Post: #1 Title: عضوه جديده, خايفه من الكتابه !!! Author: Amany Elamin Date: 01-28-2009, 09:23 AM Parent: #0
السلام عليكم ورحمة الله تعالي وبركاته الأخوه والأخوات الأفاضل
قام الأخ بكري أبوبكر مشكورا بقبولي للمشاركه في البورد.. حدث هذا قبل يومين من التهكير (يعني يا فرحه ما تمت).. ولأني من المتصفحين الدائمين والمتابعين متابعه لصيقه للبوردلأكثر من سنتين, كان طلب مشاركتي بناءا علي رغبه مني (بعد تردد طويل) في طرح أفكاري و التداخل في العديد من المواضيع الثره التي يتم طرحها..
لغاية هنا كله تمام..
المشكله أني كل ما أود أن أفتح بوست أو أتداخل بتجيني حالة بتاعة رعب ما عاديه.. يعني بفتح الصفحه حقت التداخل و بقهي ...
بقعد أتذكر ناس فلان وفلان الماحيعجبهم كلامي, وناس كده حيمصمصوا شفايفهم لما يقروا لي, وناس تانين حيطلعوني ظلاميه, وفي نفس الوقت حأتصنف معارضة ضل بارد عند ناس تانين.. ولو كتبت قصه وللا موضوع بعيد عن السياسه أحتمال يجوني ناس تانين برضه أنا عارفاهم و يطلعوني من فصيلة القلم مابزيل بلم.. أها بعد داك أنا بحب الكوره.. معناتها لو هلالابيه وللا مريخيابيه في الحالتين رشاشه وتبع الصهاينه.
تصدقوا أول مداخله عملتها كانت في بوست عزاء لزميل لي, جيت الليله لقيت مداخلتي الوحيده القدرتها أعملها بقلب جامد (لأنه دا زميلي و مافي زول حيغالطني فيه) مسحها الهكر ماعارفه ليه؟ عليكم الله ده مش رعب...
المشكله أنه الحاله دي لو أستمرت كتير, أحتمال كبير أرجع الباسورد لصاحبه ويادار مادخلك شر..
هسي أنا بكتب في الكلام ده وخايفه, فيا جماعة الخير محتاجه تشجيعكم, ونصائحكم..
أحترامي للجميع بدون فرز..
Post: #2 Title: Re: عضوه جديده, خايفه من الكتابه !!! Author: Yassir Bainwi Date: 01-28-2009, 09:31 AM Parent: #1
اول حاجة يا اماني مرحب بيك سم سانيا ما تلاوزي
Quote: تشجيعكم, ونصائحكم..
اها شجعت ( الشين مشددة ومضمومة والجيم والعين مضمومات كذلك والتاء ساكنة ) ونصحت ( نفس القصة )
خالص الود
Post: #10 Title: Re: عضوه جديده, خايفه من الكتابه !!! Author: Amany Elamin Date: 01-28-2009, 10:04 AM Parent: #2
الأخ ياسر بيناوي:
طبعا من شدة ماخفت لما لقيت ردك علي البوست, (باعتبارك أول متداخل), أظني طبزت حاجه غلط في اللاب توب, قام علق وأضطريت أقفل الصفحات كلها وغايتو.. شفت الرجفه دي كيف.. المهم الحمد لله لقيتك مشجع, وناصح..
شكرا,,
Post: #3 Title: Re: عضوه جديده, خايفه من الكتابه !!! Author: صلاح ليون Date: 01-28-2009, 09:31 AM Parent: #1
يازولة شوتي واسكتي ساكت ومحل ما تكتبي يمرررري
Post: #11 Title: Re: عضوه جديده, خايفه من الكتابه !!! Author: Amany Elamin Date: 01-28-2009, 10:10 AM Parent: #3
الأخ صلاح ليون:
شوت أكتر من البوست ده, هسي دي الحاله كلام الطير ساكت ومع ذلك الخوف كاتلني. ذاتو قدرته أرسلو كيف ما عارفه.
شكرا علي مرورك..
Post: #4 Title: Re: عضوه جديده, خايفه من الكتابه !!! Author: عبد الدائم سيد أحمد Date: 01-28-2009, 09:31 AM Parent: #1
امانى الامين قولى بسم الله
Quote: لغاية هنا كله تمام..
Post: #12 Title: Re: عضوه جديده, خايفه من الكتابه !!! Author: Amany Elamin Date: 01-28-2009, 10:14 AM Parent: #4
الأخ عبد الدائم سيد أحمد:
بسم الله الرحمن الرحيم لكن بيني وبينك الكتابه في البورد ده عايزه سورة البقره عديل.. يمكن الزول يترحمن شويه..
مشكور,,
Post: #31 Title: Re: عضوه جديده, خايفه من الكتابه !!! Author: فريد ودالمسيد Date: 01-28-2009, 11:47 AM Parent: #12
أماني الأمين .. حبابك مليوووون .. إزيك ..أنا برضو كنت زيك كدا .. لكن اهو الأمور بتمشي في النهاية .. بس خليك كوووول خالص .. ولو زول هاجمك .. طنشي .. لأنوالمشكلة كلها بتكمن في البوستات السياسية .. وإنتي عارفة إننا نحن أكتر شعب منظر في السياسة.. برغم فشلنا السياسي على مر الدهور .. بنتكلم بس لكن مافي عمل.. وزمان قالها سجيمان ..لو الواحد عايز يدخل سودانيز أون لاين من الصباح لازم يكون شايل عكازو معاهو..
المشكله زولتك النوع الحسحاس شديد (حسحاس دي من يتحسحس وكده),, هسي جبت سيرة العكاكيز القعده غلبتني,
شكرا ,,
Post: #5 Title: Re: عضوه جديده, خايفه من الكتابه !!! Author: خضر حسين خليل Date: 01-28-2009, 09:32 AM Parent: #1
أولاً بتمني ليكي إقامة طيبة ومعقولة في المنبر يا زولة أكتبي ساي السوق هنا كعب شديد أهو يمكن تمرقينا من الحاصل دة ، نصيحة ما تشتغلي بالآخرين خصوصاً (ترزية) المنبر وحاولي قدر قدرتك إنك تكوني إنتي يعني ما زول أو زولة غيرك إحساس الخوف دة شيليهو بعيد البشرية دي كلها لو عملو زيك ما كان في زول جر حرف هنا لكن زي ما قلت ليكي السوق كعب وممكن تكوني سبب في إصلاح الحال
أبقي داخلة !
Post: #6 Title: Re: عضوه جديده, خايفه من الكتابه !!! Author: سيف الدين علي محمد الفاضل Date: 01-28-2009, 09:45 AM Parent: #5
الأخت/ أماني
مرحب بيك في المنبر وزي ما قال ليك أخونا خضر شيلي الخوف من قلبك وأكتبي زي ما عايزة المنبر ده زي سوق البصل كل واحد بعرض بصلو وما تشيلي هم ، بس لو سألتك قلت ليك لما إمتحنت الشهادة كنت خايفة ؟ ختي الرحمن في قلبك ونحن معاك
مع تحياتي
Post: #20 Title: Re: عضوه جديده, خايفه من الكتابه !!! Author: Amany Elamin Date: 01-28-2009, 10:35 AM Parent: #6
الأخ الفاضل: سيف الدين الفاضل:
بعد التحيه,,
سوق البصل يعني كيف, يعني سوق وكلله بصل ..
لا ياخ في فواكه, وفي خضار, وفي واحد بيبيع أكياس و في برضو البوليس بتاع بسط الأمن الشامل, وفي حراميه مره مره بيختفو ليهم حاجه ويجروا (زي الهكر), وكده,,
بعدين أمتحان الشهاده بيدوك نتيجتك وخلاص, لكن هنا بعد النتيجه في جلد..
مشكور,,
ملحوظه: انتو الوشوش بتجيبوها من وين؟
Post: #45 Title: Re: عضوه جديده, خايفه من الكتابه !!! Author: سيف الدين علي محمد الفاضل Date: 01-28-2009, 12:40 PM Parent: #20
سوق البصل يعني كيف, يعني سوق وكلله بصل ..
لا ياخ في فواكه, وفي خضار, وفي واحد بيبيع أكياس و في برضو البوليس بتاع بسط الأمن الشامل, وفي حراميه مره مره بيختفو ليهم حاجه ويجروا (زي الهكر), وكده,,
بعدين أمتحان الشهاده بيدوك نتيجتك وخلاص, لكن هنا بعد النتيجه في جلد..
الأخت/ أماني
يا ستي سوق البصل تلقي واحد يبيع بالكوم والتاني بالكيلة وآخر بالربع وغيرو بالملوة عشان كده المنبر بقول عليه سوق بصل لكن زي ما قلتي برضو فيه فواكه وخضار وأكياس وأنا إن شاء الله من الناس البجو شايلين أكياس مش عشان يبيعوها لا عشان يخمو الفواكه دي والخضار من ناس أماني . أما ما قلتيه عن إمتحان الشهادة صاح ليها نتيجة وما تخافي هنا مافي جلدولا غيرو والبتعده حدودو صوت عنجنا موجود .. يلا ربنا يوفقك وتتحفينا بالدرر الغوالي ونحن في الإنتظار
مع تحياتي ومودتي
Post: #16 Title: Re: عضوه جديده, خايفه من الكتابه !!! Author: Amany Elamin Date: 01-28-2009, 10:22 AM Parent: #5
ألأخ خضر حسين خليل:
شكرا لترحيبك, من المتابعين بأعجاب لكتاباتك.. مبروك الخامس..
هسي بمبروك الخامس دي أحتمال أكون أتصنفت شيوعيه عند ناس كتار, مش لي حق ألاوز, غايتو أحتمال أجي راجعه أمسحها بعد شويه,,
شكرا,,
Post: #7 Title: Re: عضوه جديده, خايفه من الكتابه !!! Author: elameen Date: 01-28-2009, 09:45 AM Parent: #1
الاخت اماني مرحب بيك في حوش بكري... وبعدين يااختي شوتي ساي والله هنا الناس شايتنها مصنقعة وفي الاخر اخدو وسام المناضلين... وفي ناس شايتنها ولا عارفين بكتبوا في شنو اخدوا وسام ايضا. وفي ناس الواحد يفتح بوسط ويضع نقطة وتلقي الردود بالكوم.. اهم شي قبلي ما تشوتي حاولي اعملي ليك اتفاقيةمع مجموعة من البورداب تتفقي معاهم يردوا ليك في كل بوسط وذلك بالمثل وحتى لو ما كتبتي ولا دخلتي المنبر يلحقوك وين اماني مشت واماني طولت .........
وظلامية والاسامي الثانية دي منتظرك وهذا اضعف الايمان.
تحياتي امين
Post: #28 Title: Re: عضوه جديده, خايفه من الكتابه !!! Author: Amany Elamin Date: 01-28-2009, 11:34 AM Parent: #7
الأخ الأمين:
أهلا بيك, والله ضحكتني شديد, تصدق أنه أنا دخلت المنبر ده مابعرف فيه ولا زول معرفه شخصيه, بس متمنيه أطلع منه بصداقات طيبه وعلاقات أخويه.. القروبات دي بتذكرني الجامعه الجامعه..
شكرا,,
Post: #8 Title: 1 Author: Deng Date: 01-28-2009, 09:51 AM Parent: #1
Post: #15 Title: Re: 1 Author: خالد علي محجوب المنسي Date: 01-28-2009, 10:19 AM Parent: #9
الأخت الفاضلة عبري عن رأيك بكل حرية وشجاعة وفي نهاية الأمر مهما اتخلتفنا نظل اخوان والأختلاف لا يفسد للود قضية في فهم الواعية/ الواعي المدرك للغياية التي من أجلها نعبر في المنبر عنما في نفوسنا ودواخلنا
نصيحتك غاليه, وأختلافنا كسودانيين أون لاين هو أجمل حاجه في البورد, زي ما أجمل حاجه في الوطن السودان أنه بيشمل كل التباين والتنوع ده, التنوع اللي ربنا قال عليه:" انا جعلناكم شعوبا وقبائل لتعارفوا".. يبقي الأختلاف في المنبر فطره لو أمتزجت بتعارف وتالف نكون حققنا حكمه الهيه,,
والله أنا مما شفت الرد حقك القعده غالباني, غايتو قمت وقعدت كم مره, ومشيت أشتغلت شويه وعملت حاجات كتيره خلاص.. يعني أنا لو قايلاك شخصيا كده بترحب بي, كان غلبني أكتب البوست ده ذاتو..
المهم عندنا كلام كتير لقدام..
أحترامي,,
Post: #13 Title: Re: عضوه جديده, خايفه من الكتابه !!! Author: Mustafa Satti Date: 01-28-2009, 10:16 AM Parent: #1
اخت امانى مرحب بيك وبدايه موفقه إن شاء الله
Post: #17 Title: Re: عضوه جديده, خايفه من الكتابه !!! Author: Hassan Makkawi Date: 01-28-2009, 10:27 AM Parent: #13
عندنا في علم الوراثه واحد زي جاليليو ده, أسمه جريجور مندل,, أفني عمره في أبحاثه الصغيرة في حديقة الدير على نباتات البازلاء وزهورها وبذورها, ولم يعرف أحد عنه شيئا حتي مات, نشر أبحاثه عام 1866 ليعثر عليها العلماء ويجعلوا منها أساسا لعلم الوراثه التقليديه عام 1900
والله عندي حكايات كتيره خلاص, مما بكري أداني الباسوورد طشت,,
بقت عندي متلازمة فتح الصفحه والقهيي,,
خوف شديد بعيد عنك,,
شكرا علي مرورك,,
Post: #18 Title: عضوة جديدة .. خايفة من الكتابة Author: سمير شيخ ادريس Date: 01-28-2009, 10:28 AM Parent: #1
الزميلة أماتى ألف مرحب بيك وفى انتظار أول كتاباتك ( بدون خوف )
Post: #48 Title: Re: عضوة جديدة .. خايفة من الكتابة Author: Amany Elamin Date: 01-28-2009, 01:06 PM Parent: #18
الأخ سمير:
شكرا علي الترحيب
Post: #19 Title: Re: 1 (Re: Deng) Author: شهاب الفاتح عثمان Date: 01-28-2009, 10:34 AM Parent: #1
حبابك يا غـــاليه مرحب بك في المنبر..طــله جديده و امــــل اكثر واكثر _______________________________________________
ليتهم يعلمون ان عمر اللحظـه في بعـدك يا خـرطـوم سنين طـوال. د شهـاب الفاتح ـ كوالالمبـور
Post: #22 Title: Re: Re: 1 (Re: Deng) Author: عبدالكريم الامين احمد Date: 01-28-2009, 10:43 AM Parent: #19
هلا يا اخت اماني الامين وحبابك ومرحب بيك في سودانيز اونلاين.. ويازولة زي ماقال ليك صلاح الليون شوتي واكتبي عقلك وجدانك وماتشيلي هم وتسلحي بشجاعة الدفاع عن ارائك ان كنتي علي صواب ومرونة الاعتذار وامتصاص الخلاف وتحويله الي امر ايجابي بكل اريحية... كوني اماني كما تعرفين روحك فحتما سيكتب لك النجاح باذن الله
Post: #29 Title: Re: شوتى Author: فيصل محمد خليل Date: 01-28-2009, 11:41 AM Parent: #26
Quote: مبروك الخامس..
هسي بمبروك الخامس دي أحتمال أكون أتصنفت شيوعيه عند ناس كتار, مش لي حق ألاوز, غايتو أحتمال أجي راجعه أمسحها بعد شويه,,
طلعتي شيوعية و الدليل
آلولو.
مرحبآ بك على متن السفينة
Post: #34 Title: Re: شوتى Author: abdelhadi ibrahim Date: 01-28-2009, 11:53 AM Parent: #29
أماني سلام ولي قدام أول حاجة انا جديد (لنج) بالمنبر زيك كدة .. مرحب بيننا وبينهم ..
الحاجة التانية : انا غايتو ما كنت متردد أصلاً في الكتابة لأني طلبت العضوية بكامل قواي العقلية ( يعني عندي كلام عايز أقولوا هنا ) وانت كذلك في تقديري الخاص عندك أفكار ورؤى كثيرة جداً وخصوصاً وانت من رواد المنبر قبل فترة حسب ما ورد في حديثك .. عشان كدة نحن كلنا أمل في أن ترى هذه الأفكار النور من خلال بوابة سودانيزاونلاين ..
مشكور علي شجاعتك, وعلي تشجيعي,, ما كان حيكون عندي أحساس بالخوف, لوما كنت متابعه ,, السودانيين بقو مامستحملين بعض,, روحهم حرقتهم خلاص,, ما في زول عايز يسمع غير رايو, ده غير الأستخفاف بالغير,,
أهلا بيك, السفينه ياتها, غايتو لو حقت سودانيز أون لاين يا هلا,,
الشيوعيين يستحقوا التبريكات,, بعد ما كان مافي زول بيقدر يلمح لي أنه هو شيوعي, بقوا يعملو مؤتمر في قاعة الصداقه,, وكمان بقيت الأحزاب السياسه تشارك,
الجدير بالأشاده التجربه في حد ذاتها لأنه الناس مابقت تخاف تعبر عن ارائها,
وده نفس الحصل لما الناس طلعت ملايين في تشييع السيد أحمد الميرغني, ديل قالو للناس نحن أتحاديين وختميه بالصوت العالي, وكان معاهم بقيت الأحزاب السياسيه برضو..
ونفس الحصل لما ناس دال وكجبار وقفوا قدام الوالي بمنتهي التحضر وهتفوا هتافاتهم وعبروا عن رأيهم,,
تاني مره الأشاده بأهلناالنوبه علي مواقفهم القويه والمتحضره,,
لما بشوف الفيديو بتاع الوالي ولاللسد, بحس أنهم بالجد رجال,, عارف من النادر أنك في السودان تشوف مظهر راقي زي ده,, يعني كتبو لافتات بوضوح وهتفوا من أماكنهم بشجاعه, لاعملوا شغب ولا شتموا زول, سمعوا صوتهم عالي للناس..
أما حكاية معارضه وظلاميه فما لازم أكون تبع ديل وللا ديل,,
أنت عارف أني كتبت الكلام ده علي سبيل الجمع بين المتناقضات لاأكثر..
بالجد سودانيز أون لاين عندها رهبه, المتصفح للبورد بيحس بيها لما يجي يكتب, وأقرب مثال التصحيح اللغوي الدقيق من بعض الزملاء, والمسائله القويه عند الخطأ, غير المتخصص (زيي كدا) لازم يعد من واحد لألف وبعدين.. تاني يعد...
اهلا بيك كتير ومنورة المنبر .. اها بعد ده حبيبه نجى لحكاية التعامل فى المنبر لو قعدتى تفكرى بالطريقة تاكدى انك ماهتكتبى حرف .. وان كان انا هسه شايفه انو البوست ده ذاتو فى حد نفسو زى مابيقولو تحرر من الحاله العندك .. اكتبى رايك الانتى مقتنعه بيهو وشايفه انو بيعبر عن قنعاتك وختى فى راسك وانتى بتكتبى انو المنبر ده ماحق ناس محددة صاحبو بكرى ابوبكر بس واحنا كلنا ضيوف عندو كتر الف خيرو.. وفى الحالة كلنا متساويين قديم على جديد فى الحقوق نملك حق ابداء الراى حتى وان لم يعجب الاخريين .. طالما قلنا راينا بدون تجريح وتاكدى مافى اى مصمصة خشم ولاحاجه والعايزة ولا العايز خليهو انتى البيهمك انك تكتبتى المقتنعة بيه وبس .. تسلمى من كل شـر يارب ...
Quote: المشكله أنه الحاله دي لو أستمرت كتير, أحتمال كبير أرجع الباسورد لصاحبه ويادار مادخلك شر..
.. رجعيو.. المانعك شنو عليك الله ما ترجعيو ..؟ اموووت واعرف بكري بجيب زي ناس اماني ديل من وين ..؟ قالت تفتح البورد وتقعد مقهية .. وفي ظرف يومين كاتبة ليها خمسين رد .. يعني كان قعدتي يومين تاني بكري يسجل ليك الصفحة بتاعت تحميل الصور دي واللا شنــو..؟ اكيد كــوزة الزولة دي .. اصلو الجلابة والجلابيات من ما يجو البورد دا الواحد/ة ( ) تتمسكن بعد يومين التقول البورد دا حقها .
هسي حتقول الزوله دي بتعرفني من وين؟؟ والله أنا ضحكت جدا لما قريت مداخلتك,, أنت من الكتاب اللي أنا ما بفوت ليهم بوست أبدا,, أسلوبك بسيط, سلس وجميل, وأحسن حاجه صراحتك دي,
طيب يا سيدي, أول حاجه البوست ده, أول فرصه لي أنه الناس اللي أنا كنت بقرأ ليهم ,ومعجبه بكتابتهم (زيك كدا), أتعرف بيهم, ويتكلموا معاي وكمان يشجعوني, (شفت الهنا اللي أنا فيه),, يبقي لازم أي زول كلف نفسه مشقة أنه يكتب نصيحه أو يشجعني ساكت, أرد عليه وأسمع نصيحته, وأعلق عليها كمان..
زي الكتابه دي مابتخوف لأنها زيها وزي التعامل العادي مع الناس, ما صعب,,
لكن الصعب انك تقول لي زول أنا بختلف معاك, أو انت في الحته دي ما صاح, أو أنك تقول لي زول قضيتك الأنت مؤمن بيها دي من وجهة نظري المحدوده,, ما عادله,, والأمثله كتيره وأنت سيد العارفين,,
ما عارفاك جادي وللا ما جادي في حكايت كوزه دي, لكن ماتتسرع في أنك تحكم علي الناس,, خبرتك في البورد أنا محتاجه ليها, وصراحتك برضو, عشان كده خليك قريب,,,
Quote: ولقد نشأت الحياة وسط الخوف.. قال تعالى في ذلك: ((لقد خلقنا الإنسان في كبد)) والكبد المشقة، ولقد دفعت هذه المشقة، التي وجدت الحياة نفسها محاطة بها، الخوف في أعماق الأحياء.. ولولا الخوف لما برزت الحياة، في المكان الأول، ولما ارتقت وتطورت، في المكان الثاني. ثم هي إن لم تنتصر على الخوف، في آخر المطاف، لا يتم كمالها.. وإنما تنتصر الحياة على الخوف عندما تقوى الحاسة السادسة (وهي الدماغ.. ووظيفتها الادراك المحيط، والموحد ((بكسر الحاء) لمعطيات الحواس الأخرى - اليد، والأذن، والعين، واللسان، والأنف - في الحس، والسمع، والبصر، والذوق، والشم.. فإذا قويت يكون إدراكها لكل شئ عظيم الشمول، فكأنها تحسه، وتسمعه، وتراه، وتذوقه، وتشمه، في آن واحد)، وتدرك الأمر على ما هو عليه، على النحو الذي وصفنا، ويومئذ سيظهر لها أن الخوف إنما هو مرحلة صحبت النشأة في إبان جهلها، وقصورها، وأنه ليس هناك ما يوجبه في حقيقة الأشياء.. فإذا بلغت الحاسة السادسة هذا المبلغ، انبسطت الحاسة السابعة - القلب - واطمأنت، وانطلقت من الانقباض الذي أورثها إياه الخوف، وأخذت تدفع دم الحياة قويا إلى كل ذرات الجسد، وكل خلايا الجلد، تلك التي كان الخوف قد حجرها، وجعل منها درقة، ودرعا لصيانة الحياة البدائية.. وبذلك يعود الشعور لكل الجسد، ويصبح حياً كله، لطيفاً كله، جميلا كله، غاية الجمال..
(أنا خايف) لأني لو قلت ليك الكلام ده جبتو من وين الهاكر ح يجي يدخل هنا وبوستك ده في الخور ما حا تلمي فيهو..
ولو أبديتي اعجابك بيهو يمكن يقطعوا راسك!
لكن أكيد في ناس كتيرين (مصنفين ومنبوذين) حافظنو عن ظهر قلب!
Quote: النفوس كان اتطايبت البورد بشيل عادي,, خلي الناس تكتب وتمتعنا, علي فكره التصفح ده جميل خلاص, ما بتكون شايل هم أي حاجه, بس عايز الناس تكتب وتبدع ,,
شكرا علي الهديه التشجيعيه,,
...
Quote: حبابك الف اكتبي سااااي ما تخافي
...
مرحب بيك امانى .. مدخل مناسب
عفوا خضر ونعيم
وشكرا ًبرضو ..
..
.
Post: #64 Title: Re: حبابك Author: عبدالوهاب علي الحاج Date: 01-28-2009, 03:03 PM Parent: #59
Quote: أيوه والله أماني بتاعت الصين,,
يا اماني اهااا ممكن تكتبي لينا عن القهاوي في الصين بدون خوف صحي الجرسون بيقول :( وعندك الفين شاي وصلحو )
أماني الأمين كيف حالك وجيداً جيتي والبيت بيتك أستريحي لي قدام بس جيتك أتزامنت مع الهكر يا كافي البلا
Quote: كان طلب مشاركتي بناءا علي رغبه مني (بعد تردد طويل) في طرح أفكاري و التداخل في العديد من المواضيع الثره التي يتم طرحها..
ونحن منتظرين أفكارك عشان نقوم نصنفك أنت تابعة لأي جهة أحزاب التوالي ولا الحركات المسلحة ولا معارضة الضل البارد لازم نعرفك لازم نعرفك مافي طريقة وهل أنت من الهامش والمركز منتظرين التصنيف الخاص بك .
Quote: المشكله أني كل ما أود أن أفتح بوست أو أتداخل بتجيني حالة بتاعة رعب ما عاديه.. يعني بفتح الصفحه حقت التداخل و بقهي ...
والله يا أماني الحذر واجب في إبداء طرح الرأي أصلو في ناس في المنبر دا لو أشربكوا فيكي أحلك منهم رب العالمين .
Quote: أها بعد داك أنا بحب الكوره.. معناتها لو هلالابيه وللا مريخيابيه في الحالتين رشاشه وتبع الصهاينه.
أها يا أماني مافي طريقة إلا أن تفصحي عن نفسك رشاشة ولا صهيونية يعني أنت مع محمد عادل ولا مع هارون دياب بلاهي لو سمحتي جاوبي بسرعة سؤال لا يتحمل التأخير .
الليلة شيلي شيلتك يا أماني تشبهي أخونا الهكر بالحرامية السواد والسجم على باسوردك . . أماني والله الكلام الفوق دا كلوا عبارة عن مزح ساكت بمزح معاك ما تزعلي وحبابك مليون ونتمنى أن تكوني إضافة حقيقية للمنبر والكل هنا إخوة
المنبر حافل بناس مثقفين ومتخصصين وليهم خبره طويله في المجال ده, وده المخوفني, زولتك أول مره تكتب في بورد, أتخيل, هسي في شجاعه أكتر من كده,, أول مره وفي سودانيز أون لاين شخصيا,,
يا الف مرحب اختى امانى الامين وإياكى والخوف من اى شئ (وش كلو رجاااااااااااااااء)
كل التحايا
شول اشوانق دينق _____________________ جينا بدون تراحيب والله يا امانى ياخ تصدقى!!!
Post: #76 Title: Re: عضوه جديده, خايفه من الكتابه !!! Author: كمال سالم Date: 01-28-2009, 09:41 PM Parent: #74
ألف مرحب بيك يا أمانى ,, وأدخلى ساى المسأله مامحتاجه كل الرهبه دى ,, يمكن إنت تكونى أحسن من كتيرين هنا ,, بس طلب عاجل قبل ما تعملى أى حاجه , أركبى ليك حافله ولا بص ولا رقشه وأمشى جيبى لينا دوما وتعالى . طالما إنت فى الصين ,, يلا منتظرنك ,, تحياتى ,,
Post: #92 Title: Re: عضوه جديده, خايفه من الكتابه !!! Author: Amany Elamin Date: 01-29-2009, 03:35 AM Parent: #76
الأخ كمال سالم:
أنا ذاتي عايزه أوصل دوما وألاقيها,,
مش يمكن تعقلني وتخليني أغير رأيي, وأجلي موضوع الكتابه ده,,
شكرا علي الترحيب,,
Post: #90 Title: Re: عضوه جديده, خايفه من الكتابه !!! Author: Amany Elamin Date: 01-29-2009, 03:32 AM Parent: #74
أهلا أهلا: شول اشوانق دينق حبيب الكل شخصيا,
لما بقرأ ليك, روحك الطيبه والتسامح اللي أنت قاعد توزعه علي الناس هنا, بيخلوني أقول يارب لو في بس 10 زي شول ده في جنوب سوداننا الحبيب, حنكون دايما مع بعض حاجه واحده,
لكن عارف يا شول, في,, كتاااار أنا بعرفهم,, كلهم طيبه وتسامح,
عشان كده حقو نتفائل أنهم يغلبوا الناس اللي عايزين يفصلوا جنوبنا عن الشمال,
من جوه أو من بره,
تحياتي وأحترامي,,
Post: #77 Title: Re: عضوه جديده, خايفه من الكتابه !!! Author: محمد الطيب يوسف Date: 01-28-2009, 09:59 PM Parent: #1
أماني مبروك الباسويرد
عشان أمورك تمشي في المنبر ده لازم تكوني واحد من الحاجات دي
معارضة منضالة من الدرجة الأولي وتشبي لي أي زول في حلقو وهاك
يا خفيفة وشليقة وظريفة وهنا حيطبقو عليك الرشاقة الكتلت إشراقة والهكر لو لما في مسنجرك
دي مامسؤليتي
أها يا تسوقي الدلال علي الجماعة وبوستاتك تكون من نوع وصفوا لينا بيتكم وأقعدوا أشربو قهوة وقهوتك جنزبيلا كتير فمعروف في المنبر ده القهوة والدلال بتلم النحل والنحل بقرص
في النهاية الأقلام المحترمة والتي تلقي الإحتفاء الذي يعادل ماتخطه تعد علي أصابع اليد
خشي لي جوة وإتطقشي
سلام
Post: #93 Title: Re: عضوه جديده, خايفه من الكتابه !!! Author: Amany Elamin Date: 01-29-2009, 03:38 AM Parent: #77
الأخ محمد الطيب يوسف:
غايتو نتوكل علي الله ونبقي لي جوه زي ما قالو,,
والتصنيف يجي لي قدام,
كلامك ميه الميه,,
مشكور
Post: #78 Title: عضوه جديده, خايفه من الكتابه !!! Author: سمير شيخ ادريس Date: 01-28-2009, 10:03 PM Parent: #1
Quote: أيوه والله أماني بتاعت الصين,,
امانى أمين معليش شكلك داخلة متنكرة للمنبر وما دايرة زول يعرفك بدليل اضافة الاف واللام لاسم أبوك وبقيتى أمانى الأمين بدل أمانى أمين الاسم ال عرفناك بيه فى جامعة الخرطوم .. لكن طبعا السودانيين شيالين حال .. لو مشيتى الصين ذاتها بعرفوك . واتأكدت انه دى انتى من اسلوبك فى الكتابة .. وماتخافى ما ح أفضحك مع الناس ديل وأقول ليهم البت أمانى دى على درجة من الثقافة والاطلاع وعندها تجارب مميزة فى مجال الكتابة واهتمامات عديدة بالأدب و( السياسة كمان ) بس الفترة طالت ما عارفك هسة ( سياسيا ) شايتة وين .. وكمان ما ح أقول ليهم انك دارسة فلسفة أيام جامعة الخرطوم كانت جامعة .. عشان كدة ما تخافى وسرك فى بييييييييير . بعد السنبن الطويلة دى غريب انى اتذكرتك الليلة قبل اقرا البوست حقك .. لقيت شهادة جامعية بتاعتك كان مفروض استلمها لسفرك . أمانى .. أهلا بيك تانى ( بتاعت معرفة ) المرة دى ومشتاقين .
امانى .... صحى الصين ... فيها حصين
Post: #94 Title: Re: عضوه جديده, خايفه من الكتابه !!! Author: Amany Elamin Date: 01-29-2009, 03:56 AM Parent: #78
الأخ سمير شيخ أدريس:
أولا: أنا أسمي أماني الأمين يعني بالألف واللام معرف.
ثانيا: أنا قريت في جامعة الخرطوم لكن ما فلسفه ولا اداب أصلا ولو قريت المداخلات الفوق حتعرف أني ما عندي علاقه بالمجال ده,
ثالثا: دي أول مره (والله علي ما أقول شهيد) أكتب في الملأ كده, يعني ما حصل كتبت والناس قرت لي, ما عدا أصحابي المقربين,
رابعا: قلت لي الفتره طالت, وأيام الجامعه كانت جامعه الغريبه أنا أتخرجت 2004
خامسا: طيلة فترة الجامعه أنا كنت من ناس القرايه, ولي هسه من ناس القرايه وحياتك يعني أركان زاتو مره مره, بس ده مابيمنع أنه يكون عند ارائي الخاصه,,
أخيرا: حقو قبل ما تتكلم بثقه كده تسألني كم سؤال يمكن تتأكد بيهم أنك بتعرفني بعدين تحكي الحكايه دي كلها,
بأختصار أنا ما عارفه أنت بتتكلم عن منو, لكن والله أنا مالزوله الأنت بتتكلم عنهادي,,
والحمد لله أنه د. وليد معانا هنا في البورد, ونعيم ديل علي الأقل شافوني وبيعرفوني,,
عموما أتشرفت بمعرفتك من هنا ولقدام,,
أحترامي,,,
Post: #84 Title: سلام Author: خالد العبيد Date: 01-29-2009, 03:09 AM Parent: #1
مرحبا بالأبنة أماني الأمين في رحاب سودانيز اون لاين إضافة جديدة لبورداب الصين علي قلتهم وشح مشاركاتهم بعد اختفاء قلم الحكيمة الأخت دوما وننتهز هذه السانحة لنناشدها بالعودة استجابة لنداءات عشاق قلمها ونقول لها "المنبر بعدك أصبح خلاء"
Post: #142 Title: Re: Salamat Author: خالد سمارة Date: 02-01-2009, 08:20 AM Parent: #103
امانى الامين الف مراحب اكتبى اكتبى كما تحبين .... منتظرينك ...
Post: #99 Title: Re: Salamat Author: El hadi A.bashir Date: 01-29-2009, 04:24 AM Parent: #96
Amany
I didnot rely or state my quiry because of certain circustances or someone said so and so..... I have no single doubt you are KOZAH
I think no need to cover your political affilation??? secondly, this web side full of all walks of colors
and welcome again ????????
Post: #101 Title: 1 Author: Deng Date: 01-29-2009, 07:32 AM Parent: #1
Quote: الأخ دينق:
والله أنا مما شفت الرد حقك القعده غالباني, غايتو قمت وقعدت كم مره, ومشيت أشتغلت شويه وعملت حاجات كتيره خلاص.. يعني أنا لو قايلاك شخصيا كده بترحب بي, كان غلبني أكتب البوست ده ذاتو..
المهم عندنا كلام كتير لقدام..
أحترامي,,
أماني.
واضح أنك مكونة فكرة معينة, طيب خلينا نمشي لقدام علشان نعرف الفكرة دي شنو بالضبط وما نسبق الاحداث.
دينق
Post: #102 Title: 1 Author: Deng Date: 01-29-2009, 07:42 AM Parent: #1
لما بقرأ ليك, روحك الطيبه والتسامح اللي أنت قاعد توزعه علي الناس هنا, بيخلوني أقول يارب لو في بس 10 زي شول ده في جنوب سوداننا الحبيب, حنكون دايما مع بعض حاجه واحده, لكن عارف يا شول, في,, كتاااار أنا بعرفهم,, كلهم طيبه وتسامح,
عشان كده حقو نتفائل أنهم يغلبوا الناس اللي عايزين يفصلوا جنوبنا عن الشمال,
من جوه أو من بره,
تحياتي وأحترامي,,
هههههه
أماني.
ده كلام شنو ده?
أنتي لسه جديدة وأنا بديك حسن الظن The benefits of the doubts
أبدا والله بس أنا بخاف من أمتحاناتك دي, ناس راجعي ورقتك, وشوفي أنتي غلطتي وين,,
المهم أنا قصدي أنه الأخ شول علاقاته طيبه وبينشر في المحبه.. وفي رائي المتواضع أنه التسامح والمحبه هم المطلوبين, وهم موجودين أصلا في أغلب الحالات, ولو قريت تحت شويه حتلقي انه قلت انه في كتاااار وأنا بعرفهم,, حكاية في 10 وفي 15 فهي لازمه تقال للشخص علي سبيل الأطراء, يعني أي زول رائع في أي مكان بيقولو ليه لو في 10 زيك يا سلاااام, وكده,,
المهم لو الكلام فيه خطأ أو زعلك,, اسفين يا سيدي, وخليك دائما في حسن الظن,,,
أحترامي
Post: #105 Title: عضوه جديده, خايفه من الكتابه !!! Author: سمير شيخ ادريس Date: 01-29-2009, 08:16 AM Parent: #1
أمانى الامين آسف للخلط بينك وأمانى أمين المقصودة ..والصدفة وحدها عى ال خلقت تشابه الاسماء .. ايضا أمانى امين مقيمة فى الصبن منذ فترة .. فاتخيلت انها هى ..شوفى السودانيين بقوا كتار فى الصين لدرجة تشابه الاسماء .. عموما صاحبتنا أمانى أمين فى الصين ولو انتى هناك فتشى عنها واعرفيها وهى انسانة اكثر من رائعة وجديرة بالعرفة .. ومنها تدينا خبرها المقطوع عننا من زمن . شكرا وبعتذر تانى للخلط فى الأسماء
Post: #115 Title: Re: عضوه جديده, خايفه من الكتابه Author: الوليد محمد الامين Date: 01-29-2009, 08:57 PM Parent: #113
العزيزة أماني
عدت الآن فقط لمتابعة هذا الخيط ,
وددت أن اتقدم باعتذاري كون السؤال عن الصين جاب ليك المشاكل والشبك دي ...
يعني كان ممكن أرسل ليك في ال e-mail وخلاص , لكن طبعا انا ما اتخيلت القصة ح تجر كدا ...
عموما أكرر ترحيبي بأماني الأمين التي لا علاقة لها بأماني أمين ولا بتخصص الدراسة المشار اليه .
.
Post: #120 Title: Re: عضوه جديده, خايفه من الكتابه Author: Amany Elamin Date: 01-30-2009, 04:51 AM Parent: #113
الأخت اسيا
والله متابعه لكن طبعا من بره ما زي من جوه
من ما دخلت رجلي بقيت أتلفت,,
زمان بقرأ وبطلع بالمضمون أو الخلاصه
لكن هسي جنس تدقيق
الكلام ده صعب شديد وحياتك
مودتي ومشكوره
Post: #116 Title: عضوة جديدة .. خايفة من الكتابة Author: سمير شيخ ادريس Date: 01-29-2009, 09:48 PM Parent: #1
و منو ال قال ليكم أمانى أمين ال قاصدها أنا ( كوزة ) بغض النظر عن اتجاهها يكفى انها كانت من شرفاء المقاطعة بالجامعة وضيعت سنة ريبيت من أجل قضية طلابية عادلة حول تصفية السكن والاعاشة وقاومت فى ظل قبضة السلطة الحديدية .. دة العرفتو من مزاملتها زمااان فى الجامعة. ومعليش يا أمانى الأمين لو جبت ليل الهوا
Post: #121 Title: Re: عضوة جديدة .. خايفة من الكتابة Author: Amany Elamin Date: 01-30-2009, 05:03 AM Parent: #116
الأخ سمير:
مداخلتك تلتها مداخلة الأخ El hadi A.bashir وقد قمت بالربط بين المداخلتين لأنه قام بذكر جامعة الخرطوم ايضا شعرت كأنه استقي المعلومه من كلامك خصوصا انه لا بعرفني ولا بعرفه
ولكن بعد توضيح الأمور واعتذارك زي ما قلت ليك كأنه ما في حاجه حصلت
بشكر د. وليد لعودته بما هو كفيل بفض هذا التشابه في الأسماء عادي يا دكتور وليد مشكور,,
Post: #122 Title: Re: عضوة جديدة .. خايفة من الكتابة Author: Deng Date: 01-30-2009, 09:02 AM Parent: #121
Quote: الأخ دينق:
يامرحبا,,
أبدا والله بس أنا بخاف من أمتحاناتك دي, ناس راجعي ورقتك, وشوفي أنتي غلطتي وين,,
المهم أنا قصدي أنه الأخ شول علاقاته طيبه وبينشر في المحبه.. وفي رائي المتواضع أنه التسامح والمحبه هم المطلوبين, وهم موجودين أصلا في أغلب الحالات, ولو قريت تحت شويه حتلقي انه قلت انه في كتاااار وأنا بعرفهم,, حكاية في 10 وفي 15 فهي لازمه تقال للشخص علي سبيل الأطراء, يعني أي زول رائع في أي مكان بيقولو ليه لو في 10 زيك يا سلاااام, وكده,,
المهم لو الكلام فيه خطأ أو زعلك,, اسفين يا سيدي, وخليك دائما في حسن الظن,,,
أحترامي
الاخت أماني.
أنتي كتبتي"لو في بس 10 زي شول ده في جنوب سوداننا الحبيب, حنكون دايما مع بعض حاجه واحده" كأنك هنا توحين بأن سبب المشكلة في السودان هم أهل الجنوب. كلامك ده واضح جدا يا اماني ولا يوجد له تفسير أخر رغم مبراراتك التي كتبتيها. عندما اعطيتك حسن ظني بك كنت اتوقع منك أن تتداركي ما كتبتيه ولكنك لم تفعلي ذلك
دينق
Post: #123 Title: Re: عضوة جديدة .. خايفة من الكتابة Author: عبدالوهاب علي الحاج Date: 01-30-2009, 09:13 AM Parent: #122
Quote: حكاية في 10 وفي 15 فهي لازمه تقال للشخص علي سبيل الأطراء, يعني أي زول رائع في أي مكان بيقولو ليه لو في 10 زيك يا سلاااام, وكده,,
اماني انت صااااااااح
Post: #124 Title: Re: عضوة جديدة .. خايفة من الكتابة Author: Amany Elamin Date: 01-30-2009, 09:31 AM Parent: #122
الأخ دينق:
طبعا أنا حسيت انه انت فهمت كده.. فقمت مسبقا بتوضيح ماأقصد.. وبالأعتذار لك عن أي فهم مغلوط يمكن أن تكون قد استنبطه,,
احترامي,,
Post: #125 Title: Re: عضوة جديدة .. خايفة من الكتابة Author: Amany Elamin Date: 01-30-2009, 09:40 AM Parent: #122
الأخ عبد الوهاب علي الحاج:
ده مش أول بوست لكن فيه كترت اعتذارات وسوء تفاهم غايتو الله يستر لي قدام
شكرا لتفهمك,,
Post: #126 Title: Re: عضوة جديدة .. خايفة من الكتابة Author: Muna Khugali Date: 01-30-2009, 10:26 AM Parent: #125
مرحب بك يا أماني..
اكتبي مايرضي فكرك وضميرك.. وكوني أنت..
كل سنه وانت طيبة..
Post: #127 Title: Re: عضوة جديدة .. خايفة من الكتابة Author: سارة علي Date: 01-30-2009, 04:53 PM Parent: #126
مرحب بيك..
Post: #128 Title: Re: عضوة جديدة .. خايفة من الكتابة Author: عبد المنعم سيد احمد Date: 01-30-2009, 05:20 PM Parent: #127
مرحبا بك اضافة طيبة لمبدعى البورد فانت صاحبة الدار ونحن هاهنا الضيوف وياهلا
Post: #131 Title: Re: عضوة جديدة .. خايفة من الكتابة Author: Amany Elamin Date: 01-31-2009, 06:04 AM Parent: #128
الأخ عبد المنعم سيد أحمد:
شكرا للكلمات الطيبه
وكرم أستقبالك
مشكور
Post: #130 Title: Re: عضوة جديدة .. خايفة من الكتابة Author: Amany Elamin Date: 01-31-2009, 06:01 AM Parent: #127
الأخت ساره علي:
ياهلا
مرورك أسعدني
مشكوره علي الترحيب
Post: #129 Title: Re: عضوة جديدة .. خايفة من الكتابة Author: Amany Elamin Date: 01-31-2009, 05:58 AM Parent: #126
أهلا بالملكه مني خوجلي
شكرا لترحيبك ونصيحتك الغاليه
Post: #132 Title: Re: عضوة جديدة .. خايفة من الكتابة Author: Dalal Ezzaldin Date: 01-31-2009, 09:04 AM Parent: #129
منوره يا اماني ..
شكلك زوله حبوبه الخوفه في المنبر دا في الاساس من الاحراج المتوفر بكثره
ما عليك ... قوي قلبك وبردي الاعصاب
Post: #133 Title: Re: عضوة جديدة .. خايفة من الكتابة Author: باسط المكي Date: 01-31-2009, 11:13 AM Parent: #132
اماني الف مرااحب ..اكتب واكتبي واكتبي كلنا ولاد حفرة انا زاتي جديد اكتبي ولا ترددي وكوني بخير
Post: #135 Title: Re: عضوة جديدة .. خايفة من الكتابة Author: Amany Elamin Date: 01-31-2009, 12:31 PM Parent: #133
الأخ باسط المكي
أهلا بيك
يعني احنا دفعه في المنبر
انشاءالله بالتوفيق
مشكور
Post: #134 Title: Re: عضوة جديدة .. خايفة من الكتابة Author: Amany Elamin Date: 01-31-2009, 12:23 PM Parent: #132
الأخت دلال عزالدين:
شكرا علي التشجيع
أتمني نكون دائما علي تواصل
سعيده بمعرفتك
Post: #136 Title: Re: عضوة جديدة .. خايفة من الكتابة Author: محمد المعتصم ابراهيم Date: 01-31-2009, 12:35 PM Parent: #134
مرحب بالزميله اماني
يا اخوانا انا مشتت ليكم سكر بهناك
والله في ناس سودانيز اوون لاين حقارين
ناس ماشه معاهم قندراني طحنيه وناس ولا دي
Post: #138 Title: Re: عضوة جديدة .. خايفة من الكتابة Author: Amany Elamin Date: 01-31-2009, 12:51 PM Parent: #136
Post: #137 Title: Re: عضوة جديدة .. خايفة من الكتابة Author: هشام آدم Date: 01-31-2009, 12:38 PM Parent: #134
الأخت : أماني الأمين
عارفة! أنا أكتر حاجة بكرها في الأيام شنو؟ أيام الأعياد والمناسبات عموماً، لأننا بنقى فيها زيّ الببغاوات بنعيد ونكرر نفس الكلام: "كل سنة وانت طيب .. وانت الصحة والسلام" أو كمان "البركة فيكم ... البركة في دين محمد" ورغم أهمية العزاءات والمناسبات السعيدة في حياتنا باعتبارها واحدة من نتاج تفاعلنا الطبيعي كبني آدمين؛ إلاّ إنو الكلام المكرر ببقى مسيخ!
حسي مناسبة الكلام ده شنو؟ إنو بجي أنا أقول ليك "مرحب بيكِ" وحتردي عليّ "تسلم وأشكرك على الترحيب" وحيفضل الكلام ده مدوّر لمن تزهجي زاتو. "أنا شخصياً بزهج من الكلام ده.
خلاص القول: أخير تبقي كوزة ولا شيوعية وعندك مبدأ ورأي واضح، بدل ما تكون كوزة ولا شيوعية، وخايفة من الإفصاح عن ماهيتك دي، قناعات الزول يا أماني (أياً كانت) ما المفروض حاجة تخجّل، ولو الزول بيخجل من قناعاتو، يبقى أخير ليهو راجعا لأنها أكيد ما بتمثلوا أبداً.
وزيّ ما في شابات وشباب قالوا ليك قبال كدة (شوتي ساي)، فأنا كمان بقول ليك نفس الكلام (أها شفتي الكلام المكرر ده كيف!) وما تهتمي لرأي أيّ زول، المهم تكوني إنت مقتنعة بالكلام ده زاتو، والأهم من ده إنو تكون عندك القدرة تدافعي عن قناعاتك، لأنو (كافي البلا) المكان ده فيهو ناس بيبلّعوك الكلام في خشمك، لمن تتوهمي زاتو.
حبابك يا زولة
Post: #140 Title: Re: عضوة جديدة .. خايفة من الكتابة Author: Amany Elamin Date: 01-31-2009, 01:11 PM Parent: #137
الأخ هشام ادم
كل سنه وانت طيب,, (وجه ضاحك)..
أكيد الخوف ما من الأفكار عدم القبول للاخر أصبح عاده اذا اختلف عما نؤمن به وطبعا الخوف من الفهم والتأويل الخاطئين