يالفكي فرناندو تثبت لي قصايدي في الصفحة الاولي

يا لفكي فرناندو تثبت لي قصايدي في الصفحة الاولي
---------------------------------------------

أرفع القصيدة من الصفحة السابعة أجيبا الصفحة الاولي فجأة تغفلني تتملص فت ألقاها
في الصفحة العاشرة ... اجيبا من الصفحة العاشرة للصفحة الاولي فوق أول موضوع
تنزل فوووووو الصفحة الخمسطاشر !!!!!!!
أها وكت تعبت من الحكاية دي قتّ اسأل واحد صاحبي عندو خبرة في المسألة دي
ومن خلال خبرتو أقيس عليها . قام صاحبي سألني قال لي قصايدك دي بتاعت حب يعني
بتكتب عن الجكس ، قت ليهو لا . قال لي بتكتب بي لغة الهوسة ، قت ليهو لا. بتكتب
بالهروغلفية ، قت ليهو لا . بتكتب بأهلين أبو أهلينك ، قت ليهو لا . قام صاحبي وصف لي فكي
اسمو (الفكي ريمون) فكي هندي أحمر كارب ، قالوا بفك السحر والكجة . أها.. مشيت للفكي ريمون
الحقنا وافزعنا وانجدنا ... حكيت ليهو كل القصة ، انشحطتا قدامو.... رفعت ايديا قت ليهو يا شيخنا
أعطيني ما يقربهم مني ) ... أها الشيخ قال لي مشكلتك دي صعبة شديد ، في سحرة في قواتمالا
ضاربين الخلا والصّي منهم الشيخ " فرناندو" الوحيدين الممكن يفكوا الكجر والسبر ، بعرفوا سر السحر وسر الريح والضوء.........
ولازم تصلهم بالليل . المهم جهزت نفسي :- أها...
سريت بالليل براري التيه
سبع وهاد وسبع بحور
نزلت ودي مرابع الصي
سندت لساني في قلبي
سردت قصايدي للسحرة
البسايسوا الريح
بعرفوا سر مسارب الضي
فركوا النار
علي الحجار
شالوا رمادة من قلبي
قطعة لكنة من حلقي
معاها ندم وحفنة هم
جسوا ترابة شموا خطاي
عوجوا لساني رطنوا معاي
" فيك حسرة
وعليك حسرة
ركبت دروب
سرج مقلوب
أناك نكرة
وغناك نكرة
شن راجيهو من بكره
وصدي الذكري
شن راجيهو من بكرة
وصدي الذكري "


أها.. بعد دا كلو السحرة قالوا لي احتمال تتعالج . جابوا لي طشت كبير كبوا فيهو موية ،
قالوا لي عاين في الموية الفي الطشت بتشوف شنو . عاينت في الطشت ... ناس المنبر كلهم
قدامي عديل . قالوا لي عرفت منهم منو . قت ليهم عرفت فلان وفلان وفلانة وفلانة .......
قال لي قول ليهم كلهم الفي المنبر .... شيخ " فرناندو" قال ليكم ادخلوا ارفعوا القصايد دي فوق
وباللون الاحمر....
أها... بعد داك أدوني بخرات، وحبات رملة، وشعرات ، وعرق محبة . حبات الرملة تشتتا في
الكي بورد . البخرات بتثبت ليك القصايد في الصفحة الاولي لمدة شهر ، وأي زول يقرأ القصيدة
يغطس قبلو مايفوت من القصيدة لو ما كتب مداخلة أو مداخلتين واحتمال ما يفوت كلو كلو، حتي
لو فات يكون عندو عقدة ذنب يجي راجع تاني . أما الشعيرات ديل من ضنب جمل اسمو السّمع
موجود في بلدكم في البطانة الجمل دا امو ناقة وأبوهو شيطان في الجري مابتسابق ، الشعيرات دي
بتخليك تكتب فللي ، ومن دربك دا تمشي تدخل كل البوستات من غير فرز . قت ليهو ياشيخنا حتي
البوست لو ماعاجبني . قال لي شوف عجبك ما عجبك تدخل أسمع كلامي دا كويس وتكتر من
التحلية في الكلام من امثال :-
يسلم احساسك يا رائع .....
انت من زمان وين .......
دا بوست اجنن........
منتظرين الكتير يا رايع
ياسلام عليك نورت البوست
شيخ "فرناندو" قال لي " انت ما بتعرف تواجب في ثقافتكم المرأة لو ما جات للتانية في طهور
بتها التانية ما بتجيها في عرس ولدا .
و الما بجيني في بوستي لبكاء أبوهو مابمشي .

أي واحد يدخل البوست دا معناها جابو الفكي" فرناندو"

up

يا عوض حسن أنا غايتو جابني الدرب ما شيخ فرناندو بتاعك ده..
و ممكن اجي تاني بس تكتر لي من يا رائع و يا مبدع و نورت البوست و المحلبية دي

يا الفكي فرناندو
تثبت ليه قصايدو
تكون في الصفحة الأولى
وتجيب كل البتاوقو
والبوست يدوم قعادو ....



أها عاد
قصرت معاك يا عوض ؟



مودتي
أسامة

(*)

صباح الخير يا(فنان) ..

كمال علي الزين مرة واحدة ؟؟؟؟؟

أنا من قبيل اقول البوست دا مالو بقي جميل ومشرق كدا!!!!

اصبر لي عندي معاك مشوار طويل............. ياكمال

الاخ العزيز اسامة محمد


تحياتي ومحبتي


تسلم ياخي ماقصرت معاي تب

بدعواتك الصالحة وكمان باللون الاحمر

عشان كدا انا حاأجيب ليك بخرات من الشيخ فرناندو امكن تنفعك لقدام.

لك حبي مرة اخري

الاخ العزيز Elkhawad

التحية لك مع خالص حبي

الظاهر الشيخ فرناندو بينّ فيك

الاثر واضح خلاك تجي بدون ما تتكلم

ياخي نورت البوست

لك حبي مرة اخري

الاخ سيف النصر محي الدين

لك كل الحب والتقدير

شرفت البوست

أثبت لي انو جابك الدرب

وسوف أكد لك انك حاتجي تاني بدون

مااذكر لك الكلمات المحلبية الانت مستحقها دي .

أكرر حبي وتقديري

عوض حسن سلامات
يا صديق

يا سيدي انت عندك حاجة منشورة ؟؟؟

لو عندك صدقني الفكي فرناندو ده
حيثبتك مش في الصفحة الاولي
حيثبتك فوووووق في رأس المنبر
أسال حمور زيادة كان مغالطني ههههههه


سلام يا فنان

اخي العزيز سفيان بشير

اجمل مافي الحياة انهاتجود علي

بمعارف واصدقاء من امثالك

ياخي شرفتني كثيرا..كثيرا..كثيرا.

اهو الفكي فرناندو صحّ معاي جابك انت .

حمور زيادة صاحب الاعمال الرائعة ""....ماعادت تضحك ،صباحك سلمي ""

حمور زيادة دا فكي اخر الحقنا وانجدنا.

تشرفت بمعرفته من خلال قصصه الرائعة...له تحياتي.

لك كل الحب والتقدير يا سفيان .

يا عوض ياخ شكراً ليك
شكراً شديد وسعيد بمعرفتك
جداً جداً

بالمناسبةصورة البرفائل جميلة ومعبرة
خالص خالص
الراجل البيرسم وواقف قدام الجدارية
ده بيشبه لي صديق عزيز جداً ربنا يرحمه
وفنان جداً اسمه عادل تنقو
انا متاكد انو ده ما هو بس الشبه عجيب
لدرجة توجع القلب اذا كان المشاهد يعرف
عادل تنقو .
لك كاملة المحبة
ولذكرى عادل تنقو وميض لن يخبو.

Quote: الراجل البيرسم وواقف قدام الجدارية ده بيشبه لي صديق عزيز جداً ربنا يرحمه وفنان جداً اسمه عادل تنقو

يعني ده ما عوض حسن و للا شنو؟؟
الحقنا يا فرناندو..

Quote: يعني ده ما عوض حسن و للا شنو؟؟ الحقنا يا فرناندو..

ابوالسيوف شنو ياخ
عوض قاعد ياخ ربنا يديهو الصحه والعافية

بس انت ركز معانا وبطل شغل الغتاته ده ههههههههه
بالاماره عاين انا تحت اقتباسك ده كاتب:-

Quote: انا متاكد انو ده ما هو بس الشبه عجيب لدرجة توجع القلب اذا كان المشاهد يعرف عادل تنقو .

كيف يا سيف ياخ اشواق اشواق
اللوتري كيف ؟

سفيان

الاخ سيف النصر

سعيد بالمرور مرة اخري

( يعني دا ما عوض حسن ولا شنو ؟؟
الحقنا يا فرناندو)

اهو شيخ فرناندو لحقك .. اياني انا عوض الفي البروفايل

اخي العزيز سفيان

سعيد بوجودك مرة اخري

الصورة الفي البروفايل دا انا وقتها كنت

اعمل مدرسا للفنون بمعهد معلمات جنزور بليبيا،ايام الزمن الجميل

الاخ المرحوم عادل تنقو اعرفه جيدا انسان جميل ورائع كان في الدفعةالثالثة

وقتها كنت انا في سنة اولي . بكيت كثيرا لسماع خبر وفاته.حال الدنيا.

لك حبي مرة اخري

ودمت سعيدا

*

عدد واحد " فوق " لعناية الفكي فرناندو

وانا كمان مع حمور وهاك اتنين فوق،
عشان كلامك الحلو ده يستاهل يكون
مش فوق وبس لاكين فوق عنوان المنبر
(ظاطو)0
وتسلم يامبدع0

Quote: فيك حسرة وعليك حسرة ركبت دروب سرج مقلوب أناك نكرة وغناك نكرة شن راجيهو من بكره وصدي الذكري شن راجيهو من بكرة وصدي الذكري "

يا عوض يا صديقى
بكرة اجمل
بكرة احلى
بكرة وبكرة
ما تحلم بغير باكر
بلاش الحسرة والنبرة التمرق الروح
خليك متفائل
ونقوم نداوى جروحنا يوم باكر
عليك الله ما تحزن

سلمي الشيخ ( البت الشربت موية النيل)

تعرفي ياسلمي العبارة البين قوسين برددا كتير

مرتبطة في اخلاقياتي بكل انسانة عظيمة سودانية .

بالنسبة للحزن منذ وفاة أمي1990 التي لم احضرها

صار الحزن رفيقي الحميم واصبح شئ طبيعي .

تعرفي ياسلمي كلما اسمعك او اقرأ لك احس بأن

الحياة لها وجه اخر جميل يمكن ان نتصالح معها

بقية الايام الفضلت في قعر الزمن.

لك حبي ثمّ حبي ثمّ حبي

الحبيب صلاح الاحمر

لعلك بخير

ياخي طولت ماشايفك في المنبر

امكن انا عميت والكبر دخل ولا الحاصل شنو

شكرا علي الكلام الرفيع

سعيد بوجودك

لك عميق حبي

(( ثم فاضت الامه بركانااحرقت حممه بحر القصيد،وفرّ حرف الروي ينجو بنفسه....وأمامه اشتعلت الاوراق
وحين صارت رمادا نظر اليها فراي الاسم الجليل مكتوباعليها....
سلمي....)) "حمور زيادة"


يالشيخ حمور تثبت لي قصايدي في الصفحة الاولي

رغم انو الدنيا هكر و الجو مطر لكن بالرغم من كل ذلك غامرنا و رفعنا البوست
يا عوض حسن...تقول شنو... ماااا برانا...دي بركات شيخك .

Quote: الحبيب صلاح الاحمر لعلك بخير ،ياخي طولت ماشايفك في المنبر ،امكن انا عميت والكبر دخل ولا الحاصل شنو ؟ شكرا علي الكلام الرفيع ،سعيد بوجودك ،لك عميق حبي

الصديق عوضحاشاك من العمى ، ولو، تكفي بصيرتك المجلوة كبلور شفيف0
قرأتك ثانيا وثالثا وماكلت مراكبي في يمك العذب الفرات0
سعدت بك مثلما فرحت باضافة مبدع إلى قائمة مانحي
الأدرنالين لأجسادنا المنهكة من وعثاء الدروب ووعورة
(الدراب) في هذا المكان0ومحزن حد النحيب أن تمر كثير
من الأشياء الجميلة في هذا المنبر دون احتفاء لمجرد
أن أصحابها لا شلل لهم، شلت أيدي كل( عبيط وتليف وعوير)0
لك صــــــــــــــــــــــــــــــــادق مودتي،،،،

Quote: الصديق عوضحاشاك من العمى ، ولو، تكفي بصيرتك المجلوة كبلور شفيف0 قرأتك ثانيا وثالثا وماكلت مراكبي في يمك العذب الفرات0 سعدت بك مثلما فرحت باضافة مبدع إلى قائمة مانحي الأدرنالين لأجسادنا المنهكة من وعثاء الدروب ووعورة (الدراب) في هذا المكان0ومحزن حد النحيب أن تمر كثير من الأشياء الجميلة في هذا المنبر دون احتفاء لمجرد أن أصحابها لا شلل لهم، شلت أيدي كل( عبيط وتليف وعوير)0 لك صــــــــــــــــــــــــــــــــادق مودتي،،،،

الاخ العزيز صلاح الاحمر

لك عامر الحب .

خفف علي عنقي الضعيف وأتئد اني رايتك اخذ بخناقي
"بشارةالخوري "


تجدني عاجزا تماماعن مجاراة حروفك الشفيفة وعذب حديثك

يكفيني زهوا ويشرفني قراءتك لي ومعرفتي بك .

أكرر حبي

( رغم الدنيا هكر والجو مطر لكن بالرغم من كل ذلك غامرنا ورفعنا البوست
ياعوض حسن... تقول شنو..ماااابرانا..دي بركات شيخك . )

الاخ سيف النصرمحي الدين

ما قولنا ليك ...ترن ..ترن ... ما قولناليك ..ترن..ترن

جيت براك..ترن ..ترن

أنا خايفك تحقص في بوستي ليوم يبعثون

بالمناسبة عندي شغل حايعجبك جدا لو كنت بتحب الشعر الدارجي وحا تقرأ فيهو سنة كاملة

نزل في المنبر بعنوان ( كلام في الزمة علي لسان السرة بت محمود وحامد ود الطفح ) ولسع مستمر

علي ا لعموم شكرا لرفع البوست

لك كل الحب

الدرب الاضلم ليالي صباح
والاهو التعب في قلبو نام مرتاح
جرحنو المحن زادن جراحو جراح
في بدايتو الدموع
آخر نهايتو نواح

الأخ عوض..لم استطع الاستماع للقصيدة على موقع الزول مزيكا لأسباب تقنية لكني حتما
سأعود للاستماع اليها...لسبب ما كنت -و لا زلت- افضل الاستماع للشعر و خصوصا عندما
يلقيه شاعره و في ظني أن المتعة هكذا ستكون اكبر من تلك التي تحصل عليها بالقراءة.
عموما إن كان بامكانك رفد هذا البوست بمقاطع منها ستجدنا من الشاكرين.

Quote: الأخ عوض..لم استطع الاستماع للقصيدة على موقع الزول مزيكا لأسباب تقنية لكني حتما سأعود للاستماع اليها...لسبب ما كنت -و لا زلت- افضل الاستماع للشعر و خصوصا عندما يلقيه شاعره و في ظني أن المتعة هكذا ستكون اكبر من تلك التي تحصل عليها بالقراءة. عموما إن كان بامكانك رفد هذا البوست بمقاطع منها ستجدنا من الشاكرين.

الاخ سيف النصر محي الدين

لك التحايا

القصيدة نازلة في alzol.com مسموعة

عموما سأحاول انزالها هنا.

لك وافر الحب