الكوارك "ضرب"نا أنا ومندليف

"ناو الإنجليزية قد تعني طيب مما يطول شرحه
ولكن طيب بتاعتنا لا تعني ناو
بل تعني حلللللك!!!!"
مدخل يفسر الإستطراد الذي سيسم هذه الكتابة.

هناك برنامج إذاعي أستمع إليه من راديو السيارة
كل يوم تقريبا فلأ أحس برهق السياقة لمدة ساعة عائدا ألي البيت.
البرنامج أسمه آيدياز Ideas. يستضيف اليوم عالم فيزياء حائز على
جائزة نوبل في حوار عن الكونيات.
قلت لنفسي إذا الساعة ستبدوأقصر من دقيقة كما غنى محمد الآمين في
أغنيته ذات المقطع الآينشتايني!
والشاعر فضل الله محمد هو من شعراء "التمريرة العلمية" كما سأشرح لاحقا
فهو يمرر معنى علمي في صيغة شعرية عندما يصف نسبية الزمن بالقرب من
أو بعيدا عن المعشوق والمعنى العلمي هو أنه يقول:
الغريبة الساعة جنبك تبدو أقصر من دقيقة
هذه "الغريبة" هي دعوة للتأمل ونبذ للتلقي السلبي الذي هو أسوأ من
السكوند هاند أسموكينق!
لكن فضل الله محمد كان متأخرا عن آينستاين وإن كان لاحقا له!!!

الرجل العالم في راديو السيارة كان عميقا بشكل لافت في حديثه.
يجعلك تحس بأنه مؤهل لأن يكون مسئولا عن الكون .
أو، وهذا بديل سيئ للفكرة السابقة، يجعلك تحس بتواضعك الزعاف.

زمااان وأنا صغير كنت شغوفا جدآ بالقراءة, أقرأ أي كتاب يقع في يدي ولا أفهم
بل أقرأ فقط. آكل كل الوجبات الثقافية.أي شيئ. زي غنم إشلاق البوليس الجنب
سجن أم درمان.
ومرة من المرات قرأت كلمة لوناتيك Lunatic وعرفت ما تعنيه " يمكنك فتح جوجل
الآن لتعرف معناها أو ميريام ويبستر عشان أنا ما فاضي أكتب ليك معناها"
وعرفت أن لها علاقة بالقمر،الكلمة مش البت، مافيش بت لغاية دلوقت!
كيف لها علاقة بالقمر معرفش. فقلت دعني أكبر شوية كي أفهم أكثر.
المهم كبرت ويوم وأنا في الداخلية شكوت من أعراض مزعجة عقب شاكوش غرامي
romantic hammer
شكوت لمين؟
للشيوعيين طبعا فما كان منهم إلا أن هبوا لنجدتي. أولاد جدعان
بالجد فيهم أخصائيين طب كبار الآن. قاموا ودوني لطبيب نفسي شيوعي قال لي:
إنت لوناتيك. فقلت له:
يازول إنت جادي؟ يعني يا هو دا تشخيصك فقال لي بصرامة:نعم يازميل.
وإنتهت زيارتي بطلب منه قال لي:
ياخي أنا عايزك تكتب لي قصتك مع البت الأدتك شاكوش. أكتب أي حاجة وكل حاجة.
سمح؟
قلت ليه: سمح!
وأنا أتعجب من إختياره لهذه الكلمة "سمح" في غضون صرامته التي عرفت لاحقا أنها
من أعراض الستالينينة عنده ليس إلا!!

رجعت الداحلية لأجيب على الأسئلة المتوقعة قلت لهم
طبعا الدكتور دا طلع زميل فعلا.
فقالوا لي: كيف؟
كيف شنو ما أداني تكليف قا ل
لي أكتب كل حاجة؟
فسألني قرشي وهو من أولاد الأقاليم:
وح تكتب كل شيئ؟
فقلت له:
أيوا ح أفضحها ليكم على الورق واقول بستها عشرين مرة أو أكثر
قبل ما تفكر تسيبني!
فقال قرشي بذكاء:
يعني الدكتور قال ليك أكتب حتي الحاجات الما حصلت؟؟؟
وجريت وراءه حاملا كوب حليب لأدلقه عليه لعله ينقلب قردآ.

في الصباح أخذت ما كتبت وذهبت للطبيب وكانت الأوراق داخل مظروف.
فقال الطبيب أول ما رأني: أها كتبت كل شيئ؟
قلت: نعم وناولته المظروف.
سألني: هل شعرت براحة بعد أن كتبت كل شيئ؟ فقلت كاذبا نعم.
فما كان منه إلا أن مزق المظروف إربا أربا.
"عليك الله العربي دا ما لذيذ؟ شوف حكاية فما كان منه إلا وحكاية
إربا إربا"
قلت للطبيب بزعل شديد:
ياخي مشرط أوراقي ليه يشرط دينك. أنا ما عندي نسخة غيرها وكمان
تشرطها من غير ماتقراها؟
وشتمته وشتمني وقال أنه سيرفع بلاغ للحزب عن سلوكي المشين تجاهه.
خرجت من عنده وأنا أغلي من الزعل .
طريقة الدكتور دا فعلا نستني البت الأدتني شاكوش.
ولكنني لم أتخل عن اللوناسي بل كنت أمارس أعراضها تحت مظلة
هواية الفلك. وبذلك أصبحت لدي أعراض أنيقة أرتديها وأنا أدخل المراكز
الثقافية أو مكتبة المين main بكل كبرياء.
أكتشفت أن الفلك بيتحب يادلعدي وأقتنيت بسبب هذا الحب للفلك بعض
الكتب الفلكية وصاحبت الناس الفلكيين من كليات العلوم والآداب والأقتصاد.
كان طلاب الطب والصيدلة خارج موصوعي تمامآ.
وأهملت دروسي إهمالا فلكيا لكنني كنت شاطر في مادة إسمهاالفارماكوقنسي
أي أنها مادة غنوصية والغنوص لله علمت لاحقا انها ألغيت أو إستبدلت.
كنت في خلواتي الفلكية أختار مثلا شاطئ النيل. أذهب هناك لوحدي.
أبحث عن النجوم في عز الضهر إلى أن أهتديت إلى النباتات التي كانت أقرب لي من النجوم.
فدرست أشكالها وصفاتها وقارنتها مع ما في الكتب وقد بلغ إهتمامي بالنباتات حدا
جعل البعض من زملائي في كلية الصيدلة يعتقدون أنني طالب بكلية الزراعة وناس الزراعة
ذاتهم كانوا قايلني طالب معاهم وفي الحقيقة كنت دبل أجنت عديلdouble agent.
الله على جامعة الخرطوم في ذلك العصر الفريد! كانت مثل القاهرة. عدد سكانها بالليل
أضعاف سكانها بالنهار. كان ممكنا لاين من كان أن يحضر تقريبا أي محاضرة مجانآ.
المهم في بحوثي الفلكية توصلت لأن القمر زاتو الذي سموا عليه حالتي إنتهازي وغير قادر
على مقارعة الشمس حججها الضوئية وأبعد من ذلك ينتظر غيابها ليستخدم ضوءها.
فيالوضاعة القمر!!

كنت أخرج من نص المذاكرة في الكلية لأتأكد من أن زحل قد ظهرت وزحل دي ما زميلتنا
في الكلية ولكنها ديك التي لو كنت تبعد فيها أو يوم بقيت قمرة في سماي لابد في يوم ليك أصل.

حذف للتكرار
أمضاء:
مصطفى مدثر

ويوما أطلعت صديقي الذي كان إقليميا هو الآخر وهذا الوصف بالمناسبة كواليفايينق
qualifying بس يعني ما مقصود بيه أي شوفينية.
أطلعت صديقي الإقليمي على القمر الواحد بتاعنا دا في عز النهار
مما أثار فيه رعب كوني غريب فراح يسأل غفير الكلية:
حصل يا عم فلان شفت القمر بالنهار؟ وفاجأه عم فلان بأن قال نعم فقلت له:
ياخي طيب أسأل سواق بص البنات لأنه معتاد على صحبة الأقمار أو اسأل الأقمار ّذاتها.
عثمان الشفيع ماقال ليك والأقمار عليمة؟
وفي تلك الأيام من السبعينيات كانت هناك نجمة تظهر بالنهاروكانت هي أخوف مااخافه
كما يقول الشاعر كمال الجزولي.
لكن المستمعين لخطرفاتي الفلكية كانوا ، إيه يا بلادونا؟، قليلين وليس قليلون

الراجل العالم في الراديو كان عالم ظرات زي ما قال سمير غانم.
قال إنو الكون بدأ بنقطة لا حجم لها ولكن لها كتلة وشحنة كهرابائية
دا كيف نقطة شايلا ليها شحنة تتفهم كيف؟ ولكن دعنا نتأمل مألات
هذه النقطة. فهي فضائحية الأبعاد.
هنالك مثال هذا الشاب البسيط الذي قبضت عليه الشرطة في كشة إستباقية
pre-emptive قامت بها قبل مرور موكب الريس وقذفوا به في نقطة البوليس
وكان أن حقد و طلع من النقطة إلى الجريمة.
العالم الشخص قال: هذه النقطة وإسمها الكوارك quarck الكوارك وليس
الكوراك.. ضرب !
المهم "تبارك" الله الكوارك دا الماعندوا سايز دا عمال سنو بولينق
snow-ballingلغاية بعد جغزمية سنة تكونت الذرة وبعد داك الباقي
history هيستوري وإن كان يسير في سياق مستقبلي.
هذا الكوارك ويا له من إسم غياظ
أو هذه النقطة punkt or point كانت البدء يعني في البدأ كانت النقطة
ومش الكلمة!
هذا الكوراك ، آسف، الكوارك الذي لا حجم له تناسلت منه أحجام عجيبة
زي عشة بت المحلاوي وأبو ساندرا وهؤلاء محسوبين في الفلك، ومنهم هلك Hulk،
وسلسلا ت تلا ل التبت وكلمنجارو وعبد المنعم جارو وجبال الروكي و....، و.....،
وكوين لطيفة وحوا بنزين وصابر الحزين، و....، و.....، وخطيبتي السابقة، و...،
النقاط دي لأنو ح نتبع طريقة العبقري مندليف في جداوله للعناصر periodic tables
ونعمل تعديلات بعدين لنضيف الاسماء التي عرفنا خصائصها ولم نعرف ما إذا كنت موجودة.
ومندليف دا أنا تذكرته قبل كم يوم مشينا بارتي وتقدمنا نحو تربيزة شاغرة
وكان هناك عدد من التربيزات الشاغرات فإعترضنا نادل لا يخلو من نذالة وقال
إنو دي محجوزة فقلت له خلاص يا مندليف!!
يعني هو عارف محجوزة لمنو ولكن بطبيعة الحال منو ديل الذين يعرف خصائصهم
لم يأتوا بعد.
عبقرية العلماء أنه مرات بيكتشفوا حاجات سهلة بشكل!
ونحنا ما علينا إلا أن نقول لهم إيوااااتلك
وتلك أو ما تلكش دي ممارسة سودانية حصريا السودانيون هم الذين لا تفتنهم اي إكتشافات
علمية. يعني نيوتن دا كان سوداني كانوا قالوا ليهو إنت التفاحة دي ذاتك ليقتها وين
ثم أردفوا: والله جنس كضب يانيوتن وهكذا كان نيوتن سيتخلي عن إكتشاف قوانين الجاذبية
عشان يرتاح من الشناف بتاع أهله السودانيين ولذلك نشكر الله إنو نيوتن ما كان سوداني.
زمان في عالم سوداني إسمه السماني الله يرحموا كان عمل تجارب في المطر الصناعي وكنا
قاعدين في حتة لا علاقة لها بالعلم.
وبعد الجماعة ما سكروا إستخرجوا أدوات التشنيف وكان أن تمت إدانة هذا العالم والحيثية
إنو العالم دا كان شيوعي وترك الحزب ولذلك ففي الغالب هو كضاب وما عمل مطر صناعي
ولا حاجتين.
واضاف فاخوري بعد أن مصمص عظام الكوارع: إنو هو ذاتو الزميل السابق دا مايركز على إكتشاف
حلول لقضايا الشعب ولو بالفيزياء فقال له الزميل متعال:
ولو بالفيزيا؟
وبعد داك أصر الزميل على مواصلة إستخدام هذه العبارة التي تستصغر الفيزياء نفسها
والشيوعيون لا يغلبهم شيئ. فصارت جارية في ألسنة الزملاء والديمقراطيين، بالضرورة
في تلك الحتة التي لا علاقة لها بالعلم ألا وهي أمبده بالسبيل أو بالفيزيا.

العالم في راديو العربية قال الكوارك ما عندو حجم ذاتو فأبطأت السير وكسرت يمين
من جادة الطريق إلى غير جادته الجليدية وإنغرزت عجلات السيارة في جليد قديم كرنشي crunchy
مما أحدث صوتا أشيه بذلك الذي يحدثه شخص بيسوط في جردل تلج عشان يكسر بيهو كأس ويسكى كارب.
قلت لنفسي وأنا أنظر للسيلفون ياخي كدي نتأمل كلام الزول قبل ما أتصل بالشرطةالعامة أو الشرطة
المنزلية تجيب معاها السلسل الذي تجر به السيارات الوحيلة.
حلوة الوحيلة دي
عربيتي في التلجات وحيلة أسمحيلها
تشوف عيونك أسمحيلا
الزول العالم في الراديو دا حسب كلاموا الكون أو الأكوان دي بدأت من الصفر تقريبا
بدأت من لاشيئ أو بدأت من العدم!
إذا المادة لا تفنى "كضب" ولا تخلق من عدم "كضب تاني"!!
بمناسبة أكوان دي هنالك طريقة أخرى يمكنك إتباعها
إذا كنت راغبا في أن تكون عالم في السودان وهي أن تمرر علميتك هذه تحت
مظلة يستحسنها السودانيون مثل قرض الشعر أو الطريقة العمرية الدوشية منسوبة للشاعر
العظيم عمر الدوش الذي لم يعبأ في حياته القصيرة لا بالعلم ولا بالعلماء بل أظن أنه
كان معانا في القعدة ديك التي أشرت لها فوق في أمبدة. عمر مرر إكتشافه العلمي في
قصيدته بناديها وهي في نظري بإعتباري ممارس للموسيقى من منازلنا أعتقد أنها أجمل
أغنية في العالم أذا علمنا بالشراكة الحسية العالية بين وردي وعمر الدوش.
عمر قال:
أنا بحلم إني في أكوان
بترحل من مرافيها
قال هذا قبل أن يعرف سكان أمبدة، وهل هم عرفوا؟، أنهاأكوان وليس كونا واحدا
وأنها "بترحل" وقد تأكد أن الكون يتمدد!!
وهذه بديهة أمبدوية إذا نظرت غربا من أمبدة وتأملت التمدد العشوائي الميتاستاتايزينج
شوف ليك عبقرية علمية نبوئية تصدر من شخص لا علاقة له بالعلم إلا شوية المقررات الماركسية
التي يظن أنه إستوعبها ونال بموجب إستيعابه لها عضوية حزبنا العملاق والذي سنضيف إسمه في
جداولنا أعلاه متبعين طريقة الشيخ العبقري الآخر مندليف.

غ

what a narrative !

Quote: في الصباح أخذت ما كتبت وذهبت للطبيب وكانت الأوراق داخل مظروف. فقال الطبيب أول ما رأني: أها كتبت كل شيئ؟ قلت: نعم وناولته المظروف. سألني: هل شعرت براحة بعد أن كتبت كل شيئ؟ فقلت كاذبا نعم. فما كان منه إلا أن مزق المظروف إربا أربا. "عليك الله العربي دا ما لذيذ؟ شوف حكاية فما كان منه إلا وحكاية إربا إربا" قلت للطبيب بزعل شديد: ياخي مشرط أوراقي ليه يشرط دينك. أنا ما عندي نسخة غيرها وكمان تشرطها من غير ماتقراها؟ وشتمته وشتمني وقال أنه سيرفع بلاغ للحزب عن سلوكي المشين تجاهه

بالغ عديل كدا الدكتور دا
نان انت ما قلت ليه انا مصطفى مدثر مالك
بالله هو المفروض يتحاسب في لجنة الحزب على تقطيعه اربا اربا
لحاجة كتبتها انت..
شوفتا كيف زول موهوب ذيك المفروض يكون كوكب حايم ساكت
براهو في صقيعة المدارات..
اسع لو ما كنت شيوعي كان حيكون عندنا راوية سمحة جدا كاتبها لوني (اسم الدلع الامريكي للونتك)
سؤالى لك هل بادا حاولت تكتب تلك القصة مرة اخرى؟

دائما من الكتاب المفضلين لي..
والما بقراك امانة ما ظلم نفسو..
يا الدكتور اللونتك امانة ما ضيعت علينا قصة..

Quote: فما كان منه إلا أن مزق المظروف إربا أربا.

وطيب!!!
لكن ياخي ما ياهو دا العلاج ذااااااااااااااااااااااااااااااااااااااتو
الكتابة شفاء ودواء لكل حالات "" القَمَرِيَّة""
وأعتقد أن الدكتور كا ن مِهَتي جداً ؛
يعني كنت عايزه يقرا أسرارك ؟؟
مصطفى ،
يا وناس !!
ياخي ، ياأولادك ما بيعرفوا عربي ،
يا أنا ما بعرف كَنَدي
يا تكون إنت انقلبت صهيوني عديل كدا !!
لا أدري من أين ""نبلت "" لي اليوم
لأن بالأمس القريب كنا ،
مدني وأنا ، في السيرة ،
واجترار ذكرى تلك الأيام
تلك الأيام!!
تذكر آخر مرة اتلاقينا كان في القضارف ،
ياخي شوف شعبنا فنان كيف ،
كيف استحدث ،
استحدث دي حلوة !!
استحدث ليهو مثلث من عندياتو ،
ما موجود في أي كتاب هندسة أو رياضيات :
مثلث ديم بكر _ كبوش -_ حوش بانقا!!
عزيزي ؛
أصبر ، حأرجع ليك.

طيب!!!


تحياتي

سلام للجميع
منصور على مرحب وشكرا
ياخي أنا مشيت بروفايلك
وتضاعفت دهشتي لأنك ما طلعت
الزول الكنت متوقعه أنا.
يا نجاة وأماني وسلمي
هسع الشاب دا ما عزام ودعبدالمنعم؟
جاييكم راجع يا الباقين واحد واحد

ياخ يكورك راسك المقودس دا
خليتنى اعيد وجهة نظرى فى الكتابة
والحياة
الاستماع
بهدلتنى بهدلة
الله يديك الفى مرادك
تعال مارق بره واقعد اكتب
كتبك الخير
قول امين
كتابة فاخرة جدا
شحمانة زى ما بقول منعمشوف
عجبتنى تعبيرات كتيرة بتشبهك بس
خاصة شرطة المنزل
دى صنع خصيصا لمصطفى مدثر

على جنب
انتو تلفونكم دا ممنوع من الصرف؟
لابتردى لا بتجيبى لا بتودى؟

مدهش.

Quote: دائما من الكتاب المفضلين لي.. والما بقراك امانة ما ظلم نفسو..

مش كدا يادكتورة ؟

***
تقديري يا قصاص

ممتع يا مصطفي
بالله لو اتفرغت لى الحكى ده موش احسن من العرائض و التوقيعات (تانى سيرة البحر ... السكرتير العام السابق)

Quote: مش كدا يادكتورة ؟

شيتا يمرق الجندرية من مكمنها معناه حاجة ما عادية

شوفتي ذوقنا ذي بعض كيف؟
ودمتي

ادخل معظم البوستات وتووووووووووووش
اتخارج بعد سطر او اتنين

هذا البوست قراته كلمه ..كلمه ...كلمه
وجعلنى ابتسم من قولة تيت الصباحيه
واضحك من قولة "سمح؟"


شكرا استاذنا مصطفى مدثر على الابداع

درديري شخصيأ
ياللفرحة!
أهو دا يا جماعة واحد من الناس
الفلكيين الذين أشرت إليهم أعلاه
وكمان معاهو مدني العرضي!
صداقات عبر القرون.
زخم النص الاول من عقد السبعينيات
الفريد رغم الإنقلابات والإنقسامات!
صداقات لا تصدأ!
ولو إلتقينا سنبدأ من حيث توقفنا
مافي ما يوقفنا ولا الحكايات الحزينة.
عميق حبي وأشواقي لك ولمدني

حسين ملاسي
أشكرك على المرور
والمفيد المختصر.

Quote: درديري شخصيأ‎ ياللفرحة‎! أهو دا يا جماعة واحد من الناس‎ الفلكيين الذين أشرت إليهم أعلاه‎ وكمان معاهو مدني العرضي‎! صداقات عبر القرون‎. زخم النص الاول من عقد السبعينيات‎ الفريد رغم الإنقلابات والإنقسامات‎! صداقات لا تصدأ‎! ولو إلتقينا سنبدأ من حيث توقفنا‎ مافي ما يوقفنا ولا الحكايات الحزينة‎. عميق حبي وأشواقي لك ولمدني

آآآآيي
رغم الإنقلابات والإنقسامات!
رغم الإنقلابات والإنقسامات ، كما قلت .

أيام الأراذل وأبناء الأراذل ،
أضاعوا علينا أجمل الأيام ،
ايام بدء تفتح زهراتنا وإبداعاتنا ،
مقبلين على الحياة ،
مفعمين بالأمل في مستقبل منور سعيد لنا ولبلادنا وشعبنا .
البركة في أولادنا.

لكن ماعلقت يا عزيزي علي حكاية
"مثلث ديم بكر _ كبوش -_ حوش بانقا!!"
طبعاً ، لو تتذكر ، خميسة شنان كان عندها رأي في القصة كلها،
عوض النور وحكاياته ،
وحسن مريسة عليه الرحمة.
آآآآآه !!
تلك الأيام !!

وإلى لقاء


تحياتي

الاستاذ مصطفى مدثر.. الله يملاك عافية ويخيطها لك جلباب..
سرد يرد الروح ويجعل القلب يتقافز فرحا وتوقا..

--------

صورتك تتناسب تماما مع احداث وزمان القصة..

.


وينك يا درش ..

شنو ياخ من مندليك ... وعييييك!

والله فعلا الكواريك لبعضيها ... أمس كنت بفتش على نسخة من برنامج تصميم إسمو كوارك إكسبرس Quark Express
زمان كان مهمتو ينظم ويرتب النصوص بطريقة فلكية محيرة ... هسي ماعارفو بعمل في شنو .. المهم
طلبو مني واحد صاحبنا ملحاح ، قلت ليهو : ياشاب الكوارك ده الناس بطلوهو زمان وختو فوقو ( إكس برس )
قلت ليهو في برنامج إسمو ادوب إن دزاين أحسن ليك ... برضو ما اقتنع قال بس نفتشو ليهو ..
يا دكتور ماعندك ليهو برنامج بديل في صيدليلتك ...؟ بس الوصية ... ما يكون عندو أي صايد افكت .. على قول السودانيين !!

الوحيلة ..
حلوة بجد
كان جيتنا أيام الدجل الأول كان قلنا ليك : الوحيلة هي البنت الممشوقة التي تبدو وكأنها بلا عظم .. مشيتئذ!

أبو داؤود غنى :
نظرت لي ..
والخاطر يجيله
بين قلبي المعنى وبين روحى الوجيلة
الصدفة العجيبة والفرقة العجيلة
والقعدة اللذيذة الفي تلك
تلك النجيلة ..

واصل يا درش

مع عامر مودتي


سيف اليزل

.

.


معليش يا درش ..
نزلت المداخلة الفوق دي!
ونسيت أقول ليك أنا أصلا جيتا زاير بالدرب عشان أقول ليك
الوحيلة دي بتشبه روح أبوداؤود
الفي المقطع بتاع :
بين قلبي المعنى وبين روحى الوجيلة

وألفت إنتباهك إنو الفرق الوحيد بين كلمة ( الوحيلة ) و ( الوجيلة )
هو النقطة . عشان أبري ذمتي وكده ..

.

Quote: آكل كل الوجبات الثقافية.أي شيئ. زي غنم إشلاق البوليس الجنب سجن أم درمان.

الصواب:

آكل كل الوجبات الثقافية.أي شيئ. زي غنم
إشلاق البوليس الكان جنب سجن أم درمان.

د. نجاة
الجندرية
سلمي الشيخ

نساء في حياتنا

من زمان بيان والجندرية كانتا
تدعمان كتاباتي، ودايما سند والله
وسلمى دي قريبة مني من أصلو
غير إننا أولاد حلة.
لكن كل الود والمحبة
بيان:
القصة أعلاه فيها شيئ من الواقع
لكن أغلبها مبالغات ساي
لا أدري إن كنت ساتفرغ لها لأني
"متورط" في كتابة رواية وأتاريها
صعبة بشكل.

الشاب عصام
كيفك؟
عارف السادس ذاتو ما عندك طريقة
لأنو الدكتورة أكيد ح يعاد إنتخابها.
وماممكن تخش معاها إنت!
إنت خليك حايم بهناك أيام السابع
على أقل تقدير!!!

النصري أمين
أشكرك شديد على ذوقك وظرفك

شكرا يا حليمة على التفاعل والتعبير
لكن ماتسمعي كلام مصدق الصورة دي حديثة
جدا يوليو 2008
ومن يوميها وأنا كدة كما في الصورة.
ال juxtaposisioning
ربماكان في صالحي وانت و مصدق بتفهموا
المصطلح دا.
أحمل أمنياتي لكما في عيدالحب

لا تمتعني كتابات درش كمـا السابق وأنا طوالي قاعد اشجع لعباتو الحلـوة
لانو حريف ..
بــل
الواحد بقى عامل زي لظى ..
ما لظى الجد .. جد.
لظى دي واحدة صاحبتنـا سميتها بنفسي لانها كانت نار الله الموقدة ..
لظلك .. هــل
من مزيد؟
تمبس نايب السكرتير العام السابق .. في سيرة البحــر

تمبس؟
ياخ إنت الحريف.
لظى دي بالغت فيها
وكمان لظلك!!!
إذا إستمريت عامل فيها
زعلان بكلم ليك عمر
أول إمبارح دي كنا شغالين
معاهو بروفة.
الزعل الأسفيري أتاريهو حار
بشكل.
سلم لي على لظى
الله يحفظا!!!!

جاييك يا سيف و جاييك
يادرديري ود. نجاة

العزيز درديري
مثلث ديم بكر _ كبوش -_ حوش بانقا
ماوقع لي كويس.
إيه رأيك تتوسع شوية؟
وأخوك ذاكرة دايما ضاربة


سيف اليزل
مشيتئذ؟!!!!
ياخي والله ليك وحئة
والم استوعب البرنامج
الذي تسال عنه
لكن بركة في الشوفات

أحدهم ترك لي رسالة في الفيس بووك يقول فيها إنني
egoist وأناأدعوه لمراجعة مرتكزاته فأنا egotist
!!
نواصل!
في العام 74 كانت هناك خشبتان بينهما شق في جدار برندة مقهى النشاط.
وكان بوسعي أن أنظر، من ذلك الشق، للطرف الغربي للمقهى وأن أتجاوزه
للميدان الغربي فكلية الهندسة إلى حيث تدلى في أديم السماء وراءهم
شفق قلق مضرج.
وهو لم يكن مجرد شفق يومي بل إن بعض الأحاديث ، التي في مجملها كانت
مستخفة بالأمر، نسبته للدماء التي سالت عقب سلسلة من الإنقلابات الناجحة
والفاشلة. كنت غير مقتنع بذلك. إذ كيف يجد المرء الجرأة لعقد هكذا علاقة
بين شفق وواقع سياسي يمر بنفق؟
كنت إما متأملا ذلك الشفق ومتمنيا أن لا يرتبط وجوده بالسياسة، لأنه سيصب
في خانة ساسة اليمين، أو ناظرا في الإتجاه المعاكس حيث كنت أترقب مرور
الفتاة "أ" ولكن دعني أنبه إلى أن النظر للإتجاه المعاكس لم يكن في
أغلب الإحيان مسرآ لأنه وفي حين كنت أتوقع مرور "أ" كان دائما يمر "ن م"
وهو ناشط سياسي خرافي بقميص أصفر مزمن وأسنان صفراء يدخرها للإبتسام
وأنف أفطس ودماغ أو دقانوس يحفظ كل النصوص الماركسية.

في ذلك المغيب الرمضاني وبينما أنا أتأمل ذلك الشفق،الذي لم يعجز سواي،
مر بعد " الكتاب الأصفر" وكان هذا لقب "ن م"، الدكتور معاوية شداد.
فجريت نحوه متذكرا أنني أصلآ كنت راغبآ في التعليق على طريقته في تحري هلال
رمضان. ولكنني في ذلك المغيب الدامي رأيت أن السؤال عن الشفق هو الأهم.
قلت له: يا دكتور تفسيرك شنو للشفق الغريب البيحصل كل يوم دا. وإلتفت هو
ينظر غربآ مما أبرقني أنه ينتبه له للمرة الأولى.
قال لي: يا سلام! ياخي شكله جميل!
ثم واصل في عجل:
دا إنفيرشن. زي في الموسيقى مش في حاجة إسمها كورد إنفيرشن!!
وتوقف عندما رأى أن وجهي كله تحول إلى علامة إستفهام وبدأ يخطو حثيثا نحو
بوابة الخروج من الجامعة. وكففت أنا عن ملاحقته رغم أنني إستنكرت إنشغاله
بأمور دنيوية عن أمور الفلك. وكان من الواضح أنها أمور دنيوية لأنه كان يتحرك
أفقيآ في تلك اللحظة!!
بالمناسبة أولاد شداد ديل كلهم significant سيجنيفيكانت
وبعضهم فيري إيفيكتيف very effective ولكنهم يمتلكون تكنيك يكاد يكون واحد
في إغاظة الآخر وأي عبارة يقولها أحدهم هي عصف دماغ "برين ستورمينق" في حد ذاتها.
بعد ذهاب الإثنين شداد والأفق ظهرت تلك النجمة.
لا ليست النجمة التي في بال معاصري ذلك الزمن ولكنها النجمة التي هي" أخوف
ما اخافه".
نواصل

هيللو دكتور

كبسولاتك الما منتظمة دي بتفقدنا المناعة ياخي..

بمناسبة اولاد شداد وين ابراهيم يارب..
وعربيتهم الذي الشبشب ديك؟

مودتي

شكرا د. نجاة على التواصل. إبراهيم شداد حسب علمي في
السودان. محمد في القاهرة وطبعا كمال في السودان.
الكتابة يا نجاة عايزة وقت فراغ ودا ما عندي.
أكل العيش وسداد تكاليف التعليم شايلة الوقت أغلبه.
لكنني أترصد مايعرف عندنا باللونق ويك إند، يعني سبت
وأحد وإثنين!!

في بالي الإستطراد بالحديث عن الكونيات في الغناء السوداني،
وهذا من قبيل الإستراحة، طالما ذكرت إنو الدوش بإيراده رحيل
الأكوان في "بناديها" بدا كأنه يشير لمعرفة إنبذلت في ما بعد
في ما يعرف الآن بنظرية البيق بانق.
أمسك عندك مثلا: "لو نزل السماك الأعزل أنا عن حبو ما بتحول"
زمان أنا كنت قايلو زول سماك يعني بتاع سمك وأنه سماك بفتح
السين ربما كانت لضرورة شعرية!!
على أي حال فأن إيراد ظاهرة كونية في أغنية هو أمر غريب عندي.
يبدو أن الشاعر أراد أن يشتط إلى أبعد من "لو طلعت القمرة
وجيت"
لكن شاعر "السماك الأعزل" قطع شك لم يسمع "لو طلعت القمرة
وجيت" ولو كان سمعها كان قال إسمعيل حسن:
القمرة شنو؟ إنت كدا قضيتك خاسرة مع حبيبك. إنت عشان تكبر قضيتك
معاهو شوف ليك حاجة زي المجرة أو درب التقانة!!!
سأعود لإستعانة الشعراء بالفلكيات! هناك طرفة حكاها لي الشاعر يحيى
فضل الله تصلح للتدليل على إستخفاف المبدعين ببعض، إن جاز التعبير
وهي أن خضر بشير شاف إلفيس بريسلي في التلفزيون وهو يؤدي أغنية
أداء راقص وبهلواني فحدر ليهو قوي في الشاشة وقال ليهو:
ها العوير دا. عملناها قبلك!!!

لكن دعوني أبدأ بهذه السربعة وإحنا ورانا إيه؟
كابلي قال: "ياقمر دورين أنا شفتك وين."
شفتو وين كيف؟ هو القمر لما يكون قمر دورين، يعني قمر كامل،
يكون أوضح ما يرى في السماء فيبقى دا إستهبال من كابلي ساكت!!
وهكذا...
وهلم"مجرة"!!
ونواصل

سلامات يا مصطفى ربنا يقدرك الحياة بقت والله استعباد كامل..
بينما تجد فراغك ذات ويكند انا يبدأ عملي في ويكند.ز عصابة كاملة العدد برئيسها..
شوفتا الفرق شنو بين الرجال والنساء؟
ان شاء الله نتصيد الاثنينات لنقرا ما تكتبه
ونجي لموضوع المجرة

صاحبا لي بتاع "منجرات"
مرة بنسمع في اغنية رمضان زائد الزهور صاحبة وانت نائم..

قال لو اسقطنا فكرة النسائم البتداعب خدر الحسناء المكسال نؤمة الضحى
المفروض تكون النجوم صاحية وانت نائم..
ومن يومها بقينا نغنيها النجوم صاحية وانت نايم,,

ونحنا نعيش ونحي في ذكر (نعمات هارون)
لقمر غاب يتم نجمات بكاها السيل

ايه يا مصطفى ايه!

طالما في ناس ممكن يكتبو كدا فالحكي بخير وليرقد الطيب صالح هانئاً في البكري

سلام يا د/

جبت ليك البوست من ضهر البورد..
واصل

د. نجاة
في مسألة الوقت دي الظاهر على
حننتك لمن حننتيني إنتي ذاتك.
ياخي العمر ذاتو ما بيكفي
للناس العندها مشاريع.
المفروض الواحد يدوهو تمديد
أو تفريغ ليعيش فترة إضافية.
ممكن يقولوا ليهو كويس ح نمد ليك
بس خلصنا بسرعة!!
"حلصنا بسرعة" لزوم تأكيد بيروقراطيتهم!!
وهم مين دول؟؟

"

البوست الجميل دا لما الجميلين
متوكل(الذي نوقف عن امتاعنا) ومحمد الحاج(الذي صار ياتي لماما) و حليمة (البقت برضز زايرة)..
ناقصين الجازلوت
لو جا بنضبح تور..

مودتي لكم جميعا

*

سلام يا محمد الحاج وأشكرك على عبارتك
الجميلة جدا ويا سيدي فضلة خيرك.

متوكل يا حبيب وينك؟
والمشاريع؟
الف شكر على رفع البوست. أنا ما كنت
قايل الموضوع بتاع رفع البوستات دا
بقى صعب كدا. زمان كان ساهل.

ومرة أخرى شكر لدكتورة نجاة