتيت الى سوق أم دفسو { سوق المدينة عرب } وجدت الصفيحة كلها بألفين
حتى في فترة عيد الأضحى حيث يكثر استعمال الشطوط لم يرتفع سعرها
انا اشتريت صفيحة
والله في ذلك اليوم ذهبت ابنتي الصغيرة ووزعت على كل الجيران في الحي
وأجمل شيء أن الصحن لايرجع ليك فاضي
مرة { بليلة }
ومرة بطاطس
وحتى الفشار أتى الينا بسبب هذه الشطة الغريبة العجيبة
يعني شطة بعشرة الف يمكن تكفي ثلاثة ولايات
لكن الذ شيء صاحبنا بتاع التلج
يعني ممكن يجيب ليهو لوحين ثلج ومعاهن اربعة براميل موية !!
|
|