سؤال جاد جداً لناس الكورة :مامعنى رشاشات وعلى من تطلق؟وماهو سبب التسمية؟وبالمناسبة أنا مريخابي

.
.

لا أحب كرة القدم ولا أشاهدها إلا مكرهاً ، وبكره أيام كأس العالم عشان كل الناس بتكون مشغولة بيها وأنا زي الاطرش في الزفة ، ورغم كده بشجع المريخ لكن الله يشهد مابعرف البلعب فيه منو ، غايتو زمان متذكر حامد بريمة وسامي عز الدين .

سؤالي هو : أسمع بمصطلح رشاشات ، وماعارف مقصود بيه شنو ؟ بشوف الكلمة دي في بوستات الكورة لكن ما متاكد مقصود بيهاالمريخ ولا الهلال ، وسبب التسمية شنو ، ومصدرها شنو ؟

حالياً بقت عندي شوية ثقافة كروية يعني مثلاً عرفت إنه إستاد الهلال إسمه الزريبة ، وعرفت كاكا ووهنري وميسي وبويان يعني في تطور ملحوظ .

أسئلة أطرحها للمختصين مع خالص التحية والتقدير .
.
.

Quote: لا أحب كرة القدم ولا أشاهدها إلا مكرهاً ، وبكره أيام كأس العالم عشان كل الناس بتكون مشغولة بيها وأنا زي الاطرش في الزفة ، ورغم كده بشجع المريخ لكن الله يشهد مابعرف البلعب فيه منو ، غايتو زمان متذكر حامد بريمة وسامي عز الدين .

ازهري صاحبي

بالله بظرافتك طلعت مريخابي

اعتقد التسمية لها بالعربات التي كانت ترش الاستاد بالمياه زمان

وعشان انا ما حضرت زمن ناس قرعم ممكن تلقي مخضرمين ادوك اجابة قاطعة

ابو الزهور تحياتي

Quote: ورغم كده بشجع المريخ

اذن انت رشاشه خفيف

.
.

تحياتي وتقديري ياعبد الله كع ، وأشكرك على المرور والإهتمام .

يعني هسع أفهم من كلامك ده ياعبد الله إنه كلمة رشاشات تطلق على المريخاب؟

لو الإجابة نعم ، ياريت تورينا السبب .

ولك الشكر أجزله والثناء أوفره .
.
.

Quote: وعرفت كاكا

ابوالزهور كاكا دى مفروض تكون عارفها منذ نعومة اظافرك
وش ضاحك ,, مابعرف انزله كان عارف ورينى ,,

.
.

الأخ الزميل عبد العزيز

كاكا بدون تشديد :)

كاكا التانية ديك مادايرة ليها عَرفة :)

بالمناسبة بقولوا كاكا وككخ :)


الوجوه والإبتسامات معطلة ولحدي هسع بكري ماصلحها .


تحياتي وتقديري
.
.

.
.

خليل صديقي العزيز وزميلي الحبيب

Quote: بالله بظرافتك طلعت مريخابي

أنا زاتي ماعارف أنا بقيت مريخابي متين ، لكن على ما أتذكر ونحن صغار في إجازة في السودان عندي ولد عم زول مزعج وكان عامل فيها شفت علينا ونحن شفع وزول (متنمر) زي مابسموه الخواجات وأتذكر إنه كان بشجع الهلال ، فقام أخوك الازهري الماعارف الفرق بين البلنتي والفاول كردة فعل عكسية بقى مريخابي من اليوم داك :)

Quote: اعتقد التسمية لها بالعربات التي كانت ترش الاستاد بالمياه زمان

إجابتك دي ماحلت لي الإشكال ياخليل ، وماعرفت الرشاشات هم المريخاب ولا الهلالاب .

منتظر معاك إجابة من المخضرمين .

.
.

Quote: سؤال جاد جداً لناس الكورة :مامعنى رشاشات وعلى من تطلق؟وماهو سبب التسمية؟

وبالمناسبة أنا هلالابية ..

ازهرى ازيك

ما عارف الاجابة ..... ولكن طالما انت مريخابى اى اجابة حتعجبك وفى صالحك كمان

ارفع راسك ..... فانت مريخابى ....بس ابعد من شراب السفن اب حتى عام 2050

.
.

Quote: ارفع راسك ..... فانت مريخابى ....بس ابعد من شراب السفن اب حتى عام 2050

الأخ الزميل حامد محمد حامد

رغم إنه أنا مريخابي صنع تايوان يعني تقليد لكن يعلم الله إنه شمشرتك الحامضة دي وجعتني ، وسبعة تفوت ولا حد يموت وبطل الشماتة :) (وجه ضاحك حتى بدت لوزه ونواجذه ).

تحياتي وتقديري.
.

.
.

مرحب بيك ياسلوى ، وتحية ليك ولكل الهلالاب .

خالص الشكر على المرور الكريم والإهتمام .
.
.

أبو الزهور ...
مشتاقين ياخي ...
للأسف إنت ما رشاشة إنت صهيوني لأنو حسب الأصول المريخاب هم الصهاينة أما الرشاشات فهم ال....( وش منور )
مودتي ....

.
.

الأخ الحبيب أشرف

مشتاقين يامان ، وين مطول الغيبة ؟

Quote: للأسف إنت ما رشاشة إنت صهيوني لأنو حسب الأصول المريخاب هم الصهاينة أما الرشاشات فهم ال....( وش منور )مودتي ....

يعني هسع نفهم من كلامك ده إنه الرشاشات مصطلح يطلق على الهلالاب؟

طيب الكلمة دي مصدرها شنو ؟ وليه سموهم رشاشات؟ يعني تتوقع سموهم رشاشات لأنهم بترشوا في المباريات أهداف بالكوم ، ولا برشوا الفرق البتلعب ضدهم بالأهداف؟

بعدين صهاينة دي حارة لكن مفهومة بسبب نجمة الشعار، رغم إنه نجمة المريخ ليست سداسية بل خماسية :)

لك جزيل الشكر وخالص المودة على المرور الكريم .

.
.

أبو الزهور يا عمك
جرى العرف على ان لقب رشاشات يُطلق على الهلالاب و صهاينة - سابقا - على المريخاب - الآن وصيفاب و سبيعاب و تمهيداب و تاكسياب و ما إلى ذلك
أما اصل الألقاب فرشاشات بالضبط ما متأكد من أصله
ولكن بعض سفهاء المريخاب حاولوا يرجعوه لأصل غير أخلاقي يشبه وضاعة نفسهم ودناءة تفكيرهم
ولا اظن ان الأصل كذلك

حكاية انك بقيت مريخابي زعلة من قريبك بتأكد نظرية ان السوداني على الفطرة هلالابي سيد بلد
لكن زعلة او موقف أو شكلة تخليه يقلب مريخابي أو موردابي أو غير ذلك

.
.

الحبيب محمد البشرى

Quote: ولكن بعض سفهاء المريخاب حاولوا يرجعوه لأصل غير أخلاقي يشبه وضاعة نفسهم ودناءة تفكيرهم ولا اظن ان الأصل كذلك

ياخي إنت شامي المريخاب ديل شمة شديدة وزعلان منهم زعلة حامضة :)

بعدين نحن كنا ماعارفين معنى كلمة واحدة هسع الحكاية جابت ليها مصطلحات جديدة مجهولة وصيفاب و سبيعاب و تمهيداب و تاكسياب :)

كدي تعال مسنجر وريني ناس المريخ المعاطين ديل فسروا كلمة رشاشات بي شنو :) (الشمار كتلني).
.

الازهري
والله خسارة بأسمك ده تكون مريخابي
الزعيم الأزهري سيد الاسم كان من مشجعي هلال الخريجين والحركة الوطنية
روي عنه أنه أجل اجتماعا لمجلس الوزراء لمقابلة رئيس الهلال
وحينما عوتب على ذلك قال ان الهلال هو الذي فتح أبوابه للخرجين ومنه انطلقت شرارة الاستقلال



غايتو
البركة في سلوى صيام

.
.

الأخ الحبيب ALGARADABI

ياخي تقول شنو أدي الله وأدي حكمته :)

أشكرك جزيل الشكر على المعلومة القيمة عن الزعيم الخالد الأزهري أعلى الله مقامه في جنات ونهر في مقعد صدق عند مليك مقتدر .

وبالمناسبة أنا مريخابي صناعة تايوان ، ويعلم الله مابعرف إسم لاعب واحد في المريخ .

تحياتي وتقديري لمرورك الكريم .
.
.

لا يا أبو الزهور انا ما شامي المريخاب كدا على إطلاقها ولا ينبغي لي
والدي مريخابي والولية كمان و حتوت زاتو فيه ريحة
اختلاف الانتماء الرياضي عمرو ما كان ولا ح يكون سبب للشمة او البغضاء
وعشان كدا قلت ليك استبعد ان يكون مصطلح رشاشات يحمل معاني غير اخلاقية
لكن من يستحق الشمومة و الكره و الإحتقار هو كل من اسقط وضاعة نفسه و حقارتها على الرياضة و التشجيع وتجاوز الروح الر ياضية و المناكفات البريئة
وكل من تعدى حدود الادب و تسافه مع الآخرين في شأن هو ابعد ما يكون عن ذلك
غض النظر عن لونه هلالابي او مريخابي

بالنسبة للتصريف السفيه لرشاشات بالضبط كدة ما عارفه لان ما قريته توقف في حدود التلميحات عن نادي في الشهداء و ناس بترش وما إلى ذلك
اما بالنسبة لوصيفاب فدا يرجع لكون المريخ صاحب ريكورد اول نادي في العالم ينال وصافة البطولة الأولى في بلده لخمس سنوات على التوالي
و تمهيداب لان لما ربنا فتحها عليهم ومرقوا من خانة الوصافة الكانت متحمداهم و شاركوا في بطولة الأندية الأفريقية الإتحاد الأفريقي فرض عليهم يلعبوا في الدور التمهيدي
زيهم وزي التكاسة الروانداب و العنقالة المدغشقراب و العتالة الزنزباراب و هلم بشتنة
أما الزعيم سيد البلد و رغم حلوله وصيف في الدوري إلا ان الإتحاد الأفريقي اعفاه من الدور التمهيدي لذات البطولة مع الإندية العظام
اها بالنسبة لسبيعاب افتكر واضح طبعا
اما تاكسياب فدا تيمبوراري لحدي يوم خمسطاشر يا عملوا ليه دروب يا كمان سار عليهم
اها يا عمك .. أي سؤال


ياخي كتّر خيرك الفتحت لي باب جمجرة عليهم الليلة

.
.

:)

يامحمد البشري ياخي فكيت لي الدبرسة حقيت يوم السبت .

الله يديك الفي مرادك ويملاك عافية.

وقدر ماضحكت ،لكن برضه قلبي وجعني من جمجرتك الحامضة في المريخ والمريخاب.

خليك قريب لحدي مانعرف مصطلح رشاشات ده جابوه من وين بالضبط .

تحياتي وتقديري.

.

أبو الزهور

انا طبعا هلالابي من منازلهم لكن لما الهلال غلب الاهلي المصري مشيت الاستاد بس ما قدرت اصل من الزحمة !

لكن طبعا ما عندي شغلة بالحاصل جوه البلد دي يعني في الهلال دا غير هيثم مصطفي ما أظني باعرف لي اسم لاعب ...

وفي نهاية المطاف جا واحد اسمو صلاح ادريس كدا ملحن ومدرب ورئيس نادي الهلال وكاتب صحفي وبيعرف اي حاجة في الدنيا دي كرهنا الهلال

ذاتو !!!!!!!!!!!

Quote: دكتور الوليد ماشاء الله عيني باردة صلاة النبي عليك مع إنك عجوز وأكبر مني لكن لسه الشعر والدقن مافيهم شيب

يابو الزهور الصور خداعة , لو جيت قريب - مننا او من الصورة بتلقي الشيب قاعد ,



معليش جبت الاقتباس بتاعك من بوست تاني , لكن تعرف انا ناس سودانيزاونلاين ديل بامشي معاهم علي الحيطة !

.
.

د. الوليد

صلاح إدريس ده بنسمع بيه سماع وسمعت والعهدة على الرواي إنه زي عباقرة القرون الوسطى يعني زول موسوعي زي دافنشي رسام ومهندس وطبيب وشاعر وهو ماما وهو بابا وهو كل حاجة في حياتي .

غايتو سبحان العاطي الوهاب الذي يعطي بغير حساب ، والاداهو بالميارات يدينا بالألآف من الجنيهات الجديدة .

Quote: يابو الزهور الصور خداعة , لو جيت قريب - مننا او من الصورة بتلقي الشيب قاعد

يا زعيم كمان نقول ماشاء الله تبارك الله عيني باردة شيبك إلا يفتشوه فتيش ، لكن أخوك الأزهري كان من بعيد ولا من قريب الرأس كله أبيض مافيه غير شعرتين تلاتة لونهن أسود .

تحياتي وتقديري
.
.

<font face="Tahoma" size="5" color=blue>الأزهرى

كيف حالك ؟ أنا ما ح أقول ليك طلعت مريخابى

لأنى هلالابى وكمان عضو لجنة تنفيذيه برابطه أهل الهلال بجده

والتسميه فى الحقيقه جات من إناس لايشبهوا الرياضه فى شئ !!

وكل الموضوع إنه النادى كان فى فترة من الزمان فى منطقة ...... بأمدرمان !!

وتم ربط كل ما يدور فيها من رش مياه بنادى الهلال

وفى الحقيقه الهلال هو مدرسة وهو من يعلم الناس الأخلاق !!!

وهو نادى الحركه الوطنيه والخريجين وهو النادى الذى لم تسنطيع أى

حكومه فى تاريخ السودان من إختراقه !!!

ولك مودتى </font>

.
.

الأخ الحبيب صابر

والله منور البورد ، وليك وحشة ،ووين مطول الغيبة .

إن شاء الله أحوالك كلها تمام التمام ، وأتذكر زي سمعت خبر إنك هاجرت لدولة أوروبية (ورينا الشمار شنو)

وأشكرك جزيل الشكر على المعلومات القيمة وتقبل خالص التحية والتقدير .
.
.

أخي محمد البشري الخضر

Quote: حكاية انك بقيت مريخابي زعلة من قريبك بتأكد نظرية ان السوداني على الفطرة هلالابي سيد بلد لكن زعلة او موقف أو شكلة تخليه يقلب مريخابي أو موردابي أو غير ذلك

الدخلنا نحن القراقير في الموضوع دا شنو..؟؟

تحياتي

سلامات الحبيب الأزهري

وكتر خيرك لمحاولاتك إزالة ( أميتنا ) الرياضية
كتر خير أخونا ود البشرى لكن باين لى لسع المعنى محتاج لقول فصل

بالمرة كدا

في مصطلح حايم اليومين دي قد ما حاولت أفهم معناهو بالضبط ما قدرت

بعض الأخوان وبدلاً من الأوجه بدأوا يكتبون D:D:D:D

فهمونا فهمكم الله

.
.

الحبيب عاطف عمر

تحياتي وتقديري

مستعجل شوية وبجيكم تاني وكمان تحيةللأخ العزيز صابر المطول الغيبة .

:D :D

ده يا عاطف الكود حق الوجه ضاحك بي سنون يعني ضحكة من الاضان للأضان .

الوجه الضاحك العادي رمزه كده :) وبرضه ماشغال .

لكن في عطل في المنبر والوجوه الضاحكة مابتظهر .

الهاكرز بشتن علينا المنبر .

يعني الرموز دي رمز الوجه الضاحك شديد بس في مشكلة فنية .
.
.


صابرياحبيب راجع المسنجر الداخلي

.
.

وكان البريق ازهـــريا , ثنائي المكـــيال سمـــو و رفعه
فالنجـــوم كذلك ..

حبابكم رياضه ,
وبكل جمــيل الاسماء.

___________________________________________________________

ليتهم يعلمون ان عمر اللحظـه في بعـدك يا خـرطـوم سنين طـوال.
د شهـاب الفاتح ـ كـوالالمبور

العزيز الازهري
انحنا الهلالاب انحنا الرشاشات لانو بنترش طوالي ما حصل جبنا كاس
خارجي الا في الخيال

.
.

الأخ العزيز وليد نايل

Quote: العزيز الازهري انحنا الهلالاب انحنا الرشاشات لانو بنترش طوالي ما حصل جبنا كاس خارجي الا في الخيال

ياخي تفسيرك ده عجبني شديد والله ، وريح خاطري وسر بالي :)

ربنا يملاك عافية وأعتقد إنه لحدي هسع مافي زول جاب لينا معنى تمسية رشاشات ، ولا فسرها تفسير منطقي إلا إنت ياحبيب ،عشان كده أقترح نعتمد هذا التفسير :)

وجه ضاحك حتى بدت ضروسه

ولك جزيل الشكر والتقدير على المرور الجميل وربنا يغطي عليك من النيران الصديقة :)
.
.

.
.

الأخ العزيزأستاذنا شهاب الفاتح

أسعدتني هذه الطلة الجميلة ، والمشاعر الاخوية النبيلة .

ربنا يملاك عافية ومن تحب ، ولا حرمنا الله لطفكم ومودتكم .

وتقبل خالص التحية والتقدير ، وأسلم لمحبك .
.
.

.
.

والأزهري يحاور ويحاور ويتجاوز واحد والتاني والتالت وتسديدة قووووووية قوووووووووووية يا الله يا الله ياللحظ التعيس الكورة تضرب في العارضة وتطرشق بصوت عااااااااااالي عاااالي وواحد من اللعيبة يتخلع ويغمى عليه مشهد جمممميل مشهد لا يتكرر ياسلام عليك يا أبو الزهور كده اللعب ولا بلاش.

:)

يا اخوانا انتو حقيقة ما عارفين سبب التسميه ولا بتهظروا ساكت؟؟؟؟

نادي الهلال كان في الشهدا
المعهد الدولى حاليا

وكان قبله بجوار مستشفى امدرمان

التسمية ليها علاقة بالمكان
بدون تفاصيل

كلكم طلعتوا محطات ما عارفين

أزهري حبابك
انا متلك ما عارف سبب التسمية
ربما الأصح بخاخات

.
.

إيمو

شكراً جزيلاً على المرور الكريم .

تصدق ؟ أنا لحدي هسع ماعرفت الحاصل بالضبط ؟
.
.

.
.

وليد تشكرات أفندم على الإهتمام ، لكن ماوريتنا حاجة ؟

تحياتي وتقديري .
.
.

.
.

الأخ الزميل طارق ميرغني

أشكر لك هذا المرور والإهتمام .

لحدي هسع مافي كلام قاطع في الموضوع .:)

*

تحية وتقدير لكل الزملاء زوار البوست ، نعسان هسع بجيكم تاني إن شاء الله تعالى .
.
.

?????????????????????????????????

الاخ الازهري تحية وتقدير وودكبير يا صفوة يا رائع
كل الهلالاب الهنا عارفين معني رشاشات فقط بيتزاوغوا منها
وهي ياعزيزي معيبة ولها علاقة وثيقة بموقع نادي الهلال السابق بمنطقة حي الشهداء جوار مستشفي ام درمان
ولك ان تربط الاسم بالموقع وممارسة رش المياه الراجعة
هذه هي الحقيقة التي يتبرأ منها الرشاشات

Quote: الاخ الازهري تحية وتقدير وودكبير يا صفوة يا رائع كل الهلالاب الهنا عارفين معني رشاشات فقط بيتزاوغوا منها وهي ياعزيزي معيبة ولها علاقة وثيقة بموقع نادي الهلال السابق بمنطقة حي الشهداء جوار مستشفي ام درمان ولك ان تربط الاسم بالموقع وممارسة رش المياه الراجعة هذه هي الحقيقة التي يتبرأ منها الرشاشات

بالفعل كلام الاخ مهدي صحيح ونحن ناس ديناصورات .

كان نادي الهلال في السابق في هذه المنطقة والتي بها هذه البيوت المشبوهه حتي فترة السبعينيات .

لذا جاءت التسميه ومافي داعي ادخل في ولماذا سميت بهذا الاسم ؟؟؟

دي ذكرتني البنت التي ذكرت انها لا تعرف اسم خطيب صاحبتها ولكن اوله عبد القا ....

.
.

الأخ العزيز مهدي الصادق

لكم خالص الشكر والتقدير على كلماتكم الودودة ومشاعركم الأخوية النبيلة، ولا حرمنا الله لطفكم .

وتقريباًبعد مداخلتك يادوب بديت أفهم سبب التسمية .

لكم خالص التحية .

.
.

الف حمدلله على السلامة انك فهمت
يا اخى انت اتلايقت فى الموضوع ده لمن قرب يجيب دم

كده فط سطر




كوم تحايا وود

.
.

حيدر عثمان

الله يسألك المداخلات القبل مداخلة مهدي دي قدرت تعرف منها معنى (رشاشات) ؟

:)

كلها تلميح ، مافي أي تصريح .

بعدين إنت مالك زعلان ؟

خلينا نتلايق يامان مادام الويكة في المنبر بالكوم والردوم .

تحياتي وتقديري ممزوجة بطن من الويكة الماخمج .
.
.

.
.
وكمان هاك الهدية دي ياحيدر عثمان عشان ماتزعل وتروق أعصابك :)








شفت كيف يامان ؟ وإن شاء الله الهلال يضوي ليك ويضوي لينا، والمريخ يجمل سمانا. :)
.
.