|
|
 الحزن عابر سبيل..... نص شعري
|
الحزن عابر سبيل
----------------
العمر …....
رحلة أسي
ومشوار عذاب
في بعدي عنك ،،
الزاد… قصيدة
عليها اسمك
وصورة منك ،،
………….
أنا والسفر
تومين وتر ،،
………..
ليل المرافي و المطار
ضجيج محطات القطار
هداني سأم الانتظار
انشّر في نبضي الخدر ،،
……………..
بين الجليد وكرسي الحديد
سكن الجفاف اعضاي
نشّفني السهر
………..
صحراي شوق
ليك يا مطر ،،
من وين اجيك
يا روحي شايلك ومشتهيك
من شوقي ليك
انا يا ضفاف
بخاف عليك
لو انكسر مني الشراع
وامتدّ في دنياي بحر
……………….
بين ليل وليل
سرق الحزن
زهر العمر
فضل القليل ،،،
أنا وانتي
والشوق والرحيل ،،
لو كان مصيرنا
نعيش ونحزن ..
خلي الحزن عابر سبيل
وامشي الفرح مشوار طويل
زي الشموع ….
ختي ابتسامتك في الدموع
كوني زي صبر النخيل
واقف بصارع في الرياح
رغم الاسي وساقو النحيل
ابقي متل النيل نبيل
شايل هموم كل العصور
بين الجبال
وسط التلال
شاقي الصخور
منساب جميل
لا كلّ يوم
لا قال حليل
زمني القبيل
…………
ما انتي أكبر من جراحك
للسلام مفرور جناحك
شايلة في عينيك سماحك
وفي ربيع قلبك صباحك
…………………
كل ما جال بيك خاطر
ليل حزين
أو ماضي غابر
شدي قلبي علي ضلوعك
دلي بين نهديك ساتر
عيشي افراحك تمني
دقي ايقاعك وغني
قولي باكر…….
يومي اخصر
وقابي ناضر
…………….
شوفي كيف ورد الخميل
باسم مثير
برشح عبير
رغم الهجير
وشح الغمام
في صيف بخيل
…………..
عمري بحلم يا صبية
أكتبك علي كل غنية
واحملك في كل دنية
وبيك افاخر….
لا محارب اجيك مغامر
لاني عاشق ليك اسامر
الا جواي بيك عامر
………………
انتي في دمي الملون
بي شموس صيفك
انتي في حلمي المتيم
بي جمال طيفك
معايا في روحي المشعتفة
بي سماح ريفك
……………
كم عيون من الحزن
فقدت بريقه وانطفت
كم سفن
قصدت شواطي الحزن
تاهت واختفت
كم غصون
مخضرة ناعمة
من الحزن
مالت علي الارض انكفت
………………..
انا وانتي والشوق والرحيل
لو كان مصيرنا نعيش ونحزن
خلي الحزن عابر سبيل
وامشي الفرح مشوار طويل
امشي الفرح مشوار طويل
|
|
 
|
|
|
|
awad hassan
فيس بوك
تويتر
انستقرام
يوتيوب
بنتيريست