Post: #1
Title: طبعا زي ده ما ممكن يحصل الا في السودان
Author: د.محمد حسن
Date: 02-09-2009, 08:30 AM
دايما التلفزيون ده بجيب العجايب، وقدر ما حاولت اتجنب القشرليون افشل . المهم امس فتحت قناة الشروق ( الشروق مرت من هنا- بالمناسبة البرنامج ده بديني احساس انه رشوة مقدمة in advance يعني المؤتمر الوطني مر من هنا واداكم التلفزيون والفرن بعدين في الانتخابات ما تنسونا ، كلامي صاح يا محمد موسى؟)
نرجع لموضوعنا، لقيت في القناة الشخص الوسيم د. الزبير طه (لو ما غلطان في الاسم) وزير الزراعة ، اتكيفت وقلت خلاص سعادة الدكتور حيكلمنا عن اسباب فشل النفرة الخضراء وامكانية نجاح النهضة الزراعية وركزت مع لازول ، شعرت ليك انو الكلام ده انا مافاهم فيه حاجة ، الراجل بيتكلم لغة غريبة جدا جدا ، قمت ركزت زيادة ورفعت صوت التلفزيون وبديت اسمع في سعادة الدكتور وزير الزراعة ، برضك الراجل ده كلامه ما فيه اي نكهة فراولة او طعم قريب فروت
بغد شوية جابو اسم الضيف وطبيعة الشي الاستضافوه من اجلو ، هنا شعرت بشي من ارتفاع الضغط
الدكتور مستضاف باعتباره ( رئيس رابطة علماء النفس المسلمين)
طيب علاقة علم النفس بالزراعة شنو؟
وهنا بدات استرجع في ذاكرتي الخربة ، اكتشفت انو الانقاذ جزاها الله خير استنت سنة ما مسبوقة وطلعت بالاحصائية التالية
اخصائي نساء وولادة وزير حكم محلي
ضابط شرطة وزير صحة وبعدها وزير ثروة حيوانية
طبيب اسنان وزير خارجية
بروفسور في الزراعة والي
اخصائي في علم النفس وزير زراعة
محامي وزير تربية
وهكذا دلدليك
بالله االعنده معلومة ممكن يضيفها للقائمة دي ما يبخل بيها علينا
قلت رجب البحضروا بشوف العجب؟
|
Post: #2
Title: Re: طبعا زي ده ما ممكن يحصل الا في السودان
Author: Zoal Wahid
Date: 02-09-2009, 08:40 AM
Parent: #1
| Quote: شعرت ليك انو الكلام ده انا مافاهم فيه حاجة ، |
شخصيا نادرا ما امر على القنوات السودانية
بالصدفة سمعت جزء من كلام الوزير - اول كلامو - فيما اظن. شعرت بالقرف و الزهج
مجرد استهبال بالفاظ رنانة.
على طول غادرت القناة.
|
|