يا إدارة مركز الطيب الهندي الثقافي ، مركزكم دة ثقـافي علـى شنو ؟ !!

إذا كنتم تعتبرون أن الموسيقى والغناء ليسوا ضمن النشاطات الثقافية !!

بمبادرة رائعة من قبل مجموعة من الشباب والطلاب الجامعيين بحلفاية الملوك عملنا لإحياء حفل تأبيني بذكرى الاستاذ مصطفى سيد احمد ، وقد قررنا أن يقام هذا التأبين بمركز الطيب الهندي الثقافي الكائن بحلفاية الملوك ، وذلك بحكم أنه المركز الثقافي الوحيد بالمنطقة .ذلك ظناً منا بأن إدارة مركز الطيب الهندي سترحب بالفكرة ، بل وكنّا نظن بانها ستدعمنا ايضا في إحياء هذه الذكرى .

سلام الصديق هشام
المعروف لدى الجميع هو إهتمام المراكز الثقافية بتبني مثل هذه البرامج ولكن !
الحصل شنو ؟ ممكن توضح لينا أكتر






تحياتي لك هشام
عبد الهادي ابراهيم

عبد الهادي ياصديق ..

Quote: الحصل شنو ؟ ممكن توضح لينا أكتر

الحصل إنو ادارة المركز وافقت لكن بشرط ..
والشرط هو إنو البرنامج دة ما يكون مصحوب بموسيقى ولا غناء !!
قمت انا إتصلت بأحد إداري المركز وقال لي : برنامجكم دة فيهو شنو ؟
قلت ليهو البرنامج دة فيهو كدا كدا كدا ..
معرض صور..
أشعار ..
وغناء ..
قال لي : نحن موافقين بس لكـن الغناء دة ما يكون ضمن البرنامج ..
سألت ليه ؟؟ : قالو : الغناء والموسيقى دي لا نعتبرهم ضمن النشاطات الثقافية ..
.........
اها الكلام دة مابزعل !!

Quote: قالو : الغناء والموسيقى دي لا نعتبره ضمن النشاطات الثقافية ..

أغرب مركز ثقافي أسمع بيهو ..
طيب العمل الثقافي عندهم شنو ؟
والجماعة ديل قاعدين يضيفوا ويقدموا للثقافة شنو عشان يلغو الغناء من قائمة الاعمال الثقافية







..........................................
أمبارح أقامت جمعية أصدقاء مصطفى سيد أحمد ليلة لإحياء الذكرى الثالثة عشر للأستاذ
وتخللت فقرات البرنامج غناء وعزف وغيرها ..
أها يا حبيب طيب إذا كان الغناء عندهم ما ثقافة طيب الرقص يكون شنو ؟

Quote: والجماعة ديل قاعدين يضيفوا ويقدموا للثقافة شنو عشان يلغو الغناء من قائمة الاعمال الثقافية

سئوالك دة في الصميم يا عبد الهادي ،
وانااتمنى لو في زول من المركز معانا هنا في المنبر عشان نقدر نعرف المركز دة بقدم شنو او قدم شنو للثقافة ..
واتمنى لو يجو يورونا كيف إنو الموسيقى والغناء بقت ما نشاطات ثقافية ؟

Quote: أمبارح أقامت جمعية أصدقاء مصطفى سيد أحمد ليلة لإحياء الذكرى الثالثة عشر للأستاذ وتخللت فقرات البرنامج غناء وعزف وغيرها ..

التحية لجمعية اصدقاء ومحبي مصطفى سيد احمد وهي تحي الذكرى الثالثة عشر للفنان الرائع مصطفى سيد احمد في احتفاليتهم البهية يوم أمس بنقابة المهن الموسيقية بأمدرمان والتحية لجميع من شارك في هذا الاحتفال الضخم
شعراء،
فنانين،
فرقة الراحل الموسيقية..
اصدقاء الراحل المقيم..
جمهور،
ولجميع من ساهم في إنجاح هذا الاحتفال لهم التحية بقدر ماقدموا وبقدر حبهم وعشقهم لهذا الفنان الوطن ..
..

Quote: والشرط هو إنو البرنامج دة ما يكون مصحوب بموسيقى ولا غناء !!

الاخ الكريم هشام

خاربوا هذه العقلية وزاحموها ولا تتركوا لها فرصة أن تتفرد بالأمر وتسيطر وتعيدكم الي عهود من الظلام قميئة ...

كل التحية لك وللشباب وأنتم تحاولون نثر هذا العبق الجميل للاستاذ مصطفي سيد أحمد .. ولا تستيئسوا وواصلوا مثل هذه المبادرات ولا تهتموا كثيرا لعترات (وشنكلات) أصحاب الاغراض .

مؤيد ياصديق ..
تحياتي لكـ ..
وفي كل المراكز الثقافية في العالم وجميع مراكزنا الثقافية في السودان معروف لدينا ان هذه المراكز تعمل في اطار منسق لخلق مناخ إبداعي بمختلف النشاطات وبما فيها النشاطات الموسيقية والغنائية بشكل كبير وذلك لإنشاء مركزاً حضارياً و نقطة ارتكاز لنشر التحضر و الفكر المتنوّر و الثقافة الراقية في المنطقة ، وهذا ما لم أجده في مركز الطيب الهندي الثقافي .. وبحديث إدارة المركز هذا بخصوص النشاط الموسيقي تتحول أهداف المركز الى اهداف ظلامية ومتحجرة ياصديقي.

هشام الطيب



تحياتي...


مركز الطيب الهندي الثقافي هي مؤسسه مملوكة لأشخاص (ليست ملكا عاما") ومن حق هاؤلاء الاشخاص ان يختاروا ويتخيروا الانشطه التي يرونها












...

Quote: اها الكلام دة مابزعل !!

والله بزعل يا هشام








خيرة في غيرة
البلد بقت عاملة كدة

حاتم ياصديقي .. مساءك جميل ..
تعرف الحاجة البتزعل أكتر إنو المركز دة ياريت لو كانو عندو أنشطة ثقافية تانية من دون الموسيقى والغناء ..
فهم كما قالوا لا يتعتبرونها أنشطة ثقافية أصلاً . !!!
شوف الكلام العجيب دة كيف .. !!
الانشطة الثقافية البعرفها أنا وإنت مافي في المركز دة ياحبيب .. !!

Quote: ومن حق هاؤلاء الاشخاص ان يختاروا ويتخيروا الانشطه التي يرونها

حذيفة سلامات وتحيات ..
الكلام القلتو دة كلام خطيير .. وح نعود نتكلم عنو تاني وأكتر وبالتفصيل ؟
لأنو مافي حاجة اسمها مملوكة لاشخاص .. تعبيرك خطأ كبير ..
بعدين تعال هم ماعندهم أنشطة أصلاً في المركز دة ..
أو انشطتهم محدودة في إطار ضيق جداً ..
يوم واحد ماسمعنا بي برنامج ثقافي أو عمل ثقافي مميز في المركز دة .. ؟
لكن كنّا بنسمع بدورات تدريس الكمبيوتر ودروس لطلاب الثانوي .. واشياء من هذا القبيل ..
انا ما معترض إطلاقا على قيام مثل هذه الانشطة التعليمية لكن ارى إنو دة ما مكانة لأنه التعليم دة عندو مدارس ومؤسسات والمركز دة اسمو مركز ثقافي .. يعني مفروض تكون فيهو أنشطة ثقافية ..؟؟
والانشطة الثقافية دي كتييييرة وكتيرة جداً ياحبيب وفيها الموسيقى والغناء ديل اشياء ثابتة والأدب بكل أنواعه الشعر القصص النثر الفهم... اي حاجة
إذا كانت نشاطات مركز الهندي بهذا الشكل يجب على إدارة المركز تغيير إسم هذه المؤسسة لإسم يلائمها ويلائم نشاطتها ، كموسسة الطيب الهندي التعليمية ، مؤسسة الطيب الهندي للدروس والحصص التركيزية او ماشابه ذلك ..
وح نتكلم أكثر ..

ح نواصل ...

حذف للتكرار

سلام يا هشام
وتحياتي
لي سابق معرفة بالاخ عبدالعزيز الطيب الهعندي
حيث ساعدته مع مجموعة طيبة من الشباب بتأسيس جريدة ظلال
وكنت احد كتابها في تلك الفترة
ونحجت الجريدة بشكل منقطع النظير
ونافست صحف عندها دور ومكاتب رغم انو ظلال كانت تحرر من تحت شجرة
واسألوا عبدالعزيز البطل الشريك الثاني
وكان عبدالعزيز الهندي مدير الادارة القومية للتدريب في ذلك الوقت
وحسب معرفتي به فهو رجل متفهم لكثير من الامور الثقافية
لكنه متحفظ بعض الشئ وقد يعود هذا لطبيعة المنطقة والتربية
ان ارادوه مسيد او مركز ديني فالتكن اللافتة واضحة
مركز ديني الطيب الهندي
اما مركز ثقافي فعليهم تقبل الغناء والموسيقى والرقص
ابتداء من العاجكو وانتهاء بشبه القمرا

Quote: لكن كنّا بنسمع بدورات تدريس الكمبيوتر ودروس لطلاب الثانوي .. واشياء من هذا القبيل ..

هشام الطيب
صباح الخير
تعرف يا صديق بالعبارة دي ذكرتني حاجات كتيرة
حصلت زمان ، ونحن ما بعيدين منها تماما ، أقصد ما
بعيدين عن مركز الهدف الذي نتحدث عنه ( مركز الطيب الهندي )
صدقاً لكلامك بتتذكر لما كنا بنبحث عن معرض تراث ومعرض تشيكلي
لكي نشارك به في فعاليات كلية الصيدلة ومشينا لذات المركز عسى ولعل
نجد ضالتنا هناك ..
ماذا حدث ؟
المرة الأولى وجدنا المركز مغلق تماماً ، ولولا اللافته الموجودة على الحيطة
الجميلة ذات اللون الأصفر الجميل لما عرفت أنه مركز ثقافي ، نسبةً للهدؤ التام
الذي يعم المكان حوله والبيوت السكنية المتاخمة للمبنى يخيل إليك أنه عبارة عن
بيت سكني لا غير ..
دي واحدة .. يعني مركز ثقافي مغلق من قبل صلاة العشاء يا ترى ما هو القت الذي
يقيمون فيه فعالياتهم الثقافية ؟؟

ذهبنا في المرة الثانية في وقت مبكر شوية .. العصر ..
وفي هذه المرة وجدنا المركز مفتوحاً وبه شخص واحد ( على ما أعتقد
استاذ كمبيوتر ) سألناه عن إدارة المركز .. وممكن نلقاهم متين ؟
قال والله ما عارف أنا أستاذ فقط لكن ممكن أديكم تلفون ( ...) وفعلاً
إتصلنا تلفونيا ً بالمعني (...) وسرعان ما جاء إلينا ..
ولكننا تفاجأنا عندما قال طلبكم دة ما موجود عندنا لكن بدلكم على
الاستاذة لميس الفنانة التشكيلية المعروفة والمتعاونه معهم بالمركز
فلها جزيل الشكر على ما قدمته لنا من خدمة عجز مركز ثقافي كامل عن
تقديمها لنا ..


طيب يا هشام عايز اقول شنو :
إذا كان مركز ثقافي بي حالو لا يمتلك أدوات أساسية لإقامة معرض ثقافي
ولا يعترف بالغناء كجزء لا يتجزأ من الفن الاصيل ..
فماذا يقدم إذن للثقافة ؟؟



ملحوظة :
الدروس الخصوصية التي يقدمها المركز يمكن إعتبارها عمل تثقيفي
ولكن حتى هذه لا تقدم في شكل خدمات مجانية




مع تحياتي وشكري
عبد الهادي ابراهيم

اولا سلامات
ثم ثانيا انا بتفق مع خالد العبيد
في انه من المفترض تسميته مركز ديني الطيب الهندي
وليس مركزثقافي



خالص الود

سلامات ياياسر ياحبيب ..
وانا من هنا بناشدإدارة المركز بتغيير إسم المركز بما يناسب نشاطاتها ..
وذلك حتى لا تختلط علينا النشاطات الثقافية بالامور الاخرى ..

Quote: بتتذكر لما كنا بنبحث عن معرض تراث ومعرض تشيكلي ، لكي نشارك به في فعاليات كلية الصيدلة ومشينا لذات المركز

تعرف ياعبد الهادي من اليوم داك أنا كان عندي راي في المركز دة ،
خصوصاً لما لقينا المركز دة مغلق وإتضح لينا بعد داك إنو
ما عندهم أي فعاليات ثقافية سوى دروس تقوية لطلاب الشهادة الثانوية ،
ودروس كمبيوتر وأشياء من هذا القبيل ..




---
ح نتكلم أكتر بس اليومين دي مشغولين حبة ..

خالد العبيد .. سلامات ياحبيب
اشكرك في البداية على المداخلة والكلام الصارم الكتبتو ..

Quote: اما مركز ثقافي فعليهم تقبل الغناء والموسيقى والرقص ابتداء من العاجكو وانتهاء بشبه القمرا

تعرف الرقص دة مرحلة متأخرة جداً في المركز دة ..
وأكيد ح يكون عندهم ممنوع وحرام ..
لكن طالما إنو في لافتة مكتوب فيها مركز ثقافي فيجب أن يتضمن هذا المركز جميع النشاط الثقافية
وإلا أن تقوم إدارة المركز بتغيير اسم هذا المركز الى اي اسم يناسبه حسب نشاطه ..
فالنشاطات التي تمارس بهذا المركز الان ليست ثقافية ابدا..

على إدارة المركز تغيير اسم هذا المركز من مركز الطيب الهندي الثقافي الى اي اسم يناسبه حسب نشاطاته