جيب لاندكروزر 2009 لكل عضو وعضوة من سودانيز

وصلني فاكس على مكتبي
يبدو أنه مرسل عن طريق الخطأ والله اعلم 00
هذا الفاكس من منظمة خيرية
ولا أدري أي نشاط تعمل فيه هذه المنظمة
كما أنني لا اعرف مصادر تمويلها
المنظمة تسمى { منظمة نور السلام الخيرية }
مقرها الخرطوم 00 عمارة الزيات 00 الطابق الثالث
المسئول عن العلاقات الخارجية يسمى { عادل مبارك آدم }
لديهم ارقام تلفونات وموبايلات بالطبع
هذه المنظمة قامت بتوجيه خطاب لمؤسسة تعمل في مجال بيع السيارات
تطلب منهم جيبات لاندكروزر وارسالها بأسرع وقت ممكن لميناء بورتسودان
عارفين كم عددها ؟؟
غمضوا عيونكم
200 جيب لاندكروزر بالتمام والكمال
وبالطبع لديهم مندوب هنا للتنسيق معه
السؤال 00 في أي نشاط تعمل هذه المنظمة ؟؟
وهل تحتاج لكل هذه السيارات ؟؟؟
وهل أن هناك رجال أعمال يعملون تحت غطاء هذه المنظمات ؟؟
وهل يتم استحصال جمارك على هذه السيارات ؟؟
أم أنها تدخل على حساب هذا الشعب المغلوب على أمره ؟؟
أتمنى ان أجد التوضيح
فأنا مصاب بدوخة والله منذ يوم امس
وأرى الكثير من المنظمات الخيرية دون أن أرى خيرها

في قريتنا والحق يقال وجدت اربع مساجد
وآبار مياه جوفية
وحينما سألتهم
قالوا لي نفذتها منظمة قطر الخيرية
يعني مثل هذه المنظمة تجد بصماتها في الكثير من القرى
ولكن هناك منظمات خيرية كثيرة
لا أدري كيفية الرقابة عليها
وهل هناك متابعة لأنشطتها؟؟

ذكر لي أحد الأشخاص ممن زوجتهم الحكومة
أن قريبه متعهد باحضار شنط الزفاف لمنظمة خيرية
لاتكلفه الشنطة أكثر من 500 ريال سعودي
ويقوم بتوريدها باكثر من 2500 ريال
وبالطبع ياتي بكمية كبيرة
دون أن يتم اخذ الجمارك عليها

Quote: جيب لاندكروزر 2009 لكل عضو وعضوة من سودانيز

أبو حراز أخوي ...
والله واحشانا كتاباتك بالجد ...
ياخي من زمن التيس وموية التحلية تاني ما شفناك ..!

بعدين ملاحظتي عليكم يا ناس السعودية في مصطلح الجيب ده ..
يا أخوانا ما تراجعوا الحكاية دي ...!
بتذكرني حكاية جيب لاندكروزر دي بنكتة عن حموري ..
قالوا كان مع جماعة وراكن عربيتو تحت شجرة النيم برة البيت ..
ولماطلع ماشي بيتو ...
رجع زعلان ويكورك ...
قالوا ليهو مالك يا حموري ..
قال والله لقيت ليت الطير ملى لي العربية جنس ( خرا جداد ...!)

فهو حافظه بهذا المصطلح ...
دحين إنت آب حراز ..
جيب لاندكروزر ...!؟

التيس خبرو شنو ؟؟؟!

والله ياعثمان دغيس حموري بالغ
والشيء الطالع من الطير دا { شاورما }؟؟
قال خرا جداد قال !!!

ذكرتني بوست التيس
والله ماعارف خبرو شنو
لكن انا كماذكرت لك والله من يومها بقيت اشرب موية صحة
وسفرتي الأخيرة تغيرت مواقيت الوضوء والتيمم تماما
وعرفت كم أننا أخذنا الكثير من المقالب من موية التحلية
التيس قالوا ضبحوووووووه
لأنه اصبح منتهي الصلاحية ولايقوم بواجبه
واجبه شنو
ولا التكتح ماعندو
حتى البعير الذي سقوه ببسي
راح في خبر كان
أنا الآن اشرب عصائر أطفال بس
لدرجة انهم استغربوا في السودان لماذا اركز على عصائر الأطفال
حتى أن احد أبنائي قال يابا والله ماباقي ليك الا تحضر معانا توم آآآند جيري !!
يابوي لازم الواحد يلعب على المضمون
لأنو في هذا الزمن لو توقفت البخاخات والفلاتر والأشياء اليابانية المهمة الأخرى
فالرماد كال حماد
الرئة عرفنا بغيروها
والكلاوي بغيروها
والمعدة
والكبد
ولكن هناك اشياء لاتقبل التغيير ولاتقبل القسمة على أثنين
ولوحدث وأن تعطلت وانقطع عنك الموية والنووووووووووووور
حينها ليس أمامك الا أن تصلي الفجر مع الجماعة حتى تتحسن أحوال السودان

جيب .. دي ماركة ..
ولا جيب القلتها دي بمعناها ..
ومالو ناس سودانيز يستاهلوا أكتر من جيب ..
كشكش جيبك بس ..

Quote: عمارة الزيات

سلامات يا ابوحراز ...

العمارة دي جيرانا عديييل كده .. بيفصل بيننا شارع .. وطبعا جوه الله لا وراك ليها .. جخانين وجحور ومكاتب مضلمة وسلوك مشربكة وعيييك ..


عموما لا تستبعد الامر .. وقد يكون صحيحا مائة بالمائة لانني تابعت تنفيذ صفقة مشابهة من قبل .. وهناك ايضا صفقة الكاردينال مع حكومة الجنوب التي بلغت ملايين الدولارات وتحدثت عنها الصحف في حينها ..

معتصم محمد صالح

Quote: العمارة دي جيرانا عديييل كده .. بيفصل بيننا شارع .. وطبعا جوه الله لا وراك ليها .. جخانين وجحور ومكاتب

اذن العمارة موجودة
وكذلك النشاط
ومايهمنا معرفة العمل الخيري الذي تقوم به
شكراً للمداخلة القيمة

mutasim Hameed
تعرف أنا المحيرني الناس دي بتجيب القروش الكتيرة دي من وين ؟؟؟
انا والله من أمس مانمت
كنت بحاول احسب في المبلغ
وماقدرت عليهو
جاني صداع في النهاية
مرات تغترب عشرين سنة
ومايكون عندك حتى بيت
اتمنى المنظمة دي تكون بتعمل في مجال السكن العوني والشعبي
عشان على الأقل نعتذر ليها
طبعاً بعد ماتبني لي بيتنا
ونستقر زي خلق الله
ياريت أحد المسئولين بالمنظمة يتداخل معنا أو يتصل على تلفوني
00966507063205

الاخ ابوحراز

1- الناس اسرار ... والشركات اسرار ... والمنظمات اسرار ..........

2- حسب تقديري كان يجب إعادة الفاكس الى مصدره أو الاتصال بهم بدلاً عن نشر الموضوع على النت.

3- في احدي المرات وانا في دولة خارج السودان وصلني فاكس عن طريق الخطا صادر من جهة سيادية

موجه الى جهة سيادية في دولة اخري إعدت ارساله الى الجهة المرسلة واكتفيت بذلك.

4- ياجماعة الخير ليس كل مايصل الى علمنا نبادر باعلانه على الملا لاننا لاندري الحقيقة كاملة حول

الامر وربما نفسد بهذا النشر أمر في غاية الاهمية.

الأخ عمر عثمان

Quote: الاخ ابوحراز 1- الناس اسرار ... والشركات اسرار ... والمنظمات اسرار .......... 2- حسب تقديري كان يجب إعادة الفاكس الى مصدره أو الاتصال بهم بدلاً عن نشر الموضوع على النت. 3- في احدي المرات وانا في دولة خارج السودان وصلني فاكس عن طريق الخطا صادر من جهة سيادية موجه الى جهة سيادية في دولة اخري إعدت ارساله الى الجهة المرسلة واكتفيت بذلك. 4- ياجماعة الخير ليس كل مايصل الى علمنا نبادر باعلانه على الملا لاننا لاندري الحقيقة كاملة حول الامر وربما نفسد بهذا النشر أمر في غاية الاهمية.

كلامك جميل جداً وعين الصواب
ولكن اليس من الممكن أن يكون النشر ايضاً في صالح المنظمة ليعرف الناس أنشطتها وماتقدمه للسودان
ولماذا لايعرف القاريء العادي خلفيات هذه المنظمات ومصادر تمويلها ؟؟
واعرف بعض الجمعيات الخيرية هنا على مستوى المملكة ليس لديها سيارات بهذا الحجم
ولماذا لانملك القاريء الحقيقة ؟؟
ربما تعمل هذه المنظمة في أعمال خيرية كبيرة وربما فتحت الكثير من البيوت وساعدت الكثير من الأسر المحتاجة 00 اذن من حق الجميع أن يعرفوا
اليس أن هناك بعض المنظمات التي كان مشكوكاً في امرها وتم ايقافها أو تعطيلها
صحيح أننا لاندري الحقيقة كاملة ونريد ان نعرفها
لك تحياتي
وثق تماماً لو وصلتني اي معلومات عن هذه المنظمة سأقوم بانزالها هنا
اي المعلومات التي تعبر عن حقيقة المنظمة ودورها في خدمة المجتمع السوداني

من المعروف لدى عامة الشعب السوداني
أن حكومة الإنقاذ ابتدعت عدة طرق لتمويل المنظمات أو الأفراد حتى
ومن هذه الطرق الإعفاء الجمركي ولقد سمعت بالإعفاءات الجمركية التي تصل قيمتها الملايين زمن المليون كان يهز ويرز ولا يملكه أي واحد من طرف ساكت.
إعفاءات لملابس وسيارات وأجهزة كهربائية وكلو .... تمنح لمنظمات ، هيئات، أفراد، مؤسسات وهو تمويل باطن يعفيهم من مشقة إدراج هذه المبالغ في ميزانيات يمكن مراجعتها وكده...

الحكاية جايطة
إنت عارف عند الإطلاع على مثل هذا الخبر أنا لا أفكر في الخبر الماثل أمامي لكن بكل صراحة أفكر في الأخبار التي لم يكتب لها أن ترى النور ...

ابو حراز


كيفك

ماشاء الله دقر يا عين

الاداهم بالكوربق يدينا بالشوال

امين يا رب


ام الاء

Quote: جيب لاندكروزر 2009 لكل عضو وعضوة من سودانيز

والله أنا قايل بكرى أبوبكر بقى زي أوبرا !!!

أخ ابوحراز
أغلب الظن أن تكون المنظه تتبع لأحد المتنفذين في الحكومه والمسأله كلها فساد في فساد
وعلى ماأعتقد العربات دي سيتم إعفائها من الجمارك وبها سينشأون أسطول سيارات تعمل كـ(ليموزين) .

هذا والله أعلم
وانا مع نشر مثل هذه المواضيع لأن عدد السيارات كما ذكرت ضخم جداً ولايجب لمنظمه صغيره كهذه لم نسمع بأي منجزات لها .
وأتمنى أن يسقط هذا الخيط في أعينهم ليوضحوا لنا هذا الأمر .

مؤونة عام من الود

الأخ محمد فرح

Quote: أغلب الظن أن تكون المنظه تتبع لأحد المتنفذين في الحكومه والمسأله كلها فساد في فساد

والله العظيم مشكلة الفساد مشكلة كبيرة جداً
الاحظ هنا في السعودية لايمكن للإنسان ان يكون غنياً بين يوم وليلة
الا أولئك الذين يسمونهم هوامير الأسهم والوهميين منهم
لكن اغلب رجال الأعمال كانت ثروتهم على مراحل وبعد جهد وعرق شديد
في السودان يقفز الواحد فجأة وتتغير أحواله سريعاً
والمشكلة ثراء فاحش وشيء يندى له الجبين
مازلت أشدد على الرقابة
وأن تكون من أشخاص وطنيين أكفاء يعملون على مصلحة البلد
الفساد ضارب في الأطناب
يكاد يكون في معظم المؤسسات الحكومية

Quote: وانا مع نشر مثل هذه المواضيع لأن عدد السيارات كما ذكرت ضخم جداً ولايجب لمنظمه صغيره كهذه لم نسمع بأي منجزات لها . وأتمنى أن يسقط هذا الخيط في أعينهم ليوضحوا لنا هذا الأمر .

ياريت لو يتم نشر كل مايتعلق بهذه المنظمات
وأن يتم متابعتها
والثناء عليها إن قدمت خيراً للسودان والسودانيين
ومحاسبة كل منظمة وهمية تعمل من أجل الثراء الحرام

صلاح أبودية
ياريت يحتفل بكري بعيد ميلادو ويفاجأ الجميع كما فاجأت اوبرا زوارها ومعجبيها وجمهورها
أنا لا اتطلع ابدا الى جيب
يكفيني كورلا 2006
كتيرة علينا

حينما حضرت السعودية لأول مرة كنت أعتقد أن القروش { خم }
وركبت في بص النقل الجماعي
قلت للسوداني الراكب بجواري
والله ان شاء الله انا بس حااشتري لي بص زي دا
زولك أظنوا قديم في السعودية
قام خت سفة
وقال لي عن إذنك أنا ماشي الحمام
وتاني ماجاء قعد جمبي
قال نقل جماعي قال
الآن نتمنى أن نركب فيه ونستمتع فقط بالرحلة

Teeta
براحة علينا
قال بالشوال قال 00 عايزة تخميها خم
دائما أمي تقول مرمي الله مابترفع
والله انا مغترب عشرين سنة وبيت ماعندنا
غيرنا كل الخطط
لكن مافي فائدة
هسي جاتني فكرة اعمل منظمة خيرية اسميها { ولا الضالين }
ان شاء الله حانمسكك فرع ولاية الجزيرة
شدي حيلك وأكربي بطنك
واقعي محل الأكل الصااااااااااااح
سنة واحدة تلقي نفسك في نص ناس المنشية
عمارات وسيارات
الله يحفظ ليك آلاء

Yousif A Abusinina
كيف يامان
اسمك موجود بكثرة في قرية اسمها الوراك او الوراق
بها عبد الرحيم ابوسنينة رجل قدم ويقدم الكثير من الخدمات
اتعشيت معاه مرة قراصة بي لبن
على طريقة واحد أخونا في الحصاحيصا عندو بقر
والبقر حارسو كلب
الكلب ابن اللذين ماقاعد يتعشى الا رغيف بي لبن
يوم مشينا في الزريبة وشفت عمك شايل الرغيف واللبن
انا قلت الراجل عاوز يعشينا
قلت ليهو ليه ياخي تاعب نفسك
قام قال لي والله دا عشاء الكلب
كلبنا مابتعشى الا رغيف بي لبن
قلت ليهو اصلو دا كلب وللا ماااااااااااااااادح ؟؟؟؟

مواصفات الجيب { حوض بكب عادي 00 تاتشر } وللأهمية سرعة انجاز العمل

يا ابو حراز

كيف يا ود العم

A تعنى عبد الرحيم وكمل الاسم واخبار البص شنو ان شاء الله وصل ابو حراز واخبار اهلنا العركين الاجداد والخيلان وانت لازم تقول كل شى ما عارفك من ابو حراز وكفاية (فرمل) بعدين الوراق وابوسنينه قرية واحدة

المهم انت خليك فى الموضوع يمكن ربنا يعطيك لاندكروز ما الزمن كل زول بعمل مشكلة برضوة يمكن يرضوك بجيب

بس ما تنسانى معاك ههههههههههههههههه

وشكرى وتقديرى ليك وتحياتى لك وللاهل

ود ابوسنينه

Yousif A Abusinina
كيف يامان ناس ابوسنينة والوراق
أنا من قرية ترقد على الأصالة
وترضع كل يوم من السماء 00 ترضع من حليب القمر
أهلها يمشون في الأسواق وياكلون الطعام ويقراوون سودانيز أون لاين
وكما قلت لك
حتى جدودنا الذين لاهم لهم غير السبحة والابريق
اصبحوا يستمعون لندى القلعة
ويشاهدون نسرين سوركتي
أجمل اللحظات ياسيدي تلك التي أمضيها بقرية ودربيعة الحالمة حد الدهشة
هناك تضحك من أعماقك
الناس بسطاء وساخرون جداً
نكاتهم تدخل في العضم
وياويلك لو سكنت معهم وغادرتهم
فإن مات لك جد أو قريب فانتظر الكارثة
ياتونك عشرات الحافلات
حتى قال لهم أحد الممرضين ذات مرة
هوووووووووي يانس ودربيعة من الليلة لاتباكونا ولانباكيكم
في هذه القرية الجميلة تنسى كل أحزانك
وهمومك
ومصائبكم ومصائب ناس الحكومة

ولكن ثق لو أن هذه الجمعية ساومتني بجيب واحد من المائتين
ثق تماماإن أول ما افعله سأقوم بحذف البوست
واغادر السعودية فورا
واشتغل معهم مؤذن اذا ارادوا ذلك

تخريمة :
البص كلما أنظر له اتحسر على فشلي بالغربة
وزوجتي كرهت اليوم الذي أوقعها بزوج عديم الحظ
وكل مرة اقنعها بالعبارات الفضفاضة والمطاطة
واقول لها الرجل شهامة وكلمة
فتقول لي خلي الكلمة بتاعتك دي تبني لينا البيت
قال الرجل كلمة قال !!! والحديث الأخير على لسانها

الأخ جعفر محي الدين
كلامك صحيح جداً
وربما كنت تتابع موضوع القروض الضخمة التي تم منحها للبعض
وكذلك عدة صفقات في هذا المجال
لاتوجد رقابة محكمة على المال العام
وحتى المجلس الوطني وجد الكثير منالتجاوزات
ولكن لايتم محاسبة المفسدون في الأرض
يجب أن تكون هناك هيئة تحقيق مستقلة لإرجاع أموال هؤلاء الغلابة
اعفاءات للبعض
والبعض الآخر يتم مرمطته حتى يترك أحياناً عفشه واغراضه الشخصية
ذهبت الى الجمارك لمعرفة جمارك سيارة اشتريتها باربعة عشر الف ريال
اي مايعادل 7 مليون
وجدت الجمارك 10 مليون واربعمائة الف
طبعا هونداي آكسنت 2006
اصبت باحباط شديد
بعتها برماد وشها لواحد مسئول
وحينما أخبرني بجماركها على طريقته الخاصة أصبت باكتئاب واحباط في آآآن
قانون الجمارك شبه معاق ولايتعامل بالمواطنةوالأنظمة التي تحفظ حق الدولة والشعب
بل بالمحسوبية والمعرفة

Quote: فأنا مصاب بدوخة والله منذ يوم امس وأرى الكثير من المنظمات الخيرية دون أن أرى خيرها

الاخ أبو حراز سـلامة العودة.

أذا كنت راجى خير هذة المنظمة الخيرية, أنتظر حتى يأتيك اليقين.

يا سـيدى الحاصل فى هذا البلد أحتيال ونصب وشركات وهميية و منظمات خلفها أصحاب الدقون

الكذابين الدجالين,

العزيز ابوحراز

Quote: 200 جيب لاندكروزر بالتمام والكمال

200 بس


تحت تحت :ـــــــــــــــــــــ
واحد صاحبي جو قرايبو يشترو 500 شاحنه كبيره ودفعو مقدم
تتخيل في الوكاله مالقو العربات البتكفيهم
اشتروا الموجود ورجعوا والباقي رسلو ليهم




اشاور صحبي واجي اتم ليك الباقي

أخي محمد الطيب حسن

Quote: واحد صاحبي جو قرايبو يشترو 500 شاحنه كبيره ودفعو مقدم تتخيل في الوكاله مالقو العربات البتكفيهم اشتروا الموجود ورجعوا والباقي رسلو ليهم

ياخي عليك الله روق المنقة شوية
انت الظاهر قاصد خمسة شاحنات كبيرة !!!
معقول 500 شاحنة


الآن أجبتني على سؤال حيرني كثيراً
فقد ذهب سعودي لإحضار سائقي شاحنات من السودان
قال رفضوا أن ياتوا معه براتب 2000 ريال !!!
سبحان الله

غايتو أجمل شيء في الموضوع إنهم حايشغلوا ليهم 500 سائق سوداني !!!

أخي آدم

Quote: أذا كنت راجى خير هذة المنظمة الخيرية, أنتظر حتى يأتيك اليقين

والله هذه تكون مشكلة عويصة جداً إن لم يكن هناك وجود لهذه المنظمة
وحتى لو كانت موجودة لماذا لايتم معرفة أنشطتها وخدماتها
لانريد أن تذكر لنا أسماء الأشخاص الذين قامت بمساعدتهم
بل خدماتها التي قدمتهاللشعب السوداني
وفي اي مجال تعمل
وهل خاصة بولاية معينة ؟؟

جمعية البر الخيرية هنا بالمدينة التي اعمل بها
وهي فرع من هذه الجمعية الممتدة على امتداد المملكة
والله لاتملك سوى ثلاثة سيارات عادية
وتقوم بخدمات كثيرة جدا لمواطنيها
تقدمت لهم بحكم علاقتي بمديرها تقدمت لهم بخمسة حالات تخص أخوة سودانيين
أحدهم مصاب بحروق
وآخر بترت رجله
وعملية في العيون
وحالتين خاصتين
جميعهم قدموا لهم مساعدة بعد دراسة حالتهم واحضار التقارير المطلوبة
واستلم الأخوة شيكاتهم من الجمعية

الاخ ابو حراز

عوافي

العود أحمد ... ليك نكهة خاصة

ولا قهوة أهلنا المكادة

* ذكر لي أحد الأشخاص ممن زوجتهم الحكومة
أن قريبه متعهد باحضار شنط الزفاف لمنظمة خيرية
لاتكلفه الشنطة أكثر من 500 ريال سعودي
ويقوم بتوريدها باكثر من 2500 ريال
وبالطبع ياتي بكمية كبيرة
دون أن يتم اخذ الجمارك عليها *


يعني بالواضح ظاهرها تزويج ... وباطنها تتيس

مسكين شعب ... عقله فى أذنيه

دورنقاس
كيف أخبارك أيها المحارب القديم
ماتكون لحقت أخوك وانفزرت بعد الزواج
اراك سابقاً محاربا صلداً

الجنوبي الظريف كان يغازل في العروس الطالعة لتوها من الزواج الجماعي
قام عريسها نفخ ريشو وزعل
وقال للجنوبي ليه تغازل مرتي
الجنوبي قال ليهو دي ما مرتك 00 دي مش مرة الحكومة ؟؟

قبل ايام تقدمت واحدة من بنات العمارات بعرض للزواج
قالت عاوزة راجل يكون مسئول
وهي تتكفل بأي شيء
ولديها عمارة بها اربع شقق
وحيث أن البيت يشكل لي هاجساً كبيراً
فقد طرحت الموضوع على ست النفر
وقلت لها رايك شنو اتزوج انا الزولة دي وممكن تدينا شقة وفي النهاية نكتبها باسمك
باسمك دي لزوم تلطيف الجو وكدا
المهم الزولة لعابها سال
وقالت لي عايزة افكر لحد بكرة
وانا استخرت
واشوف ليك في النوم حصان ابيض كبير
يجي الحصان ويحني ظهروا وأنا اركب فيه
وتقوم ست النفر تلز الحصان
والحصان عييييييييييييييك من ودربيعة للعمارات في رمشة عين
مش معناها خلاص نتوكل على الله
بكرة غيرت رايها نهائيا
وقالت الساطووووووووووور قريب
باقي ليك حالتنا حا تتصلح ؟؟؟
قال حصان ابيض قال !!!

الاخ ابو حراز

انا مع راي الاخ عمر عثمان

كان من الممكن الاتصال بالمنظمه اولا و سماع رايهم، احتمال ده فاكس غلط و بعت ليك بالقصد لنشره في سودانيز، و المقصود بيهو التشهير بالمنظمه، احتمال الفاكس ما مرسل من المنظمه الخيريه المعنيه و لكن صور ليعطي مظهر انه مرسل من المنظمه

الانسان قد يستبعد الاحتمالات دي، لكن ده زمن عجيب

اي نعم هناك الكثير من الممارسات الغلط في مجال العمل الخيري في السودان، لكن التحقق من اشياء كهذه تضر بمصالح المواطن قبل النشر مهم، و اذا لم تجد استجابه من المنظمه يحق ليك النشر في رايي، لان مواضيع كهذه لا تستحمل السكوت عليها، و لكن الكيفيه مهمه

الموضوع العام البيستاهل النقاش المثار في البوست في نظري و التطرقت ليهو بعض المداخلات، بغض النظر عن حقيقه الفاكس، هو موضوع المنظمات الطوعيه و الرقابه عليها في السودان، و خصوصا في مساله الاصول دي

تفاحة البورد الحبيب ابوحراز تحياتي لك بعدد جيباتك وشاحنات محمد الطيب
تعرف مصداقاً لحديثك عن النهب المصلح الذي تقوم به المنظمات الخيرية تحت غطاء العمل الخيري والله العظيم قبل فترة بسيطة جداً اطلعت على اوراق صادرة من جهة حكومية في دولة خليجية تطالب احد المنظمات الخيرية في السودان باستعادة اكثر من اثنين مليون دولار كانت مخصصة لانشاء صرح ولكن ذهبت ادراج الرياح ولا صرح ولا عمل خيري ولا تقديم مساعدة
السؤال الكبير منو اللهطا؟
والآن المنظمة لا وجود لها تماماً
تقول لي عمل خيري تاني في السودان
(تعميم سري لكل الجهات عدم تمويل اي عمل خيري في جمهورية السودان إلا عن طريق رئاسة الجمهورية فقط)
ويعني شنو عملوا زيتهم في بيتهم

ebrahim_ali
تحياتي من الأعماق 00 معليش على عدم الاتصال
الجيب فاااااااااااااضي
ماعندي رصيد
أظن الموبايل فيهو 3 ريال محتفظين بيها للظروف الطارئة
تقوم المدام تنهرك فجأة وتقول ليك ليه ماقاعد تتصل

يمكن كلمتك عن واحد أخونا تشاء الظروف أن يتصلوا على تلفوني وقالوا لي الراجل دا نسيبو مات
يعني ابو مرتو
وزولك من النوع الخواف لدرجة ماتتصورها
في السعودية لمن تتصل عليهو يقعد يتراجف اليوم كلو

موبايلي كان فيه 100 ريال بالتمام والكمال
قوم يا الملقوف ابوحراز أمشي كلم الزول
وصاحبك طوالي فكاها ليك بكية وجعييييييييييييييييير
وياريت لو وقفت الحكاية على هنا وبس
قال لي أديني موبايلك عشان أعزي مرتي
وطبعاً نحن بنتعاور عوارة شديدة في حالات الحزن
قوم أديهو الموبايل
وانفقع ليك بكاء مع المدام
والرصيد راح في خبر كان
أخيراً قلت ليهو يازول استغفر
قام أداني الموبايل وعاينت للرصيد لقيتو ليك 11 ريال
قمت طوالي حلفت عليه وقلت ليهو
علي بالطلاق كان تكمل بكيتك !!!!!

{ اللهطا }عبارة ظريفة جداً
هم يلهطون ولايحاسبون أنفسهم

..
.

Quote: 200 جيب لاندكروز بالتمام والكمال

معقولة ..
200 لاندكروز .. وسعر الواحد
65.000$ = 245.000 درهم او ريال = 140.000 جنية سودانى = 140 مليون جنية سودانى بحسابنا نحن القديم
ودا كلو ما تحسب الجماركـ والشحن ..
والتسهيلات والسمسرة
والخش جيب المدير وضابط الجمارك
والمخلص وشركة الشحن الخارجية والمحلية ..
وتكاليف المندوب ..
يعنى الجيب بحصل 200 مليون براحة ..
وكل من عرق الشعب .. اماالجمعية دى اكيد فيها نشاط ما طبيعى
ولا يمكن يكون دا عمل خير لانو المبلغ دا ممكن يزيح نسبة الفقر المحددة بحوالى 71% فى السودان
حسب تقرير CIA ممكن تقل الى 65% لو اتوزعت الجيبات دى على افراد او مشاريع تنموية
يستفيد منهاالمجتمع ..
انا شخصياً بلفت نظر الاستخبارات العسكرية تعرف الجيبات دى بتاعت منو وماشة ووين
ما يجينا بيها خليل ابراهيم
اها ولو طلعت للحكومة او جهة تحت مظلة الفساد فى الدولة
بنحول الموضوع للصحفى سيد احمد الخليفة بالوطن ..
اهو الراجل الوحيد البحت مواقع الفساد ونعرف الجمعية دى شنو ؟؟

العجب صاحب صاحبنا الاشترو 500 شاحنة لمن ما لقو استوك فى الوكالة
ياخى الشاحنة قريب 500 مليون
الناس دى عندها مكنات نقود ؟؟



__________

ما دام اسمهاالسلام الخيرية غايتو اما تابعة للحركة الشعبية
او مفوضية تنمية دارفور .. والقصد تعمير الصحراء .. بقاهرالصحراء

تبلدينا سلالالالالالالالالام
جيبك ماشاء الله عليه شاقي عباب الصحراء
وعلالتو تكتح

Quote: ولا يمكن يكون دا عمل خير لانو المبلغ دا ممكن يزيح نسبة الفقر المحددة بحوالى 71% فى السودان حسب تقرير CIA ممكن تقل الى 65% لو اتوزعت الجيبات دى على افراد او مشاريع تنموية يستفيد منهاالمجتمع

بالله المبلغ يمكن يسوي الشغل دا كلو
والله شيء عجيب جداً
يعني معناها ممكن ودربيعة بتاعتنا دي تتطور مابين يوم وليلة
مرة أخوي اصغر مني قال لي انت قايل قروش السودان دي كلها عند كم نفر
قلت ليهو كم يعني ؟؟ قال لي عند 400 نفر بس هم محركين السودان وموقفنه على كراع واحدة


ناس الأمن والمخابرات بعض الأشياء المهمة لايعطوها اعتبار
يعني مفروض كما قلت يكون هناك متابعة لأي شيء
عشان حماية بلدنا وأمنا القومي

كون الجمعية تتبع للحركة او دارفور من اسمها هذا ليس مقياس
وإن كان لاننفي ذلك 00 كل شيء جائز
لكن الجماعة اصبحوا يستخدمون عبارات رنانة ومؤثرة

يعني عادي محل كمبيوتر تلقاه اسمو { والضحى }
هذا غير ناس البنشر الاسلامي
وشفت لوحة برضو مكتوب فيها { المخبز الاسلامي }
اسبيرات تهتدون
سوبر ماركت تشتهون !!!
مؤسسة العاديات !!!

الأخت رحاب
شكراً لمداخلتك الجميلة والثرة جداً
وأطمئنك وأطمئن الأخوة القراء بان صاحب الفاكس حضر لي ليلة البارحة
وهو صاحب مؤسسة تسمى { مؤسسة الشفا للسيارات }
ويبدو لي أنه شريك
وقال لي يوجد فاكس طلبت ارساله عن طريقك مكتبك
سألته عن محتويات الفاكس
فذكر لي أنهم بصدد توريد سيارات جيب تاتشر
ويودون دراسة العرض
أخذ الفاكس
واحتفظت بصورة منه
بالنسبة له الموضوع أكثر من طبيعي
فكما ذكر لي يقومون بوريد مثل هذه الكميات
ولكن احياناً يستعيرون من بعض المعارض الأخرى
لأن الكمية كبيرة ويصعب توفرها دفعة واحدة

ابو حراز نعلك طيب
ياخي يقول ليك منظمة خيرية
تقول ينشروا نشاطها و يشكروها
ياخي ديل لا تعلم يسارهم ما قدمته يمينهم
و جنهم و الشكر عشان ما يحبط اعمالهم
امال ايه
ما تضيع اجر الزهاد ديل
اصلهم جايبين العربات دي يسبحوا بيها
بدل اللالوب و اللابتوب

اب حراز اخوي
النبي احجز لي واحدة
وبعدين نشوف موضوع المنظمة الخيرية دا ماشي على وين.....



اتفقنا

نصار 00 وانت طيب ان شاء الله

Quote: اصلهم جايبين العربات دي يسبحوا بيها

يعني تهليل تكبير ومن ثم تسبيح
لينا بي حالهم ياخي
والله حالف يدوني واحد من جيوبهم دي الا اعمل سبحة كبيرة واحرس الجامع
الشغالين ليها شنو تاني


على طريقة واحد أخونا جاء قدم لينا محاضرة وخلانا اليوم كلو نبكي
صاحبك قال من رأى شيخنا يوم الأثنين والأربعاء دخل الجنة بدون حساب !!!

قلنا ليهو عليك الله الأربعاء الجاية جيب لينا معاك شيخك دا
قال لي شنو ؟؟
قلنا ليهو عشان نشوفوا وبعداك نبيع الجامع بتاعنا

قال دخل الجنة قال !!!
تعرف بيتنا جوار الجامع انا قلت أزيد الحوش بتاعنا لو شفنا عمك الشيخ

Quote: غايتو أجمل شيء في الموضوع إنهم حايشغلوا ليهم 500 سائق سوداني !!!

...............
...............
الســلام عليكم
انت ما ســمعت بتقليعـة اســتقدام الســواقين من الهنـــد
( قالوا راتبهـم أقــل وكمان بدعكــوا كويس )
ولا ما شــفت ســواقين الباصات ( مصـريين , أتراك , ســوريين ......الخ )
والله الـ 500 ســوداني ديـل إلأ يغتـربوا في الســعودية أو الخليج
وبالعـدم يشــغلوا في الســعودية أيـام الحج

ابوحراز

Quote: يعني عادي محل كمبيوتر تلقاه اسمو { والضحى } هذا غير ناس البنشر الاسلامي وشفت لوحة برضو مكتوب فيها { المخبز الاسلامي } اسبيرات تهتدون سوبر ماركت تشتهون !!! مؤسسة العاديات !!!

غايتو جنس محن

أخي محمد الطيب

Quote: يعني عادي محل كمبيوتر تلقاه اسمو { والضحى } هذا غير ناس البنشر الاسلامي وشفت لوحة برضو مكتوب فيها { المخبز الاسلامي } اسبيرات تهتدون سوبر ماركت تشتهون !!! مؤسسة العاديات !!! غايتو جنس محن

انت شفت حاجة
واحد صاحبي الحكاية بايظة معاه
كل يوم شكلة مع المدام عشان طلبات البيت
اها يوم قالت ليهو ياسجم الرماد كان انضميت ليك لأي حزب كان أحوالنا اتصلحت
وزولك ماشاء الله من الجماعة المعارضين لكل شيء
ماجات حكومة الا وكان من معارضيها
المهم مشى ناس الحركة الشعبية ماقبلوه
شكوا فيه وقالوا ليه انت طابور خامس
مشى المؤتمر الوطني قالوا ليه ملفك وسخان
المهم في النهاية اصر على المؤتمر الوطني
وبدأ يحاول وكل يوم يطردوه
قوم في عز الزحمة والمشاكل جيب ليك توائم بنات
وعزم الجماعة وقام سمى البنات واحدة { تهليل } والتانية { تكبير }!!!
بالله صاحبك مش غلب الجماعة 10 / صفر
ومن يومها الكرش بتاعتو بدأت تزيد !!!

عيييييييييييك 00 قال ملف وسخان قال !!!!

عبدالله احيمر
يعني معناها حتى السواقين مافي اي طريقة لتشغيلهم
شاهدت كمية كبيرة من الهنود والبنغلاديش ليس في الخرطوم
حتى في الأقاليم
وهناك تقليعة جديدة
كمية كبيرة من { البنات } الحبشيات في محلات القهوة والشيشة
جمعن حولهن كمية كبيرة من العطالة
في الرميلة تشاء الظروف أن أبيت ليلتين مع أحد الأصدقاء
ذهبت معه الى السوق
كمية كبيرة جداً من الأثيوبيات
جمال منقطع النظير
وتقديم القهوة بطريقة فيها نوع من الغنج
سألت صاحبي لماذا لاتشرب القهوة في البيت
فقال لي هنا لها طعم خاص ونكهة خاصة
وفي كل المرات التي ذهبت فيها هناك أشخاص مثل الصيدليات
خدمة 24 ساعة
لايغادرون هذا المكان الا بعد ذهاب الفتيات الى منازلهن
وما اثار استغرابي عمك كبير 70 سنة
اسمعه يسأل الحبشية متألماوقال لها عليك الله أمس مشيتي وين
شحتفتي روحي يا بت الحلال
وانا طبعاً ضغطي مرتفع في السماء
عليك الله شوف الراجل المابخجل
وصاحبك عوير طبعاًوبراءتي زي براءة اطفال التوحد
أمشي طوالي البيت
وكلم ست النفر بالحبشيات
من يومها قالوا القهوة في البيت
عليك امان الله صاحبي نفسو قالوا لينا تاني ماتشيل كراعك مع كراعو

قال شحتفتي روحي قال !!!!

..
.
بمناسبة الفساد ..
يحكى لنا بالامس د. مادةEntrepreneursship
فى معرض حديث عام عن الفساد .. بانه صادف اثناء تواجده بالكرين
حضور موقف ان جاء احد الاخوة توضح ملامحه انه مسؤول فى حكومة جنوب السودان ..ومعه وفد صغير بكامل اناقتهم المعهودة
فى بيعة عربات تمت مسبقاً وجاؤوا للسداد .. ( عربة برادو + عربة بوكس دبل كاب )
الاولى من الحوار اتضح انها بـ 160 والثانية بـ 90 ..
وكان صائد الركب يحمل شنطة دبلوماسية وفى لحظات تم حسب مبلغ 250 الف جديد( 250 مليون قديم )
وقام اثنين من الوفد المرافق .. بقيادة السياريتن خارج الكرين لاقرب محطة وقود
الامر الغريب .. ان يأتى مسؤول من حكومة جنوب السودان ويت البيع والشراء بهذه الصورة
وهذا مثال بائن للفساد وتضيع المال العام ..
وبلاشك ان امثال هؤلاء كثر فى حكومة شمال السودان وبين المنظمات الوهمية ..
اموال لا تحصى ولا تعد وعربات فارهة من مال الشعب ..
اتمنى ان قرصة اوكامبو ان تعيد هؤلاء لصوابهم
وعلى اولئك من جنوب السودان ان يتعظوا من القبح فى الشمال
ولينتبهوا لبلادهم ومناطقهم بدلاً من العربات الفارهة والفنادق الفاخرة
هنا وخارج السودان ..

_____________

بهمنى جداً ملفات الفساد
ولازم تتفتح .. ويطلع عليها الكل ..
عشان كدا نرفع البوست دا لعلنا نجد مجيب او جهة
تتبنى متابعة اكل المال العام

الغزاااااالة 200 لانكروزر طقه واحده !!!


غايتو يا العركي ناسك ديل لو قاصدين بعمل الخير دخول الجنه

الكميه دي بتدخلهم الجنه تووووووش , لكن أظنهم زادوا العيار

شويه , لكن أنا خايف لو دخلوا الجنه من تال السافل ظييييط

يمرقوا منها من تال الصعيد , قول ليهم خففوا الابنص شويه .

مثل ماقال جعفر , هذا باب للفساد مشرع منذ عهد التمكين .

كنت مع صديق تاجر بالسوق العربي فإذا بشابين يبدو على محياهم

التقى عرضا علي صديقي ما يؤكد أنهما مناديب جمعيه خيريه, ثم

عرضا ما عندهم من بضاعه , دهشت عندما علمت أنها سجاير وكريم

ديانا.

-----------------------

ما قتا لي : ليلى علوي , ولا تاتشر ؟

انا غايتو مشحتفاني ليلى , عامله جضوما المنفخات ديل

تاتشر دي خليناها لي ناس خليل.

أخي معاوية

Quote: ما يؤكد أنهما مناديب جمعيه خيريه, ثم عرضا ما عندهم من بضاعه , دهشت عندما علمت أنها سجاير وكريم ديانا.

والله شر البلدية ما يضحك
ان كانت بعض الجمعيات الخيرية بهذا المستوى فالتذهب الى الجحيم
طيب ليه ناس مكافحة التهريب لمن يقبضوا سجائر وكريمات بيحرقوها
الأفضل أن تباع ويوزع ريعها للمحتاجين
خاصة بيوت العجزة والأيتام
ودار الأطفال مجهولي الأبوين

الجماعة اياهم غلبوا امام مسجد عطبرة 10 /صفر
الزول قالوا كان بيخلي الناس كلهم يبكوا في خطبة الجمعة
جات الانتخابات رشح نفسه ضمن دوائر الحزب الشيوعي
وفاز باغلبية الأصوات
ولله في خلقه شئون
قال ديانا قال !!!

Tabaldina
طريقة الشراء في بعض المؤسسات الحكومية بالسودان جد غريبة
ولايمكن بالطبع ان ياتي مسئول ويحمل معه مثل هذه المبالغ ليشتري مباشرة من المعرض
وهذا اخلال بانظمة المشتريات الحكومية
ما اعرفه في الجهة التي اعمل بها أن هناك لجنة تسمى لجنة فحص العروض
هي التي تقوم بكل شيء
ابتداءا من احضار التسعيرات المطلوبة
وكذلك الاطلاع على الشروط الفنية والكتالوجات والبطاقات الجمركية وغيرها
ومن ثم يبدأ التمحيص في اختيار المناسب من العروض
وحتى فتح المظاريف لايتم الا بواسطة موظف على درجة عالية من الكفاءة والوظيفة الادارية
يجب أن تنتبه الحركة الشعبية لمثل هذه الممارسات
فالحركة جاءت لتجتث الفساد
ويجب أن لاتعيد زراعته مرة أخرى
هناك قضية جيبات لاندكروزر مشهورة تم تأمينها لإحدى الولايات
ولقد كانت الأسعار فوق مايتصور الانسان
اذ رفضت شركة شيكان تغطيتها بالتأمين لارتفاع اسعارها
الفساد هو السرطان الذي تتكاثر خلاياه كل يوم في جسد الوطن
وكم نتمنى أن تكون هناك مراقبة دقيقة لمثل هؤلاء التماسيح الذي يقضمون بانيابهم الحادة اقتصاد وثروات البلاد ولأجيال
شكراً لمداخلتك الجميلة

Tabaldina
طريقة الشراء في بعض المؤسسات الحكومية بالسودان جد غريبة
ولايمكن بالطبع ان ياتي مسئول ويحمل معه مثل هذه المبالغ ليشتري مباشرة من المعرض
وهذا اخلال بانظمة المشتريات الحكومية
ما اعرفه في الجهة التي اعمل بها أن هناك لجنة تسمى لجنة فحص العروض
هي التي تقوم بكل شيء
ابتداءا من احضار التسعيرات المطلوبة
وكذلك الاطلاع على الشروط الفنية والكتالوجات والبطاقات الجمركية وغيرها
ومن ثم يبدأ التمحيص في اختيار المناسب من العروض
وحتى فتح المظاريف لايتم الا بواسطة موظف على درجة عالية من الكفاءة والوظيفة الادارية
يجب أن تنتبه الحركة الشعبية لمثل هذه الممارسات
فالحركة جاءت لتجتث الفساد
ويجب أن لاتعيد زراعته مرة أخرى
هناك قضية جيبات لاندكروزر مشهورة تم تأمينها لإحدى الولايات
ولقد كانت الأسعار فوق مايتصور الانسان
اذ رفضت شركة شيكان تغطيتها بالتأمين لارتفاع اسعارها
الفساد هو السرطان الذي تتكاثر خلاياه كل يوم في جسد الوطن
وكم نتمنى أن تكون هناك مراقبة دقيقة لمثل هؤلاء التماسيح الذي يقضمون بانيابهم الحادة اقتصاد وثروات البلاد ولأجيال
شكراً لمداخلتك الجميلة

حقيقة:
كان هناك منظمة اجنبية تعمل فى التنمية الريفية ى غرب السودان بها 51 موظف ( 2 بريطانيين و الباقى سودانيين)
تعمل فى حفر الابار مع اليونسيف
اعادة صيانة المدارس
فصول محو امية و تعليم كبار
الارشاد الزراعى
توزيع تقاوى محسنة و وقاية المجاصيل المخزنة
التثقيف الصحى
عدد سياراتها
3 لاندروفر للعمل فى الحقل
ا لاندكروزر للعمل فى الحقل
1 هايلوكس مكتب الخرطوم
1 سيارة صالون لمكتب الخرطوم مكتب الخرطوم
__________________
ملحوظة :
الموظفين 51
المنظمة بها 49 سودانى و هى منظمة اجنبية
المنظمة تركت السودان منذ فترة ....................