Post: #1
Title: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 01:22 PM
ونخص بالإهداء :
المشوكشين والمشوكشات
الأحياء منهم والأموات
و
قمر بوبا
وريهان الريح
وأميرة الــ(شيكـ)
وسفيان بشير
وآخرين لا تعلمونهم الله يعلمهم
وأقول قولي هذا وإستغفر الله لي ولكم سائلين الله أن يجعل هذا العام عام محبةوبركة
وأن لا يريكم مكروهاً ! وغايتو الله معاكم
ــــــــــــ
ملحوظة :
الأسماء التي وردت هنابالضرورة لا تعبر عن رأي المنبر
وهذا مالزم التنويه !
ملحوظة أخري :
كل من يأنس /تأنس في نفسه/ا الشجاعة فليتقدم .
فلستوب
|
Post: #2
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 01:26 PM
Parent: #1
وبهذه المناسبة العطرة أهديكم الأبيات أدناه :
كفي يا قلبي
أنسي الفات
فليكن شعار المرحلة يا أصدقائي في المدن المنسية !
|
Post: #3
Title: Re: عبادالله : قوموا الي فلانتاينكم يرحمكم الله !
Author: Ishraga Mustafa
Date: 02-14-2009, 01:26 PM
Parent: #1
لن
وان طرق فالتين طرف حلم قديم
وأتانى بالزهور الحمراء تلك التى اشتهيها
ان هدهد نشيج روحى
وطبطب
بالنجمات جروحى
لن افتح
ساوصد نوافذ تلك الحجرة الحنينه
وستنطفىء فوانيس
أشعلها لهيب لوعتى
وجسد يترقفص فى فوهة الروح بلا مشاعل
لن افتح لفالنتين
ولن استجديه ان يبقى
فليذهب برياحينه
وهدهداته
ولتنطفىء نجماته
فماعدت إمرأة تنثر رياحين الحب فى حديقه
لذا لن افتح
فيينا.. وفالنتن ينتظر 2004
|
Post: #4
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 01:29 PM
Parent: #3
أخت دمي إشراقة
ازيك وكل فلانتاين وانت بخير
ـــــــ
يرجي عدم التحريض !
|
Post: #5
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 01:30 PM
Parent: #4
ننــوه :
أن ريع البوست سيخصص لترميم (ما أفسده الدهر) .
ــــــــ
بالنسبة لي حأكون مطالبكم دهور!
|
Post: #6
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 01:37 PM
Parent: #5
والجدير بالذكر
إنو البوست سيكون حصرياً علي المشوكشين والمشوكشات
الي جانب الذين جاء ذكرهم هنا !
وسيتم تكوين لجنة عليا تنبثق منها لجان أخري
لدراسة المسألة المشار إليها ومدي تأثيرها علي مستقبل الشباب !
يمنع منعاً باتاً الآتي :
مناقشة أي علاقة من طرف واحد( وننوه أن مثل هذه العلاقات لن تنظر اللجنة في أمرها)
|
Post: #7
Title: Re: عبادالله : قوموا الي فلانتاينكم يرحمكم الله !
Author: سلمى الشيخ سلامة
Date: 02-14-2009, 02:37 PM
Parent: #6
رغم انى ما مكتوبة
لكن النحكى ليك بالفالنتاين حقهم
امس الجمعة "كانت الامة مجتمعة يوم الوقفة "
شفت كيف؟
شفت كيف مش؟
المدرسة كانت "نادى المريخ الله يكرمك "
حمراء من غير سوء
القلوب تتطاقش
كل طفل جابو ليهو كيس "كيس ياصبى "
او كما قال السنى فى احد حلقات محطة التلفزيون الاهلية فى زمان نضر
وكل مدرسة جابو ليها اهل الاطفال
كيس قدر الضربة مليان "حلاوة قلب"
وشيوكلاتا
وشيكات "ما مضروبة "
تمشى تتجدع وتصرفا وتشترى "النفسك فيه"
وتهانى بالتلفون للماحصلو يجو
ويازول هيصة كدا لمن غلط
وتمنيات "اكنو العيد عيد جادى "
من جاه "المحبين "جانا الحب
ومشينا معاهم فى "شارع الحب يا احلى طريق"
او كما قال ثنائى الجزيرة
شارع الحب يااحلى طريق
نور جنبيك خليك رشيق
انا داير امشيك ومعاى صديق
يا شارع الحب
ما احلى حنان اتنين حبان
لاواحد جار ولا واحد خان
الواحد كان على طول فرحان
لوحب يقول يسكت خجلان
شفت كيف؟
شفت كيف؟
مش؟
ويحيا الحب دام صفانا
عاش النيل الروانا
ضرب الكاس يا حلاتو بين اترابو ونداتو
|
Post: #8
Title: Re: عبادالله : قوموا الي فلانتاينكم يرحمكم الله !
Author: حنين للبلد
Date: 02-14-2009, 02:40 PM
Parent: #7
سلمى
اشراقة
خضر
اسه ده براه ماعيد حب واحتفاء بالناس الحلوة...البتحب وتتحب
دعونانخلق الاعياد من دواخلنا...
كل عام وانتم وما تتمنون
|
Post: #9
Title: Re: عبادالله : قوموا الي فلانتاينكم يرحمكم الله !
Author: GamarBoBa
Date: 02-14-2009, 02:54 PM
Parent: #8
ياخي مالك شلت حالنا في الاسافير ياخي
كدي انا هسة مارق بتاوق ليك علي اوزون وانا مارق...لو في اي حاجة يفلتنوها بهناك بديك خبر...
الفوق دي قلوب لكن شغلها قوانص لحدي ما نلقي ليها سكة
|
Post: #19
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:02 PM
Parent: #9
والله يا قمر بوبا
الشهادة لله مشاويركـ للأوزون كترت بالحيل
المسألة دي بالنسبة لي مخيفة
خالص وبتهدد مصالح مشتركة
هسي الخراتيم دي كان ما قلة شغلة
دة زمن حب في زمتك
ـــــــــــ
قلوبك الفوق دي مالها بتدق كدة
دقق دقق دقق
عملت لينا هبوط ياخ
|
Post: #10
Title: Re: عبادالله : قوموا الي فلانتاينكم يرحمكم الله !
Author: سلمى الشيخ سلامة
Date: 02-14-2009, 02:55 PM
Parent: #8
| Quote: اسه ده براه ماعيد حب واحتفاء بالناس الحلوة...البتحب وتتحب |
يا حنو
اصلو المحبين الحنان لا بمشو لا بتحولو
او هكذا قال شيخى صلاح ابن البادية
وبالمناسبة
الاغنية السودانية رغم اتشاحها بالصرامة الغيرمعلنة
فهى احد دعاة الحب
انت عارف انا بحبك وبحلف بك ولا ماك عارف بالمرة؟
شفتى الحب دا كيف؟
"قلوب طايرة"
ياحبيبى تعال نبدا
الله على الجمال
التعارف والتالف والمودة
عاينى جنس الحب دا ؟
انت حبيبى وحدى
وانا مابهوى تانى
جبت حاجة من عندى ؟
الحب موجود فى الدنيا
اها ابراهيم عوض وعبد الرحمن الريح ديل لاقو فالنتاين وين؟
و
ياحبيبى عمرى كلو
عمرى كلو اهديتو لحبك
يابدورى فى الظلام
والظلام يحجب لى دربك
انت عارف انا ياروحى
انا ياروحى بحبك
اسمعيل حسن ووردى فى عام سابق لمعرفة الفالنتاين فى السودان
يحيا الحب دام صفانا
دا اخر كلام
|
Post: #11
Title: Re: عبادالله : قوموا الي فلانتاينكم يرحمكم الله !
Author: ibrahim kojan
Date: 02-14-2009, 03:14 PM
Parent: #10
في فالانتاين ( فضل ظهر )
انا عندي صور بكل الشواكيش القديمه...
نتفع في البوست دا؟؟؟؟
|
Post: #12
Title: Re: عبادالله : قوموا الي فلانتاينكم يرحمكم الله !
Author: حنين للبلد
Date: 02-14-2009, 03:32 PM
Parent: #11
| Quote: نتفع في البوست دا؟؟؟؟ |
النبي فوقك ياكوجان...
الناس دي ماناقصة...
كفاية السويتها اخر مرة......
|
Post: #13
Title: Re: عبادالله : قوموا الي فلانتاينكم يرحمكم الله !
Author: humida
Date: 02-14-2009, 03:38 PM
Parent: #12
الفلانتاين دا زيادة مصاريف ساي ..
ذي السجاير يعني .. ( مكروه ) .. او كما قال مفتي الديار .. !
|
Post: #14
Title: Re: عبادالله : قوموا الي فلانتاينكم يرحمكم الله !
Author: محمد عبد الماجد الصايم
Date: 02-14-2009, 03:45 PM
Parent: #13
غايتو يا عمكـ
بقول ليكـ قصة واحـد من جماعتنا باني
مسجد في قطعة أرض بتاعتو .. وبقى الإمام
الجماعة زعلانين من الكلام دا وبقوا
ينقنقوا بي تحت تحت!
يوم في خطبة الجمعة لما ليكـ فيهم:
هُـسن فدوقلو ولا إساكا فليرا كجوا!
قوموا إلى صلاتكم يرحمكم الله
وكيتن لغير الناطقين بها
|
Post: #25
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:19 PM
Parent: #14
ود الصايم
ياودأبوك
تقبل الله ياخ !
بعدين جنس إمامكم دة ياخ ياهو الجايب لينا الكلام
والله الضحك شرطني !
لغير الناطقين يرجي الاتصال بقمر بوبا
|
Post: #15
Title: Re: عبادالله : قوموا الي فلانتاينكم يرحمكم الله !
Author: Amira Elsheikh
Date: 02-14-2009, 03:46 PM
Parent: #13
Quote: قمر بوبا
وريهان الريح
وأميرة الــ(شيكـ)
وسفيان بشير
|
غايتو فى ناس خبيثين حيشتغلو ليك تباديل وتوافيق فى القائمة
دى....
شلتا حالنا...بس عافين ليك لله والرسول
|
Post: #31
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:35 PM
Parent: #15
أميرة الـ(شيك)
دة ما شيل حال
دة تضامن ياخ
تضامن إسفيري ليس الا!
تلفونك مقفول عديل
|
Post: #23
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:11 PM
Parent: #13
حميدة
إزيكـ ياخ
كويس إنك بي جاي
وألف ألف ألف مبروكـ
بيت مال وعيال
بعدين معاك ياخ ، كلامك دة هسي نظام عرست ولا شنو؟
بدري جدو مات يا حميدة !
|
Post: #20
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:04 PM
Parent: #11
كوجان
عشان حركاتكم نوهنا فوق بـ:
عدم طرح أي علاقة من طرف واحد
دايرين علائق مكتملة يا زميل !
أسمعني ياخ ما تكرمنا بي تلفون ! أخوك محتار شديد
في أمر دنيوي . فتعال سريع
|
Post: #17
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 04:54 PM
Parent: #8
حنين للبلد
يازولة ازيك
والله الواحد حابي يهديكي غنية
لكن تقول شنو ؟ البلد ضيقة
والمحبة ألم
رأيك شنو أأجر ليكي البوست دة
في الاوكات الانا بكون فيها سابح في ملكوت الله
عشان نستفيد من فروقات الزمن يا زمن
|
Post: #21
Title: Re: عبادالله : قوموا الي فلانتاينكم يرحمكم الله !
Author: حنين للبلد
Date: 02-14-2009, 05:05 PM
Parent: #17
| Quote: رأيك شنو أأجر ليكي البوست دة |
للأسف ماضية لي عدد من الكونتراكت..
يمكن الموسم الجاي....ننظر في العطاء ده
اسمع.......
|
Post: #22
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:09 PM
Parent: #21
عدد بتاع الساعة كم يا حنين
المواضيع التانية ملحوقة !
أسمعي : نتقسمو النص رأيك شنو
أصحاب آخر زمن !
|
Post: #16
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 04:49 PM
Parent: #7
سلمي
شفتي كيف ؟
شفت
كل سنة وإنتي طيبة
طبعاً يا سلمي القائمة أعلاه شملت الناس
التم رصدهم خلال اليومين ديل .
وبالتالي ركزنا عليهم شديد
ودة طبعاً لا يعني إنو اللقب الرنان دة يشملكم
فأنتم السابقون وهم اللاحقون يا سلمي
بالمناسبة بعدما حضرتي (وقفة) الفلانتاين
ممكن توصفي لينا براحة شعورك كان شنو بالضبط
والله خواجات آخر زمن .
زمان الخواجة فيهم ماعندو الحركات دي نهائي
لكن نقول شنو ؟
ضرب الكاس وماقال كش
شفتي كيف
شفتي
|
Post: #18
Title: Re: عبادالله : قوموا الي فلانتاينكم يرحمكم الله !
Author: باسط المكي
Date: 02-14-2009, 05:02 PM
Parent: #16
خضر..
دي قوية
كل عام وانتطيب ادم الله المحبة
والحب بين الناس
|
Post: #24
Title: Re: عبادالله : قوموا الي فلانتاينكم يرحمكم الله !
Author: Amira Elsheikh
Date: 02-14-2009, 05:12 PM
Parent: #18
| Quote: الفوق دي قلوب لكن شغلها قوانص لحدي ما نلقي ليها سكة |
قوووية...
دى لغة زول بعرف اوزون اسي..
|
Post: #26
Title: Re: عبادالله : قوموا الي فلانتاينكم يرحمكم الله !
Author: humida
Date: 02-14-2009, 05:20 PM
Parent: #24
| Quote: بدري جدو مات يا حميدة |
البركة فيهو و فيكم ..
لكن بتقولا بتأثر كدا ليه ..
اديتني احساسه انه جده دا واحد من اتنين .. يا النور عنقرة يا بتهوفن ..!!
|
Post: #27
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:28 PM
Parent: #26
Quote: لكن بتقولا بتأثر كدا ليه ..
اديتني احساسه انه جده دا واحد من اتنين .. يا النور عنقرة يا بتهوفن ..!! |
حميدة ياخينا
طيب يعني مثلاً إنت عايزني أقول ليك
وبمناسبة عيد القسيس فالنتاين جد بدري مات ولا كيف ؟
عموماً البركة فينا وفيكم
دغالتك في الادغال مافي
بالمناسبة .
|
Post: #28
Title: Re: عبادالله : قوموا الي فلانتاينكم يرحمكم الله !
Author: humida
Date: 02-14-2009, 05:30 PM
Parent: #27
لا ما كدا ..
درجا لي ..
مثلا قول لي .. جد بدري طلع في الحيطة ..
انا بفهم الباقي ..
..
..
وهكذا ..
..
..
بالمناسبة احتمال نجي غزوة الشرقية .. جهزوا الاسرى و معدات الحرب ..
|
Post: #29
Title: Re: عبادالله : قوموا الي فلانتاينكم يرحمكم الله !
Author: حنين للبلد
Date: 02-14-2009, 05:33 PM
Parent: #28
| Quote: جهزوا الاسرى و معدات الحرب .. |
استغفر الله العظيم
|
Post: #30
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:34 PM
Parent: #28
| Quote: بالمناسبة احتمال نجي غزوة الشرقية .. جهزوا الاسرى و معدات الحرب .. |
جيبو معاكم مرزوق !
دايرين حبة بهجة ياخ !
|
Post: #35
Title: Re: عبادالله : قوموا الي فلانتاينكم يرحمكم الله !
Author: محمد عبد الماجد الصايم
Date: 02-14-2009, 06:06 PM
Parent: #30
هل لنا أن نشاركـ في هذه الغـــزوة الميمونة؟
|
Post: #36
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 06:32 PM
Parent: #35
| Quote: هل لنا أن نشاركـ في هذه الغـــزوة الميمونة؟ |
أجـــــل يا ود الصايم
أجل
|
Post: #32
Title: Re: عبادالله : قوموا الي فلانتاينكم يرحمكم الله !
Author: خضر حسين خليل
Date: 02-14-2009, 05:42 PM
Parent: #18
يا باسط
ازيك ياخ
والله سعيد بي طلتك ومشتاقين باقي طولنا ما سمعناك
كل سنة وإنت حلو يا صاحب !
ربنا يديم المعروف
|
Post: #33
Title: الحُب
Author: Ibrahim Algrefwi
Date: 02-14-2009, 05:42 PM
Parent: #1
أحب الحُب وأيامو ، وذكرياتو وأحلامو ...
|
Post: #34
Title: Re: الحُب
Author: خضر حسين خليل
Date: 02-14-2009, 05:44 PM
Parent: #33
قرمبوز
ازيك ياخ ! أنا مشتاقين عديل كدة
سائل عنك والله !
أنا جاييكم يامان
كل سنة إنت وماو أصحاب ياخ
|
Post: #37
Title: Happy Valentine's day
Author: سناء عبد السيد
Date: 02-14-2009, 06:36 PM
Parent: #1
Happy Valentine's day shabab
سلام خضر و الفلنتاين ينعاد عليك و على الجميع باليمن و البركات
شخصياً اشتريت شيكولاته لنفسي و تشيرتيين لونم احمر , قصرت؟؟؟؟؟
|
Post: #38
Title: Re: Happy Valentine's day
Author: GamarBoBa
Date: 02-14-2009, 06:45 PM
Parent: #37
| Quote: و تشيرتيين لونم احمر , قصرت؟؟؟؟؟ |
يا سناء قصرتي ياخ
ده اسمه عيد الحب
ما عيد كسوة المريخ
ود الصائم الامام داك انا زي البعرفه...زكرني بزول كان بتكلم قبل كم في الموبايل...قال ليه لو سمحت انا الضارب ...يعني انا اتكلم وانت تسمع بس لما تضرب لي انت انا اسمع لكن هسة هسسسس...انا بس الاتكلم
|
Post: #40
Title: Re: Happy Valentine's day
Author: خضر حسين خليل
Date: 02-14-2009, 07:07 PM
Parent: #38
موسي
الأوزون كيف كان ؟
|
Post: #39
Title: Re: Happy Valentine's day
Author: خضر حسين خليل
Date: 02-14-2009, 06:53 PM
Parent: #37
سناء عبدالسيد
فنيلتين يا مفترية ! غايتو ربنا يسامحك
يعني هسي دي نظام مكاواة ولا نظام شنو بالضبط
ـــــــــــ
تنفعك الشكولاتة يا سناء
والسنة الجاية تلاتة فنايل حمر
|
Post: #41
Title: Re: Happy Valentine's day
Author: GamarBoBa
Date: 02-14-2009, 07:34 PM
Parent: #39
يا معلم ده عيد اسفيري ساي
ده احسن منه عاشورا (يب يب)
يمين يا معلم كنستها للكلاكلة الاسكان
الناس شيمتها الوجوم...لم يسمعوا بهذا العيد بعد...مررت علي دياركم...كل الناس يا خضر قرفانة..وليد جعفر وامير الكافر ومجتمع الرسالة الطليعية...كلهم قرفانين
تقول لي عيد حب
الاكواد لو كانت شغالة كنت رفعت ليك اللمبي يغني ...كاتاكيت..صو صو صو ..حب ايه الانت جاي تقول عليه
يا خدركة...الحب لو حاصل ما داير له عيد
هو من يومه عيد
دي جلكسات ناس عندها مشكلة في الحب
دي بسموها يا خدركة في الفيزيا نظرية الشك واليقين
يا خدركة الله بيسألك لو في زول عايش حبه يومي كما يجب ...هل بحتاج يحتفل؟؟؟
_
حب حب ..شروع في شروع والبادئ اظلم والزمن دبوي
|
Post: #42
Title: Re: Happy Valentine's day
Author: خضر حسين خليل
Date: 02-14-2009, 07:57 PM
Parent: #41
Quote: يا خدركة...الحب لو حاصل ما داير له عيد
هو من يومه عيد
|
طبعاً كلامك دة وقع لي في جرح يا رزق ! غايتو حكمك حكم
كنت عارف سلفاً انو قصة الاوزون دي حركة منك !
ياتو اوزون ياخ ! هو بالله في زون أكتر من النحنا فيهو دة
اما ناس وليد جعفر وأمير الكافر فبالله قول ليهو يحاولو
يتعايشو مع الواقع دة ياخ !
ياخ بكرة موش قال أجمل من ظروفنا ولا شنو شنو ماعارف
والله لكن يا رزق شئ عجيب !
فعلاً دنيا دبنقا ياخ
ـــــــــــ
بعدين أشورا يب يب يب
دي إتذكرتها كيف انت يا مشوطن
|
Post: #43
Title: Re: Happy Valentine's day
Author: ريهان الريح الشاذلي
Date: 02-14-2009, 10:21 PM
Parent: #42
قالت مطمنة روحها ومطمنة معاها ناس كتار ""عيد الحب ده موضة قديمة وسلوك مراهقين""
فردت حميراء الملبس: ربنا لا تؤاخذنا بما يقوله المشوكشين منا..
|
Post: #44
Title: Re
Author: احمد التجانى احمد
Date: 02-15-2009, 01:58 PM
Parent: #1
خضر حسين ازيك وكل سنة وانت طيب
انا اطلاقا لست ضد مثل هذه البوستات بل واجد معظم مشاركاتى
فيها ولكن كانى اذكر انك قبل كدة شجبت واستنكرت على الناس
كتابة مثل هذه البوستات فى بوست سميته معا لعودة سودانيزانلاين
وكنت مضيق فيه الخناق على بكرى مرة تناديه بصاحب الامانة ومرات
سيد الكورة واخرى ناسيها وفى بعض الناس وافقوك واتحمسوا اكتر
منك وبعضهم اختلفو بصورة مهذبة تليق بمقامك وقالوا ليك المنبر
دة زى السوق اى زول يعرض بضاعتو والما عايز يشترى ممكن يتفرج
هسة فى ناس كثيرون ليس لهم فى الفالنتاين وحاجات الخواجات دى
هل ممكن نقدر نقول انه قد تم المساس بحقوقهم لما يشوفوا مثل هذه
البوستات ولا يمكن يكون مسموح بالنسبة ليكم بعد كل اربعة خمسة
بوستات من نوع الرؤى والكمنجات والتضاريس تفكوا واحد زى دة
|
Post: #45
Title: Re: Re
Author: خضر حسين خليل
Date: 02-15-2009, 04:27 PM
Parent: #44
عزيزي أحمد التجاني أحمد
ازيك ياخ
وشكراً لأمنياتك
في البدء أنا سعيد بتداخلك هنا بالرغم من أني ماعارف جبت الكلام
بتاع إني رفضت أو تحدثت في بوست من البوستات عن ما يكتب هنا !
حتي البوست الذي كتبته عن عودة سودانيز أونلاين يا أحمد لم يكن
علي الاطلاق من ضمن واجباته تبصير الناس بما يكتبوه . فأنا كما تري
عضو مثلي مثلك وأشارك في كل ماهو مطروح في سوق الله أكبر هذا حسب
التساهيل ! يبقي يا أحمد يا ريتك توريني أنا قلت الكلام دة وين
ومتين ! أما عن عودة سودانيز أونلاين فأظنني قلت ما عندي في
ذلك البوست ،
حديثك حول الرؤي والكمنجات والتضاريس والحاجات دي أتمني يا أحمد
إنك تراجع نفسك . مع أكيد إحترامي لرؤيتك .
سلمت
خضر
|
Post: #46
Title: Re
Author: احمد التجانى احمد
Date: 02-15-2009, 06:17 PM
Parent: #1
Quote: بالرغم من أني ماعارف جبت الكلام
بتاع إني رفضت أو تحدثت في بوست من البوستات عن ما يكتب هنا !
حتي البوست الذي كتبته عن عودة سودانيز أونلاين يا أحمد لم يكن
علي الاطلاق من ضمن واجباته تبصير الناس بما يكتبوه . |
الاخ العزيز خضر
اعتذر بشدة عن عدم ادراكى لما كتبت فى بوست معا لعودة سودانيز اونلاين
وقد قادنى هذا الفهم الخاطى للتمادى لدرجة تنميط كتاباتك وذلك ايضا يستوجب
الاعتذار منك ولك العتبى حتى ترضى
ومرة اخرى اتمنى لك ولمحبيك عاما سعيدا مباركا
|
Post: #47
Title: Re: Re
Author: خضر حسين خليل
Date: 02-15-2009, 08:41 PM
Parent: #46
الأخ العزيز أحمدالتجاني
تحياتي وعميق الإحترام
يا عزيزي أنا شاكر لك تفهمك لما حدث ،
وليديم الله المعروف والتواصل بيننا !
شكري واحترامي اللامحدود ياأحمد !
|
|