العصمة في يد الزوجة: مع أم ضد؟ إستبيان

الأحباب البورداب وزوار سودانيز أونلاين رجاء المشاركة بالرأي لأغراض صحفية:

العصمة في يد الزوجة:

أ-موافق (مع ذكرالسبب)
ب-غير موافق (مع ذكرالسبب)
ج-لا أدري


كل من البورداب و الزوار رجاء ذكر:
الإسم
المهنة
مكان الإقامة
مع صورة شخصية إن أمكن

زوار منتدياتنا يمكن المشاركة بالرأي على الإيميل:
[email protected]

العصمة في يد الزوجة:

أ-موافق (مع ذكرالسبب) اذا كانت المرأة الأرشد
ب-غير موافق (مع ذكرالسبب) غالبية النساء تتعجل اتخاذ القرار
ج-لا أدري


كل من البورداب و الزوار رجاء ذكر:
الإسم عبدالعزيز عيسى
المهنة تشكيلي
مكان الإقامة سنغاورة
مع صورة شخصية إن أمكن البرفايل

الاخت لنا
غير موافق
لان القوامة هي للرجل مهما ضعفت شخصيته لا يمكن ان تكون لدرجة ان يكون بيد امراة حتى لو كنت انا هذه الامرأة ....


منظر غير مقبول

Quote: الاخت لنا غير موافق لان القوامة هي للرجل مهما ضعفت شخصيته لا يمكن ان تكون لدرجة ان يكون بيد امراة حتى لو كنت انا هذه الامرأة .... منظر غير مقبول

الأخت Shibka

سلام


يا ريت لو الرجال رجال

العصمة تكون في يد الراجل يا لنا,

بس مع حق الفيتو للمرأة

يعني لو ماعايزة تعيش معاه, مافي داعي يمسكها

شفتي كيف ؟

تحياتي


أحمـد الشايقي

غير موافق ( السبب لا اري سببا يجعل العصمة في يد الزوجة )


وليد محمد المبارك

لنا ازيك
هى الزوجه أسى بلاااااااا عصمه ما مقصره
حكومه جد

على أى حال لا أرى مانعاً اذا تم الاتفاق بينهما على ذلك
على الأقل تضمن مستقبلها ومستقبل أولادها من الطلاقات العشوائيه دى

عموماً العصمه لا تعنى الكثير فى رأيى
ففى حالة عدم التوافق بين الزوجين يمكنهم الانفصال بعصمه أو بدون عصمه
(عن طريق المحكمه مثلاً)
وليس هناك ما يجبر أحدهما على الحياه مع الآخر اذا انعدمت الموده .
تحياتى

يا لنا

أسي عليكي الله ناس خلاس باجيب الخدراة لكن ما بأورقا ديل كان العصمة عندو وللا ما عندو فارقة بي شنو؟؟

تفرق بي شنو لو العصمة عند هذا أو ذاك.
هي شراكة لو استحالت المواصلة فليذهب كل إلى طريقه بغض النظر عن صاحب العصمة. طبعاً دا بافتراض أن صاحب العصمة هو طرف عاقل يدرك عواقب كل أمر.

بعدين على ما اعتقد أن قانون الخلع قد منح الزوجة شيئا من هذا القبيل.

غايتو المغتربات كلهن عصمتهن في يدهن وأي شي في يدهن.

عبد العزيز

ا

Quote: يا ريت لو الرجال رجال

يعني هي اصلا ما ناقصة كمان تجيب ليها عصمة في يد الزوجة

لا اري ما يستدعي النقاش في هكذا امور فتعاليم ديننا الحنيف
اوضحت هكذا امور ولكن ان اتفق الطرفان لاضير في ذلك .
لكني ما ظنيت انو في فحل كدة بقبل يكون كما في الصورة اعلاه

العـزيزة الأخت لنا،، تحية طيبة،،
ما دمنا ننادي بالمساواة بين الرجل والمرأة في الحقوق والواجبات وبالضرورة أن تشمل المساواة الأزواج أيضاً، وإذا كان العصمة يقصد بها من في يده إنهاء الزواج متى أراد،، فأنا أرى أن المساواة تقتضي أيضاً أن يكون الأمر بيد الإتنين،، لا بيد أحدهما فقط.. يشبه ذلك لحد كبير الموجود في القوانين الغربية... فنجد في الغرب أنه يجب الوصول (لتسوية) عندما يطلب أحد الطرفين الطلاق سواء بطريق المحكمة أو بطريق المحاميين الممثلين لهما..وغالبا يتم دفع تعويض مادي للطرف المتضرر... لذلك نجد الناس في الغرب مثلا لا يتزوجون إلا بعد سنوات طويلة من (المساكنة) يعني بعد ما يقتنعوا إنهم ممكن يعيشوا باقي عمرهم مع بعض،،وكثيرا ما نرى الأطفال حاضرين في زواج والديهم!.. ورغم أن المساكنة هي أيضا علاقة قانونية ومسجلة وتترتب عليها كثير من الإشياء الرسمية مثل أن يحمل الأطفال إسم والدهم الخ،، إلا أن إنهائها لا يتطلب موافقة الطرفين كالزواج..ورغم أننا كمسلمين وسودانيين لا نعرف (المساكنة) وسمعت أنها موجودة في دول عربيةأخرى، أعني أنها بالنسبة لنا غير مقبولة من الناحية الإجتماعية على الأقل حتى لا أفتي فيها من الناحية الدينية بغير علم،، لذا فأنا أرى أن نلغي شي اسمو العصمة مرة واحدة...ولكي الشكر..
الإسم: عيسى يوسف
المهنة: Physicist and Software Engineer
هـولندة..

لنا

شكرا ع الموضوع

والله الاجابات المغلقة دى(اوافق،لا اوافق) غير كافية ، لسبب ضيق الحيز بالنسبة للتوضيح والحجج

لكن في رايي لا مانع ان تكون العصمة في يد الزوجة لكن بالتاكيد ليست كل الزوجات ، فاختلاف درجات التحمل وطولة البال والاحساس بالمسؤولية والحكمة وغيرها من السمات الشخصية المطلوبة للعصمة هى غير متوفرة عند كل النساء ،، وتختلف من واحدة الى اخرى

طلال جبير

من منظور شرعي

طبعاً،، باطل ولا يصح وهنا الاحتجاج بآية القوامة،،((الرجال قوامون علي النساء بمافضل الله بعضهم على بعض...الخ))

لكن لايوجد نص شرعي واضح فكلها اجتهادات

ملخص اجابتي

لا مانع

ــــــــــ
تعرفي يالنا هم معشر الرجال ما ح يوافقوا ليه؟؟ لانهم عارفين نفسهم ما محتملين ، وممكن نرمي عليهم يمين الطلاق قبل النكاح ذاتو (وش ضاحك على خفيف)

الأخت الفاضله لنا:

السلام عليكم,,

عندي سؤال:

الاسم ومكان الاقامه والصوره الشخصيه!!!!!!!

الاستبيان بسيط والمعلومه المطلوب الحصول عليها أبسط,

مالجدوي من طلب هذه البيانات؟؟؟

يعني يمكن السن والمستوي التعليمي مثلا,

لكن صوره شخصيه !!!


تقديري...

شكراً لكل من استجاب من الأحباب

Quote: الاسم ومكان الاقامه والصوره الشخصيه!!!!!!! الاستبيان بسيط والمعلومه المطلوب الحصول عليها أبسط, مالجدوي من طلب هذه البيانات؟؟؟ يعني يمكن السن والمستوي التعليمي مثلا, لكن صوره شخصيه !!!

الحبيبة أماني
المطلوب ما معلومة المطلوب وجهات نظر المعلومة بتكون حاسمة بينما وجهات النظر متباينة
بالنسبة للصور لو لاحظتي في بداية البوست كتبت أن الاستبيان لأغراض صحفية و طبيعي تنشر الصور للراغبين، و لذلك وضعت (إن أمكن) عند طلب الصور الشخصية بمعنى أن ما لا يرغب بنشر صورته مع إجاباته غير ملزم بإرسال الصور..
لنا

يا عيسى

Quote: لذلك نجد الناس في الغرب مثلا لا يتزوجون إلا بعد سنوات طويلة من (المساكنة) يعني بعد ما يقتنعوا إنهم ممكن يعيشوا باقي عمرهم مع بعض،،وكثيرا ما نرى الأطفال حاضرين في زواج والديهم!.. ورغم أن المساكنة هي أيضا علاقة قانونية ومسجلة وتترتب عليها كثير من الإشياء الرسمية مثل أن يحمل الأطفال إسم والدهم الخ،، إلا أن إنهائها لا يتطلب موافقة الطرفين كالزواج..

دي واحده من الاسباب الخلت الدول الغربية تلجاء ليكم عبر هجر لتغطية التدني الواضح في البيبلوشن
يعني نحن نعمل بي حاجات الخواجات بعد ما هم عاوزين يسيبوها

المساكنة مشاكلها كتيره
اولا قانويا لا تحرم معاشرة اكثر من شريك
الفكاك من رباط زي ده بالسهولة دي وخاصة لو في اطفال بكون مشكلة كبير

يعني الموضوع ما الراجل والمرأة فقط
الناتج من علاقتهم دي عنده حقوق

وده اصبح ظاهر الان في الدول الغربية
وبحاولوا يلقوا ليه حلول

الاخت لنا
انا ضدالموضوع دة.. لانو خايف المرة تقوم تستخدم صلاحياتا
والواحد ما صدق انو لم ليهو في مرة قبلت بيهو.....

في السودان بالذات لو كانت العصمة بيد المراة لوجدتي معظم الرجال يحملون بطانياتهم ويخرجون في منتصف الليل للبحث عن مكان للمبيت فيه
اقل زعلة منها يمكن أن توديك في داهية
بالطبع هذا ليس تعميم منهن العاقلات
ولكن سمعت باضاني دي واحدة قالت لو كتب لي البيت والدكان لأخرجته من حياتي بدون عودة !!
والله المشكلة ماتقول ليك انت طالق
المشكلة تجيك أمها وتقول انت طالق ياحمار !!!
واحدة قبل فترة اقسمت بالمصحف لزوجها بان لاتكون له إمراة منذ هذا اليوم
يعني الراجل ساعة مالقت طريقة تطلقوا باخوي وأخوك حلفت ليهو بالمصحف
وتاريهو زولك كان عاوز الحتة دي
قامت العصر رجعت براها
وحاولت حتى تقبيله والاعتذار له فرفض ابوالقدح وقال لها هذا قسم
والله العظيم كان دفعت التمن أنا ابوحراز الضعيف فلا لي ناقة ولاجمل في هذا الموضوع
ومشيت معاهم من شيخ الى شيخ
ومن فكي الى فكي
وأخيراً امام المسجد الكبير حل لينا المشكلة
وقال ليها لازم تطعمي عشرين مسكين
وكل واحد صحنو براهو
برضو شالت القروش من ابوالقدح وأطعمت المساكين عصيدة بي ملاح شرموط
ورجعت المياه الى مجاريها
ياجماعة الحياة الزوجية حياة مقدسة يجب أن يسودها الاحترام
وان فقدت الاحترام فقدت معناها
وقد لاحظت أن معظم المشاكل الزوجية بالسودان سببها اما عدم الوضوح اي الغموضو الشديد
أو التدخل الأسري لكلا الزوجين
كما ان الموبايلات دخلت في هذه المعمعة
حمى الله بلادنا من هذه الكوارث
وأتمنى للجميع حياة زوجية سعيدة بعيداً عن العصمة وامثالها

معليش يا لنا تعليق سريع على كلام الأخ وليد الموجه لي:

Quote: دي واحده من الاسباب الخلت الدول الغربية تلجاء ليكم عبر هجر لتغطية التدني الواضح في البيبلوشن يعني نحن نعمل بي حاجات الخواجات بعد ما هم عاوزين يسيبوها المساكنة مشاكلها كتيره اولا قانويا لا تحرم معاشرة اكثر من شريك الفكاك من رباط زي ده بالسهولة دي وخاصة لو في اطفال بكون مشكلة كبير

يا وليد،، أول حاجة الدول الغربية ياخوي نحنا ال لجأنا ليها بعد أن ضاقت علينا بلادنا بما رحبت،، مش هي التي لجأت لينا! شفت كيف؟! تاني حاجة أنا ما قلت نعمل بحاجاتهم (مثل المساكنة)،، لكن قلت في ما يتعلق بإنهاء الزووواج الشرعي.. والقاليك منو هم الخواجات دايرين يسيبوا الزواج والمساكنة أو (العيش سوياً) في ترجمة أخرى ل cohabit OR live together؟؟ أنا بالعكس قلت دا شي ما بناسبنا وما مقبول إجتماعيا ودينيا،، ولكن وضحت إنو أنا لا أفتي في أي مسألة دينية (إلا نفسي) مهما صغرت أو كبرت يعني لا أقول هذا حرام وهذا حلال أبدا..حاجة تالتة برضو معلومة إنو المساكنة لا تحرم معاشرة أكتر من شريك حسب تعبيرك برضو دا كلام ما صحيح،، وزي ما قلت في الأول هناك فروقات بسيطة بينها والزواج، يعني ما بكون فيها عقد شرعي (في الكنيسة للمتدينيين) عشان كدة برضو مافيها طلاق شرعي،، لكنها مثل الزواج تسجل في كل الإدارات الأخرى مثل البلدية ومصلحة الضرائب ليحسب دخل الإتنين مع بعض الخ... والفكاك منها نعم هو ساهل،، ولكنه ليس بأسهل من الفكاك من الزواج عندنا! يعني الرجل (منّا) يستطيع بكلمة واحدة وقيل بي SMS إنهاء العلاقة الزوجية،، وفي المجتمع السوداني وغيره من المجتمعات (المسلمة) نجد نسبة عالية من حالات الطلاق حسب بعض الإحصائيات يعني المسألة ما ليها علاقة كبيرة بشكل العلاقة شنو ومن في يده العصمة الخ...

الاخت الكريمة لنا
لا اوافق
لانه زي ماقال عادل امام
لو كل واحد ساكنه تحيته رقاصة يعزل
كل البلد حتبات في الشارع

انا حأدخل بي تخريمة

تعرفي العصمة في يد الزوجة
زي نظام الكفالة
في اي لحظة تتوقع خروج نهائي
سلامات

مرحب الاخ عيسى

Quote: أول حاجة الدول الغربية ياخوي نحنا ال لجأنا ليها بعد أن ضاقت علينا بلادنا بما رحبت،، مش هي التي لجأت لينا! شفت كيف؟!

ما مختلفين
بالنسبة ليك لجو بالنسبة ليهم هجرة
لو ما الهجرة اليهم تصب في مصلحتهم ما كان اتيحت فرص اللجوء الكتيره دي

المهم ده ما موضوعنا

Quote: وفي المجتمع السوداني وغيره من المجتمعات (المسلمة) نجد نسبة عالية من حالات الطلاق حسب بعض الإحصائيات يعني المسألة ما ليها علاقة كبيرة بشكل العلاقة شنو ومن في يده العصمة الخ...

النسب العالية لا تقارن بنسب انهاء العلاقات في ( المساكنة ) والتحويل من جهة الى اخرى
هنا الطلاق مع انه في يد الرجل لكن المجتمع خاتي ليه محازير كتيره جدا
غير موجوده في المجتمعات الغربية

لماذا لا تكون العصمة في يدهم الأثنين ؟

يعني إتفاق على زواج من الأول برضا الطرفين .... لو في واحد ما داير يواصل يطرح الموضوع ويتناقشو ويصلو لي حل ؟


افتكر كده أحسن ...ولا ؟؟؟؟؟؟؟؟

اسامة

لنا ...
سلام ...
السؤال هنا حول ضرورة العصمة و طريقة إستخدام هذا الحق ...
عموماً أنا أرى أن تكون العصمة للرجل ليس لإستعراض العضلات أو ممارسة الضغط بل لأن معظم الرجال ( لا أقول كل الرجال ) يملك نفسه عند الغضب و لديه قدرة أكبر على كتم الغيظ ... و من هذا المنطلق حفاظاً على الأسرة بمكوناتها المختلفة (الزوج و الزوجة و الأبناء) ... و لك إستخدام رأيي هذا من الناحية الإحصائية في الإستبيان ... و لكن لأن لا شيء مطلق ... فلا أرى مانع من أن تكون العصمة للمرأة إذا تم الإتفاق بين الطرفين على ذلك إن كان الرجل واثقاً في أن من إختارها شريكة له لديها القدرة على إتخاذ القرار المصيري بالإستمرار أو الفراق ... ثم أنني أعود فأؤكد أن العصمة في عالم اليوم لم تعد صلاحية كاملة في إصدار أحكام مصيرية بل تدخلت عوامل أخرى غيرت العصمة كمفهوم إلى شيء شبه بروتوكولي ...
مع خالص الود و التقدير ...

Quote: يعني هي اصلا ما ناقصة كمان تجيب ليها عصمة في يد الزوجة

Shibka

سلام

هنالك نساء يساون أكتر من رجل..
عندنا نساء في الحي لهن كلمتهن رغم الصبغة الذكورية لمجتمعنا السوداني..
واتفق معك بأن موضوع العصمة شئ حساس وفيه مخاطرة لو صار بيد كثير من النساء..

تحياتي
عبدالعزيز

لنا
سلام

كدي أول خليني ألم في (المرا) بعدين نتشاور في موضوع العصمة ده

علي العموم موضوع العصمة هو يتم بالاتفاق من الاول
بعدين ده واحدة من الاسباب الخلت الرجال عينهم طايرة (الواحدة) ماشة مع راجلها وتعاين وتتلفت في الشارع زي الرايحة ليها حاجة

والله كان ادوكم العصمة ولا ما ادوكم ليها اياها حالكم
ـــــــــــــــــــ
تخريمة:
كدي شوف لي خيار رابع

العصمة تؤول لصاحب النصيب الأكبر من المسؤولية الأسريّة من رعايّة ماليّة، وإلتزام أخلاقي تجاه الشخص نفسه وباقي الأسرة..
___
ولكن إن أراد أحدهما الطلاق بقناعة تامة بعد تشاور رشيد، فلا بد للطرف الآخر بأن يستجيب دون الحوجّة لعصمة، إفتراق بإحسان..

العصمة يا لنا في يد الرجل
هذا بعيداَ عما ورد عن السلف الصالح ,
في العموم عندي كلام كتير حول البعد الانساني لقوامة الرجل في الالفية التانية و بدايات الثالتة
و للاسف لا رغبه لي لسنين طوال في الخوض في كتابه تأخذ مني زمنا و رهقا و برضو ما عارف ليه ..
لكن في العموم و بطبعي لا انظر للاسئلة في مباشرتها و اركز جيدا في الحِراكـ الانساني للمعادلة محل السؤال,
فالكثير من القضايا تضيع فيها اطراف عديدة بسبب المباشرة و اعني علي وجه الخصوص كل ما يتعلق باللي ما يتسماش
الحب .






__
كتبت (الحب) و انا اعنيها فأهل الالفيه التانية يسمونه العشرة و الولف و .. الخ لكنه يظل عندي (الحب).

الأخت لنا
سلام
ليه يا أبيض أو أسود
أنا بفتكر ماتكون فى يد أى واحد منهما بمفرده..
يعنى تكون فى يد المحكمة...
بجيك راجع أوضح ليك ليه...مستعجل محصل الكوووووورة..
لك الود
سيف مصطفى .../محامى

غير موافق
المرأة إنفاعلية وتعمل من الحبة قبة .. غايتو كان أخدت العصمة كنا بتنا فى الشارع من زماااان

وريحنا نفسنا

لا أقول لأنها متقلبة المزاج ولكن أقول لأنها تجدد نضجها كل حين ولو مر
عارض فى ذاك الزمان لعصفت بثبات كوكب الزوجيه عصف عاد وإرمة ذات العماد
وإنها سوف لا تبقى ولا تذر لذرة من ذرات ذلك الكوكب إلا ولاحت بها لتهوى فى
سحيق جب لا سيارة يأوون إليه ولكنى لا أحرمها من مناصفة الشراكه فى كل شئ
وأن تقول كل ما بوسعها ولكن على الرجل أن يأخذ بعشره سرا دون إفصاح
وأن تبقى العصمة فى يده لأنه أكثر صبرا وأعرف بسخانة جمر الأسره رغم أكثر
الأعباء تقوم بها المرأه فالعلاقة الزوجية ثغر والرجل حارس خلق لذاك
والله ورسوله أعلم وهنا لا أفتى لأن للفتوة شروط وأن العمل بها بعد إصدارها
أمر إيمانى وأجب العمل به



زول ساهى

الأستاذة لنا مهدي

تحية طيبة

لا أوافق بصورة شخصية جداً

أي مايتعلق بحياتي الزوجية ( هذا رأيي ورأي زوجتي بالمناسبة)

لأن زوجتي إنفعالية الي حد ما

حتي أنها لم تكتفي بأن تكون العصمة في يدي بل إنها تصر وتكرر بألا أستخدم هذا الفيتو

حتي وإن طلبت هي ذلك


يعني لو العصمة في يدها كنت أنا بكون في بيت ابوي زماااااااااااااااااااااااااااان

موضوع مهم

لنو كيفك حبيبة

احكي ليك وانت حكمي ضميرك

عندنا هنا في الرياض ، واحدة عندها التابعية السعودية ، ولتسهيل العمل زوجها على كفالتها
يوم زعلت منو
عملت ليه خروج نهائي
تقولي لي عصمة ؟

Quote: غير موافق المرأة إنفاعلية وتعمل من الحبة قبة .. غايتو كان أخدت العصمة كنا بتنا فى الشارع من زماااان

رأفت ميلاد اصبت ياصديق اهلي الدناقلة ..واضيف عاطفية زيادة ..

لنا مهدي :
يا انصارية زي اهل أمي الطمبلاب ..
الاسم : محمد ابراهيم عثمان ..
العمل: مدير قاعدة بيانات ببلدية الشارقة ..
الرأي : لا اوافق ..
انتهينا من طلبك ..
شوفي طلبنا ..
لنا مهدي : طلبنا ولومنا قبل كل شيء زوري الاتي :
ملتقىالمليون ...وليلة حميمية ترفيهية على شرف اسرة نادي ...ادي السوداني ..دبي..
تحياتي ..

لنا،
صباحك طيب ...

العصمة في يد الزوجة
ب-غير موافق :

أرى ان العصمة و ما يترتب عليها أمر يجب ان يكون مناصفة بين طرفي العلاقة و بالتراضي .. احتكار الرجل لهذه القوامة بغض النظر عن المسوغات النصية الدينية كان مرتبطا بالقدرة المالية و الكسب و هو ما لم يعد سببا كافيا بعد خروج المراة للعمل و مساهمتها المادية. العصمة مرتبطة بالطلاق - انهاء العلاقة - ابطال العقد - ومن المجحف ان تكون هذه السلطة بيد أي طرف منهما أو نافذة بدون قبول الآخر


عزاز شامي
مديرة مركز مصادر المعلومات
الرياض، السعودية
الصورة (نقي البيعجبك من الفيس بوك :) )

Quote: العصمة في يد الزوجة

الاستاذة لنا مهدى
لك التقدير
شخصيا عندى تحفظ على مسمى كلمة (عصمة)فيها الواد القديم
للانثى ...
هو عقد نكاح عقد زواج عقد قران
والعقد شريعة المتعاقدين بداية
ونهاية

لنا ازيك
كدى خلينى قبل العصمة اقول ليك ملاحظة فى القسيمة ذاتها مكتوب فيها مجبرتى
شوفى الكارثة تكونى مرتبطة بيه 5 سنوات ويوم العرس تكونى مجبرتى .

انا مع العصمةفى يد المراة
سببى انها اكثر صبرا ويكفى تربيه الابناء كمثال .

برضو انا بفتكر انو الاحترام و الثقة هم الاساس يعنى ممكن 30 سنة من الزواج ما تحتاج لعصمة .

لنا مهدي

سلام

لو كنت تقصدين بالعصمة حق فض الزواج.

اري العصمة حق اصيل للطرفين، ايا منهما يجب ان يكون له الحق في التحلل من عقد الزواج عندما يصل لقناعة بعدم جدواه.