جمال الوالي رئيساً لنادي المريخ بطلب من عمر البشير ..

Quote: وكشف الوالي عن أنه تولى رئاسة المريخ بعد اتصال من الرئيس السوداني عمر البشير. وأضاف "اتصل بي عدد كبير من رجال المريخ الكبار وطلبوا مني قيادة النادي فاعتذرت.. واتصل بي عدد من الوزراء وعلى رأسهم عبد الباسط سبدرات وزير العدل والدكتور مصطفى عثمان إسماعيل فاعتذرت ايضا." وتابع "لكني فوجئت باتصال من المشير عمر البشير رئيس الجمهورية يطلب مني الموافقة على تولي رئاسة النادي وقال لي 'إن الرياضة عمل قومي والمريخ ناد قومي وأنا واثق أنك ستنجح وستكتسب المزيد من الخبرة لأن الرياضة مدرسة فتوكل' فلم أجد أي سبيل سوى الموافقة."

المصدر ..
http://goansport.net/article/id/15674

الكلام دا بقى زي الحديث ..
ناس قوون قالوا ناقلنه من رويترز وناس رويترز قالوا ناقلنه من سوبر ..
المصيبة الشارع الرياضي كله عارف المعلومة دي ..

نادي الحكومة يا عمكـ
معقولة يرأسوه الأهالي؟

تعميد من فوق ياعريس..

وما قال ليهو ونحن بندعمك......

معتصم خالص مودتى لك..إسماعيل محمد أحمد عباس...

كيفك يا إسماعيل ..

تسجيل وارغو كلف خزينة النادي تلاتة مليون دولار أقصد جمال الوالي ..
ووالي الخرطوم قال متبرع بحوض سباحة عالمي دعماً لجمال الوالي ..

Quote: معقولة يرأسوه الأهالي؟

تاني يقولوا ليك أهلية وديمقراطية الحركة الرياضية ..

أهلية شنو يا عمك ..
دي خزينة الدولة ..

Quote: أهلية شنو يا عمك .. دي خزينة الدولة ..

__
Ya man, every body knows that..

ياسر العريس ..
مشتاقين ياخ ..

المشكلة خزينة الدولة دي كان صانت لينا طريق الخرطوم مدني دا مالو ..
أو على الأقل عملت لينا إستاد بدل زريبة العيش مالو ..

معتصم تحياتى

انا شخصيا سمعت الكلام دا من جمال الوالى على اجهزة الاعلام اكثر من مره

محمد علي سلام ..

بالفعل هذه المعلومة موجودة في الشارع الرياضي ..
ولكن كنا نريد من الدولة دعم الرياضة كافة مثل البنيات التحتية وتوجيه وزارة الرياضة بتاهيل الملاعب ورعاية الناشئين وخلافه وليس بتوجيه من يلزم بعمل اللازم ..
الآن الكفة المادية مرجحه لصالح المريخ مما خلف تساؤل وقاب كبير بينه وبين الفرق حتى نادي الهلال الندي التقليدي له وأصبح المال هو المحرك الرئيسي في بلد فقيره في كل شي ..

Quote: تسجيل وارغو كلف خزينة النادي تلاتة مليون دولار أقصد جمال الوالي ..

بل من خزينة الشعب الصابر علي أمثال هولاء


تحياتي معتصم

أنور كيفك يا حبيب ..

Quote: بل من خزينة الشعب الصابر علي أمثال هولاء

ليهم يوم ..

المصيبة كلها في تبرع والي الخرطوم لبناء حوض سباحة في نادي المريخ ..
والخرطوم كلها تغرق في شبر موية ..
الخريف دا بجي كل سنة يا عالم ..


حوض سباحة ومقصورة ..
والسودان كله ما فيهو كورة ..

الغالي معتصم دفع الله
تحياتي :
بغض النظر عن التكليف الذي جاء على عاتق جمال الوالي من سعادة الرئيس ولكن في اعتقادي أن الفكر الإداري عند جمال الوالي متطور جداً والدليل على ذلك جعل من نادي المريخ مؤسسة استثمارية ضخمة قادرة على تمويل كل مشاريع النادي والآن النادي ليس في حوجة لدعم الدولة . أنت عارف يا معتصم العائد المادي من الشركات الراعية لتوقيع العقد مع وارقو حوالي 400 ألف دولار .

Quote: نادي الحكومة يا عمكـ

يا ود الصايم عندك خبر أمس نافع علي نافع زار بعثة الهلال وأتبرع ليهم بمبلغ 10 ألف دولار وأيضاً أناشد السيد / جمال الوالي بدعم نادي الهلال للخروج من أزمته المادية والمشاركة في صيانة المقبرة بس يا معتصم الصيانة ساهلة المشكلة ريحة الكسبرة والشمار .
تخريمة :
الحكومة عارفة المريخ هو النادي الوحيد الذي يجلب الفرح للشعب السوداني

( غايتو حسادة رشاشات هههههههه)

العزيز معتصم
كويس اعترفتوا انها زريبة عيش

يا سمؤال ..
شوقنا بالكوم يعلم الله ..

ما نحن فريق الغبش والغلابة من الشعب عشان كده إستادنا زريبة عيش ووسط الناس
بعدين الله يستر عليكم التاكسي دا ما ينزلكم في التمهيدية بالنص ..

وإستادكم دا تتموهو مع ناس الدوري الممتاز ..






-----------
تليفون السودان شغال يا صديق ..

كيفك يا حسن ..

التكليف دا بتم بأمر الشعب يا صاحب ..
ورئاسة الدولة عليها بتكليف وزرائها ومسؤليها ..
يعني عندك المدينة الرياضية شاهدة على فقر الرياضة وتدهورها ..
إذاً كيف للدولة تكليف ودعم جمال الوالي ..

بعدين وين هو التطور الإداري الذي تتحدث عنه وكل يوم نسمع بمشاكل وإنقسامات ..
مافي حاجة إسمها إستثمارات ظاهرة للعيان ما تم هو بناء إستاد ولا غبار عليه فهو مفخرة نعم ولكن ليست هنالك سياسة إستثمارية واضحة كل ما نعرفه من دعم هو نفرة وتبرع الأعضاء والدعم البجي (باللفة)..
التطور هو إتباع المؤسسية وليس المال هو كل ما يحكم ..
ليس هناك بناء مؤسسي أو هرمي نقدر نشير له إنما إجتهادات فقط وهذا من المفترض ان يكون عمل الإدارات ..


أما تبرع نافع دا ياخده عليه ويوديه لوزارة الشباب والرياضة أو يقول دي للمدينة الرياضية التي تنفع الأجيال والنشء وليس للشعارات أو الكسب السياسي ..

أبقى طيب يا حبيب ..

العزيز حسن مضوي

Quote: تخريمة : الحكومة عارفة المريخ هو النادي الوحيد الذي يجلب الفرح للشعب السوداني

صدقت والله



تحت تحت :ــــــــــــــــــــــــــــــــــ
العريس معتصم وينك ياجميل والله مشتاقين
009746916878 ده تلفوني الجديد
القديم المعاك رجعت لقيتو مسحوب من الخدمه


ابقي اظهر

وين الديمُقراطية ...؟

وين أهلية وديمُقراطية العمل الرياضي ؟؟؟


فوووق دا كلو وين رجالات المريخ ؟؟؟


ألم يخلق الله غير الوالي ؟؟؟


الوالي يبطل نعاذير ويدخل الانتهابات ويشرعن وجوده بالطُرق الديمقراطية ؟؟؟


يعني هسع لو اتصل رئيس افريقيا الاتحاد الافريقي او الدولي وقال للبشير تنحى ح يتنحى ؟؟؟؟



تمثيلية بااااااااااااااايخة ومكررررررررررررررررورة.


...............................................................................حجر.

معتصم العريس الجميل
صباحاتك خير

Quote: المصيبة كلها في تبرع والي الخرطوم لبناء حوض سباحة في نادي المريخ .. والخرطوم كلها تغرق في شبر موية .. الخريف دا بجي كل سنة يا عالم

..

الحبيب أسعد الريفي ..
صباح النور يا صاحب ..

حوض سباحة والبلد تغرق في شبر موية ..
أمر محير ..

الرفاعي الحبيب ..
كيفنك وحمدلله على السلامة ..

حالياً الساحة أصبحت خالية تماماً إلا من الوالي والدعم معروف ..
أهلية دي انتهت وحتى الديمقراطية والإنتخابات القادمة سوف تكون معروفه ..
ما نريده وحتى تعود للرياضة عافيتها الدعم الكامل والرعاية من الدولة ..
وتعمير البنية التحتية ودعم الناشئين وتطوير المناشط الرياضية كافة ..


تشكر يا حبيب ..

كيفك يا محمد الطيب ..
مشتاقين كتير ..
سجلت الرقم عندي الآن ..

بعدين حكاية الحكومة عارفه دي ما كتيرة شوية يا جماعة ..
ياخي الحكومة دي أكتر حاجة مانعة الفرحة من الناس ..
وهو المريخ زاتو وين من سنة 1989 ممكن تربط الاتنين مع بعض ..

والله أنا كنت أتمنى إنو يوجه الدعم دا للمنتخب وللبنية الأساسية للرياضة على الأقل ..
يا محمد شفت أمس وأول أمس المباريات الودية الدولية ؟
ياخي متعة والله حتى تونس والمغرب كمان ..


أبقى طيب ..

العريس معتصم
مسكاقمي
أها يا العريس نقول شنو حسع كلامك دا نفسروا على اية بند
بند أن جمال الوالي كوز وجايبنو ناس الحكومة عشان زولهم
ولا بند ناس الحكومة الكيزان مريخاب وجابوا زولهم وقاعدين يصرفوا على ناديهم ( المريخ )

ركز ياخ

Quote: والله أنا كنت أتمنى إنو يوجه الدعم دا للمنتخب وللبنية الأساسية للرياضة على الأقل ..

ولو بالمرة دعمو الاكل والعلاج والتعليم يكون أحسن

عمنا الجعلي كسرت رجله أعلى الفخذ وهو شاب في
الخامسة والسبعين من عمره .. يحب الحياة وأكل
لحم الخراف التي (مرعاها طيب)
قال لي: أدوني بطاقة معاقين أركب بيها الباصات
مجانا، وأتعالج بيها مجانا .. ياخي أنا
عاوز بالباصات والعلاج شنوّ؟ .. هسع
لو أدوني بطاقة للمطاعم مش كان أحسن؟

تحياتي يا عريس

كيفك يا جنرال محمد ..

المشكلة كان لخبطنا كوم الكورة على باقي الأشياء ح نطلع صفر كبير ..
والله نحن عايزين كل مواطن يكون عنده بطاقة علاج وبطاقة تموين وحياة كريمة ..
الله يعين البلد ..

أبقى طيب ..

كيفك يا خال ..
وحمدلله على السلامة ..

Quote: أها يا العريس نقول شنو حسع كلامك دا نفسروا على اية بند بند أن جمال الوالي كوز وجايبنو ناس الحكومة عشان زولهم ولا بند ناس الحكومة الكيزان مريخاب وجابوا زولهم وقاعدين يصرفوا على ناديهم ( المريخ ) ركز ياخ

صدقني ما فرقت يا خال ..
وأنا مركز شديد عشان كده كتبت الكلام دا ..
كثيرون نفوا دعم الحكومة للمريخ ممثلة في شخص جمال الوالي لذلك نتساءل ..
أما كان الأجدى والأنفع أن يكون هذا الدعم للرياضة عامة في السودان ..
أنا لا يضيرني إن كان بالمريخ إستاد عالمي أو خلافه بالعكس أنا مع تشجيع الأندية للإرتقاء بالبنية التحتية الخاصة بها وتطوير نفسها ودا بالطبع ينعكس على شكل الكرة عموماً في البلاد ..
كنت في السودان وشهدت عملية تسجيل اللاعبين وما يكتب في الصحف الرياضية وللأسف الأمر كله مخجل وسيؤدي بالرياضة إلى ما لا تحمد عقباه لأن الكل يتكلم عن الكاش البقلل النقاش ومافي حاجة مدروسة أو إتفاق على تطوير العمل الرياضي عموماً والحرب الكلامية مشتعلة ما بين أنصار الناديين والبقية ضائعة في الرجلين وحتى إتحادنا الهمام أصبح لا فائدة مرجوءه منه ..
هل تعلم يا خال أن اللاعب المجنس لاسانا إستلم جنسيته السودانية قبل أن تطأ أقدامه مطار الخرطوم بالله عليك كيف يتم ذلك لو لم تكن هناك محسوبية وتمرير مثل هذه القرارات في بلد تتكلم عن السيادة وخلافه ..
مشكلة تب مافي والله ..
مبروك على المريخ جمال والوالي والحكومة زاتو ..

أبقى طيب ..

Quote: صدقني ما فرقت يا خال ..

لا فرقت يا العريس معتصم يا ود اختي
تفرق ونص كمان
اتهام المريخ الكيان العظيم بانها تأكل مال الشعب وتقول لي ما فرقت
أمال البتفرق شنو
إذا دليلك ان المريخ صرف ملايين الدولارات في تسجيل اللاعبين وأنها من اموال الدولة
نعم المريخ فعلاً صرف ملايين الدولارات في تسجيل لاعبين بس مش من اموال الدولة
طيب الهلال أيضاً سجل لاعبين وبالملايين كمان أها جاب الملايين دي من فين
أنا أجاوب نيابة عنك
من الارباب ومن أعضاء الشرف بنادي الهلال
أها طيب المريخ كمان عنده الوالي وأعضاء شرف ولا مش كدا
وما تجي تقول لي جمال الوالي شاب صغير ولقي الفلوس من فين وأنه كوز والمؤتمر الوطني تدعمه
لا يا اخوي
كتار جداً الشباب في السودان عندهم مليارات وهم مؤتمر وطني لانهم وجدوا تسهيلات ومارسوا تجارة
واعضاء شرف المريخ والهلال شغالين تجارة وداخل السودان وبيدعموا انديتهم
والاخ جمال الوالي عند توقيع العقد مع النجم وارغو في فندق روتانا وضح قيمة العقد ومصدر التمويل
واظن الكلام كان واضح ونحن بنثق في جمال الوالي
هل نسحب الثقة والمصداقية من جمال الوالي عشان هو كوز
مالكم كيف تحكمون
ما سألنا الهلالاب من اين كان تمويلكم للصفقات التي تمت
سبحان الله ايه الوطنية والشعور الديني المطلوب من المريخ فقط دا
المريخ ما مسئول عن تمويل المنتخب ولا شارع مدني ولا بيوت الايتام ولا حتى بيوت الاشباح

Quote: مبروك على المريخ جمال والوالي والحكومة زاتو ..

الله يبارك فيك
الشئ المعروف أن جمال الوالي ليس لديه منصب دستوري ولم يتقلد منصب دستوري في هذا النظام وليس عضواً في المكتب التنفيذي للمؤتمر الوطني والذي نعرف عنه انه رجل اعمال ورئيس نادي المريخ
ولكن
ركز معاي في ولكن دي
عبدالرحمن سرالختم كان وزيراً للدفاع وحالياً والي الجزيرة ورئيس المؤتمر الوطني لولاية الجزيرة وعضو المكتب التنفيذي للمؤتمر الوطني

يا خال تفرق لما السياسة تتدخل في الكورة ..
والتعيين السياسي معروف في الحتة دي وحتى عبدالرحمن سرالختم نرفضه ولو جاء بمال الدولة كلها ..
لو الدولة بتوجه ماله دا للعام مافي مشكلة ودونك المدينة الرياضية والمنتخب القومي لا يجد الدعم منها وأتفق معك أنها ليست مسؤلية نادي المريخ أو الهلال حتى ولا مطلوب منهما تمويل شارع الخرطوم مدني أو مشروع حيويي آخر ..
أموال صلاح ادريس التي يصرفها على الهلال بشيكات مدفوعة والكل يعلم ذلك حتى أننا نتخوف من عدم الإيفاء بما دفعه للهلال لو طالب بها الآن ..

Quote: الشئ المعروف أن جمال الوالي ليس لديه منصب دستوري ولم يتقلد منصب دستوري في هذا النظام وليس عضواً في المكتب التنفيذي للمؤتمر الوطني والذي نعرف عنه انه رجل اعمال ورئيس نادي المريخ

ننتظر قادم الأيام ربما تخبئ لنا شيئاً ..

وبرضو دعواتنا مع المريخ حتى يتخطى التاكسي الرواندي ..

أبقى طيب ..

الصهاينة مريخاب
و الكيزان مريخاب

لكن انصار السنة هلالاب لانو انتقدوا الوالى فى ثمن وارغو


ده كلام .....لخويا ساكت........

يا شهاب لخوية دي تقدر تقول تمرين ساي وليست تجربة ولو أنها وضعت الهلال في غير شكله ولكن دي دروس من المفترض أن نستفيد منها ولا نقع فيها مره أخرى ..
أما كلام أنصار السنة نخليهو لأنصار السنة ووارغو ..

أبقى طيب ..