Post: #1
Title: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى السودان
Author: فخرالدين عوض حسن
Date: 02-14-2009, 11:46 PM
Parent: #0
لو بحثت عن خط (عبور مشاة) أو (أمامك مدرسة) أو(منحنى) فى كل (العاصمة) ولم تجده ...تبقى أكيد فى السودان
*****
لو إنت فى بلد فيهو سنه سابعة وسنة تامنه ابتدائى… تبقى أنت أكيد فى السودان
*****
لو طالعت إعلانات لشركات (مسئول) كبير وهو لا زال (فى الخدمة)… تبقى أنت
أكيد فى السودان
*****
لو (لبد) ليك شرطى (مرور) فى نهاية شارع (إتجاه واحد) وخلاك لمن دخلت وجاك بى (دفتر إيصالاتو)… تبقى أنت أكيد في السودان
*****
لو لقيت فى بلد ما فيهو (معينات البحث العلمى) وكل يوم الجامعات تناقش(خمسين) رسالة دكتوراة و(ميتين) رسالة (ماجستير)... تبقى أنت أكيد فى السودان
*****
لو أنت في بلد وزارة الصحة فيهو قالت (الدواء) ده (فاسد) أحظروهو .. وبعد شويه قالت (ما فاسد) خلوهو .. وبعد شويتين قالت (فاسد) أمنعوهو …. تبقى أنت أكيد في السودان
*****
لو لقيت فى بلد (الصحف) بتتقفل بى (مادة) فى القانون (معموله للمطاعم) …تبقى أنت أكيد فى السودان
*****
لما تلاقى الترزي كاتب على باب المحل بتاعو آية بتقول ( وفصلنا كل شئ تفصيلا) صدق الله العظيم … تبقى أنت أكيد في السودان
*****
لما تخلص موضوع فى مكان ما، وتجى تركب عربيتك وتلاقى (المساحات) مرفوعه عشان تعرف على طول انو فى واحد مسحها ليك وح ياخد منك واحد جنيه … تبقى أنت أكيد فى السودان
*****
لو قرأت الصحف فى 1987 أو فى 2016 عن (إنتهاء قطوعات) الكهرباء ولقيت نفس الكلام فى صيف 2030 … تبقى أنت أكيد فى السودان
*****
لو زوجة الوزير مليانة دهب بتتجدع بيه بالعلن في الشارع من غير حساب وأطفالها بيملطشوا اولاد الجيران... تبقى أكيد إنت في السودان
*****
لو أهم (كبرى) فى عاصمة البلد صيانتو عاوزة ليها (سنتين)… تبقى أنت أكيد فى السودان
*****
لو بهدلوك في اي مكان واشتكيت للشرطة قالوا دا مش اختصاصنا امشي اشتكي في الثروة الحيوانية ... تبقى أكيد أنت في السودان
*****
لو لقيت أنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها (شركات إنشائية)… تبقى أنت أكيد فى السودان
*****
لو دخلت (الوزارة) وأنت مؤجر في (زقلونا) وطلعت وعندك عمارتين في (قاردن سيتى) تبقى إنت أكيد في السودان
*****
لو اشتغلت في الخدمة المدنية 30 سنه وأدوك معاش شهرى يساوى 6 كيلو لحمة ...تبقى أنت أكيد فى السودان
*****
لو توقفت (الحركة) إثناء ساعات (الذروة) وإكتشفت أن السبب (كشه)... تبقى أنت أكيد فى السودان
*****
لو عدمت (التعريفة) وكمان دخلت فى (ديون) للإيفاء بنفقات (فراش) قريبك الذى توفى إلى رحمة الله... تبقى أنت أكيد فى السودان
*****
لو وجدت أن (ترخيص عربتك) يساوى (ربع) قيمتها …. تبقى أنت أكيد فى السودان
*****
لو تقدم إبنك (المهندس) لشغل وظيفة وكان (الإنترفيو) عن (صلاة الجنازة)... تبقى أنت أكيد فى السودان
*****
لو (فجأة) إكتشف (المسئولون) أن (الخريف) على الأبواب)... تبقى أنت أكيد فى السودان
*****
لو عندك (الكلية) اليمين متعطلة وعاوزين يشيلوها ليك قامو (إستأصوا) الشمال السليمة لأنو الدكتور كان ماسك الأشعة (بالمقلوب)... تبقى أنت أكيد فى السودان
*****
لو مكث (مرتبك) معك (تلاته ساعات وإطناشر دقيقة) هى الفترة من لحظة إستلامه من الصراف إلى حين عودتك للمنزل... تبقى أنت أكيد فى السودان
*****
لو فاز فريقك الذى تشجعه على الفريق الخصم فى مباراة الذهاب 8/صفر وخسر فى مباراة الإياب 12/صفر…. تبقى أنت أكيد فى السودان
*****
لو لقيت لوري التراب وكومر البلدية من سنة 50 شغال بالاضافة للركشة في نفس الشارع... تبقى اكيد انت فى السودان
*****
لو وجدت أن رؤساء (الأحزاب) هم (رؤساء) مدى الحياة... تبقى أنت أكيد فى السودان
*****
لو وجدت أن نسبة الفقر تزداد بإزدياد (معدل النمو تبع الحكومة) …. تبقى أنت أكيد فى السودان
*****
لو ضربتك عربية حكومة و مشيت القسم و طلعتا انت الغلطان... تبقى اكيد انت في السودان
*****
لو خشيت مؤسسة حكومية ولقيت الموظفين مافي اثناء الدوام.. تبقى اكيد انت في السودان
*****
لو طلعت مستحمي و متريح وماشي عرس و دخلت العرس زي الكأنك كنت بتلعب كورة... تبقى انت اكيد و اكيد في السودان
*****
لو ماشي مشوار 20 كيلو متر و وصلتا في 4 ساعات... تبقى انت اكيد في السودان
*****
لو لقيت مطعم وقدامو دورات مياه... تبقى اكيد انت في السودان
*****
لو مشيت الحوادث و قالو ليك لو (عندك رصيد اضرب للدكتور لانو نايم)... تبقى انت اكيد في السودان
*****
.. .. تبقى اكيد انت في السودان لو شغال في السوق و قالو ليك ادفع ضريبة ميزان
*****
لو لقيت اجنبي وعواطلىو عندو صلاحية اكتر منك و الناس كلها تحترمو... تبقى انت اكيد في السودان
*****
لو اعلنو عن 3000 وظيفة و مشيت تقدم في اليوم الاول و قالو ليك (تعال بكرة لانو لجنة المعاينة ما اكتملت) و جيت تاني يوم و لقيت التقديم قفل... تبقى انت اكيد في السودان
*****
لو لقيت حي ساكن فيهو مسؤول كبير و الكهرباء فيهو ما بتقطع نهائى... تبقى اكيد انت في السودان
*****
لو محتاج حاجة و لقيت اقرب حتة تجيبا منها على بعد 3 كيلو متر... تبقى اكيد انت في السودان
*****
لوقريت الكلام دا وما علقت ولا جنيت وكنت بارد شديد ومستسلم... تبقى أكيد أنت من السودان
*****
ولو ما مرت بيك اي حاجة من الفوق دي... تبقى اكيد انت ما من السودان
|
Post: #2
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: فخرالدين عوض حسن
Date: 02-14-2009, 11:50 PM
Parent: #1
ولو قالوا ليك الحكومة وقعت اتفاق مع د. خليل بكرة
ونقضت ميثاقها مع مناوي بعد بكرة
وخرج علان بعده
وتمرد فلتكان
والمعركة لازالت جارية بين الصقور والحمائم
والاعتقالات جارية
اكيد دي حكومة الانقاذ
|
Post: #3
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: saif massad ali
Date: 02-15-2009, 00:26 AM
Parent: #2
صدقت
|
Post: #4
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: emadblake
Date: 02-15-2009, 01:20 AM
Parent: #3
ولو بتقعد تكتب جنس الكلام "الفاضي" دا... وما تعمل حاجة مفيدة تنفع الناس تبقى أكيد سوداني !!
|
Post: #5
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: Anwar Ahmed
Date: 02-15-2009, 01:31 AM
Parent: #4
صدقت
|
Post: #6
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: فخرالدين عوض حسن
Date: 02-15-2009, 01:44 AM
Parent: #5
الافاضل سيف، عماد، انور
شكرا علي المداخلة
هو ايميل وصل علي بريدي ولم اكتبه
وقلت شر البلية ما يضحك وتعالوا نتونس
تقديري وموتي واحترامي
|
Post: #7
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: ابوحراز
Date: 02-15-2009, 06:12 AM
Parent: #6
أكاد أجزم بان 90% مما ذكره الأخ صحيح
ملاحظات في مكانها وتحتاج لنقاش
ويجب علينا أن نحول سلبياتنا الى ايجابيات
حتى نرفع الوطن عاليا
ليس من أجل جيلنا الذي انتهت مدة صلاحيته
بل من أجل أبنائنا
كمان أزيدك من الشعر بيت
لو مشيت عشان تستلم ارضك بعد 30 سنة وقالوا ليك الموظفين الليلة مشوا سماية نفيسة تكون إنت أكيد في السودان
ولو كنت خواجة ومريت على قرية وضبحوا ليك غنماية اللبن أكيد انت في السودان
ولو تمردت على الحكومة وأدوك بكرة حقيبة وزارية أكيد انت في السودان
ولو كنت مغترب ونفضو1 جيبك زي شوال الدقيق أكيد انت في السودان
ولو قريت ليك لوحة محل مكتوب عليها شركة تهتدون للتأمين ودخلت جوة المحل ولقيتو ببيع { المديدة } أكيد انت في السودان
ولو صدمت ليك زول بسيارتك ورغم أنه قد مات يجيك أهلو ويعفون عنك أكيد انت في السودان
مثلما هناك صور مظلمة لدينا صور مشرقة ومضيئة
ولكن 00 علينا أن نجعل كل صورنا مشرقة
ومليئة ببقع الضوء !!!
|
Post: #8
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: SHIBKA
Date: 02-15-2009, 06:15 AM
انا عملت معاينة في لجنة الاختيار لوظيفة في المواصفات والمقاييس وهي في مجال تحليل الاغذية
وكانت الاسئلة عن مبطلات التيمم
والفعل ونائب الفاعل
واتكلم عن نفسي بالانلجيزي
وفي النهاية لم يتعين احد من المتقدمين والذين تمت معاينتهم في لجنة الاختيار (لان الكثير منا يتعارف)
وكان التعيين من نوع اخر
|
Post: #9
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: ابوحراز
Date: 02-15-2009, 06:24 AM
Parent: #8
لدي احد الأصدقاء كلمتكم عنه سابقا
الزول دا بتاع رياضيات
وبجضم الرياضيات دي بطريقة عجيبة جدا
والغريب في الأمر عمل معاينة قبل عشرين سنة
يعني قبل ناس غسل الجنازة والتيمم
كانوا عاوزين مدرسين رياضيات
زولك عامل فيها فالح
دخل على لجنة المعاينة وبصوت جهوري كصوت عمر بن الخطاب قال لهم { السلام عليكم }
فردوا عليه جميعاً { وعليكم السلام }
وطلبوا منه أن يقوم بإعراب { السلام عليكم } !!!
زولنا قعد يتلفت ولاعارف الفاعل وين ولا المبتدأ بيرفع الفاعل كيف ؟؟
وقالوا ليه انت فاشل
كيف ماتعرف تعرب السلام عليكم
وطلع صاحبنا حردان وكرطع ليهو { 3 } ببسي
والمشكلة منذ أكثر من 20 عام وصاحبنا لو قابلك في الطريق لايقول ليك { السلام عليكم }
ولو عملت فيها شاطر وبادرته بالسلام يقوم يقول ليك { أهلاً } !!
|
Post: #10
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: عبدالله كع
Date: 02-15-2009, 07:52 AM
Parent: #8
ولو ما كنت سوداني واهل الحاره ما هلي و مأساتي وازلي
يا خووووانا سودانا والله زي العسل .... لو ما فيه الحاجات دي .
كدا اتخيلو الحاجات ( ما كلها ) لو ما موجوده في السودان ..
حتت الغبار دي بالذات ..!!!!
|
Post: #11
Title: Re: لو تقدم إبنك (المهندس) لشغل وظيفة وكان (الإنترفيو) عن (صلاة الجنازة).. تبقى أنت أكيد فى الس
Author: فخرالدين عوض حسن
Date: 02-15-2009, 04:34 PM
لو مشيت عشان تستلم ارضك بعد 30 سنة وقالوا ليك الموظفين الليلة مشوا سماية نفيسة تكون إنت أكيد في السودان
العزيز ابوحراز
والله دي حصلت لي اكثر من مرة في السودان كانوا يقفولون ان المدير مشي عزاء فلان وعلان اثناء ساعات العمل الرسمية
|
|