فرض الأرض .... (نص شعري)

أنا والغيمة ..
وشوف النسمة ..
ضل النيمة..
المطر القيمة..
وبعض سحاب الروح العاق.
من تاريخ الصمت مرقنا ..
شان واجبنا كان الفرض ..
وزي طول بالنا .. كان العرض
قلنا نفرتِك حزن الأرض ..
لما نباصِر ها التاواق..
كنا رفاقه .. ومانا فياقه
إلا الواسعة انسدت طاقه..
وايه الباقي ؟؟
دلو غنانا .. وحلم زقاق؟
وايه غير سكه ..
طريق وحريق ..
وهمّ في الجِتَّه ..
مواسم ضيق ..
ومطراً شاق.؟
حراً كافر وما بنطاق ..
ديمه يلاوي الجو الفيك..
وديمه يصابحك بالنقناق..
لما يجيلك ..
بهزم نيلك
وقُدرة حيلك
وما بتفكر في الأسباب
ببقي دليلك..
حافر خيلك ..
وسطوة سيلك …
وشرع الغاب..
....
...
جانا الريح لافح توبو..
لابس فرده من مركوبو..
وهو المِن يومو قافل الباب !!
ونَّس ..
حنَّس ..
كان يبرانا..
قال في الكتمة ببقي ضرانا ..
ونحن لُصاصاً ما بِغبانا ..
قلنا ومالو؟ ..
يلا معانا
إلا النسمه. المارضيانه..
شاله الشك مما جانا..
وجوفه يطنطِن .. فوت اختانا
.....
.....
جاي لا جاي ..
قِبلت غايتو .. إلا بتدعو ..
سُترة حالو تبقي نهايتو..
لما يفارق ها التاواق.
وكبّ طفّرنا ..
وزاد الفينا ..
إنو الفينا هو مكفينا..
ومهما يصعب ما بِكسِرنا
كنا عطاشه ومريوقين..
إلا هدفنا كان كافينا
قلنا نتمِّر شوف الأرض ..
لما نغسِّل حزن الطين ..
لما يدفِّق دمع العينه
لما نقوِّم كم راكوبه ..
حتماً تكبر وتبقي مدينه
لما الضُل الكان أُلعوبه ..
فيهُ نقيِّل .. حُب وسكينه
لما مروقاً فيك مصبوبه..
ترحم شِعَباً كم مسكينه
ندِّي النيل أشواق وخصوبه ..
وتبقي النجمه فوقو رتينه ..
غيمه وخيمة حن منصوبه..
سُتره وصُلحه .. وضروه متينه
قلنا نرد الروح السمحه ..
لي جوف أحمد .. وشوف حبوبه
كنا بنقرا ونكتب .. وتمحي..
إيد الليل القامت دوبه
كل ما نفتح نفاج فرحه..
تطلق ناره وعاتي هبوبه
تقلع حلماً قالد قمحه ..
وتجري تفتِّش باب التوبة!
حقي وحقك .. وضاع في لمحه..
صبحاً عِزتو ما سِمعوبه ؟
وين الطِيبه .. عمَار الخُوّه ؟
وين الناس التقسِم توبه ؟
كيف جُودِيه بتصبح قوه
لما تصالح ناس مغلوبة !؟
سيف الفُرقه الطاعِن جوّه ..
حال الأرض الكم مقلوبه
آه ياغيمه .. الكسحك هُـوَ ..
يوم مازاد الهم .. الهُوَّه ..
ويوم ماعَكَّم في اللالوبه ..
ما بالدغري .. فنكهه ساي ..
كانت نيتو.. بشاتِن راي ..
وفكَّة بيعتك يا مجلوبه
يوم ما مطرِك فارق بيتو..
ضرعِك عتّم يا محلوبه
جارِك ..
دارِك ..
وانتي وصيتو ..
نارِك ..
طارِك ..
وحُمّي النوبه
ساسِك..
فاسِك ..
حَدّو مناسِك ..
يلحق ذمماً كم معطوبه
يا ربيان من جوع أخوانو ..
كيف تبقالك ها التبروقه ؟!
يا متحلوِّن وميّه الوانو ..
تِلَح البال الكم مسبوبه
يا متلوِّن زيف شيطانو ..
وفاكر نفسو فارس الحوبه
،،،،،،،،
قُمنا .. مشينا ..
تالا الشمس السوت بق ..
كانت عتمه قُصاد الحق
بانت كتمة صيف وخريف ..
مطراً كاضِم .. وسيل اتمحَّق
فاطنه السمحه..
فاقده جناحاً نام .. ما حلَّق
غيم الروح البات مجروح..
في مِرق الوجع الشرَّ .. اتعلق
ساساق النجمه .. بيوت الحِله
شليل والشُلّه الباله .. مفلَّق
القمر الشوف .. الساتر الخوف
من حزن الأرض الشوفه .. مشلَّق
كرب الضُلمات الكان متضاري
فارق جحرو وجانا .. مطلَّق
شاشاي الطفله .. وقوق الحفله
في الحَلاّل .. إتعشي .. وحلَّق
تربال العافيه أبزرعاً .. بلّق
من نيل البلد الخيرو .. مغلّق
الزاد الراكز ويوم ما .. جلّق
دلوكة وجرتق جنب المُشرع
زاد تحميسه وجوفه .. اتخنّق
شبال النخل الفدع تمرو
الشفع تلفح كم شُكاناً جاها.. مزلّق
.............
دغري مرقنا ..
واتقاودنا..
وهاك يا أرضاً سمحه وجيهه
ما بوقفنا همّ ونجيهه
لما نفوته .. ولما نجيها
أُمنا كلنا .. باهيه نبيهه
ما صرّت لنا مره وشيها
وهي المِن يومه غيمنا وصيها
تقطع طاري الحال الفيها
لو في بالو كان طاريها
يا كنتور النور باريها
وتاتي مشيها..
لو كان ضلّت ..
إنت اهديها.
صنّت ..
حنّت ..
تاكت باب الوجع الفيها
كرست ..
حرست ..
حاكت طاب في ليل واطيها
فاتت ..
باتت ..
عند جيران مجبوره تجيها
نامت ..
قامت ..
حامت ..
زي درفونةً مافي وليها
وجَّت حنّينا ..
إلا الضل والغيمه حزينه
كانوا وراها ..
ونحن نعاين من قِدّامه
ترفس ترفس كل اقدامه
فِك يا طين .. ياماسك حيل كرعينا
وين الريح القال بسترنا ..
لما الكتمه .الحَرّه تجينا؟
كانت طيبه ..
مالا الأرض للقومه تعافر ؟
كانت هيبه ..
وأيه الجاب الدمع الطافر ؟
شيتاً يأسِّر ..
وحالاً يحنِّن قلب الكافر
كان بتأشِر تالا حشاها ..
وكان الريح..
والسيف ..
والخاصِر
: ...
- نحن زمان شِن قلنا ؟..
ما قلنا غباءكم بكتلنا ؟..

: أُس يا غيمه ..
وشيلي معانا ..
هاك يا ضل . وهاك يا مطره
خلو النسمه التبقي قبلنا..
وين مرواد العافيه . أملنا ؟
لسه مساهر جوه تُكلنا
وكيف الكيه .ونحن قفلنا ؟
كوكوناها ..
وسنّدناها..
ناس قِدامه .. وشُله وراها
نحن ضراها .. وشوفنا قفاها
وهاك يا مشيه ..
قالت:
- قبل الجيه . ما كُت حيّه !
سته عويناً ما مختشيه ..
ولعوا نارُن فوق القيفه ..
وكان منتشيه ،،
زادوا عويشُن ..
ساقوا كشيشُن ..
تالا أبوكُن ..
......... ؟
أيوه النيل ..
ناساً زايعه وكم مُرتشيه
عاموا . وحاموا
خمجوا . وقاموا
حول في حول والنيل هدامو..
صابر يرقِّع في هِندامو
كمّلوا صبرو.. وحفـُّوا اقدامو
ويومو القرر يشيل عوامو..
تحت الطين الغاضب ناموا.
- ما قصرتوا .. أبقوا قُبالي
تعال آ ضل .
وهوي يا غيمه تعالي
وإت يا نيمه..
شدِّي ضراعك فوق العالي
غور ياريح . مسيخ ولديح
وإت يا نسمه .
أعدلي نعالي..
تعال آ باكر. بُن وسكاكر
مافي عساكر. تبقي جواكر
ومافي مسلّط يكشف حالي
،،،،
واتلمينا..
إتحجينا..
وإتدفينا منها زين..
يكفي عذابِك . والبشتين
يكفي صباحِك . يا بعدين
وزي ما قلتي ..
مافي شُراداً بِستُر دين..
ومافي نفاقاً بصبح دِين..
مافي دموعاً تغشي الطين
ومافي ضلاماً بمنع باكر..
......
نامت .. ونمنا
وكان حارسنا ود العين ..
وقبلو المولي..
وهو أمين.

قالت:

- قبل الجيه . ما كُت حيّه !

سته عويناً ما مختشيه ..

ولعوا نارُن فوق القيفه ..

وكان منتشيه ،،

زادوا عويشُن ..

ساقوا كشيشُن ..

تالا أبوكُن ..

......... ؟

أيوه

النيل ..

مالا الأرض للقومه تعافر ؟
كانت هيبه ..
أيه الجاب الدمع الطافر ؟
شيتاً يأسِّر ..
وحالاً يحنِّن قلب الكافر
كان بتأشِر تالا حشاها ..
وكان الريح..
والسيف ..
والخاصِر

الرائع ابوحوه

تسلم علي كل الجمال والابداع

ومتابع بندهاش


مدثر تيف تيف

Quote: الرائع ابوحوه تسلم علي كل الجمال والابداع ومتابع بندهاش مدثر تيف تيف

مدثر محمد آدم..


سلام وود وامتنان.

الشعر مرايا الروح يا صاحب..

ففيه نري أنفسنا بوضوح تام..

لا خفوت ،،

لا سكوت ،،

لا بين بين ،،

ولا هم يحزنون.



أحي روحك الجميلة يا صديق.





مودتي..
وأشياء أخري

Quote: أنا والغيمة .. وشوف النسمة .. ضل النيمة.. المطر القيمة.. وبعض سحاب الروح العاق. من تاريخ الصمت مرقنا .. شان واجبنا كان الفرض .. وزي طول بالنا .. كان العرض قلنا نفرتِك حزن الأرض .. لما نباصِر ها التاواق.. كنا رفاقه .. ومانا فياقه إلا الواسعة انسدت طاقه.. وايه الباقي ؟؟ دلو غنانا .. وحلم زقاق؟ وايه غير سكه .. طريق وحريق .. وهمّ في الجِتَّه .. مواسم ضيق .. ومطراً شاق.؟ حراً كافر وما بنطاق .. ديمه يلاوي الجو الفيك.. دايماً يصابحك بالنقناق.. لما يجيلك .. بهزم نيلك وقُدرة حيلك وما بتفكر في الأسباب ببقي دليلك.. حافر خيلك .. وسطوة سيلك … وشرع الغاب..

القصيدة كلها بديعة
ولكن هذا الجزء

قتلننا ولم يحين قتلانا

لك خالص التقدير والاعجاب

ابوحوة

شكرا لحرفك الانيق




خالص الود

Quote: تعال آ باكر. بُن وسكاكر مافي عساكر. تبقي جواكر ومافي مسلّط يكشف حالي

الله على النفس الشعرى البديك جرعة امل
الله عليك
قريت النص كم مرة
وكل مرة بدينى احساس جديد
اولا مخزون تراثى واسع
استخدام الموروث دون اخلال بالمعنى
يعنى تطابق الوصف مع الموصوف
لغة بسيطة تدخل قلب القارئ
ودى اهم ميزة من ميزاتك كشاعر
النفس الطويل فى القصيدة لحد انها تبقى روائية
شكرا لامتاعنا بهذا الشعر الكثيف الدقيق الرقيق

سوى بعض الاخطاء فى الطباعة
لكن لم تخل كثيرا بالمعنى

حزف للتكرار

صنّت ..
حنّت ..
تاكت باب الوجع الفيها
كرست ..
حرست ..
حاكت طاب في ليل واطيها
فاتت ..
باتت ..
عند جيران مجبوره تجيها
نامت ..
قامت ..
حامت ..
زي درفونةً مافي وليها

Quote: الله على النفس الشعرى البديك جرعة امل الله عليك قريت النص كم مرة وكل مرة بدينى احساس جديد اولا مخزون تراثى واسع استخدام الموروث دون اخلال بالمعنى يعنى تطابق الوصف مع الموصوف لغة بسيطة تدخل قلب القارئ ودى اهم ميزة من ميزاتك كشاعر النفس الطويل فى القصيدة لحد انها تبقى روائية شكرا لامتاعنا بهذا الشعر الكثيف الدقيق الرقيق سوى بعض الاخطاء فى الطباعة لكن لم تخل كثيرا بالمعنى

سلمي الشيخ (طعامه).

إنتي عارفه ..
مرات مرات الروح تتوهط في أوجاع كتيره ..
ودا ما شيتا جديد عليها..
وشوفي براك المضامين المارقه من فعل (الكوانين) الحريق.
أنا غايتو (بكوس لي دفو)، كان (حرفاً) حار من صاج البلد ، وإن كان (تاتيقه) قصيده.
وهاك يا (لُواجه) و (سُواجه)..ساعات (نبوِّق) واطاة حروفنا.. وكمان ساعات (نسلِّك) لي جروفنا..
وساعات ساعات (نشلخ) من الغربه خوفنا.
أها ترا جنس نضميك الطاعم دا يا هو البخلي (عين الشمش) تتاوقنا كل ما (الحَمَار شقَّ) القِبَل.
وياهو البخلي (الجنوي) تخلي الحرد.. وفي بطن البحر هاك يا ( تِضِرِع)..ما بتخاف التماسيح ..خليه الورل والبَرَد.


كلامك يا سلمي زادني ضراعين وكم شبر لي فوق..
ممتن يا بت الناس التقسم توبه.

وإن كان للأخطاء في الطباعه..
أرفعي إيديك معاي :
الله يجازي (العجله).


مودتي ..
وأشياء أخري..

Quote: ابوحوة شكرا لحرفك الانيق خالص الود

يا ياسر أنا (ناوي) (بيك)..


الدهشه..


زي ما إنت (بِيّ) (ناوي)..




محبتي..
وأشياء أخري

Quote: القصيدة كلها بديعة ولكن هذا الجزء قتلننا ولم يحين قتلانا لك خالص التقدير والاعجاب

الموصلي يا فنان إنت..


أنت هنا ؟

مرحي لك يا حروف بطول قامه..

ومرحي لك يا أرض بطاعم فصول..



شكراً لك يا زول بكل التفاصيل.



مودتي ..
وأشياء أخري

عالم من الدهشة والطعم والله يا فاروق

يطيب معناك إن شاء الله

والشعر إذا تنفس

وجاتنا الريحة من تالاك

سكرنا وغنينا معاك

Quote: عالم من الدهشة والطعم والله يا فاروق يطيب معناك إن شاء الله والشعر إذا تنفس وجاتنا الريحة من تالاك سكرنا وغنينا معاك

وين يا مطر العافيه الضارب الحِله؟؟

أبوذر يا مطر وفصول عافيتنا..


إنت عارف ..
كتير الواحد يتشربك في حرف خيوطو وطن..
وغالباً ما يكون الوطن دا نديهة صالحين..أو فكة ريقة ضحكة طفلة..
تصدق كل ما نحاول نتفك من دوار التوهان بين عيون شبكتو..
تلقانا في عز (المعافره) ننسج نشيد جديد من نفس الخيوط البلد..
.
غايتو أنا عارفك متورط في نفس المصيده..العشق.
وبقوله ليك (الشربكني بنسجلك).
وعاد وين بتودي حروفك ؟؟
قبِل أبكبوته الأربعة.. وطن.



ياااخ انا مبسوط إنك هنا..
وصاحب حق أصيل في هذه الرحلة.

سلمت مطرنا..
وعافية شوفنا.


محبتي ..
وأشياء أخري..
أقلها عشقي

ابو حوه
شاعر لا يشق له غبار
وهذه ملحمة راسا عديل
سر وعين الله ترعاك
دفق شاعري متميز

شاكر لك هذا البراح يا أبو حوة
ياخ واصل
إتدفق وأملأ الأرض أناشيد

Quote: جارِك .. دارِك .. وانتي وصيتو .. نارِك .. طارِك .. وحُمّي النوبه ساسِك.. فاسِك .. حَدّو مناسِك ..

حمى النوبة هى التى كتبت القصيدة عنك
تسلم يا أبو حوة
نص جميل وثر

وينك يا زول يا رايع

مشتاقيـــــــــــــــــن

نلتقى ان شاء الله

Quote: وينك يا زول يا رايع مشتاقيـــــــــــــــــن نلتقى ان شاء الله

الرائع (همزه) ود سليمان..

أردت قول الكثير يازين القول..

ولكني،،


..
.
سئمتُ ،،

هشاشة ،،

الترميز.


ح نتقابل حقيقه بقوله .. مابحلم
وغصباً عن عيون الهم..
وعن كل الضباب الجاي ،
والمبهم.


محبتي ..
وأشياء أخري..

Quote: حمى النوبة هى التى كتبت القصيدة عنك تسلم يا أبو حوة نص جميل وثر

روزمين الصياد:


لك الوصل الأنيق يا صائدة الروز
ولنا حمي النوبة ..
وأشياء أخري ينوء بحملها النشيد.
ولكنها تجمل ما علي عاتق الوطن الجميل.



مودتي ..
وأشياء أخري

Quote: شاكر لك هذا البراح يا أبو حوة ياخ واصل إتدفق وأملأ الأرض أناشيد

أديتك سكة قلبي ..
مفتوح ممشاها موده..
.........

الحبوب خضر..

وصلني نشيدك الطاعم وطن.. وأمنيات
فكل البراحات والقِبَل وطن..



كل الشكر علي القول المحفز..




محبتي ..
وأشياء أخري

Quote: ابو حوه شاعر لا يشق له غبار وهذه ملحمة راسا عديل سر وعين الله ترعاك دفق شاعري متميز

الزول القدر حلم البلد حِلمو..
مطاميرنا و عصافيرنا المعاك سِلمو..


هاشم أخوي..

زماااان كنت مسمي روحي:
(ود بابَكُر) الما بخاف من اللوم ولا بعجبو الشكر..
وأول (درفنت) عرفت انو (الود بابكر) دا يجردني من إنسانيتي ..
ويخليني جسد منحوت من جليد الإسكيمو .
وتراني هسه فرحان بي (حديسك) تب (يامن) شرقان.


كتر خير الشوق الجابك تجري..
ربي يزيدك ..
زي ما زايد طولي ورافع قدري



مودتي ..
وأِشياء أخري

Quote: ............. دغري مرقنا .. واتقاودنا.. وهاك يا أرضاً سمحه وجيهه ما بوقفنا همّ ونجيهه لما نفوته .. ولما نجيها أُمنا كلنا .. باهيه نبيهه ما صرّت لنا مره وشيها وهي المِن يومه غيمنا وصيها تقطع طاري الحال الفيها لو في بالو كان طاريها يا كنتور النور باريها وتاتي مشيها.. لو كان ضلّت ..

يسلم قلمك ..
نص جميل شديد وحقيقة لو لحنت هتكون
عمل ابداعى كبير كلها منظومة بشكل سهل الفهم وعميق المعانى
تسلم يارب ..

Quote: يسلم قلمك .. نص جميل شديد وحقيقة لو لحنت هتكون عمل ابداعى كبير كلها منظومة بشكل سهل الفهم وعميق المعانى تسلم يارب ..

الماجده بت خوجلي..

جيتك هنا في (البكان) دا ألحان وخريف.. ومواسم دوزنه
والنميم دا زي بحر أبيض منشر وطويل..
لكن دا ما بمنع ..
العندو ماعون (اليغرف) ساكت لامن يروي ويروينا،
وإن كان إتعدم الماعون اليشرب (بالهين) ،
ماعون الله الوهيط وروّاي.

..
الجمال المعاك كامن..
هوالبخلي الحروف القدامك سمحه..

تسلمي علي البراح والأمنيات.


مودتي..
وأشياء أخري..
أقلها إمتناني

تحيه وسلا م يافاروق

نفس شعرى عميق وطويل .. وصاحبك شايف فيهو

حاجات تانى وتالت

دايرالا مفاكره

بى روقه

تسلم

يا صاحب

.

.

Quote: تحيه وسلا م يافاروق نفس شعرى عميق وطويل .. وصاحبك شايف فيهو حاجات تانى وتالت دايرالا مفاكره بى روقه تسلم يا صاحب . .

خطاب يا صاحب..

سلامك تاجنا..
نسمة صيفنا..
قهوة كيفنا .
وشوف نفاجنا.
.....
ما دام النضمي عن الأرض تلك الفرض،،
يبقي (قطع شك) بدورلو قعده في الواطه.
فما أحلي المفاكره (سيجتئذِ) أو (صفرجنئذِ)..
وكمان فوق دا كلو ،،
تكون إنت الصاحب ، الأنيس و الند..
..
.
أعلم تماماً أن النص يحتاجك جداً ..
كما هي ..
تلك التي تعافر تحت أقدامنا المتبرجلة الخطي..
ولن أسوق الأن أي مبررات ، أو خطوات إستباقيه
لكن ..
في رجاك عانيت قساوة الإنتظار..

محبتي ..
وأشياء أخري.


والحب ..

في حد ذاتو..

مبرر كافي.

.