Post: #1
Title: مرات ..مراتك ... يا فاضلابي ( استشعار )
Author: ibrahim fadlalla
Date: 02-11-2009, 11:34 AM
" يا ربي الكلام ده صاح .. ول ما صاح ؟؟
المهم ...عليك توكلت يا مالك روحي ..."
( 1 )
المرة الجاية
لما تعاين
خلي عيونك تعاين برة
وسيب الروح.. في حالها
عشان الروح يا صاحب
ما بتتحمل..هسيس النظرة
وخرش الفكرة ..
عشان الروح ...
..ما بية الهجعة
في ضل الحلمة
ودوام .. رحالة
( 2 )
ومرة في وحشة
شايفك واقفة
براك .. مرتعشة
في نص روحي..
جنب النغمة ..النايحة
على أوتار الدهشة ..
مندهشة ..
حضنتك .. يا .. الله
حضنتك .. بي دثار اللهفة
عمر .. الرمشة
لقيتك .. عطرتي الكون ..
في كل أركانو
وريحتك .. لنهاية .. الكون
تخلي الدنيا ..كل الدنيا منتعشة..
( 3 )
المرة الجاية ...
لمن تاني ..
يجيك المعني ..
جاري حروفو..
و تزرع فيهو ..
رويحتك .. غنوة..
وسع .. بين حرفك و حرفك
مسافة .. فرقد..
عشان ..ألقاني .. جواها ..معاني
تبوح.. تتولد..
لامن روحك ..
تقالد الروح..
ويبق ضيٍِِّك..
في عيون الحلم
شعلة عسل ضواية
في حوش القلب ..
تتلالا .. تلوح
كأنو الحب..صبح .. ملموح
تشوفو العين ..
زي عطر .. يتضوع ..يفوح
قبال ما تجول في خاطري ..
وبعد ..ما تروح ..
( 4 )
المرة الجاية ..
اصارحك ..قول ..
ألملم .. أطراف الكلام
والعقل ..مبهول ..
وأقول .. حبيتك ..بعمق الشهقة
وطول الموجة ..السايلة
فوق جبينك خصلة ..
ولون الضحكة ..
لامن تجي ..من جواك .. منبثقة
اشوفك .. براي .. اتشهد ..
تروح أنفاسي .. وأبقى
كاضم .. تب ..خلاص استرقي ..
ألاقي .. روحي ..
وروحك .. للفوات ...مستبقة
أحاحي فراقك .. من خوفي ..
متشهي أشوفك ..
و شوفتك .. نذير فرقة ..
( 5 )
ومرات ..أحتار
.. في رقة وريقة وردة
تشق .. كيفن ..صميم الصخرة
وفي لمحة..من عينيك ..مستطرة
بي كلام المحنة والشوق ..
وخوف الفراق ..واللقيا
كيفن .. تحكيهو في نظرة ..
( 6 )
لاكين ..
( 7 )
Quote: دايماً ..لمن تحصل حاجة
عجيبة .. وما بتتصدق..
لمن أفتش شاهد ..
ما بلقاه ..
أسكت ساي
والعن خاش الوحدة
وأطنطن
دايماً لمن أكون محتاج
لروح جمب روحي ما بلقاها
دايماً لمن أخطط حاجة ..
بلقى الحاجة
مخططة حاجة براها ...
***/ فاضلابي /***
|
|
Post: #2
Title: Re: مرات ..مراتك ... يا فاضلابي ( استشعار )
Author: ibrahim fadlalla
Date: 02-11-2009, 03:33 PM
Parent: #1
مش كده بالله !!!
|
Post: #3
Title: Re: مرات ..مراتك ... يا فاضلابي ( استشعار )
Author: fadlabi
Date: 02-11-2009, 05:27 PM
Parent: #2
إبراهيم
مشكور على الإهتمام و الكلام
كدة و نص و خمسة كمان
|
Post: #4
Title: Re: مرات ..مراتك ... يا فاضلابي ( استشعار )
Author: ibrahim fadlalla
Date: 02-12-2009, 09:56 PM
Parent: #3
<font size=4>
بس من زوقك ...تشكر كتير على المجاملة البتمييل الراس ..
|
|