وكدي عجبني للمرقوت

Post: #1
Title: وكدي عجبني للمرقوت
Author: د.نجاة محمود
Date: 02-12-2009, 04:54 AM
Parent: #0

نادى المنادي "حواء" وهي تفلح حقلها
يا "هوة" قطيتك حرقت
اعتدلت "حوة"
وقالت كدي عجبني للمرقوت..

صدر القرار ليجهض محاولات السلام والاتفاقات التي دفع فيها الغالي والرخيص

وتعالى صياح مناضلين بلاد برة الذين يعيشون في بلاد بعيدة تنوم وتصحى على مخدات الطرب..

السودان بلدي الحبوب
اصبح مثل اليتيم والكعكة في يد اليتيم عجبة
لا يريدون له السلام ولا الامن..

لاجل الوطن السودان ولاجل الشعب السوداني
ارفض قرار توقيف البشير لانه قرار غير منزه من الغرض
ولان المحكمة غير مستقلة..

ولانه اي شخص سوداني لن يقول كدي عبجبني للمرقوت..

وابكي يا وطني الحبيب وشرط هدومك

Post: #2
Title: Re: وكدي عجبني للمرقوت
Author: b_bakkar
Date: 02-12-2009, 05:03 AM
Parent: #1

من قتل نفساً بغير نفس أو فساد في الأرض فكأنّما قتل النّاس جميعاً ومن أحياها فكأنّما أحيا النّاس جميعاً» المائدة 32

"كل المسلم على المسلم حرام دمه وماله وعرضه وأن يظن به ظن السوء" حديث شريف

"وإذا قيل لهم لا تفسدوا في الأرض قالوا إنما نحن مصلحون. ألا إنهم هم المفسدون ولكن لا يشعرون"

د. نجاة
الله يهديك ويفتح بصيرتك..

لعل هذا هو المرقوت الذي تقصدينه!!

Post: #4
Title: Re: وكدي عجبني للمرقوت
Author: خالد العبيد
Date: 02-12-2009, 05:10 AM
Parent: #2

Quote: نادى المنادي "حواء" وهي تفلح حقلها
يا "هوة" قطيتك حرقت
اعتدلت "حوة"
وقالت كدي عجبني للمرقوت..

صدر القرار ليجهض محاولات السلام والاتفاقات التي دفع فيها الغالي والرخيص

وتعالى صياح مناضلين بلاد برة الذين يعيشون في بلاد بعيدة تنوم وتصحى على مخدات الطرب..

السودان بلدي الحبوب
اصبح مثل اليتيم والكعكة في يد اليتيم عجبة
لا يريدون له السلام ولا الامن..

لاجل الوطن السودان ولاجل الشعب السوداني
ارفض قرار توقيف البشير لانه قرار غير منزه من الغرض
ولان المحكمة غير مستقلة..

ولانه اي شخص سوداني لن يقول كدي عبجبني للمرقوت..

وابكي يا وطني الحبيب وشرط هدومك

Post: #5
Title: Re: وكدي عجبني للمرقوت
Author: د.نجاة محمود
Date: 02-12-2009, 05:14 AM
Parent: #2

اخي العزيز
ر بنا يهدينا جميعا ويفتح بصيرتنا بما ينفع الوطن

اذا جبتا ايات قرآنية عايز تخش بمدخل اسلامي
لا يجوز تسليم اي مسلم الى غير المسلمين..دي قاعدة اسلامية..

حاكم البشير بناء على الشريعة
بعداك اقطعوه من خلاف واقتلوه
لكن في وطنوا بواسطة قضاة مسلمين..
مثل هذه الصورة ستكون بالالاف.. وهانك البعض الذي ريد ذلك

وقلبي علي كل الضحايا في كل السودان
ايضا الضحايا الجدد في كل السودان..

Post: #9
Title: Re: وكدي عجبني للمرقوت
Author: Wasil Ali
Date: 02-12-2009, 05:45 AM
Parent: #5

Quote: حاكم البشير بناء على الشريعة
بعداك اقطعوه من خلاف واقتلوه
لكن في وطنوا بواسطة قضاة مسلمين..

ميثاق روما قائم على مبدأ التكاملية بمعنى ان لو حوكم البشير بنفس التهم او قربية منها امام محاكم وطنية بامكان السودان عندها ان يطعن في مقبولية القضية امام فضاة الجنائية كما في حالة كولومبيا.

من جهة اخرى لاتنسي ان السودان شارك في صياغة ميثاق روما ووقع عليها وان لم يصادق. اذن السودان من ناحية المبدأ لم يرى تعارضا بين الميثاق وبين الشريعة الإسلامية كمثله من دول اسلامية كثيرة وقعت.

السعودية وباكستان مثلا لم يشاركوا في صياغة ميثاق روما ولم يوقعوا عليها بسبب مسألة الشريعة التي اشرتي اليها

Post: #3
Title: Re: وكدي عجبني للمرقوت
Author: د.نجاة محمود
Date: 02-12-2009, 05:09 AM
Parent: #1

Post: #6
Title: Re: وكدي عجبني للمرقوت
Author: د.نجاة محمود
Date: 02-12-2009, 05:17 AM
Parent: #3

الاعزاء القراء من خارج المنبر
نرحب بتوصيل وجهة نظرك الموضوعية
سلبا او ايجابا
الراي الاخر يعطي صورة كاملة
[email protected]

Post: #7
Title: Re: وكدي عجبني للمرقوت
Author: Kostawi
Date: 02-12-2009, 05:36 AM
Parent: #6

بشيرك راح
شوفي ليك زول تاني

عليك الله سيبي سيرة البشير دي

يعني ممكن تقولي
عايد عايد يا نميري

Post: #11
Title: Re: وكدي عجبني للمرقوت
Author: Kostawi
Date: 02-12-2009, 05:59 AM
Parent: #7

Quote: لا يجوز تسليم اي مسلم الى غير المسلمين..دي قاعدة اسلامية

و أنا ليه بقول إنتي مظلمة ظلامية? سبهللا ساكت يعني?

البشير مسلم???!!!!

مسلمك هذا قتل و إغتصب و سحل
و سجن و بيوت أشباح و خلافه

الإسلام دا بقى قبيلة/جنسية/ود عمتي و ود حبوبتي
?
دا ياهو النفاق زاتو
عشان كدا يا بيان أنا قلت عليك ظلامية و إحتمال أنا أكون غلط بوصفي هذا

may be you are less or more than that

مسلم
بشيل سلاح ضد مسلم منتخب من قبل الشعب عشان يتربع في قصر الشعب و يتزوج الثانية ويحلف بالطلاق أن يهزم أمريكا و يكاوش هو و أتباعه ثروة البلاد و تحويلهافي بنوك ماليزيا, الصين , تركيا......south america

دا هو البتسميه مسلم!!!????

غوري كدا

Post: #8
Title: Re: وكدي عجبني للمرقوت
Author: الشامي الحبر عبدالوهاب
Date: 02-12-2009, 05:42 AM
Parent: #6

Quote: لاجل الوطن السودان ولاجل الشعب السوداني
ارفض قرار توقيف البشير لانه قرار غير منزه من الغرض
ولان المحكمة غير مستقلة..

اعتقد ان هذا هو الموقف المطلوب الآن
وسيندم المنتشون للتوقيف عندما يتبين لهم
ان القطيةالتي تجمعهم وهي هذا الوطن الكبير
قد احترقت

وشكرا لك د. نجاة

Post: #10
Title: Re: وكدي عجبني للمرقوت
Author: b_bakkar
Date: 02-12-2009, 05:52 AM
Parent: #6

Quote:
اخي العزيز
ر بنا يهدينا جميعا ويفتح بصيرتنا بما ينفع الوطن

اذا جبتا ايات قرآنية عايز تخش بمدخل اسلامي
لا يجوز تسليم اي مسلم الى غير المسلمين..دي قاعدة اسلامية..

حاكم البشير بناء على الشريعة
بعداك اقطعوه من خلاف واقتلوه
لكن في وطنوا بواسطة قضاة مسلمين..
مثل هذه الصورة ستكون بالالاف.. وهانك البعض الذي ريد ذلك

وقلبي علي كل الضحايا في كل السودان
ايضا الضحايا الجدد في كل السودان.

الأخت العزيزة د. نجاة،
عن أي إسلام تتحدثين، وعن أي شريعة تتحدثين؟؟

هذه شريعة الغاب يا دكتورة..

سألتك بالله الذي لا إله غيره، هل أنت تؤمنين في أعماق قلبك بأن حكومة الإنقاذ تحكم بالإسلام والشريعة أو أن قادتها يلتزمون الإسلام والشريعة في أنفسهم وفي رعاياهم؟؟

الإسلام قيد الفتك يا نجاة..

الإسلام حرم الظلم والكذب وأكل أموال الناس بالباطل وقتل النفس الآدمية البريئة، مسلمة أم غير مسلمة..
وقومك هؤلاء قد فعلوا ويفعلون كل ذلك.

بالله عليك يا دكتورة نجاة، هل تعتقدين أن ما فعلته جماعة الإنقاذ بأهل السودان أقل شناعة مما فعله الأتراك، والإنجليز "الكفار"؟؟

الله يهدينا ويهديك، ويهدي البشير، ليسلم نفسه للعدالة الدولية.وهي بالمناسبة ستكون أخف حكما من الشريعة بكثير، إذ ليس فيها إعدام وليست فيها محاكم طوارئ، وسجونها فنادق..
وخير للبشير وأخوانه أن يقضوا بقية أعمارهم في خلوة إلى ربهم يسألونه المغفرة ويسألون ضحاياهم وذوي ضحاياهم العفو..

وعلى الله قصد السبيل ومنها جائر ولو شاء لهداكم أجمعين

تحياتي

Post: #13
Title: Re: وكدي عجبني للمرقوت
Author: د.نجاة محمود
Date: 02-12-2009, 06:36 AM
Parent: #10

Quote: الأخت العزيزة د. نجاة،
عن أي إسلام تتحدثين، وعن أي شريعة تتحدثين؟؟

هذه شريعة الغاب يا دكتورة..

سألتك بالله الذي لا إله غيره، هل أنت تؤمنين في أعماق قلبك بأن حكومة الإنقاذ تحكم بالإسلام والشريعة أو أن قادتها يلتزمون الإسلام والشريعة في أنفسهم وفي رعاياهم؟؟

الإسلام قيد الفتك يا نجاة..

الإسلام حرم الظلم والكذب وأكل أموال الناس بالباطل وقتل النفس الآدمية البريئة، مسلمة أم غير مسلمة..
وقومك هؤلاء قد فعلوا ويفعلون كل ذلك.

بالله عليك يا دكتورة نجاة، هل تعتقدين أن ما فعلته جماعة الإنقاذ بأهل السودان أقل شناعة مما فعله الأتراك، والإنجليز "الكفار"
؟؟

الله يهدينا ويهديك، ويهدي البشير، ليسلم نفسه للعدالة الدولية.وهي بالمناسبة ستكون أخف حكما من الشريعة بكثير، إذ ليس فيها إعدام وليست فيها محاكم طوارئ، وسجونها فنادق..
وخير للبشير وأخوانه أن يقضوا بقية أعمارهم في خلوة إلى ربهم يسألونه المغفرة ويسألون ضحاياهم وذوي ضحاياهم العفو..

وعلى الله قصد السبيل ومنها جائر ولو شاء لهداكم أجمعين

تحياتي

اخي العزيز لا ولن ادافع عن الانقاذ
يجب ان تنتبه الى موقفي وهو موقف غير مدافع عن الانقاذ
انحنابتوع الحشائش التي ستتضرر كثيرا

ولك التحية والاحترام..

Post: #12
Title: Re: وكدي عجبني للمرقوت
Author: حسين نوباتيا
Date: 02-12-2009, 06:24 AM
Parent: #1

هي القطية دي دكتورة يا يحكموها يا يحرقوها ما في حل تانى خالص؟؟؟؟

Post: #14
Title: Re: وكدي عجبني للمرقوت
Author: د.نجاة محمود
Date: 02-12-2009, 06:38 AM
Parent: #12

Quote: هي القطية دي دكتورة يا يحكموها يا يحرقوها ما في حل تانى خالص؟؟؟؟

حسين يا اخوي لو شايف شوفة تانية قولينا
ودائما ما تكتبه محل تقدير عندنا وعند اي قارئ حصيف..

وربنا الحل في وجهة نظرك..الذي سفر البن دق وحرق
ولك المودة

Post: #15
Title: Re: وكدي عجبني للمرقوت
Author: د.نجاة محمود
Date: 02-12-2009, 06:40 AM
Parent: #14

اما الكرمبا وهترشاته بترد على نفسها
وعايزة اقوليك تصور يا الكرمبا انت ذاتك مسلم
الا تجي تقول انك ارتديت عن الاسلام..

مودتي

Post: #16
Title: Re: وكدي عجبني للمرقوت
Author: د.نجاة محمود
Date: 02-12-2009, 07:09 AM
Parent: #15

من الاخ يوسف محمود ايميل كتب فيه الاتي:

Quote: السيدة نجاة محمود شكرا لهذه الفرصة
ارى ان يقدم الرئيس نفسه ويدافع عنها وبهذا يبرئ نفسه ويحقن دماء عشيرته واذا بقت على تسليم المسلم لغير المسلمين فلعله معلوم ان الضرورات تبيح المحظورات شكرا

وجهة نظر مقدرة اخي يوسف...مع احترامي

Post: #17
Title: Re: وكدي عجبني للمرقوت
Author: Kostawi
Date: 02-12-2009, 07:19 AM
Parent: #16

غلبك التسويه!!!!
غلبك الرد علي!!!

أها بشيرك دا لميه في قفة و إتخارجي بيه

البشير راح
حول

Post: #18
Title: Re: وكدي عجبني للمرقوت
Author: الصادق اسماعيل
Date: 02-12-2009, 07:23 AM
Parent: #16

يادكتورة

أنا سألت نفسي السؤال دا

(إذا أُغتصبت أختي وقُتل ولدي وحُرِقت قريتي، هل سأويد قرار المحكمة الدولية،)

الإجابة نعم

فقط إسألي نفسك هذا السؤال

يعنى وطن يعمل فيني العمائل دي كلها هل تفتكري ما حأقول عجبنى للمرقوت، إحتمال أعمل إحتفال عديل كدة

Post: #19
Title: Re: وكدي عجبني للمرقوت
Author: Abdulbagi Mohammed
Date: 02-12-2009, 07:30 AM
Parent: #16

الجاتكم في رئيسكم سامحتكم

Post: #20
Title: Re: وكدي عجبني للمرقوت
Author: د.نجاة محمود
Date: 02-12-2009, 07:36 AM
Parent: #19

اي زول يحاول يلوي الحقيقة
ويتكلم على اساس بيان كوزة و بشيرنا
دا اوف بوينت

لو زول اغتصب اختي وقتل امي بقتلو براي
ما بفتش اب اضان حمرة يجي يقتلو لي
وانا قاعد في البلد ام سقط..

دا ىخر رد غير موضوعي يتكتب في البوست دا..

بقة شكرا الطفل دا ضاحك على منو عقدتونا ياخي...

Post: #21
Title: Re: وكدي عجبني للمرقوت
Author: د.نجاة محمود
Date: 02-12-2009, 07:52 AM
Parent: #20

من الاخ كمال كمال عبر الاميل

Quote: بكرة تنتهي الضجة المصاحبة لقرار اعتقال البشير --ولن يستطيعوا اعتقاله-ولكن السؤال هو الى متى نعيش فى هذا الوهم المسمى السودان--ادعوا الله ان ينير بصيرة ولاة امورنا وننفصل من الجنوب ومن دارفور

Post: #22
Title: Re: وكدي عجبني للمرقوت
Author: حيدر حسن ميرغني
Date: 02-12-2009, 10:10 AM
Parent: #21

سلامات د.نجاة

لماذا لايفعل البشير مافعله هذا الرجل إن كان يعتقد انه غير مذنب

الزول الشجاع المعني بالبوست أعلاه برضو مسلم

سلم نفسه براهو وطلع منها رغم أن الإتهامات الموجهة ليهو كانت أكبر من الموجهة للرئيس البشير

ياريت يمشي ويحرج الجميع

كان رجع حانشكك في ميزان العدالة

ولو تربسوه ماحا يخسر شيئ لأنو سارق سلطة

Post: #23
Title: Re: وكدي عجبني للمرقوت
Author: حسين نوباتيا
Date: 02-12-2009, 10:14 AM
Parent: #14

Quote:
حسين يا اخوي لو شايف شوفة تانية قولينا
ودائما ما تكتبه محل تقدير عندنا وعند اي قارئ حصيف..

وربنا الحل في وجهة نظرك..الذي سفر البن دق وحرق
ولك المودة

الفاضلة دكتورة نجاد..

اعلم سمؤ هدفك ونبل مقصدك فيما تكتبين و اعلم من تكونين و اعلم ما قمت به وزوجك من اعمال جليلة لخدمة الطلاب والاسر المهاجرة لماليزيا و اعلم انك لست بضلامية كما قال اخونا كوستاوي او كوزة والعياذ بالله واعلم انك لست بحاجة لهذه الحكومة الشيطانية و ليست لك مصلحة شخصية بل هدفك هو سلامة ووحدة السودان لكن دعينا نبسط الاشياء لكى لا ننفر من الصالح و نفرح بالطالح..

اولا ما هو اسواء سينارو لصدور مذكرة توقيف البشير !! اجبار الموظفين والطلاب للخروج في مسيرات مليونية للتنديد بامريكا ومن ورائها المؤامرة الصهيونية؟؟اعتقال عشرات او مئات او حتى الوف من المواطنين الابرياء؟؟ تعذيب االشرفاء في بيوت اشباح النظام؟؟؟مذيد من الغارات الجوية و قتل مذيد من مواطني دارفور؟؟ اشعال النيران في انحاء متفرقة من السودان؟؟ اعلان حالة الطواري و معاملة الناس كمجرمين؟؟نقض اتقافية نيفاشا و عودة قوات الحركة الشعبية للجنوب الشبه منفصل؟؟ قطع كل العلاقات الدبلوماسية مع كل الدول الغربية الداعمة للمحكمة الدولية؟؟ هل كل هذا جديد على هذه العصابة الحاكمة ... الم نعايش كل هذا من قبل..وهل تعتقدين ان هذه الحكومة المتهالكة قادرة على فعل كل هذا الان بعد ان انكشفت سؤتها امام العالم.. وهي ترتعد خوفا و تشتكى لطوب الارض لمنع صدور هذه المذكرة..
هذه الحكومة لم تعقد اتفاقية نيفاشا حبا في السلام بل في السلطة..وهي لا تسعى لمحاورة الحركات الدارفورية المسلحة رافاة بانسان دارفور المعذب بل خوفا على سلامتها هي..

الحل عندي هو اقتلاع هذا النبت الشيطانى من جزوره و حرقه و زر رماده في المالح.. فالاوطان لا تبنى بالمطايبه و تاجيل القصاص لان الوقت غير مناسب!! فالنموت انا وانتى و غيرنا فارواحنا لست باغلى من الاوراح التى تزهق كل يوم في دارفور ..بدلا من وضع المساحيق على وجه ملئ بالدمامل بانتخابات صورية لذر الرماد في العيون..الم يعقدوا انتخابات قبل بضعة سنين فخرجوا بالباب واتونا بالشباك؟؟ و لتنعم الاجيال القادمة بوطن معافى من الخبث والمكر و ترد للانسان كرامته ..حينها ستقدر هذه الاجيال ما قمنا به .. بدل ان نورثهم وطن عليل مشلول مكبل بالظلم والظالمين..

Post: #24
Title: Re: وكدي عجبني للمرقوت
Author: د.نجاة محمود
Date: 02-12-2009, 03:50 PM
Parent: #23

ساعود اليك اخي حسين

بالتفصيل...

وشكرا لك للكلمات الطيبة في حقي وحق زوجي.نتمنى دائما اننا نكون عند حسن الظن

Post: #25
Title: Re: وكدي عجبني للمرقوت
Author: lana mahdi
Date: 02-12-2009, 03:59 PM
Parent: #24

نجاة الحبيبة أعرف موقفك و أنك لست مع هذه الطغمة
ولكن توقيف هذا الطاغية سيجعل كل من تسول له نفسه العبث بمقدرات و حريات الشعب السوداني يفكر مليون مرة قبل يعمل عمايلو المهببة
-مناضلة كيبورت:(:(:(:(:(:(:-

Post: #26
Title: Re: وكدي عجبني للمرقوت
Author: د.نجاة محمود
Date: 02-12-2009, 04:26 PM
Parent: #25

يا لنا ازيك

السلح الجنجويد منو؟

الموضوع دا حيجر اوي اوي

مودتي

Post: #27
Title: Re: وكدي عجبني للمرقوت
Author: القلب النابض
Date: 02-12-2009, 05:00 PM
Parent: #26

العزيزة دكتورة بيان

عارفة الجماعة ديل تخلوا عن خليل طالما انه ترك الحرب

فهم سماسرة حروب ومرتزقة على حساب المساكين في المعسكرات ..

لكن عندما حاول خليل الحصول على مكاسب شعب من خلال الحوار انفضوا من حوله ..

انفضوا من حوله لان احلامهم باستمرارا الازمة ستنتهي على طاولة المفاوضات

وعلى اسنة الاقلام التي ستوقع اتفاقية سلام

وينتهي الاسترزاق باسم دارفور ...والزغاوة ..

تحياتي لك

سأواصل

عشان المرقوت يحرقوا القطية كلها ويقعدوا على تلها

Post: #28
Title: Re: وكدي عجبني للمرقوت
Author: د.نجاة محمود
Date: 02-12-2009, 05:24 PM
Parent: #27

Quote: عشان المرقوت يحرقوا القطية كلها ويقعدوا على تلها

لا يختي وين تلها؟
يعدو في امريكتهم واستراليتهم واوربتهم يضربو الولفير
ولايف اذ يوجوال
البقعدو على تل الخراب الشعب المسكين

الحكومة يجب ان تعمل بكل همة من اجل الشعب
عشان الناس دي تجدع قميس عثمان المرفوع لاثارة الحروب والدمار..

Post: #29
Title: Re: وكدي عجبني للمرقوت
Author: القلب النابض
Date: 02-12-2009, 05:28 PM
Parent: #28

Quote: لا يختي وين تلها؟
يعدو في امريكتهم واستراليتهم واوربتهم يضربو الولفير
ولايف اذ يوجوال
البقعدو على تل الخراب الشعب المسكين

الحكومة يجب ان تعمل بكل همة من اجل الشعب
عشان الناس دي تجدع قميس عثمان المرفوع لاثارة الحروب والدمار..

صدقتي ..

ولكن اذا لقو طريقة يجو مترجمين ومستشارين للغزاة بيجو ...

Post: #30
Title: Re: وكدي عجبني للمرقوت
Author: lana mahdi
Date: 02-12-2009, 06:05 PM
Parent: #26

Quote: يا لنا ازيك

السلح الجنجويد منو؟

الموضوع دا حيجر اوي اوي

مودتي

الحبيبة نجاة
مبروووووووووووك
بقيتي سودان جديد
GO A HEAD
سلحهم نظام الإنقاذ البائس الهالك المدكوك هو و رأسه سارق الوطن بليل بإذن الله..
لنا

Post: #31
Title: Re: وكدي عجبني للمرقوت
Author: محمد على طه الملك
Date: 02-12-2009, 07:41 PM
Parent: #30

يا دكتورة قولي بسم الله ..
اولا ـ لم يصدر بعد إعلان رسمي بالقرار من المحكمة الدولية او المدعي العام ..
ثانيا ـ يجوز أن تكون المحكمة قد أخطرت جهة محددة مثل الأمين العام للأمم المتحدة ..
وقام الأخير بإخطار الخمسة او السبعة الكبار لإتخاذ التدابير اللازمة لحماية بعثاتهم ..
وهذا مجرد تخمين او إفتراض من قبلي ..
ثالثا ـ لا تنهار الدولة إذا غاب رئيسها او خلى منصبه إذ أن نصوص الدستور تنظم هذا الأمر ..
رابعا ـ الرئيس لا يمثل سيادة الدولة في السودان فالسيادة للشعب حسب نص الدستور..
خامسا ـ فالنتذكر مقولة سيدنا ابو بكر (رض )
( من كان يعبد محمدا فإن محمدا قد مات ومن كان يعبد الله فإن الله حى لا يموت ).
Quote: انحنابتوع الحشائش التي ستتضرر كثيرا

لن تتضرر الحشائيش بل سوف تنهار أشجار وتٍقتلع جذور ضخمة امتصت عرق هذا الشعب ..
لك إحترامي.

Post: #32
Title: Re: وكدي عجبني للمرقوت
Author: عبدالعزيز الفاضلابى
Date: 02-12-2009, 11:47 PM
Parent: #31

دكتورة نجاة,,
تحية زاكيه لك وكل من حواه جمعكم العامر..
هذه مداخلة لى فى بوست الأخ انور التكينة عن نفس الموضوع.
عموما اتفقنا او اختلفنا مع البشير فهو بشر ولن يدوم فى الحكم ابد الآبدين فاما يفوت الحكم بالموت او عندما يريد الله ويسبب الأسباب ,, وقطعا الله لم يجعل الأمر بيد البشر فكل الذى تراه امامك لن يحدث منه شئ الا بارادة الله سبحانه وتعالى ,, فدعهم فى خوضهم يلعبون ,,
وبدل ان تجيش الجيوش وتنفق الأموال لإزالة الحكم لو انفقت على المتضررين لكان أجدى وانفع لهم والا بالله قل لى بربك اذا كنت من المشردين فى دارفور هل ينفعك ان يسجن البشير مدى الحياة وهل سجن البشير يجلب لنا ديمقراطية حقيقية وهل يردع من قيام انقلابات اخرى?

Post: #33
Title: Re: وكدي عجبني للمرقوت
Author: القلب النابض
Date: 02-12-2009, 11:59 PM
Parent: #32

Quote: يجوز أن تكون المحكمة قد أخطرت جهة محددة مثل الأمين العام للأمم المتحدة ..

ذكرت ناطقة باسم الامم المتحدة انهم لم يخطروا وانه لا علاقة لهم بالمحكمة حتى يخطروا بقرارا كهذا قبل صدوره حسب تصريحها للجزيزة.

كل مافي الامر أن الصحيفة ومن وراءها لهم مأرب أخرى خاصة وان هنالك عملية تفاوضية فلا بأس من بعض تشويش

Post: #34
Title: Re: وكدي عجبني للمرقوت
Author: محمد على طه الملك
Date: 02-13-2009, 00:28 AM
Parent: #33

Quote: كل مافي الامر أن الصحيفة ومن وراءها لهم مأرب أخرى خاصة وان هنالك عملية تفاوضية فلا بأس من بعض تشويش

دا كلام له ما بعده ياقلب..
ترى هل المأرب أن يطوع دهاقنة الإنقاذ الجناح المتمرد قبل العمل على إرسال العسكر الى السكنات ؟
ام المأرب شغل هذا الجناح الأكثر استعدادا للمغامرة حتى يسوي الإنقاذيون في الداخل معضلة القرار حال صدوره؟
ام أن مأرب السودان كله مهدوم مهدوم؟

Post: #35
Title: Re: وكدي عجبني للمرقوت
Author: Egbal Elmardi
Date: 02-13-2009, 02:00 AM
Parent: #34

إزى الحال يا دكتوره
والله إسلام البشير ده ما بعرفه!!!؟؟
إسلام بحل ليه يقتل 28 ضابط فى ريعان شبابهم وييتم أطفالهم,فى الاشهر الحرم
وفى يوم الوقفه...عشان شنو!!!عشان عملو نفس العمله هو!!!(لا تنهى عن خلق وتأتى بمثله)
إسلام بحل ليه يفتح بيوت ألاشباح بما يمارس فيها من قبح لم تعرفه الاخلاق السودانيه من قبل...
خلت السفاح يبدو زى العامل بلاستك سرجرى...
إسلام بحل ليه يسمح بالقتل والسحل والحرق بالمكاوى والسجائر وخلافها...والاغتصاب للرجال قبل النساء فى ما
يسمى ببيوت الاشباح...والاشباح يعلم الله ده ما سووه!!!
إسلام بحل ليه يحييل الام والاب للصالح الخاص إمعانا فى الازلال وتجويع الاطفال!!!
إسلام بحل ليه يبيد قرى بحالها قتل وحرق وإغتصاب وتهجير قسرى من قراهم إلى دول الجوار!!!
ومنع الاغاثه عن من لم يهاجر (لا يرحمو ولا يخلو رحمة الله تنزل)
إسلام بحل ليه سرقة أموال الشعب هو وأعوانه... وبناء القصور وحياة البزخ ...
وتهرييب ما زاد عن الحوجه الى ماليزيا وخلافها...والشعب جعان وعريان وعييان لا صحه لا تعليم لاخدمات؟؟؟
كان ده الاسلام فى نظركم...باقى كلامى حمدو فى بطنه

إقبال المرضى

Post: #36
Title: Re: وكدي عجبني للمرقوت
Author: Egbal Elmardi
Date: 02-13-2009, 02:01 AM
Parent: #34

إزى الحال يا دكتوره
والله إسلام البشير ده ما بعرفه!!!؟؟
إسلام بحل ليه يقتل 28 ضابط فى ريعان شبابهم وييتم أطفالهم,فى الاشهر الحرم
وفى يوم الوقفه...عشان شنو!!!عشان عملو نفس العمله هو!!!(لا تنهى عن خلق وتأتى بمثله)
إسلام بحل ليه يفتح بيوت ألاشباح بما يمارس فيها من قبح لم تعرفه الاخلاق السودانيه من قبل...
خلت السفاح يبدو زى العامل بلاستك سرجرى...
إسلام بحل ليه يسمح بالقتل والسحل والحرق بالمكاوى والسجائر وخلافها...والاغتصاب للرجال قبل النساء فى ما
يسمى ببيوت الاشباح...والاشباح يعلم الله ده ما سووه!!!
إسلام بحل ليه يحييل الام والاب للصالح الخاص إمعانا فى الازلال وتجويع الاطفال!!!
إسلام بحل ليه يبيد قرى بحالها قتل وحرق وإغتصاب وتهجير قسرى من قراهم إلى دول الجوار!!!
ومنع الاغاثه عن من لم يهاجر (لا يرحمو ولا يخلو رحمة الله تنزل)
إسلام بحل ليه سرقة أموال الشعب هو وأعوانه... وبناء القصور وحياة البزخ ...
وتهرييب ما زاد عن الحوجه الى ماليزيا وخلافها...والشعب جعان وعريان وعييان لا صحه لا تعليم لاخدمات؟؟؟
كان ده الاسلام فى نظركم...باقى كلامى حمدو فى بطنه

إقبال المرضى

Post: #37
Title: Re: وكدي عجبني للمرقوت
Author: د.نجاة محمود
Date: 02-13-2009, 02:32 AM
Parent: #36

سلامات يا اقبال

الامور دي كلها نخليها لرب العالمين يحددها

بعدين انت فهمتي الموضوع غلط خالص
البوست دا ما دفاع عن البشير دي وجهة نظر الحشائش

استعدوا للانتخابات بصورة جيدة اعملوا دعايتكم برامجكم
ما تنسوا مجانية العلاج والتعليم والضمان الاجتماعي
اقتلعوا البسير عبر التصويت
موش تجبوا الاجانب يغيرو ليكم الحكم رافعين دارفور كقميص عثمان
ومستخدمنها كبقرة حلوبة.

الان بدا حوار للسلام..
نديه فرصة...
وشكرا لوجهة نظرك

Post: #38
Title: Re: وكدي عجبني للمرقوت
Author: د.نجاة محمود
Date: 02-13-2009, 02:50 AM
Parent: #37

عبر الاميل مشاركة من الباشن مهندس الشاذلي واشكروا على الكلام الطيب في حقنا واتمنى اكون عند حسن الظن دائما وابدا

Quote: شخصيا" اثق فى القضاء السودانى ..يعنى لو البشير اخطاء او غيرو يجب محاكمته فى الداخل ..اما قصة اوكامبو دى حسب فهمى البسيط هى مكايدات خارجية واساليب لتركيع الحكومة ..ومنها يلجو الى الوطن الكبير ليعملو فيه تمزيقا وقتلا ..وما تصريح البشير الاخير ببعيد ..(كان سلمتنا كوشيب ولا هارون بنخليك ) او البلد تقدم شوية تنازلات كده
يعنى تحسى بيهم هم زاتهم ما جادين خالص فى قصة الشرف والامانة والقانون دى ..وما باقين على البشير خالص ..يعنى ادونا اية شىء وخلاص ..

اما الساكنين بره وعاملين فيها خلاص عرفو الدنيا والديمقراطية والعاوز يضبح خروف ..والمتصور لى مع اوباما ..والتكاسى هبانى (كمان ما يطلعنى حرامى وكوز) نذكرهم بالله والوطن ونقول ليهم العرجة لى مراحا ..وخافو على اهلكم وناسكم الجوه من اوكامبو
واسفى شديد للاطالة ..
وكثير احترامى وتقديى لما تكتبى ..
كما اتمنى ان تعتذر لكى هنادى لما سببته لكى ولاسرتك الكريمة من اذى وكونى بخير ..

م.الشاذلى خيرى

Post: #39
Title: Re: وكدي عجبني للمرقوت
Author: د.نجاة محمود
Date: 02-13-2009, 02:52 AM
Parent: #38

ولدنا احمد عبر الاميل رسل القصيدة دي

<font color=blue>

عافى عليك أوكامبو

عافى عليك أوكامبو

تقول بالله فوراوى

تقول فلاتى ... مسلاتى

تقول هو زغاوى

ماهسبان ولا من دولة التانقو

عافى عليك أوكامبو..

عافى عليك بالمره

عافى عليك محل ماتمشى

تفتح ليك دروب من ضو

تنوّر فى ضلام حُكام

بسرقو الحكم فى ليله

يكتفو كل ناس البيت

يكتلو شى

ويشردو شى

ويعذبو فى الفضل قايلين

حكومات الخراب بتطول

ومهما تطول

بجيهم يوم

وبظهر زول يفر العدل

فى دولة خراب حكمت

تمام عقدين من التنكيل

وعافى عليك أوكامبو

عافى عليك تنجّم لى

ناس عمر البشير

وود عثمان محمد طه

لى ناس قوش

وود الجاز

وللمجرم وزير الموت

وداك الأصلو مانافع

وباقى الرجرجه الدهماء

والغوغاء

عافى عليك تمد حبل العداله طويل

يحصل أهلنا فى دارفور

يواسى قلوبهم الحرقوها ناس الجبهة بالتقتيل

عداله تعم بلاد الفور

زغاوه وداجو أو تنجر

مساليت كانوا أسياد بيت

وفلاته

عداله ترجع النازحين

بعد هوس الحكومه الشين

تعود دارفور بلاد من ضو

صبايها السمر تنفر فى ضهر الصحارى تفز

كما الغزلان

عافى عليك أوكامبو

عداله تطول عصابة الجنجويد

تنهيها فى إسبوع

تخلى ديارا ليل مفجوع

تصادر كل حصناتم .. مدافع الموت

تفرتك شملهم مره

وتنهى الكانت اسطوره..

عافى عليك أوكامبو

ماساومت فى شغلك

دخلت عديل على المحظور

وجاهرت

قلت الكلمه لمن خفتت الأصوات

وقفت كشفت زيف فرعون

بدون ماتخاف

بدون ماتلف

بدون تلفيق

أو تزييف

عافى عليك أوكامبو

عافى عليك أوكامبو....

أحمد

Post: #41
Title: Re: وكدي عجبني للمرقوت
Author: القلب النابض
Date: 02-13-2009, 02:59 AM
Parent: #37

Quote: استعدوا للانتخابات بصورة جيدة اعملوا دعايتكم برامجكم
ما تنسوا مجانية العلاج والتعليم والضمان الاجتماعي
اقتلعوا البسير عبر التصويت
موش تجبوا الاجانب يغيرو ليكم الحكم رافعين دارفور كقميص عثمان
ومستخدمنها كبقرة حلوبة.

لا لا انتخخابات دي ما بيقدروا يخاطرو بي نستبلهم فيا

عشان كدة دايرنا يدوهم ليها مقشرة وجاهزة زي العراقيين الاطربقت على دماغهم ولم يعد هنالك أمن ولا حياة ولا جيش ..

وتقسموا الى شيع وطوائف بفعل فاعل ..ووجهت الالة الاعلامية الغربية والتي خصصت لهذا الغرض ( الحرة) (والعربية) وغيرها من وسائل الاعلام

لتفكك بنية المجتمع العراقي ..

الجماعة ديل ما دايرين يتعبوا تاني في دعاية انتخابية ..

وسهر ليالي واجتماعات ...وجري

لا شغل جاهز ... بس

الديمقراطية التي ينادون بها يعلمون انهم لم يبلغوا فيها نصيباً يجعلهم يستفردون بالحكم

فيصبحون ك ليفني ونتنياهو يستجدون الاحزاب الصغيرة ليكونو حكومتهم ( ويكونوا في كف عفريت يعني تحت رحمة الاحزاب الصغيرة)

اهزموا البشير بالانتخابات ...إن شئتم.

Post: #42
Title: Re: وكدي عجبني للمرقوت
Author: Egbal Elmardi
Date: 02-13-2009, 03:06 AM
Parent: #37

نجاة سلامات
إعتقد إنى فاهمه صاح أكتر مما تتخيلى!!
وبالمناسبه ده منطق عجيب جدا...البشير يكتل أطفال دارفور ويعمل كل العمايل المذكوره سابقا...
ونحن نقطعها فى حشانا عشان ما يقولوا قميص معاويه...جنس دا ما سمعنا بيه!!!

وبالمناسبه قالو الجو يساعدو فى قبر أبو ما بدس المحافير!!!
ونظرية أنا وأخوى على إبن عمى ...وأنا وإبن عمى على الغريب ما بتخارجو...
لانه قطع كل الاواصر دى وما فضل لينا حاجه تجمعنا بيه الا العداء السافر
وبنقول ليه قولة كمال الجزولى
بيننا وبينك الغضب.

إقبال المرضى

Post: #45
Title: Re: وكدي عجبني للمرقوت
Author: د.نجاة محمود
Date: 02-13-2009, 03:55 AM
Parent: #42

سلامات يا اقبال

اصلو ما قلت البشير يقتل اي زول

المعارضة اتجهت لدارفور بعد فشلت بكل الطرق في تغير النظام
مثل المعارضة العراقية هي التي استدرجت الامريكان الى
العراق بربط صدام ببن لادن واسلحة الدمار الشامل
وفي حرب الارهاب وغباء الاجهزة الامنية الامريكية واعتمادها على مخبرين
كذابين دخلت امريكا مستنقع الرمال المتحركة العراقي.
وطلع الشلبي شغال مع ايران..

نفس السناريو عايزنو في السودان تجي قوات اجنبية تغير الحكومة
دارفور بلموا باسمها الملاين و بتصلها ملاليم
كما اثبت اثناء مشكلة مركز الخرطوم,,
الناس القاعدة في المعسكرات هي البتدفع الثمن
وهي عايزة السلام والامن
ودي ما بجي بجيوس اجنية
بجي الناس تقعد تتحاور..

بينك وبين البشير الغضب
اهداك قاعد في القصر شيلوه انتو ذي ما شلتو عبود وذي ما شلتو نميري
لكن تيجيبو قوات اجنبية دي ما بتجي ولا تتبلع لاي وطني,
والشكر لوجهة نظرك القيمة

اهم حاجة لو عايزة تفهمي البوست دا

تبعدي من ذهنك اني كوزة واني بدافع عن البشير..

Post: #44
Title: Re: وكدي عجبني للمرقوت
Author: Hisham Osman
Date: 02-13-2009, 03:49 AM
Parent: #37

Quote:
استعدوا للانتخابات بصورة جيدة اعملوا دعايتكم برامجكم
ما تنسوا مجانية العلاج والتعليم والضمان الاجتماعي
اقتلعوا البسير عبر التصويت[/QU

الشيخة نجاة

الانتخابات هذه ليست سوبر ماركت يتبضع منه الناس الحلول لازماتهم

كما انها ليست وصفة سحرية تصلح لمداوة كل الامراض. تلبيس الحق بالباطل

والتسييس ذو المنحي الغوغائي لن يفيدكم في كثير او قليل, لانه اشبه

بالصلاة بعد زوال الوكت.

الديمقراطية ثقافة مجتمعية قبل ان تكون هياكل وصناديق وعمليات اجرائية

وبنظرة بانورامية panoramic view ,شهد السودان خلال نصف القرن الماضي

انهيار كل تجاربه الديمقراطية وعددها ثلاث, لابسبب كوارث طبيعية, انما

بسبب غياب الديمقراطية كثقافة عن الوعي العام, وبسبب التناول الغوغائي

في مخاطبة جزور الازمات.فالانتخابات ستشرعن الواقع المرير, ففي وجود

نظام لم يترك حقا من الحقوق الا واستباحه, لن تكون الدمقراطيات سوي

( لعبة ارقام). عشان كده لا تعويل البتة علي الانتخابات.التعويل علي

الحلم بسودان جديد عبر ازالة الظلامات الاجتماعية دونما عجلة او استعجال

وعبر خلق قاعدة اجتماعية مؤمنة بالتغيير وليها مصلحة فيهو, غير كدا

لو في زول مستعجل ولا مزنوق مخير يواجه ماكسبته يداه, ويالها من يدان

ملطختان.

Post: #49
Title: Re: وكدي عجبني للمرقوت
Author: د.نجاة محمود
Date: 02-13-2009, 09:47 AM
Parent: #44

السيد هشام عثمان

تاني مرة تخاطبني بالشيخة يمكنني ان اخاطبك باي لقب يناسب مع نوعيتك من الرجال..
تجي تكتب رايك بادب غالبك تكون مؤدب نحنا بنستخدم ليك الاسلوب البيستدخم مع نوعيتك من الرجال..
واحسن ليك (تهديد عديل دا) تخطاني ولا عذر لمن انذر..
ما تكبرو شوية تخلو حركات المراهقين دي حريقة تحرقكم..

Post: #55
Title: Re: وكدي عجبني للمرقوت
Author: Hisham Osman
Date: 02-13-2009, 05:51 PM
Parent: #49

Quote: تاني مرة تخاطبني بالشيخة يمكنني ان اخاطبك باي لقب يناسب مع نوعيتك من الرجال

لقب شيخة من بتين بقي كعب ,اخواتك في الله بينومن ويصحن علي حلم الوصول

لللقب دا.بعدين( ياشيخة) لو حبيتي تستخدمي الالقاب معاي, فانا مالقبي

(السيد), لانو انا ( دكتور) , سيد دي تقوليها لواحدين تانين.

يلا اها ورينا شطارتك وادينا نموذج للعبارات البتستخدميها حصريا مع

نوعيتي بدل ادمانك للمجانية واصدار الاصوات بالارجل.

Post: #58
Title: Re: وكدي عجبني للمرقوت
Author: د.نجاة محمود
Date: 02-14-2009, 03:13 AM
Parent: #55

Quote: لقب شيخة من بتين بقي كعب ,اخواتك في الله بينومن ويصحن علي حلم الوصول

لللقب دا.بعدين( ياشيخة) لو حبيتي تستخدمي الالقاب معاي, فانا مالقبي

(السيد), لانو انا ( دكتور) , سيد دي تقوليها لواحدين تانين.

يلا اها ورينا شطارتك وادينا نموذج للعبارات البتستخدميها حصريا مع

نوعيتي بدل ادمانك للمجانية واصدار الاصوات بالارجل.

الدكتور ضكر الانترنت

ما تبوظ البوست دا بالله

____________
لا تقربوا الكيبورد وانتم سكارى

Post: #60
Title: Re: وكدي عجبني للمرقوت
Author: Hisham Osman
Date: 02-14-2009, 04:33 AM
Parent: #58

Quote: ما تبوظ البوست دا بالله

حاضر (ياشيخة)

بس حكاية السكر دي كدي اعدي فيها البصر كرتين, عشان كان الله هون

دحين انا في البلد دي غالبا حا اسوي ليي حاجات ترفع راس السودانيين

المدنكس من عمايل الكيزان وماشابه.

Have fun

Post: #61
Title: Re: وكدي عجبني للمرقوت
Author: د.نجاة محمود
Date: 02-14-2009, 01:41 PM
Parent: #60

ضكر الانترنت

السودان ما بترفع بالذيك ولا بتنكس بالكيزان

يعني اسع منتظرينك ترفع راس السودان
الله قادر..
في امريكا راس السودان مرفوع من زمان لما المبعوثين الحكومين بيمشوا بناء على التفوق
الاكاديمي والقدرة. واتخرجوا واثبتوا نفسهم داخل وطنهم وخارجه.

الزول البطارد الناس بدون سبب.

خيارين يا مجنون يا سكران

اني خيرتك فختار
الجن بنداوة كعبة الاندارة..

Post: #40
Title: Re: وكدي عجبني للمرقوت
Author: د.نجاة محمود
Date: 02-13-2009, 02:57 AM
Parent: #31

Quote: لن تتضرر الحشائيش بل سوف تنهار أشجار وتٍقتلع جذور ضخمة امتصت عرق هذا الشعب

طبعا اختك صدقت كذب البورد للاسف ناس ما مسؤولة الموضوع عندهم ما اد..

تقتلع اشجار بالانتخابات
ويحل السلام بالحوار
مودتي لك يا ملك..

Post: #43
Title: Re: وكدي عجبني للمرقوت
Author: د.نجاة محمود
Date: 02-13-2009, 03:11 AM
Parent: #24

سلامات يا حسين
ليه نموت نحنا لو في فرصة ما يموت زول؟

ليه دائما ترتبط الحرية والديمقراطية بالموت؟

الموت يخلق احقاد لا تدفن جيل عن جيل..
قتل اقارب في الجنوب كانا يعملان في الاشغال.في التمرد الاول حين كان سبب القتل
ان تكون شماليا لا يهم لو كنت طيب او سئ او اتيت لتعليم ابناء الجنوب
كانت امهم عندما يضيق بها حزنها تركض في كثبان الرمال وتبكي
كل من شاهد هذه الام الثاكلة بالتأكيد حفر هذا المشهد في اعماقه
وتتوارث الاحقاد والكراهية..التي تولد مزيد من الامهات الثاكلات
في الجهتين..بناء السلام يحتاج للتضحيةبالامور الشخصية لغرض اكبر
يجب الا يموت اي انسان باسلحة حكومته واذا سنحت اي فرصة لايقاف نزيف الدم يجب اهتبالها
لان القتل يولد الحقد والكراهية..

لوردات الحروب بما فيهم حكومة البشير الان يحاولون راب الصدع والدخول
في حوار مباشر لرفع الظلامات وحقن الدماء..
عندما انتهت حرب الجنوب الاخيرة بالـاكيد كثير من الاسر التي مات ابنائها فيها من الجهتين
حتكون شافت اولادها ماتوا سمبلة. لكن اولادهم ديل رصفوا طريق الحرية والسلام بجماجمهم
موت كثير ثم سلام حتى لا يموت المزيد..

ثورتنا الوحيدة الان هي ثورة الاصبع البنفسجي كما سماها اخي عادل
الانتخابات هي الحل الوحيد المتاح بدون اي اراقة دماء..
يلا استعدوا جميعا لها حتى لا يكتسب نظام البشير شرعية من الجماهير..

السلام هو الذي يبني البلد ويكفي من ماتوا لاجل السلام..
ولك التحية دائما وابدا وجهات نظرك مقدرة جدا..

Post: #46
Title: Re: وكدي عجبني للمرقوت
Author: د.نجاة محمود
Date: 02-13-2009, 08:04 AM
Parent: #43

<object width="425" height="344"><param name="movie" value="http://www.youtube.com/v/SaZP_hJsO9c&hl=en&fs=1"&g...;/param><param name="allowFullScreen" value="true"></param><param name="allowscriptaccess" value="always"></param><embed src="http://www.youtube.com/v/SaZP_hJsO9c&hl=en&fs=1"; type="application/x-shockwave-flash" allowscriptaccess="always" allowfullscreen="true" width="425" height="344"></embed></object>

Post: #47
Title: Re: وكدي عجبني للمرقوت
Author: د.نجاة محمود
Date: 02-13-2009, 09:09 AM
Parent: #46

ومن ولدنا احمد يوسف وجهة النظر دي

Quote: ا دكتورة خليها تحرق عشان اي مرقوت يموت و اكان للقطية بنبنيها تاني باس خالية من اي مرقوت وكان اي مرقوات فكر تاني يجيها بليل بي دبابتو يكون عارف مصيرو شنو

وش متكيف جدا

Post: #48
Title: Re: وكدي عجبني للمرقوت
Author: حسين نوباتيا
Date: 02-13-2009, 09:33 AM
Parent: #43

تحياتى يادكتورة..

Quote: ليه دائما ترتبط الحرية والديمقراطية بالموت؟

على قول الزعيم الازهري الحرية نور و نار فمن اراد نورها فاليكتوى بنارها ...و لانها تؤخذ و لا تعطى ..

Quote: الموت يخلق احقاد لا تدفن جيل عن جيل..

الموت يادكتورة حصل في الجنوب و الشمال والشرق والغرب و خلق احقاد و غبن ALREADY و ليست من الحكمة ان يرى الضحايا القاتل يتلولح و يتراقص قدامهم ليل نهار ..

الناس الماتت في الجنوب دي ما ماتت من اجل حرية او استقلال بل استغلال وانتهازية حكومة الشياطين التى صورت لدبابنيها ان قتل اخوانهم الجنوبيين هو جهادا يدخل الجنة ..فمن الطبيعى تلقى احقاد تطال المحسن والمسيئ ..

Quote: ثورتنا الوحيدة الان هي ثورة الاصبع البنفسجي كما سماها اخي عادل
الانتخابات هي الحل الوحيد المتاح بدون اي اراقة دماء..
يلا استعدوا جميعا لها حتى لا يكتسب نظام البشير شرعية من الجماهير..

الماسك القلم مابكتب نفسو شقي يادكتورة ..
يعنى حسى البشير وعصابته ديل حايذحو لنا من البلد علشان شوية صناديق اقتراع !!! ديل عشان يقعدوا قتلوا الملاين و شردوا عشرات الاف و نزلوا نص الجيش والخدمة المدنية للصالح الانقاذي ..وتخلوا عن حلايب وباعوا ملاين الافدنه في الشمال للمصرين..و فتحوا البلد لمخابرات الدول الغربية من اجل توفير الحماية..و حتى لو باعونا بالكيلو كسماد لن يتخلوا عن السلطة طواعية..

Post: #50
Title: Re: وكدي عجبني للمرقوت
Author: قيقراوي
Date: 02-13-2009, 12:23 PM
Parent: #48

Quote: ثورتنا الوحيدة الان هي ثورة الاصبع البنفسجي كما سماها اخي عادل
الانتخابات هي الحل الوحيد المتاح بدون اي اراقة دماء..
يلا استعدوا جميعا لها حتى لا يكتسب نظام البشير شرعية من الجماهير..

جميل التعبير دا : ثورة الاصبع البنفسجي
لكني ما ملاحظة يا دكتورة انو البوست دا بتناول حكاية الثورة دي بخفة شوية ؟
ينقز بينا من " الولاء و البراء " و محاكمة البشير ( المسلم ) بالشريعة الاسلامية لي الحل السلمي الديمقراطي عبر صناديق الاقتراع . . . من غير ما يحدد آلية و لا حيثيات . . .
باقي ليك لسه نحن بنتخمى بالسهولة دي ؟
اخدنا حصانة ياخ عبر مشوار التثوير الطويل بتاعنا دا ياخ . . .
باقي ليك في ديمقراطي بصدق المتآمرين و المنقلبين على الديمقراطية بأعمال تدبر بليل لاستمرار ليل الظلم الطول
وين قسم اكتوبر طيب ؟
" لسه بنقسم يا اكتوبر لما يطيل في فجرنا ظالم نحمي شعار الثورة نقاوم "

إقتناص الفرصة الأخيرة أو الفوضى الشاملة: مبادرة المجتم...لمدني وأزمة السودان

Quote: * الاجراءات التمهيدية قبل المؤتمر:
الدعوة للمؤتمر تعني قبول الحوار والتفاوض والوصول لتسويات وإتفاقات ترضي مختلف الأطراف، أي في النهاية رفض نهج الاستفراد وقبول الديمقراطية وآلياتها التوافقية. ولكي يشكل المؤتمر قطيعة حقيقية مع النهج القائم الذي قاد الى الأزمة الراهنة، فهنالك اجراءات تمهيدية، ضرورية ولا غنى عنها، على الحكومة القيام بها على وجه السرعة، تشمل:

* (1)إظهار النوايا والشروع الواضح في التنفيذ المخلص والنزيه لما تبقى من بنود اتفاقية السلام الشامل
* الإعلان والالتزام المخلص بوقف إطلاق نار في دارفور وكفالة أمن معسكرات النازحين، من قبل طرفيّ الطراع
*(2) الإلتزام والتعجيل بعملية إصلاح القوانين، بما يتسق مع الدستور الإنتقالي، وبصورة خاصة قوانين الأمن الوطني، الإستفتاء وتقرير المصير، الصحافة والمطبوعات، مفوضية حقوق الإنسان
* العفو عن المدانين في أحداث 10 مايو
* رفع الرقابة الأمنية عن الصحف
* إيقاف عمليات الاستدعاء والاعتقال والتعذيب تجاه الناشطين المدنيين والسياسيين
* القبول والإعلان الرسمي لمبادئ العدالة الإنتقالية( بما في ذلك آليات الحقيقة والإنصاف والمعافاة وجبر الضرر والاصلاح المؤسسي والعدالة الجزائية).

كان سألتي عن حل تالت :
(1)
طيب يا دكتورة و عطفاً على ما فهمته من موقفك في البوست دا و انو ما دفاع عن البشير و لا الحكومة الحل في يد منو باقيلك ؟ . . . الحكومة و لا الناس الموجهه ليهم بوستك دا ؟ الظالم و لا المظلوم ؟
المبادرة دي قدمت ليك بديل لـ " عدالة " للمحكمة الجنائية الدولية المابنها دي . . . طيب رايك شنو في " العدالة الانتقالية " . . . و قصة محاكم العدالة " الناجزة " بقوانين سبتمبر ديك الشعب قال كلمتو فيها و ما بتلفق مع " السودان الجديد "
(2)
اتكلمتي عن ثورة الاصابع البنفسجية . . . جميل كلام الانتخابات دا ياخ . . . بس بياتو قانون انتخابات عامة ؟
الفصلو الترزي داك ؟ . . . و الاقر بمساومات سوق الله اكبر داك ؟ عشان يكرس قعاد الناس ديل في راسنا ليوم القيامة ؟
الفي رسينا دا قرن ما قمبور

كامل تضامني مع البشير و ربنا يهديه

Post: #51
Title: Re: وكدي عجبني للمرقوت
Author: د.نجاة محمود
Date: 02-13-2009, 03:24 PM
Parent: #50

قيقا

الرد ليك
ايوا انا كوزة متزوجة كوز عجوز عشان قروشو الشالها من الانقاذ
ونحنا القلبنا الحكومة كنا في المجلس الاربعني حق انقلاب الانقاذ
واسع ماسكين قروش الانقاذ متنعمين بيها.
عشان كدا خايفين البشير يمشي النعمة حقتنا تزول..
انا ارجع ابيع الزلابية وزوجي يشحد بكوز البزاق في المحطة الوسطى..
ذي ما قالت هنادي ..

وشكرا ليك لحسن الظن

Post: #52
Title: Re: وكدي عجبني للمرقوت
Author: عزام حسن فرح
Date: 02-13-2009, 03:33 PM
Parent: #51

أن الدِستور السوداني مِثلهُ مِثل كُل دساتير الطُغاه ، فُصلِت موادِهِ لِتكريس هيمنتِهِم على الكُل ... فإن التِكِوِع على أن الدِستور لا يسمح بِمُحاسبة رئيس الجمهورِية أثناء شُغلِهِ لِلوظيفة كإستِشهاد المُسلِم بِأي القُران الكريم أمام اليهودي ... سيتشبث بِالحُكم عُمر البشير وحكومتِهِ تشبُث الأعمى بِعُكازِهِ ستُضاف أسماء الآخرين مِن مَن سقطت أسماءِهِم بِقائِمة أوكامبو ، فالحُكم هو الضمان الوحيد لِلحَيولة دون القبض على عُمر البشير وزُمرتِهِ ... لِذا سيعُض على كُرسيهِ عضاً ... وهذا التشبُث سيؤدي بِدَورِهِ إلى المُغالاه في مُمارسة الديكتاتورِية بِرِقابتِها على الحُرِيات العامة وتوزيع الإتِهامات الجاهِزة ، مِما سؤدي كذلِك إلى مُعاناه الخالات والعمات والرُضع وذوات الخدور في بِلادي ، التي لها الله تعالى شأنهُ فهَو المُنتقِم الجبار ... والمُدهِش في الأمر أن البشير يطلُب مِن مَن قُتِل آباءِهِم وأزَواجِهِم وإخَوتِهِم في دارفور وشرق السُكان ... يطلُب مِن أهالي وقبائِل قتلانا في كجبار ... يطلُب مِن آلاف المفصولين لِلصالِح العام وأُسرِهِم ... يطلُب مِن أهالي وقبائِل عدد (28) ضابِط تم إعدامِهِم في لَيلة العيد ... يطلُب مِن (140) ألف نازِح مِن دارفور ... يطلُب مِن المُهمشين بِأطراف بِلادي الذين أصبحوا أشباح يسكُنون أطلال ... يطلُب مِن ساكِني الشوارِع والسكن العشوائي مِن الذين في الفيافي مِن الذين يقبعون في السِجون بِسبب الزِندِية التي تفرُُضُها مصلحة الضرائِب ... يطلُب مِن كُل هؤلاء أن ينصِفونهُ أمام أوكامبو ...

كُلما همدت نار ستشتعِل أُخرى ... فإن مُتمرِدين دارفور ومِن قبلِهِم الحركة الشعبِية (قرنق/سِلفا) وحركات الشرق ، يرَون أن المُتمرِد عُمر البشير الذي تمرد على حُكم ديمُقراطِي ... يرَون أنهُم لا يختلِفون عنهُ بِشئ ... لِذا تأبى أجِندتِهِم أن يعفو عنهُم أو يطلُب مِنهُم العَودة لِطاوِلة المُفاوضات أو أن يقوم بِتقسيم السُلطة علَيهِم ... قد يتساءلون الأن لِما لا نطلُب نحنُ مِنهُ ذلِك ... فنحنُ كُنا جميعاً في الهم مُتمرِدين ... وإن كان تمرُد الحركات أشرف ، فإنهُم يتمردون على مُتمرِد قد تمرد على ديمُقراطِية ...

Post: #53
Title: Re: وكدي عجبني للمرقوت
Author: Adil Osman
Date: 02-13-2009, 04:46 PM
Parent: #52

http://vimeo.com/3150958

المرقوت وصل القصر الجمهورى

Post: #54
Title: Re: وكدي عجبني للمرقوت
Author: قيقراوي
Date: 02-13-2009, 04:52 PM
Parent: #51

Quote: قيقا

الرد ليك

ما فهمت علاقت مداخلتي هنا بالكلام القلتيهو دا يا دكتورة يا ريت التوضيح لو تكرمتي علي

Quote: وشكرا ليك لحسن الظن

ودي بالذات ادتني احساس ما جميل
الدخل حسن الظن هنا شنو ؟
و الجاب الظن اصلاً شنو ؟

انا ضغت على جزئية محددة شايلها من اهلنا الطيبين و متفق معاك فيها " من فش غبينو خربت مدينتو "
البلد دي بلدنا كلنا و الفيها اهلنا و بهمونا كلنا. . .
بس اختلافي معاك انو المرة دي مافي عفى الله عما سلف
الديمقراطية - السلام - العدالة - الوحدة . . . حزمة واحدة

و اعتراضي على البوست اتوقف في حصر القصة في خيارين لا ثالث لهما

Quote:
Quote: هي القطية دي دكتورة يا يحكموها يا يحرقوها ما في حل تانى خالص؟؟؟؟

حسين يا اخوي لو شايف شوفة تانية قولينا
ودائما ما تكتبه محل تقدير عندنا وعند اي قارئ حصيف..

وربنا الحل في وجهة نظرك..الذي سفر البن دق وحرق
ولك المودة

قمت جبت ليك راي انا شايف صحتة و سداده : إقتناص الفرصة الأخيرة أو الفوضى الشاملة: مبادرة المجتم...لمدني وأزمة السودان

الظن وين هنا ؟

Post: #56
Title: Re: وكدي عجبني للمرقوت
Author: د.نجاة محمود
Date: 02-14-2009, 02:52 AM
Parent: #54

Quote: و اعتراضي على البوست اتوقف في حصر القصة في خيارين لا ثالث لهما

سلامات يا قيقا

البوست ما حصر القصة في اي عدد من الخيارات
بل جعل خيارات مفتوحة واتفتح للقراء انه يكتبوا ما يرون..
بالفعل اي زول كتب نشرت ما كتبه
حتى لو متعارض معاي

كيف ممك الخوج من الازمة دي
انا قدمت حلي وهو الانتخابات او ثورة الاصبع البنفجسي
في اخوة من برة وجوة جو قدمو خياراتهم.

معي دائما الخيارات مفتوحة

قايلني اتربيت في حزب شمولي (وش ضاحك)

Post: #57
Title: Re: وكدي عجبني للمرقوت
Author: د.نجاة محمود
Date: 02-14-2009, 02:57 AM
Parent: #54

Quote: بس اختلافي معاك انو المرة دي مافي عفى الله عما سلف
الديمقراطية - السلام - العدالة - الوحدة . . . حزمة واحدة

منو القال عفى الله عما سلف؟
ياخي الى الان انا بفتكر انه اي زول اتظلم يلقى حقو
وزعلت جدا لما مرقو النميري بدون حساب
والى الان بفتكر انه تتفتح تحقيقات في كل الحاجات الحصلت والظلامات من
قصر الضيافة وموت الازهري في السجن ومحاكماات الشجرة وود نوباوي والجزيرة ابا
وما حدث بعدها من اغتيال للشخصية الامام الهادي..

فقط انتظروا الانتخابات بعداك محاكمة اي زول داخل السودان

Post: #59
Title: Re: وكدي عجبني للمرقوت
Author: د.نجاة محمود
Date: 02-14-2009, 03:16 AM
Parent: #57

من الابن ياسر بالاميل..

Quote: تحية وسلااام دكتورة

اول شى ايتها العزيزة شكرا انك اتحتى ناافزة للضيوف

انا خااايف يادكتورة النااس المناااضلين ديل يبقواا عاملين زى المرة الجااها حراامى نص الليل

ورااجلها قاااعد..بتقول ليه قوم ياراااجل...قال ليها عبااس ود الجيرااان نوباوى وعضلااته تبش بقدر على الحراامية ..كوركى ليه

وياا مرة طيرتى الحلم الله يقطعك

يمكن لو اوكاامبو دة سوداانى كنا ادينااهم العزر ..بس فرحاانين بى واحد اجنبى ينوب عنهم ويجى يحااكم البشير؟؟؟

يبقى الرجال كملواا فى كررى..وأحيي كل منااضل قتل وسجن وعزب وهو ينااضل من اجل وطنه وفى وطنه

وسلاام

م.ياسر ابوزيد

Post: #62
Title: Re: وكدي عجبني للمرقوت
Author: قيقراوي
Date: 02-14-2009, 10:18 PM
Parent: #59

Quote: منو القال عفى الله عما سلف؟
ياخي الى الان انا بفتكر انه اي زول اتظلم يلقى حقو
وزعلت جدا لما مرقو النميري بدون حساب
والى الان بفتكر انه تتفتح تحقيقات في كل الحاجات الحصلت والظلامات من
قصر الضيافة وموت الازهري في السجن ومحاكماات الشجرة وود نوباوي والجزيرة ابا
وما حدث بعدها من اغتيال للشخصية الامام الهادي..

فقط انتظروا الانتخابات بعداك محاكمة اي زول داخل السودان

برضو السؤال موهط :
كيف ؟
الآلية شنو ؟
بياتو قانون ؟
بإرادة منو ؟

اي نعم مع الازمة العالمية الرابعة كساد و سوق كعب و قوة شرائية مافي
لكن ما لدرجة بيع حاضرة بغائبة او بالمجان عديل كدا . . .
وكتم البعملوا في عمايلم دي قايلين الشغلة طلقيت ساي ؟

اها يا دكتورة رايك شنو في المبادرة ديك و ما شفناك فيها ؟

و العدالة الانتقالية كيف ؟
( بما في ذلك آليات الحقيقة والإنصاف والمعافاة وجبر الضرر والاصلاح المؤسسي والعدالة الجزائية).
مش من زمن نميري بس من المهدية مروراً بـ 1955 م . . . عنبر جودة . . . و لي يوم الليلة

Quote: قايلني اتربيت في حزب شمولي (وش ضاحك)

كان في واحدهنا اتربى في حزب شمولي كان اتحسس اسي دي

Post: #63
Title: Re: وكدي عجبني للمرقوت
Author: د.نجاة محمود
Date: 03-02-2009, 04:46 PM
Parent: #62

فوق

لربنا يحفظ بلدنا من الفتن ما ظهر منها وما بطن